البارت الثالث والثلاثون
رواية...انا هي جميع نساؤك
بقلمي...نور سمو العراق
💔💔💔💔💔💔💔
مؤيد.... المخادع فقط يستطيع أن يكون ذا وجهين، والأغبياء يصدقونه، والمجرمون يصفقون له.وعندما تسألني عن الخيبه أخبرك بأنها أوقات قضيتها مع انسان كاذب... هذه المرة لن أبكي على من يخذلني ، فمن يكسر شيئا جميلا جمعني به لا يستحق قطرة من دموعي !
....................................
باوعت عليها تفلت عليه...
نزلت راسي واحد شيحجي ويه عار مثلها
بدينه بالإجراءات الطلاق وطلكتها تنازلت هي عن الحاظر والغايب...
طلعنه من المحكمه وهي توخزر بيه ....
شنو ذنب الطفل الي يجي بهيج ضروف قاسيه هم اكدر وامه طعنتني
ان شاء لله يموت ولا ينولد مااريده هو احتمال مو ابني
خاينه حقيره الله يهلكج ويسود وجهج مثل ما سودتي وجهي...
والله صح الانسان يغلط ونكدر نتجاوز عن اخطائه لكن حنان وحده صلفه وحقيره
ركبنه بالسياره وجدي كال...اكوو حديث للرسول صلى الله عليه واله وسلم يكول إياكم وخضراء الدمن
باوعتله بااستغراب كتلها...اي
كمل بهدوء...سالو الرسول صلئ الله عليه واله وسلم كلوله شنهي خضراء الدمن...كلهم هي المرأه الجميله بمنبت السوء
ياجدي تفسير الحديث ينص علئ ان موش كل وحده حلوه تغرينه بجمالها وهي موش زينه...
وانه ما اقصد كل الحلوات موش راحه ياله هاي منيرس تنافس الكمر بجمالها...بس حليبها طاهر ومنبتها حسن
جريت نفس قوي واني استمعله جاوبته...اني شمدريني امي لزكتها بيه حلوه وحلوه ومثقفه وعلئ الموده
صلف بعتب ...جااا جدي بعد جدك ساطرك العباس ماتعرف تسأل تنشد دكول هاي الراح اخلص عمري وياها زينه ياله
بسرعه ركضت تزوجتها الزلمه الحوك يسأل علئ اصلها وفصلها منين ويشخلها شخل...
مؤيد..سالت كالو خوش ناس
صلف عض اصبعه...هو انت فاهي انه كلت من زمان عود انت اخوو المنذر ياله وروح محمد موش اخوو... تصير زلمه يا مؤيد لا اكضنك بصونده الوبجک تلوبج
عبن شنهي كلش داقني رجال ما ينتبه المرته شتسوي ما تسوي اذا تضل فكاكه حتئ لو ازوجك الاخس من منيرس
هم تتفرعن براسك
صييير رجال ولا تخلي المره تصير ارجل منك
ضجت كلش من كلام جدي جاوبته بعصبيه...شبيه مو رجال لان فقير واحترم مو رجال يعني اله اطيح حضها يالله دكولون رجال...
صلف بحده...ولك جااا شنهي هو الرجال بالكتل ؟ انت حاسبها لا تسوين هيج لانلبسين هيج خلي الك كلمه انه ما كلت الك اضرب كتلك خليلك شخصيه...
هي لو معترفه بيك وشايفتك رجال ما تفلت عليك كدامنه
جريت نفس ورديت بقهر...هو ابوها ما تخاف منه تريدها تخاف مني
صلف...عبنكم ثنينكم موش زلم لو زلم وتخاف منكم ما سويت هيج
ولك والله جنت جدتك لسانها اطول من طريق لعماره كصيته الها وخليتها تعترف كلمتي ما تصير ثنين
انه جان ابوك محمد جاهل واجاني يبجي كاتلينه لزمت عليه عكالي كتله اذا ما تروح تچسره تچسر لا تجيني
موش يكتلونك وتجيني تتبچبچ ياله تاخذ حقك بيدك حتئ لو جنت فرخ
وصدك محمد من ذيج. الساعه تعلم اليضربه يضربه ..وليهينه يرجعله نفس الاهانه
القصد يجدي اريدنك تصير زلمه وتعتمد علئ روحك اليتجاوز عليك تلطمه علئ حلگه واليدوس عليك كسر راسه وخلي كلمتك وحده
هزيت راسي وسكتت....
