رواية زواج لدقائق معدودة الجزء الثاني الفصل الرابع عشر 14 - بقلم زهرة الربيع

عايزه اعرف حالا انتي ناويه ترجعي لطليقك ولا لا. لو جاوبتيني بصراحه دلوقتي انا هتفهم وهحترم قرارك ولو كانت اجابتك ايوه هاخد شنطتي وامشي حالا وبهدوء. شروق اتوترت جدا من سؤاله وقالت: احم... انت بتقول ايه يا نبيل. انا لو كنت ناويه ارجعله كنت اتطلقت ليه من الأساس. نبيل اتنهد وقال: دكتوره شروق...

احنا اطباء.. وفاهمين يعني ايه اضطرابات نفسيه وعارفين العقل بيأثر ازاي على القلب لما يكون غضبان. وانا واخد بالي جدا لمشاعر ابن عمك ومتاكد انه بيحبك ولو شكي في محله وانتي بتبادليه نفس المشاعر يبقى انا مليش دور وسطكم. ولو صارحتيني هنسحب بكل هدوء لكن مش هقبل افضل بينكم واتحداه واحاول عشانك وانتي تكوني... شروق قاطعته وقالت بسرعة: انا معرفش مشاعره ايه.. ولا عايزة اعرف...

انا كل اللي اعرفه ان نوح صفحة طويتها من حياتي ومعيزاش افتحها تاني. ومش هرجعله حتى لو انت مكملتش معايا يا نبيل. نبيل اتنهد وقال: متاكدة يا شروق. شروق ابتسمت بتردد وهزت راسها بالموافقة وقالت: اكيد. انا عمري ما هستغنى عن الثقة والاحترام والتقدير اللي لقيتهم معاك. هو ده بس اللي انا محتاجاه ونفسي اعيشه. نبيل ابتسم بسعادة ومسك ايديها وقال: ولو انك مقولتيش الحب بس انا بأكدلك ان محدش هيحبك قدي.

شروق ابتسمت وهيه بتحاول تقنع نفسها ان ده الصح. ونبيل قال بحماس: كده خلاص انا هكلم بابا وماما واخليهم يجو هنا ونطلبك من والدك رسمي. والباقي هيبقى على حسب ما يتفقو. اذا والدك وافق الخطوبة تبقى عندنا في القاهرة هنسافر كلنا سوا. واذا اصر تبقى هنا مش مشكلة المهم تبقي مرتاحة. شروق قالت: مش مسالة راحة والله بس دي عوايدنا البت خطوبتها تبقى عند ابوها. نبيل ابتسم وقال:

عارف وبحترم جدا عوايدكم. بس انتي عارفة انا بابا وماما اتحدوا العوايد دي واتجوزوا في القاهرة رغم ان والدتي كانت من الصعيد. انا وانتي كمان هنتحداها. بصي انتي سيبي المسائل دي عليا هخلصها مع عمي هكلمه دلوقتي. شروق ابتسمت بتوتر وقالت:

انا ما عنديش مانع في كل ده بس ليه عندك طلب بلاش استعجال خلينا نعرف هيحصل ايه مع غنوه الاول. انا حابة تحضر معايا هي وجنة.. انت سمعت بنفسك اللي حصل معاهم وعايزاهم يفرحوا معانا ونوقف جنبهم في ازمتهم. و.. احم يعني كمان انت عارف ان هو يعني لسه ما كلمناهوش. نبيل قاطعها وقال بسرعة:

خلاص انا هجيب اهلي ونطلبك رسمي ومش هعمل الخطوبة غير لما نطمن على غنوه. هنستنى ونعرف هتعمل ايه بالظبط. اما حضرة العمده ده ولا يشغل بالك انا اتكلم معاه بالحسنى ولو منفعش هو ما لوش دخل بينا. شروق ابتسمت بالعافية وقالت: معاك حق ملوش دخل. كملت بهمس وقالت: ربنا يستر. نبيل قال بابتسامة: بتقولي حاجة. شروق ابتسمت وقالت: ابدا سلامتك. عند حليمة كانت قاعدة مع سماح وقالت بغضب:

