رواية #رواية...انا هي نساؤك.. الفصل السادس وأربعون 46 - بقلم الكاتبه سمو العراق

غائبي انا افتقدك..💔

هلاوو بنات شلونكم ان شاء لله تكونون بخير...

طبعا حبيت اشكركم واشكر مشاعركم الجياشه انصدمت بكمية التعليقات المعزيه بجميع انواع التواصل الاجتماعي شكرا من قلبي الئ قلوبكم متابعيني...
حسيت بمدئ شفافيتكم وصدوك حسيت الدنيا بخير واني اشوف اقبال المعزين لحبيبة قلبي منارس...و رفع الحداد داخل حساباتكم...

القصة نجحت بيكم ربي يوفقكم ويعلي مقداركم ولا يهضمكم علئ عزير....

اسفه مكدرت انزل صور عن اجوبتها لان شفتو كميه الاسئله وكذالك راح ازرع تفرقه اذا وحده طلع تعليقها وحده لا...وكذالك هي تتعب بالكتابه لذالك اني حلقة وصل بينكم وبينها...

اتصلت بيها واستفسرت منها....كانت هذي اجوبتها 👇👇👇👇👇👇👇👇👇

لطلب الرحمه وقراءة سورة الفاتحه ماهو اسم المنذر الحقيقي...

-المنذر يملك اسمين بالجنسيه وبالحياة العاديه ...بالجنسيه اسمه مازن...لذالك جنت اكول احبنك واحبن حرف النون عبنه من حروف اسمك

اسمه حازم لان جان دائما يوكف وياي ويساندني لذالك يسمونه حزام منارس...منارس وحزامها...

لهل سبب الكاتبه اختارت المنذر وطبقت المقولتين عليه....

س/حنان شنو حجت الصلف وماهي سبب غموض موته

-حنان مااعرف شنو حجت هي اجت هو طلع يتوعد بوثاب ومات مدعوم..

من سالناها نكرت كالت اجيت اشوف ابني طبعا بس اني وعمتي سالناها مدخلنه الولد خفنه من المشاكل وخفنه تصف ويه وثاب وهي فعلا صفت وياها

بعدها همه شالوو حتئ منعرف بأي ارض ولا تسال عن ابنها راحوو محافظات

س/..اولادج وين وصلوو وهل هم متزوجين:؟

غرام ومؤمل جانو فرع ادبي ومعدلاتهم طلعت عاليه رادت غرام تروح لغات انكليزي بس اني كلتلها رغبة ابوج قانون وانتي بكيفج تردين تحققيها اولا هي خطيه امتثلت للامر الواقع وخلصت قانون..وتزوجت وعندها طفلين...

ومؤمل من البداية زرعت بعقله بأن هو ضابط واسسد مثل ابوو لذالك هو عنده مؤهلات ونقبل بكلية الضباط وتعين الحمد لله ....

التوم..ذوله اووف منهم هووايه بيهم شبة من ابوهم وحتئ بالتصرفات...

اتخذو الفرع العلمي ومعدلهم كان قليل بعض الشئ دخلتهم جامعه علئ حسابي اجهزه طبيه...

والحمد لله تعينهم مركزي....

بس غرام متزوجه والولد ممتزوجين رافضين الفكره حاليا عندهم شغلات اهم...

س/...مؤمل يعرف انتي مو امه الحقيقيه وكيف كان شعوره عند معرفة الحقيقيه....

مؤمل ابني واني امه اي كلام ينقال غيره ازعل والله هو سند اليه ولاخوانه عشنه بيت واحد يعرف ابو مؤيد اي بس هو ينتمي الي وكاعد وياي واعتمد عليه بكل لامور

مؤمل ضابط ورغم مركزه يكلي الجنه تحت اقدامج يفرش فراشي ويوكف احزام ضهر لاخووانه احببنه مثل مااحب اخوته...

اصلا هو ميعترف بالكل بس بيه ويكلي انتي امي مره كاتب علئ اسمي الغاليه واني خابرته صار هجوم وكلبي نار عليه...

من اصدقاءه يشوفون اسم الغاليه يكلوله هاي حبيبتك يضحكون عليه...

يكلهم حبيبتي وغاليتي وامي مؤمل مااكدر اوصفه بكلمه...

