رواية #رواية...انا هي نساؤك.. الفصل الثاني وأربعون 42 - بقلم الكاتبه سمو العراق

البارت الاربعون
رواية...انا هي جميع نساؤك
بقلمي..نور سمو العراق

💔💔💔💔💔💔💔💔💔

يا حبيب عمري الحزين

كم من الأحزان أجرجر معي اليوم

وكم من الهموم عايشتني في الأمس

أنت الضياء الذي ينير سماء قلبي

أنت النظر لعيني 

أنت من علم ثغري الإبتسام

أنت من أخرجني من سجن الأحزان

أنت من زرع في قلبي ملايين من الأزهار

حبيبي

قبلك أنا كنت كالورقة الذابلة في شجرة ميتة

كنت كغيمة بلا مطر...... كصحراء يابسة

أنت من رويت صحرائي

كيف لي الحياة بدونك

.............................................

راح واخذ روحي وياه...

ما اكدر افاركه هو الروح والنفس من يصير عنده خفر بدوامه اضلن للصبح ما نايمه عبن بالي يضل يمه

واعرف الوكت اليرجع بي من دوامه اضلن كل شويه فازه علئ الباب بس يتحرك وافرح اكولن اجه نذري

وماادري الهوه يلعب بمشاعري ويحرك الباب....ضليت وحيده ما املك غير خيبة الامل وشعور بفقدان الصبر

شنهي من بعد المنذر يصير شنهي المذله؟ الراح انذلها لا ارريده اريد منذر حبيبي مااكدر اضل بدونه وانه حاسه بخطر....

عابد وجاسم وعمر ومؤيد وعمي كلهم يكدرون ينهزمون بس المنذر ثاره قووي ويه وثاب وهو عنيد وبراسه فكره يكول رجال عسكري وبحكم شغلي ارجع...

اباوع علئ اهلي وناسي كلها تبجي وتنحب علئ الصار واكيد ما يخلون الولد سالمين...

انه كلها التمت عليه منا الجهال يبجون ومنا اخوتي وزوجي بالضيم وبنص النار

وهمين خوفي من وثاب خاف يهجم علينه واحنه بس نسوان...

راحوو واحنه شووويه واندك باب بيتنه...

ماتن رجليه وعمتي لزمتنه وحضنتنه كالت لا تخافن جدتي راحت فتحت الباب ...

ودخل رجال جبير بالعمر كال...يالله امشوو وياي انه من بيت مسعد ومر عليه المنذر و وصاني بيكم وانتم امانتي

احنه خفنه من عنده موش ماكوو بعد ثقه بالوادم...

عمتي هزت راسي كلتله...لا ما نروح احنه هنا يردون يكتلونه خليهم يكتلونه

انه لزمت عمليتي والرجفه اعتلتني...

هو كال...انه من بيت مسعد المنذر وابو جاسم وصوني بيكم لا تخافون انتم وديعه عدنا ومحد يوصلكم...

جدتي كالت...اي ابو ناصر من بيت مسعد وهمه جانوو من الناس التحب صلف يالله حظرن رواحجن وخلنه نتوكل

احنه بسرعه حضرنه ارواحنه وانه ساعدتني ازهار خطيه ما قصرت ...

ونيران وهاله اجن يمنه خافن علئ عيالهن ونيران ماتت من البجي علئ عمر...

خطيه هو رجال غريب لا بيها ولا عليها اخذوو وتبركست سالفه برأسه....

طلعنه ركبنه بالسيارات ورحنه للبيت ابو مسعد....

دخلنه جان بيت جبير بالثوره مدينة صدام سابقا...مدينة الصدر حاليا...

خطيه الناس ما قصرو ضيفونه وفرشو فراشنه جنت محتاره بالجهال بس يبجوون وغرام وكحه وعرك هي ومؤمل...

هو كتلها واجه شارد شمر روحه بحضني وهي تصرخ تريد تكتله گوه تتماسك بمشيتها...

