رواية زوجتي بالخطأ الفصل الخامس 5 - بقلم غادة أشرف

هو انتِ قالتها الفتاة وهي تنظر له بصدمة. رعد. هو انتِ؟ ماسة. أيوا أنا. رعد. أى الصدفة المنيلة دي؟ ماسة. اه والله فعلاً صدفه منيلة بهباب. تركته ماسة، واتجهت مرة أخرى إلى الطربيزة التي يجلس عليها أحمد. واتجه رعد هو الآخر وهو غاضب إلى مقعده. عند ماسة. أحمد. مالك يابنتي؟ ماسة. مافيش يابوحميد. أحمد. وبعدين هدور ع شغل فين تاني؟ ماسة. إن شاء الله ربنا يفرجها. أحمد وهو يمسك يدها.

امته بقى ربنا يكرمنا ونتجوز أنا وانتي ونتلم في بيت واحد؟ ماسة بخجل. إن شاء الله. أحمد. بحبك. وقبّل يدها. ابتسمت ماسة بخجل. ليقطع كلامهم صوت رعد. ماكنتش أعرف إن انتي مقضياها كدا. ماسة. واحد وخطيبته. أش دخلك؟ أحمد. في حاجة يا أستاذ؟ نظر له رعد بكل غرور وغادر. بينما كانت ماسة مشتعلة من الداخل. أحمد. مين ده؟ ماسة. ده رعد اللي ماما شغالة عندهم في الفيلا. أحمد. وهو ماله بيكي؟ ماسة. يلا، وابقى أحكيلك بعدين. أنا عايزة أروح.

أحمد. يلا. وخرجوا، وعادوا إلى المنزل مرة أخرى. عند رعد. دخل الفيلا. ندى. حمد الله على السلامة يا رعد. رعد. الله يسلمك يا دادة. ندى. أحضرلك الغدا؟ رعد. لا يا دادة شكراً. بقولك يا دادة، هي ماسة مخطوبة؟ ندى. في حكم مخطوبة يبني، لي في حاجة؟ رعد. لا أبداً. أصل أنا شفتها انهارده، هي وواحد قاعدين في مطعم. ندى. اكيد أحمد ابن حلال وبيحبها، وهي كمان بتحبه. ربنا يتمم لهم على خير. رعد.

ماشي يا دادة، أنا طالع أنام شوية قبل العشاء. ندى. ماشي يابني. اتجه رعد إلى جناحه وأخذ شاور. وتذكر ماسة وحديثها. رعد. ماشي، والله لأقطعلك لسانك ده. خرج رعد، وارتدى تيشرت أبيض وسروال أسود ونام. عند ماسة في المنزل. كانت ماسة في المطبخ مرتدية برمودا أطفالي من اللون البينك، وشعرها على هيئة كحكة منسدلة منها بعض الشعيرات التي تجعل شكلها جذاب للغاية. كانت ماسة تصنع إندومي لها وهي تغني. حتى طرق الباب. ماسة. أيوا جايه أهو.

اتجهت ماسة وفتحت الباب، ووجدت صديقتها شهد. شهد. مسا مسا يا زميل. ماسة. مسا مسا يا أسطى. دايماً بتيجي في الأوقات الغلط. شهد. خيانة! إندومي من غيري؟ أكيد طنط ندى مش موجودة. ماسة. روحي هاتيلك شوكة وتعالي كلي. ذهبت شهد وأحضرت شوكة، وجلسوا الاثنان في البلكونة يأكلون ويمزحون. شهد. مجتيش الكلية ليه انهارده؟ ماسة. كنت أنا وأحمد بندورله على شغل. شهد. وشغله؟ ماسة. اترفد. شهد. ههههههههه. ماسة. إيه. يا خفة!

والنبي خفي شوية، مش ناقصة. شهد. حاضر. ولقيتوا شغل بقى؟ ماسة. لأ، هندور بكرة تاني. شهد. أشطا. بس مالك مزاجك مش رايق انهارده كدا؟ ماسة. أحكي يعني. شهد. عيب يا بو صلاح، سرك في بير. ماسة. يبقى الله يرحمنا. بصي يا ستي. وقصت لها ماسة ما حدث بينها وبين رعد. شهد. كل ده؟ بقولك إيه، أهدي كدا. انتي مش قده. ماسة. أعلى ما في خيله يركبه. شهد. ماسة بلاش عناد، انتي مش قده. ماسة بعصبية.

لأ قده واده ميت مرة. هو انتو ليه كلكم بتعملوا له حساب؟ لي محسسني كأنو ولي من أولياء الله الصالحين؟ إيه دا بني آدم زينا وأقل منا. على الأقل إحنا بنحس بالناس ومبنشوفش نفسنا على الناس ولا بنتغر زيه. شهد. أهدي يا ماسة، أنا مش قصدي أعصبك. ماسة. أنا آسفة يا شهد، اتعصبت عليكي. شهد. انتي مجنونة! أنا استحمل أي حاجة عشانك. ماسة. ربنا يخليكي ليا يا رب. شهد. ويخليكي ليا يا روحي. في المساء في فيلا رعد. كان الجميع جالس. مها.

