رواية يأس القلوب الفصل الثامن والخمسون 58 - بقلم رودة

وبين نقاشات عائلتي الحادة وأغنيتي وأفكاري في نهايتنا وأعمالي المتراكمة "تجي ببالي ضحكتك وأضحك وياها" ريحانة كعدت على اول باية وابجي واصيح. كلهة اجت على صوتي. ماما تحاجيني بخوف وتكلي: "شبيج ماما؟ كتلها: "ماما راح اموت. وجع قوي وجع وشي دينزل علية." وصرخت من الوجع. ماما صاحت: "مرييم اركضي جيبي العباية البنية. راح تولد." وحسين طلع ركض يشغل السيارة. بابا سندني وكومني واني ابجي.

وكتله واني اشهك: "باسل بابا فدوة خابر على باسل." هز راسة وكال: "هسة اخابره ياروح ابوج هسة." وكفني ولبسني الشال والعباية وسندني وطلعني. وماما ويانة. صعدوني بالسيارة. وماما كعدت يمي لازمة ايدي وتهدا بية. واني راسي على كتفها وابجي. وبابا يحجي بالمبايل وسمعته يكول: "يابة متوجهين لمستشفى ***. على الاكثر عدها ولادة." ماما كالت: "كلة خلي يجيب وياه جنطة الاطفال. كلشي يصير." كالة بابا: "كله." وسد الخط.

ومنا لحد ماوصلنا للمستشفى طلعت روحي. دخلوني بساع. الدكتورة فحصتني وكالت: "بساع حولوها لغرفة الولادة. راح تولد." ويركضون بية واني روحي طلعت وارجف من الخوف. وماخلوا ماما تدخل وياي. واشوف البنات الي بصالة الولادة يولدن ويصرخن. وضليت ارجف بالزايد والخفقان شكل عندي. والممرضة تهدا بية وتمسد بهدوء على كصتي. وشوية وبديت اصيح: "صار عندي ولادة." والوب منا ومنا وهنه لازماتني ويكولون: "اهدئي لايصير بالاطفال شي."

والوجع مال ولادة جنت سامعة يوجع بس مولهل درجة. حسيت روحي وجاي تطلع. لحد ماسمعت صوت الاطفال يبجون. وهم انزاح من عندي. غمضت عيوني وفقدت. بعد ماحسيت بشي. باسل اروح وارجع بالممر مال مستشفى وخايف على ريحانة وقلقان. وضليت اروح منا وارجع منا. توجعت مو اني ماجنت يمها علمود اهديها. هسة ولدت لو بعدها؟

خاف يصير بيها شي. وضليت اكل بروحي اكل. لحد ما دخلت وشفتهم طلعوها من صالة الولادة لغير غرفة. واني اباوع عليها وجها تعبان واحمر دم. وتون روحي راحت من شفتها هيج. دخلوها وخلوا الها مغذي وطلعوا. ودخلن يمها. واني واكف وامسد على خدها بهدوء وايدي ترجف. وهية تون ودموعها تنزل. "باسل وين؟ اريد باسل." كتلها واني ادنك عليها وابوس ايدها

ومااهتميت لكل الواكفين: "هذا اني يمج ياروحي انتِ. الحمدالله على سلامتج بنيتي ولدتي بخير وسلامة." كالت ببجي: "الاطفال وينهم؟ هاا. كتلها: "هسة يجيبوهم هسة." وهية لازمة ايدي وتون من الوجع واني تبهذلت من شفتها هيج.

شوية واجو ابوي وامي. وكلها دخلت للغرفة ويباركون النا ويتحمدولها بالسلامة. واني عين عليها وعين عالباب شوكت يجيبون اطفالنا. متلهف على شوفتهم صار هواي انتظرهم. ودخلوهم ويبجون. والضحكة انرسمت على شفافي. تركت ايد ريحانة بهدوء وتقدمت شايلاتهم الممرضات. اني شلت البنية وابوي شال الولد. وايدي ترجف والدموع ترست عيني. منضر يقشعر البدن. كبرنا باذنهم. وهمست بهدوء: "انتِ اسمج ملاك."

