رواية زين الصعيد الفصل التاسع 9 - بقلم دودي

مريم: بعد ما وديت الأوراق اللي الدكتور طالبها مني ورجعت مش لاقيتك في الأوضة. كانت هدى موجودة، معرفش كانت بتعمل إيه، بس لاحظت أن أنا أول ما دخلت ارتبكت كدا لما شافتني. وسألتها عليكي قالت معرفش وخرجت على طول بس وشوفت كوباية النسكافيه كانت على المكتب فكرت عملتيها ليا، ولما شربت حسيت بوجع ولاقيت نفسي بصرخ، والباقي بقا أنتي عارفاه. جنة: بس ليه هدى ارتبكت، هي كانت بتعمل إيه؟ مريم: مخدتش بالي أوي منها علشان كان ضهرها ليا.

مريم وهي بتبص لـ جنة لاقتها سرحت كدا وزي ما تكون بتفكر في حاجة وسألتها: مالك بتفكري في إيه كدا؟ جنة: بصي يا مريم، أنا معرفش هتصدقيني ولا لأ، بس أنا متأكدة إن هدى اللي ورا العملة دي. مريم باستغراب: ليه بتقولي كدا! جنة: كلامك بيدل على كدا، تقدري تقوليلي ليه ارتبكت أول ما شافتك؟ طاب بلاش دي، قولتي كمان أنها كانت مدياكي ضهرها وقت ما دخلتي يعني كانت بتحط حاجة في النسكافيه وقتها وكان السم. مريم بصدمة: معقولة!

هدى ممكن تعمل كدا! طاب ليه أنا عملت لها إيه! جنة وهي بتخبط على كتفها: يا هبلة افهمي بقا، هدى مش كانت قصداكي أنتي، دي كانت قصداني أنا. وطبعًا علشان أنتي اللي شربتي النسكافيه فبالتالي الفخ جاه فيكي بدلالي. وبتعمل كدا ليه؟ أظن معروفة أوي، علشان تكرهني ونفسها بأي طريقة أبعد عنها علشان تكون هنا في القطاع الكل في الكل. مريم بتردد: لا بس برضه ممكن تفكيرك وتوقعاتك تكون مجرد إحساس مش أكتر!

جنة: ده مش إحساس ده تأكيد، وحتى لو بنسبة صغيرة فلازم أتأكد. مريم بضحك: وهتتأكدي إزاي بقا يا مفتش كرمبو؟ جنة: اضحكي اضحكي يختي، على الله النسكافيه يكون طلع حلو يا طفسة. مريم: ما خلاص بقا الله. جنة بضحك: بكرش همك على بطنك وخلاص، أروح أجيب حاجة أكلها أرجع ألاقيكي بتجعري لينا هنا. مريم

وهي بتخبط بخفة على كتفها: بقا أنا بجعر، ماشي غوري من هنا يلا يا عسل، مش عايزاكي. روحي شوفي راحة فين وبعدين أنتي مش المفروض تنزلي إجازة بكرا! جنة: أممم المفروض، بس قولت أطمن عليكي الأول، شوفتي بقا مش خلصني أسيبك إزاي؟ وتضحك. مريم بضحك: كتر خيرك يا ستي والله، طمرت فيكي العشرة. الحمد لله بقيت كويسة. جنة بضحك: ما لازم تكوني كويسة طبعًا مش شربتي النسكافيه كله يا أم كرش.

مريم بتنهيدة: يادي أم النسكافيه، كان يوم أسود يوم ما شربته يختي بلا بقا أمشي زهقتيني. جنة بضحك: طيب مش تزقي كدا يلا سلام يا كرشو. وطلعت جنة من عند مريم وراحت تضبط حاجاتها علشان الإجازة. اللواء جمال راح يطمن على زين. اللواء جمال: إزيك يا بطل عامل إيه دلوقتي؟ زين وهو بيحاول يتعدل علشان يسلم على اللواء جمال: الحمد لله يا فندم، مكنش في لزوم تتعب نفسك وتيجي لحد هنا.

اللواء جمال بحب: ولا تعب ولا حاجة، وبعدين أنت زي ابني بالظبط يا زين، كل واحد هنا في القطاع ابني ويمكن أكتر كمان. طمني صحتك تمام لو تعبان أو فيك حاجة قولي. زين: لا أبدًا يا فندم، الحمد لله بقيت أحسن. اللواء جمال: ماشي يا بطل، قوم بالسلامة وأنا اديتلك إجازة أسبوع علشان تستريح كدا وترجع لنا قوي. زين: مش لها لزمة الإجازة يا فندم، أنا كمان يومين وهخرج خلاص. اللواء جمال: مفيش نقاش، أنا خلاص طلعت قرار الإجازة.

زين بضحك: لا خلاص ما دام القرار طلع مينفعش نرفض. اللواء جمال بخفة: يا واد قال يعني مكنتش عاوز إجازة، حظك أهي جاتلك لحد عندك أهي بس مش تاخد الإجازة وتأنتخ. زين بضحك: لا متخافش يا فندم مش هأنتخ. اللواء جمال: يلا يا بطل أنا همشي وأشوفك لما ترجع من الإجازة سلام. زين: سلام يا فندم. نيجي بقا لماجد. كان نزل إجازة قبل جنة وقتها. ماجد هو وصاحبه في الكافيه. صاحبه خالد: إيه يا ميجو بتفكر في إيه؟

ماجد: ولا حاجة يا عم بس مش عارف لو روحت عيد ميلاد هدى جنة هتزعل ولا لا. خالد: وإيه عرف جنة؟ ما تروح يا عم وخلاص، وبعدين هي هدى دي حلوة يعني؟ ماجد: حلوة بس! دي تقول للقمر قوم وأنا أقعد مكانك، دي عليها جسم ملبن إنما إيه يودي اللومان وحياتك، ده جسمها كرباج. خالد بضحك: يخر بيتك بقا الملبن معاك في الشغل وساكت كل ده، شوقتيني أشوفها يا ميجو والله. بقولك إيه ما تاخدني معاك العيد ميلاد وعرفني عليها وينوبك فيا ثواب.

ماجد: أخدك فين يا عم هي رحلة؟ على الأقل أنا زميلها في الشغل واحنا دكاترة زي بعض، لسه العيد ميلاد الأسبوع الجاي بس مش عارف أمتي. خالد: يا بختك يا واد يا ميجو. ماجد: يا بختي إيه يا عم بس، حتى لو اللي في بالك أنت ناسي إني خاطب ولا إيه؟ خالد: على أساس بتحب جنة يعني، ما أنا عارف اللي فيها. ماجد بضحك: ما دام عارف بتسأل ليه بقا؟ خالد بخبث: طاب أنا عندي فكرة إنما إيه بمليون جنيه. ماجد باستغراب: فكرة إيه؟