رواية #رواية...انا هي نساؤك.. الفصل الثالث وأربعون 43 - بقلم الكاتبه سمو العراق

البارت الواحد والاربعون
رواية...انا هي جميع نساؤك
بقلمي...نور سمو العراق

💔💔💔💔💔💔💔💔

اشكد حقير!
الماعرف شنهي الامانه
وماسمع صوت الضمير!
اشكد حقير
اليمشي بدروب الخيانه
ومامشه ابدرب الفقير!
هذا انته
وهذا انه
وباجر انشوف المصير!
والوصف
يبقه
ابمكانه
وتستحق كلمة حقير
اشكد حقير!!

...............................

رجعت خطوات جبيييره ...يممه اموتن ولا انسجن انه اخافن ومو بس هييج ما اكدر افارك جهالي

صرخت...مااااروحن مااا ريييد اروحن جددده لا تعوفيني

جدتي لزمتني وحضنتي صاحت بوجهه فاروق...انت زلمه مد ايدك عليها والله اجسرها وحطها بركبتك والله نسيت انت ياهو ومنارس جدها ياهووو

منارس جدها صلف تمنيته موجود جاا خله طشاركم ما اله والي...

هو باوع عليها بجمود ورد عليها بهدوء...ام محمد انت علئ العين والراس واني جاي بواجب رسمي ولازم اقضي بما ان زوجها مهزوم هي تدخل السجن علئ ما يسلم نفسه...

جدتي ردت علي...خايب رووح والله ما تطولونها ولا تنام ساعه بالسجن لا تنسئ هاي عرضكم وموش من شيم الشيوخ يرضون عرضهم يتبهذل بالسجوون...

رفع حاجب بجبروت وجاوبها...ولا من شيم الشيوخ يقتلون وينهزمون بركبتكم دم سلمو أنفسكم...

جدتي...انت رجال شرطي وطالع بمهمه روح دور عليهم لا تجي علئ النسوان...

شوويه ودخل وثاب وهو لابس الخاجيه ويسبح بسبحته كال...لا فاروق لا انه ما ارضاها علئ عرضي ولا تنسئ منارس عرضي والها معزه خااصه

باوعتله بحددده اعرفه حقير وكلامه مو لله وراه مصيبه  ابتعدت عن حظن جدتي بلعت ريكي جاوبته باحتداد...ما اريد ادخل سجن

كال بضحكه مستفزه...ابشري يبعد اهلي ما تدخلين سجن وانه موجود وراسي يشم الهوه...

استغربت شنهي من لعبه ناوي يلعبها هل كلب وياي ومن شوكت صاير حنين

فاروق جاوبه...لا خالي لازم ناخذها حتئ زوجها يسلم نفسه

وثاب باوع علئ سبحته كال...ننطي مهله يسلم نفسه انطيهم اسبووع وان شاء لله يسلم نفسه

فاروق ابتسم اله بهدوء وهز راسه ...اني ايقنت همه جذابين واصلا ما جااي بمهمه عسكريه ياله هذا ملعوب منهم...

فاروق طلع هو وجلاوزته...

و وثاب تتقرب مني كال ...لخاطرج شفتي طردت فاروق واعوانه مو مثل رجلج العار انهزم وخلاج بيد الطامه

جريت نفس عميق وزفرته جاوبته...موش عاار هو اسسد بس انه مااريدن يضل هنا وانه الخليته يروح والعارات تعرف روحها...

هو نزل راسه وهزه بجمود وبعدها رفعه بحده كال...يجي يوم واخليج مناري ويجي يووم واذلج خلي كلامي ترجيه باذنج ولا تنسينه

جدتي كلتله...ما عاش ولا انولد اليذل منارس والكاتبه الله يصير ويالله روح البيت بس نسوان

هو ضحك بصوت عالي وطلع...