كنتي لازم توقفي جنبيه وتتاكدي انه شربها حتى تسيبيه. نعمل ايه دلوك حطينا كل الحبوب اللي معانا ولسه هستنى لما الغبي اللي بجيب منه يعرف يتصرف لي في علبة كمان. سماح قالت بضيق: وانا ذنبي ايه كنت هشربهاله في بقه يعني. انا لما وديتها لقي يدي بترتعش. قال لي روحي نامي مشيت. مشوفتهاش لما جات اخذتها. حليمة قالت بغضب شديد:

انا ما عارفاش البنت دي طلعت لي من وين وكله كوم وسند كوم عامله زي ما تكون سحراله. بس ملحوقة هي يعني هتخلد هنه مسيرها هتتكشح سواء تموت او تغور في داهية. وانا وراه والزمن طويل ولد صابحه وكيف ما خلصت من امه هخلص منه عمره ما هيكون اصعب منها. عند نوح تحت كان بيتكلم في التليفون مع حسنين وبيقول:

يا حسنين انا مش بكلمك علشان تحكي لي قصة حياتك. انا بكلمك علشان اقول لك ان فيه مواضيع كتيرة جديدة حصلت وجدت وانا قلت لك لما اعرف ولدك اتقتل ليه هكلمك واقول لك. انت لازم تاجي ونقعدو ونتحدتو في الموضوع لاني عرفت كل حاجة. لو جيت بالحسنى كان بها ميمعتش الكلام هعتبر ان ملكش اي حق عندنا وساعتها لو قربت لاي حد من البيت وبذات أرملة ولدك هتبقى مشكلتك معايا انا. وسمعوا شوية وقال:

كده زين بديت تتكلم بعقل وانا احب الناس اللي بتتكلم بعقل. هستناك بكرة نقعدو ونتحدتو وكل اللي ليه حق ياخده. قال كده وقفل ولسه هيطلع لقى نبيل في وشه قال بضيق: خير الهم اجعلو خير. نبيل قال بحزم: عايز اتكلم معاك يا عمده راجل لراجل. نوح ابتسم بسخرية وقال: راجل لراجل. ولو ان مفيش مساواة خالص في الجملة كلها بس ماشي. سامعك اتفضل يا راجل. نبيل قال بسرعة:

اللعبة اللي بنلعبها سوا دي مش هتنفع خالص. انا وشروق بنحب بعض وعايزين نتجوز و... بس قاطعه نوح لما قال: لاه كده في غلط في الكلام. انت بتحب شروق وده طبيعي وعاذرك فيه. شروق لو اتكت على الحيط اللي وراك ده هيحبها. اما هيه تحبك دي بعيده عليك قوي. اما تكلمني اتكلم كلام يدخل عقلي مش يدخل عقلك انت. نبيل قال بغضب:

بتحبني او لا دي حاجة تخصنا احنا. المهم انها عايزة تكمل معايا انا. واللي انت بتعمله ده مش هيفيدك بحاجة وهيقلل من قيمتك لان في النهاية بعد كل اللي بتعمله ده هتجوزها. نوح ابتسم بسخرية وقال: لا انت كده بقى جاي تتحدى مش تتحدي. نبيل قال بثقة: اعتبر كلامنا زي ما تعتبره. انا قعدت مع شروق وقولتلها اني هكلمك. عايزك تشيل مناخيرك من موضوعنا خالص. ممكن تعتبر ان ملكش بنت عم اصلا لان شروق بقت تخصني. نوح قرب منه خطوات وقال بتحدي:

تمام. يبقى اسمع الكلام اللي تمشي عليه الجمال. شروق من يوم ما اتولدت وهي تخصني انا وبس والدنيا كلها مشت على الاساس ده. حتى ربك اللي خلقني وخلقك بجلالة قدره بعد كل الحواجز اللي بينا وكانت فيه حواجز اصعب منك مليون مرة وبردك شالها من بينا علشان سبحانه يفهمك انت وغيرك انها من نصيبي انا وبس. فلو عايز تحفظ كرامتك خد بعضك وعاود بلدك بدل ما تعاود من غيرها وانا مش مسؤول. نبيل قال:

