رواية زواج بالاتفاق الفصل الثامن 8 - بقلم مي سيد

رد والدها وهو تقريباً متوتر من ال هقوله: اتفضل ي بنى. هو الأول فين مي؟ ردت والدتها بطريقة مش لطيفة: خلتني أسأل، هي إزاي مي مستحملة إنها تعيش معاهم. مرزوعة جوا. طيب بعد إذن حضرتك ناديها. قامت نادت مي وهي اتأخرت شوية. دقيقة ولقيت مي داخلة وباين ع ملامحها الانكسار. لوهلة حسيت إني لازم آخدها ف حضني، لازم أخفف عنها، لازم أشيل عنها الحزن اللي هاددها ده، لازم ترفع رأسها زي العادي. حاولت أطنش أفكاري دلوقتي عشان أركز معاهم.

بعد إذنك ي عمي، أنا كنت محتاج أكتب ع مي ف أسرع وقت. طبعاً حضرتك عرفت اللي حصل النهارده، وطبعاً مي مش هتقعد من الكلية. فلو عملنا الفرح بسرعة هيبقى أفضل. واهو آخدها معايا الكلية وأنا رايح ونرجع أنا وهي سوا. واهو هتبقى حضرتك مطمن عليها وهو معايا. بس ي بنى... وقبل ما والدها يكمل كلامه كان أخوها جاي من جوا بسرعة عشان يضربها. بقيت فضحتينا، جبتلنا العار، لازم أخلص منك. وقبل ما إيده تتمد عليها كانت مي ورايا وأنا اللي قدامه.

إياك، شوف إياك تفكر إنك تمد إيدك عليها. اتكلمت تاني لوالد مي: أنا كنت جاي أقول لحضرتك إني عايز نعمل الفرح بسرعة. ولما سمعت كلام والد مي ليها قولت لحضرتك نكتب الكتاب ف وقت أسرع. ودلوقتي بقولك إني هكتب ع مي وآخدها معايا بكرة. أنا مستحيل أسيبها أكتر من كده. بس ي بني إزاي مي... قاطعته والدتها: أنت لسه هتقوله إزاي ي أخويا، وافق خلينا نغورها ونخلص من همها. بصت لمي اللي كانت ورايا واللي حسيتها اتكسرت أكتر بعد كلامهم.

واللي خلتني أصمم أكتر ع موقفي. توافقوا إيه ي ماما؟ البت دي لازم تتربي الأول. كلام أخوها عصبني أكتر. من غير ما أحس لقيت نفسي بضربه بالبوكس ف وشه. البت اللي بتقول عليها دي متربية أحسن منك. أنا هكتب الكتاب حالا ودلوقتي. ردت والدتها عشان تنهي الموضوع وعشان ما نمسكش أنا وأخوها ف بعض من غير ما تاخد بالها من المسكينة اللي ورايا. أحسن، خلينا نخلص ونرتاح. تمام،،، تعالي ي مي عايزك. ده بعد إذنكم طبعاً.

دخلت البلكونة عشان أكلم أدهم صاحبي وأخليه يجيب المأذون ومصطفى صاحبنا عشان يبقوا شهود. واخدت مي معايا عشان ما أسيبهاش معاهم. هي باين عليها إنها مش حمل كلمة ولا نظرة من حد منهم. وأنا مكنتش هقدر أروح البيت وأسيبها معاهم بعد ما شوفت كل اللي عملوه ده. كلمت أدهم وطبعاً مردش من أول مرة. والمرة التالتة رد. رد أدهم بصوت نايم: الوو. فوق معايا ي ادهم كده وصحصح. حسيته بيحاول يفوق فعلاً لما سمع نبرة صوتي الجدية. أيوه ي يونس معاك.

خير ف حاجة ولا إيه. أنا عايزك تتصرف حالا وتجيبلي مأذون وتيجي ع بيت مي. وهات مصطفى معاك عشان تشهدوا ع العقد. حالا ي ادهم. طب وأنا هجيب مأذون منين ي يونس الساعة 12. رديت بعصبية: ما تتصرف ي ادهم. اتصرف. تمام تمام. اهدأ. نص ساعة إن شاء الله ونبقى عندك. " بارك الله لكما وبارك عليكما وجمع بينكما في خير " هو إيه اللي حصل ولا إيه اللي بيحصل. أنا اتكتب كتابي. وع يونس. بالسرعة دي. أنا مش زعلانة والله.

