رواية تيمو الفصل العشرون 20 - بقلم ولاء فتحي

ايه الكلام دا. لاء مستحيل يحصل طبعًا. وانتي رأيك إيه؟ مايا: يا بابا أنا بكلم حضرتك لأن متعودتش أخبي عليك. علاء: وهو شفتيه فين؟ مايا: هو اتصل بيا وبكل أدب وزوق قالي لو انتي مش مرتبطة ممكن تفكري، ولو مش موافقة مش هشوفه تاني. وبصراحة أنا بفكر. علاء: يا بنتي إحنا منعرفش عنه حاجة خالص، حتى لما حاولت أجمع عنه معلومات معرفتش. واضح إنه كان بره مصر. ومعرفش مين أهله. مايا: أنا شفت مامته وأخته. ناس شيك وزوق أوي.

علاء: شفتيهم فين وامتي؟ مايا: امبارح شريف شومان خطب ملك. وكانت تيمو وأخته ومامته معاه. وأخته خطيبة دكتور باسل أخو شريف. وغالبًا مامته خالتهم. بدأ علاء يطمئن قليلًا، ولكنه برضو مازال غير مقتنع. علاء: طيب أنا راجع كمان كام يوم. متتصرفيش أي تصرف إلا لما نقعد مع بعض. مايا: يا حبيبي أنا أول حاجة عملتها حكيت لك. إحنا أصحاب قبل أي حاجة. وبصراحة هو شخص ممتاز. متنساش إنه دافع عني وكمان جابلي حقي.

علاء: معلش أنا هقفل. عندي اجتماع مهم وهنكمل كلام لما أخلص. ..................................... تميم: يا بني انت وهو كبرتوا الموضوع أوي. أنا كويس. شريف: لما تقعد في البيت ومتنزلش الشغل يبقي الموضوع كبير. باسل: اللي حصل دا إجهاد طبيعي لأن انت من يوم الحادثة مريحتش نفسك. وأكيد منتظمتش على الأدوية. تميم: حادثة إيه؟ دا موضوع قديم يا حبيبي. انت الظاهر مشكوك في شهادتك.

باسل: يا حبيبي انت بتجهد نفسك جامد جدًا وواضح إنك مش بتنام كويس. شريف: تكونش بتحب؟ أيوا انت بتحب. تميم مسك الفازة جنبه وهوشهم بيها: يلا يلا انت وهو اطلعوا بره. دي آخرة اللي يقعد مع عيال. عملوا نفسهم خايفين وبيجروا وضحكوا جميعًا. سعاد فتحت الباب بسعادة: يلا يا ولاد علشان نتغدا سوا. ووقفت تتمعن النظر فيهم بسعادة وحب. باسل: لا يا سوسو أنا مش ممكن آكل من غير ميسو. دي كانت تاكلني. ميسون: مين جايب سيرتي إن شاء الله؟

تميم: جتلك اللي هتربيك أهي. أختي وعارفها. ميسون بتمثيل الزعل: كدا برضو يا تيمو تقول كدا على ميسو حبيبتك. قام تميم احتضنها بقوة وقبل شعرها: وأنا أقدر دا. انتي حبيبتي وأختي وبنتي وحياتي كلها. باسل: إيدك يا أخ عن مراتي كدا لو سمحت. أحكم تميم يده حول أخته وهو يمثل الغضب على باسل: اجري يا ابني. معندناش بنات للجواز. قال مراتك قال. هو أنا أفرط في القمر دا بالساهل كدا. ونظر لأخته بحنان واضح: ولا إيه رأيك يا قلب أخوكي؟ ميسون:

تنظر ل باسل بغيظ: اللي تشوفه يا قلب أختك. شريف: الحمد لله أنا فلّت منكم. وضحكوا جميعًا وسط جو أخوي وسعاد طايرة من الفرح. سعاد: طيب يا قلب سعاد منك ليه ليها. يلا أنا عاملة الأكل بإيدي. باسل: حيث كدا بقى أنا أول واحد نازل. ميسون: الأول كله يدخل يغسل إيده يا دكتور. باسل: حاضر يا عيون الدكتور. ميسون: تسلم لي. تميم بحزم: إيه دا انتوا نسيتوا أنا واقف؟ وسحب أخته وحملها ونزل مسرعًا: يلا يا ميسو.