ختل بحضني وهو يضحك بصوت عالي حضنته بقهر وحزن وسكتت اجت غرام تبجي تريد تعضه اخذتها وثبتتها بحضني...

باوعت عليهم وهو يريد يكتلها وهي تريد تعضه وما يعرفون بنار كلبي وشنهي الصار بينه ...

بستهم ثنينهم وحاولت اهديهم...

ضلينه كاعدين جدتي سألت الحجي كلتله ...شنهي الصار

كلها...بيت وثاب متخبلين مات اسعد ورفعو دعوه عليكم ودخلو كل واحد اجه ويه ابو جاسم واول راس يردونه المنذر وعمر...

جريت نفس من القهر ودمعت عيني شلوون تخلص يربي ويه ذووله همه حتئ جادر ما نصبو اله ياخذون ثارهم...

كله من وره ابو جاسم كله المنذر خلي نرفع دعوه بس هو اصر يروح يرميهم وهاي نتايجها

رحنه للغرفه الكاعدين بيها ومؤمل كل شوويه يطلع وازهار تروح تجيبه لو نيران اني مااكدر اكوم...

وارضع بالتووم...

اجه كعد يمي كتله...امولي بعد لا تطلع تجيك البزونه تعضك خووش؟

هو باوع عليه بطفولة وبراءة كال...ميووو

جاوبته ببتسامه باهته...اي ميوو تعضك وتعض غرومه

هو دفن روحه بحظني خااايف...

حطيت ايدي علئ ضهره ونزلت دمعتي من تذكرت المنذر من رادني ادخل وما قبلت وخوفني با ابو طبر...

من زعلت عليه لمن تعارك ويه نيران وحلفت انام بالحديقه وجان بيها مطر...

رجعت بذاكرتي الذاك اليوم الي جان عندي تعيس بس للاسف هذا الموقف هسه عندي اسعد موقف...

غمضت عيوني واني اتذكر....

جنت كاعده بالحديقه والجوو بارد ويداعب بشرتي واطراف شعري رغم البروده انه جنت موش مهتمه عبن شنهي انه زعلانه....

انتبهت علئ الباب انفتح رفعت راسي شفته هو واكف ولازم جكارته ويدخن كال بتساؤل...منوس شعندج كاعده هنا تعالي ادخلي جووه لا تتمرضين

جاوبته بقهر وعصبيه....ياله لا تخاف عرج ما يطگني رووح نام واشبع نوم انه حلفت انامن بالحديقه عبن شنهي انه وحده لسان واتدخل بكلشي

هو وكف مقابيلي وببل شفته وعقد حواجبه كال...شبيج بابا انت مجنونه لو تدعين الجنون اني لازم هيج اتصرف لان اذا اختي شافتني مرخي الحبل اكييد راح تتماده اكثر وهي اختي انتي مو احن عليه منها...

وكفت بغضب والدمعه تلمع ...جااا موش طكيتني ياله مو بس هييج رزلتني وانه شنهي شكتلك سبيت العنب كل الاريده تهدء شوويه

هو نزل راسه وبعدها رفعه مسح علئ شواربه كال...عمي اسف وحقج عليه واعتذر بعد شتريد

درت وجهي وكتفت اديه وانطيته ضهري كتله...اسفك ما يوكل خبز وانه حالفه انامن بالحديقه....

حط ايده علئ خصري وهمس برومانسيه ...اذا اسفي ما يوكل خبز لعد استخدم غير اسلوب الأسف مثلا مثلا...نسوي ليلة حمره

درت وجهي عليه وبعصبيه...شنهي كاعدين بجهنم وتسوي ليالي حمر ياله اكلك حالفه وانه ما احلف جذب وانامن هنا

مطرت الدنيا واشتد المطر...

هو شالني وانه حسيت طرت بالهوه ادركت هو شايلني ضليت ارافس برجليه وانه احلفنه وهو يكول...انتي تشلعين الكلب اشيلج وادخلج للغرفه غصبا عنج وما ادوخ روحي...