وانه فرفح كلبي من القهر غميته بثنين اديه وسبيته

جدتي كالت...ان شاء لله اروحن للعماره واحاجي المنذر عبن اخافن ياخذونج

لزمت ايدها بتوسل وبكاء...ياله جده فدووه اروحلج فدوه لا تخلينه يجي

هي سكتت وكعدت وعمتي ضلت تبجي وتتوسل محد يخبر المنذر بالصار اليووم...

رحت للجهال اشوفهم لكيتهم نايمين حمدت الله و شكرته..

وغرام ومؤمل بس يلعبون و يتعاركون جنهم الفاره والبزون..

....................................

نيران بعده فتره رجعت البيت عيالي ...

عمتي ضلت تحجي كالت...انتم ورطتو عمر وهيه ابني بالضيم انتم ناس عدكم مشاكل لا تدخلونه بمشاكلكم....

كلتلها بقهر...عمه هو عمر دخل نفسه ان شاء لله ماكوو شئ لا تخافين

ردت بعصبيه...شنوو ما اخاف هذا ابني طالع من كلبي بنص الموت ودكولين لا تخافين انتي شنو من مله

اني انقهرت حييل بس ما الي وجهه احجي وياها فعلا احنه غلطنه بس عمر هو تدخل وهو زوجي يعز عليه مثل ما اخوويه يعز فراگه عليه...

انطيتها البنيه وكعدت اعزل بالبيت وانضف وارتب رحت سويت غده واتذكر عمر تذوب روحي عليه فعلا عمر انسان نادر وقله وجوده هو الي نقذني من قوقعتي وحطاني علئ راسه بعد ما جنت اسفل السافلين.....

.............................

بعد مرور ايااام

جنه كاعدين بالبستان ومستعدين لأي حدث ...

اجه عمي ابو جاسم كال للمنذر...انت شبيك گالب خلقتك علينه وروح ابوووي اذا ما تعدل اسلوبك اخلي واروحن بغير ديره وانت خليك هنا....

المنذر صاح بوجهه بعصبية والله ياريت لان وجودك يسبب ازعاج والله تندمت لان وكفت بوجهه وثاب انت واكولها بكل صراحه ما تستحق تكون شيخ

لان الشيخ لازم يكون وحكمه وهو يهدي الوضع مو يشعله انت هسه بركبتك دم ...وبركبتك مصير عشر افراد...

جان صلف محد يفتح حلكه بكلمه بوجوده لان رجال يعرف شلون يتصرف وبعمره ما قتل قتل...

كتلك خلي نقدم دعوه ضدهم ويكتبون تعهد عاندت واصير اندكهم وهاي دگينه وهاي النتيجه

ثار صلف لغفته وخليته ضاع بسبب طمعك انت ما تصلح للشياخه انت رجال ضايع واعذرني اذا الحقيقيه تجرحك....

ابو جاسم وكف بعصبيه وهو يصيح...صدك لو كال عليك صلف ...راس وما يتحاجه ومغرور واناني انت شنهي من مله انه عمك هيج تحجي وياي

المنذر بغضب..لك انت بهذلتنه دمرت عوائلنه وجاي دكول راس واناني والله محد اناني غيرك

تريد تصير شيخ وانت لازمك شيخ يعدل اخطائك

اشتد الجدال و وصلت للمسبه واحنه نسكت بيهم ونهديهم....

شوويه ونشووف عجوز شاده عمامه علئ راسها وتمشي بهمه وتتلفت وراها.....

احنه استغربناها والكل وكف من المنازع والعرك

ركزنه عليها...هاي جدتي ام محمد شجابها شدلاها علينه .والله غريبه محد يعرف مكانه هي شلون عرفت....

ركضنه عليها ولزمناها

هي خطيه من شافتنه فرفحت صارت منو التلزمه تحضنه وتضل تبوس بي وتبجي علئ حاله...