وباسل يجري خلفه: هات مراتي يا ابني. وشريف يجري خلفهم ويضحكوا. وجد من تجلس تحت وهي تضحك وتدعي ربنا يسعد قلوبكم يا زرعة عمري. كلهم بسعادة وجروا عليها: نانو وحشتينا يا نانو. احتضنتهم وقالت لهم: انتوا اللي وحشتوني يا قلب نانو من جوا. ياااه ربنا ما يحرمني من لمتكم. سعاد من خلفهم: ما قولت لك يا ماما اقعدي بقى معانا. بتوحشينا جدًا. تميم: يا ريت يا نانو تقعدي معانا بجد. والكل من خلفه: آه والنبي والنبي.

ليجدوا من يدخل من الباب: هي هتيجي تقعد معايا أنا. تونسني. الولاد بسعادة: بيلا. بيلا: لاء كدا بقى إحنا نعتبره عيد. بيلا: العيد اللي بجد لما تفرح قلبي وتريح جدا يا تميم. تميم: قريب إن شاء الله يا بيلا. سعاد: بجد يا تميم؟ هي مين؟ ونروح لها إمتى؟ تميم: أنا جوعت يا سوسو ووحشني أكلك. سعاد: تعالوا يلا دا يوم عيد. إننا نتلم وماما وخالتو. ربنا يرجع عمي وأختي بالسلامة يارب. ...........................

ملك: اتفضل بابا مستنيك جوا. شريف: وحشتيني. ملك: احترم نفسك. شريف: هو أنا بشتمك؟ عمومًا حقك برضه. ما انتي قمر يا ملوكتي. ملك: أيوه يا بابي دا أستاذ شريف. شريف: ينفع برضه يا عمي بنتك دي واللي بتقوله. بابا ملك: بيضحك. أهلاً يا شريف. معلش استحملها بقى. ملك ملهاش في الكلام أوي. شريف: دا أنا أستحملها العمر كله. بس حضرتك وصيها عليا. عاوز أتكلم معاها.

بابا ملك: وماله يا ابني. أي وقت تشرف بيتك ومكانك. تعالي يا ملك اقعدي مع خطيبك. ملك: حاضر يا بابي. قعدت. بابا ملك: أنا هقوم أنا أعمل تليفون. شريف: براحتك يا عمي خالص. ملك: هتسيبني لوحدي؟ الأب: كلنا هنا معاكي في البيت. وبعدين شريف خطيبك. شريف: قولها يا عمي الله يخليك. وانصرف الأب وهما قاعدين في مكان مفتوح. ملك: ها عاوز إيه؟ شريف: عاوز إيه؟ في آنسة رقيقة تقول لخطيبها راجل وسيم وكاريزما زيي كدا؟ عاوز إيه؟ ملك: كاريزما؟

ههههههههههههه مين بقى ضحك عليك وقال لك كدا؟ شريف: أعدهالك من أول إيه ولا إيه؟ ملك: بغيظ: إيه؟ مين دي إن شاء الله؟ شريف بجدية: اقعدي يا ملك. عاوز أتكلم معاكي. ملك: اتفضل. اتكلم. شريف أخرج من جيبه علبة فيها سلسلة رقيقة. ونظر إلى ملك: دي هدية أول زيارة. ملك: شكراً. اتفقنا نتكلم. شريف: خدي البسيها طيب. ولا اتفرجي عليها وهنتكلم. ورانا إيه غير إننا نتكلم. ملك: مش تيمو اتقدم لمايا؟ شريف: بجد؟ توقعت كدا.

ملك: بس هو غامض أوي بصراحة. منعرفش عنه حاجة. شريف: هو مبيحبش حد يعرف عنه أكتر من اللي هو عاوز يعرفهوله. ملك: واضح إنك تعرفه كويس. شريف: أعرفه أكتر من نفسي. وعمرها ما هتندم. ملك: بس ممكن أونكل علاء يعصلج. شريف بحيرة: ليه؟ فين المشكلة؟ وتذكر أن تميم يرفض الإفصاح عن هويته. على فكرة دا ابن خالتي. وأنا مش جاي أحكي عنه. هو يحكي عن نفسه. وأنا جاي أحكي عن نفسي. ملك: احكي. سمعاك.

شريف: لاء. أنا عاوز أسمعك الأول. طلباتك. أحلامك. طموحاتك. ملك: انت قلت في كلام انت هتقوله. أنا سمعاك. شريف. .............................................................. ميسون: بجد يا تيمو قريب هنفرح بيك. تميم: إن شاء الله. منتظر بس ردها. ميسون: هو في واحدة في مصر كلها ترفض تميم شومان؟ رئيس مجلس إدارة إمبراطورية شومان والرجل الحديدي.