حلفته بارتباك...برووج ابووك عوفني عليك العباس اهوو ياله ياله حلفت بأمير المؤمنين تعوفني...

هو نزلني وهمس بااستغراب كال...شبييج؟

همست وانه عاكده النونه...اريد اضلن هنا

هز راسه باسئ وسحب نفس قووي كال...ضلي هسه يجيج ابو طبر ويطبرج

مشه خطوتين وانه استغربت كتله...هذا ياهو ابو طبر...ويطبه مرض خلي يجي ما اخافن منه وروح ابووي اكتلنه بطبر مالته...

ابتسم ورجع عليه كال..ابو طبر ما تعرفينه

جاوبته...ياله منهووو بس لا بطل مسلسل مسكيكي المجرم

ضحك بصوت عالي كال...لا مو بطل مسلسل مسكيكي..مكسيكي...هذا بطل مسلسل عراقي هذا حاتم الهضم ابو طبر

سألته بااستغراب..هو منهو

تقرب مني وباوع من هاي الصفحه ودار وجهه للصفحه الثانيه وكأن يأمن المكان وتكلم بصوت قريب للخافت الخائف...هذا واحد يحتسي الخمر ويغتصب النساء جلاد سفاح مجرم سمو ابو طبر لان جان يلزم طبر « فأس» ويطبر العالم...

جان يستهدف الطبقات الراقيه والدكاتره واصحاب رؤؤس المال...والحلوات امثالج

انه خفت حييل كتله...يممممه هسه هو موجود يمممماي وروح ابووي بعد لا اطلع ولا اطب ولا اروحن حتئ للمدرسه بطلت...

كال..يالله لعد تعالي نامي

رفعت حاجبي بغرور...ما اجي

ابتسم وهمس...يالله اني داخل خلي يجيج ابو طبر

هو مشه خطوتين وانه احسن ابو طبر شاركني انفاسي يمه متت خووف ركضت وراه ولزمت ايده همست...انه موش خايفه من ابو طبر بس بردت كلت انامن بالغرفه وصحيح انه حلفت بس نذري هو يدفع كفاره موش صح

ضحك بصوت عالي...لانعل ابو طبر يا ابو بيت الهضم ندفع كفاره ليش لا بس ادخلي يگلبي..

دخلت وانه لازمه ايده واتلفت يممه يجيني ابو طبر غير اموتن من الخووف...

نمت بصفه ودرت وجهي وانه خايفه وبعدها كلت انه شمالني خايفه شوو نايمه بصف اسسد لا ابو طبر ولا ابو سعدون يكدر يوصلي...

والمنذر حاضني وكل شويه بايسني اتمنئ ازعل واطول بزعلتي عليه بس انه ما اكدر عبن شنهي كلب والده بسرعه احنن عليه...

همست بخوف ...تغطه زين وخلينه نقفل باب الغرفه عبن خاف يجينه ابو طبر

انتبهت عليه ضحك كال...لا تخافين مات وشبع مووت هو ما ضهر بهذا زمنه لا بالسبعينات ب 73

كعدت ملهووفه ضربته علئ صدره كتله..يا ضالم النفس دكلي يجيج ابو طبر وهو ميت قبل لا انولد

لزم اديه وضحكته ترن بالغرفه كال..غير من وره ابو طبر انتي اجيتي تركضين ولبدتي بحظني ملجئ الخائفين والحلووين

درت وجهي وانه اخفي ابتسامتي

كال..والله ردت اقره لفاتحه لابو طبر لان سوالي خدمه ورجعج الحضني بس اتذكرت واحد مجرم ميستاهل...

ضحكت بهدوء ونمت وانه منطيته ضهري وهو ما يكعد بس يتحارش

فقت من ذاكرتي علئ صوت مرتضئ ومصطفئ وهم يبجون...

باوعت عليهم واحد بحضني ومؤمل نايم بصفي والثاني مقابيلي يبجي منومته علئ ملحف

همست ...اوووف يا ربي تشتتنه الله لا يوفقك يا وثاب العار انتم مال شيوخ انتم مال حصن...

