رواية زينة القلب الفصل الأول 1 - بقلم يارا عبد العزيز

يؤذن أذان الفجر لتستيقظ بطلتنا من نومها. تقوم وتتوضأ وتصلي فرضها، ثم تجلس على سجادة الصلاة لتدعو ربها. تقرأ وردها وتسبح لفترة من الوقت، ثم تقوم بأعمال منزلها الذي تسكن فيه مع جدتها. تعلن الساعة الثامنة فتذهب إلى جدتها لكي تعطيها دوائها. تدق زينة باب غرفة جدتها ليأتيها الرد في الحال. زينة: صباح القمر على أجمل تيتة على الكوكب كله. الجدة: صباح النور يا زينتي. زينة: يلا يا تيتة عشان تأكلي وتاخدي دواكي.

الجدة: كل يوم بتتعبّي نفسك كده يا بنتي، بتروقي البيت وتعملي لي الأكل، مش كفاية عليكي شغلك وكليتك يا بنتي. زينة: تيتة والله أزعل منك، ده ميجيش حاجة قصاد اللي إنتِ عملتيه وبتعمليه عشاني. ده كفاية إنك إنتِ اللي ربيتيني بعد ما ماما وبابا ماتوا في حادثة وسابوني وأنا لسه طفلة صغيرة. ما إنتِ ياما تعبتي واشتغلتِ عشان تصرفي عليا، دلوقتي أنا كبرت يعني إنتِ دلوقتي تقعدي وأنا أعمل لك كل حاجة وأي حاجة إنتِ عايزاها.

وبعدين إنتِ مش بتتعبيني ولا حاجة، ويا ريت لو سمحتي متقوليليش الكلام ده تاني عشان حقيقي بتزعليني. الجدة: حاضر يا حبيبتي، مش هقوله تاني، ده إحنا ملناش غير بعض يا بنتي. زينة: ربنا يديمك ليا يا تيتة، يلا عشان تأكلي بقى وتاخدي الدوا. الجدة: حاضر، أي أوامر تانية يا أستاذة زينة. زينة: لا يا تيتة يا جميلة، بالشفا يا رب، يلا أنا هقوم ألبس بقى عشان أروح الكلية وبعد كده هروح الشغل. الجدة: ماشي يا حبيبتي، ربنا يعينك.

زينة: آمين يا رب. ذهبت زينة إلى غرفتها وارتدت ملابسها المكونة من دريس وخمار. *** وعلى الناحية الأخرى، في ڤيلا ضخمة تشبه القصر، يستيقظ شاب في الثلاثين من عمره من نومه على صوت رنات تليفونه. حمزة: ألو، أيوا يا زياد، مش مبطّل زن ليه على الصبح. زياد: إيه يا عم، إنت صاحي تتخانق على الصبح ولا إيه. حمزة: اخلص يا زياد وقول عايز إيه. زياد: موضوع يخص الشغل. حمزة: ما تقول يا ابني. نسيب بقى زياد وحمزة دلوقتي ونروح لزينة. ***

زينة: أنا ماشية يا تيتة، مش عايزة مني أي حاجة. الجدة: لا، سلامتك يا حبيبتي. زينة: خدي بالك على نفسك، وأوعي حد يرن الجرس تفتحي له أحسن يعاكسك ولا حاجة وإنتي قمر كده. الجدة بضحك: بس يا بكاشة، وخذي بالك إنتِ على نفسك. زينة: حاضر. *** زينة وهي خارجة من باب البيت قابلت جارتها سارة. سارة: صباح الخير يا زينة. زينة: صباح النور يا سارة. سارة: زينة، هو إنتِ رايحة فين. زينة: رايحة الكلية، فيه حاجة ولا إيه.

سارة: الصراحة يا زينة، أنا واقعة في مشكلة دلوقتي. زينة: فيه إيه يا بنتي، خير.