رواية يأس القلوب الفصل الخامس والخمسون 55 - بقلم رودة

وانه كل اللي رِدته ألزم چَفوفك واگُلك ضاگ صَدري طالب قال الدكتور هيج واني تبهذلت أحوالي، ما أدري شلون كمت من الكرسي وركضت للغرفة، وكفت يم الباب شفتها كاعدة على السدية وتبجي، الدكاترة من شافوني ابتسموا وطلعوا، وهية باوعتلي وبجت وخلت إيدها على وجها، مشيت بساع وصلت يمها وشبكتها حيييل كل قوتي وحجيت: وينج عني بوية وينج؟ وبستها براسها وبخدها، سحبت إيديها بوستهم وجسمي يرجف، مامصدك لزمت وجها بإثنين إديه وحجيت

والخوف سيطر على كلامي: آخر مرة هاي، مو آخر مرة، بعد ما تعوفيني. وشبكتها وهي بعدهي تبجي، رجعت حجيت: وإني ساند راسي على كتفها: سمعيني، صوتج يبعد حيلي. مشت إيدها بهدوء على وجهي وكالت: طلوبي. ولا أول مرة بعد ٨ أيام ضحكت من كل قلبي: روحة وعمرة وكلبة وعيونه وحيله لطالب. ابتسمت وحاوطتها بإيدي، وهية راسها على صدري وحاضنتني، بستها براسها وكالت بتعب: بنتي وين؟ طالب همست وإني أبوس إيدها: موجودة ياروحي، ارتاحي. واجيب لج ياهة.

رجعت كالت: البنات الولد وينهم؟ أريد أشوفهم. كتلها: أجيبهم الج والله أجيبهم بس ارتاحي. نومتها على السدية وغطيتها وجاي أصيح حسين. لزمتني من إيدي وكالت وهية تريد تبجي: وين راح تعوفني بوية. كالت هيج وسحنت روحي سحن، بست إيدها وكلت بهدوء: ما عايفج ياروحي انتِ، بس أصيح حسين. هزت راسها، طلعت جان يفتر بالممرات. صحتله: حسين تعال. ودخلت للغرفة. أجه بساع دخل وكبل راح كعد بالكاع وباس

إيدها وراسها ويحضن بيها، واني مادري شلون متحمل، وهية هم ضلت تبجي. واني أكثر شي يضوجني من أشوفها تبجي، وبالكوة تحجي، بعدها تعبانة. كعدت على القنفة وأباوع الها، وبدي أكعد كبالها وأسكت ما أسوي شي بس أصفن بوجها، بس التعب أكلني أكل. بس إنتجيت كبل غفيت. مادري شكد ضليت نايم بس فزيت، فتحت عيوني على كيف، حسين يمي على القنفة نايم. إجت عيني على

جوري نايمة. طلعت مبايلي شفتها الساعة ١١ ونص. كمت بهدوء وجسمي متكسر تكسر. تقربت يمها بستها براسها ومسحت على شعرها، وهية فتحت عيونها بهدوء. ابتسمت وهية ابتسمت ومالت راسها، تموتني بهاي حركتها. أدنت شوية كعدت يمها على السدية وامسد بإيدي على شعرها بهدوء، وهية شابكة إيدي الثانية. همست: ليش هيج متعب روحك؟ شصاير بيك؟ كلت وإني بالكوة مفتح عيوني من النعاس: مابية شي، ماتعبان، شوفيني.

كالت بهدوء: أي مبين، دشوف عيونك شصاير بيهم. سودة علية. كلت وإني أبوس إيديها: اسم الله عليج جوريتي. همست بهدوء: من نمت جابولي بنتي. شفتها وابتسمت. وكالت: مسميها غلا. شكد حلو. وسكتت وكالت: مو تحبها أكثر مني ها؟ ضحكت بهدوء وكتلها: بيا وضع انتِ بعد روحي وتغارين؟ ودنكت عليها بستها بخدها وكلت: هذا يا مايستحي يحب بنته أكثر منج ها؟ كوليلي.

