رواية زواج غير مدبر الفصل الثامن والعشرون 28 - بقلم أسماء سلام

رحاب أول ما شافت المنظر صرخت من الفرحة، ولفت وحضنت حسام وقالت: رحاب: بحبك أوي. حسام: وأنا كمان يا روحي، إيه رأيك في الهدية دي؟ دي الأوضة بتاعة ولادنا. رحاب: جميلة أوي، بس إحنا ما نعرفش ولد ولا بنت. حسام: مش مهم يا روحي، دول رزق من عند ربنا، وممكن بكرة نروح ونعرف علشان ترتاحي. رحاب: تمام يا حبيبي. حسام: تعالي أفرجك على الأوضة. حسام ورى رحاب الأوضة والدولاب اللي صممه خصوصًا ليهم، والرسومات واللعب.

رحاب: واو يا حسام، بجد روعة، بس إمتى عملت دول؟ حسام: كنت كل يوم باجي من الشغل بدري وأجيب النقاش يعمل الأوضة ويمشي قبل ما تيجي. رحاب: ربنا يخليك ليا. حسام: تعالي معايا أوريكي أوضة الألعاب الرياضية. رحاب: جميلة يا حسام. حسام: أنا لاحظت إنك بتيجي كتير فزودت لعب علشانك، تعالي نقعد وقوليلي عملتي إيه النهاردة في الشغل، واتصرفتي إزاي مع الموظفين هناك.

رحاب قعدت تحكيله اللي حصل، بس ما حكتش ليه على زياد علشان ما يغرش عليها ويقعد يفكر يا ترى زياد هيعمل إيه معايا، بس بدأت تعيط خفيف كده. حسام: طب بتعيطي ليه دلوقتي؟ رحاب: علشان قالولي إني خطافة الرجالة، وإني علشان عانس بصيت لخطيب أختي وخليته يقع في حبي ويتجوزني. حسام حضنها وقال: مدام كلامهم غلط وإحنا صح، ما تحطيش في دماغك حاجة، واعرفي أنا ربنا معانا. رحاب: حاضر بس عايزة توعدني إنك ما تتخلاش عني أبدًا.

حسام: أوعدك، بس ليه دلوقتي؟ رحاب: عادي يعني. حسام: حاضر يا حبيبتي، يلا ندخل نغير وبعدين نروح لأهلك. رحاب: طب خليها يوم تاني لإني تعبانة شوية وعايزة أنام. حسام: تمام، اللي يريحك. رحاب: حسام أنا عايزة أكل فراولة. حسام: فراولة إيه اللي دلوقتي؟ ده مش الموسم بتاعها. رحاب: ماليش دعوة، أنا نفسي أكل فراولة ودلوقتي. حسام: يا حبيبتي إيه اللي جاب على دماغك الفراولة دلوقتي؟

رحاب: أنا بتوحم على فراولة، ولا عايز ابني أو بنتي يطلعله وحمة في جسمه علشان أيوه رفض يجيبله. حسام: حاضر يا روحي، قومي غيري وأنا هنزل أجيبلك الفراولة وجاي. رحاب: ماشي. رحاب دخلت غيرت وبعدين دخلت تعمل الأكل وفجأة جت ليها رسالة ففتحتها. ... : اتهني بيه شوية علشان هاخده. رحاب: مين معايا؟ ... : مش مهم مين، بس أنا هاخد حاجتي منك. رحاب: حاجة إيه وأنتي مين؟ ... : قلتلك مش مهم، سلام يا رحاب.

رحاب استغربت إنها عارفة اسمها فده يدل إنها عارفاها شخصيًا، بس قالت مش مهم ورجعت تعمل الأكل. حسام رجع وجاب معاه الفراولة. رحاب خدتها وغسلتها وقعدت تاكل فيها بشراهة. حسام: إيه يا حبيبتي، بالراحة. رحاب: مش عارفة مالي بس أنا عايزة أكلها كده. حسام: ماشي يا روحي بالهنا والشفاء. بالليل رحاب: يا حسام انزل هات لب وسوداني وخلينا نسهر النهاردة ونتفرج على فيلم حلو كده. حسام: فكرة حلوة، هنزل أجيب عقبال لما تختاري فيلم حلو.

