رواية #رواية...انا هي نساؤك.. الفصل التاسع وثلاثون 39 - بقلم الكاتبه سمو العراق

البارت السابع والثلاثون
رواية...انا هي جميع نساؤك
بقلمي..نور سمو العراق
💔💔💔💔💔💔💔💔

هواي احبها بكد بياض سنونها
#_الله_مدري_اشحاط_فوك_عيونها
حلوه  ويغار  الغصن  من طولها
#__اشلون__اهلها__تطلع__يخلونها
بارده
       ومنها
                الثلج
                        ماخذ
                                 خصال
#__وحتى_فجر_الله_اخذ_من_لونها

.............................

مؤيد...

وكعت منارس وهي تنزف...خطيه جانت حالتها حاله تبجي علئ غرام وهي مااعرف شبيها تنزف...

المنذر تخبل عليها رفعها الصدره وهو يضرب علئ وجهها ضربات خفيفيه ويحاول يصحيها...منارس

اجت الممرضات بسرعه جابو سديه اني سالت وحده منهن كلتلها...غرام شلونها

كالت...ديعالجوها

المنذر شال منارس وخلاها بالسديه وهو يصيح عليهم وربكهم خلاهم ناس تركع بناس....

ضلينه محتارين بين منارس وغرام...

المنذر لزمني كال...روح يم غرام واني اضل يم منارس

هزيت راسي ورحت يم غرام...

جنت اباوعله من العنايه المشدده...حطولها مغذي واوكسجين وبطل دم...

طلع الدكتور اني استقبلته بالهفه كتله....هاااا دكتور بشر

تنهد الدكتور كال...وين جنتو الطفله صاير عندها جفاف حاااد وتحتاج عنايه...

بلعت ريكي اذا تموت غرام والله منارس والمنذر يتخبلون لا منارس تهج اعرفها شكد تحب الاطفال ...انوب مو غرام

جريت نفس جاوبته...ناخذها مستشفئ خاص

هو جاوب بهدوء...بابا مو قصة مستشفئ بس طفله صار الها اكثر من 3 ايام اسهال وتقيئ اي سوائل ما ضاله بجسمها....

حنه دنسعفها بالمغذي ونسوي العلينه والباقي علئ الله

مسحت وجهي بتوتر كلها التمت علينه انوب المصيبه امها تخربطت

ادري هنه عود ليش مااخذنها مو يشوفنه مشغولين وناس رايحه وناس جايه...

بس ازهار كالت لامي اتذكرها وامي كلتلها خلي تشربها خافض حراره وجدتي دكلي شربيها ورود

ما عبالي هيج حالتها سيئه

اني حتئ حجيت ويه المنذر كتله بنتك حالته مو زينه مصخنه

هو كال...عندها علاج خلي تشربها وتاخذه للمضمد هي وامي

كلت لامي كالت صارت زينه اني بعد العليه سويته ضلت هي ورجلها

ضليت كاعد منتظر شنو يصير والمنذر يم منارس

.........................

فتحت عيوني بغواش وتعب...اني من غير هيج وهيج ما اشوفن عبن عيوني يوجعني من البجي...

وكلبي نار علئ غرام ...

شفته كاعد مقابيلي وعاكد حواجبه انتبهت علئ ملامحه رجوليه اكثر من اللازم...

وشاربه مخطوط بااتقان...جانت زهوره دكول شوارب المنذر شتويات وتضحك عليه...

انه كلتلها...رجل بدون شارب كالحمار الهارب..

وهي تخبلت عبن مؤيد ماعنده شوارب...

اي انه أي واحد يقلد علئ نذري اردنه...وما اسكت...

اول ما شافني فتحت عيوني اجه عليه ملهووف لزم ايدي وابتسم كال...هااا منارس شلونج هسه

رفعت نفسي بتعب المغذي مشكل بيدي جاوبته بتعب وزعل...موش زينه غرومه وين انه شبيه...

هو جر نفس وحط ايده علئ راسي وابتسم بفرح كال...انتي حامل

انه فزيت مرعووبه...ياله ياله جذب موش حامل ياربي موش حامل مااريدن...كله من وراك انت السبب

هو تخبل كال...لج دتحسسيني مغتصبج شبيج بابا هذا رزق واني لحد الان خايف افقد الطفل وضعج ممستقر...وانتي متردين الطفل..

رديت عليه وانه امسح دموعي...انت بنيه وحده وما مهتم وبعدين انه عليمن الحك علئ غرام على مؤمل لو علئ دراستي...