ضليت اليل كله ابجي وادعي يارب يحفظهم وين ما يكونون...

يا رب المنذر امانتك احفظه ورعاه بحفظك وعين الذي لا تنام...واحفظ اخوتي واولاد عمي...

ياربي احبنه ابو جهالي لا تفجعني بي

.....................................

بعد مرور يومين..

جنه من مكان المكان لا ليلنه ليل ولا نهارنه نهار رحنه للعماره واستقرينه عند احد الريفين بااطراف قلعة صالح...

جانوو عرب اصحاب غييره ونخووه بس احنه كضباط ومن بغداد استصعبنه اليومين

بگ وحااره وريحة الهوش تفجع الرأس...

اني والمنذر ما جنه خايفين كوونه من رجال الدوله وطلعتنه جانت غلط

بس الصح هو اهل وثاب وفاروق دمهم بعده حاار وجرحهم هسه مفتوح ومعروفين بالغدر لذالك اصر ابو جاسم نطلع وياهم...

شفت المنذر كاعد قريب من الشط رحت كعدت يمه وحطيت ايدي علئ كتفه وجريت نفس كتله...ابو غرام گول يا الله

هو جر نفس وزفره باوعلي وابتسم بيأس كال...دائما اكول يالله بس مقهوور ...مقهور علئ اهلي وامي .زوجتي اطفالي هسه اجوو للدنيا شنو ذنبهم يتبهذلون

لك حتئ ما فرحت بجيتهم والله جنت ناوي اخليهم اسعد ناس وافرحهم شكد مااكدر تالي اني مهزوم

جريت نفس كتله...تنحل ان شاء لله بس انت اصبر

رد بحزم...لا ارجع اني لازم ارجع اني مكاتل وبحكم شغلي ارجع وابو جاسم هو القتل حتئ لو ينسجن نحطله محامي وهو ما متعمد القتل لان جان اسعد سكران وهو الخبر الدنيا وانقتل....

عمر...بس اصبر شوويه بس خليهم يبردون شوويه ونرجع ثق بالله نرجع اني هم اريد ارجع وحالي من حالك....

المنذر...احس روحي حقير واني تارك عائلتي زوجتي صغيره اخاف ياخذوها ويسجنوها تعرف فاروق ايده طايله بالدوله اخاف يضرهم...

عمر...لا لتخاف هي هم من دمهم ما اعتقد يضروها...

بعدين تذكرت لا يا كلب فاروق نذل نيران غدرها وكسرها ما يكدر يكسر منارس...

لا منارس اذا دخلت السجن نقره عليها السلام البنيه حلوه وصغيره واخاف ياخذوها الهم

الله يعينك يا منذر ...

هو وكف وراح اخذ مي من الحب وتوضه واخذ تربه وسجاده من الناس وادء الصلاة  بالبستان

واني كذالك توضيت وصليت وياها رواحنه متهمنه بس حريمنه تهمنه واطفالنه...

قررنه نرجع اني والمنذر...

بس ابو جاسم ما قبل و ضل يصيح وحط المسدس براسه كال...اكتل روحي بس،ترجعون اعرفهم يغدرونكم

طك هو والمنذر وصارت عركه للضالين

المنذر يصيح ويغلط وابو جاسم يصيح ويغلط ثنينهم مثل الزيت والنار ما تراهموو

واخر شئ منذر عافهم وكعد بالبستان وهو صديقي،اكثر منهم ما اكدر اتاقلم وياهم اجيت وكعدت يمه ضليت اواسي بي لحد ما جزعت....

كال بحده...انسجن ولا انهزم...

سكتت ما كدرت اقنعه.....

............................

منارس فاتت ايام واحنه رجعنه البيتنه عبن شنهي كال الرجال من بيت مسعد يكول وثاب احنه نريد زلم ما نريد نسوان

وانه رفعت دعوه وكلهم خليتهم بالدعوه وان شاء لله كلهم اعدام...

انه بلعت ريكي وضجت كتله...ان شاء لله عدموو بحبل من نار هل المصخم هذا جاا كضوو ابنهم سكران ويرمي بدون وعي...

