رواية زوج للايجار الفصل العاشر 10 - بقلم اميرة محمد

يزن بأستغراب: إيه ده؟ لينظر حوله ويجد الظلمة في كل مكان. ليحاول إشعال الضوء ليصدم بما أمامه. يزن وهو يبتلع ريقه: تمارا! إيه ده؟ لتقترب تمارا وهي ترتدي فستانًا من اللون الطوبي وتضع مكياجًا يظهر ملامحها بأنوثة. لتضيف تصفيفة شعرها جمالًا فوق جمالها لتظهرها أكثر. لتقترب منه تمارا وهي تبتسم وتنظر له بحب: فكرت إننا بقينا مهملين في بعض من يوم ما خلفنا. حبيت نجدد، إيه رأيك في زينة الأوضة؟ أنا جهزت عشا رومانسي لينا لوحدنا.

لينظر لها يزن بصدمة وهو يقترب منها: جامدة أوي. اللون ده جاحد عليها. لتقول تمارا بغباء: لون إيه؟ الأوضة نفس لونها، أنا مغيرتش ألوانها. أنا بس حطيت ورود حمرا وشموع وعملت مكرونة اللي بتحبها. يزن بضيق: مش وقت غبائك دلوقتي يا تمارا. ركزي معايا، مش هنضيع كل اللي عملتيه عشان مبتشغليش عقلك. لتنظر له تمارا بضيق وهي تمسك بيده: طب تعالي، أنا جعان أوي. ليبتسم لها يزن وهو يحتضنها بعشق. *** في صباح اليوم التالي.

نايا بفرحة: ها، إيه رأيك بقى؟ لينظر إلياس بصدمة لما حوله وهو يقول بصدمة: إيه ده؟ نايا بسعادة: ده الجيم الجديد بتاعك. أنا بجهز فيه من فترة ودلوقتي خلص من كله ومستني المدير وبس. إلياس بصدمة: ده ليا أنا؟ لتنظر له نايا بملل: أمال لأمي يا إلياس؟ اخلص، عجبك ولا محتاج يتغير فيه حاجة؟ إلياس بذهول: يتغير فيه إيه؟ ده خيال مش طبيعي. أنا حتى في أفظع أحلامي مكنتش أتخيل ده أبدًا. بس مستحيل أقبل بيه. نايا بريبة: ليه؟ في حاجة غلط؟

مش أنت اللي قلتلي نلاقي جيم مناسب ونبدأ فيه؟ إلياس بتوتر: أيوه، بس كان قصدي أي جيم وأشتغل الكوتش بتاعك فيه لفترة. بس مش قصدي تشتري جيم جاهز من كله باسمي. نايا بلا مبالاة: عادي، أنا أصلاً كنت بجهز فيه من أول ما عرفت إنك كوتش. وده كمان عشان قدامهم لو حبوا يزوروا هنقول لهم إيه. إلياس بتوتر: يا نايا افهميني، أنا مقدرش. أنا حاسس إني صغرت قدام نفسي أوي.

أنتِ جبتيلي كل حاجة حتى من غير ما أطلب، شقة، عربية، جيم كامل، لبس وحاجات في خيالي مكنتش أتخيلها. أنا صحيح وافقت بس على مبلغ معين، مش كل ده. نايا: إلياس، كل الحاجات دي كماليات عشان يصدقوا. وأنت تعبت معايا وهتضيع فترة من حياتك عشاني. ودي أقل حاجة أقدمهالك. إلياس برفض: لا، مش هقبل أكتر من كده. لتقول نايا بضيق: إلياس، كله جاهز، أنا هعمل بيه إيه؟ ملوش لازمة عندي. أنا مبفهمش فيه.

إلياس بضيق: خلاص، لو قبلته مش هاخد منك المبلغ اللي اتفقنا عليه. لتقول نايا بتفكير: مع إننا متفقناش على كده، بس ماشي. لو ده هيريحك ويخليك تقبلهم، يلا انطلق بقى وشوف الجيم بتاعك. ليضحك إلياس بعدم تصديق وفرحة. ليدخل وهو يتفحص كل شيء بذهول، فهو من أحدث الأجهزة. نايا بمرح: عشان تعرف إن نايا زي العصاية السحرية. وكمان عملت لك إعلان عن الجيم وجالك طلبات كتير جدًا. وكتبت هتبدأ من بكرة عشان يبقى فيه شهرة للجيم.