رجع جدي سالني بااستغراب...ليش اخوو حنان يطعن بعرضنه ويكول لكينه اختك بشقة دعاره
مؤيد...جذاب واحد محترك دمه شتريد يكول اكييد يطعن بشرفنه خلي يولي
باوعلي بشك وسكت
بعدها جر نفس وكال...انت واخوك شلاعبين من وراي
مؤيد...والله ماكوو شي وروح ابووويه بس اكيد محترگ گلبه هذا واحد نذل مثل اخته...
صلف...خوش عوفنه منه شرايك اخطبلك ازهار بنت عمك خووش بت وعاقله وشريفه
مؤيد بقهر...مااريد اتزوج روحي لعبت من النسوان
صلف بعصبية...بووويه موتني الفاهي ولك جدي شبيك موش انكسرت عندك هاي هي انتهت الدنيا لا تبين العدوك انت مكسور ياله اريدنك بطل موش جبان ومكسور
مؤيد بحيره...بكيفك شتسون سسو
صلف ...خوووش خليني انه اتكفل بالموضوع
سكتت مجاوبته ورجعنه للبيت واني اتمنئ امنيه وحده الطفل يموت...
صح ماله ذنب بس العار راح يلاحگه ليوم الدين...
.......................................
كعدت الصبح مؤيد موش هنا راح يطلك وعمتي بالسوك...
ونذري بعد گلبي بدوامه...
نضفت البيت وغسلت مواعين وعجنت اريدن اخبز...
نذري فرحان عبن شنهي رجعت
وانه موش مصدكه رجعت لاحضان عاصفتي....
عمتي تشيل روحها وتطكها بالكاع منهو وصل موضوع نيران الحنان...
وكالت مؤيد ما يدري بالسالفه انه هم نسيت...
انه سكتت جااا شحجي....
بس رحت حجيت ويه المنذر كال...مالج شغل انتي ممقصدوده
الحمد لله ارتاحيت شووويه....
صدك نسيت موش رحت قدمت مسائي اول متوسط
شنهي كلهن اكبار وعجايز وام طالب لگيتها هناك همزين فرحت عبن شنهي هي صاحبتي
صحيح هي من اكللها غششيني تفضحني ودكول للعمله...ست منارس تريد اردلها
والمعلمه دكومني تكعدني اول رحله
بس ميخالف تضل صاحبتي وما تخبث بس بالصف بس خارج الصف لا حبابه...
هي المراقبه علينه من جنه بالسادس سوت بينه فلك
بس وحده تفك حلكها سجلت اسمها
انه جنت اهددها بالمنذر وهي دكول يممماي خفت خفت الحكووني...خايبه دولي انه ابو طالب حاطه براسه عشر خياطات....
بس حاليا لا حبابه وتحبني موش اول ما اجيت تضوج مني...
استلمت كتب من المدرسه ودايخه بيهن شنهي مااعرف ولا طكه اصعب من الابتدائي...
دخلوو جدي ومؤيد وهمه يسولفون ....
اجيت كعدت يمهم ...جدي كال سويلنه جاي انه رحت سويت وصبيت الهم...
كال...هااا شلونه وياج نذرج مشه عدل يا ارجع اجرن اذنه
جاوبته بسرعه ولهفه...ياله جدي مثل الورد كلللش زين
كال بحده...خوووش واحد منهم يحاجيج كليلي اجسر جعووبه
هزيت راسي بأي وطلعت...
والله يالله يجسر نذري وابو فاضل غير اموتن ياله ادافعله مااخلي جدي يكسره...
