رواية زوجى وعشيقته الفصل الرابع 4 - بقلم اميرة جمال

وانا ببص من الباب عليه شيفته عرقان كأنه بيعمل مجهود. بصراحة قلقت عليه وخوفت على نفسي برضو. وفي نفس الوقت سامعة زي صوت تأوهات كأن ست معاه في الأوضة بس مش شايفة غيره. قررت أخبط على الباب هو حذرني من ده بس لا مش قادرة. أنا لازم أفهم كل حاجة. أخدت نفس وخبطت على الباب جامد. حسيت بصوت مرعب جاي من الأوضة. قلبي كان هيقف والبيت كله بيتهز كأنه زلزال. وانا بحاول أجري من الشقة بس مش عارفة.

كل ما أقرب من الباب الأرض بتتحرك من تحتي وتاخدني تاني لجوه. صوتي ماكنش طالع نهائي نفسي أصرخ أي حد يساعدني. والغريبة رغم كل اللي بيحصل ده خالد ما طلعش من الأوضة. فضلت أخبط على الباب جامد وبعمل في الأوكر الباب اتفتح. شوفت ست مرعبة الدم بينزل من عيونها وشعرها لونه أزرق وطويل جدا وباصة ناحيتي. أنا اتسمرت وحسيت إن الزلزال وقف وأخيرا صوتي طلع صرخت جامد. وبعدها ما حسيتش بأي حاجة غير وأنا بفوق في أوضتي ومعايا خالد والدكتور.

بيقول ما تقلقيش عايزة مقويات بس وغذاء وألف مبروك على الجنين. جنين إيه هو أنا حامل ومن خالد اللي تقريبا مش طبيعي ده ولا بيحضر عفاريت. مش فاهمة المهم إني مش عايزة أعيش معاه تاني. وفضلت أفتكر اللي حصل من شوية فوقت على صوت خالد وهو بيقولي مبروك يا حبيبتي ده عادي ولا كأن حاجة حصلت. ما قدرتش أمسك نفسي أكتر من كده واتكلمت.

"أنت بتباركلي على إيه إن فيه طفل يربطني بيك أنا مش عايزاه هنزله وأنت هتطلقني ومش هقعد معاك لحظة واحدة." كالعادة بنفس هدوءه رد عليّا. "ليه إيه حصل لكل ده أنا طلعت من الأوضة لاقيتك واقعة ومغمى عليكي شيلتك وجبتلك الدكتور." "طيب والزلزال يا خالد." "زلزال إيه يا حبيبتي ما فيش حاجة حصلت والبيت زي ما هو ما فيهوش حاجة متكسرة." "أنت عايز تجنني يعني إيه كل اللي شوفته ما حصلش." "يا حبيبتي ممكن كابوس."

"كابوس وأنا صاحية أنت بتقول إيه." "الواضح إن أعصابك تعبانة مش أكتر." "أنا عايزة أعرف بتعمل إيه في الأوضة دي." "حاجة ما تخصكيش." "أنا مراتك يبقى يخصني وهتبقى معايا الأسبوع كله أنا مش واخدةك على خاطرك علشان تقولي نقسم الأسبوع." "مش هينفع." "يبقى هروح بيت أهلي لحد ما يبقى ينفع أو ورقتي تجيلي." "أنتِ بتقولي إيه وابني." "ده اللي يهمك بس." "ده اللي هينقذنا ويريحنا احنا الاتنين أرجوكي فهمي." "فهّمني أنت إيه اللي بيحصل."

"مش هينفع الأحسن تفضلي مش عارفة." "وأنا هسقط الجنين وهتطلقني." "بدل ما تسقطيه أولديه وهاتيه." "إيه أنت عايز تحرمني من ابني." "هو لازم يتاخد مننا أنا عارف إني ماليش ذنب بس غلطة وبندفع تمنها." "غلطة إيه اللي تخسرني ابني." "هحكيلك.....