وفتحت عيونها بهدوء اخضر فاتح وبيضة حييل. وشعرها على شكار. همست بحب: "واسم على مسمى بنيتي." وبستها بخدها وقربتها من ريحانة. من شافتها ضلت تبجي وتبوس بيها. وكلت لعمي بضحك: "يابة عيونها خضر عليمن؟ ضحك عمي وباوع لعمتي جوري وكال: "عليها يابة عليها." وتقرب اخذ البنية وباسها. وصارت من حضن الحضن. تقربت اخذت الولد من ابوي. بعد ماكبر باسمه.

بسته بخده وهمست: "نورت الدنيا حبيب ابوك." باوعتله بابتسامة. شعره لونه اسود عكس اخت اشكر. ابيض بس شعره اسود وعيونه نفس عيونها اخضر فاتح. سبحان الله. همست باذنه: "انتِ اسمك ياسر." وابتسمت على شكله صافن بوجهي. رجعت بسته وخليته بحضن ريحانة. وطبعا الاسماء متفقين عليهم اني وريحانتي من زمان. واخذوهم للخدج. ورحت سويت البيان الخاص بالاطفال. ورجعت للغرفة. ريحانة نايمة والباقين يسولفون والابتسامة مرسومة على وجوهم. طلعت من

الغرفة ولحكني ابوي وصاح: "يابة ابو ياسر اوكف النا." شوي ضحكت ووكفت. حضني وباركلي وبسته من راسه وكال: "احمد الله واشكره خلاني اشوف هيج يوم قبل لا الله ياخذ امانته." بسته من ايده وكلت: "عمرك طويل يابة تعيش وتشوف الاكثر ان شاء الله." ابتسم وكال: "ان شاء الله." وضلينا نسولف. وطلع عمي ومحمد يمنا. وكعدنا بالحديقة لين المستشفى صار هوسة. ريحانة

فزيت ورة مدري كم ساعة. التعب والوجع الي احس بيه فضيع. فتحت عيوني بهدوء. اباوع ماما غافية على القنفة ويمها عمة. وباسل كاعد على الكرسي وغافي. ابتسمت بهدوء لبطني صار صغيرونة لين جبت. جانت كبيرة. همست بهدوء: "باسل." ماجاوبني. كلت مرة ثانية: "باسل." فز بساع وباوعلي. كبل اجة يمي ولزم ايدي باسها. وهمس: "ها حبيبتي بيج شي لو تردين شي؟ همست واني احضن ايده بهدوء: "وين اطفالنا ليش مو يمّنا بالغرفة؟

ابتسم وكال: "بالخدج ميصير يبقون يمنا هنا. باجر نطلع من المستشفى وناخذهم ويانة." ابتسمت وكتلة: "ملاك وياسر." هز راسة وابتسم ودنك باسني بخدي وهمس: "خفت عليج بنتي بس انتِ قوية وولدتي بخير وسلامة." كتلة بهدوء: "ايي بس حسيت بوجع قوي وانتَ مويمي." باس ايدي وكال: "بعد ما اعوفج. ابقة مكابلج وكاعد." كتلة: "بعد ما اصير حامل. الولادة تاذي. مااريد." ضحك وكال: "الله كريم."

ابتسمت وهوة يمسد على خدي بهدوء. لحد مانمت وهوة جاب الكرسي وخلاه يمي وكعد وضل لازم ايدي. في اليوم التالي سارة نايمة وفزيت على صوت باب الغرفة يندك. تلفلفت باللحاف ودرت وجهي. امير رايح بسابع نومة. ندسته بهدوء وكتلة: "امير اكعد يدكون بالباب." فتح عيونه بنعاس وكال: "كايم." بدل وكام. واني رجعت غمضت عيوني. اسمعة فتح الباب وصبح عليه وكال: "تفضلوا. هذا الريوك وصباحية مباركة."

ابتسمت: "خرب المانيا شلون نادل مؤدب. يمة لايسمعني امير ونتعار من اول يوم." شوية وانسد باب الغرفة واني بديت اغفي. وانرفع اللحاف من وجهي. فتحت عيوني بهدوء. شفت امير متكرفس كدامي ومبتسم. ابتسمت وهمس: "صباح الخير عروستي الحلوة." ابتسمت بخجل وكتلة: "صباح النور." باسني بخدي بهدوء وهمس: "شلونج؟ بلعت ريكي وكتلة: "زينة وانتَ؟ كال: "ترديني اصبح بهيج وجه وموزين؟ يابة باحسن حال اني." ابتسمت بخجل: "خرب يومك هسة الة تخجلني."