تميم: أيوه. ممكن يا ميسو. لأنها متعرفش غير إني تيمو شيف في مطعم. وأحيانًا ويتر ومهندس بالشهادة. ميسون: إيه؟ انت بتهزر طبعًا. ليه يا تميم تعمل كدا؟ تميم: لأني عاوز إنسانة تحب تميم الإنسان. تميم في أي ظرف وأي وضع. تميم بس. اللي هتوافق على تميم شومان الرجل الحديدي هتتجوز الشركات والفلوس. مش أنا. ميسون: وانت تميم إنسان رائع. لو مكنتش أخويا كنت أتمنى إنسان زيك. راجل محترم، متدين، مهذب، ناجح، وسيم، رياضي.

تميم: وعصبي وبارد زي ما بتقولي. المميزات. قولي العيوب. ميسون: مشكلتك إن مشاعرك مش بتبينها بالايجاب أو السلب. مشاعرك مخبيها. تميم: الله. بنوتي كبرت وبتحلل شخصية أخوها اللي رباها. ميسون: أمّال طبعًا. دا أنا قريب هكون زوجة وأم. تميم: دا أنا هطلع عين الواد باسل دا. ميسون بخضة: ليه؟ عمل إيه؟ تميم: معملش احتياطي أحسن يزعلكم. ميسون: باسل طيب أوي وحنين يا تيمو. صحيح هو مش رياضي ولا كاريزما زيك. بس هو إنسان أوي.

تميم: الله الله. لاحظي إني أخوكي الكبير يا قطتي. ميسو: أخويا وأبويا وصديقي وكل حاجة. بموت فيك. وهتعترف مين دي؟ تميم: بص في الساعة. أنا همشي. عندي معاد. ميسون: باسل قال إنك محتاج راحة يومين يا تيمو. عشان خاطري ارتاح شوية. تميم: طيب. يلا روحي ذاكري. لو مجبتيش امتياز زي كل سنة هنعيد السنة ومفيش جواز. ميسون: وعلي إيه. قلبك أبيض. أنا رايحة أهو. بس روح اقعد مع نانو وبيلا شوية. انت وحشتهم.

ذهب تميم للسلام عليهم وأخذ دراجته البخارية. سعاد: انت خارج يا حبيبي؟ تميم: مش هتأخر. سعاد: ريح قلبي وخد عربيتك. مصر غير بره. أنا بقلق عليك. ولا خد حراسة. تميم: متقلقيش عليا. أنا بحب أكون حر. سعاد: طيب قلل من ركوب البتاع دا عشان خاطري. تميم: خلاص. أوعدك إني هقلل منه. بس ممكن أخرج؟ محتاج أشم هوا. سعاد: طيب يا حبيبي ترجع بالسلامة ومتتأخرش. ........................... شريف: الو يا سيد. انت عارف إني عند خطيبتي.

سيد: شريف. الموضوع خطير. ومش عارف أتصرف في أي اتجاه. شريف: خير. في إيه؟ سيد: دكتورة مايا في خطر. شريف: مش عارف تتصرف إزاي؟ احميها بأي شكل. ومتبلغش تميم لأنه تعبان. سيد: دكتورة مايا في حكم خطيبته تميم. بس الموضوع دا سر. وعلى أساسه أتصرف. سيد: علم. عن إذنك. شريف: تابع معايا الموضوع دا. وأنا هجيلك حالا. سيد: خلاص تمام. أنا هروح بنفسي ليهم عند شركتها. شريف: وأنا جاي لك. .............................

شريف دخل واخد مفاتيحه. شريف: أنا مضطر أمشي. عندي شغل مهم. ملك: إحنا متعشيناش. شريف: معلش مرة تانية. موضوع لا يحتمل التأجيل. ملك: طيب استني هقول ل بابي. شريف: أنا هتصل بيه. ........................... ملك بتعيط. بابا ملك: إيه يا حبيبتي؟ مالك بتعيطي ليه؟ وفين شريف؟ ملك: مشي. الأب: انتوا زعلتوا مع بعض ولا إيه؟ ملك: جاله تليفون وخرج مشي وقال شغل مهم.

