رواية ريحانة والشيطان .... الطاغية والبريئة الفصل السادس عشر 16 - بقلم jolyjojo23

(الكاتبة ام جوليا)
#ريحانه_والشيطان .... #الطاغية_والبريئة
#الكاتبة_ام_جوليا
#قصص_وروايات_عراقية
#الجزء_السادس_عشر

::::::::::::::::::::::::::::::::::::::::::::
الموقف الي خلتني بيه امي جدا صعب ومداكدر اقرر ومثل الواحد اجه وصعقني بالكهرباء..
كمت من يمها محتار دايخ ...
متعودمن اختنك اكعد بالحديقة واخلصها جكاير ..
اجه ضياء من بيت اهله امه دازته عليه ..
-شلونك عمو
-هلا عمو تعال اكعد..
-لاعمو اعذرني عندي دراسة بس ماما دزتني عليك وتريد تحاجيك  ضروري
-خير خو مومتعارك احد وياها
-لالا محد متعارك وياها .. بس هي كالت تريد تحاجيك ودزتني عليك
-يصير خير ، شوي واجي
:::::::::::::
هاي شنو رايده ؟
معقولة واصل خبر بالموضوع .. لوشنو..؟
خل اروح واشوف شنو تاليتها ...
....
دخلت البيت ومنتظرها وهي جانت ماتلبس حجاب ولبسها عادي بالبيت مرتب ..
رغد .. مساء الخير شلونك ابو ريحانة
احسان ... الحمدلله ام ضيغم .. تفضلي محتاجة شي دازه عليه
رغد.. زاد فضلك والله يحفظك
شوف اني ماعرف الف ولاادور بالحجي دائما طبعي الي بگلبي على لساني واني وياكم من جنت عمري 13 سنة ماشفت منكم اي قصور ويايه او وي ولدي والنعم (الكاتبة ام جوليا) منكم حتى من توفى محمد الله يرحمه انته تكفلت بينا ومقبلت يتربون الولد بعيد عنكم واني قبلت لان ماريد ابعدهم عن خالتي ام محمد وهي ونعم الام جانت النه اني وجيهان ومافرقت بينا وبين اطفالنا كلنه
واني فرحانة بوجودي يمكم ولمتنه ..
احسان.. وانتي والنعم منج ماقصرتي بشي وماسمعنه منج كلمة زايدة ناقصة قايمة بواجباتج وي الولد وماعترضتي على شي واني اعرف الولد كبرو ومتعبينج بس هاي مرحلة مراهقة وبعدين يكبرون ويستوعبون تضحيتج وتعبج وياهم ..
رغد... اني ولدي همه الي باقيلي من ريحة محمد واني برغم اني صغيرة بس كبروني وكبرت مسؤوليتهم وتعبت والله .. ماني كد هالحمل ..
اني عرفت ابويه شنو عرض عليك وزعلت منه ، هوايه ناس تقدمولي ورا وفاة محمد وجنت ارفض اكول هذول ولدي ماتركهم واكعد عليهم ،لكن كبرت وكمت اسمع كلام اشكال من اقرب الناس الي ، اقاربي وناسي ،مانكر محمد حبي الاول ووعيت عليه لكن اني من كبرت فهمت حاجتي لرجل بحياتي ولما بدو يطلبوني كمت افكر وقبل جنت ارفض علطول ..
خصوصا ولدي مديحترموني كلما احاجيهم يكبون بوجهي مداسيطر برغم انته متواجد وياهم لكن مموجود بنفس البيت وتخلي الي قيمة واعتبار او تشوف ردهم عليه .،
والله تعبت ومو شرط ازوج خل اروح اكعد يم اهلي واخذ ولدي هناك همه يشوفون جدهم يخافون منه ويحترمونه ويحسبوله حساب .
انته ماقصرت كفيت ووفيت والنعم منك .،
اني خاله حساب لعشرتي وياكم وماريد تزعلون مني ابد
اما للموضوع الي گلك عليه والدي ، اني اعرف كلش زين انته شكد تحب جيهان ومستحيل تخلي احد يشاركها هالحب ، عشت وياكم وعرفت هذا كله ،،وهي هم تحبك ومتستحق ان تجيها ضرة وهالضرة صديقتها
اني ماتحملها ، شلون هي تتحملها، اني صح ماكدر اوكف بوجه والدي وارفض الي يكوله لان انته تعرفه وتعرف طبعه ميحتاج احجي بشي ، بس اريد احلفك بمحمد ، انته مدامك ماراغب ترفض طلبه وتخليني اخذ ولدي واكعد وي والدي
هناك راح ينضبطون اكثر (الكاتبة ام جوليا) لان والدي حيطلع تقاعد ويكعد بالبيت يريد يرتاح .