أنا ممتنة ليونس بال عمله ده. أنا لو كنت فضلت يوم واحد كمان هنا ولا حتى ساعة واحدة كان ممكن أعمل ف نفسي حاجة بسبب أهلي. مكنتش هستحمل أفضل معاهم. أنا بس زعلانة عشان معرفتش أفرح زي بقية البنات. ده حلم عمري اليوم ده. اليوم اللي هيتكتب كتابي ع شخص يتقي ربنا فيا، يحبني. على الرغم من كل اللي يونس عمله بس حاسة إنه بيعمل كده بدافع الشفقة، الجدعنة. إنما مش بدافع الحب. مش باين عليه، أو أنا اللي مش شايفة ده، مش عارفة.

بس الحقيقة إني مستريحة. كفاية إنه خلصني من سجن أهلي بس. يارب ما يكونش هياخدني لسجن تاني مختلف عن السجن ده بشوية. يارب يتقي ربنا فيا حتى. ف عز سرحاني لقيت إيد بتتمد لإيدي. إيد حسيت فيها بالدفا. إيد يونس. مش يلا ي حبيبتي. احم تمام. يلا. هلم بس هدومي. رد بصرامة: مش محتاجينها. هنجيب غيرها واحنا ماشيين. تمام. شد إيدي وخرجنا من البيت. نزلنا تحت وأنا ماسك ف إيدها. بشد عليها في محاولة مني إني أطمنها، أدفيها.

أحاول أنسيها اللي حصل طول اليوم. أحاول أخفف عنها الحزن اللي باين في عينيها مهما حاولت تداريها. في صوتها مهما حاولت تسكت. في كتافها اللي متهدلة. في جسمها اللي عمال يترعش. في إيديها اللي مش قادرة تحركها حتى. في روحها... روحها اللي حسيت إنها اتكسرت بعد اللي شافته من أهلها فوق. نزلنا لقيت صحابي بيباركولي. لقيت أدهم بيحضني بعد ما سبت إيديها عشان أفتحلها الباب عشان تركب. مبروك ي يونس. الله يبارك فيك ي ادهم. عقبالك.

اتكلم مصطفى: الف مبروك ي معلم. الله يبارك فيك ي درش. تسلم. تسلموا ي رجالة أنا عارف إني تعبتكم وصحيتكم. رد مصطفى: يعم براحتك إنت بتصحينا كل يوم بس متكررهاش تاني بقا. ماشي ي مصطفى. هنفخك بس أما أفوقلك. محتاجين نتكلم. كان صوت أدهم وهو بيهمس في ودني بعد ما مصطفى سلم عليا وركب عربيته ومشي. هشوف مي عشان زي ما أنت شايف حالتها ونبقى نتكلم. لأن أنا كمان محتاج أتكلم معاك. تمام ي حبيبي. والف مبروك كمان مرة. محتاج أي حاجة؟

لا ي ادهم تسلم. تصبح على خير. وسبته عشان أروح لمي اللي قفلت إزاز العربية عشان مناخدش بالنا من دموعها اللي موقفتش. بس أنا واخد بالي من أول ما دخلتها العربية. لفيت عشان أركب. ركبت العربية وماشيين عشان نروح شقتي اللي المفروض كنا هنتجوز فيها. هي مش محتاجة حاجة أصلًا لأن أنا كنت عايش فيها طول الوقت. واللي هي أصلاً فوق شقة والدي. لأنه وهو بيسكن العمارة بحكم إنه صاحبها رفض يسكن الشقة اللي فوق عشان أتجوز فيها وأبقى جنبهم.

ببص ع إيد مي لقيتها بتترعش ومبطلتش عياط من أول ما ركبت. تلقائي وبدون ما أحس لقيتني بمسك إيديها ولا أول مرة متعارضش ومتزعقش. سكتت كأنها كانت محتاجة لده فعلاً. حاولت أطلعها من الصمت اللي هي فيه ده. يعني معترضتيش إني مسكت إيدك زي كل مرة؟ ردت بخفوت وصوت مجهد: إنت بقيت زوجي ي يونس. قالت كده وسكتنا إحنا الاتنين كأننا لسه مكتشفين ده دلوقتي. يا الله ع الكلمة. كأنها خطفت دقة من قلبي. مش مصدق أصلًا إنها بقت مراتي.