كال: "يلا كومي كافي نوم خلي نتريك." كتلة: "اما بعدني انعس." سحبني وكال: "دكومي كومي." كمت لبست الروب ودخلت سبحت وطلعت انشف بشعري. وهوه دخل يسبح. رتبت الغرفة ومشطت شعري. طبعا لبست قفطان مغربي ذهبي وابيض وسويت شعري ضفيرة وخليت مكياج خفيف ورشيت عطر.

طلع وكف يبدل. بعدين مشط شعره ورش عطر واجة سحبني لحضنة وكعدني يمه. وبدينا ناكل ونسولف ونضحك. بس شنو احجي وياه واتذكر هسة اهلي يتريكون بهيج وقت ومن دوني. وتحصرني العبرة واريد ابجي. واذكر قريبين علية واروح الهم واضم البجية. بس شنو اشتاقيت الهم حيييل. دك مبايل امير جاوب ويكول: "الف مبارك. يتربون بعزك حبيبي. ياسر وملاك. الله شهل اسامي الحلوة." واني كبل طخت ببالي ريحانة. اشرتله بمعنى: "شكو؟ اشرلي بمعنى: "دقيقة."

شوية وسد الخط وكال: "ريحانة جابت البارحة بالليل وسموهم ياسر وملاك." ضحكت وكتلة: "صدككككك! الله يا عيني حرامات اني وين جنت عنهم." كال: "جنتي بحضني يعني وين جنتي." ضربته على كيف وكتلة بخجل: "عابتلك امير." ضحك وسحبني لحضنة واني طايرة من الفرح. اول مكملنا غسلت ودك مبايلي. جاوبت ماما تطمن علية وكلتلي على ريحانة. وشنو فرحت بالزايد من كالت غير طالعة عيونهم علية وتورطت. ابوج يكلي راح اكابلهم واكعد. بعد.

ضحكت وكتلها: "بوسيلي ياه حبيبي. اشتاقيت اله." شو ماما انطيني ريحانة احجي وياها. انطتني ريحانة. باركت الها وتطمنت عليها. وسولفت وياهة شوية وسديت الاتصال. ورجعت الم بغراضنا. راح نطلع من الفندق. كملت لفيت الشيلة ولابسة فستان مال محجبات. ورتبت مكياجي. وامير منتظرني اكمل ويباوع علية ومبتسم. كملت. اجة صار مقابيلي باسني براسي وهمس: "احبج." ابتسمت وكتلة: "اني هم احبك."

ولزمني من ايدي وطلعنا. لقينا عمو ابو امير موكف السيارة كبال الفندق. شافنا ونزل سلم علينا وبارك النا. صعدنا وبدا يسوق ويسولف هوة وامير. واني صافنة على الجامة. لحد ماوصلنا للبيت. ولد عمه واكفين بالباب. اول مجاي ندخل ذبحوا خروف ية رجلينا. واني لزكت يم امير. وهوة يضحك علية. دخلنا ارتفعت الهلاهل. وشمروا علينا جكليت. وبوستنا عمة والبنات وباركوا النا. وبعدين امير طلع يم الولد واني كاعدة يم البنات ومنتظرة واحد من اهلي يجي. شوية ودخلن مريم ووداد. سلمنا علينا وكعدن. لزكت يم مريم وهية

تطمن علية ومبتسمة وكالت: "اعذرونا امي ماكدرت تجي وية اختي بالمستشفى. ان شاء الله فد شوبة تجي." وباوع علية وكالت: "تريكتي حبيبتي؟ جبنا هسة ويانا كيمر وعسل تحبيهم انتِ؟ كتلها: "لا تريكنا اني وامير الصبح." كالت وهية تمسد على خدي: "يمة فدوة لاختي الصغيرونة الي صارت عروسة. ديربالج على نفسج." وضلت توصي بية واني اكول الها: "ان شاء الله." وداد منطلقة تحجي وية البنات. شوية وكامن راحن. واني صعدت وية البنات لغرفتي.