كعدناها وجبنه الها مي ابو جاسم سالها كلها...يممه منهو دلاج علئ مكانه

كلتله وهي تلهث من التعب...ام المنذر كالت اجه المنذر وكلها هو بيا مكان وانه اجيت بدون علمهم

عبن انه كلش خااايفه

المنذر لزم ايدها كلها....جده شكوو شصاير اهلي بيهم شئ

جدتي هزت راسها ودمعت عيونها وكعدت تنعي ....حمامات طارن وبعدن وجنهن علئ المشهد تعدن يا شاعبات الكلب ردن....

يمممه سووده عليه منارس انهجم بيتي يغرام جده

المنذر تخبل لزم جدتي حييل وبعصبيه وتوتر وارتباك كلها....شكووو شبيها منارس احجي لا تخوفيني

كلتله وهي تجر نفس...موش ذاك اليوم اجونه الامن ويردون ياخذون منيرس وربك تدخل وثاب وما خله فاروق يعتقلها....

هي حجت هييج وهو تخبل وكف منهااار كلها ...والله ليرش منارس بمي ارشه بنفط

والله والله قسما بذات لله ما تنام بالسجن واني اشتم الهووه...

اني راجع لبغداد

احنه كلنه انصدمنه من قراره كلناله...يابه اصبر ترئ همه يسوون هييج حتئ تسلم نفسك

ردن علينه بجمود...واني لازم ايلم نفسي وما اخلي واحد يتعده علئ حرمتي وعرضي الروح والنفس تفداهم...

اني راجع وليريد يرجع خلي يرجع مع العلم ابو جاسم من سابع المستحيلات يسلم نفسه

بس اني ما كتلته واكوو شهود تأييد كلامي والناس جانت حاظره...

عمر كال...اني ارجع وياك لان بصراحه تعبت ومليت

باوع عليه المنذر وهز راسه بالإيجاب...

جدتي كعدت كالت...اي لازم يرجع ذووله ناس ضالمه ونخاف يستغلونكم بالنسووان....

ناس مؤيده وناس معارضه اول المعارضين عمي كال بس يرجعون يخلونهم يعترفون علينه

المنذر كله...حتئ اذا نعترف انت غير مكانك وبعدين الي متئ انت تضل هارب من القانون...

ابو جاسم عافهم ورااح...

وهمه حظروا أغراضهم و ودعونه وراحوو كالو...احنه ناس عسكرين وعدنه خدمه بالجيش لازم نرجع انتو ضلوو

اني حضنت المنذر حيييل وكأن بعد مااشوفه وهو حضني وضحك وضل يوصي بيه...

واني وصيته يسلم على امي وعلئ زوجتي....

اخذوو جدتي ورجعوو....

..................................

منارس صار دنيا ليل وجدتي ماكوو هي من طلعت كالت...انه رايحه لكرابتنه بااطراف بغداد وراحت بعد ما رجعت ضلينه بقلق عليها....

صرت افتر بالبيت اروح هيج واجي هييج وذكرياتني محاصرتني واحلام سوده مراودتني...

يارب تعدي هاي الازمه ويرجعلي المنذر والله روحي ذابت بغيابه...

احسن متبهذله واستحي حتئ اطلب حليب للجهال وهمه ثنين

ضعفت حييل وجهي اصفر وعيوني محوره بحيث اكووم واوكع...

رغم جانت عندي مشاكل واغارن حييل واسوي مشاكل وانكتل واتصالح بس كلها تهوون مو مثل هذا الضيم....

اخاف يسجنوني انه اخافن من السجوون وانه موش كلش اجتماعيه اذا صادقت اصادق و اله الشخص هو يصادقني...

اذا دخلت للسجن انه اعرف روحي اخلصها بس بجي ولا اكدر اكعد يم وحده....

وجهالي ما اكدر افارگهم...

شوويه واندك الباب حييل رحت اركض فتحته جنت متاكده هاي جدتي...