تثقفت اكولن يكسره موش يجسره ...ان شاء لله بعد وبعد
اجت عمتي من السوك وانه عزلت المسواك وسويت غده
وهي كل شويه دكله...بعد امج منوره لا تعبين نفسج
تفاجئت عبن صايره تحبني وحتئ من رحت استلمت كتب ماحجت ولا ضوجتني...
وانه حيل فرحانه موش مصدكه عمتي صارت زينه وياي....
رجعت للمطبخ وانه اغني اغنيتي المفضله...
خايب هوي خايب هووي خايب هوو
ياحيه يام راسين خايب هوو طبي بجدرهم خايب هوو وسمي عيال البيت خايب هوو
بس خلي نذرهم خايب هوو...
وانه اغني حسيت اختنكت لزمت صدري بصعوبه وكعدت بالكاع مااعرف شصار بيه خنكه موش طبيعيه....
ضليت اتنفس بصعوبه واقره ايات واصلي علئ محمد
مااعرف شبيه ضليت ابجي بس انه مااحبن واحد يشوفني ومااحب انكد علئ الوادم...
خليت وكمت غسلت وجهي ورحت اكمل الغده.....
................................
نيران...
عمر حجه ويايه كال رحت للشيخ وكال الطلاق باطل وكونك مو نضيف الطلاق يحتاج طهاره...
وكونك جنت بحالة غضب شديده...
اني جنت بحالة اكتئاب ما جاوبته ومسحت دموعي وعفته وطلعت بره
مر يومين علئ هذا الكلام ...
همه اهل عمر جانو عائله مرتبه وهادئه....
دائما اخلص واجبي العليه وارجع لغرفتي كلامي قليل وياهم او بالاحرئ ممتعوده عليهم...
وهمه ما يحجون حتئ صوت التلفزيون عندهم ناصي اذا تابعت مسولسل مااسمع مخلينه علئ انصه درجه
امل واكعد بغرفتي....
دخلت سبحت ودا امشط بشعري...
دخل عمر باوع عليه واني باوعتله ودرت وجهي عمر احسن من قبل بهووايه بس دائما يكابر
بس اشوف اهتمامه بعيونه ونظراته تثبت هذا الشئ
لكن دائما يجافيني مااعرف ليش يخليني اكره نفسي حييل
يمكن لان بنظره انسانه مو نظيفه بس هو ممجبور اني كتله قبل لا تطلك حنان طلكني
وهو اصر يرجعني ....شفته اخذ ملابسه ودخل للحمام
جريت نفس قوي ورحت كعدت علئ القنفه مر عليه شريط حياتي
ومن بينها الفجوه الي دمرت حياتي فاروق النذل يكولون صاير زين ويكولون شارب العرك كله بحفلة خطبة خاله الله ياخذه....
كلش انقهرت الله لا يوفقه بهذلني...
ختنكت بعبرتي وبجيت بصوت خافت
طلع عمر من الحمام اول مشافني ابجي استغرب وعقد حواجبه واني ارتبكت ومسحت دموعي بسرعه....
هو تقرب مني وكعد مقابيلي جر نفس كال...شبيج نيران
بلعت ريكي جاوبته بهدوء...ماكوو شئ
هو تقرب مني مسح دموعي واني عبالك استجابيت اله بجيت بصوت عالي
هو سحبني لصدره بلهفه ومسح علئ ضهري
همس بحنيه وشبه رومانسيه....اسكتي ان شاء لله كلشي ينحل واوعدج اصلح كلشي انكسر
همست من بين شهكاتي ...لاااا اني ما استاهلك اني اصلا مكسوره ومحد جبرني
عمر تنهد كال...جبرج يعمري بس انطيني مجال
حضنته حييل واني ابجي بصوت وهو يمسح علئ ضهري ويهدء بيه....
..............................
بعد مرور اكثر من خمس اشهر....
اليوم خطبت ازهار و مؤيد ....
زهوره خطيه فرحانه ومعتنيه بروحها واجدادي راحو من تطلكت حنان
بس البارحه اجوو عبن اليوم خطبه وجدي لازم يكون حاضر
انه بطني صغيره موش كلش جبيره جايه بالعرض بس شنهي صايره حمره وخشمي أحمر والمنذر كله يكلي صايره بطه بطه مووش مره
لان سمنانه
اجن البنات ويدكن ويركصن ذابات لحم ومؤيد زين ما ضايج....
