رواية ريحانة والشيطان .... الطاغية والبريئة الفصل الخامس عشر 15 - بقلم jolyjojo23

(الكاتبة ام جوليا)
#ريحانه_والشيطان .... #الطاغية_والبريئة
#الكاتبة_ام_جوليا
#قصص_وروايات_عراقية
#الجزء_الخامس_عشر

:::::::::::::::::::::::::::::::::::::::::::
ضليت كاعد ع الكورنيش ...
لحد المغرب بقيت .. الافكار أكلتني اكل .. شريط حياتي مر كدامي
من اني صغير لحد مشفت جيهان ماحسيت اكو شي مميز بحياتي غيرها
ولما حصلتها كأني ملكت الدنيا ومابيها ..
ماحبيتها حب شهوة وجسد ، حبيت برائتها ونقائها ، من اشوف نفسي الكى نفسي انسان مذنب بكلشي جنت اسوي .
جانت هي الشي الصافي البريء الطاهر بحياتي ،
حاولت وجدان تخليني افقدها وانكلبت بوقتها وحش كاسر ، واذيت ناس هوايه لان حاولوا يأذوني بيها ..
كلما اريد استوعب ان اني اخلي جيهان تحس هالاحساس ، ماتقبل هالشي ..
برغم اعرفها ماراح تسوي شي ..ولاراح تعارضني على اي شي اكوله ..
بس مراح تتحمل يتم هالزواج كدامها ، اعرفها شكد تحبني وتغار عليه
وهذا كوم واولاد محمد كوم ، اني عمهم اخو ابوهم شلون ح يتقبلوني ك زوج امهم .
واني شلون اتقبل رغد الي هي حبيبة اخويه كزوجة الي ..
رغد هذي جان عمرها 11 سنة من شافها محمد .. جانت راجعة من المدرسة ومحمد ومجموعة من الضباط معزومين عند ابوها..
شافها راجعة وهي جانت دتجيب النتيجة مالتها ناجحة للاول متوسط..
بس هي من صغرها جانت طول بجسم محد ينطيها هالعمر الصغير ..
من اجه وكلي اني ح ازوج وحجالي كمت اضحك عليه..
يمعود تره انته اكبر منها بهوايه منو كلك ابوها ينطيها..
وليش مينطيها اعيشها ملكة وادللها دلال ..
.. محمد اصحى ، اول مره اشوفك هيج رايد وحده ..
لك احسان لو تشوفها تعذرني ..طولها وجسمها مال وحده 16 سنة وهنوب عيونها سود كبار ومسحوبة وطاخة رموشها بحواجبها وحواجبها ثخان ومرسومة .. لك شأحجيلك .
احسها انثى صدوك ، مومثل هالبنات الي لاعبات بنفسهم ، واني اريد هالعمر اربيها على ايدي..
تتعود على طبعي وتفهمني ..
مادري والله شاكولك ، احجي وي امي وابويه وبلكي يكدرون يقنعون ابوها .
حاجى اهلي وابوي فرح بس (الكاتبة ام جوليا) من عرف هيج عمرها كله مراح ينطيها ..
كله محمد اني قابل حتى لو احجزها بس تصير الي ..
وصدوك راحت امي كـ زيارة تشوف البنية وتتعرف على اهلها ورجعت متخبلة عليها..
تكول جمال وعقل ورزانة.. وتخاف من ابوها حيل وتحسب الف حساب.
امي عجبتها رغد حيل وطمنت محمد تاخذها اله ..
لكن من رحنه لابوها ابوها انصدم .. ورحب بابوية وطلبه ، بس كله صغيره مو مال ازوجها هالعمر.
ظل محمد ياكل بنفسه اكل ، ودخل هواي واسطات كبيرة بالحزب ..
لحد مااقتنع الاب وكال تخلص الاول متوسط وازوجها .. بس شرط تكمل دراستها وبيتها وحد
ومحمد كل هالامور جهزها ..
خصلت اول متوسط وازوجو وهم كبرو عمرها حتى يسمح الها بالعقد مال زواج ..
وجان طاير وجانت هي صدك تستاهل الي سواه محمد علمودها..
