رواية #رواية...انا هي نساؤك.. الفصل الخامس وأربعون 45 - بقلم الكاتبه سمو العراق

البارت الاخير 💔💔
رواية...انا هي جميع نساؤك
بقلمي..نور سمو العراق

💔💔💔💔💔💔💔💔💔

دخل المنذر وهو ملهووف من شافني ركض عليه وانه رحت بهمه وسرعه حضنته وابجي وابوسن برگبته وبصدره...

ولزمت ايده بستها اريدن انعش روحي بوجوده واحسن بي

وهو خطيه حضني ويبوس بيه عبالك طفل والكه امه الفاقدها من سنين...

حظن وجهي بكفوف اديه وابتسم كال...شلونج

غمضت عيوني باسئ وهمست ...طلگني

باوع بعيوني بصدمه وذهوول وبلع ريگه همس بهدوء وحزن ....شنووو؟

ذابت روحي وكرهتهه ودعيت عليها بالموت عبنها موش روح ياله هاي انتقام حرگت گلب نذري...

انه الما اعيشن لحظه بدونه جايه اليوم اكسر خاطره واگلله طلگ...

سكتت ما جاوبت بس دموعي جانت تجاوب بحزن...

هو رفع وجههي بااصابعه وباوعلي بعيون هشمتهن القسوه والحقد والالم صاح بوجهي....ليييييش؟

بلعت ريكي ولزمت ايده وانه احاول اهدي جاوبته...لا تعصب موش زين عليك لا يرتفع ضغطك ويصيرلك شئ

نتر ايدي بغضب وقهر ورجع لزمني من فكي بقسوه كال...ان شاء لله اموووت مالج دخل كوولي ليش تردين تتطلكين وبعدين شكوو جايه اصلا وذول تعرفينهم عيونهم نگسه وما يرحمون المن جايه جايه تحرگين گلبي،فوك قهري....

حطيت اصبعي علئ شفايفه بسرعه وانه امنعه من الكلام وانتحب بصوت مسموع رديت عليه..ياله لا دكول هيج انت شغب مراهقتي وحواسي ما تشتغل اله انت موجود ...انت كل الاشياء المستحيله....انت سبااح الكلب...

جر نفس،قوووي واختنك بحسرته رفع وجهه ليفوك ويحاول يثبت انفاسه رجع باوعلي وقبض علئ ايده كال...شتردين...

جانت انفاسي ترجف وكلبي راح يوكف ودموعي شلال جاوبته برجاء...اريدن اتطلك

غمض عيونه باسئ كال...اعرف بس ليش

بلعت ريكي ...عبن انه هيج صغيرونه وانت راح تطول بالسجن

صاح بوجهي بعصبيه وعيونه صارت نار كال...تردين تتزوجين

بجيت بنحيب ...ياله ينذري ما اريدن اتزوج انه اريدن انقذك...عبن انه مثل مرض السرطان لازم تستئصلني

هو تقرب مني وابتسم بحزن مسح دمعتي كال...راضي بسرطانج مناري واذوب بااحزانج يكفيني فخر اسمج مربوط باسمي ...وشخصج مذكور بجنسيتي...

هذا الكلام مو كلامج منو لعب بعقلج وقشمرج واعرفج عقلج وكلبج وكلج تنتمين الي ومستحيل تتغيرين من ناحيتي...

شوفي وجهج اصفر وعيونج محوره وذااابله وهذا كله بسبب حزنج عليه اعرفج تموتين باليوم الف موته لان اني محكوم اعداام...

تردين تقنعيني ان انتي ما مهتمه الي وتردين تتطلكين وتزوجين احجي منو ضحك عليج...

درت وجهي وانطيته ضهري همست ببكاء...محد لعب بعقلي انه اريدن اتطلك ينذري...

سحبني وحط ايده علئ خصري كال...منارس تعلميني بيج اني خابزج وعاجنج دكليلي نذري وتردين تتطلكين احجي منو لعب بعقلج

رديت عليه بنهيار...محد محد.