هو جر نفس كال...ازهار موجوده تهتم بمؤمل وغرام...وانتي اهتمي بدراستج واني اوصي عليج

صحت بوجهه...ما احبنك نذري...عبن انت فارغ عبالك انه مثلك ماعندي شئ...ياله انه كلشي فوك راسي وانه بعد ما اتحمل غرومه مريضه صار 3 ايام

اكلكم اخذوها محد ياخذها عمتي دكلي سويلها كمادات وجدتي دكول سويلها فوح وانت ادزن عليك دكللهم خلي تاخذها امي...

منا لمن البنيه اجت تموت وروح ابووي اذا غرومه ماتت اكتلنك انت واهلك ولا دكول ما كالت...

ضحك بهدوء كال...واصير شهيد كاتلتة مرته بسبب اهماله البنته والها...احلئ جريمه مرة عليه بتاريخي العسكري

رديت بعصبيه...اي اضحك عليه هسه كول انه شبيه وغرام شبيها...

كال..صار عندج نزف بسيط لان انهبطتي مجرد ثقب مشيمي ولازم ترتاحين ومتتحركين...اما غرام عندها جفاف وان شاء لله تصير زينه لا تخافين ماكوو شئ...

جريت نفس ودرت وجهي...شلون ورطه أنه حامل وغرومه ومؤمل صغار وعندي امتحانات والاسد مايحس بس،يريد يكثر فروخ...

همس بهدوء...حبيبي لا تضوجين ترئ والله الكاع ما ساعيتني لان حامل....وان شاء لله غرام تصير بخير

بلعت ريكي...بس انه بعدني صغيره وعندي بنيه. وولد وادرس ما يصير هيج

مسح علئ شواربه وعض شفته كال...واني شيبت واريد اطفال مو انتي عمرج 19 مدري 18 وما تردين ترئ اني طاك ب 36...

رديت عليه...يمه شويب تقشمرت

ضحك كال...مو كتلج وكلتي اداريك

جاوبته بحنين...اداريك بعيوني بس موش انت ما تكعد هسه حتئ عيب جدي ترابه بعده اخضر وانه حامل

رد بجمود ...واني شنو نايم بفاتحة جدج ترئ صارلج شهرين حامل...ولا تنسين غرام عمرها خمس اشهر...

جريت نفس...انه اريدنك ابووي كون من اتنخاك تركضلي اريدنك ليل من اتوجع تسهر وياي

كال...واني هيج وعند عيناج اذا لمنوسه ماافزع افزع المن الحيحو

سكتت جا هو عاصفه ياهو اليكدر علئ لسانه

اجت الممرضه شالت المغذي مني سالتها علئ غرومه كالت...بقسم الاطفال...

انتبهت علئ المنذر كال...لا تخافين رحت للدكتور وان شاء لله يهتمون بيها انتي اهتمي لنفسج...

واني راح اخذ اجازه اضل وياكم تمام

هزيت راسي بأي بس انه كلبي نار علئ غرام موش بخير خطييه...

ضليت الوبن والمنذر يمي ...

بعدها كتله...خليني اروحن اشوفنها

هو مقبل بالبدايه بس انه مثل عجوز العرب الحن هوواي اضطر ياخذني الها...

يمه من شفتها تخبلت عليها حالتها ما تطمن وحاطيلها دم ومغذي و اوكسجين

ضليت ابجي وانوح عليها ومنذر ومؤيد يطمنون بيه

اجه الدكتور كال...لا تخافين مابيها شئ ان شاء لله

هزيت راسي بأي وكعدت علئ الكراسي الموجوده...

كعد يمي المنذر باوع بوجهي كال بحزن...ذبلانه وعيونج رايحه لا تسوين هيج بعد الراح راح منكدر نرجعه

هسه الاريده منج تقريله قران وتصلين وهذا هو الي يريحه بگبره...مو اللطم والبجي هذا الشئ مو زين تاذين الميت وتاذين نفسج

جريت نفس ونزلت دموعي هو سحبني الصدره وباس راسي كال...اني ابوج وجدج ونذرج لا تخافين ما يفرقنه غير الموت...

حطيت اصبعي علئ شفايفه كتله...ياله لا تطري الموت يبعد كلبي مالي حييل افارك احبابي بعد روحي ذابت من الحزن يالنفس...

هو ابتسم بهدوء ...وضل يمسح علئ ضهري...

وفرحان لان احمل باحشائي ولي عهد من عنده...

انه اعرفنه اسسد اسسسد هل مره مضبوط وان شاء لله ولد من صلب ابووو...

ضل ويانه وما تركنه ولا لحظه

.................................

عمر كعدت الصبح دا اروح للدوام شفت نيران بطنها كبرانه ونايمه...

ماحبيت اكعدها كلت اتريك بالشارع...

لبست ملابسي ودا البس،بالساعه هي رفعت راسها كالت...صباح الخير حتروح

ضحكت كلتلها...صباح الخير نامي نامي اي حروح هههه

وكفت كالت...لا اسويلك ريوك...