يبقى انت اللي ابتديت. انا مكنتش عايزة اتخطاك بس انت اللي عايز كده. بكرة اهلي هيجوا وهيطلبوا شروق رسمي من ابوها وهنحدد الخطوبة سواء هنا او هناك على مزاجه. نوح قال بتهكم: على راحتك. شكلك معايز تتبهدل لحالك وعايز تجيب اهلك معاك يونسوك. يا اهلا ومية مرحب تنور. نبيل قال بسخرية: بكرة نشوف. و خليك فاكر اني جيت لك بالذوق وانت اللي رفضت ومش عايز تشيلني من دماغك. نوح ضحك بخفة وقال:

اشيلك من دماغي. لهو انا لو هاحطك في دماغي احط في رجلي ايه. هنا نبيل اتعصب جدا ولسه هيقرب عليه شروق كانت سامعة كل حوارهم وجريت عليه بسرعة وقفت مابينهم وقالت: نبيل اطلع ريح انت وان شاء الله ما هيحصلش غير كل خير. نبيل قال بغضب: هو فعلا مهيحصلش غير كل خير. انا هتصل على اهلي وبكرة باذن الله هيكونوا هنا هنطلبك رسمي واللي عندو حاجة يعملها. قال كده ومشي. ونوح بس لطيفة بغضب شديد و بص لها بحده وقال:

وانتي مش رجلك لسه وجعاكي قاعدة تتنططي عليها ليه. اطلعي ريحي في اوضتك. شروق قالت بضيق: ارتاح كيف بعد اللي بتعملوه ده يا نوح. كفاياك بقى. انا مش صغيرة وبقول لك عايزة اتجوزوا هو وراضيه بيه. نوح قال بغضب: اه من لسه من شوية خدت بالي انك ريداه هو و راضيه بيه. شروق اتوترت جدا واتكسفت لانها فهمت انه قاصد لما كانوا فوق. قالت بغضب: انت قليل حيا وانا غلطانة اللي بتكلم وياك. ولسه هتمشي وقف قدامها وقرب منها قوي وقال:

طبعا انتي سمعتي اللي دار ببنا. ولاخر مرة هقولك انهي اللعبة دي وخليه يغور من هنه. انتي عمرك ما هتكوني لحد غيري وده وعد من نوح. شروق قالت بغضب: وانا عمري ما هكون لعبة ليك يا نوح. هملني في حالي واطلع من حياتي. انا هتجوز نبيل وهقول لابويا ولو ما وافقش همشي انا ونبيل ونتجوز هناك عند اهله. وسابته ومشيت وهي متعصبة جدا. نوح ابتسم بسخرية وقال بصوت عالي: نجاتي. نجاتي جيه وقال بسرعة: امر جنابك. نوح قال بثقة:

عدي على صلاح الخياط وصيته على فستان واديتو المقاسات جيبه منه. وعدي على ابو خالد الصايغ وصيته على دبله حريمي قوله عايز الدبله اللي وصاك عليها نوح بيه وهاتهم الاثنين وتعال بس بالراحة عليهم دي حاجات غالية قوي. ماشي يا نجاتي عشان انا عارفك. نجاتي قال بفرحة: دا انا هحطهم في عيني جنابك. نوح اتنهد وقال: طب ربنا يستر. نجاتي مشي ونوح ابتسم وقال: ماشي يا بنت حكم انا عارف كيف ارجعك لعقلك.