استغفرت ربي الميت ما تجوز اله بس الرحمه بس شسوي كلبي محترك وصاير نااار

عايشه بقلق....وخوف ورعب عبن شنهي اهلي ونذري موش بخيير

خابرتني ام طالب كالت نجحتي ما اهتميت ابد انه موش بحال الشهاده هسه بحال نذري واهلي...

انه ميخالف خلي نذري بعيد عني بس شنهي كوون هو بخير والله انه بخير المهم يكونون بخيير

سوينه عشا ومحد اله واهس يتعشه...

رحت الغرفتي الجهال كلهم نايمين بس مؤمل يلعب بلعبته

ضحكت عليه بحزن وطلعت صور عرسي اعاين عليهن ...

ابتسمت بألم ضلت بس الصور يالمنذر يارب يردك سالم والله كلشي ما اريدن بس يكون سالم...

شوويه واندك الباب جانو كلهم نايمين انه خفت حييل بس اخذت مؤمل عبن شنهي عود معتبرته رجال واخذته نكول منهوو...

كلت بصوت ضعيف...منهوو؟

همس بصوت ردلي روحي كال...اني المنذر افتحي الباب...

ضحكت ببكاء وباوعت المؤمل بسته حييل وفتحت الباب هو دخل بسرعه وسد الباب حضني حييييييييل حسيت تكسرت ضلووعي

وانه حضنته وابجي بكل ما املك من قووه واعاتبنه...يمممه وينك يالمنذر ترئ بجيت بالسر ومحد مسح دمعتي وانكسرت وانهنت ومحد حضني اي ينذري احضني طيب جروحي لا تخليني افقدنك احبنننك يابعد الرووح....شجابك ما تخاف انت علئ روحك

بعدني شوويه واحتضن وجهي بجفوفه وابتسم بحزن بعد ما مسح دمعتي همس...جابتني لهفتي المجنونه بييج ورهنت عمري ثمن في سبيل اشوف عيونج الحلوووه....

شهكت من البجي ولمست وجهه وانه اعاتبنه...تدري من طلعت من البيت بيمن شبهت طلعت...مثل طلعت الروح من الجسد

مااكدر احجي الكلام متضخم بصدري اعجز انطق ينذري محد يفهم شعوري ..شووف هذا الكوون شكبره احسنه يخنك عبن شنهي انت ما موجود

وشايف شكد دخلت ناس وامي وكلها واكفه بصفي بس انه احسن وحيده وما متحمله فراكك

هو جر نفس ورجع حضني كال...منارس قووي نفسج واسنديني لا تصيرين ضعيفه وخلينه نتعده هاي المحنه....

هزيت راسي وانه امسح دموعي هو انتبه علئ مؤمل اللازم برجله رفعه وهو يضحك ويبوسه ويكول...هله بالسبع للما يخلي امه تطلع وحده هله بعصبة الراس النشمي مؤمل البطل...

ويبوس بيه ومؤمل حاضنه هو يحبنه عبن دائما يتعاركون واحد يشاقي الثاني...

دخل للغرفه وانه وراه امسح علئ جتفه واصلي علئ محمد وال محمد....

اللهم صلي على الرسول الكريم وال بيته الله يحفظك من كل شر يبعد روحي...

سألته عن اخوي عابد ومؤيد وعمي وعمر والولد وهو جاوبني همه الحمد لله تمام

دخل للغرفه الكئيبه البارده لعدم وجوده بيها

همست...هسه نورت الغرفه بوجودك يعاصفتي

باوع عليه وعيونه تحجي...

كال....مشتاق الغرومه بنت ابوها الملعوونه ولا فاركت خيالي كل دقيقه افكر بيها...

اخذها من سريرها وسمه باسم ربي...

باسها وحضنها وشمها وكانه يشبع روحه المتعطشه لبنته...

رجعها لمكانها وانتقل لمرتضئ ومصطفئ كال...اوف الكتاكيت ولا شبعت منهم...