دنت وكالت بهدوء: نام هنا يمي. واني ما كلت لا، كبل تمددت وضميتها لحضني. وأكثر شي مفرحني موخرين كل الأجهزة منها. الحمد لله والشكر. شبكتني وخلت راسها على صدري وتجر نفس بهدوء لحد ما غفت، واني صافن بوجها وامسد على شعرها لحد ما غفيت. حسين فزيت الصبح مبايلي يدك، أباوع محمد. جاوبته بنعاس: وسم شعندك داك من صباح الله! كال: أي طايح الحظ، غير البنات موتني مفعلات وضع الفرحة. -بعد روحي شلونها أمي؟ سمعني صوتها.

باوعت الها وابتسمت: ها طلوبي، ها وين نايم؟ كتلة بضحك: شسمعك بعد روحي. غير أبوي نايم يمها على السدية. أمك هم لوتية تلكاها، هية صاحته تدري أبونا فقير، سودة علية. ضحك وكال: ملعون بطل هاي سوالفك. شوكت ترجعون للبيت؟ كتلة: إن شاء الله اليوم نسوي ورقة الخروج ونطلع. باوع: افرش السجادة الحمراء، ما أمشي على الكاع وإني وأريدكم تستقبلوني بهوسات ومهاويل. كال: جان سويت لك خوش استقبال يليق بيك وبحظك الطايح، بس تدري محرم.

كتلة: خوش لعد شغلي باسم الكربلائي. ضحك وكال: ملعون ولي دوختني، رايح أتريك وشلون ريوك أخ الله يفوتك. كتلة: سم وعافية على كلبك المتروس. بنات إذا ما أخلي وداد تفسخ الخطوبة وأزوجها لمصطفى، أصبرلي. كال: من ترجع للبيت تعرف بمن أكتلك. كتلة: ههه شبيك بعد روحي صاير ماتتحمل شقة. يلا روح، أكل خليني أكمل نومتي، دوختني من الصبح. شكد تحجي! وهدهد مدري وداد شلون متحملتك ما أدري. كال: مشكور بعد أخوك. ضحكت وكتلة: تاج راسي. وسديت الخط.

وكمت وكلت: يالله. وكفت كدامهم وأخذت الهم صور وهمة نايمين، وجاي أطك واشتغل الفلاش. وكعد أبوي، مسح كصته وكال بعصبية ونعاس: الكتلة صارت كتلتين. أصبرلي حسين. كتلة: أرجع نام بعد روحي ما أفيدك. إني. كام من السدية وغطة أمي، وهية بعدها لازمة إيده. ابتسمت وكتلة: خرب يومكم شكد حلوين. غرت ألة أزوج أصبرولي. ضحك أبوي وكال: دولي من وجهي. وراح يغسل، واني رحت وياه. غسلنا وطلعنا للكافتيريا تريكنا، وهم أخذنا ريوك

لأمي. بعدين رحت سويت ورقة الخروج. ونوب رحت أتطمن على غلا. استأذنت من الممرضة حتى آخذها يمنا بالغرفة. وطلعت واني شايلها ومبتسمة: بوياي شهل الاخت الحلوة! ملعونة شهل جمال! بستها وصارت بوجهي: فدك! لا إله إلا الله. ابتسمت وكالت: يوم تشيل بتنا إن شاء الله. تنهدت وكتلها: بهذا الوكت يمكن عقلي فالت، لو شوف شني، لين مامعقولة أني أقبل بيج لو أريدج. وعفتها ومشيت، هيج

أحسن لج، ألة أفشلج. دخلت للغرفة شفت أبوي يساعد أمي علمود تاكل. خليتها بحضن أمي. شبكتها وتبوس بيها، وأبوي واكف يمها ويناغيلها وهية مبتسمة. كتلها: يابة، أخذت الوصفة مال دوة وسويت ورقة الخروج. كالوا: تكدرون تطلعون. وصحت لهم: اثنينهم عال العال. والحمد لله. ابتسم أبوي وكال: الف الحمد لله. كملت أكل، واني باعتباري المرافق مالتهم لميت الغراض بالجنط، وغلا بالحافظة

مدري شيسموها. المهم هاي نفس الكاروك بس تنشال بالإيد يخلون بيها الطفل. إني أسميها حافظة، همة مدري شيسموها. كمت الجنط وأبوي يساعد أمي بالعباية. شلت غلا والجنط بإيدي الثانية وطلعنا، وأبوي ساند أمي ويمشون، وإني كدامهم. وصلنا يم السيارة، فتحها أبوي، خليت الجنط وخليت غلا وصعدنا، أمي يمها وأبوي كعد يمهم، واني سديت الباب وصعدت وبديت أسوق. وعيوني بالكوة أفتحهم.