المنذر دخل للحمام سبح وبدل ....
وانه هم بدلت لبست فستان كصير جنت جاي البس بالساعه هي مابيها باتري بس ميخالف للكشخه...
هو طلع باوع عليه وضحك اخذ الساعه من ايدي ولبسها اليه وباس ايدي
ابتسمت ونزلت راسي
بعدها اخذ العقد و وكف وراي رفع شعري ولبسنياه بهدوء
جانت عيونه حاده تخترقني بالمرايه يمااااي موش نظرات يموتن يموتن...
عبنه شنهي زلزال اي وروح ابووي زلزال يخليني هييج اروح منا واجي منا من واحد واتطوطح
باسني بركبتي وانه نزلت راسي علئ خدي
رجع باسني مره ثانيه وثالثه
سحبت نفسي منه بدلع وجاوبته...كافي ينذري شنهي انت ما تشبع
هو سحبني علئ كيف وكطع باقي كلامي ببوسه عميقه وموش حلوه
ياله حلوه بس غريبه
دفعته شويه كال...لا والله مااشبع
ضحكت كتله...كولت جدي مهروش وطاح بكروش
هو عض شفته بزعل كال...لا يا غبيه علئ هل حجي
ضحكت وحضنته
هو ضحك حط ايده علئ بطني وكال...شلونها العائله؟
جاوبته...زوينين يبوسون ايدك...
ابتسم ابتسامه حلوه كال...هم متعبج الطفل
جريت نفس وحطيت ايدي علئ بطني وابتسمت...موش هووواي شووويه...
كال...افااا والله اطيح حضه اذا تعبج
حطيت ايدي علئ خصره جاوبته ...يااا والله شنهي ما وراه ام تهد وراه شنهي تطيح حضه
هو تقرب مني بمراوغه كال...تهدين عليه لخاطر ابنج
باوعتله بحسره ....ياله اهدن علئ صلف الخاطرك
هو ضحك بصوت عالي واحتضني حييل حسيت تكسرت ضلوووعي
بعدها عمتي دكت الباب كالت ...يالله وينكم راح نروح
بسرعه هو مشط شعره ولبس قندرت...اءءء حذائه قصدي
وطلعنه انه لبست عبايه وحجاب عبن عيب...
رحنه البيت عمي زهوره امكيجه ومبدله شويه رايح اثر الجدري
وطالعه تجنن تجنن كلش حلوه
همه متفقين علئ الحاضر والغايب واحنه ضلينه نركص بس انه ما ركصت....
وجدتي تهوس علئ عمي...ابنج متخير من عمه ابنج متخير من عمه
واحنه نركص...
صدك مؤيد اخذ من عمي ابو جاسم ازهار وازهار خووش بت وشريفه...
انه هوست كلت...مؤيد ماكعد راحه اخذله خوش تفاحه
صدك موش مره تفاحه
دخل مؤيد مبتسم ولا جنه ذاك اليوم حنان خانته الله منطي نعمة النسيان
انه وين الاسد علئ سالفة نيران لا ياكل ولا يشرب وحتئ انه يزكح بوجهي
بس مؤيد بارد
دخلوو عقدو ورجعو كعدو علئ القنفه مؤيد مبتسم
وازهار خطيه خجلانه وترجف رجيف كله انتبهت عليها حتئ مؤيد
جدتي تحب هاي السوالف ضلت تدك حبها ولك حبها ولاتخاف من امها...
مؤيد ما صدك ضل يمطك وازهار شارده ههههه
خلصنه الخطبه ورجعنه البنات يمنه واجه عمر
سوينه عشاء وجدي وامي وجدتي اجوو يمنه صارت عزيمه وانه اركض هيج وهيج...
بس الله شاهد البنات ما قصرن ضلن يساعدني.....
كفينه العشاء وغسلنه المواعين ونيران راحت ويه عمر وهاله اخذها رجلها
جدي وجدتي باتو يمنه....