اما غنو فضلت مع جنه لحد ما نامت هي وابنها. ورجعت على اوضتها. ولسه هتقفل الباب سند حط رجله عند الباب وقفها وقال: عايز اتكلم وياكي ضروري. غنوه قالت بتوتر: انا قولت كل حاجة تحت يا سند وعايزة انام. سند دخل وقفل الباب وقال: لا مقولتيش كل حاجة. الجزء اللي يهمني مقلتهلوش. غنوه بصتله باستغراب وقالت: قصدك ايه مفهمتش. سند قرب منها قوي وقال:

انا الحلم اللي كان كبير عليكي ومش طايلاه. وعشان كده قبل ما تعملي مسرحية موتك في اليوم اللي اتصبتي فيه قولتيلي عشقاك في النور مش كده. غنوه اتوترت وحاولت تضحك بسخرية وقالت: واه... انت لسه فاكر اليوم اللي اتصبت فيه. ده انت حالتك واعرة قوي. يلا بطل كلام ملوش لازمة واطلع لاحسن شروق تاجي. يلبس شهقت لما شدها ليه بقوة وبص لعيونها بعشق وقال:

الكدب باين في عنيكي. العيون دي اللي كل ما يبصولي احس نفسي سلطان زماني ومحدش يملا مكاني. غنوه ابتسمت بيعاده من جواها وقالت: امم طب انت عايز ايه دلوقتي. سند قربها ليه وقال بهمس: اللي عايزه كتير والصبر مر. ولسه هيلمس شفايفها دفعتو وقالت: وبعدين بقى في قلة الحيا وعدم الرباية. اطلع يلا ومتتعبش نفسك النحنحة دي مبتجيبش معايا واصل. سند اتنهد وقال بغيظ:

قلة حيا وعدم ترباية كمان. ماشي على العموم. بقاش فاضي الا القليل وهكلم نوح وهتجوزك وساعتها هوريكي ان حليمة مربتنيش ساعة على بعضها. غنوه قالت بدهشة: طب ما انا عارفة انها مربتكش ولا دقيقة حتى. بس جواز ايه. انا مش قولتلك مينفعش نتجوز لاني مش عارفة موضوعي هيرسي على ايه. وسند قال بسرعة: هتجوزك يا غنوه غصب عن عين حسنين وكل قبيلته والدنيا باللي فيها. غنوه كتفت ايديها وقالت:

و عايز تتجوزني ليه بقى. ايه السبب. شوف يا سند انا مش عبيطة اذا انا عاجباك وليك مزاج تاخد لك كام ليلة معايا ولقيتني مصدرالك الوش الخشب فقولت تاخدهم بالحلال وبعد كده تطلقني. انسي انا الكلام ده مينفعش وياي واصل يعني شيلني من دماغك. سند اندهش من كلامها و قال: انتي فاكراني هتجوزك علشان اقضي كام ليلة. ليه من قلة الحريم اياك. غنوه ابتسمت بثقة وقالت: الحريم كتيرة بس هي غنوه واحدة. سند داس على شفته باعجاب و قرب منها وقال:

في دي معاكي حق. وعشان هيه غنوه واحدة داخلة مزاجي. بس اسمعي يا بت الناس انا صوح عايزك وقوي كمان. بس عايزك للعمر كله لاني متأكد انك الوحيدة اللي تسدي معايا عمر بحاله وتغنيني عن الدنيا بكل حريمها. غنوه كانت من جواها طايرة بالسعادة وقالت: طيب. احم. طيب امشي دلوقتي ربنا يهديك احسن حد ياخد. سند بصلها جامد وقال:

طيب. ماشي بس عايزة اقولك حاجة اخيرة. بمناسبة حلمك البعيد اللي مكنتيش طايلاه. جيت اقولك ان حلمك اتحقق يا صبية. واللي كان في يوم حلمك بقيتي دلوقتي كل احلامه. غنوه اتفاجأت بكلامه و لمعت عيونها بالدموع وقلبها بيرقص جوه ضلوعها. ولسه هترد الباب خبط وسمعوا صوت شروق بتقول: غنوه قافلة الباب من جوه ليه. افتحي اخوكي حميد معايا عايز يسلم عليكي قبل ما يمشي. غنوه اتسعت عنيها بذهول وسند اتوتر وقال:

واخوكي جدع عاقل ورزين وهيستنى يفهم ولا مقفل كيف نوح كده. غنوه قالت بخوف وطريقة اشبه بالبكاء: لا يا اخويا كيف نوح. وشكلهم هينوحو علينا النهارده منك لله يا بعيد.