تنفس بضيق وغمض عيونه رجع فتحهن وباوعلي بحده كال....ما اطلك لو تموتين

تقربت منه حطيت ايدي النحيفه علئ صدره كتله...فدوه اروحلك طلگني انقذ روحك الخاطري والخاطر الجهال

هو لزم ايدي كال...بس كليلي منو دافعج عليه اعرف هذا مو كلامج يا خسيس حشه براسج عليه وبعدين انتي منو جابج...

بلعت ريكي جاوبته...ابن عمي جاسم

كال...اي وبعد منو وياه

همست بخووف...محد

تقرب مني وباوع بعيوني وانه بسرعه نزلت عيوني لمليانه دموع وضليت افرك بااصابعي...

كال بحددده ارفعي راااسج ...

رفعت راسي وضل مركز بعيوني كال...جذااااابه جابج فاروق مووو

شهكت من البجي وجاوبته...انه وياك روح وحده وتوزعنه علئ جسدين شنهي يهون عليه اجي اطلب الطلاگ بس وثاب كال اذا تطلكتي اطلع المنذر براءه واطعن بالحكم...

فتح عيوونه بغضب ورجف شاربه لزمني من اكتافي عصرني عصر كال...رحتي الذوووله الكلاااب غاب القط العب يا فار شفتيني ماكوو ضليتي تلعبين بكيفج ذوله اعدائي شلون سولت الج نفسج ورحتي

انه شمرت روحي بحضنه وانحب وابجي...اذل الروح لاجلك ينذري شلي بروحي وانت موش موجود اروحن واتوسل بس كون انت بخيير

كال بعصبية...مو بخير مو بخييير ما دام فضلتي ترحين تتوسلين بعدوي مو بخييير اني افضل الموت علئ العار

ذووله عار وهيهات اقبل تتوسلين بيهم وتذلين نفسج الروح وحده وما ياخذه الا باريها اذا متت فكلنه نموت لا تخافين هذا وعد وحق ومحد يبقه بس وجهه الكريم

المكتوب مضموم وهذا نصيبي من الدنيا افضل اكون مضلوم علئ ان اكوون ضالم خليهم يعدموني

همست بحزن ورجاء ....وانه

حضني حييل كال...انتي النفس ادري بيج راح تتاذين ويعز عليه فراكج بس يا منارس ما باليد حيييله اريدج تكونين قوويه ولا تشتتين الاطفال كوني الهم ام واب واحتويهم اعتمد عليج واعرفج ام بيت وشريفه ونادره وما تعيبج عيبه....

ما اتحسف اعدامي بس الي اتحسفه انتي وامي واهله واطفالي...احببببببج هووواي وشفت الدنيا بيج قصتي بدت بيج وانتهت بيج محولله وموهبه ومبريه الذمه يا عذابي...

اموت ومفتح عيوني لان كاسره ضهري وخاطري...

حضنته حيييل وصرخت بصوت عالي وانه ابوسنه واشمنه
واشبع روحي المحرومة منه عضيته بصدره عقوبه علئ كلامه لاذع

هو ضحك وحاول يرفع راسي فكيت اسناني وانه ارجف ودموعي غسلت وجهي غسل

ابتسم كال..احب قساوتج الترفه بس ليش عضيتيني

جاوبته برجفه..عبن كلامك جرحني وحسيتك راح تبتعد انه احبنك طمني لا تجرحني

جر نفس عمييق وزفره كال...اوعديني

غمضت عيوني ومجاوبته ما اريد اصدك راح يروح من اديه رجعت ضربته وانه منهاره ضليت الطم وابجي وانهاريت كلش احسن راسي يصدع وجع مو طبيعي عيوني احس بيهن مثل الابر من كثر البجي

هو يضحك ويحاول يلزمني بس ادري بي هو حالته اتعس من حالتي بس ميريد يزعلني ...

وكعت وهو نزل وياي كعدنه علئ الكاع حضني ومسح دموعي عبالك طفله بحضنه كال...يالله حبيبي لا تخافين ما امووت ...ما امووت شبييج

مسحت دموعي وحضنته همست...لا تموت

كال...ما امووت...