فراح تصير عينه عليهم .
احسان (ساكت وصافن عليها هادئه ومؤدبة ومتكلمة لبقة .. حقه محمد من حبها لان بنية والنعم منها ومن عقلها): زين اني وياج بكل الي كلتيه لكن اذا هناك وكلج ابوج تتزوجين شراح تسوين هم مراح ترفضين طلبه ، وهنوب ولد اخوي يعيشون يم غريب تتوقعينها اقبل بهالشي .
رغد - انته تعرف ماكدر اكسر كلمة والدي ، طول عمري اني هيج وياه ، وماخسرت من سمعت كلامه وحتى اذا طلب مني ازوج وهو شايف هالشخص مناسب الي ولاولادي راح اوافق لان واثقة اختياره صح
وجان اختياره الاول محمد وعشت بسعادة وياه ورا مااستشهد وطلب مني ابقى وياكم وجان هذا حقكم واني وافقت وماقصرتوا بشي لكن اني اريد ولدي ياخذون طبع والدي العسكري شويه ، انته بحكم حبك الزايد الهم دللتهم هوايه ماشفتهم من كبرو وشلون يعاملوني وهذوله مثل مكلت فترة مراهقه يرادلها شدة ولين ..
وبالنسبة للزواج فقبل ماافكر اوافق رح ابلغك انته وخالتي بكلشي وراح اترك مصيري الكم وانتم تقررون لاعبالك اني ماعندي شخصية وماالي كلمة ، لكن تعلمت وتربيت على ان الكبار كلمتهم هي الصح لان عدهم خبرة بالبشر ومروبتجارب اكبر من عمرنا ومن عدنا.
احسان: يعني المطلوب هسه شنو مني؟
رغد: المطلوب منك ماتغصب نفسك عليه وتخلوني اخذ ولدي واروح يم اهلي لحد ماالله يفرجها.
احسان: بس والدج كال متقدملج شخص ويريد ينطيه جواب هالاسبوع وهذا الاسبوع خلص .
رغد: اني راح اروح احجي وي والدي أأجل الموضوع واعرف منو الشخص وابلغك وانته اسأل عليه وشوف .
احسان: واذا ازوجتي الولد يرجعون النه
رغد : حتى اذا ازوجت اني اريد ابقى عايشة يم والدي ، امان اليه ولولدي وبهالحالة ماافترق عنهم ويتربون كدام عيونا .
واني مراح اكطعهم عنكم (الكاتبة ام جوليا) خليهم بالعطلة يخلصونها يمكم وفترة الدراسة يمي .
احسان : ماعرف خليني افكر اكثر وارد عليج ، واطمني هالكلام يظل بينا .
رغد : ربي يحفظك احسان وانته ماتقصر بشي ، واكيد يبقى بينا هالكلام .
احسان: يلا اترخص اني .
رغد: الله وياك .
::::::::::::::::::::::::::::::::
رحت للبيت محضرين العشا ..ماكدرت اتعشا..
خابرت سيف..وطلبت منه المعلومات عن الي خاطب رغد ..
سيف : عرفت عنه معلومات ورح اجيبهم الك باجر للمكتب ملفه كامل .
طبعا مااحجي وي جيهان وهي متجنبتني على كد اكلي وشربي وتحضير ملابسي ..
شفت ولد وجدان وحنين وريحانة واني اتابعهم بالدراسة علطول اتفقد واجباتهم ودفاترهم وكتبهم واي ملاحظه عليهم يجيلي اتصال من المدرسة فوري لان اريد اضمن الهم مستقبل ومهنة تخليلهم قيمة بالمجتمع ..
جيهان ممقصرة وي الكل ..
امي بعدها غضبانة عليه ومحتار شلون اصالحها ، كلام رغد فر دماغي وعجبتني حيل شخصيتها وذكائها ، المرأة من تكون بهالشخصية وهالعقل والرزانة صدوك ترتاح بعيشتك وياها وتطمن على عائلتك وتربية الاطفال.
جيهان حبيبتي مستحيل افرط بيها بس هي ماعدها شخصية رغد دائما خايفة وتنطي حقها في سبيل تخلص من المشاكل ، يمكن اني السبب بسبب تسلطي رغد خلاها محمد تكمل دراسة واهلها مساندينها دائما وماتعذبت عذاب جيهان .
الغبية تتنازل عني بسهولة (الكاتبة ام جوليا) لان امي حاجتها يعني اني لو رايد ولد او رايد زواج انتظر امي تكولي تزوج مافتهمت اني مكتفي بيها وبريحانة وببقية الولد ولدي ليش اني اربي واكبر..
