رواية #رواية...انا هي نساؤك.. الفصل الخامس وثلاثون 35 - بقلم الكاتبه سمو العراق

بارت الثاني والثلاثون
رواية..انا هي جميع نساؤك
بقلمي...نور سمو العراق

💔💔💔💔💔💔💔💔💔

وكأن شيئاً بيننا من ألف عام
شيءٌ تآلف بيننا من دون همسِ أو كلام

نظرات أعيننا أذابت مهجيتن
وأشعلت نار الغرام ؟؟

.....................................

طلعنه انه وجدي وما انشوف اله واحد راكب بسياره وياه ثنين ولد وطالع من جام السياره ويرمي علئ بيت عمي ابو المنذر

ويصيح..ولكم كلاب حقراء عارات بيكم خيير كضوو نسوانكم تتهمون اختي باطل...

جدي خطيه تخبل لزمني وصفني علئ الحايط وحماني بصدره وهو يصررخ...جدي منارس دنگي لا تزلفين مني لا تجيج طلقه...

انه ارجف وابجي والعالم التمت المنذر شفته طلع يركض حافي...

ومؤيد يركض وراه...وعمتي تصررخ...

صحت بصوت خايف وانه دموعي شلال...جدي جدددي نذري راح يكتلوونه

جدي سحبني وانطاني لمرة عمي كلها....ادخلن جوووه ادخلن

ركض علئ المنذر سوده عليه جان حااافي ومسدسه هو رمئ عليهم ويغلط ويسب گله...لك عااار لك حفضنه عارك ساقط...

جدي لزمه هذاك بعده يغلط اخوو حنان صاح علئ المنذر...احسن من عرضك لگووو بشقق الدعاره

يممه حطيت ايدي علئ صدري و روح ابووي اليوم المنذر يفطسه تفطس...

شمر المسدس وركض عليه وذاك وجهه سلاحه علئ نذري

انه صرخت وركضت اريدن احمي بس مؤيد لزمني صرخت ضربته خرمشته ما تركني

جدي ركض وره المنذر وواحد من الجيران تدخل واخذ السلاح من اخوو حنان

هو وكع بيد المنذر عبالك فرخ جديد ووكع بيد اسد

صارت تجي الراشديات والبوكسيات من كل مكان بعد المنذر الله يسلمه موش جف عليه يسطر سطر...

العالم كلها وجدي وياهم ومحد مخلصه من ايده

ومستمر يغلط عليه بذاك الغلط والمسبه انه اول مره اسمع نذري هييج يسب موش حلوو الغلط مالته

ياله حلووو نذري شيطلع من حلگه حلووو

المهم گوه گدرو يخلصون اخوو حنان اجه ابوها اخذه طاحله راشديات

الولد ينزف من كل مكان وجهه تشوه...

جدي وكف كال لابوها بجبروت...روح اخذ هل عاار وانقلعوو وانه حسابي وياكم بعدين

الرجال جاوبه بحزن...اطييح حضه مااعرف شلون طلع

صلف بجمود...اخذه وروح

انه جنت اباوع عليهم يمماي رجين المنذر اكلتهن الكاع واحتركن من الشمس

رحت بسرعه دخلت جبت نعاله واجيت كدام الناس

خليت النعال كدام رجليه هو باوع عليه بااستغراب دنك وسحبني لزمني من اكتافي،ومشه بيه للبيت

كال...شطلعج منارس

جاوبته بحزن...موش الكاع حاره وانت بدون نعال

هو ابتسم بهدوء وباسني بگصتي همس بحنين...يا روح الروح يلومني لان اختاريتج ما يدرون اني ماخذ مكتلة برائه وحنيه...

نزلت راسي بهدوء وبتسامه حلوه ورجعت باوعت عليه

هو كال ..لا تطلعين بعد ما احب غيري يشوف طوولج

رديت بتردد وسرعه...ياله انه ما طالعه انه ما اطلع بس شنهي انت لا تعارك بعد انه اءء اخافن عليك

هو ضحك بصوت عالي وحضن وجهي بين كفوفه كال...محد يضحكني بعز ضيمي غيييرج لج والله لو عندي طفل موهييج مثلج يفرحني...

يممماي كلمه يخببل يخببل احبنه اتمنئ هييج اختفي،وبس انه وياه اضلن محد يمنه

كون كوكب بس النه عبن شنهي مااريدن اشوفن غير هل عاصفه....

بس وين كله تصييح المنذر ما المنذر...

شنهي ماكو غيره هو صدك اسد والباقي موش اسود بس مو هييج

هاا صدك جدي هم اسد...