انه رحت الغرفتي طكيته نومه حتئ نذري ماادري بي.....
كعدت الصبح لكيت المنذر نايم ومنطيني ضهره
وانه حاطه رجلي كلها علئ خصره حركتي الموش حلوه
بسرعه كعدت ملهوفه وسحبت رجلي وهو رجع سحبها
يا صخام ولطام كاعد
جاوبته بخجل وخوف....المنذر شنهي عووفني عيب وروح ابووي
ضحك كال...احببج واحب هاي الحركه
باوعتله بعصبية...عبنك ابو نسوان تحب هاي الحركات انه مااحبها عبن شنهي عيييب عيييب افتهمت
هو سحبني صرت جوه كال...مو عييب مو عيييب وكم مره كتلج لا دكولين ابو نسوان
ضحكت بوجهه باارتباك...ياله قصدي شنهي يصيرن عندك بنات ومن يكبرن يصيرن نسوان بدال ما يسمونك ابو البنات يسمونك ابو النسوان....
ضحك بصوت عالي كال...تعرفين تصرفين
ما سمع اله الباب اندك وجدي يكوول ...المنذر تعال عبن موضوع مهم
هو وكف بسرعه راح غسل وطلع وانه هم غسلت وطلعت
جدي جان واكف ويفتر وجدتي تبجي وعمتي تبجي حالتهن حاله استغربت منهم
المنذر باوعلهن مستغرب كال...شكوو
صلف بجمود....حنان جابت واجه منهم طارش يكول تعالو اخذو الولد روح انت ومرتك جيبو الطفل...
خلي منارس تجيبه وانت انتظرها ببابكم
انه انصدمت والمنذر هم انصدم بس امتثل الامر جدي
وراح بدل وانه بدلت ورحنه لاهل حنان....
وصلنه للبيت دكيت الباب فتحته امها عبالك جانت منتظرتنه...
صدك جدي كال...صار الها اسبوع جايبه بس احنه ما ندري وجايبه ولد....
اول مادخلت سلمت علئ امها
طلعت حنان تبجي وتمشي علئ كيف كالت....هااا جاي تاخذين ابني
كلش انقهرت عليها كلتلها...ياله ابنج الج انه جاي اشوفج
كالت وهي تبجييي حييل...اهلي مايرضون اخلي ميرضوووون
سكتت وجريت نفس بعدها دخلني جوه باوعت للطفل احمر وصغير ويبجي حييل ....
انقهرت عليه جان يباوع بعيون بريئه ما مفتهم من الدنيا شئ
هي من شافتني دخلت ركضت علي شالته وحضنته الصدرها مثل المجنونه...
كالت ما انطي...خطيه تبوس بي مثل الملهووفه
موقفها لحد الان ماانساه يكطع باب الكلب....
امها سحبته منها بعصبيه واخذت منه البطانيه وانطته اليه وهو يصرخ ...
وحنان تصرخ وانه متت بجي
طبت عليه بشرئ تصرخ وتبجي كالت...ساقطات كح...امهات الولد صايرات شريفات تذبن تهمه علئ اختي الله لا يوفقجن
مؤيد ان شاء لله سياره بدوون رقم
حنان فتحت ثوبها طلعت صدرها كالت...اني نفسه ربي اريدك مؤيد تبهذله ان شاء لله مايرجع سالم اخذوو ابني مني
انه تقدمت ورجعته وانه ابجي علئ حالها كلتلها...اخذي خطيه والله مؤيد مايحجي يكول اذا تريده خلي الها
امها طلعتني كالت ...اخذي خاله وروحي
طلعت امشي بيأس ودموعي توكع علئ عيونه واختلطت بدموعه شكد مسكين ياربي احسنه مضلوم هل طفل...
ومااشوف اله اخوها اعترض طريقي وهو لازم حديده وعيونه تجدح
تراجعت بخووف وانه احظن الطفل....
نهايه البارت ...يتبع
كونوا انتم كونوا بخير...احبكم
نور سمو العراق...💔
غلسوو علئ السحكات..وصوتو بلا زحمه 🌷
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!