فتحت الباب وانه اشووفن العيد هل هلاله عليه يممه نذري روحي التصعد وتنزل جااي ويه جدتي

عفت جدتي ولا سالتها ولا حجيت وياها حسيته ما موجوده شمرت روحي بحظن نذري وانه ابجي واتنحب واشكيله همي وابوسن بي

هو بعدني عن وابتسم كال...استحي ولج جدتي واكفه

رديت عليه بدموع...شنهي ينذري عبالك نسيتك ونسيت ذكرياتك ياله وحگ علي انت نزرعت بين اضلوعي وانه يوميه اعيشك إلف حياة

ضحك بحزن وحط ايده علئ جتفي كال...ابتسمي منارس شوفيني ضحكتج ضحكتج قارب نجاتي و كلبج الحزين موطن انتمائي

ما عرفتي شصار بيه من عرفت فاروق العار مخوفج اقدم الروح بطبق من ذهب لاعدائي بس كوون انتي ما تتاذين

جاوبته بحزن...ياله فدوه اروحلك لا تقدم شئ بس تكون بخير انه بخير...وكل ما توكع ورقه من اغصاني ادعي ربي ما تكون انت اخر ورقه ينبضي

وكل يوم بالمغرب انه ادعي تنجي انت واخوتي من هذا المصاب اني عايشتك بكل فصول الجنون

احببنك ينذري واموتن اذا صارلك شئ

هو مسح علئ راسي وجر نفس دخلنه جووه تلكته امه تبجي وتبوس بي...

خطيه هو ما قصر ويه امه يبوس بيدها وراسها...

وبعدها اجت غرام شمرت روحها بحضنه ملعوونه ما ناسيته مثل امها تنسه روحها وما تنسئ نذرها...

ضحكت عليها ومؤمل هم اجه

ضل يضحك وياهم ويبوسهم ويشاقه وياهم وهمه ميحبون الشقه لطشوو بي فد لطشه...

اجت اطكهم كل واحد قبق منوم واخذ نذري وانهزم منهم عبن شنهي طكيت من الغييره...

اخذتهم منه وضحكت كتله...يردوون ينامون

كال...اي خليني اشوف مرتضئ ومصطفئ

انه دخنت شنهي غرومه ومؤمل مصطفئ ومرتضئ وانه شنهي مالي حصه بس فروووخه

والله وروح ابووي ما يسوه البجي عيوووني راحت ابجي وادعي واريدنه بس يرجع...

هو دخل للغرفه وانه طكيتها ركضه وراه ولازمته الحمد لله جانو نايمين...

خطيه ضل يبوس بيهم ويسمي عليهم وبعدها دخل للحمام كال...عفنت من الطريق اريد اسبح

جاوبته بهيام...ياله ريحتك تخبل عنبر عنبببببر

ضحك بصووت عالي كال بخبث...ادخلي سبحيني

فتحت عيوني...ياله ياله ادخل انت انه رايحه اسووي عشا

سحبني من ايدي كال..خليني افطر بيييج صارلي شكد صاايم

كتله بضحك...تكعد راح اسميك منا رمضان كريم عبن كلشي وكلت اريدن افطر بيج اريدن اتسحر ببيج شنهي انت رمضان ههه

ضحك وباسني بقوووه كال...تدرين اني هناك ومشتاق السوالفج وكل شوويه اتذكر سالفه واضحك لج انتي شنوو من شنوو مخلووقه والله انتي احلئ من العسل...

بلعت ريكي بحزن ودخل اصابعي بشعره سحبته الي و وكفت علئ اطراف اصابعي و لاول مره اتجرء وابووسه بشفايفه غمضت عيووني واني تايهه بعالم المنذر...

وهو مبادلني بكل حب ورمانسيه

ابتعدت شوويه واني ارجف وابجي...

هو باوع عليه بنظرات غريبه وركز علئ شفايفي كال...شبييج ليش تبجين ليش شفايفج ترجف

بلعت ريكي وهمست...خااايفه

غمض عيونه باسئ كال...لا تخافين ثقي،بيه ان شاء لله ماكوو شئ

شمرت روحي بحضنه حييل وابجي واناشغ...فدووه ينذري ولا مااكدر اعيشن بدوونك والله اموتن شوف حالي باوع بعيوني شوف كمية الحزن والله لا ليلي ليل ولا نهاري نهار انه مخبله بيك...