جدي صاح بعصبيه...منذر عااف منارس وتعااال موش ما صدكت....

هو عاين علئ جدي بعتب ورجع عاين عليه

بسرعه عافني وراح بعد ما وصاني ما انقهر ولا اضوجن يخاف علئ النونو

انه كله اكولن نونو وزهيره متفاجئه دكول صايره مثقفه وتحجين بغدادي

كلتلها...جااا شعبالج ووحد انه حتئ دارسه...

رجعت كعدت يم البنات بس شنهي تخبلن يكولن منهو كال لاخو حنان بسالفة نيران...

واصلا منهو كال الحنان نيران هيج صار بيها

وهي اصلا جانت ما متزوجه ....

انه حسيتهن شكن بيه ضجت حييل....

عمتي ام جاسم راحت من اول العركه تحشم عمي وابنها

صدك رحت لغرفتي طلعت القران وخليت واجيت يمهن

كلتلهم خاف تشكن بيه انه لكلت الحنان...احلف بالقران ما حجيت ولا كلمه لاي واحد

نيران اختي وعرضها من عرضي وهي اخت المنذر انه من سابع المستحيلات اخونن رجلي واطعن بعرضه...

هاله وكفت بسرعه وسدت حلگي كالت...اسكتي يمعوده انتي منو محلفج

عمتي كالت...هو اكوو غير الفاهي كللها

هن سكت بس نيران جانت تبجي بجي يكطع الكلب...

شوويه ودخلوو كلهم للبيت صار البيت هووسه ...

ودي جاي وجيب الجاي...

اسمع جدي يكول...هسه يروح جاسم وعابد ومؤيد يكاومنهم يجون

عابد...عد عيناك جدي

المنذر كال...خابرت عمر وكال راح اعتقله

صلف...يستاهل...

ضلينه كاعدين ناس تروح وناس تجي ...

شويه واجه عمر

خطيه نيران من سمعت ضلت ترجف وانقهرت كالت..ارجع ويه عمر إذ رجعني ما اريد اكون عار علئ اهلي...

هاله جاوبتها...شترجعين لج عوبه هو غير مطلكج

انه انصدمت ياله جذب شلون طلكلها

بس سكتت انه شلي بالمشاكل. شو محد يعرف بالسالفه

ضلينه تقريبا لليل....

واجوو اهل حنان وعمامها ...

اخذوو عطوه واعتذرو...جدي كال ما صار شئ بس ان شاء لله نتفق علئ الطلاگ

بعدها انه رحت ويه ام جاسم تعبت حييل ورحت البيت عمي...

تلكتني جدتي وامي اساله وانه مالي خلكهن مشتاقه النذري....

....................................

نيران ...

بعد ما كفت العركه جنت اكل بروحي لحم انقهرت حيل من حجو بشرفي...

حسيت روحي عار علئ اخوويه...

كلها راحت ضل بس عمر والمنذر ومؤيد وجدي...

جدي فرشوله بالاستقبال ونام...

وعمر ضل ويه المنذر...

اني قررت ارجع لعمر لان مااعرف شصار بيه احس ما اكدر اخلي عيني بعين اهلي

لذالك تهربت من نضراتهم بعمر...

بلعت ريكي وتشجعت صحت علئ مؤيد ومؤيد صاح المنذر...

اجه وهو جكارته ما فاركت شفايفه كال...هااا

جاوبته بخجل وخووف...اريد ارجع ويه عمر

عقد حواجبه واستغرب كال...افااا ليش شنو صار شئ احد غثاج بشئ

جريت نفس بقوه ومسحت دموعي جاوبته بخفوت...لااا بس اني اريد ارجع

ركز بعيوني كال ...اذا علئ هل عار لحجه عنج فلا تورطين نفسج وداعتج باجر اخلي صريخه يوصل لسجن النسوان...

جاوبته بلهفه وسرعه...لا لا اني اريد ارجع...

كال...ان شاء الله

هو دخل واني رحت حضرت اغراضي وابجي ياربي شلون ارجع وهو مطلكني شلون اعيش ويه شخص اني محرمه عليه....

شويه وصاح عليه المنذر كال...يالله عمر منتظرج

رحت سلمت علئ امي همزين هاله راحت جان ما قبلت اروح بس الحمد لله اجه رجلها واخذها

طلعت شفت عمر راكب بسيارته من شفته ما اعرف ليش رجف كلبي شخصيته وجبروته هو الي يخلي كلبي يدك سريع

مع العلم موافقي وياه كلهن زفت ولا موقف حلوو وهذا الي خلاني اضووج انو اباوع بعيون عمر

لان اشوف ماضيي الاسود بي...