إلياس بصدمة: أنتِ لحقتي تجهزي كل ده امتى؟ مش مصدق بجد. لترفع نايا كتفيها بملل وهي تقول: عيب عليك، مع نايا مفيش مستحيل. ليضحك إلياس عليها بشدة وهي تنظر له، ولم تعلم لما، ولكن شعرت بخفقان غريب أثر ضحكته. *** نونيا بابتسامة: أظن عدى وقت كتير ومتناقشناش في حاجة. أنا حابة نخلص من الموضوع ده بسرعة. شادي بابتسامة: حصل خير. أنا بدأت فعلاً في الموضوع وخدت الإجراءات المناسبة.

نونيا: الصراحة محبتش أجيب تالي عشان ميحصلش زي العادة. أنت عارف ليه. ليضحك شادي وهو يقول: طب والله بتعمل جو للمكان، والوحيدة اللي قدرت على مؤمن. نونيا بضحك: الصراحة فعلاً، ومؤمن أول واحد يعمل كده مع تالي. دايمًا محدش كان يقدر يرد عليه. ليتحمحم شادي بإحراج وهو يقول: وأنتي مخطوبة؟ لتنظر له نونيا بخجل وهي تشير بنفي. ليبتسم شادي براحة وهو يقول: حظي حلو. نونيا بعدم فهم: عفواً؟ مش فاهمة.

ليقول شادي بإحراج: أقصد يارب ينفع والموضوع مياخدش وقت كتير. نونيا: امممم، شكلك زهقت مني ومن قضيتي. ليقول شادي سريعًا: لا طبعًا، أنا نفسي تطول بس مش حابب تقعي في مشكلة. نتقابل من غير مشاكل عادي. بعدين فرح إلياس ونايا عليه أربع أيام بس، فـ عادل. لتقول نونيا بخجل: خلاص، بما إني تعبتك، إيه رأيك أعزمك على الغدا؟ ليقول شادي بمزاح: مين المفروض يعزم مين بقى؟ خليها المرة دي عليا. لتنظر

له نونيا بخجل وهي تقول: خلاص يلا بينا عشان جعانة أوي. *** تالي وهي تزفر بملل: وبعدين حالنا بقى؟ شكل الولايا كده قاعدين حاطين إيدينا على خدنا ومستنيين الفرج. عدي بضيق: بقولك إيه؟ هو كل يوم تيجي تعدي هنا وتنوحي؟ أنتوا معندكوش بيت تتلموا فيه؟ إيه نظام الشحاتة ده؟ جبتيلي المرض. تالي بشهقة: أنت ياض ياللي معندكش دم ده؟ أنا لو كنت اتجوزت وخلفت كنت جبت اللي قسمك نصين. عدي بتقزز وهو يحرك يده: ومين اللي أمه داعية عليه بعدين؟

لو شاطرة اتجوزي متقعديش تقرفي أهلي. لتنظر تالي بعصبية لتمارا: سامعة ابنك يست تمارا بيقول إيه؟ امسكيه بدل ما أطلع القديم والجديد عليه. تمارا بضيق: هعملك إيه يعني يا تالي؟ الواد عنده حق. أنتِ جبتيلي أنا شخصياً اكتئاب. أنا لو ولدت بدري هيبقي بسببك. الولد كره عيشته جوه بطني. تالي بعصبية: نعم يا أختي؟ ليه دي أمه برميل نكد؟ بعدين أنتِ ناسيه لولايا مكنتوش عرفتوا تعملوا حاجة أصلاً. جتكم ستين نيلة. لتجلس بملل وهي تزفر.

لتقول فجأة: لقيتها! أنا متخانقتش مع الواد مؤمن من يومين. إيه رأيك أكلمه وأجر شكله لما يتعصب عليا؟ تمارا وهي ترفع إحدى حاجبيها: والله؟ يعني أنتِ اللي بتجري شكله أهه؟ ومتلاقيش بعد كده حد يخلصكوا. لتكمل بخبث: ولا هو اللي وحشك وبتتحججي؟ تالي بتوتر: هتحجج ليه؟ أنا أصلاً مش بطيقه، هيوحشني على إيه؟ أنا بس زهقانة ومش لاقية حاجة أعملها. عدي بسخرية: إيه؟ للدرجادي حياتك بقت فاضية؟ مش لاقية حاجة تشغلها؟