انت شايف وحده مثلي هيج تعشگ بجون احبك بصيفك وبخريفك ...احبنك من تكون بارد مثل الشتا احبنك من تصير زاهي مثل الربيع...

انه ما اعوفنك...

حضني حييل وضحك بقهر كال...يابه حتئ اذا متت يعني شنوو ترئ الموت حق وبعدين انتي بعدج طفله كله عمرج 19 واني داخل علئ السبعه وتلاثين يعني شوويب...

لذالك الطريق كدامج...

انه تخبلت من كال هييج هجمت عليه مثل البزونه المتوحشه ضربته بصدره وهو يضحك ويرجع ليوره ويحاول يلزم ايديه

ويكول بضحك...يا يابه ههه طلعتي متوحشه واني عبالي فقيره ومسكينه والله لبووووه لبووووه

وانه بعدني اضرب واغلط...خااايب رووح اي شايب شايبب وانه اموتن علئ هذا الشايب والحسين وداعت جهالي بعد اذا حجيت هييج اطكن بعيار ام طالب واخلي دمك يجري

هو يضحك وكدر يسيطر عليه دارني صار ضهري علئ صدره وجهي مطل للباب ولزم ادييه ثنينهن حط شفايفه عند خدي كال...لج صدك مجنونه تضربيني

رديت بعصبية ودموعي تجري...اموتنك تموت اذا جبت طاري الموت واستخفيت بروحك وكلت الطريق كدامك ..كل الطرق وعره ومسدوده وانت ماكوو افتهم يعاصفتي لا تحرگ كلبي....

سحني ودارني عليه مسح دموعي وكال...يابه اسف وحقج عليه واعتذر بعد مااعيدها

جاوبته بدموع...موش من زمان كتلك اسفك ما يوكل خبز

ضحك وهز راسه كال..صحيح واني اسووي الازم واعتذر بطريقتي الخاصه ادللي اسبح وقبل لا اتعشه اعتذر وبطريقتي الخاصه وغمزلي...

ابتسمت ومسحت دموعي ضربته بصدره وهمست...يمممه موووش رجال منحررررف منحرررف...

تركته يضحك عليه ورحت اسويله. عشا...

بسرعه سويت عشا وكملته ودخلت شايله الصينيه

لكيته هسه طالع من الحمام لابس دشداشه سووده يممممماي تجنن عليه صدك لو كالت جدتي احله من صلف بشبابه....

كعدت حطيتها وهو كال...اي والله مشتاق اكل من ايدج لعبت نفسنه هناك مدري شلوونه الاكل مدري اني متزوهر من اشوفج تنفتح شهيتي

ضحكت...اي اي اكل براسي حلاوه

كال...انتي حلاوه تعاي اكلج

منارس...يمممه منك بس تاكل بيه عبن شنهي...

ما خلاني اكمل كلامي كال...عبن شنهي انتي بقلاوه ياله انتي كنافه...

ضحكت كتله...ياله زنود الست..

باوع عليه وجر نفس كال...ويكلولي ليش تحبها وعفت الناس كلها واخذتها ما يدرون اني ماخذ كتلة براءه لج والله والله امووووت عليج تدرين احبج اكثر من الاطفال ...

ابتسمت ونزلت راسي كتله...وانت تعرف شكد احبك ماكوو داعي احجي مو صحيح

هز راسه بقبول كال...اعرف ومتفاجئ

جاوبته...لا تتفاجئ انت ابووي وكل اهلي...

جر نفس كال...ان شاء لله باجر الصبح اسلم نفسي ونخلص من هاااي المشكله وبعد اعيشج ملكه والله وتدرين ناوي نطلع ببيت الوحدنه واخليج تكملين دراستج...والاطفال اكوو مره كبيره بالعمر تريد شغل اخليها تداريهم...