حسام نزل جاب السوداني والتسالي ورجع، وكانت رحاب مجهزة الفيلم والمكان والفاكهة. رحاب اختارت فيلم جديد رومانسي. حسام ورحاب بدأوا يتفرجوا على الفيلم واندمجوا معاه أوي، ولما كان بييجي مشهد رومانسي رحاب كانت بتتكسف وخدودها بتحمر وتغمض عينيها.

رحاب لاحظت أن حسام مندمج مع الفيلم أوي، وخصوصًا مع المشاهد الرومانسية، ولما البطلة تهتم بنفسها زي البطل، فقررت تعمل حاجة لحسام نفسها تعملها بقالها كتير بس ما عندهاش الجرأة على كده، بس لازم تتشجع لأنه زوجها مش حد غريب. رحاب استأذنت من حسام إنها تدخل الأوضة تجيب حاجة، وبعد شوية ندهت عليه وقالتله يطفي التليفزيون ويجي. حسام طفى التليفزيون ودخل لرحاب الأوضة، وأول لما شاف منظر رحاب انذهل مكانه.

رحاب كانت لابسة قميص نوم أحمر يظهر أكثر ما يخفي. حسام واقف مكانه مش عارف يعمل إيه. رحاب قربت منه بدلع وبتتمختر وقالت: إيه رأيك يا حبيبي؟ أنا ولا الممثلة اللي في الفيلم؟ حسام: بسرعة أنتي طبعًا يا حبيبتي، أنتي طبيعي لكن هي بتحط ميكب وكله صناعي. رحاب بصت في عينه ولفت إيديها حوالين رقبته وقالت: ها وبعدين إيه رأيك فيا؟ حسام بلع ريقه لأن رحاب أول مرة تعمل كده معاه وده شيء مخليه سعيد جدًا. حسام: أنتي جميلة أوي يا رحاب.

رحاب: بتحبني يا حسام؟ حسام: أوي أوي يا روحي، وبعدين قال: أنا مش قادر على كل ده. رحاب بصتله وهي مش فاهمة كلامه. حسام: مش قادر على الجمال ده، وفجأة شال رحاب ونزل بيها على السرير وقعد يقبلها على جسمها كله. وهنا تسكت شهرزاد عن الكلام الغير مباح. في الصباح حسام عمال يلعب في شعر رحاب علشان تصحى. حسام: صباح الخير يا روحي. رحاب: صباح الخير يا حبيبي. حسام: إيه النوم ده كله؟ رحاب بخجل دارت وشها في صدره وقالت: بس بقى.

حسام: لأ قولي إيه النوم ده كله؟ رحاب: ما أعرفش اسأل نفسك عملت فيا إيه إمبارح. حسام: أنا ما عملتش حاجة، مش أنتي اللي كنتي متزوقة ليا؟ رحاب: عادي زوجي حبيبي وبهتم بيه، حرام يعني؟ حسام: لأ مش حرام، بس أنتي عملتي كده علشان كنتي غيرانة من الممثلة. رحاب: ولا غيرانة ولا حاجة، أنا أصلاً أجمل منها. حسام: طبعًا يا روحي، بس مدام هتعملي في نفسك كده وتهتمي بيا فأنا أتفرج على كل أفلامها بقى.

رحاب قامت قعدت وقالت: أبقى اعملها يا حسام وشوف أنا هعمل فيك إيه. حسام: والله بهزر يا حبيبتي، ما فيش أحسن ولا أجمل منك في عيني، أنتي حلالي يا رحاب والحلال طعمه أحسن مليون مرة من الحرام واتأكدي إني بحبك أوي وعمري في يوم ما هبص لواحدة غيرك أبدًا. رحاب حضنته وقالت: وأنا كمان بحبك أوي يا حسام، وربنا يقدرني وأسعدك دائمًا. حسام: مدام عايزة تسعديني، وقام شالها وقال: يبقى ناخد دش سوا. حسام خلصوا دش وغيروا وفطروا وراحوا الشغل.

في الشغل رحاب بقت قوية مش زي الأول ولما أي حد يكلمها عن زوجها بتتكلم عادي. فجأة جتلها رسالة من نفس رقم إمبارح. ... : لايقين على بعض بس مش هتكملوا مع بعض. رحاب: أنتي مين وتعرفيني منين وعايزة مني إيه؟ ... : مش مهم تعرفي أنا مين بس افهمي كلامي كويس. رحاب: لو ما رديتيش عليا هاعملك بلوك. ... : اعملي براحتك، مش مهم بس أنا حذرتك. رحاب عملت بلوك للشخص ده. رحاب عمالة تشتغل عادي وفجأة جت ليها رسالة من رقم غريب. ...