طلعنا من المستشفى ماما شايلة ملاك وعمتي شايلة ياسر واني باسل ساندني ويمشي بية وبابا منتظرنا بالسيارة. صعدنا بالسيارة وبدا يسوق واني عيوني على ملاك وياسر، يموييي هيج كزكزت. نوب ماشاء الله حجمهم كبير، إذا اني أجيب وأكل شحدهم ميطلعون كبير. نضحكت على سوالفي ولمحت باسل يباعلي بالمراية ومبتسم. ابتسمت اله ورمشت. ضحك ورفع حاجبه. وصلنا لبيت أهلي لين راح أبقى يمهم كم يوم بعدين نروح لبيتنا. نزلنا وذبحوا ذبيحة ودخلنا.

نوموني بغرفة ماما ويمي الأطفال على الجرباية. رضعت ياسر بعدين ملاك وناموا. ومريم ووداد يمي ومكزكزات عليهم واني أوخر بيهن. سألت مريم كتلها باسل وعمتي راحوا. كالت لابعدهم بالاستقبال. شوية وبابا أجه كال باسل يريد يشوفها. اطلعن بابا، كامن البنات ودخل باسل وبابا طلع. تقرب باسني براسي وهمس: راح أروح أنا حبيبتي، ديربالج على نفسج وكل يوم أمر عليج أشوفج لحد ما شوية تتحسن صحتج. ما أريد أتعبج.

همست واني أحضن إيده: تمام حبيبي، بس موتتأخر علي. ابتسم وهز راسة وكال: لا تقهريني، باجر ألتحق. 10 أيام وبالكوة مصبر نفسي. كتله واني أهدأ بيه: على كولتك يخلصن برمسة عين، غمض فتح خلصانات وتجي تلكانة أنا وملاك وياسر منتضريك. ابتسم وكال: إن شاء الله. وبوسهم وهمة يتحسسون من شواربه. ضلينا نضحك ونوب رجع باسني وهمس: أحبج. بنتي كتله بحب: أموت عليك أنا حبيبي. وخلة مصرف ما قبلت أخذ بس جبرني كال: ما يصير تحتاجين. كتله: مو عندي.

كال: عادي خليهم. وباس أيدي ورجع باسني من خذي وهمس: راح أشتاقلج هواي. كتله وعيوني مدمعة: أنا هم. شو أحضني قبل ما تروح. حضني حيل وفزينا ثنينا على صوت باب الغرفة يندك بساع. وخر واني ضحكت وبابا صاح: يمعود السيارة مشتغلة راح يخلص البانزين. ضحك باسل وكله: جاي جاي. تقرب دنك على الجهال باسهم ووخر بعدين باسني براسي وكال: في أمان الله. ابتسمت وهمست: الله وياك حبيبي. طلع من الغرفة وعينة علينة.

ودخلن يمي البنات واني بالي ضل يمه. سودة علية، يا عمري، مبين بعيونه القهر لين راح يروح. شوية واندمجت وية البنات بالسوالف. *** صارت الدنيا ليل وخفوا الخطار ناس رايحة وناس جاية علمود ريحانة. سديت باب الكراج ودخلت لكيت فارشيلي بالاستقبال فراش لين ريحانة نايمة بالغرفة. دخلت وتمددت وعلاوي كاعد يباوع على التلفزيون. باوعت للساعة صارت بـ 12 ونص كتله: علاوي بابا كوم طفي التلفزيون وروح نام، عيونك مو زين عليهم.

كال: كايم. طفة التلفزيون واجه باسني من راسي وكال: تصبح على خير بابا. ابتسمت وكتله: اجمعين حبيبي. طلع من الاستقبال. عود شلون راح أنام وجوري مو يمي؟ إذا ما أحضنها وأكسر ضلوعها ما أرتاح. شوية وانفتح باب الاستقبال ودخلت جوري ولابسة الدشداشة القصيرة لونها أحمر وياكل ويشرب عليها، وشعرها شايلته باهمال ولازمة غلا بأيده والحليب وهالسوالف. ابتسمت وكالت: ها عيني تستقبلنا يمك بنتك تبجي وتكعد بأحفادك وطردونا من الغرفة؟

ضحكت وكتلها: تعالي يابة تعالي. وريحانة منو بقى يمها؟ كالت: مريم ووداد. ومرتين ناموا وكعدتهم غلا بصوت بجيها. بنتك وكحة. ضحكت عدلت كعدتي وغلا بحضنها بس تصيح ومدري شتحجي تدردم. ضحكت عليها أخذتها من حضنها وبوستها وكتلها: ها إنت وكحة باباتي تصيحين بنص الليل ومتخلين العالم تنام؟ وضليت أحجي وياها وهية تضحك. ابتسمت وبستها وجوري تباوع النا وتبتسم.