مش مصدق السرعة اللي حصل بيها الموضوع. في غمضة عين بقيت مربوط بزوجة ومسؤولية. فضلت محافظ ع إيدها جوا إيدي طول الطريق لحد ما وصلنا الشقة. عديت ع شقة أهلي والحمد لله مكانوش صاحيين. أنا لسه همهدلهم الموضوع ومعرفش هيبقى موقفهم إيه؟ وأي كان موقفهم مش عايزه يبقى قدام مي. هي مش حمل كلمة من حد دلوقتي. سندت ع إيدي لحد ما وصلنا الشقة ودخلنا. لفيت عشان أقفل الباب لقيتها لسه واقفة مكانها بتترعش.

لوهلة حبيت أضمها بس خفت من رد فعلها. احم،،، مي. بصتيلي من غير ما ترد. بصي،، الشقة زي ما أنتِ شايفة دورين. الدور اللي تحت فيه الريسبشن والمطبخ وحمام وأوضة المكتب وأوضة للضيوف. أوض النوم كلها فوق. شوفي الأوضة اللي تريحك ونامي فيها. هزتلي رأسها وسابتني وطلعت. وأنا لفيت عشان أروح أوضة المكتب. مش جايلى نوم. ومحتاج أقعد مع نفسي شوية. محتاج أفكر في كل اللي حصل ده. هعمل إيه مع بعض الفترة الجاية.

هعمل إيه مع أهلي اللي ميعرفوش إني اتجوزت. هعمل إيه مع الكلب اللي اسمه طارق. والأهم من ده كله هعمل إيه مع مي. هنعش مع بعض إزاي؟ فضلت أفكر مع نفسي لوقت معرفش قد إيه. ببص ع الساعة في إيدي لقيت فاضل ساعة ع الفجر. طلعت فوق عشان آخد دش وأنام. كفاية كده النهارده. وأنا طالع وقبل ما أدخل أوضتي سمعت صوت عياطها. لوهلة فكرت أتجاهل وأعمل نفسي مسمعتش حاجة. وتلقائي لثاني مرة ولثاني مرة لقيت نفسي من غير ما أحس فتحت باب أوضتها ودخلت.

بس لقيتها بتصلي. برضه مقدرتش أمشي. سندت بكتفي ع الباب واستنيتها لحد ما خلصت. سلمت ومخدتش بالها مني ولذلك فضلت مكملة في عياطها اللي وجع قلبي عليها أكتر. دخلت من غير ما أتكلم وقعدت قدامها. وهي فضلت موطية رأسها وبتعيط. مقدرتش أمنع إيدي من إني أرفع راسها وأخليها تبص في عيني بس فضلت حاطة عينيها في الأرض. مي. همهمت ببكا وخلاص. بصيلي ي مي. أنا بقيت جوزك يعني مينفعش تغضي بصرك عني. وأخيراً بصتلي.

أخيراً شوفت عينيها اللي زي فنجان قهوة ممتع ع الصبح مع صوت فيروز في شتا جميل في بلكونة الساعة 6 الصبح في وسط المطر. حاولت أبعد تفكيري عن لون عينيها دلوقتي وأشوف قلبها اللي محتاج يترمم ده. ممكن تهدي. كله هيبقى كويس صدقيني. قلبي بيوجعني أوي ي يونس. قالت كده وانفجرت في البكا أكتر. في نفس اللحظة مقدرتش أمنع نفسي من إني أضمها لقلبي وأطبطب عليها. وهي كمان مقدرتش تمنع نفسها من إنها تدفن نفسها فيها أكتر. سلامة قلبك ي مي.

سلامة قلبك ي حبيبتي. حاولت أتجاهل الكلمة اللي طلعت مني تلقائي لثالث مرة معاها في يوم واحد وركزت عليها هي. قولت وأنا مازلت محافظ عليها جوا حضني وإيدي مازالت بتطبطب عليها كأنها بتطبطب ع قلبها مش ع كتفها. كله هيبقي بخير ي مي. الحيوان اللي عملك كده صدقيني والله ما هرحمه. وأهلك معلش. هما بس مصدومين مين اللي حصل. هما كانوا خايفين عليكي ي مي معلش. قولت الجملة التانية وأنا مش مقتنع بيها بس ردها صدمني.

صدمني ووجعني في نفس الوقت.