نومتي خربت بهل أيام وجسمي مكسر. نومة الكرسي تكسر الظهر. وصلنا للبيت. دخلت السيارة بالكراج، والعائلة الكريمة كلها منتظرتنا بالكراج. ونزلنا وصار هجوم على أمي، وناس تشبك منا وناس منا، واني ميت ضحك عليهم. شالت غلا بين إديه وكتلهم: ما أخليكم تشوفوها. ودخلت ركض، وأبوي يصيح ورايي: حسيين! لا تطيح منك. وهمة يركضون وراي. وسارة تكول بضحك: لا حسين الله عليك خلي أشوفها. ضحكت وكفت، والتمن عليها ويبوسن بيها وهي تضايقت.

وخرتها وكلت: ما تتحمل. وخرن منها، وهنة كزكزن عليها. وأروح منا ويجن منا. موتني لحد ما كعدت على القنفة وضامها لحضني. وهنة مسطرات يمي ويناغن الها، واني مبتسم واكلها: الله يساعدج بعد روحي، شيخلصج منهن بعد. أنطيتها لريحانة وصار العرك عليها. عفتهم وصعدت فوك، كبل دخلت سبحت وبدلت وكفت مشطت شعري ورشيت عطر وخليت مبايلي على الشحن، وكبل شمرت روحي على الجرباية وغفيت. طالب

دخلت تسبح وسارة دخلت وياها تساعدها، واني أخذت ملابسي ورحت سبحت بالحمام الثاني، ورجعت دخلت للغرفة وإني أنشف بشعري، وهية ممدة والبنات محاوطاتها ويضحكن، وهية متونسة عليهم. ابتسمت على منضرهم، ووكفت أمشط. وشبكني واحد من ورة درت وشفته علاوي. ضحكت وشلته وشبكته وكلت: هلا بعلاوي، هلا بحبيب أبوه. بسته وهوة متعلق بركبتي ويبوس بيه ويكول: اشتاقيتلكم.

إني بسته براسه وكتله: ميت عليك يبعد أبوك. وكعدت على القنفة وهو بحضني ويسولفلي شسوة هالايام، واني أضحك على سوالفه. ومريم كالت: يلا علاوي حبيبي نروح نباوع على التلفزيون ونعوف ماما وبابا يرتاحون، وغلا هم حتى من تكعد نلعب وياها. باسني وركض باس أمه من خدها وكال: يلا امشينا. طلعوا وسدوا الباب، واني كمت تمددت على الجرباية. وجوري تقربت يمي وحضنتني وكالعادة خلت راسها على صدري ونامت، واني غفيت وبعد ما حسيت بشي. ريحانة

طايرة من الفرح وأروح منا وأجي منا ويموييي غلا! أريد أكرطها هييج أكلها. تخيلت تصير عندي هيج بنية. وكزكزت يمة أريد أجيب بس علمود أشيلها. والبنات يضحكن علية. دكيت على باسل وأسولفله ومتحمسة، وهو يستمعلي ويضحك. وكال: اشتقت لج. كتلة بإحراج: اعذرني باسل، عود انتَ جاي من الالتحاق وتعبان والتهيت وياي. تاخذني وتجيبني حتى ما ارتاحيت. كال: لا تحجين هيج وتضوجيني. يا عيني عليمن أعذرج؟ ليش تخليني أدوس ببطنج؟ صايرة مدري شلون تحجين.