من بستها ضحكت وكالت: بوسها بعد مرة ترا ما أغار. بستها مرة ومرتين وثلاثة. بالرابعة حضنتني وخلت راسها على كتفي وكالت: وأني شنية ترا أغار. ضحكت وبستها بخدها وكلت: إنت الأصل بوية الأصل. ابتسمت وباستني بخدي. كتله: بوية صعد السكر. ضحكت وشوية ونامت غلا. خلتها على فراشها وتمددت وأجت نامت بحضني وشبكتها حيل وبستها بخدها وهمست: هسة يالة راح أنام مرتاح.

ابتسمت وضلت تمسد على خدي وتسولف وياي واني أستمع الها. ومن توصل إيدها يم شفايفي أبوسها لو أعضها وهية تكمز. لحد ما غفيت واني حاضنها وراسها على كتفي وإيدها على خدي. أني نايم يم القنفة وهية يمي بالجهة الثانية ويمها غلا. *** كاعدين أنا وأمير بالحديقة بالمرجوحة وضامني لحضنه والمرجوح تفتر بينا والجو بارد ثلج وأني حاضنته وراسي على صدره. يمسد على شعري بهدوء ويدخن ونسولف ونضحك. رفعت راسي واجت عيني بعينه

ابتسمت وهوة همس بهدوء: أنا متأكد اللي اخترع جملة "حط عينك بعيني" ما مرت عليه عيون مثل عيونج. هوة كال هيج وأني انسحنت روحي. ابتسمت بخجل وضميت راسي. ضحك وشبكني حيل كال: شو باوعيلي حبيبتي. كتله: أما وخر. ضحك وكال: دباوعيلي. رفعت راسي بهدوء باوعتله باسني بخدي وكال: أحبج ترا! ابتسمت وكتله: أموت عليك. حضن

إيدي وباسها وهمس بهدوء: خل ندخل الجو صار بارد حيل لاتتمرضين. هزيت راسي وكمنا وهوة ضامني لحضنه ونمشي. دخلنا سدينا البيبان وصعدنا لغرفتنا. دخلت وسديت الباب. عدلت شعري كدام المراية وهوة بدل وبقى بالشورت والكيمونة وأني بدلت لبست دشداشتي القصيرة خفيفة ومريحة. تمدد على الجرباية وفتحلي أديه. ركضت وشمرت روحي بحضنه ابتسم وباسني وهمس وكصتي على كصته: أحبج. *** فزيت على صوت ياسر يبجي. فتحت عيوني بنعاس

وسحبته بسته براسه وهمست: جوعان حبيبي. ورضعته وسكت ورجع نام. وبعدين رضعت ملاك ونومتهم. كمت بهدوء غسلت والبنات مخلين الي ملابس على الميز. أخذتهم سبحت ولبستهم ومن سبحت فد ارتاحيت. طلعت شغلت ضوة الغرفة وصاحت مريم: يمعوددة طفييي مونايمين. كتلها: كومن أكعدن. كالت: دطفي فدوة ميتين من النعاس بالكوة نمنة من ورة جهالج بس يبجون. ضحكت وكتلها: طفيته طفيته. فارشة الها ولوداد بالكاع نايمات.

طلعت من الغرفة أمشي عالكيف ما أكدر أحس بتعب مو طبيعي. رحت داشرب مي شفت بابا وماما كاعدين يتريكون. شافوني ابتسموا وكلولي صباح الخير. رديت صباح النور. سوتلي ماما مكان يمها وكعدت أكل وياهم ويجيبون ويخلون كدامي لحد ما خلتني أنترست ومستمرين يوكلون بية وأني أضحك. حسسوني طفلة. كملنا أكل وكعدت على القنفة اللي بالاستقبال وجبت مبايلي. دكيت على باسل. لكيته داك علية الصبح. رد: صباح الخير ياروحي. ابتسمت وكتله: صباح النور حبيبي.

