رواية صدفه للحب الفصل الحادي والعشرون بقلم عهد عامر

بعد مرور أسبوع، كل واحد رجع من شهر العسل مع حبيبته على بيته، وكان أسبوع كله فرح وسعادة وحب للكل. في بيت عائشة: عائشة: آه أخيرًا رجعنا. محمد: اللي يشوفك يقول إنك كنتي عايزة ترجعي وأنتي ممشيكي بالعافية من هناك وفرجتي عليا الناس. عائشة: الجو كان حلو. محمد: تقومى تعيطي وسط الأوتيل وتقولي خاطفني، تخلي الأمن يوقفني لولا ما خرجت كارنيه شغلي كان زماني مقضي الليلة في الحبس؟ عائشة: على الأقل كنت هقعد شوية كمان.

جرى محمد وراها وعائشة دخلت الأوضة بسرعة وقفلت على نفسها. محمد: بتجري مني؟ طيييب. عائشة: الجري نص الجدعنة معروفة. ضحك محمد عليها ودعا ربنا إنها تدوم في حياته. *** رجع عمر ومازن البيت ومعاهم نور وسارة ولقوا منصور قاعد هو وسحر، والحزن مالي وشوشهم. عمر بقلق: فيه إيه؟ منصور: بلغوني من السجن إن ندى انتحرت يا ابني. مازن: لا حول ولا قوة إلا بالله العلي العظيم، ربنا يرحمها.

عمر: محدش يجيب سيرة لعائشة، احنا مصدقنا إنها خرجت من الحالة اللي كانت فيها. منصور: ده اللي هيحصل، المهم بكرة الصبح تيجوا معايا عشان نخلص الإجراءات وندفنها. مازن: حاضر يا بابا. سحر: حقكم علينا يا ولاد، خدناكم على مشمكم كده ومرحبناش بنور ولا سارة. نور بطيبة: ما تقوليش كده يا طنط، الله يكون في عونكم. سحر: يا رب يا بنتي، يلا اطلعوا أوضكم وهنندهلكم على الغدا. عمر: حاضر يا أمي، بعد إذنكم.

وطلعوا فوق غيروا هدومهم ونزلوا تاني اتعشوا في جو مرح حاولوا فيه تخفيف الحزن على قلب منصور للي حصل في ندى وكمان يهونوا فراق عائشة. وبعدها طلع الكل ينام. *** عند عائشة الساعة 2 الفجر. صحى محمد على صوت عياط عائشة. محمد بخضة: مالك يا عائشة إيه اللي حصل؟ حاجة بتوجعك؟ هزت عائشة راسها بنفي. محمد: طيب مالك إيه اللي حصل؟ عائشة بعياط: ماتت يا محمد ماتت. محمد بتوتر: هي مين؟ عائشة: بطلة الرواية.

محمد بصلها بعدم استيعاب: مين يا عنيا؟ عائشة: بطلة الرواية. محمد: يا بنتي الله يهديكي قطعتيلي الخلف وصحيتيني من أحلى نومة عشان تقولي إن بطلة الرواية اللي هي وهمية أصلًا ماتت؟! عائشة: أنا كنت عارفة إنك مش هتستحملني يا محمد، فضلت تقولي هبقى معاكي وهستحملك وأديك أهو ظهرت على حقيقتك من تاني أسبوع جواز عاااااااااا وديني لأميييييي! محمد: بااااس، إيه ماسورة واتفتحت، وبعدين هو أنا اشتكيت؟

عائشة: إيه يعني أما أصحيك تلاتة الفجر وأنا بعيط؟ الحق عليا إني بصحيك وبالمرة تكسب ثواب وتقيم الليل. محمد: ما أنتي لو مصحياني عشان الثواب مش هتكلم لكن أنتي مصحياني وأنا قاطع الخلف. عائشة ضمت إيدها وبصت قدامها وسكتت. محمد: طيب ما تزعليش خلاص. عائشة: ... محمد: ألاه، دانتي زعلانة جدًا. عائشة: لو سمحت يا أستاذ محمد اخرج نام برا مادام بقطعلك الخلف.

محمد بضحك: أستاذ مرة واحدة، لا يا ستي أنا مش جايلي نوم، أطلبي أي حاجة أصالحك بيها وأنا موافق. عائشة بصتله بلمعة عين: بجد يا محمد؟ محمد: أطلبي وشوفي يا عيون محمد. عائشة: ننزل نتمشى سوا دلوقتي. محمد: دلوقتي؟! الساعة 3؟ عائشة: آه يلا قوم. محمد: أمري لله يلا. وخدها ونزلوا يتمشوا على كوبري ستانلي (استانلوسا بمقولة أخرى) وجابلها شاورما ورجعوا مع شروق الشمس بعد ما صلوا الفجر برا.