روحي شوفي حاجة تنفعك لآخرتك. افرضي متي، طلعلك صدقة ولا صليلك ركعتين ينفعوكي بدل ما ترازي في خلق الله. تالي بعصبية وهي ترفع كم قميصها: ده أنا هطلع صدقة على روحك أنت شخصياً دلوقتي. تعالي ياض أنت غلطت وأنا كنت مستنياها، أديني لقيت تسليتي. عدي وهو يتراجع بخوف: أنتِ طبعًا مش هتأذي عيل صغنن بريء زيي؟ ميطاوعكيش قلبك؟ لتقول تالي وهي تضغط على أسنانها: عيل إيه يا خالتي اللتاتة ده؟

أنا هيبعتولي جواب شكر وبرقية على اللي هعمله فيك ده. أنا قلبي هيرقص ويزغرط لما يقول "ميطاوعنيش". عدي بخوف وهو يركض: يماااا! البت اتحولت! هتاكلني! الحقيني يتيييتههه! تالي بعصبية: عيال متربية! إذا كان أمه مش متربية ابنها هيطلع متربي. لتقول تمارا بضيق: وأنا مالي أنا الله؟ ميبلاش الكلام اللي يجوع الواحد ده. *** نايا بتعب: لا، معدتش قادرة خلاص. حرام عليك، أنا قلت أتمرن مش تعاملني زي أبو لهب كده؟ إيه مش للدرجادي!

إلياس بضيق: أبو لهب إيه يا نايا؟ إحنا مكملناش عشر دقايق حتى. إيه؟ يا ماما؟ لتقول نايا بتعب وهي تحرك يديها: لا، أنا خلاص، يسيد، مش قادرة. إلياس وهو يزفر بضيق: طب لو قمتي وكملتي حتى نص ساعة، هطلبلك الأكل وناكل سوا. نايا بفرحة: بجد؟ طب اطلبلي وجبة من ماك وهاتلي بطاطس وبيبسي عائلي الكبير ده. وعايزة نص كيلو بسبوسة. مهبطة أوي والله، منك لله. إلياس بصدمة: نص كيلو إيه؟ وماك إيه؟ أنتِ متأكدة عايزه تخسي؟ لتقول نايا

بعصبية وهي تشير لنفسها: أمال أنت شايفني بعمل إيه؟ بدلع بقالي ساعة بتمرن ويكاد العرق يبقى شلال. إلياس وهو يقرب وجهه منها ويمسك بها من ثيابها: أه يابت الكذابة! مفيش نقطة عرق واحدة حتى. قومي يابت نكمل، وآخرك معايا سلطة وصدر فرخة مسلوق. نايا بعصبية وهي تبعد يده: مسلوق ليه؟ رايح تزور خالتك اللي والده؟ إلياس وهو يزفر بملل: أمال يا نايا يروحي؟ مفكرة إيه؟ هتاكلي وتشبعي وتخسي سوا؟ ليه مفكراني ساحر؟

لتقول نايا بضيق: طب بلاش دي، إيه رأيك نعمل دايت إسلامي؟ إلياس باستغراب: ده اللي هو إزاي؟ مش فاهم. لتقول نايا بابتسامة فخورة: ناكل وندعي ربنا إننا نخس. إلياس بتشنج: لو كانت سهلة كده، كنا قفلنا عيادات الدكاترة والجيم ودعينا كلنا ونستني الفرج يمر. نايا ببكاء مصطنع: لا، مهو أنا مش هفضل عايشة على شوية خضرة وخس. ليه؟ مفكرني أرنب فار هقرقض فيه؟ مستحيل ياناس، أنا بشر.

إلياس بعصبية: وحياة أمي يا نايا لو مقمتي، لعلقك على باب الجيم وأعملك عرض للي يسوى واللي ميسواش وأخوف العيال بيكي. أنتِ حرة! قووومي! لتفزع نايا سريعًا وهي تعود للتمرين بهمّة. ليضحك إلياس عليها وهو ينظر لها بيأس منها. *** منار بضيق: بت يا روجينا، أنتِ هتفضلي قاعدة كده؟ قوليلي ذاكرتي الامتحان بكرة؟ لتقول روجينا بخفوت: ذاكرت. منار باستغراب: مالك يا بنتي؟ حالك مش عاجبني. حتى مبقتيش تروحي لشروق ولا اتصلتي بيها.