ضحكت وكتلها: ويعني ينطيك كلبك تدوس ببطني؟ تنهد وكال: كلبي أخ منة، يحبج وما يكدر. ضحكت وكتلها: واني أموت عليك حبيبي. موبس اني، حتى أطفالي. ضحك وكال: أفديكم بوية. وظلينا نسولف ونضحك. سارة كاعدة بالحديقة وأحجي وية نازك بالمبايل. طبعاً بعد مالكفتها هية وحسين. سولفتلي كل شي. ويايمة شكد فرحت الهم، من زمان متمنيتها إله. ومن غير فرحتي بماما، يا عيني اليوم حلو وفرحانة. وأخيراً. صعدنا اتصال أني ونازك وكالت بضوجة: حسين وين؟

كلها نايم تعبان. كالت: محاجين هالايام لين التهى بالمستشفى. ومشتاقتله. ضحكت وكتلها: عيني عيني يمة، تبيعين ثكل ويمي يروح. ضحكت وكالت: شبيج سارة؟ بعدين أحنا مجرد أصدقاء. كتلها: أي أي أصدقاء. وظلينا نسولف لحد ما صاحوها وراحت. طلع علاوي يلعب بالطوبة وكمت جاي أسد بالباب. وسمعت صوت ضحك أمير. وعلاوي يكلة: الله أنتَ تضرب الطوبة حيل علمني. ابتسمت يعني ديلعب وياه طوبة. مديت راسي، محد بالشارع.

وكلت: علاوي تعال ادخل. وإني جذب، مو علمود علاوي. شافني أمير كبل دخلت راسي وجاي أسده. ودفع الباب بهدوء ومد راسه. باوعلي ورافع حاجبه، وإني الثولة ابتسمت اله. وهو نسة العصبية وابتسم. دخل وانتجة على الباب، وإني منتجية على الحايط. تقرب باسني بخدي وكال: شلونها الحلوة؟ كتلة: زينة. وانتَ؟ هز راسة وكال: الحمد لله. وكف يمي وحاوطني بإيده وكال: شكو واكفة بعيد عني؟ غير تشبكيني. ابتسمت بخجل وكتلة: شو وخر، خلي أدخل أحسن.

باسني بخدي وكال: وليش تدخلين؟ دهر فرة سحن روحي سحن. ملت راسي على صدره وكلت: أروح يم البنات. كال وهو يمسد على شعري: لعد واني أعوفك وتدخلين؟ خلاني تبهذلت، ما عرفت شحجي. ضحك وظلينا نسولف وهو محاوطني بإيده وكلساع يبوس خدي ويكول: ضعفانة يولي، خدودج راح يرحن. واني أضحك عليه. وشوية وعلاوي دخل وكله: يلا تعال خلي نلعب، راح تصير دنيا ليل وبعد ما أكدر أطلع. ابتسم أمير وكال: جايك حبيبي بس دقيقة. طلع علاوي

وهوة كال وهو يعدل شعري: يلا إني أروح. ما أوصيج بعد، طلعي راسج علمود أعرف شلون أحاسبج. ابتسمت وهزيت راسي، وهو باسني براسي وطلع. سديت الباب وانتجيت عليه وكلت: أحبه ياناس، أحبه. بعد مرور ساعات حسين نايم وفزيت على صوت الموبايل يدك. فتحت عيوني بنعاس وكلت: "استغفر الله، ما يكولون واحد تعبان يريد ينام؟ ". مديت إيدي، أخذت الموبايل من الميز. أبَاوع ماكنويشة. ابتسمت وعدلت كعدتي. عمي أموت على هيج كعدة.

ومن عندج فتحت خط وكلت: "الو". ردت: "هلا". حسين: "هلا. حسين شلونك؟ كتلها: "هلاء. زين وانت شلونج؟ كالت: "اني تمام. نايم وكعدتك مو بس شسمه، اشتاقيتلك". هيَ كالت هيج واني صحصحت والابتسامة شكت الحلك. كتلها: "أفدي اليشتاقلي اني". كلت بگلبي: "أي بوية بدا الحب، خلي نختبرها شوية". رجعت كلت: "اعذريني التهيت بالمستشفى بعد تدرين بالوضع وما كدرت أحاجيج. وهم أريد أصارحج بشي". كالت: "شنو؟