رفعت نفسي من حضنه وباوعتله باسئ...وعددد

ركز بوجهي وجر نفس كال...وعد

همست...انه اعتذر يعاصفتي خلي يولي وثاب الصخل انه لو يموت ما اتطلك منك عباله اتزوجه اتزوج نعال وما اتزوجه

ضحك بحزن وكال...كلب ابن سطعش كلب اعرفه يريد يذلني لج اني اذا طلكتج ورحتي تزوجي غير اموت الف مووته فعلا تعدميني

حطيت ايدي علئ شفايفه بسرعه وجاوبته...ياله يولي اسم الله عليك الموت لاعدائك يعاصفتي انه عايشه بيك لا تخاف انه مستحيل اعوفنك

ضل يحجي وياي ويوصيني علئ الجهال وانه تصيبني رجفه واضلن ابجي ويرجع يطمني...

بعدها اجوو كالو خلصت المواجهه...يالله اطلعي...انه رجعت حضنته وهو يبوس بيه ويمسح علئ راسي دموعي غسلتني وما غسلت همومي ...

جنت لازكه بي وكووه طلعت منه وهو خطيه هم جان لازمني وعاصر ايدي وكأن يكول لا تفاركني...

تفاركنه برغم ماردنه لفراك#

طلعت من السجن واشوفن فاروق واكف وجاسم بعيد عنه لازم مؤمل وشايل غرومه....

فاروق رسم ابتسامه خبيثه علئ محياه وتقرب مني باوعتله بااستهزاء كال...هااا طلبتي الطلاق

جاوبته بضحكه مستفزه...بااحلامك انت وشيخك الفاسد شيوخ تالي وكت..

رجعت باوعتله بحده وهاجمته...هيهات من الذله راح امشي علئ خطئ الامام الحسين عليه السلام من كال هيهات منا الذله...انتم ركزتو بين اثينين بين تتسلون بيه وبين تذلوني...وهيهات تذلوني وتتسلون بيه...

والموت اولئ من ركوب العار...انه ونذري نفضل نموت ولا يركبنه العار...

احبن اكللك انت سويتلي خدمه وما راح اشكرك عليها خليتني اشوفن نذري ويالله ولي من وجهي...

عفته مصدووم ورحت الجاسم ابجي...

اخذت غرومه وهو كعد يسالني علئ المنذر وانه اجاوب بدون تركيز بالي وعقلي كله عند نذري اروحن فدوه ونذر لطوله الحلوو...

اتذكرته ورجعت الذاكرتي القبل لا ينكتل اسعد بايام...
من شافني كاعده بهمه ارضع بغرومه وبطني جبيره وادرس وحالتي حاله....

تمدد يمي علئ الجربايه كال...شتقرين

جاوبته بملل...قواعد كان واخواتها...يربي هسه انه اعرف كان حتئ اعرف اخواتها..شعليه بيهن تزوجن خلفن شلي غرض تعاي اقريهن وكل وحده و وضيفتها...

هو ضحك بصوت كال..لسانج لسانج

جاوبته بضحكه..لو متزوج من اخوات كان مو احسلك عبن شنهي طلعن موضفات وكلمن الها وضيفتها احسن مني عشتووو هههههه

ضحك بصوت عالي كال..جاي اتخيلهن مثل حيحو الشحاطه ام الضغط والقميص ابو الكتافيات والجنطه الجلد يطيحن الطير من السما هههه

رجع باوعلي ورفع حاجب كال...مااريدهن اريدج انتي

باوعتله بطرف عيني وانه ابتسم كتله ...راح اصيرن دكتوره بعد ما اقلد الك

ابتسم بحب كال...صدك ولج اذا دخلتي كليه هم متقلديلي حتئ من هسه ابطلج

جاوبته بسرعه....ياااا والله ليش هو اكوو احله منك واحسن منك تجيب المزعطه وياك يالاسد انت اسسسد اسسسد وذولاك ارانب لا تقارن يكلبي همه ثوم وانت حلقوم...

هجم عليه وانه غرومه بحضني وضل يبوس بيه وانه ابعدنه اكلله ...ولك عيب منا غرررام

كال بلهفه وهو بعده مستمر...حتئ تعرف شكد احب امها

جاوبته...موش تطلع عينها

جاوب بضحكه كال..عود فگسيها...

