رواية زوجتي الصغيرة رومنسيه خليجية الفصل المئة 119 - بقلم Shifaoman

في بيت ابو جواد

نزلت بسرعه و هي تقفل عبايتها و تعدل من حجابها

توقفت عند اخر الدرج و هي تتنفس بعمق لانها كانت تلهث

مشت بهدوء للصاله

سلمت و ابتسمت لابوها و هي تتقدم من ولد عمتها سلطان

مدت له الملفات و هي تقول بصوت واثق : اتمنى يعجبك شغلي

خرجت من الصاله بكل شموخ

و هي عارفة ان شغلها تمام

بس تحس انها مو واثقه بنفسها و ان شغلها ممكن ما يعجب ابوها او سلطان

بس تبي تعيد تبني ثقتها من جديد

صعدت غرفتها وهي تتنفس بعمق

تذكرت معامله سلطان لها

'' المكتب مليان اوراق و مو عارفة كيف ترتب شغلها و لا عارفة مين تبدا

عفست وجهها بانزعاج

تنهدت بقوة و هي تتافف

قامت من كرسي المكتب و هي تتوجه لمكتب ابوها

و اللي كان بجنبه مكتب سلطان

بما انه نائب المدير

دخلت للمكتب و هي تقول بضجر : يبه ما عرفت كيف ....

سكتت و هي تشوف سلطان جالس مع ابوها و مبين انهم يشتغلوا

نزلت راسها بخجل و هي تقول : اسفه ما كنت ادري انكم تشتغلوا

قال ابوها بابتسامه لبنته : لا عادي يبه

و شنو اللي مخليك زعلانه

قالت و هي ترد تعفس ملامحها من تحت غطا وجهها لا اراديا :

يبه ما عرفت كيف اشتغل

و كملت و هي تسبل عيونها لابوها :

و بما اني تعبانه اليوم و ما لي نفس اشتغل

ابي اخذ اجازة

و كملت بسرعه عشان ما يرفض ابوها :

بس اليوم

ضحك ابوها عليها و ابتسم سلطان على حركاتها

و كانها بنت العشر سنين

قال ابوها بجديه : روان اللحين سلطان يوريك شغلك لاني مو فاضي

و لف على سلطان و هي يقول بابتسامه : سلطان يا ولدي اذا ممكن توريها شغلها

قال سلطان و هو مبتسم بهدوء لخاله : اكيد

و كمل و هو يمشي عشان يخرج من المكتب :

اللحين بوريها شغلها و بكرا بنكمل دراسه المشروع

خرج من المكتب و روان للحين مع ابوها

قالت باحراج : يبه ليش تقوله يوريني كيف اشتغل

قال ابوها و هو يقوم من المكتب :

عادي ما فيها شي

قالت بخجل : يبه شنو عادي استحي منه

قال ابوها و هو يربت على كتفها : روان بنتي يساعدك ولد عمتك و هو القريب احسن من الغريب

خرجت مع ابوها و هي تحس انها بتموت خجل

...

جلست على المكتب و هو واقف جنبها و بدا يوريها كيف تشتغل

مسك الاوراق و الملفات و رتبهم

تحرك بهدوء و هو يرتب الملفات و يوريها كيف ترتب شغلها اول شي

وقف وراها و انحنى و هو يشغل اللاب اللي جنبها

حبست نفسها و هي تحس فيه قريب منها

كانت بتبكي من الخجل

مد يده و بدا يوريها كيف تشتغل

قال بعد ما خلص : فهمتي علي

قالت و هي تسلك له : ايه فهمت و مشكور على كل شي

قال وهو عارف انها ما فهمت شي

خاصه و انه لاحظ احراجها منه :

وريني كيف بتشتغلي

ارتبكت من طلبه و مدت يدها للاب عشان تشتغل بس ماعرفت

كيف تشتغل

قالت وهي منزلة راسها و تناظر يدينها اللي على اللاب :

اسفه بس ما انتبهت لك كيف تشتغل و ما قدرت اركز معاك

قال بهدوء : خلاص بكرا باوريك كيف نشتغل

ورفع يده يناظر الساعه : عندي شغل اللحين و ما اقدر اتاخر اكثر من كذا

قالت و هي تنزل راسها بخجل منه : اسفة اني اخرتك على شغلك

ابتسم بخفه و هو يشوف خجلها منه

قال بصوت هادي اقرب للهمس لا عادي "