كتلها: "بالمستشفى حبيبتي السابقة فدك، وصراحة كل ساعة تجي يمي وتطمن عليه وسولفت وياي وراضتني وطلبت من عندي نبدأ بداية جديدة. واني گلبي حن إلها واشتاقيت لأيامنا سوية. فهسة رجع كلشي طبيعي بيناتنا. وأحب أنهي كلشي وياج والله يعوضج بالأحسن". أحجي وهية ساكتة. كتلها: "ها نازك؟ كالت بقهر: "زين إذا انت تحبها وتدري بروحك متكدر بدونها، شكو خليتني أتعلق بيك وهسة جايني تريد تنهي كلشي؟ ". وسكتت. رجعت كالت وصوتها

أحسه مختنك وبالكوة تحجي: "اخذ راحتك، ما أحب أضغط عليك ولا أفرض نفسي على شخص ما رايدني. الله يسعدكم". وسدت الخط. "لا يالله، هاي مو مال شقة". رجعت دكيت عليها مترد. "هسة اني شكوا سويت بيها هيج؟ " ومن كالت "تعلقّت بيك" أكيد تقصد تحبني. "أويلي يابة". رجعت أدك عليها ماكو. كمت طلعت من الغرفة أدور على سارة المنقذة. مالكيتها بغرفتها. نزلت لكيتها بالاستقبال. كتلها: "سارة بس انطيني موبايلج شوية". كالت: "شتسوي بيه؟

حكيت لحيتي وكتلها: "دنطيني". فتحتلي ياه. كتلها: "ادخلي على محادثتج انتِ ونازك". دخلت وانطتني ياه. كبل دكيت عليها واجاني صوتها وهية تبجي. سارة: "همزين خابرتي". شهكت. سارة: "شوفي حسين شيكلي". واني ساكت. طلعت من الاستقبال كعدت بالحديقة على الكرسي. وهية كالت: "رجع لفدك، شوفي اني شورتني وياه. شورتني وحبيته من البداية أصلاً. هوَ أني هذا حظي". وبجت. "واني شصار بيه؟ ". همست.

"بدون مقدمات أو مبررات، أحبج ماكنويشتي". وابتسمت. وهية سكتت. كالت: "حسين؟ كتلها: "روحة". كالت: "انطيني سارة. شكو دا تحجي وياي؟ مو تتريدني؟ همست: "دسكتي بلا، ونسي الكلام الكلته. أشاقة وياج جنت. شمدريني انتِ أم دمعة وحساسة. يابة تروحلج فدوة فدك، يا عيني انتِ". سكتت واني سكوتها يموتني. همست: "يابة دحجي مو شلعتي گلبي". كالت: "بسرعة والله ترا اني أحبج". "هيَ شنو بعد؟ ما أكدر أكتم".

ضحكت بصوت عالي وكتلها: "أويلي يابة، أموت عليج. شتحجين؟ ". بعدين تعالي، ما عدنا بنات يحبن؟ كعدي وسكتي". ضحكت واني ضحكت. ورجعت كلت: "يابة أحبج". وهية سكتت تستحي. وضليت أسولف وياها مشتاق إلها لحد ما خلص شحن موبايل سارة. "بوية هسة تخبصنا". انطيته الموبايل وضلت تصيح. واني صعدت وخابرتها من مبايلي وضلينا نسولف. طالب

فزيت من النوم على صوت غلا تبجي. فتحت عيوني بنعاس أبَاوع جوري منتجية على تاج الجرباية ومخليتها بحضنها وتلوليها. ابتسمت على منظرهم وعيوني بالكوة مفتوحتهم من النعاس. انتبهتلي جوري وغلا سكتت. خلتها بهدوء بالكاروك وتقربت. باستني بخدي وكالت: "صح النوم حبيبي". وشبكتني. ابتسمت وشبكتها وكلت: "شلون ارتاحيتي من نمتي؟ كالت: "أي كلش ارتحيت الحمد الله". همست: "الحمد الله. زين تحسين بأي وجع؟ كالت: "لا والله، ولو أتوجع أكلك". مسحت

بهدوء على خدها وهية كالت: "اني أحبك". همست بكل حب: "واني أموت عليج. روحي انتِ". مسحت بهدوء على خدي وكالت: "شصاير بيك؟ باع السواد الجوة عيونك من التعب. سودة عليه". كله من وراي. وعيونها دمعت. واني شصار بيه مباشرةً. شبكتها وكلت: "اسم الله عليج ياروحي انتِ. شنو هذا الحجي بنيتي؟ أزعل عليج إذا عدتي بعد مرة. شعندي غيرج اني بوية". ونزلت دمعتها بهدوء. مسحتها وبست عينها وكلت: "ما أقبل تبجين. دموعج غالية".

