رواية روية ممكن بسكوتة الفصل الخامس 5 - بقلم غير معروف

ودعته واول ما قفل باب الشقة وراه عيطت. ماما جات قعدت جنبي واخدتني في حضنها. -لية القساوة دي كلها؟ -علشان بحبه يا ماما.. بحبه. -وهو كمان بيحبك. رفعت وشي وبصتلها فابتسمت وهزت راسها.

-قبل ما يقولك الحقيقة بتلت أيام كان وصل ليا، قعد معايا وفهم أن حبك لباباكي وتعلقك بيه سبب الصدمة دي، ولما قعدنا مع الدكتور قال إن لازم تعرفي الحقيقة بشكل صدمة، ساعتها هو اعترض، بس الدكتور اقنعه إنك ساعتها هترجعي للواقع مش التوهة اللي كنتِ عايشة فيها. -يعني مكنش.. -مكنش عاوز يأذيكي، كان عاوزك تكوني كويسة. سيبتها ودخلت اوضتي ومرت ذكرى بينا على بالي. -تعرف، أنا اكتشفت أن الحب دا احلى حاجة في دنيا.

-وبيكون احلى لما نحب اللي يستاهل قلوبنا. -ازاي؟ -يعني تحبي شخص يخاف عليكِ، يهتم بيكِ، بتفاصيلك الصغيرة، بتحبي أيه أو بتحبي مين، والأهم من دا كله أن يشوف الأصلح ليكِ قبل ما يشوف نفسه. -حتى لو على حساب نفسه؟ -حتى لو على حساب قلبه. نزلت من العربية، اخدت نفس ووقفت قصاد المحل. -لو سمحت عاوز واحدة بسكوت من دي. لف بسرعة، ارتبك فالازازيز وقعت، لمهم فوقعت كام كرتونة من كتر توتره. ضحكت ودخلت لميتهم معاه. -رجعتي من تاني.

-خفت العمر يعدي من غير ما اقولك حاجة مهمة. -تقوليلي أية؟ -أقولك إنك أوحش إنسان في العالم. -أية! ملامحي رقت وابتسمت. -وأطيب قلب. -شكلك حلو النهاردة. -شكلي حلو ازاي؟ ابتسم. -لا مقدرش أقولك، أنا بتكسف. ضحكت. -ويا ترى مين قالك كدا؟ -واحدة صغيرة قالتلي عمرها ٨ سنين، اخدت عمري معاها ونسيت هي تسمع أهم حاجة. -نسيت أية؟ -نسيت تسمع إني بحبك، يمكن كانت الكلمة تبوس قلبك في يوم وترضى عني. دمعت وقلبي دق. -كدبت عليا. -علشان بحبك.

-حسستني بالخوف. -وبحبك. -بعدت عني. -وبحبك. بصيت للبسكوت وابتسمت. -نسيتي تدفعي تمن البسكوت. -عاوز فلوس مني؟ -لا. -اومال عاوز مني أيه؟ -عاوزك جنبي طول العمر. -عاوز رحمة ولا رحومة. -لا رحمة طلعت قاسية، رحومة قلبها أبيض ويساع الكل. ابتسمت. -رحومة صغيرة على الحب.