تركتها راحت غسلت وطلعت عيوني راقبتها منا لمن سوت ريوك واجت جابت الصينيه ...

دخلت حطتها وصبت جاي كعدنه تريكنه سوه وصيتها تدير بالها على نفسها وطلعت...

ركبت سيارتي وصلت للمركز ...

شفت ابو جاسم وفاروق دخلوو  للمركز وياهم ضابط تحقيق...

استغربت هو صار يومين المنذر ممداوم رغم هو جان عنده مصاب وهمات مداوم بس جدد الاجازه

العرفته ان بنته ومرته مريضات وبالمستشفئ...

ضليت تقريبا نص ساعه اغلي بسبب وجود فاروق الكلب

شوويه وطلعوو ماحبيت اشوفه كلب وبكل حقاره يجي ويدخل للمركز...

شويه شفت ابو جاسم واكف الوحده

اجيت سلمت عليه وسالته ...شجابهم هنا

كال...اجيت انزل الدعوه عن الضرب صلف لان هو موش قصده بس راح يفصلون وان شاء لله خير

جاوبته بقهر...شلون تتنازل بدون علم المنذر

جاوب بعصبيه...شنهي تعلموني انه الشيخ من بعد صلف وانه الاقرر موش المنذر يقرر عني

اني مجاوبته لان همه عائلة بيت ومو من حقي التدخل...

هو تركني وراح....

حاولت اتحره عن الموضوع...بس جان الموضوع حيل مشدد والأكثر مايعرفون غير فاروق وابو جاسم والجاني

كلت اروح للمنذر واحجيله الصار....

................................

مؤيد جنه عند بنت المنذر ...

شويه حالتها استقرت ...عمي ابو جاسم ضال يلعب بكيفه

والمنذر يروح بس يسبح ويبدل ويرجع ومتناسي ثأر صلف حقه محد يلومه بنته وزوجته حالتهم حاله....

مع العلم ام منارس واخوها يجون بس المنذر مراح للبيت لان بنته تكسر الخاطر

هم اجت امي واخواتي يزورنها ومنارس لحد الان عندها نزف بس مقبلت تروح

اجه عمر ضل يحجي وياه وهو نفعل تخبل ضل يحجي

وخله وطلع بررره المستشفئ واني لحكته...

رحنه للبيت...

اول ما دخل راح لابو جاسم وضل يصيح وعمي يصيح...

وتالي عمي كال...مالك شغل ثار صلف انه اخذه وطلعت الولد عبن موش قصده وان شاء لله يفصلوون...

المنذر رفس الباب وطلع بس بعد كلام عمي ما اله كلام...

لان هو راح يتنصب شيخ....

وثاب هو يريد يصير شيخ وكابه الامه للستار .....

رجع للمستشفئ وهو يدخن أعصابه نااار....

منارس...

اجه المنذر اعصابه نار و وجهه ما يتفسر ...

تنهدت موش رجال شوكت ما اجي اعصابه محتركه ونااار

عبن من يدخل للمستشفئ السسترات كلها تاخذ تحيه

وان كلبي بي نار موش احبنه

وما احبن اي وحده تعاين عليه....

شمالهن ذن شنهي ماكوو غيره شوو المستشفئ متروس شباب وهنه وما يعاينن اله علئ نذري...

سألته...شبيك ينذري

جر نفس كال.  عمج التافه ابو جاسم لاعب لعب من وراي هذا شكل شيخ هذا

والله ما اخلي كهوجي بالمضيف

حطيت ايدي علئ جتفه وهمست...علئ كيفك موش هيج جاا انت ما تخاف علئ صحتك ان شاء لله تنحل كل المصايب بس كول يالله

تافئف بغضب وزمجر بعصبيه...راح وعفه عن القاتل وطالب بالفصل هيج دم صلف انوازنه بالفلووس

جاوبته...موش فلووس ياله بس شنهي عمي يريد يخلص من المشاكل...

كال...لا اله الا الله...لج محد جاي يفهمني...ردت احقق وياه مااكدر احقق مدام عمج عفه...وطالب بالفصل

جريت نفس شسوي انه مااعرف للفصول سكتت وبالي يم غرومه كالوو تحسنت شوويه.....

.................................

ازهار...

خابرتني حنان وذيج المسبه والغلط والفشار دكلي ام الزلم اخذتي مؤيد اني الج اله اخليج تبجين دم

انه شسويت قفلت التليفون عبن وحده فارغه وتافهه. .

وطلبت من مؤيد ياخذني لاهلي موش صار هواي ما شايفتهم...

وهو ما قصر اخذاني اخذت وياي مؤمل وهو مسكين يلعب وما يعرف شنهي السالفه....

شويه واندك الباب...رحت فتحته طلع فاروق

كال ...ابووج هنا

جاوبته...اي موجود

رحت صحت لابوي وابوي دخله جووه رحت سويت جاي و وديته اله...