س/عمر بعد ما خرج من السجن صار عنده اطفال

-عمر صار عنده ثنين بنات وثنين ولد...كلهم الفينات..
ما شاء لله بناته حلوات وحده 2004 ميته عليها اريدها بس تكبر اخطبها لمؤمل بس كل ما احجي وياه وكال زعطوطه مثل ابوو هههه...

س/..احجي الي عن موت فاروق

-فاروق جان بالنظام هواي ناس راحت بسببه لذالك هو مطلووب...من صار السقوط صارت الثارات...

هو دفن روحه دفن عشر سنين ميطلع ابببد لكن نسئ قوله تعالى...يدرككم الموت ولو كنتم في بروج مشيده....

تصوب مره واخذ احتياطات اكثر...

وبعدها انقتل العشيره اتهمت مؤمل بقتله كالوو اجو ثنين علئ ماطور وهو كاعد بباب بيتهم وملثمين وقتلوو...

بس اني هجمت علئ العشيره وكلتلهم ولدي خط احممر....وماعندكم دليل

هو جلب وفطس ومطلوب للعالم شكو تدخلون ولدي..

س/..هل استلمتي تعويض للمنذر وكيف كانت الحياة من بعده...

-استلمت اني وعمر كل واحد 83 مليون كونهم سياسين وما اعتبره تعويض لان العراق كله ميعوضني زوجي...

بس لقهرني ابو جاسم حاله من حالنه استلم 83 مليون اعتبرو سياسي للاسف...

س/ّاحجيلي عن وثاب

-وثاب انسان حقير سافل من انعدم المنذر راد يصالح العشيره ويتودد النه بس اني كل شخص ينتمي الوثاب اني متبريه منه حتئ لو اخووي..

ما كدرت انتقم منه اخاف علئ اولادي واخاف ادخلهم بالثارات واخسرهم مخليه ربي ياخذ حقي

هو حاليا انسان كبير وشكد ططوه صار انفجارين وهو بنصهم ما مات بس تصوب اثر الصواب سمعت عود صاير ينسه ومتخبل مااعرف زهايمر ماافتهمت عساه بالزهايمر مسودن وكلها تركض وراه ان شاء لله

س/شنو موقف العشيره بعد اعدام المنذر

اكثرها دكول هو قائد انقلاب عسكري قابل هو ميعرف النظام وهيج يسوي وكلها مصالح محد نصفني غير اخووي ومؤيد...

اما البقيه باطليين ومصالح...

لحد هاي اللحظه باطلين ذاك اليوم واحد من الكباريه دز النه واحد يكول انتم ما مهتمين بالعشيره وما تدفعون فصول وفواتح واعراس وصندوك ما تدفعون اله راح نطردكم من العشيره واحد من التوم كله تسون فضل...ياريت والله...

س/ شلون دبرتي العيشه من بعد المنذر

-صعببه حيييل صعبه ...اني جنت مجنونه بحيث اصررخ صوتي يطلع جان جيرانه شايب يدز بنته عليه خطيه تكعد تواسيني ودكلي صلي اله وادعي مجانت دكول هو شهيد تخاف..جان الخوف سيد الموقف ومن تحجي تضل تتلفت عبالها واحد يسمعنه...دكول احمدي ربج واشكري اكو ناس ما استلمت جثث انتي مو زين دفنتي وزرتي وكفتي علئ جنازته

سنه كامله اني حتئ ما اسولف واذا سولفت بس احجي بي هملت نفسي واطفالي خطيه حمواتي جانن ياخذن الجهال يمهن يدارنهم

بعدها صحيت علئ نفسي وكلت لازم اسندهم جان هو مخلي فلوس بالبنك طلبت من عابد يجيبهم للاسف مصدريهن ماكو اي مبلغ...

بعت ذهبي وانطيت الفلوس العابد وهو شغلهم بأرض زراعيه وجان يجيبلي شهريه فلوس وميكفي...

اشتغلت بتطريز العبي او اخيط عبي العباءه وعنت نفسي بس الله شاهد عمتي وامي واخوي ومؤيد محد قصر...حتئ حمواتي...

س/ وين عايشه حالي

-ببغداد اني اولادي وعمتي فقط ومؤيد طلع هذا البيت يحمل ذكريات زوجي اطلع منه جنازه يالله يبعونه...