يعني هذي حب محمد ، شلون اني اتجاوزه واصير بمكانه وريحانة ..
تهت بالافكار وشفت دنيا غربت .. اخذت سيارتي ورجعت البيت..
جيهان مجهزتلي الحمام والملابس ، واكفتلي وكفة ، كلشي بايديها تسويه اليه ، وشكد جنت اطلب منها ماتعب نفسها علمودي بس هي متقبل
تكلي راحتي وسعادتي بخدمتك انته مو بس زوجي ابني هم ..
كملت سبح ومااكلت نمتلي ساعه ونص وكعدت رحت لامي احجي الها الصار..
-ياابني تره كلامه صح والبنية بعدها صغيرة وترملت من حقها تتمتع بشبابها ولدها واحنه نضمن ولد محمد يبقون يمنه ويتربون على تربيتنا ..
تره ماتحمل افاركهم هذولي من ريحة المرحوم اذا موكل يوميه اشوفهم واشمهم واحضنهم مارتاح ..
-بس اني ماكدر اتقبلها ياامي .. مرت اخويه وحبيبته شلون بس فهميني ؟ وجيهان مستحيل اظلمها او اخليها تحس بالاذيه بعد مني ..
-ياابني جيهان تحبك وراح تقدر هالشي واني هم اريد اشوفلك ولد بعد يشيل اسمك ورغد .. ماشاءالله بطنها تشيل ولد وتحمل بسرعة وانته شفت شلون جابتهم 3 ولد .. بلكي الله يرزقك بتوم ولد يسندون ريحانة ويصيرون عزوه الك وانته كبرت ..
-بس جيهان مستحيل مااكدر ..
-احسان مايوم جبرتك على شي وشكد طلبت منك شغلات ومنفذتها الي .. بس (الكاتبة ام جوليا) برضايه عليك ياابني
اريدك توافق بزواجك من رغد واني راح احجي وي جيهان ..
جيهان..-خالة شنو دتحجين زواج منو من رغد..
(دخلت جيهان فجأة جايبة الغده لام احسان)
-حبيبتي اني افهمج ..
-شتفهميني يوم .. شصاير
احسان: يوم سدي الموضوع رجاءآ.. وماريدج تحجيلها شي
جيهان: لااحسان اريد اعرف كلشي ..
احسان: اني طالع وهالموضوع ينسد ، وينلغي ..
::::::::
طلعت وعفتهم وخابرت سيف يجيلي..
اجه سيف وظلينا كاعدين بالاستقبال ، حجيت اله كل الي صار ..'
سيف: وتالي شراح تسوي ..
احسان : ماعرف والله دايخ منين مااجيبها صعبة حيل ، صعبة عليه وعلى جيهان ، هنوب مرت اخويه ..
واولاد اخويه ، وامي تلومني ، طلبتهم مني يبقون كدامها ، واني اعرف ابوها اذا كال كلمة ينفذها .
سيف: تره الرجال كثر خيره قبل من البداية تبقى يمكم على ولدها..واني صح سمعت هواي ناس تخطبها وهي ترفض.
زين ليش ماتحجي وي رغد .. تخليها ترفضك من يمها..
-احسان: لاشلون ترضاها (الكاتبة ام جوليا) انته اخليها بهالموقف ، تلكيه اصلا ماكايل الها، هنوب اصغر اني بنظرها ، واني الكبير بعيونهم وحامل مسؤوليتهم ، تريدني اروح اكولها رفضيني .. عيب وزحمه عليه وعليها.. انتقص منها وانتقص من نفسي..
اني مقرر ارفض وولد اخوي مانطيهم ، تريد تتزوج تروح وتتركهم .
سيف: بس ابوها واصل والكل يحسب اله الف حساب وهو طلب منك تزوجها اذا رديته خاف يحسبها جبيرة وهنوب يشد وياك وانته مناقص مشاكل .
احسان: والحل يعني برأيك ؟
سيف: ازوجها احسان ورغد خوش بنيه ومتربايه وتحملت خطية هوايه من حقها ان تستقر وتزوج.
