رواية زوج مستعمل الفصل الثالث 3 - بقلم فاطمه سمير

أنتِ خارجة؟ قولت بابتسامة وأنا بلف الطرحة: آه، معاك. بصلي في المرايا باستغراب: وده إزاي! أنا رايح الشغل مش خارج أفسح. لفيتله وقولت بابتسامة: مش كنت محتاج سكرتيرة، هاجي أشتغل سكرتيرة معاك. قال بخبث وهو بيحط إيده في جيبه: وده من امتى بقى؟ قولت ببرائة مصطنعة: من دلوقتي. أتفضل القهوة. ضغط على جبينه بارهاق، وقال بابتسامة مجهدة: شكرًا، حطيها عندك. قولت بقلق: انت كويس؟ قال بارهاق: الحمدلله، بس مصدع شوية.

روحت وقفت جنبه وقفلت الورق وقولت بابتسامة: يبقى كفاية شغل دلوقتي ونفطر سوا وبعدين نكمل. حط إيده على خده وقال وهو بيبصلي بمشاكسة: وهنجيب الفطار منين بقى؟ قولت بغرور مصطنع: عيب عليك لما تسأل السؤال ده، وأنا موجودة. كملت باحراج: اطلب لنا يابني فطار من أي حتة. ضحك وقال وهو بيقلدني: عيب عليك تسأل، وفي الآخر هنطلب من برا وأنا اللي قلت تلاقيها عاملة فطار لينا. قولت بسخرية:

وده كنت هعمله امتى إن شاء الله، وانت بتصحى على ٦ الصبح عشان تجهز وتنزل الشغل، ده أنا صاحية بالعافية أصلًا. قال بخبث وهو بيقرب مني: وإيه اللي جبرك على كده؟ قولت بمسكنة مصطنعة: أكل العيش مر يابني. زقتني بخفة وقال بقرف مصطنع: ما أسمعش صوتك لغاية ما الأكل يوصل. إيه ده أنت معاك حد غريب! طيب أبقى أشوفك في وقت تاني بقى. رفعت عيني لقيت إسراء بتتكلم بدلع، كملت أكل وأنا بقول بهزار مصطنع: يا ستي ما غريب إلا الشيطان...

شاورتلها على الأكل: اتفضلي كلي. قالت بترحاب زائف: طبعًا... وكانت رايحة تقعد جمب حسام فروحت قعدت جنبه وقولت وأنا حضنه دراعه: معلش اقعدي هناك، لأن هنا مكان مراته اللي هي أنا يعني. همس جمب ودني وقال بصوت عميق: خليكي قد كلمتك. بعدت إيدي عنه لكنه شدها تاني وفضل ضاممها ليه، وقال ببرود وهو بيشاور على الأكل: اتفضلي اتغدي معانا يا أستاذة إسراء. قامت بعصبية وقالت وهي عند الباب: شكرًا، شبعانة. قولت بصوت واطي:

ياريت عينك كمان كانت كده. فوقت على صوت حسام وهو بيقول بخبث: مكان مراته هنا، ها؟ قولت بتحدي وأنا عيني في عينيه: عندك اعتراض. قال وهو بيضحك: وأنا أقدر اعترض أصلًا! في البيت ممكن تصحيني بدري بكرة؟ قولت ببرود: ليه هو المنبه بتاعك بايظ ولا حاجة؟! قال بقرف مصطنع: المفروض لما أقولك تصحيني بكرة تقولي برقة كده من عنيا، فين الكلام الحلو؟ قولت وأنا بضحك: لا الحاجات دي بتجزع نفسي. قال وهو بيقرب مني:

ما أنت ضحكتك حلوة أهي، حرمانا منها ليه؟