صحت من ذكراها وهي تسمع صوت سيارته اللي خارجه من بوابة بيتهم

تنهدت بعمق وهي تحاول تطرد الافكار من راسها

وقفت جنب المرايه و هي تشوف نفسها وتفكر

"ما ابي اعيش تجربه جديده لاني بكل الاحوال راح افشل

و في الاخير اصير انا الغلطانه

ادري ان سلطان ولد عمتي و مستحيل يسوي لي مثل حسام بس

احس اني انا السبب في فشل تجاربي في هذي الحياة "

رجعت للسرير وهي تتمدد عليه بالعرض

رجعت بذكرياتها لقبل سنه و شوي

'' جالسه في الصاله ببيت عمتها

ابتسمت لعمتها اللي قامت من مكانها و جلست جنبها و هي تمسح على

ظهرها بحنان و حب

قالت عمتها و هي تناظرها بإعجاب : هلا ببنت اخوي الحلوة

ردت بنعومه : عيونك الحلوة عمتي

قالت عمتها وهي تمسح على شعرها : ما ابي غيرك زوجه لسلطان ولدي

ابتسمت بخجل من كلام عمتها

و قالت بهدوء و هي تحاول ما تجرح عمتها بكلامها :

و انا ما القى احسن من ولد عمتي زوج لي

بس انا ما ابي اخذ من عيال العايلة

عمتها و هي تناظرها بصدمه من كلامها

حست انها جرحت عمتها بالكلام بس هي وقتها كانت

تحب حسام و تتكلم معاه

و من ذاك اليوم و هي تحس ان معاملة عمتها تغيرت معاها

حاولت ترجع علاقتها معاها مثل ما كانت و احسن بس

عمتها كانت دايما تصدها و تعاملها ببرود

رغم انها كانت اقرب وحدة لها من البنات "

تنهدت بقوة و هي تطرد الافكار من راسها

نزلت تحت تبي تجلس مع امها

على الاقل تنسى الواقع شوي

باست راس امها و جلست و هي تحط راسها في حضن امها

مسكت شعرها و هي تلعب فيه

قالت امها و هي تمسح على شعرها : روان وش فيك يا بنتي ناقصه حنان

قالت روان و هي تسوي انها زعلانه :

ايه تدرين ناقصه حنان و عندي طفوله متاخرة

قالت امها و هي تناظرها و تقول باسى

على حال بناتها المتطلقات :

ما ادري متى يتعدل حظكن انتي و اختك

فتحت عيونها بقوة و هي تسمع كلام امها

اذا امها و هي اقرب الناس لها تقول كذا كيف الحريم

تدري ان امها تبي مصلحتها و تشفق عليها

و مستحيل يكون انها تبي تشمت فيها

قالت و هي ترجع تغمض عيونها و تسوي نفسها مو مهتمه :

ليش ما تبينا نجلس معك انتي و ابوي

قالت امها و هي تمسح على شعرها بحنان :

لا بس ابي بناتي كل وحدة مستورة ببيت زوجها

حست بعيونها تحرقها من كلام امها و انها تبي تبكي

عضت على شفايفها و هي تمنع نفسها لا تبكي

كملت امها و هي مو عارفة انها تجرح بنتها :

ابي اشوف احفادي قبل لا اموت

و ابي اتطمن عليك انت و اختك انكم في بيوتكم

ما ابي الحريم يتكلمن عليكم و انكم متطلقات

اختك طلقها زوجها و رماها علينا

و هي حامل و لا رجع و لا سال

و احنا ندور عليه و لا لقيناه

و انت طلقك زوجك ليلة ملكتك

الله لا يسامحه

حسبي الله و نعم الوكيل

لفت و هي تحضن امها بقوة و تبكي بحرقة

"ليش تبيني اتذكر اللي صار و انا اللي ما قدرت انسى الا بعد مدة

ليش يمه تزيدين جرحي

ما تدرين ان جرحي للحين لسا ما برى

ليش تبين تجرحيني اكثر

ادري ان الكل يتكلم عني

و ان اكيد فيني شي و هذا اللي خلاه يطلقني ليلة ملكتي

بس على الاقل خليني اتوهم ان ما حدا يتكلم عني

صحيح غلطت بس

انا تبت و استغفرت ربي و ان شاء الله يغفر لي "

