رواية تزوجت ارمل الفصل التاسع 9 - بقلم هاجر عمر

بصوا لبعض بمكر ورجعوا بصولها. "حاضر يا تيتة." هاجر دخلتهم أوضتها يلعبوا فيها لحد ما يخلصوا تحضير الغدا. في المطبخ. بصتلها بحنان. "عاملة إيه يا حبيبتي مع جوزك؟ ابتسمت بحب. "الحمد لله يا ماما كويسين." مسكت إيدها بهدوء.

"ما تزعليش مني يا هاجر إن كنت جرحتك بكلمة من غير ما أقصد أو زعلتك، بس والله يا بنتي من خوفي عليكي كنت عايزة أسلمك لراجل يحبك ويرعى ربنا فيكي. وشوفت في مؤيد الراجل ده. لما شوفت لمعة الحب اللي في عينه وهو بيتكلم عنك، شوفت واحد مراهق لأول مرة يحب. لهفته لما يسمع اسمك. صدقيني مؤيد بيحبك وهيصونك ويحافظ عليكي، إنتي غالية عنده أوي." قاطعتها بابتسامة وفرحة. "أنا عارفة يا ماما، ده كله ومؤيد قالي وأنا واثقة فيه."

"طب طمنيني، ولاده عاملين معاكي إيه؟ اتنهدت تنهيدة طويلة وحاولت ترسم ابتسامة على وشها. "كويسين يا ماما، هما صحيح أشقيا شوية ربنا يهديهم." طبطبت على كتفها. "اكسبييهم يا حبيبتي، خديهم من صفك، اسقيهم حنية واهتمام، مش هيتغيروا في ساعتها، بس حاولي تفضلي تسقيهم لحد ما يشبعوا ويبادلوكي الحنية. بلاش القسوة." اتنهدت بقلة حيلة.

"قسوة إيه يا ماما، أنا طول عمري أسمع عن مرات الأب المفترية اللي مبهدلة ولاد جوزها، لكن أول مرة أشوف العكس." ختمت كلامها بضحكة. ضحكت وقربت منها. "معلش يا حبيبتي، مش سهل عليهم بردو يكون ليهم مرات أب، هيخافوا تاخدي أبوهم منهم وتلاقي جدتهم بتلعب في دماغهم بالكلام ده. ودول مهما إن كان عيال، كلمة تجيبهم وكلمة توديهم، فاعذريهم وخليكي طويلة البال وخديهم بالمدادية. وما تنسيش الحنية يا بنتي، بتلين الحجر." ابتسمت براحة.

"حاضر يا ماما، أنا وعدت مؤيد إنهم في عيوني وهحاول معاهم." فجأة سمعوا صوت دَب جامد وكسر، جريوا على الأوضة لقوا سجدة واقعة على الأرض وبتعيط وهي ماسكة إيدها، ويامن ويزن واقفين مش عارفين يعملوا إيه. جريت هاجر عليها وفضلت تطبطب عليها. "مالك يا حبيبتي، إيه اللي حصل؟ يزن وهو بيعيط. "كنا بنلعب وهي واقفة على السرير، زقيناها، وقعت." هاجر بصتلها بخوف وبصت لإيدها، لقيتها ورمت وازرقّت. شالتها بسرعة.

"ماما أنا رايحة المستشفى، خلي بالك من يامن ويزن على ما أرجع." "ابقى طمنيني يا بنتي، يجيب العواقب سليمة يا رب." هاجر راحت المستشفى ودموعها على خدها وسجدة في حضنها. دخلت أوضة الكشف وعملوا أشعة وطلع عندها كسر. اتصلت بمؤيد. "وحشتيني." "مؤيد." عقد حواجبه باستغراب. "مالك يا هاجر بتعيطي ليه؟ "سجدة وقعت على إيدها وإحنا في المستشفى، هتجبس إيدها." "طب اهدى يا حبيبتي، أنا جايلك دلوقتي."

قفل معاها واستأذن من الشغل وراح على المستشفى. شافها من بعيد، راح عليها بلهفة. "هاجر." كانت بتعيط، أول ما شافتُه اترمت في حضنه. "أنا آسفة يا مؤيد، ما كنتش قد ثقتك فيا." مسح دموعها وبهديها. "اهدّي بس، إيه اللي حصل؟ حاولت تتكلم من بين دموعها. "أنا كنت مع ماما بنحضر الغدا، وفجأة سمعت صوت دب، جريت على الأوضة لقيتها واقعة على الأرض، ويامن ويزن قالوا إنها وقعت من على السرير." رجعت تبكي تاني. "آسفة والله يا مؤيد." قاطعها.

"يا حبيبتي ما تعتذريش، إنتي مالكيش ذنب، قدر الله وما شاء فعل." هزت راسها بنفي. "لأ، أنا كان لازم آخد بالي منها أكتر من كده." خدها في حضنه وطبطب على راسها. "الحمد لله على كل حال، وكويس إنها جت على قد كده. هي فين سجدة دلوقتي؟ اتعدلت من حضنه ومسحت دموعها. "بيجبسوا إيدها جوه." "طيب اهدّي بقى كده وبطلي عياط." داعب أنفها. "وإنتي بقيتي شبه الطماطماية كده بمناخيرك دي. اضحكي يا نكدية."

ضحكت على طريقة كلامه ومسحت دموعها، وفضلوا مستنين سجدة. ما عداش كتير وخرجت وهي بتعيط، وأول ما شافت مؤيد جريت عليه. "بابا." مؤيد مايل بجسمه وهو فاتح إيديه يستقبلها، شالها ورفعها في حضنه. "حبيبة بابا وعقل بابا." دموعها في عينيها بتوريه إيدها المكسورة بطفولة. "شفت يا بابا إيدي حصل فيها إيه؟ اتكلم بحنان بالغ وطفولة. "أوه يا روح بابا، ألف سلامة يا روحي." باسها من خدودها. "بكرة تروق وتقومي بالسلامة."

هاجر قربت منها وبتحسس عليها بلهفة تطمن. "حبيبتي، فيه حاجة بتوجعك؟ شاورت على إيدها بطفولة ومكر. "إيدي يا طنط." هاجر بزعل. "يا روحي، شوية وهجيبلك الدوا وتاخديه هتخفي على طول." اتكلمت بطفولة ظاهرة وتفكير ثعباني مخفي. "بابا أنا عايزة إندومي." مؤيد بضيق ظاهر وهو شايلها. "إندومي إيه بس يا سجدة، مش قولنا بيجيب أمراض ووحش ومش هيخليكي تكبري بسرعة؟ سجدة بتمثل الزعل وبتلعب على أوتار مؤيد وحبه ليها.

"بلييييز يا بابا عشان خاطري، أنا تعبانة ونفسي فيه، يرضيك تزعل سجدة حبيبتك؟ بصت لهاجر ببراءة مصطنعة. "قوليله يا طنط يجيبلي إندومي." هاجر بصتلها بتعاطف وبصتله بوجه الجرو الصغير لما يحتاج حاجة من صاحبه. "ما تبصوش ليا كده." نفخ. "حاضر هجيب و أمري لله." بص لسجدة بتحذير. "بس دي آخر مرة." سجدة بفرحة. "يعيش بابا، يعيش." مؤيد ضحك على أفعالها الطفولية. "آه منك يا عفريتة، يلا بينا."