ضحكت وانه امسح بوجه غرومه وهي ترضع وتباوع علينه مصدومه شنهي شبي ابوها هجم مثل الاسد علئ امها المسكينه....

رجعت من ذاكرتي وتحسرت علئ ايامنه يربي ما انسعدت هسه شفتك بابك يربي ليش انكسر وانه بعز شبابي...

جان الروح مجروحه وملكومه ومحد يطيبها غير طلعت المنذر وجنت اموتن الف مووته بالثانيه عبن نذري موش بخير....

...................................

هاله ....

حالتنه بالضيم...منا عمر والمنذر اعدام ومنا مؤيد ما موجود اني شابعه بجي حتئ عيالي ودوني الاهلي..

كلوبنه صارت رماد عليهم متنه من الحزن ومترقبين بكل لحضه يا اما ساعة حزن لو ساعه فرح...

ندعي ونصلي ونبجي وما خلينه نذر ما نذرناه ولا دعاء ما دعيناه...

امي جانت مخبله علئ المنذر وعمر...ومنارس اتعس من حالتها ضلت تتخربط وناخذها نشد مغذي...

ونيران دمعتها ما نشفت من عينها خلينه محامي لكن التهم جانت قوويه...

خطيه زوجي ما قصر وكف وياهم وكفة اخوو...

تفاجئت من زوجي كال الدعوه انسحبت من مؤيد و عابد وضلت بس،على ابو جاسم...

جاوبته ...ليش

كال...كل همهم المنذر وعمر وكعو بيدهم بعد ماكو حاجه للباقين من وره ابو العرك راح ينعدمون اثنين يسون عشيرتكم كلها....

ضليت ابجي من كال هيييج زلغت خدودي متت من القهر ...

ضل المنذر تقريبا هووايه بالسجن وتحدد موعد اعدامه....

المحامي مكدر يسوي شئ...بس من ناحية عمر انحكم مؤبد مااعرف ليش انصدر الحكم بعمر هيج والمنذر اعدام...

بس الي فهمته ان المنذر هو القائد للانقلاب العسكري..

ما خلينه للداء دواء ماكوو ونقلوو بغير سجن صارت الروحه اله صعبه

مؤيد رجع خطيه روحه طايره علئ اخوو وقابله اكثر من مره بس ما حجه شنو الدار بينهم...

بس جان المنذر يوصي علئ زوجتة وامه واولاده واحنه...

مؤيد شوكت ما تجين تلكونه يقره قران ويدعي للمنذر ...وخطيه حتئ مرته...

اما منارس مسودنه ومجنونه حالتها ما تنوصف مثل الام الفاقده كل اولاده بساعه وحده...

حتئ ما مهتمه بااطفالها ذبلت ذبووول طاغي صارت جلد وعظم وجهها اخضر صار مو اصفر ....

وبس ينفتح الباب تكمز ......

احنه ما كلنه الها عن موعد اعدامه لان خطيه مسكينه نكللها ان شاء لله يطلع ان شاء لله مؤبد مثل عمر...

وهاي حالتنه نموت باليوم الف موته....

..........................

دخلنه علئ سنه جديده 1994/7/16

صار عمري عشرين سنه والمنذر سبعة وتلاثين...
والجهال كبرت...

جنت نايمه واشوف جدي كاعد يضحك ويسولف ويه المنذر كعدت من النوم وركضت عليه بفرحه ولهفه وانه محتاره احضن ياهو بيهم نذري الكاسر ضهري

لو جدي صلف التبهذلنه بدوونه ...ركضت حضنتهم ثنينهم وانه ابوسن بيهم واشكي همي الهم واعاتبهم

جدي مسح علئ راسي وضحك كال ..لا تخافين المنذر يمي وهو بخير

رجعت حضنت المنذر كتله...مشتاقتلك

ابتسم وحضني كال...لا تخافين اني بخيير بس مشتاقلج تعاي ارد اشوفج

باوعتله بقهر ..انت شعندك يم جدي

كال..اليوم رحتله وكعدت بيت احسن من بيت جدي ومنتظرج تجين بس مو هسه هسه لازم تدرين بالج علئ الجهال...