محمد: أظن بقى ننام من غير هرمونات ولا روايات. عائشة: كده كده يا قرة عيني يا قمر أنت. وناموا سوا. *** ونقول بعد مرور 5 سنوات. عائشة ومحمد خلفوا بنت زي القمر وسموها فاطمة. ومازن وسارة خلفوا (علي وعائشة) وأخيرًا عمر ونور خلفوا (حبيبة وعشق) النهاردة عيد ميلاد فاطمة بنت عائشة، اللي جدها حمزة أصر إنهم يعملوه في الفيلا بتاعته. كانت عائشة ومحمد بايتين معاهم.

صحيت عائشة الصبح بدري وصحت فاطمة ومحمد كان صحى ونزلوا تحت عشان يفطروا وفاطمة تروح الحضانة. نزلوا لقوا حمزة ومريم قاعدين على السفرة. جريت فاطمة على جدها وباست إيده زي ما محمد علمها. فاطمة بصوت طفولي: صباح الخير يا جدو. حمزة: صباح النور يا عيون جدو، نمتي كويس؟ فاطمة: الحمد لله. وبا ست مريم اللي شالتها وحطتها على الكرسي جنبها. ومحمد وعائشة صبحوا عليهم. مريم: الحمل عامل إيه يا عائشة؟ عائشة: الحمد لله يا ماما مريم.

محمد: هانت كلها شهر وأقل وعمر باشا يشرف. حمزة: ربنا يقومك بالسلامة يا بنتي. كلهم أمنوا على دعاء حمزة وكملوا فطارهم. فاطمة: ماما هو ليه ربنا ما حرمش أكل التفاح بالرغم من إن شجرة التفاح خرجت سيدنا آدم من الجنة؟ عائشة باستغراب: مين اللي قالك كده يا فاطم؟ فاطمة: الميس في المدرسة قالت إن شجرة التفاح خرجت سيدنا آدم من الجنة ووقفتله هنا في زوره عشان كده سموها تفاحة آدم.

عائشة: لا يا حبيبة ماما مفيش الكلام ده، بصي يا حبيبتي، ربنا سبحانه وتعالى قال لسيدنا آدم والسيدة حواء (ولا تقربا هذه الشجرة فتكونا من الظالمين) ، يعني ربنا ما حددش في أي نص قرآني إنها شجرة تفاح أو حتى أي نوع من الشجر، عز وجل قال هذه الشجرة وسكت لم يذكر نوعها ولا شكلها، فبالتالي مينفعش إننا نجود ونقول إن دي شجرة تفاح، وبرضو حاجة تانية مش أكل سيدنا آدم من شجرة هي اللي نزلته على الأرض، لا، ربنا قال في سورة البقرة

(قال إني جاعل في الأرض خليفة، قالوا أتجعل فيها من يفسد فيها ويسفك الدماء ونحن نسبح بحمدك ونقدس لك قال إني أعلم ما لا تعلمون) ، يعني ربنا كده كده كان هينزل سيدنا آدم من الجنة عشان يعمر الأرض، طيب ليه خلاه في الجنة الشوية دول؟ عشان يعرفوا قيمة الجنة ويوريه جمالها عشان نفسه تشتاق ليها مرة أخرى، عشان يسعى في الأرض ويعمرها وما يغضبش ربنا بأي شكل عشان تكون مكافأته الجنة وما فيها من خير ومتاع.

فاطمة: الله يا ماما أنا ما كنتش أعرف كل ده. عائشة بابتسامة: أديكي عرفتي يا فطوم، بعد كده لو عوزتي تسألي على حاجة أنا موجودة وبابا موجود. باستها فاطمة من خدها ومحمد ابتسم وحمد ربنا جواه على زوجته وصلاحها وباس راس عائشة واتحرك على شغله بعد ما وصل فاطمة المدرسة. *** جرى الوقت وجه الليل كانوا كلهم متجمعين عشان عيد ميلاد طمطم. مازن: حبيبة خالها، كل سنة وأنتي بخير. فاطمة: وأنت بخير يا خالو. وقدملها هديته.

وكلهم عملوا كده وقعدوا مع بعض في الليفنج. نور: عاملة إيه؟ عائشة: زي الفل الحمد لله. نور: الكرومبة هتنزل إمتى؟ عائشة: كرومبة في عينك، ده أنا ابني قمر. نور: أما نشوف يا أختي. سارة بمرح: ما تزعليهاش بقى وإلا نكتشف إنها حامل. عائشة: نينينينيني حد قالكم تخبوا عليا قبل كده. نور: بس جات بفايدة واكتشفنا إنك حامل. Flash back... سارة كانت قاعدة مع عائشة بتمهدلها موضوع موت ندى بناء على طلب الجميع... سارة: عائشة بصي... هو...