شالهم ثنينهم ويحجي وياهم عبالك كبار ويوصيهم عليه ويبوسهم...

بعدها كال...منارس روحي صيحي بس امي مشتاقلها ولا تكلين لاي واحد اخاف تصير هووسه وضجه...

انه رحت اركض كعدت عمتي كعدت مفزوعه وخايفه كلتلها...لا تخافين المنذر بالغرفه يريدج ويكول ما اريدن اي واحد يعرف

عمتي خطيه وكفت علئ حيلها وراحت تركض وهي تبجي وتندب حظها...يمه يالمنذر سووده عليه يممه شحالك انت واخووك سوده بوجهي...

هي دخلت للغرفه وشافته وهي ركضت علئ مثل الحمام المنحوور

وهو عاف الجهال بسريرهم واجه عليها ملهووف حضنها وباس راسها وايدها وهي تبجي وتبوس بصدره وجتفه

كلها...يمه علئ كيفج مابيه شئ

جاوبته بدموع وكلب محروك...يممه بعد لا تجي اخاف يكتلونك شلونك يمه مرتاح تاكل تشرب اخووك شلونه ولد عمك...عمر شلونها

جاوبها...الحمد لله بخير لا تخافين

ضلت كاعده وياه وانه جبتله ماااي شرب وطلعت عندي قران صغير كلت خلي يشيله بلكي ربي يحفظه

كال...لازم اروح قبل لا يطلع الفجر

عمتي ودعتها وانه لازمه ايده عبالك ابووي موش رجلي وابجي وعمتي دكول..كافي منارس لا تفاولين عليه

باس عمتي وراح طلعنه انه وياه وعمتي ...

هو وصل للباب راد يطلع ووكف مثل المحتار كال..اريد اغسل وجهي احس نعست يمه جيبيلي خااولي...

عمتي خطييه راحت تركض وهو اتبعه بعيونه ورجع باوع عليها ولزمني من اكتافي باسني بشفايفي حييل وكانه يطفي نااار الشووق

واني مصطكه ودموعي تجري.....

ابتعد شوويه ومسح دموعي كال..من اشوفج انسه روحي...

اجت عمتي جايبه الخاولي وهو غسل وجهه وانه اعاين عليه وابجي...

ودعنه وطلع...

وانه ركضت الغرفتي نمت علئ جربايتي وحطيت اصابعي على شفايفي وبجيت بحسسره علئ حاالي..

اووف ينذري صار الموداع مثل لمح البصر....

ضليت كاعده للفجر ودموعي ما وكفت واحسن حركن خدودي...

اذن المؤذن رحت توضيت وصليت...

شفت مؤمل زايح الغطه غطيته ومسحت علئ راسه

وبعدها نمت وبالي كله يم المنذر....

كعدت تقريبا الساعه بالعشره احسن العمليه موتتني

تريكت والبنات عمتي كلتلهم البارحه المنذر اجه وهنه استلمني اسأله كل من تسأل عن زوجها

وانه طمنتهن....

شويه وتعطر الباب تعطر موش دك ياله مال اخبال

راحت جدتي تركض فتحت الباب وما نشوف اله الجيش ترس بيتنه ترس...

كلهم لابسين زيتوني وشواربهم يخوفون ويرهبون

وجان يتراسهم فاروق ...

جدتي ضلت تصييح ...خايبين شتردوون هادين عليه ترئ بس نسوان ماكوو زلم يالله روحو منا

دخل فاروق وهو يرسم ابتسامه خبيثه علئ شفايفه اشر عليه وكال...اعتقلوها....

انه رجعت خطوات كبيره وفتحت عيووني برعب وصرخت بصوت عالي....ياله مااااااااااروح

نهاية البارت...يتبع

كونوا انتم كونوا بخير...احبكم💔

نور سمو العراق...

لا تنسوين التصويت والمشاركه بكم نكتمل

التصميم ..اهداء من وئام الشيخلي snwn2231

شكرا يعمري تعبتج 😘