هزيت راسي بأي سألته...مرتاح ؟

ابتسم بس جان وجهه يشع شكد اني اشوفه حلوو بس هل مره احلة من كل المرات كال..اي الحمد لله مرتاح...

فتحت عيوني واني ارمش كعدت ملهووفه ياربي هذا حلم مو حقيقه حرامات انكسرت فرحتي وتحطمت احلامي...

بجيت بهدوء ورحت سبحت وغسلت وجهي ما اسمع بس الصرخه صارت انهبطت ...

عبالي الجهال ومااسمع بس الصريخ صاار ومؤيد يصررخ

طلعت من الغرفه اركض شفت عمتي تلطم وتصرخ كالت...يمممه عدموك المايخافون الله...

هي كالت هييج وانه تخبلت هجيت طلعت اركض بالشارع مثل المخبله اثاري نذري معدوم وانه ماادري

واصررخ بصووت عالي واصييح ...ولك منذرررر منذررر ولك لا تعوفني

وكعت علئ ايدي لحد الان اتذكرها حسيت شاغت روحي وفرفحت بس ما اهتميت

خطيه ركض وراي اخووي عابد وهو يصرخ ويصيح...يااخوويه يامنارس خوويه كسرتي ضهري كون انه الميت ولا نذرج

جنت الطم واصرخ منهاره حييييل
شالني اخووي ودخلني جووه اباوع كلها تتلاطم وتتصارخ...

ماجنت مصدكه الصار اكولن جذب هسه يجي منذر هسه يفتح الباب جانت الساعه بالتسعه ومؤيد كال انعدم من الساعه بسته الصبح....

شعري كطعته بحيث ترس الكاع لطمت علئ وجهي بحيث صار وجهي قطعه زركه....

شوويه وجابوو من الطب العدلي فتحو الباب طلاقتين ودخلوو بي للبيت من شفت جنازته تسودنت ...

انهزمت واصررخ وكلها ما لزمتني...ما تقربت منه ولا اجيت الجثته

شوويه وطلعو الجنازه للدفن وانه طلعت وراهم خطيه جيرانهم لبستني حجاب وعبايه

وكفت شفتهم شايلين التابوت ويردون يشدونه علئ السياره وانه لطمت كتله...شلووون الحيييد شالوهه الحماميل وين السلح ركابة الخيييل

وينهم يمنذر وينهم جنت احجي والدموع تتطافر من عيني

ركبوني بالكوستر وكلهن راحن للدفن والولد شككو قمصانهم عليه...

جان الطريق طووويل واني علئ فرد صرخه وصلنه للنجف ودخلونه للمغيسل بير عليوي...

دخلوو يغسلونه دخلوو عمتي من انتهو من التغسيل..

وبعدها دخلووني يممممه يمممممه الله لا يحرك كلب واحد علئ عزيز ولا يخلي احد مكاني

جنت ارجف واصرخ والطم وانحب ومااعرف شسوي

دخلت شفته نايم علئ المغيسل ومجفن بس وجهه طالع تخبلت انهرت تسودنت

لزمته من وجهي وعاتبته بالم ...هااا منذر رحت مو كلت ما نتفارك مو كلت انت مناري ما اكسر كلبج شوو كسرت كلبي يگلبي...

اباوع الملامحه مثل الصقر ما هامه المووت بسته بشفايفه يممه ريحة عطره مي ورد تجنن يممه يالشهيد يالمضلووم يالمنذر...

اعرفنك سبع وانمر عليك الكون مگلووب...

راحت تضل ذكرئ فاجعتني كل عمري وعد مني يا منذر اصليلك واخذ ثارك وانه عند الوعد

حضنته حييل وانه اصرخ ما عهدتك هييج قاسي يا منذر انت لجنت بس تشوفني تحضني وتلحگني محولل يا تاج الزلم محولل يا بن روحي

باوعت لرگبته حبل المشنقه حازه حز صايره حمرره سوده بوجهي سوده عليه تصخمت منارس من بعدك يا غلاها...