احسان: اني مانكر هالشي يااخي بس افهمني ، اني من يوم مشفت جيهان ، النسوان ماتت بعيني ماتدني نفسي على اي وحده هنوب ارملة اخويه وولدها بطولها..
سيف: ولدها بطولهالان مزوجه وعمرها 13 سنه وجابت توم علطول وهي ماقاصرة بالجمال والف من يتمناهاحتى بعدها مادخلت بالثلاثين .
احسان: سيف اريدك تعرفلي منو هذا الخاطبها.
سيف : شلون اعرف هاي امور خاصة .
احسان : هالشي ميخصني ، ارشي انطي فلوس للخدم لاي احد بس اريد اخبار اكيدة منو هذا الي رايد رغد ، ووين شايفها؟
سيف: وشراح تسوي ..
احسان : طبعا ارفض، بس اريد اسوي شي يخلي الولد يبقون يمنا؟
سيف: مثل شنو؟
احسان: جيبلي المعلومات وبعدين اعرفك..
...
سيف : احاول ماوعدك بشي.، يلا اني اترخص لان حضرتك مدتخليني ارتاح يوم واحد
احسان: لك انت اخوي شلون ترتاح واني مامرتاح ..
سيف : اي قشمرني بهالحجي 😅 يلا عمي اروح لاتسويها مصيبة عليه بت عمك .
احسان :ههههه تستاهل ..سباعية
سيف: اروح احسن مابتلي بيك ، في امان الله.
احسان: الله وياك .
:::::::::::::::::::::::::::::
رجعت دخلت لغرفتي بدون مااحجي وي احد ...
الافكار متضاربة براسي ..
دخلت لكيت جيهان عيونها مورمة من البجي ..
احسان : البزونة مالتي ليش باجيه ..
جيهان (تشهك وتبجي ) : اني اموت عليك والله احسان ، ولخاطرك اني موافقة تتزوجها لرغد من حقك بطفل .. اني مداكدر اجيب الك بعد
احسان: لج سكتي ، انتي شدتحجين ، واني مووعدتج متبجين بسببي بعد
ماريد هالعيون الحلوة تبجي ابد.. اني مستحيل اقبل بغيرج عيوني متشوف غيرج اصلا .. انتي روحي الي اعيش بيها شلون اعذبج ..وازوج عليج كافي الي سويته بيج قبل ..
جيهان : اني اغار وانجن عليك .. بس لا اني موافقة ، امي ماتتحمل فراك بعد ، واذا راحو ولد خاف اسم الله يصير بيها شي واني ماتحمل افقدها ، ورغد حبابة وتحبني مابينا مشاكل ، واكيد رايدة مصلحة ولدها ومن حقها تريد تتزوج وتعيش حياتهامثل الناس
احسان : خل تعيش حياتها بس ولدها اني ربيتهم على ايدي وقايم بكل طلباتهم وماقصرت وياهم بشي ..
جيهان : ادري والله ادري ، وعلمود هيج ابوها راد يأمنها عندك لان شافك رجال وكد كلمتك وامانتك واني افتخر بزوجي الي كل وحدة تشوفه تحسدني عليه..
احسان : اتركي الموضوع جيهان .. اني قررت وخلص .. ماكو زواج
جيهان : واذا كوتلك لخاطر ولخاطر امي .. اني يمكن كم يوم اتأذى بس بعدين اتعود واريد اشوفلك ولد يحمل اسمك وافرح ان يكون سند لريحانة ..
احسان : ريحانة ممحتاجه سند لعد اني المن ربيت ولد عمها وولد وجدان.. هذوله همه عزوتي وولدي ..'
جيهان: اني ترفضلي طلبي احسان.
احسان : اي جيهان وانسيه هالموضوع اني احله..
جيهان ؛ ماانساه ولاول مره اعاندك واكسر كلمتك .. تتزوجها لـ رغد.. اصيرلك زوجة ، ماتتزوجها تنسى عندك جيهان
تعصبت حيل من ردها عليه هيج صرت افور
ماحسيت بنفسي الا ضاربها راجدي قوي..
احسان: لج جيهان اسمعي مو اني الي تجبرني مره على شي .. صح انتي روحي واعشقج اني ..