طلع اخووي اخذ الجاي مني ودخل جووه...

اسمع فاروق يكول لابووي...لازم بتنصب شيخ يا ابو جاسم

ابوي جاوبه...انه الشيخ من بعد صلف وان شاء لله بس تطلع الاربعين انصب روحي....

فاروق رد عليه...جااا شلون هو مو وثاب الشيخ من بعد صلف لان معروف بالحكمه واله هيبه عد ااهالينه ابغداد وانت يا ابو جاسم رجال جبير وينك و وين المشيخه

ابوي جاوبه بحزم...هذا موش حجي انه الشيخ يعني انه

فاروق..تكفئ لشر يا ابو جاسم وخلي وثاب الشيخ تعرفه اله هوواي ناس اذا هاي نسوي مثل القرعه ونختار

ابو جاسم بغضب...شنهي تضحكون علينه صلف كال ابو جاسم الشيخ يعني انه...موش وثاب

وهذا حجي يفيدكم....

فاروق ضاج وخله وراح وابوي ضل يصيح ويحجي...

وحالتهم حاله....

وناس تجر طول وناس تجر عرض وكلمن يريد يصير شيخ...

وراح يصير مجاتل من وره هاي السالفه

اي والله جدي كال تصير مجاتل وتروح شبان مثل الورد من وره المشيخه...

..............   .................

منارس بعد مرور ست اشهر...

المصايب والطلايب كايمه...

انه غرومه كبرت ومؤمل كبر وبطني واصله الخشمي  ثكيله حيييل..وتوجعني ولا اكدر اكوم ولا اكعد...

من رحت للمدرسه وكلتلهن حامل تخبلن كال بنتج بعدها طفله....

كلتلهن ...والله موش قصدي احبل بس صار بالغلط

واستلمتني ام طالب سوت بيه فلك كالت...شهل عياره مالتجن تحبل وكالت بالغلط وهنه نهارك كله مشلتحات كدام الزلمه...

امهات بالغلط...خااب امشي بالغلط كضي روحج وما يصير بالغلط

اكلت رزاله معدله من ام طالب...

وبعدين فكرت صدك شنهي بالغلط انه حتئ ما ماخذه احتياط واكولن بالغلط....

انه زينه بدراستي واقره تعبانه حييل صرت شاطره والمنذر يقريني باليل يكعد وياي

وانه اكتب هوواي وانتبه علئ المعلمه من تشرح والحمد لله

نومت الجهال ورحت سبحت لبست ثوب خفيف كصير احس روحي مختنكه

والطفل احسه بين رجليه متت كعدت علئ الجربايه

دخل المنذر شافني ابتسم وانه ضحكت بتعب كله من وراه حامل 

انه لو اموتن بنتي تصير يتيمه والمنذر يتزوج يبووو وروح ابوووي اموتن قهر

تقرب مني باسني بخدي وشفايفي...

كال...ترئ هليام مصومتني شوكت أفطر

جاوبته...من اجيبن عبن شنهي اخافن تصير عندي ولاده مبكره

هو ضحك بصوت عالي كال...لا لا لتخافين هم اخاف علئ طفلي مو الهلدرجه قاسي

ضجت حييل بس شسوي حكم القوي علئ الضعيف قشمرني وبالغلط ههه من تسمع ام طالب تموتني

اي بس صحيح قشمرني وخلاني ذبت بحضنه مثل الزبده مالت جدتي من تذوب بالخبزه الحاره...

وخلصها همسات وبوسات وانه صايره ما اتحمل ضليت ابجي وتركني...

موش رجال دمااار شامل اي وروح ابووي دمار ماار

كعدت الصبح سبحت وهو سبح تعبانه وضهري موتني

كتله اخذني للدكتوره وهو ما قصر بدلت وكملت وهو بدل تريكنه ورحنه...للمستشفئ...

مسافة الطريق و وصلنه....

دخلت علئ الدكتوره النسائيه ضلت تحجي وياي وانه متت من البجي...

موش مصدكه كلامها ياله جذب جذب...

طلعت ملهووفه وابجي شافني المنذر وكف كال...هااا منارس شبيج

جاوبته والدموع تتطاير من عيوني...الحك الحك موش الطفل....

نهاية البارت ...يتبع

كونوا انتم كونوا بخير.. احبكم

نور سمو العراق....

اعتذر منكم حبيباتي اذا كان قصير او خالي من الاحداث لكن والله لقحت مالت الحمل وايدي تاذيني من القاح....

انتظروني ...احبكم بحجم السماء...

لا تنسو التصويت والمشاركه...

ان شاء لله قربت الروايه علئ الانتهاء...

التصميم للمتابعه وئام الشيخلي 😍