: عملتيلي بلوك يعني؟ ابعدي أحسن. رحاب: أنتي مين ولا أنتي مين وابعد عن مين؟ ... : يعني مش هتيجي بالذوق يبقى بالعافية. رحاب: ردي عليا وتعالي واجهيني وجه لوجه وقوليلي أنتي مين وعايزة مني إيه. ... : ما تخافيش أنا هقابلك قريب. الشخص ده بعت لرحاب صورة وهي إمبارح مع حسام وهو بيوريها أوضة الأطفال وصورة وهي لابسة الفستان الأحمر القصير. ... : إيه رأيك في الصور ولا أبعتلك وأنتي على السرير مع زوجك ومع بعض؟

رحاب مصدومة إزاي الشخص ده قدر يجيب الصور دي وبعدين قالت: رحاب: أنتي جبتي الصور دي إزاي وعايزة مني إيه؟ ... : مش مهم جبتها إزاي وهاقولك في الوقت المناسب أنا عايز منك إيه. رحاب: أنتي راجل ولا ست الأول؟ ... : تصدقي أنتي طلعتي واحدة مغفلة لأنك سألتي السؤال ده. رحاب: بلاش غلط وقول أنتي راجل ولا ست؟ ... : أنا ست وعايزة أقولك على حاجة، خلي بالك من طفلك كويس. رحاب حطت إيديها على بطنها وقالت: أنتي عايزة مني إيه؟

أنا ما أعرفكيش وما أذيتكيش علشان تعملي فيا كده. ... لأ، أذيتيني أوي كمان، بس أنا بحذرك، يلا سلام. رحاب لقت أن الست دي قفلت. رحاب في نفسها: يا ترى مين دي وتعرفني منين؟ وجابت الصور إزاي؟ وليه بتقولي خلي بالك من ابني؟ أنا خايفة لتأذيه، وبردو إزاي جاءت صور أوضة النوم بتاعتي؟ أنا خايفة جدًا. رحاب استأذنت وروحت بدري لأنها مش عارفة تركز بعد المحادثة مع البنت دي. حسام جه ولقى رحاب قلقانة وشكلها مش كويسة. حسام: مالك يا روحي؟

فيكي إيه؟ وليه مكلمتنيش علشان أجي آخدك؟ رحاب: أصل خدت إذن وجيت بدري. حسام: ليه يا رحاب؟ في إيه؟ تعبانة ولا حاجة؟ رحاب: لأ يا حبيبي أنا كويسة، بس حاسة إني دايخة وده من أعراض الحمل فجيت. حسام: ماشي يا حبيبتي، يلا ادخلي ارتاحي شوية. رحاب دخلت تنام بس معرفتش وعمالة تفكر مين الست دي وعايزة منها إيه، وقررت متقولش لحسام علشان ميقلقش عليها.

بالليل، رحاب عملت الأكل واتعشت هي وحسام ودخلوا علشان يناموا، فحسام جه علشان يقرب منها بس رحاب قعدت تتلفت حواليها علشان تعرف لو في كاميرات مراقبة ولا حاجة. حسام: مالك يا رحاب؟ في إيه؟ رحاب: مفيش يا حبيبي، بس تعبانة النهاردة ومش قادرة، ممكن تخليها يوم تاني. حسام: عادي يا حبيبتي، طب تعالي نامي في حضني. رحاب: لأ، كل واحد ينام عادي. حسام: متأكدة إنك كويسة؟ أو مش زعلانة مني؟ رحاب: والله أبدًا يا حبيبي، بس متضايقة شوية.

حسام: تمام يا رحاب، وبعدين جه علشان يقبلها على شفتيها بس رحاب بعدت. حسام اتضايق وقال: في إيه يا رحاب؟ مش عايزاني ألمسك خالص ليه؟ رحاب في نفسها: مينفعش أقولك يا حبيبي علشان ممكن لو في كاميرا تكون هي بتراقبني وتعرف إنك عرفت، وكمان مش عايزاك تقرب مني بأي شكل علشان متصورنيش، أصل أنا معرفش هي ممكن تعمل بالصور دي إيه. حسام: ردي عليا. رحاب: مفيش، بس حاسة إني تعبانة.