ركبت بالسياره واني احس روحي حتطلع متت من القهر والبجي...

هو زين منه عمر وقابل بيه صحيح اني عار على اهلي

هو باوع عليه وتنهد ساق بسرعه بعد ما ودعت اخواني....

جان طول الطريق السكوت سيد الموقف ....

وصلنه للبيت نزلت من السياره ودخلنه للبيت دخلنه للغرفة...

اني كعدت علئ القنفه والدموع ما فاركت عيوني...

هو اجه كعد يمي وحط ايده علئ كتفي صرخت...لااا وووخر وخررر

انت حرام عليك مو طلكتني

رفع ايده من كتفي وابتسم كال...علئ كيفج نيران طلاقي منج باطل لان بساعه عصبيه وماكو شهود وجنت متعصب مينحسب

باوعتله بقهر ورفعت اصبعي...لا عصبيه ولا شئ انت طلكتني اذا تريد ترجعني تجيب سيد ويعقد النه من جديد

كال بضحكه...عمي اجيب سيد بعد شتردين

ضليت صافنه بوجهه اول مره اشوفه يضحك شكد حلوه ضحكته لعد شبي گالب خلقته دائما...

رفع حاجب كال...مضيعه شئ بوجهي

نزلت عيوني جاوبته...لا

تقرب مني اكثر كال...لهلدرجه اني حلوو وركزتي بيه

رجعت باوعت عليه ورفعت حاجب جاوبته...الرجال ما ينقاس بالجمال الجمال للمره اما الرجال ينقاس بافعاله...

ضحك بصوت عالي كال...والله وطلعتي متكلمه

سكتت ما رديت عليه

رجع حط ايده علئ كتفي كال...اخذي راحتج ولا تخافين ما راح اجبرج علئ شئ وان شاء لله انصلح شكو شئ انكسر اوكي يا حلوه....

درت وجهي مجاهله كلامه...

هو راح اخذ ملابس وسبح...

واني نمت على القنفه بكامل ملابسي وانحب وابجي على حضي للاسف شفته طلعت من الحمام كتمت نفسي واستدعيت النوم...

حسيت بي كعد مقابيلي رفع شعري من وجهي ومسح مسار دمعتي علئ خدي وباسني بجبيني.....

....................................

منارس

مر اكثر من يومين...

انه جنت حيل ضايجه جدي معاند ما يرجعني وانه ميته قهر

عبن شنهي نذري راح يروح من ايدي وجدي معاند

هسه رجعني شنهي انه فاتن حمامه...

والله موش توب نذري ياله توبني حلفت بعد ما ارجع

صدك طلعت ناجحه موش مصدكه موش مصدكه

جدي كالي وانطاني درجتي من الفرح بس ايد جدي وبست راسه...

الحمد لله رحت اول متوسط موش بعد ما اتحاجه راح اصيرن معلمه واعلم الفروخ دار دور داران من دق بابنا نذري دقه بابنه

اي وين ابو فاضل ونذري يدك بابنه ويرجعني

عبن مشتاقه لكل شئ بي

بس وين جدي ما يقبل راح اخلف واسجل ابني بالمدرسه وهو بعده يتشرط....

هاا وصدك البارحه خطب وثاب يكولون موش حلوه دعجه وسمينه

وكلها ضاله تعيب عليها...

انه كلت هي خلقت ربي ليش يقلدون موش زين منها واخذت صخلة العشيره وثاب....

شوويه واندك الباب...

راح اخووي عابد فتحه كال...دشن دشن اجه المنذر

انه ضليت مصطكه بمكاني موش مصدكه وروح ابووي اجه نذري...

هو دخل بس ما عاين عليه يممممممماي يكتل يكتل موش رجال انتقااام انتقاااام

شحلاته شحلات رجولته يخببل احله من المذيعين بالتليفزيون ابو الطكه...

دخل علئ جدي بالديوووان وانه ركضت سويت جاي و وديت ماي ورجعت سويت نومي بصره

صحت علئ عابد كتله...خاف ما متغدي المنذر

كال...لا متغدي

رحت ورجعت سويت كوه كال اخووي عابد ولج منارس كافي طحلتي الوادم طحل....

فشلت من اخووي وسكتت...