لازم أأدبها واني اعرف شلون راح أدبها على تصرفها ، بس اخلص من هالسالفة .
...
كعدت الصبح .. وكالعادة سبحت وبدلت وتعطرت ومقبلت اكل بالبيت .. هذا اول عقاب الج ياجيهان حتى تعرفين قيمتي.
رحت للمقر واجالي سيف ع ساعة 10
هاجبت المعلومات الي كتلك عليها..
-اي هذني بالملف
الصورة للتشبيه فقط..

الاسم : دكتور كمال حسين ،
اختصاص: طب اسنان
العمر : 36
الحالة : ارمل وله ابنة عمرها 11 سنة
زوجته توفت باثناء ولادة متعسرة وماتت اثناء الولادة هي والطفل من 3 سنوات وهو ماتزوج وبقى يربي ب بنته
الصلة : شايف رغد اثناء مراجعتها بضياء لدكتور الاسنان وسائل عليها وخاطبها من ابوها ورا فترة
....
انسان محترم جدا وخلوق ومن عائلة كلش راقية وابوه وامه دكاترة طب عام ومعروفين
ماعدهم زايدة ناقصة وماعدهم اي مشاكل وي اي شخص
مثال للانسان العملي الملتزم الناجح
العنوان::................... كاملا...
:::::::////:::::::::::::::::::::////////
احسان: هههه اكولك سيف شو هذا جاي كامل مكمل مابيه عيب
سيف: والله شكولك يااخي اني لو يجي يخطب بنتي انطيها اله.
لان كلش ولد خلوق وملتزم وماعنده زايدة ناقصة لامنا ولامنا.
يعني رغد اذا قبلت بيه هنيالها..
احسان : لك انته ليش متسكت احسن ، شنو قابل احسن مني .
سيف: ههههههه لاطبعا شلون احسن منك ، احسان ابو الصولات والجولات كل مصيبة شكبرها بسببه تصير وتعال ياسيف ساعدني واني واكع بيها .، اكولك تورطت صرت ابن عمك ، فك مني ياخه تره والله (الكاتبة ام جوليا) مللتني 😅 مداكدر اخذ راحتي من وراك
احسان : اي ابو النسوان متكدر تاخذ راحتك 😌👌 تدري رگبتك بين اديه 😊
اخبارية وحده للمدام 😂😂 وتصير في خبر كان
خليني ساتر عليك ومفاضحك
سيف : هاي هيه عمي سكتنا ، شنكدر نحجي وي استاذ احسان .
احسان : اي اضبط نفسك 👌
سيف : دتعال احجيلي شراح تسوي هسه وي ابو رغد .
احسان : راح اتاكد من المعلومات واخلي رغد تروح لاهلها واخلي الولد يجونا بالعطلة واكوله ينطينا فرصة نفكر وبهالحالة اشوف امي شنو ردة فعلها وقرارها
واشوف الولد شلون راح يندمجون هناك لو لا ..
اني كلام رغد عجبني وعجبني تفكيرها .
سيف : والله هي كلها تعجب اكبر واحد ، بس انته تدفر النعمة بيدك
احسان : البنية وردة ماعليها غبار ، بس جيهان مستحيل اجرحها بعد واني گلبي ميرف لغيرها
وهم حرام اظلمها لرغد ويايه
اذا طلع الولد خوش ولد اخليها تروح تتزوج لان صدوك صغيرة واني اعرف ولد اخويه وجسارتهم وخبالهم وراثة امهم ممرتاحة يذكروني بيه اني ومحمد هيج جنه معذبين امي وابوي ..
بس امي جان ساندها ابوي ورغم هذا تعبناهم ..
شوف اني رايح اقابل ابو رغد وافهمه قرارنا..
وراها احاجي امي والله كريم ..
سيف : الله وياك بس طمني من توصل بالتلفون خابرني حتى اعرف اخر الاخبار او حتى نلتقي
احسان : ان شاءالله..
:::::::::::::::::
رحت لابو رغد وفهمته الوضع وان اني ماكدر اظلمها لرغد وان اني عرفت معلومات عن الي متقدم الها وشايفه مناسب الها ..
صح انزعج لان تصرفت من وراه بس فهمته ان اني ماراح اعيشها مرتاحه وماكدر اعدل..
وهم ماضامن حياتي لان عندي اعداءمتخفين ليش اظلمها ويايه ..
والورث راح (الكاتبة ام جوليا) احاجي الوالدة بحيث يستلمونه الولد بمرحلة عمرية يكونون واعيين بيها
ومصاريفهم وكل مايحتاجونه يوصلهم وزايد..