بس كوله الاكرامتي فتهمتي ادوس عليج وعلى كلبي اذا حاولتي تذليني..
وهاي شغلة مره ومر مرة اني الي اقررها ولج ويلا ولي من كدامي طفي الضوة اريد انام لاابتلي بيج بنص الليل ..
:::::::
سكتت مردت عليه كامت جبت بطانيه فرشتها بالكاع وحطت مخدة واخذت بطانية ثانية تتغطى بيها
درت وجهي عنها ولاكأني داشوفها، ورجعتلي الافكارومداندل دربي شاسوي..
نمت وكعد وجان عندي شغل من 6 الصبح ..
رحت للمقر بدون ريوك ومكعدت جيهان ..
جانت الدنيا طالعة من عيني .. اجانا امر نطلع لمحافظة كربلا ..  بيها اخباريات عن مجرمين نريد نتعقبهم واني مصدكت اخلص من هوسة البيت
رجعت علطول للبيت حضرت جنطتي.. اجتي جيهان تحاجيني معبرتها ..
سلمت ع كل البيت وكوتلهم يومين وراجع..
- ترجع بالسلامة حبيبي..
:::::
رحت وبالي يم جيهان بلكي تبطل هالسوالف مالتها من اغيب عنهاوتعقل وموضوع رغد ارفضه والولد مانطيهم وشيسوي خل يسوي..
بقيت اليوم الاول  والثاني التهيت حيل رحنا  سوينا اجتماعات بالمقرات الحزبية واطلعت ع ملفات المجرمين والمشتبه بيهم ..
واخذنه جوله ع مراكز الشرطة والسجون ..
ودنخطط نداهم كذا وكر لتجمعات مجرمين ..
اجالي اتصال من سيف ..
سيف : احسان ضروري ترجع حالا
احسان : خير سيف شكو شصاير ،؟
سيف: احسان وجدان متخربطة حيل ومدنعرف نتصرف،
احسان: شبيها متخربطة ماتكلي اني مار عليها قبل ماسافر ومجان بيها شي صح ساكته بس عيونها ونظرتها نفس الصلافة والحقد.اكولك جيب الها دكتورة حنان، اني هسه مااكدر اجي وماعندي حجه وخاف يشكون بيه بأي شي..
هذي متموت هسه تشوفها حنان وتنطيها مقويات تصير زينة ..
سيف : رح اسوي الي كلت عليه والله كريم .
احسان : لتتصرف اي تصرف بلا مترجع الي ، قبلها.'
سيف:هاي هيه الي تريده يصير
سده سيف الاتصال واني احس اختنكت تكومت الدنيا على راسي ، ربي لطفك بيه وجهني للصواب مداعرف اتصرف وشاسوي اني قوي كدام الكل لكني ضعيف امامك.. خايف اصرف اي تصرف وهم ارجع اظلم الناس ويايه ..
محتار ياربي ساعدني..
...ورا ساعة اتصل سيف
سيف: احسان تره وجدان محتاجة تروح للمستشفى تسوي تحاليل هامه وضرورية
احسان ؛ لامتروح خلوها تموت بمكانها .
سيف : ميصير هيج تره حالتها حيل تعبانه والدكتورة مدتعرف تنطيها العلاج الا تحاليل .
فجأة سمعت امي: لك ابني فدوة اروح الك خلها تسوي تحاليل وسيف وياها وحنان ميتركونها وتصير زينه وترجع ..
احسان : ميصير تطلع ياامي ميصير بيااسم تطلع  وهسه اذا انكشفنا كلنه نروح بيها .
خل دكتورة حنان تنطيها علاج بالبيت وهي اصير احسن .
الام : اذا وجدان صارلها شي هالمرة ماسامحك ابد..
احسان : ميصير بيها شي ، يلا مع السلامة ..
سديت التلفون ، شنو هاي معقولة صدك هذي مريضة.. امي تتخبل اذا صارلها شي بالكوة مصبرها اخليها تشوفها مرة بالاسبوع تطلع يمها بالخلفية مال غرفتي من الولد والبنات بالمدارس..
منالساعتين..خابر سيف..