كال: شلونج؟ الأطفال شلونهم؟ كتله: الحمد الله زينين، نسأل عليك. كال: بخير دام إنتوا بخير. ابتسم وكال: اليوم أحسن من البارحة يعني؟ شوية تكدرين تمشين؟ كتله: أيي. كمت وكعدت تريكت ويا ماما وبابا بس يعني أحس بتعب مو طبيعي. كال: هسة شوية شوية تصيرين زينة وترجعين أحسن من قبل ياروحي إنت. كتله: يا عمري إنت، أروحلك فدوة. تريكت قبل لا تطلع للدوام لو هم طلعت بدون ما تأكل شي؟ كال: لا والله تريكت وطلعت.

كتله: ألف عافية يروحي. ديربالك على نفسك. كال: إن شاء الله. وهمس بحب: أحبج بنيتي. ابتسمت وكتله: أموت عليك حبيبي. وشوية وسدينا الخط بعد ما وصاني على نفسي 727282 مرة. شوية وماما جابت ملاك وياسر يمي. كعدوا فرشت الهم فراش وخلتهم بالاستقبال لين كعدوا. وكعدت يمهم وغلا هم يمهم وشكلهم يموتت. ومريم كعدت ووداد بعدها نايمة. شفت محمد نزل وسمعته يسأل على وداد. مريم كالت اله بعدهي نايمة متقبل تكعد. وراح لغرفة بابا وماما يكعدها. ***

دخلت للغرفة بهدوء واجت عيني على وداد نايمة بالكاع ومتغطية وشعرها مفتوح وصاير نصه على وجهها. ابتسمت على شكلها. شلت البطانية بهدوء ونمت يمها وشبكتها. وهي فتحت عيونها وكمزت. ضحكت وسحبتها لحضني وهمست وأني أبوسها بخدها: صباح الخير يحلوة. ابتسمت وكالت بخجل: صباح النور حبيبي، شو وخر خلي أكوم عيب لا يدخل أحد. كتلها وأني أشم شعرها: محد يدخل لاتخافين وبعدين حتى لو دخلوا مرتي إنت. غمضت عيونها وهمست: ترا بعدني نعسانة ليش كعدتني.

بستها بخدها وكلت: أريد نتريك سوية ميصير. كالت: يصير. وباستني بخدي. ابتسمت وسحبت إيدها بستها وطب دخل أبوي للغرفة ينشف بشعره. الضاهر ما يدري بينا بالغرفة. بساع وخرت وهية غطت راسها باللحاف مستحية. وهو انتبه علينا كبل طلع من الغرفة وصاح: العفو يابة مادري بيكم بالغرفة. ضحكت وكتله: لا عادي ما صار شي. ضربتني وداد وهمست: كلة من وراك شكد عيييب. كمت وكتلها: الحكيني عود مو تبقين نايمة.

كالت: أيي. طلعت من الغرفة وأبوي واكف بالممر يم المغسلة يمشط. شافني ضحك. مسحت كصتي بارتباك وكتله: ها يابة شلونك. ضحك وكال: زين زين. وحسين كاعد عالدرج غمزلي وكال: وين جنت؟ ها ملعون صاير ماتستحي. خزرته وكتله: أحترم نفسك حسسين واحجي مثل الأودام. غمزلي وكال: أعصابك لهل درجة معصب لين أبوي خرب عليكم اللحظة. أخخخ حرامات لو أنا داخل بدال أبوي. ركضت جاي ألزمه وصعد الدرج يركض ويضحك.

ضحكني الأدبسز وأبوي يصيح: اضربه هالمرة ما أدخل لو تكسر راسه. نزلت دخلت للمطبخ مريم تحضر بالريوك. كالت: ها وينها وداد؟ كتلها: هسة تجي. كعدت عالميز وشوية ودخلت وداد للمطبخ. شافتني ابتسمت بخجل واني ابتسمت. شكد أحبها يايابة. ضلت تساعد بمريم وبعدين كعدنا نتريك أنا وياها وحسين ومريم. وسارة مكانها خالي كلش. وحسين خلصها علينا يتعارك وية مريم لين