رحت كعدت يم زهوره واجه جدي كال حضري روحج عبن نريد ناخذج للمدرسة

انه هم بسرعه حضرت روحي عبن يردون يسجلوني

طلعت شفت المنذر راكب بالسياره وجدي لزمني صعدني بالصدر

انه كتله بأدب...ياله جدي انت لازم تكعد بصدر

هو ضحك كله روح منذر

المنذر رجع ضحكله وساق بسرعه

اني انخبطت الواني شنهي انه شسويت خفت والله ما مسويه شئ ليش جدي اطاني للمنذر معقوله راح يكتلوني

بالقران اني ما طلعت سالفة نيران ياله ليش يكتلوني

بسرعه بجيت هو باوع عليه كال...شبيج

منارس بخوف...انه والله ما مسويه شئ والله

هو ضحك كال...ادري بس جدي رجعلج اليه بعد ما شرط بيت لوحدج وباسمج ....

باوعت عليه بذهول...شنهي بيت الوحدي ياله والله ولا اكعد بي عبن يكولون جنه بدون ناس ما تنداس

رجع باوع عليه وابتسم كال...لا منكعد بس راح اسجله باسمج تذكري البيت الرحناله مرتين

جاوبته....هااا الكتلتني بي اي اتذكره بس لا تريد تسجله باسمي

كال...اي تستاهلين

كتفت اديه وجاوبتي...ياله وروح ابووي ولا اريده بس تسجله احركنه عبن شنهي بيت فكر كل ما اروحن اله انكتل..
.
المنذر ضحك بصوت عالي كال...لا اصبغه وارتبه يروح منه الفال الموزين

رجعت باوعت عليه بحنان جاوبته...ياله حبيبي انت اكبر هديه انه ما اريدن بيت ولا سياره اريدنك انت

جر نفس عميق وابتسم كال...يابه لا تقهريني فوك قهري والله متندم من مديت ايدي عليج وهذا البيت بسمج شئتي ام ابيتي

ضحكت ودنكت راسي...انه وياك واحد والشئ الملكك هو ملكي مابينه ينذري

هو رفع ايدي وباسها...

وصلنه للبيت عمتي استقبلتنه وتبوس بيه وتهلي عليه....

وانه رحت نضفت البيت عبن شنهي صار موش هلكد

تعبت باليل رحت النذري

سبحت ولبست ثوب أحمر

هو من شافني تخبل عيونه صارت موش راحه وتنطنط عليه

بسرعه وكف وباسني بشفايفي بلعت ريكي

خجلت منه حييل عبن صار هواي ما متقربه منه

سحبني للجربايه وهو يبوس بيه ويعتذر انه حيل احبنه واعرف يحبني عبن اختبرته وكتله انه روجين وهو ما اهتم

عرفت يحبني ومايحب روجين ام سيقان ولا ام عطوب ولا ذيج الجلحه....

انا كل نسوانه بعد شريد يمممممماي يمووت يمووت

تقرب مني بس جان حذر وموش مثل قبل ياله بهدوء

نمت بين احضانه وانه مغموره ومطموره برومانسيته...

........................

مؤيد بعد مرور اسبووع...

اتفقنه اني وجدي واهل حنان علئ الطلاگ...

جدي راح استفسر لان يكول التطلك وهي حامل حرام وباطل...

راح الشيخ  والشيخ كله ما دام خاينه طلكوها...

صدك رحنه نطلك يم الشيخ

رجعنه رحنه للشيخ ضلينه كاعدين

اجت حنان هي وابوها ....ابوها طردها كلها ضلي واكفه بالباب انتي مو مال احترامات

هي ضلت واكفه وتخزر بيه

الشيخ كال...ابغض الحلال عند الله الطلاق عمي المره حامل لا تطلكها واذا غلطت ماكو واحد معصوم

ابوها كال..هي تنزف لان كتلناها واذا مات الطفل اني ما مسؤؤل...

صلف تنهد وكمل...الحياة والموت بيد الله اذا مات هذا امر ربنه واذا عاش انه ما اكطع راضع من مرضوع...خلو الها

ابوها رد بغضب...لا الكم

صلف هز راسه باي...

صاح عليها الشيخ هي اجت وتبجي بصوت عالي ووجهه مزورك

كلها الشيخ ...بويه انتي تردين تطلكين

هي ردت بصراخ...لا لااا احبه ما اريد اطلك واني حامل

اني رديت ...شيخ طلك وكافي احنه متفقين علئ كلشي

ابوها لزمها وطردها

والشيخ بده بعقد الطلاك...

باوعت عليها وهي خزرتني واشرتلي بيدها بمعني اله اخليهم يطيحون حضك...

هزيت ايدي

وبعدها رجعت باوعتلها وهي سوت...تفوووو عليك

نهاية...البارت....يتبع

كونوا انتم كونوا بخير...احبكم

نور سمو العراق...❤