مكنتيش بتقعدي يوم من غير ما تقرفيه. روجينا بهدوء وحزن: مفيش يماما، بس تعبانة شوية. لتضع منار يديها على جبهة روجينا وهي تقول: حرارتك مظبوطة. أمال إيه؟ روجينا بضيق: مفيش يماما، ابعدي عني بقى. لتستمع لصوت جرس الباب. لتفتح منار على الفور وهي ترحب بالقادم: منار: تعالي يا شروق يبنتي. شوفيها قاعدة جوه بقالها يومين لا أكل ولا شرب ولا راضية تقول ماله. لتقول شروق بابتسامة: متخافيش يطنط، دي أعراض قبل الامتحان.

تلاقيها من التوتر. روحي بس هاتي كيكة، أنا شامة ريحتها من آخر الشارع. منار بضحك: اه يا بكاشة، عنيا هتوزع أنا وأسيبكوا براحتكوا. لتقول شروق بضحك: والنبي أنتِ عسل يطنط، يفهم أنا. لتنظر لروجينا بعد خروج منار وهي تقول: مالك يا بت؟ ببعتلك مش بترضي ولا جيتي ولا عبرتي، في إيه؟ لتقول روجينا بدموع وهي تقول: قلت له كل حاجة يا شروق. شروق بحماس: وقالك إيه؟ احكيلي بالتفصيل. لتقول روجينا ببكاء خافت: برايك، قالي إيه؟

يعني مش شايفة منظري؟ شروق بخيبة أمل: شكلك عامل زي اللي ميتم رفض. صح؟ خيبة عليك يا خويا. هيلاقي أحسن منك فين؟ لتقول روجينا ببكاء: ياريت رفض، بس هاني يا شروق. وزعقلي جامد وقالي شيلي الهبل ده من دماغك. لتحرك شروق شفتيها بضيق: أخويا غبي مبيفهمش. عامل زي أخوكي كده. أنا مش فاهمة إيه اللي بيحصل. روجينا بعصبية: لا، أنا فاهمة كويس. هو بيعمل كده عشان بيحبها. أنا شفت نظراته ليها يوم كتب كتاب إلياس. شفته بيبصلها إزاي؟

كله بيتكلم مع بعضه وهو سرحان فيها. شروق باستغراب: مين دي؟ قصدك على مين؟ لتقول روجينا بحقد: قصدي على نونيا. أخوكي بيحب صاحبة نايا. شروق ببكاء: هي دي هتفضل ورانا ورانا؟ من يوم ما دخلت حياتنا وهي سرقت مني إلياس. ودلوقتي صاحبتها سرقت شادي منك. روجينا ببكاء: هو عمره ما كان ملكي يا شروق، عمره. لتقول شروق بعصبية: اسمعي يبت، أخويا كان ممكن يبصلك لولا نايا وصحابها. مش لازم نخليهم يتهنوا ونقعد نعيط زي خيبتنا.

روجينا باستغراب: يعني إيه؟ هنعمل إيه؟ لتقول شروق بحقد: تنور الننوسة وتيجي هنا، بعدين نعرفها الشغل الحقيقي. *** نايا بتعب: جسمي كله اتكسر، مش قادرة، يمااااا. ليضحك إلياس بشدة وهو يقول: بس يختي، معموله من هوا، مش مستحملة حاجة. مخدناش نص ساعة أصلًا. نايا بعصبية: بس يمفتري، عايز تكسرني قبل الفرح؟ ليقول إلياس سريعًا: صحيح، هننزل نجيب البدلة والفستان امتى؟ الفرح معدش عليه حاجة.

نايا بتفكير: خلاص، ننزل بكرة بإذن الله ونجيب كل اللي ناقصنا. ليومئ إلياس باقتناع. لتقول نايا بتوتر: أنا خايفة يحصل حاجة، مش مطمنة. يعني كل حاجة ماشية لغاية دلوقتي كويس جدًا. إزاي محصلش غلط صغير حتى؟ إلياس بضيق: يختي اتفائلي، ده حتى بيقولوا "تفائلوا بالخير تجدوه". لتقول نايا بشرود: ربنا يستر ويعدي الفرح على خير. وبعدين كل حاجة هتتصلح. لينظر إلياس لها بتركيز وهو يقول: ييجي الفرح، ووقتها هعرف أتصرف ونرتب كل حاجة.

لازم النقط تتحط على الحروف.