رواية _حافيه_القدمين💋 الفصل الحادي عشر 11 - بقلم زهورا

الشيخ ،،،جان مخلي ايدة على قلبة ودمعتة واكفة على طرف عينة ونفسة ثكيل تقربت منة وهمست شمالك شيخ كامت شفتة ترجف ووكع عليه بعد ميصد ولا يرد صرخت والتمت الوادم علينا وديناه للمستوصف وكالوا جلطة صايبتة ولو نلحك بي للمدينة لو منلحك
رحنة بسيارة الاسعاف وزيد مندري عنة وين صارت بي الدنيا من الصبح وهو يدور عنها اتصلوا بغزوان وجان ينتظرنا بالمستشفى وجان مصدوم وميعرف شصاير دخلوا الشيخ للعناية المركزة وحجيت لغزوان شسوت بينة زهراء وشلون لعبت علينة كل هالفترة وكتلة اكيد شردت مع حبيبها
جان غزوان مدنك وساند راسة بأيدة وماحجة ولا كلمة طلع الدكتور وكال احنة سوينة الي نكدر عليه والاعمار بيد الله الله يرحمة
غزوان،،،،ضربت راسي بالحايط وبجيت وامي تدعي على زهراء واليوم الي لفيناها بي لبيتنا
غزوان ،،،حضنتني امي وقسمت لا اكون ذباحها وميهنالي عيش ولا اطب بيت الشيخ الا وماخذ ثارة ودموعي لاول مرة تنزل على خدي
زهراء،،،من نزلنا من الباص اخذوني على الخيم مالتهم كعدت بعيد عنهم بالزاوية ولميت نفسي وكعدت ابجي ظلوا يحاجواني ويريدون يعرفون قصتي بس مكدرت احجي شي
اجتي المرة الجبيرة وكالولها يمكن خرسة هاي شو من صعدت ويانة ماسولفت كالتلهم خطية تركوها صبولي غدة واكلت شوي وعفتة تندمت اني شسويت بروحي وشيوصلني لغزوان وشلون اعرفلة طريق بعد جان عقلي عقل طفلة والخوف سيطر عليه وماعرفت شلون اتصرف بوكتها ومن شردت جان بأعتقادي افضل حل وكنت معتقدة انه راح يجيني غزوان ويرتمي بأحضاني مجنت حاسبة حساب الفضيحة والعار الي راح يلحق اهلي بسبب شردتي بيومها بالليل كعدت يمي المرة الجبيرة ام فضة اسما وطلعت البنات وكالت ها يمة ارتحتي اكدر احاجيج
زهراء،،،كفيت نفسي وجنت اباوعلها بخوف
ام فضة ،،،احجيلي يمة شنهي قضيتج اذا قتل مااحويج يمي واني ام فضة بس اذا سرقة او غير شي احجيلي نشوفلج دوبارة شنهي علومج
زهراء،،،خفت اكثر وهمست اني ماسويت كلشي وكمت ابجي
ام فضة،،،لعد من منو شاردة وليش؟؟
احجيلي لتخافين ياحلوة الي تشوفيهن كدامج هالبنات كل وحدة بيهن قصتها قصة وكلهن لفيتهن يمي وحميتهم من جلاب الشوارع ومن غدر بني ادم
زهراء،،،بس اني مااريد اصير مثلهن
ام فضة ،،،بنيتي احجيلي قصتج خليني على بصيرة انتي اذا الله ماجذبني بنت عز وخير ودارت بيج الدنيا مثل مادارت على غيرج
زهراء،،،خفت بالبداية احجيلها بس بعدين ارتاحيت الها حجيتلها قصتي كلها
ام فضة ،،،يا سواد وجهج ياام فضة انتي ترباة شيوخ و يصير عمج الشيخ وانتي اليتيمة الي عزج ورباج وصانج وعبالك بنتة واعز؟؟
شجاج يمة على هالسواية الي تكسر الظهر
زهراء،،،كمت ابجي ومااعرف شنو اردلها
حضنتني وكالت اوف بعدج طفلة شألوم بيج حسبي الله على غدر وظلم بني ادم لنفسة ارتاحي يمة خليني افكر بهل يومين شلون راح نتصرف بس الي اريدة منج انه تخلين نفسج خرسة وماحد من البنات يسمع صوتج حتى ميجرجرنج بالحجي ويفضحونج
غزوان ،،،من دفنة الشيخ وماخطيت البيت ابد ظليت بالمضيف طول الفاتحة لبسوني ثوب المشيخة وحلفت مااستلم مهام الشيخ الا اخذ بثارة مجان كل الناس ولا كل العشيرة يعرفون شصاير بداخل بيت الشيخ امي كالت لناس انه زوجناها لزهراء بغير محافظة وماكدرت تحضر فاتحة الشيخ
غزوان،،،جانت روحي تلوب وقلبي تشب بي نار متهدة واحس كاعد على جمر وماراح تطفى ناري الا اخنكها بأيدي لزهراء وبكد الحب الي جان الها بكلبي بكد الحقد والكره الي بداخلي تجاهة
ام فضة ورة 3 ايام والبنية لاتطلع ولا تتحرك من مكانها دخلت احاجيها وهمست الها خوما احد سمع حسج وحاجاج
زهراء ،،اشرت براسي لا
ام فضة،،،اسمعي يمة انة راح اروح لمنطقتكم واتحرى عن علوم اهلج واذا كدرت اقابل الشيخ واحجيلة الي صار واعرف شنو ناوين يسوون وشصاير بعدج
زهراء،،،اخذيني وياج خالة الله يخليج
ام فضة ،،،لا يمة علامج تروحين الموت برجليج خلينة نعرف على شنو ناويلج وشنو مطلعين عليج من حجي اكيد ام غزوان ماتركتج بحالج  اروح اشوف وان شاء الله خير من اطمن ارجع اخذج عليهم باجر يلا احنا رايحين بسلامة
زهراء،،،شكد ارتاحيت كلت اكيد عمي الشيخ راح يفرح اذا لاكاني واخيرا راح يظهر الحق كون تلكة غزوان هناك او تعرف خبر عنة يارب ان شاء الله خير