سيف: احسان موكتلك خل نلحكها .. بس راسك يابس مايفيد بيك ابد، ارتاح ماتت وجدان ماتت وخلصت منها..
احسان : انته شدتحجي..شموتها ، شنو ماتت
سيف : ماتت مثل ما كل الناس تموت..، وامك كالبةالدنيا بالبجي والنوح ولازمتها متريد تنطيها ..كلي شاسوي هسه ..
احسان : انتظرني بلكن لباجر اكدر اخذ احازة واجي ..
- وامك منو يكدر عليها..
احسان: خل د. حنان تنطيها ابرة مهدئة وتنيمها..
سيف: احاول بلكي اكدر
..
طبعا الليل كله منمت ابجي مقهور على اختي الي دمرت نفسها ودمرتنا وياها ومنا امي ومنا هالشباب الي براسي وسالفة رغد وهنوب موتت وجدان كملتها..
لما طلع الصبح خابرت ع القيادة العليا اريد انزل والدتي مريضة ومحتاجه وجودي، مقبلو ..
وظليت بحيرة لازم ابقى بعد اربع ايام بكربلا الا انزل..
شاسوي..
خابرت سيف: شوف سيف مااكدر اجي منطوني اجازة ..منا لاربع ايام بعد الا اكدر اجي .
سيف : منكدر نبقي جيهان بلادفن كل هالوقت .. شاسوي هسه
احسان: انته تكفل دفنتها وخلي كبرها بعيد عن العين وغير الاسم ماريد احد يعرف شي ..
هسه مدام الولد والبنات بالمدراس سوي الي كتلك عليه
وخلي دكتورة حنان تجيب ممرضة تراعي امي وتنطيها شي يهدأها علما اجي ..
سيف : صار هاي هيه ح اروح اسوي الي كتلي عليه ..
ظليت متواصل وي سيف طول فترة كعدتي ب كربلا وماحاجيت جيهان ابد وهي هم مفكرت ابدتاخذ التلفون من سيف او تطلب تحاجيني .. وحاولت احجي وي امي مقبلت تحاجيني..
اوووف شلون راح تنحل .. دتتعقد اكثر..
كملت الواجب مالتي وراجع لبغداد ..
دخلت البيت تلكتني.. اخذت جنطتي وحضرت الحمام ...
-تسبح ..
-هسه اشوف امي واجي اسبح ..
دكيت الباب ودخلت .. امي تقرا قران وتبجي ..
احسان: شلونج يوم ..
-شلوني يعني ماتدري شبيه كلبي ..موتتني انته بكل الي تسويه ،شكد كوتلك سامحها لوجدان.. غلطت وربيتها بس انته ميفيد بيك موتت زوجها ، وماتت رنين وماتعظت لحد ماموتتلي وجدان ، اتوسل بيك تروح مستشفى ماتقبل ولك شنو من كلب عندك .. اني مو امك ليش كلمتي رخيصة
ليش هيج اني احجي ولاترد عليه ولاتعبرني..
شوف احسان انته ضيعت الكل بعقلك وتصرفااتك ومشيتها بس بعد والله مااسكت الك واتبرى منك واطلع حتى من البيت اخذ جهال وجدان وجهال محمد واروح بيتي ..
-شدتحجين انتي ياامي قابل اني متقصد اموتها لرنين او وجدان .. موبقصد . وصادق يستاهل الي صارله ..
-احسان هذا الحجي كله راح وميقدم ولاياخر .. اني كوتلك يااما تنفذ وتتزوج رغد .. وتلم ولد اخوك ..
ياتنسى عدك ام وابقى غصبانة عليك ليوم القيامة
واخذهم واهج ..
...
لا ياربي صدك تحجين ..
- اي صدك احجي وباجر الرجال تنطيه ردك..
:
:
وللحكاية بقية ...

هلو حبايبي شلونكم
اعتذر عن التأخير كنت معزومة وماعندي نت انزل القصة..
شخباركم
وشلونها القصة عاجبتكم لو لا الاحداث؟
توقعاتكم شنو؟؟؟؟

لاتنسون تضغطون ع النجمة تصويت وتنطوني رايكم ؟
احبكم في الله
الكاتبة ام جوليا...