سارة ماكو وكالساع كائل: هسة أكمل ريوك وأروح أشوفها مشتاقلها. يايابة ويامن أتعارك بعد إذا أتعارك وية أمي أبوي يكتلني وين أنطي وجهي. وأحنا نضحك عليه متصيرله جارة. *** كملت ريوك غسلت وبدلت. وشفت أمي لابسة عبايتها وبيدها غلا. كتلها: وين رايحة جورية طالب؟ ضحكت وكالت: رايحة أشوف سارة. وكالت: جيبي وياج غلا. كتلها: خوش. أجي وياج. أخذت غلا منها وطلعنا. جاي أسد باب الكراج ووكفت سيارة يوسف أخو نازك.

ابتسمت وكلت بقلبي: يابة هلا راح ينور البيت. نزل من السيارة سلم علي وهاي ونازك نزلت وكبل دخلت جوة. وأمي سبقتني ودخلت يم سارة. شوية وراح وأطلع أمير. سلمت عليه ودخلت ويا جوة وأمي وسارة كاعدات بالاستقبال. شافتني سارة ابتسمت وتقربت سلمت علية. شبكتها وبستها من راسها وهمست: أشتاقيتلج سويرة مكانج خالي. وهية مبتسمة وعيونها متروسة دموع. كعدت وضميتها لحضني وأمير يباوع الها بتك عين. ابتسمت بمكر وشبكتها

وبستها براسها وكلت: هذا شماله يغار ولا عبّالك شكبره. ضحك وكال: ملعون متصيرلك جارة. ضحكت وضلينا نسولف وهنة يسولفن. وشوية وكمنا جاي نطلع وسارة باستني وكالت: ألملح عود كالساع تعال يمي أضوج أنا. كتلها: ولج بس يضوجج أمير. البسي عبايتج وتعالي. ركض هنة خطوتين. ضحكت وكالت: هوة حسوي عركة وأجيكم. ضحكت وكتلها: عود عضي عدل كون يبقة أثر ما أوصيج. كالت وهية تحرك بحواجبها: مو تدلل.

ضحكت وكتلها: تحمستي زيادة بعد أخوج. عوفيني خلي أروح يمنا فد ناس أجوا هسة يردون الروح. كالت: منو الله عليك؟ كتلها: نازك هستوها أجت. كالت: خوش فد شوية أكول لأمير وأجيكم. كتلها: منريدج ولي.

كالت: دروح روح. ضحكت وبستها براسها وطلعت. وأمي بوستها وضلت ساعة بالباب يحجن هية وأم أمير. عوزها بعد بس أصبلهن جاي ويكعدن لحد ما كملت حجي يالة دخلنا للبيت. والجو يكرص من البرودة. دخلت للاستقبال خليت غلا بفراشها كدام التدفئة. ومحمد متمدد على القنفة وأبوي يكلب بالموبايل. محمد ابتسم وكال: أجت صديقة البنات وما قبلت تدخل. كالت: بس لا حسين العكرة موجود إذا موجود ما أدخل.

باوعتله بتك عين وكتله: لا تخليني أشرد وداد وأشوفها صاحباتك القديمات. كال حسين: نجب لك منيلي قابل أنا حسين. أصبرلي إلا أخلي مريم تفضحك يم البنية. كتله: دنجب لك منيلي أنا فقير تربات طالب. كلت هيج محمد طكها بضحكة وأبوي باوعلي بتك عين وكال: أي كلش. ضحكت وأبوي كال: شلونها سارة زينة؟ هزيت راسي وكتله: زينة يابة زينة. بس شهرتنا عاضة الولد من خده ومزوركته. كال: لا بشرفك.

ضحكت وكتله: جذب ما عاضته بس كتلها من يحجي وياك لكطي بعضة. ضحك وكال: ماتصيرلك جارة يمعود ماتصيرلك. سارة مؤدبة ما عدها هيج سوالف ماتسويها هاي سوالفك. ضحكت وضلينا نسولف ونضحك. وشوية وراسلت نازك كتبت الها: جاية بدون ما تكوليلي. شافت الرسالة ودزت: غير مفاجئة ياعيني. شلون طالع حلو الأملح. شو الدشداشة حلوة عليك. نوب سودة لابس يمة فديتك. ضحكت وكتلها: قشمريني أي قشمريني.