ابتسمت وطكتها ببجية وكالت: "والله أحبك". ضحكت بصوت عالي وكلت: "يابة والله أموت عليج". وغلا بجت وهية شابكتني. ماتقبل تكوم. ضحكت وكتلها: "كومي البنية تبجي".

شبكتني حيل وكالت بضحك: "أما ما أكوم". يلة. وباستني بخدي وتحاول تدغدغني بخدودها. عود شلون تدغدغها بلحيتي وموتتني ضحك. وطار النوم من عيوني. باستني بخدي وكامت على كيفها. وغلا أول ما بجت كبل سكتت. بس هية كامت إلها وتبوس بيها وتسكت بيها. وبعدين نامت. ورجعت يمي شبكتني وتسولف وياية وتضحك. وأحسها بهاي سوالفها تعوض كل تعب هاي الـ ٨ أيام. باسل

طلعنا من البيت اني وأمي وأبوي. رحنا لبيت عمي طالب. وصلنا. نزلوا واني طفيت السيارة ونزلت وراهم. استقبلنا محمد ودخلنا بالاستقبال. شوية ودخل عمي طالب وتحاضنوا هوَ وأبوي. صار ١٠ أيام ما متشاورين. وأبوي يتعذر منه ويكله: "والله ملتهي بالموكب وتدري بعد". وردت أجي مباشرةً بس ما كدرت.

وعمي يكلة: "صدك جذب عزيز، ما يحتاج خوية. أهم شي خابرت وسألت وهاي كلش كافية". وأمي دخلت يم البنات وكعدوا يسولفون. واني مندمج وية محمد وحسين. طلعنا للحديقة. نسولف ونضحك. ولمحت حبيبة روحي بالمطبخ تغسل بالماعین. ابتسمت على شكلها. وكل ساعة شعرها ينزل وتوخره. استاذنت من الولد وتمشيت على كيفي. وانتجيت على باب المطبخ وكلت بضحك: "بس بس". وهية كمزت.

شافتني وصاحت: "باسل". غسلت أديها وشبكتني ركض. ضحكت وحضنتها حيل. ملعونة، مشتاقلها. شبكتها حيل وبستها بخدها وكلت: "شلونها حبيبة روحي؟ وهية باستني بخدي وكالت: "عوفك من شلوني، شنو حليان بغيابي عينييي؟ ". وكرصتني. ضحكت وكتلها: "ها بدينا؟ شوفيني أصلاً ذبلان بدونج". سوت حركة حلكها من تفرها تخليني أموت من الضحك. وكالت: "أي مبين. سودة عليه". ضحكت. وهية لزمتني من إيدي وخلتها على بطنها وكالت: "يسألون عليك".

ابتسمت وكتلها: "أروحلهم فدوة اني". "وخري من يمي مو عيب عليج تحضنيني؟ لا يدخل أحد". ضحكت وكالت: "يا يا يا خوش مو إله أشابكك وخلي يدخلون". شبكتني حيل وتضحك واني أضحك على سوالفها. بستها براسها وكلت: "يلا خلي أروح يم الولد عيب". كالت: "تمام". واني أروح أحضر أغراضي حتى أروح وياكم. كتلها: "تمام". وبستها بخدها وطلعت. رجعت يم الولد. طالب

شوية وراحوا بيت عزيز. وراحت ريحانتي وياهم. كعدت بالاستقبال وحسين راسه بالموبايل وكاعد يمي. أبَاوعله يراسل مدري منو. وفاصل وساعة يضحك وساعة الابتسامة تشك حلكه. واني أبَاوعله بتك عين. كتلته: "حسين؟ ". مارد. مندمج بالموبايل. طكيته على ركبته وكلت: "حسين مو أحجي وياك؟ كمز وكال: "ها يابة اعذرني. ما منتبه". جاي أحجي وية نازك...