گوه سحبوني منه كمت مااكدر اسيطر علئ روحي كل شويه واكعه...

اخذو للامام علي عليه السلام صلو عليه ورجعنه للدفن...

انه شفت الرمل الحاره والحفره عقل ما ضل براسي صرت اركض مثل المجنونه وكلها تركض وراي صحت بصوووت عالي ...ولك صلللللللف ولج غررررررام اجاكم المنذر تلكووو اجاكم ابن روحي عاصفتي اجاكم اتلگووو....

باوعت للسماء صحت ليش ربي شنهو ذنبي مو كتلك لا تختبر صبري بالمنذر مو تعرف مااكدر افاركنه...

دفنوو وما شفته جنت منهاره التراب كله خليته علئ راسي خلصنه دفن ورادو نرجع...

انه لزكت حاضنه كبره وكاعده ومااقبل اروح وخطيه عابد يتوسل بيه....

كوه شالني واخذني....

رجعنه للبيت وانه اندفنت احلامي وكل امالي ورجعت جسد بدون رووح....

فاتحه ما نصبوو كالوو ...اله ناخذ ثاره...

ثلاث ايام الفاتحه احنه لا ناكل ولا نشرب بس نلطم كلتلم...ابو جاسم اني بريئه منه اليوم الدين لا هو عمي ولا اني بنت اخووو...

عمتي خطيه عمت علئ المنذر والبنات عيونهن زرك من اللطم اخوهن وشيال همهن مات مضلوم...

ابو جاسم من مات المنذر سلم نفسه متندم وحكمو عشر سنوات...

انه وره الثالث رحتله اخووي اخذني انه وعمتي والبنات....

اول ما دخلت المكبره تخبلت بالصريخ جان شويه الجو حااار

لاكتني حمامه بيضه ضلت تمشي وراي وصلنه الكبره بعده تراب

شمرت روحي علئ كبره وانه اعاتبه واحاجي كتله..غرومه يتمتها يالمنذر مصطفئ ومؤمل ومرتضئ صارو يتامئ بس لا تخاف عدهم ام تجبر بخاطرهم بس انه يتيمتك ياهو يجبر بخاطري

كل مره تتلكاني يالمنذر شنهي بعد ما تحبني شوو ما تلكيتني الموت ما خلاك يبعد كلبي...

خطيه عمتي تنعئ والبنات يصرخن ومؤيد وجاسم وعابد ماتوو يصرخون ...

حرامات التراب تدفن زلم وتخلي غمان ضل الاغم فاروق و وثاب يعيثون بالأرض فساد..

عابد حط ايده علئ جتفي كال ...منارس هاي الحمامه من دخلنه للمكبره لحد هسه هي لاحكتج احتمال روح المنذر...

انه باوعتلها فررحت مديت ايدي الزمها هي ابتعدت وكفت ومشيت بسرعه عليها طاااارت وضلت واكفه علئ كبر عالي وتباوع عليه...

انتظرتها تنزل واخذها بالبيت اداريها بس هي طارت

اي طارت مثل نذري من طار من اديييه...

باوعت لكبره وحضنته ونمت ودمعتي بللت ترابه...

بعدها وكفت وانه ناويه اندفن يمه بكل حزم واصرار لكيت خشبه وكفت وحددت بيها كبر بصفه كلتلهم...هذا كبري ان شاء لله كم يوم وجايه يم المنذر

همه خافوو ضلينه تقريبا اربع ساعات يمه متت من البجي وضليت اتقيئ

خطيه كووه اخذونه منه اربع ساعات وانه كاعده اسولف عليه وابجي واصررخ....

رجعنه للبيت وقررت انتحر جزعت دخلت باليل للحمام وانه متناسيه جهالي رشيت النفط ولزمت عود الثقاب شغلته ما اشتغل...