حضنت امها بقوة و هي تبي ترجع طفله و ما تنجرح كذا

تبي بس تمسك دميتها و تلعب و لا هي داريه عن شي

بس تنام و تاكل و تلعب

علا صوت بكاها و هي تسمع صوت امها تبكي معاها

قالت و هي تشهق : يمه بس لا تبكي ما ابي اكون سبب دمعتك

بعدت عن امها و هي تمسح لامها الدموع

و تقول لامها : يمه بس خلاص

يمه الله يخليك مسحي دموعك و لا تبكي

بسي امها كانت تتحسب على طليقها و هي تدعي عليه

انه شوه لها سمعتها

قامت امها و هي تتوجه لجناحها تبي تهدا و روان لحقتها

بس امها قفلت الباب و طلبت منها انها تتركها لحالها

خبطت الباب و هي تقول برجا :

يمه الله يخليك فتحي الباب خليني اتطمن عليك

ما سمعت رد امها

خبطت الباب مرة ثانيه و هي تقول : يمه الله يخليك ردي علي

تسندت على الباب و هي تنزل للارض

و تبكي :

يمه الله يخليك فتحي الباب و الله ماراح ازعلك مرة ثانيه بس فتحي الباب

حطت راسها بين رجلينها و هي تبكي بقوة

رفعت راسها و هي تشوف ابوها اللي يمشي بسرعه

و مبين عليه انه سمع صوت البكا و الخبط على الباب

انحنى و هو يوقفها و يقول : شفيكم شاللي قاعد يصير

قالت و هي تبكي و مو قادرة تتكلم من شهقاتها :

يمه زعلت مني

قال و هو يتنهد براحه : على شنو

قالت و هي تمسح دموعها ب الكم :

كنا نتكلم و زعلت عشان انا و جود متطلقات

و كذا و...

و انهارت تبكي مرة ثانيه

حضن بنته على خفيف و هو يمسح على شعرها

و هو يحس بالضيق على بنته

اللي صارت متطلقه بسبب شي كان هو السبب فيه

خبط على الباب بخفه و هو يقول بصوت جدي :

يا ام جواد فتحي الباب

ما ردت عليهم

و بعد مدة انفتح الباب و كانت امها عيونها مورمه من البكا

رجعت جلست على السرير و هي تمسح دموعها

مسك بنته و هو يبي يوديها لغرفتها

فلتت من يده و هي تجري لامها و تجلس على ركبها

قدام امها اللي جالسه على السرير

و تبوس يدها بقوة و هي تقول :

و الله ما ازعلك يا يمه

حضنتها امها و هي تمسح على راسها

و ماسكه دمعتها

قالت بعبرة : و الله ماني زعلانه منك

بس متضايقة من اللي يصير فيكن انتي و اختك

ناظر فيهم باسى

مسح وجهه بقلة حيلة و هو ما عارف شنو يسوي

شاف روان و هي تخرج من الغرفة قفل باب الغرفة

و توجه لزوجته

جلس جنبها على السرير قال لها و هو يناظرها بعتب :

ليش تجرحين البنت فوق ما هي مجروحه

نا ظرته و هي تقول بين دموعها : و انا مو مجروحه على بناتي

كل ما اروح عزيمه الحريم يتكلمن عليهم

و انا ما اب ي احد يتكلم عن بناتي بالسوء

قال و هو يناظرها بقلة حيلة :

و شنو تبيها تسوي البنت ما هي بيدها تتزوج

و اذا جا ولد الحلال بتتزوج ان شاء الله

بس هذا هو نصيب بناتك شنو نسوي يعني

قالت و هي تمسك راسها بيدينها الاثنين :

يا ويلي على بنات بيعنسن و ما يتزوجن ابد

مسكها من يديها و هو يقول : استغفري الله يا مرة شنو هالكلام

اقول لك هذا النصيب

تتفاولي عليهم انهن ما يتزوجن ابد

قالت و هي تمسح دموعها بشيلتها اللي على رقبتها : استغفر الله و اتوب اليه