عائشة: فيه إيه يا سارة؟ تتكلمي، أنتو كويسين؟ سارة: بصي هي أمانة وربنا استردها. عائشة بفزع: تقصدي مين يا سارة؟ سارة بحزن وهدوء: الشهر اللي فات أما رجعنا من السفر السجن بلغ عمي إنه... ندى انتحرت. عائشة بدموع: انتحرت؟ أنتي بتقولي إيه يا سارة، أنتي أكيد بتهزري. سارة: اهدي طيب، أنا مش بهزر بصي ادعيلها بالرحمة يا عائشة.

عائشة فضلت تعيط بصوتها كله على اللي وصلتله ندى بسبب عمايلها، جرى محمد عليها وحضنها وفضل يهديها وفجأة حس بتقل عائشة في حضنه. محمد بقلق: عائشة؟ ورفع وشها لقيها أغمى عليها، كلهم اتخضوا ومازن جرى كشف عليها. مازن بابتسامة: أنا شاكك في حاجة ويارب تكون صح. محمد: إيه؟ مازن: هتبقى أب يا عم. عمر: احلف! مازن: والله، عائشة حامل يا عمر. كلهم فرحوا ومازن أصر إنه ياخد عينة دم ووداها معمل التحاليل اللي أكدت إن عائشة حامل.

قرب محمد عليهم هو وعمر ومازن. عائشة: فاطمة فين؟ محمد: في الجنينة بتلعب مع باقي الأولاد. هزت راسها عائشة وسكتت. نور: أنتي كويسة؟ عائشة: آه آه تمام. مازن: عائشة مالك؟ وشك أصفر. وفجأة صرخت بكل قوتها وكلهم جريوا عليها وكانت بتولد. طلعوا بيها على المستشفى بسرعة وقعدت سارة مع مريم وسحر في الفيلا عشان الأولاد. ================== دخلت عائشة العمليات وبره كان محمد قاعد وخايف عليها وبيتوجع كل ما يسمع صراخها.

جريت فاطمة على محمد وهي بتعيط. فاطمة: ماما مالها يا بابا؟ إيه اللي حصل؟ محمد بتفاجؤ: فاطمة إيه اللي جابك؟ فاطمة: ركبت في عربية جدو منصور وجدو حمزة من ورا. محمد: أول وآخر مرة تعملي كده سامعة! هزت فاطمة دماغها بدموع ومحمد أخدها في حضنه. محمد: خلاص يا حبيبي، بطلي عياط. فاطمة: أنا خايفة أوي على ماما. محمد: إن شاء الله هتخرجلنا بألف سلامة. بعد شوية خرجت الممرضة وهي شايلة عمر على إيدها وأدته لمحمد.

الممرضة: مبروك لحضرتك جالك ولد زي القمر. خده محمد من إيدها وباسه. محمد: عائشة عاملة إيه؟ الممرضة: بخير الحمد لله، شوية وهننقلها في أوضة كويسة. محمد: الحمد لله. حمزة: كبر في ودنه يا ابني. أذن محمد في ودن عمر الصغير وحضنه وهو بيعيط. فاطمة: بابا عايزة أشوف النونو. نزل محمد لمستواها ووراها عمر الصغير وفاطمة باست خده بكل حب. فاطمة: أنا هجيبلك كل يوم شوكولاتة وأنا راجعة من المدرسة. ضحكوا كلهم عليه وعمر شالها.

عمر: بس هو لسه صغير. فاطمة: هحوشهمله يا خالو. ضحكوا عليها وعمر ضمها لقلبه أكتر. بعد شوية خرجت عائشة وكلهم اتجمعوا حواليها واطمنوا عليها ومشوا لأنها هتبات انهارده في المستشفى وفاطمة أصرت تبات ومتروحش ومحمد كذلك. محمد نيم فاطمة وعمر وجه جنب عائشة ومسك إيدها. محمد: حمدلله على سلامتك يا عمري. عائشة: الله يسلمك. محمد: هفضل أشكر ربنا على كل دقيقة بعيشها معاكي، ربنا يديمك ليا. عائشة: ويديمك في حياتي يا رب.

فاطمة: ناموا بقى أنا عايزة أنام. ضحكت عائشة عليها ومحمد شالها: حتى أنتي يا زقردة ليكي صوت؟ فاطمة: أنت اللي صوتك عالي يا بابا. محمد: المرة الجاية هكلمها بالهمس. فاطمة: برضو هكون معاكم. محمد: ليه بقى؟ فاطمة: حدانا حريم تكلم رجالتها بليل. ضحكت عائشة على منظر محمد اللي بيقول: مازن لحق يعلمهالك؟ ضحكت عائشة على محمد اللي حضنهم سوا وناموا في سعادة وأمان. عائشة بهمس: الدار أصبحت أمان يا محمد.

محمد: أمان بوجودك فيه يا عائش قلبي. وضمها أكتر وناموا. وتوتة توتة فرغت الحدوتة.