حسام: ألف سلامة عليكي يا حبيبتي، يلا نامي، يلا تصبحي على خير. رحاب: وأنت من أهل الخير. تاني يوم، رحاب جتلها رسالة من نفس الشخص. الرسالة: حلو أوي الجو اللي عملتيه امبارح مع زوجك ده، وإنك مرضيتيش تخليه يقرب منك. رحاب: أنتي عرفتي منين؟ وكمان مينفعش تتجسسي على واحد ومراته كده، عيب وحرام. الرسالة: طب وأنتي ليه مقولتيش إنه حرام لما خدت حاجة مش بتاعتك؟ رحاب: خدت إيه منك؟ هو أنا أعرفك أصلًا؟ قوليلي أنا خدت منك إيه؟

الرسالة: هقولك بعدين، بس اعرفي إن سعادتك قربت تنتهي. رحاب: لأ قولي دلوقتي. الرسالة: سلام يا ماما. رحاب مش عارفة تركز في الشغل والمدير زعقها وقال: لو الحمل تعبك ومش قادرة تشتغلي هدي إجازة بدل ما تشتغلي غلط. رحاب: آسفة يا فندم، آخر مرة هتحصل. في البيت. حسام: إزيك يا حبيبتي؟ عاملة إيه دلوقتي؟ رحاب: الحمد لله. حسام: يا رب دايما.

بالليل، حسام حاول يقرب من رحاب بس هي رفضت وقالت إنها تعبانة والدكتورة قالت إنه المفروض يبعد عنها فترة. حسام: ماشي، أبعد فترة بس ده ميمنعش إني أبوسك أو أحضنك. رحاب: هي قالت كله. حسام عرف إن رحاب بتكذب عليه فسابها ودخل غرفة الألعاب الرياضية. رحاب قعدت تعيط وتقول: عارفة إنه صعب عليك بس غصب عني. حسام عمال بيجري على مشاية الجري وهو بيقول: حسام: ليه بتبعد عني؟ معقول مش عايزاني ألمسها؟ بس ليه؟

تاني يوم، رحاب وحسام راحوا عملوا سونار وتعرفوا إن رحاب حامل في بنت. حسام كان مبسوط أوي بس رحاب كانت قلقانة علشان الست اللي بتهددها وخايفة على بنتها. كل يوم حسام بيحاول يقرب من رحاب وهي ترفض لحد ما تعب منها وبقى يبعد عنها خالص. في يوم. حسام بغضب: لأ كده كتير أوي، بقالنا حوالي أسبوع كل لما أحاول أقربلك تبعدي عني، مع إن الدكتورة قالت عادي لو حصلت علاقة بينا يعني مفيش مشكلة على الطفلة، فليه عمالة تبعدي؟

رحاب بعياط: غصب عني. حسام: غصب عنك إيه؟ هو في حد جبرك؟ لو مش عايزاني ألمسك قوليلي بدل ما أقرب وترفضيني وتحسسيني إني مقرف. رحاب: الموضوع مش كده. حسام: طب إيه الموضوع؟ رحاب: معلش سيبني فترة علشان حزينة شوية. حسام: حزينة من إيه؟ قوليلي، أنا زوجك حبيبك مش حد غريب، أنا سبتك أسبوع بس كل يوم الوضع بيسوء أكتر، أنا عايز أسألك سؤال: هو في حد غيري في حياتك؟ رحاب: إيه اللي أنت بتقوله ده يا حسام؟

حسام: ما هو ده السبب المنطقي اللي يخليكي تبعدي عني وعايزاني حتى أحضنك أو تنامي في حضني. رحاب بعياط: غصب عني والله. حسام بغضب: دي بقت عيشة تخنق، وقام لبس وطلع بره. رحاب قعدت تعيط وفجأة جتلها رسالة. الرسالة: حلو أوي ده. رحاب: أنتي هتستفادي إيه لما تفرقينا عن بعض؟

الرسالة: ملكيش دعوة، واعملي اللي بقولك عليه، لاما هعمل زي ما قولتلك وهنشر صورك أنتي وزوجك على النت وهتبقى فضيحة على الملأ ومش هتعرفي تورّي وشك للناس أنتي وزوجك. رحاب: حرام عليكي كده. الرسالة: ماشي، يلا سلام يا قمر. عدى أسبوع كمان وحسام بعد تمامًا عن رحاب وبقى عنده شك إن في حد في حياة رحاب غيره. في يوم، الجرس رن فحسام قام يفتح. حسام: .......