رواية حكايه مرام الفصل الأول 1 - بقلم احمد محمود

زميلة مراتي عزمتنا على حفلة عيد ميلاد بنتها مرام اللي عندها 7 سنين. الساعة 8 كنا وصلنا العمارة، طلعنا الدور الرابع. رنيت جرس الباب وبعد كام دقيقة فتحت لينا مدام أسما. رحبت بينا ودخلنا. أهلًا بيكم نورتوا. كان لسه مفيش ضيوف وصلوا غيرنا، بس كان في أجواء عيد ميلاد، زينة متعلقة وبلالين، وأغاني أطفال شغالة. كان في شغالة واقفة، طلبت منها تجيب مشروب. حاضر يا مدام. وجهت كلامها لزوجتي. زينب وحشاني أوي، فينك من زمان.

أنا موجودة أهو، بس معلش شغل البيت، والولاد، أنتي فاهمة بقى. ربنا يعينك، بس أنتي ليكي فترة متصلتيش. صدقيني الفون وقع مني وضاعت كل الأرقام معاه. أها عشان كدا كل ما بتصل بلقاه مقفول. المهم طمنيني عليكي يا أسما. الحمد لله احنا بخير، سافرت فترة مع جوزي بره مصر، بس متحمّلتش الغربة وقررت أنزل مع مرام ونسيب باباها هناك، بينزل مرتين إجازة في السنة.

رجعنا من 8 شهور، حاولت أوصلك كتير معرفتش، بس جبت رقمك من زميلتنا أميرة، فاكراها؟ آه طبعًا فاكراها، هي أخبارها إيه؟ فضلوا يحكوا مع بعض عن ذكرياتهم في الثانوي والجامعة وإيه إنهم مفتقدين للمة الصحاب زي زمان والجو دا. أسما كانت نفس سن مراتي، المفروض عمرها 43 سنة، بس ملامحها تقول إنها أصغر من كدا بعشر سنين ع الأقل. وكأنها متجاوزتش الـ 30 سنة!

كنت مستغرب جدًا، معقول علامات السن مش باينة عليها كدا، وإزاي مراتي مخدتش بالها ولا يمكن خدت بالها ومش عايزة تلفت انتباهي، غيرة ستات مثلًا؟ الحقيقة مش فاهم. الساعة عدت 9 ومفيش ضيوف وصلوا. هو حضرتك مش عازمة حد غيرنا ولا إيه! لا عازمة طبعًا، بس في ناس عندها ظروف واعتذروا، وفي ناس زمانهم على وصول. بعدها خرجت مرام، لابسة فستان أبيض. رابطة شعرها فيونكات وشكلها حزين. تعالي يا روما سلمي على طنط زينب وعمو شريف.

البنت جات وسلمت عليا، قعدت قصادي وأنا حاسس إنها متضايقة، متوترة، فيها حاجة. بعدها بشوية مامتها قالت. يلا نطفي الشمع بقى. أسما بصت للست الشغالة، هزت دماغها إنه كله تمام. اتفضلوا يا جماعة. روحنا ع السفرة موجود 4 كراسي عليها. هي ومرام قعدوا جنب بعض، وأنا ومراتي جنب بعض. التورتة كانت في النص وحواليها قطع جاتوه وحلويات وعصير وفاكهة ومياه غازية. صورة مرام في نص التورتة، مكتوب عليها: عيد ميلاد الأميرة مرام.

بس لقيت عدد كبير من الشموع. في عدد كبير من الشموع، عديتهم بسرعة واكتشفت إنهم 43 شمعة. هو عيد ميلاد بنتها ولا عيد ميلادها هي؟ ولعت الشموع وطفت النور. وقفنا احنا الأربعة نقول: Happy birthday to you. Happy birthday to you Maram. Happy birthday to you. وبعد ما طفينا الشمع لقيت مرام...