ورا حجي هواي الاتقبل كلامي
وبهالحالة حليت الموضوع وي ابو رغد ..
بقت الوالدة وهذي كارثة بحدذاتها ..
الله يستر من الجاي ..
رجعت البيت ودخلت بوجهي لرغد والولد حاجيتهم ان ح ينتقلون لبيت جدهم ويرتبون وضعهم بالبداية ضاجوا بس بعدين كتلهم فترة وترجعون لان اني بخطر شويه واريد اطمن عليكم ..
اقتنعو بالحجي وان جدهم رايدهم يمه ..
دخلت للبيت ..
جيهان: الله يساعدك حبيبي.
احسان (ساكت مارد عليها).. حضري الحمام .
جيهان: مراح تتغدا.
احسان: لامتغدي ماريد( كذبت عليها حتى اكمل عقابي الها بالاهمال)
جيهان:احسان والله اني اسفة اذا غلطت بحقك والله ماتحمل من تزعل مني
احسان : اششش ماريد اسمع ولاكلمة اريد اسبح وانام ماريد صوت طلعي برا من اطلع من الغرفة دخلي انتي .
جيهان: بس....
احسان: اني شكلت يلا .. ( صيحت بيها الا اندمها بسيطة جيهان )
::::::
سبحت وبدلت ونمت ساعتين كعدت ميت جوع بس ماريد ابين الها اني مماكل
رحت طلعت فاكهة اكلت ورجعت الباقي بالثلاجة علما اطلع اكل برا ..
شربت جاي وجيهان ماكو مراوتني وجهها قلقت عليها ..'
طلعت برا بالحديقةلكيتها كاعدة ع المرجوحه وتبجي .
مايهون عليه دموعج ياعمري بس لازم تكونين قويه وتحافظين على حقج لازم اقوي كلبج واطلع الشراسة الي بيج واني اعرف شلون اطلعها..
صحت جيهان.. بصوت عالي
شمكعدج برا..
جيهان : اختنكت وجيت اكعد برا شويه ..
احسان: يلا دخلي وبعد ماكو طلعة بدون اذن مني افتهمتي ..
جيهان: صار
احسان : جيبي جاي وتعاي وراي يم امي ..
::::
دخلت لامي جانت تقرا قرآن ..
سدت القران وبستها من راسها ..
وبديت احاجيها ..
شلونج يوم ..
برحمة الله يمه..
هاكولي شقررت ..
شوفي امي اني حجيت وي رغد وعرفت رايها بالموضوع وسألت عن الولد..
حجيت الها كل التفاصيل ..... الي صارت
وهذا الي صار كوله..
انتي شنو رأيج اظلمها للبنية واني مارايدها وهي بعدها حلوه وصغيرة لو اخليها تعيش مرتاحة والولد يتربون احسن تربية بينا وبين جدهم ..
- راح يربون وي الغريب شتحجي انته
- يوم ليش تصيرين انانية
داكلج اذا زوجتها مراح ترتاح ويايه ليش نفكر بنفسنا وبجهالنا ومنفكر بيها هي مو خطية من حقها تعيش بظل رجال يحبها ويحميها ويدللها..
ليش نخالف شرع رب العالمين وهو القبول وعدم الاكراه بالزواج
ليش تجبريني ع زواج من ارملة اخوي ماكدر ياامي ومااتقبل هالشي هي اختي طول عمرها وراح تظل اختي ..
بهالاثناء دخلت جيهان وسمعتنا وظلت مدنكة ..
واذا ع الزواج وتريدني ازوج علمود الولد ..
اني هم راح افرحج عن قريب واجيبلج الي راح اختارها زوجه الي وام لابني ..
هسه شنو حجتج ..
- لايمة ماريدك تاخذ ع جيهان . اني ردت رغد لان منا وبينا وعرفتها خوش بنيه
- لايوم هاي هيه اني قررت واريد اتزوج ومن حقي يكون عندي ولد .. بس اني دادور وح اختار الي تناسبني ..
بهالاثناء جيهان طلعت تركض من الغرفة ..

يتبع ...

هلو حبايب
شلونكم ..
شخباركم ؟
شلونه احسان وياكم 😌ورغد شنو رأيكم بتصرفها؟
وشنو ردة فعلج لو زوجج كلج ح ازوج بدعو ويايه 😂👌

لاتنسون التصويت بنجمة وتعليقكم يسعدني ...
اخاف مالحك ارد ع كل تعليقات عذروني حبايب 😘😘😘😘😘
احبكم في الله
الكاتبة ام جوليا