نورتينا يا مايا. مايا. ميرسي يا طنط. خالد. أخبارك إيه يا مايا؟ مايا. كويسة يا انكل. عاملة إيه يا جنات؟ جنات بعفوية. كويسة. آدم هامسا في أذنها. قومي يابت وهتيها من شعرها. جنات بصوت منخفض. اصبر بس، هي تكه واحدة. مايا. أمال فين رعد؟ رعد وهو يترجل من على السلم. ازيك يا مايا؟ اتجهت له مايا واحتضنته. بعدها رعد عنها. مايا. ازيك يا رعد؟ رعد. الحمد لله. اتجه رعد إليهم وجلس بجانب آدم وجنات. مها. ندى ندى. جاءت ندى. ندى. نعم.

مها. العشا جاهز؟ ندى. أيوه يا فندم. مها. طب يلا يا جماعة. ذهبوا جميعًا إلى السفرة وأخذوا يتناولون طعامهم. وعيون مايا لم تسقط من على رعد. بعد قليل قام رعد. جنات. على فين يا أبيه؟ رعد. هقعد في الجنينة أشُم شوية هوا. آدم. خدني معاك يا صاحبي. جنات. وأنا كمان. ذهبوا الثلاثة إلى الجنينة وجلسوا سويا يتحدثون. مايا. طب أنا كمان هخرج أقعد معاهم. مها. ماشي يا قلبي. خرجت مايا هي الأخرى. خالد. ما تيجي نقعد إحنا كمان معاهم. مها.

لأ، أنا عايزك في موضوع مهم. خالد. موضوع إيه؟ مها. بص. في الخارج. رعد. خلاص يا آدم، هتبدأ من بكرة. آدم. إن شاء الله، ربنا يستر. مايا. هو انت فتحت شركة يا آدم؟ آدم. أيوا. جنات. بقى كدة يا آدم تفتح شركة ومتقوليش؟ آدم. هو أنا أقدر يا أميرتي، بس نسيت والله. جنات. خلاص، اعمل حسابك أنا جايلك بكرة وهشتغل معاك. آدم. والله فكرة، الشركة هتنور بيكي يا أميرتي. رعد. عن إذنكم، هقوم أعمل مكالمة. قام رعد وأجرى مكالمة. ندى. رعد. رعد.

نعم يا دادة. ندى. أنا همشي بقى عشان ماسة لوحدها في البيت. رعد. معقولة يا دادة، سايبة ماسة لوحدها في البيت لوقت متأخر كدة؟ ندى. أعمل إيه يا ابني، أنا اتأخرت عليها انهارده عشان خاطر العزومة دي. رعد. طب تعالي يا دادة أوصلك، ومتسبيهاش تاني لوقت متأخر. ندى. إن شاء الله. رعد. تعالي أوصلك. ندى. لأ يا ابني، خليك. أنا هاخد تاكسي. رعد. لأ طبعاً، يلا. ذهب رعد وندى. مايا. هو رعد راح فين؟ جنات. راح يوصل دادة ندى. مايا بغرور.

إيه ده! الخدامة بيوصل الخدامة. جنات. دي مش خدامة، دي الدادة بتاعتنا وزي أمنا بالظبط. مايا. أنا مش قصدي حاجة يا جنات. جنات. خلاص يا مايا. عند رعد وندى. رعد. وصلنا يا دادة. ندى. شكراً يا ابني. ترجل رعد وندى من السيارة. رأت ندى ماسة قادمة أمامها. ندى. إيه ده، هي دي ماسة؟ رعد. ماسة؟ وإيه اللي مطلعها متأخر كدة؟ ندى. مش عارفة. ماسة. إيه كل ده يا ماما، اتأخرتي كدة ليه؟ رعد بحدة. إلى مخرجك بره في وقت متأخر زي ده؟ ماسة.

كنت بشتري حاجة من السوبر ماركت. رعد. والحاجة دي متتأجلش إزاي؟ تنزلي لوحدك دلوقتي، انتي عارفة الساعة كام؟ ماسة. والله أنا حرة. ندى. ماسة اتكلمي باحترام. ماسة. هوف، أنا طالعة. واتجهت ماسة إلى الأعلى. ندى. أنا آسفة يا ابني. رعد. ولا يهمك يا دادة. ماسة دي مجنونة وعنيدة أوي. ندى. ربنا يهديها. رعد. يارب. يلا تصبحي على خير. ندى. وانت من أهل الخير يا حبيبي. اتجهت ندى إلى منزلها، وعاد رعد مرة أخرى إلى الفيلا.