جريت نفس ومااعرف هو اجاني بس كان اني شفته حلم يقضه بس مثل لخطف مني كال..ازعل عليج والله الجهال ذمه بركبتج لا تاذين روحج

بعدها استوعبت اني شجاي اسووي اريد انتحر واروح جهنميه واكسر كلب نذري يممه اسم الله عليه

رحت سبحت وغسلت وتوضيت وصليت اعتذرت من ربي...وقريت قران هديت سورة يس وسورة الهاكم والتكاثر حتئ زرتم المقابر لهديتها لروح نذري...

وتلث ايام الفاتحه انه اصليله صلاة الوحشه....

مرت سنتين غرفتي ما دخلتلها اببد سنتين اني صايمه وهديتهن للمنذر

ومرت سنين وجرحه كل يوم يتجدد وانتهت ضحكة منارس الفطيره الساذجه وصارت ارمله منكوبه وام للايتام...

كبرت وربيتهم و وصلتهم حاولت اكمل دراستي مكدرت عقلي وفكري يشتغل...

الحمد لله تعوضت باولادي يفكسون عين الشمس اذا واحد زعلني...

عمي ابو جاسم طلع بسنة 2001 اجه للبيت وطلب رضاي وانه رفضت حتئ اشوفه ولحد الان

وره السقوط طلع عمر وجانت فرحه كبيره للكل جريت نفس لو منذر محكوم مؤبد جان هسه طلع...

خطيه عمر اول مطلع راح للمنذر وانه رحت وره ما اجوو...

مؤيد صار عنده اطفال والحمد لله عايش حياته...

جدتي ماتت ويه طلعت عمي...

وامي عايشه ومتحجي ويه عمي وانه عايشه ويه عمتي واولادي ...

ولحد الان اروح للمنذر واعاتبه....

لسان حال منارس...💔

كوّم احظني منذر وبوسني أترجاك
نذري شبيك ساكت هذه مو ملكاك
تلاكيني جنت ملكه الطفل بالعيد ها منذر كمت والموت ما خلاك ...
روحي وكلبي اخذهن نذري خذهن هاك
مالهن ضروره تعلعلن بجفاك
يا منذر تعال البيت ما بي روح
شو حتى السوالف فاهيه بلياك
بيتك ناطرك ويريدك اتعود وهدومك ينذري متانياتك
مشتاكيلك بكد طيبة البيك
والك وحشه بكبر كسرة منارك...💔

.............................

اعتذر عن النهاية المأساوية للقصه لكن هذا واقع حال البطله وماكدرت اغير بيها لان هي طالبه الرحمه الزوجها وهذا احد اسباب نشر قصتها...

واني حالي من حالكم من بداية الروايه واني ميته من النهايه بحيث اليوم كتبت البارت واحسن عيوني مااشوف الكيبورد ودموعي ترست الموبايل حتئ ضغطي هبط...

ومنارس قهرتني حييل بحيث تخابر وتبجي واني ماتحملت بجيت وياها وتعبت نفسيتي لذالك اعذروني عن النهاية حالي من حالكم وحالنه مو احسن من حالتها الله يساعدها ويصبرها....

القصه انتهت بالتسعين بالنسبه للمنذر اما منارس والبقيه لا منارس ام صالحه رغم صغر عمرها ربت اولادها و وصلتهم وما شتتهم ولا تزوجت كعدت عليهم وربي وفقها...

واجه يوم للضالم وسقط النظام وصار فاروق مثل الجرذ المنهزم نهار كله خاتل بالبيت وعاش عشر سنوات بغرفه ميطلع منها لان مطلوب من هووايه ناس...

تصوب مره وما مات وبسنه 2012 طلع بالباب مال بيتهم وانقتل من مجموعه مجهوله وضاع دمه بيوم موته هلهلت منارس...ونصبت جادر للمنذر....

وثاب والعم ابو جاسم اثنينهم ما حصلو علئ الشياخه اخذها احد افراد عشيرتهم....

حادثة قتل فاروق غامضه وغريبه....

الي هنا اسدل الستار واغلق ابواب رواية...انا هي جميع نساؤك...

واتمنئ قد وفيت حقها وجعلها من الروايات المليونيه

انتظروني برواية جديده ان شاء لله تحمل في طياتها الكثير...

كونوا انتم كونوا بخير...احبكم💔

نور سمو العراق...