رواية تزوجت صعيدي الفصل الرابع والعشرون 24 - بقلم أميرة جمال

تعالى يابنتي. ليه بيحصل معايا كده يا جدتي؟ كله خير، ربنا مش بيختار لنا حاجة وحشة أبداً. طلعت طول السنين دي عايشة في كدبة، وأهلي مش أهلي أصلاً، وكمان اتجوزت وأنا ما اعرفش. اتجوزتِ زين الرجال، مش الفكرة في سليم، المشكلة في كل اللي بيحصلي. إيه اللي بيحصلك يانور؟ ها؟

كل حاجة حلوة. عرفتي إن أهلك مش مهم الحقيقيين، لكن ربنا رِضاكي في نفس الوقت، وعرفتي أهلك وطلع لكِ عيلة كبيرة، وإنتي زينة البنات وألف مين يتمناكِ، والبشمهندس أحمد جوزك لراجل لو لفيتي الدنيا كلها مش هتلاقي واحد زيه في أخلاقه ورجولته وغيرته على مراته. ده بنات البلد كلها هيموتوا عليه. نور بغضب خفيف: والبه طبعاً فرحان باللمة دي. فاطمة بخبث: يعني مش أوي، مش مهتم بيه؟ نور: لا، كان اهتم إيه اللي مانعه؟

فاطمة: مش عارفة، حاسة كده اليومين دول إنه بيحب، بس مش عارفة مين، ومش متأكدة برضه. نور بعصبية: كده يبقى خاين. فاطمة: خاين ليه؟ نور: لأنه جوزي. فاطمة بابتسامة: كويس إنكِ عارفة إنه جوزك، خلي بالك منه بقى. نور محاولة تغيير الكلام: إيه اللي بين سليم وحسام؟ بحسهم مش طايقين بعض. فاطمة بتنهيدة: ماضي يابنتي، ممكن يبقى سليم يحكيهولك لو كان حابب. نور: تمام، هروح أرتاح في أوضتي. فاطمة: ماشي يابنتي، ربنا يريح قلبك وبالك.

نور بتنهيدة: يارب. وخرجت على أوضتها. *** إيه يانور؟ اتأخرتي أوي. كنت مع جدتي ياملك. أنا عارفة اللي حصل لك مش قليل. مش عارفة إيه اللي هيحصلي تاني. كل خير ياحبيبتي، وبعدين ماننكرش الحلو اللي في الحكاية. وغمزتلها. نور: إيه الحلو بقى يا أستاذ ملك؟ ملك: سليم مثلاً يعني. نور ابتسمت تلقائي، بس أخفت الابتسامة بسرعة: ماله يعني سليم؟ ملك برفعة حاجب: ماله سليم؟ ده الحب كله. نور: إنتي اتجننتي ياملك؟ أنا أحب سليم؟

ملك باستغراب: ماله سليم بقى؟ بشمهندس وزي القمر وألف واحدة تتمناه. نور بجدية: وأنا مش هكون من الألف دول. ودخلت الحمام تاخد دش.

سليم كان بيسمع الكلام بصدمة. هو كان طالع يطمن على نور بعد اللي حصل، وبعد اللي سمعه كان هيفركش الجوازة كلها، لكن افتكر كلام آدم وإنه يقدر يخلي نور تعترف بحبها ليه. ولأنه عارف إنها عنيدة، كان متأكد إن الموضوع مش هيكون سهل. ابتسم وهو بيتوعد لنور وإنه هيندمها على كلامه ده، وهتكون فعلاً من الألف دول. وكمل طريقه لأوضته.

نور كانت ساندة على باب الحمام، إيدها على قلبها بتحاول تهدّي نفسها من كمية المشاعر اللي بتجتاحها من مجرد ذكر اسم سليم وكلام ملك إنها بتحبه. وافتكرت كلام فاطمة إنه بيحب واحدة. وأخدت قرارها إنها هتوقعه في حبها وتحافظ على جوزها فعلاً. *** عرفتي هتعملي إيه؟ اعتبريه حصل. قدرية بشر: أنا مش عايزة غلطة. لا لا، ماتقلقيش، هولع البيت حريقة. المهم تركيزك على سليم وبس، مالكيش دعوة بحسام. وأنا هغرقك فلوس.

المهم الفلوس طالما متوفرة يبقى مش هنختلف. ماتقلقيش، أنا عارفاكي كلبة فلوس. مقبولة منك برضه يا سِت قدرية. بالظبط، خليكي فاكرة إني ستك وتاج راسك، علشان شيطانك ما يخليكيش تلعبي معايا. ما أقدرش طبعاً. إنتي فعلاً ماتقدريش، لأن في الوقت ده هتكوني المرحومة. بتبلع ريقها بخوف: هنفذ أوامرك كلها. كده تعجبيني، معادنا يوم الخميس في الفرح. تمام. قفلت قدرية وهي بتبتسم بشر: ها انتي يا نور، هخليكي تكرهي سليم لحالك. ***

الكل متجمع تحت بأوامر الجد اللي طلبهم كلهم. حسام كان نازل يقعد جنب نور، لكن سليم سبقه وبصله وقاله: معلش، مابحبش حد يقعد جنب مراتى، دي ملكية خاصة. حسام قعد بضيق بعيد. نور كانت فرحانة من جواها على كلام سليم، لكن مابينتش. الجد بحمحمة: طبعاً انتوا عارفين إن الخميس الجاي فرح ودخلة سليم ونور. الكل هز رأسه بالإيجاب. الجد اللي ما تعرفهوش إنه هيبقى كتب كتاب حسام وسارة كمان.

سارة كانت مصدومة، لأنها ما فكرتش أبداً تكون لحد غير سليم. حتى لو متجوز نور، كانت هتاخده منها برضه، لكن كده خلاص. وأخيراً اتكلمت: بس أنا مش موافقة يا جدي. الجد بحزم: ومن إمتى بعد كلامي فيه كلام تاني واعترض؟ اللي قولته هيتنفذ. آدم: جدو، طيب وأنا هفضل سنجل ولا إيه؟ الكل ضحك على خفة دم آدم. الجد: نقي العروسة اللي تعجبك يا ولدي وأنا أزوّجها لك. آدم بسرعة: ملك أهي، منقّيها.

ملك حسّت بالإحراج، وكان نفسها تقوم تجري من تسرع آدم، لولا تعب رجلها اللي منعها. الجد: اممم، بس مش شايفك يعني مناسب لملك. آدم: ليه؟ ده أنا حلو وعسل وبقرمش وكل حاجة. الكل ضحك تاني على آدم. الجد بضحك: طيب، هستنى رأي العروسة، يمكن مش موافقة. آدم: لا، هي موافقة، أنا عارف. الجد: اتكلمي ياملك، مالكيش دعوة بالولد ده. ملك بكسوف: اللي تشوفه حضرتك مع بابا وماما.

الجد بابتسامة: يبقى على خيرة الله، كتب كتابكم معاهم. أنا كلمت أهلك، يوم الخميس هيوصلوا. آدم وهو بيحضن جده بفرحة: يا جدو، يا جامد أنت، يا بتاع المفاجآت. الجد بضحك: مش عارف هتتجوزيه على إيه المجنون ده. آدم وهو بيغمز لملك: المهم إني عاجبها. الجد وهو بيرفع عصاه على آدم: اتحشم يا ولد. آدم طلع يجري: حاضر. الجد بابتسامة: اطلعوا ارتاحوا، بكرة الحنة بتاع سليم ونور، والكل هيصحى بدري عشان التجهيزات.