وكفت مفزووعه...شنهي تسلم رووحك ياله وروح ابووي ما تسلم روحك شنهي تريد تنتقم من نفسك

ذووله خوونه غدارين يغدرون بيك..

المنذر...لج بابا شبيج قابل قاتل اني هو ابو جاسم كتل واني ضابط محد يكدر يحجي وياي وبعدين صار شكد اني غايب راح افقد شغلي ومركزي لازم احل هاي المشكله حتئ ارجع الحياتي الطبيعيه

صرخت بوجه..لا تسلم نفسك

ركضت علئ ايده ابوسها هو سحبها كتله...فدوه اروحلك ارجع للعماره لا تسلم روحك اذا تعزني لا تسلم نفسك ابوسن ايدك

كال بحزم...لازم اسلم نفسي،هذا قراري واني اعرف اتصرف لذالك لا تتدخلين انتي تعرفين شئ واني اعرف شئ...

كتله...انت خايف لا اني انسجن والله وثاب ميسويها عبن يحبني

ما حسيت غير بكف ايده سد حلكي وايده الثانيه علئ راسي وعيوني تباوعله برعب ودموعي تجري

كال بتهديييد...اخر مره تجيبين سيرة هل عااار علئ السانج مفهووم مره ثانيه اذا ذكرتي اتصرف غير تصرف...

بعدت ايده من وجهي وضليت اتوسل بي اتوسل اببد ما فاد مقتنع يسلم نفسه....

عفته ورحت نمت علئ الجربايه وانه ابجي واناشغ هو كمل غسل واجه يمي حضني وضل يبوس بشعري ويطمن بيه وانه زعلانه ودايره وجهي...

دارني عليه وحضني مثل الطفله باحضان رجوولته

ضل يمسح بدموعي ويهديني وانه مفرفحه من البجي....

وليل كله مانمت كاعده رغم هو نام بس انه اتامل ملامحه وابوسنه وادعي ربي يحفظ اسدي عبن ما الي غييييره.....

......................   ...........

عمر ودعت اهلي وامي وزوجتي ورحت اسلم نفسي

مريت علئ المنذر هم مودع اهله جانت انحسها شغله بسيطه حتئ لو انسجنه احنه مو قتله والقاتل معروف...

هو ابو جاسم احنه مجرد وياه...

طلع المنذر سلم عليه واني كذالك وصلنه للمركز وما نشووف اله العسكر طووقنه استغربنه...

طلع الضابط التحقيقي وهو يامر الشرطه بالقاء القبض ...

احنه سلمنا ارواحنه ودخلنه علئ ضابط التحقيق كتحقيق مبدئي و اولي...

جان يباوع علينه بغضب وكأن مرتكبين جريمه بشعه وشنيعه....

المنذر كال بثقه...بس ترئ احنه ما قتلنه مجرد شاركنه والقاتل هو العم ابو جاسم وهو اصلا معترف علئ نفسه....

ضابط التحقيق كال...بس انت وعمر محكومين اعداام...والباقي افراج من عده ابو جاسم

فتحنه عيوووونه بصدمه و واحد باوع للثاني كله المنذر...ترئ الحادث الصار ما يستحق الاعدام

الضابط كال...لا يستحق كونك قائد مجموعه كبيره ضد النظام وضارب منظمه عسكريه ومعتدي علئ حقوقها وقاتلين احد اهوة رجال النظام وهو اخ فاروق... وجاي تاجج الامن والاستقرار وتسقيط الدوله الصداميه وتدعي ان هي دووله ضالمه متجبره..

نهاية...البارت يتبع

كونوا انتم كونوا بخير...احبكم

نور سمو العراق....

اعتذر عن عدم النشر البارحه لكوني قمت بزيارة سيدي ومولاي الامام محمد الجواد عليه السلام وطبعا كانت زياره مفاجئه ومقسومه اليه وطبعا دعيت الكم...يا احلئ متابعين😘