الأب: انتي لازم تتعودي على نظامه. هو صحيح شاب صغير بس رجل أعمال له اسمه ووضعه في السوق. شغله صعب ومتعب. وهتلاقي نومه قليل وسفره كتير. ملك: وأنا؟ إيه بقى هيتجوزني ليه؟ علشان يركني لوقت فراغه؟ الأب: انتي الراحة والأمان له يا ملك. زي أمك كدا. عمري ما حسيت غير بيها جنبي بتشجعني. ملك: بس حضرتك مكنتش بتسبها كدا. الأب: مين قالك؟

ياااه دي اتحملت كتير. عشان كدا كنت مابصدق أفضي نفسي وقت ليها أعوضها عن تعبها معايا. الحياة مش دلع وفسح. الحياة ميكس حلو وحادق. ياريت تكوني فهماني. وتبدأي تقربي من خطيبك وتفهميه. الولد ابن أصول ومتربي. ملك: حاضر يا بابي. اللي تشوفه. ........................... المجهول: أيوه يا باشا. هي خرجت من الشركة ومتأخرة. وأغلب موظفين مشيوا. يعني الشارع فاضي. بس معاها حراسة. وفي عربية بتراقبها من بعيد.

خال رائف: اتشقلب وهاتها. لازم تسافر ل رائف. مش أنا اللي ابن اختي يتعلم عليه من واحدة ست. المجهول: حاضر يا باشا. 48 ساعة وتكون معاه. خال رائف: انهارده تكون معاه. وإلا. المجهول: أوامرك يا باشا. ........................... ذهب تميم إلى مكانه على النيل الخالي من الناس وجلس بمفرده يفكر. هل فعلًا هو معجب بمايا؟ أم أنها مجرد تلبية لرغبة جده الذي مرض مرضًا شديدًا ويحتاج لمن يطيعه؟ فهو في وضع لا يحتمل نقاش أو رفض.

وفتح هاتفه وظل يتصفح ذكرياته مع شين وهو يردد: سامحيني يا شين. سامحيني. مش هعرف أعيش على ذكراكِ. وفجأة. ........................... خرجت مايا من الشركة وهي تسير. وجدت سيارة الحرس خلفها وسيارة أخرى. تنهدت: برضو يا بابا؟ ماشي حراسة ورايا. هو أنا عيلة صغيرة؟ طيب أطلب ملك؟ لاء خطيبها عندها. ربنا يسعدها. أكلمها بالليل بقى. أكيد هتخلص وتيجي. وبدأت تفكر في عرض تميم وموقف والدها. وبداخلها محتاجة أتكلم معاه.

فجأة كسرت سيارة على الحرس وأطلقت نار على إطار سيارتهم. الحرس بسرعة أطلقوا نار عليهم. ولكن كان الطرف الآخر أسرع. وسيارة سيد خلفهم ومعه رجاله. بدأ يسرع ويترك لحراسه النوبي والمتطفل الفرصة لاستكمال معركتهم. وعينه على سيارة مايا. سيد: أيوه يا شريف. سبتهم يضربوا في بعض. وأنا بحاول ألحق مايا. معرفش هي بطئت ليه. شريف: خلي بالك منها. أنا. الدنيا زحمة مش عارف أوصل لك. سيد: برقبتي. شريف: حصلها وخدها بسرعة. سيد: علم.

شريف: مش عاوزها تعرف عن تميم حاجة. سيد: بس هي شافتني معاه في المخزن. شريف: لو سألتك عن حاجة. قوليها اسألي تيمو. سيد: طيب. اقفل. معلش. وفجأة كسر سيد على سيارة مايا اللي جانب الطريق. ارتبكت مايا ووقفت. ولحقهم سيارة المجهول. نزل سيد بسرعة. مايا: انت مين وعاوز إيه؟ سيد: من فضلك مفيش وقت. حياتك في خطر. انزلي بسرعة. بدأ المجهول يطلق النار عليهم وسط صراخ مايا.

سيد: افتحي بسرعة يا دكتورة واتنقلي على الكرسي التاني. مفيش وقت. أنا من طرف تيمو. مايا: بسرعة. صرخت وفتحت الباب. زقها سيد وانطلق بسيارتها وسط صراخها. ورجاله نجحوا في إلهاء المجهول لحين انصرافه. سيد: اهدي يا دكتورة متخافيش. وانزلي في الكرسي تحتي. امسكت تليفونها تحاول الاتصال بوالدها. لكن خارج نطاق الخدمة. ومن سرعة السيارة وقع تليفونها. تحاول التقاطه. وفجأة.