عمتي وامي عايشات بس كبرن حيييل

جدتي ماتت....

صار خمسه وعشرين سنه لابسه اسود رادو ينزعونه مني بزواج غرام لكن رفضت مستحيل المن البس ملون راح زوجي واني بعز شبابي انحرمت منه ومن الألوان...

جان كلشي بنفسي حلفت اموت وتنزعه المغسله و ماموجود المنذر حتئ يدفع كفاره لذالك اني مقتنعه وعند وعدي...

س/شنو رايج بالبارت الاخير

قبل النشر بثواني حسيت الموت دخل برجليه ومثل يوم وفاته واني مترقبه جثته وبداخلي مكذبه الخبر قريت البارت اكثر من عشر مرات وبكل مره اقره بيها نفس الشعور والاحساس الدموع حجبت عندي الرؤيه وشهكت من البجي احس راسي انفجر

ولدي استغربو حالتو من يصير بيه هيج يكلولي يمه كافي والله نروح نزوره وفعلا ياخذوني اله

لحد الان ما نسيناه نسوي ثواب ونتصدق ونزوره وكل ما اروح للنجف عبالي ناري تبرد اثاري هي نفس النار...

انكسرت كسره جبيره يتيمه صرت فعلا حسيت بيتم..مات ابوي محسيت يتيمه لان امي عوضتنه بس المنذر كسرني كسر ما ينجبر مستحييل...

شكد ناس خطبتني بعد وفاته وشكد اجو عليه كلتلهم يمممه انه المنذر جوه التراب وتكشخ الغيره عساني متت قبله ما يحله بعيني رجال غيره

الحمد لله على كل حال...

كل يوم احجي وياه واطلع الصور عبالك ما ميت و روحه وياي واحجي وياة واغازله بنفس اللهفه ومن ازوره احجي وياه بنفس لهفتي ولا كدرت السنين تغيرني...

هو خطيه سوده عليه يجي يزورني والله مره تمرضت اجاني يمسح على شعري وانه حضنته كتله بفرحه...انت عدل

كال..اي واجيت اشوفج كالو مريضه

كعدت مرعووبه مسودنه يدري بيه مريضه وجاني يمه يالحنين يالمضلوم...

لهفتي كتبتها بالقصه وان شاء لله زوجي استفاد من نشر القصه وحصل رحمه

لا تنسوني بالدعاء وربي يحفظكم ويحفظ اولادي

.............................

شكرا حبيبت قلبي منارس تعبتها بالاتصال هذي جانت اجوبتها واذا حابين تسالون أسئلو هنا👇

............................

واني جدا اسفه كوني رضيت اكتب قصه نهايتها ماساويه لكن فعلا مجنت اعرف النهاية ماساويه من جانت تسولف باللهفه ومقاطع تموت ضحك جنت متونسه

كلتلها هسه شكد عمره 60 مو

هي ترسلي بصمات رسلتلي بصمه كالت لا توفئ بعنر 38

انصدمت والله فعلا انصدمت كلتلها يااا شلون

ضلت تحجي بالبصمه وبعدها رسلتلي بصمه كالت نص ساعه واكملح لان اختنكت...

فعلا حيل حزنت عليها وكتبتها لان الحمد لله حصل رحمه منكم...

اشكر الجميع واشكر كروب قصص نوره وغدوره علئ المقاطع الحزينه ولاشاده بالقصه

.بيج قصص ليل وعشك

وبيج قصص عراقيه من واقعنا ولهفتهم وارسال مقاطع حزينه تدل علئ حزن منارس...

واعتذر منهم كوني ما كدرت انشرهم لان لازم اسحبهم من اليوتيوب واني ماعندي قناة خاصه لذالك اعتذر وكلها وصلتها المنارس

شكرا مره ثانيه...

ماكدرت تجاوب علئ كل الاسئله لان قصتها بعد موت اسدها تحتاج جزء ثاني...

لكن اني اكتفيت كون اسدها غير موجود بالروايه....

كونوا انتم كونوا بخير...احبكم

نور سمو العراق....💔

من كد ما بجيت عليك وادم غربه حبتني 😢

الصور والمقطع اهداء من المتابعه بالفيس...سدرة المنتهئ...

وهذا شكر من منارس