رواية ريحانة والشيطان .... الطاغية والبريئة الفصل التاسع عشر 19 - بقلم jolyjojo23

الكاتبة ام جوليا)
#ريحانه_والشيطان .... #الطاغية_والبريئة
#الكاتبة_ام_جوليا
#قصص_وروايات_عراقية

#الجزء_الثامن_عشر
::::::::::::::::::::::::::::::::::::::::::::
طلعت من بيت ابو رغد واني اعرف راح تصير مشاكل هوايه بسبب تسرع ابو رغد واجباره بنته ع الزواج ، حتى لو هالشخص مناسب الها بس هي بعمر مفروض ميجبرها ع شي ، ح انتظر اسبوع واروح الهم واشوف شصاير وياها..
رجعت للبيت والوالدة زعلانة مني حقها ، بس موبيدي شي اسوي الها غير اني اتابع الولد ، وكلت هذي العطلة مال خميس وجمعة اونسهم بيها حيل ،عدى الاسبوع عادي بين عملي والبيت
لحد يوم الاربعاء
-جيهان حبيبي خلي الداده تساعدج علمود يترتب المكان الي يم المسبح ، باجر نسوي مشاوي واحنه كاعدين ع المسبح ونخلي الكل ينزل يسبح شنو رأيج ، حتى انتي انزلج تسبحين 😍
- احسان اخاف متعرفني اخاف من المي
- حبيبج يمج وتخافين راح انزل وياج وايدي بايدج وخلي شويه تصير حياتنا بيها روح ، لان طلعت روحي من الضغوطات واريد اخذج ورا فتره ونروح للاردن نغير جو وحتى امي احاول اقنعها تجي ويانه وكلشي اكولج عليه نفذيه خلي نعيش بسعادة وفرح كافي هو وحزن ، يلا مثل موصيتج .
-صار حبيبي تدلل
- مدام ادلل تعالي دلليني مشتاقلج (وغمزت الها)
.. اباوع الها شون تخجل مني بعدها لحد هسه الله رازقني بأطيب واجمل زوجة بالدنيا
- خل اكمل شغلي واجيك
جريتها لحضني..
-لج ياشغل اريدج يمي اليوم انسي الشغل كله واني المن جايب خدامات بالبيت ليش متجوزين وتفرغين نفسج الي ، شفتي بعد اذا اجي والكاج تشتغلين ازعل عليج وتعرفين زعلي شنو ، (رفعت تك حاجب ).. اهتمي بيه لج تره اروح من ايدج 😌..
- احسان شدتحجي (بغضب) ، بعدك تريد تزوج مو ..
-من حقي لو مو من حقي ، اكولج تعالي دلليني تكليلي ورايه شغل ، اخليج للشغل واجيب وحده تدللني..
- لاوالله مو هو بكيفك حتى اموتك واموتها واموت روحي وراك
- اويلي يابه فديت العصبي، ولج متأثرة بالافلام الهندي صايره .. (ابوسها واكرص بخدودها) يعني اكو واحد عنده هالكمر ويباوع للنجوم شنو اعمى ..
بس اريدج تبطلين شغل وتتفرغين الي
- حبيبي والله متفرغة الك بس احب اخدمكم بأيديه
- من اكلج تجيلي تتركين كلشي بالبيت من ادخله وتجين يمي وتنسين كلشي ماعدا ريحانة افتهمتي..
انتي الي وبس ، ينتهي حق الكل بيج
- صار حبيبي ، والله لاادللك دلال فدوه لعيونك اروح ..
-عيونك حلوه صوبن كلبي ماخلني اندل دربي واغنيلها وهي تضحك شغلت الها الكاسيت ع الاغنيه وكعدتها بحضني والعب بشعرها واباوع بعيونها ولج اني الي اروح فدوه لهالعيون😍

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

ورحنا بعالمنه مخليتها تطلع بس ع كد جابت الاكل وبقت ويايه لثاني يوم بحضني ومااشبع منها ..

.
. ثاني يوم طلعت لدوامي ووصيتها ان تجهز هالامور يم المسبح لان راح نكضي اليوم هناك .
ومناك امر اخذ الولد واذا رادت تجي رغد هلا بيها
......
كملت دوامي ورحت ع الولد لكيتهم جاهزين ورغد مراح تجي وياهم ..
- شلونج ام ضيغم ، ها شعجب مراح تجين وي الولدمسوي الهم اليوم كعده ع المسبح ومشاوي وهالسوالف دنغير جو
جان اجيتي تونستي وباجر راح اشوف وين يحبون يطلعون هم راح اطلعهم .
- الحمدلله، والله والدي مقبل ، ( دنكت راسها) يكلي بعد ماكو روحه خل ولدهم يرحون وحدهم ويرجعون واليوم ع اساس يجون اهل الي متقدملي يشوفوني وبابا منطيهم موافقة ..
- وانتي موافقة لو لا.. اذا مموافقة لاتخافين منه اني احاجيه واقنعه
- لا هو ميتعيب بس اني ردت بعد شوي وقت اتأقلم اني والولد ع الوضع بيت والدي ، اعرف بابا اختياره صح ، بس خوفي ع ولدي وبنفس الوقت اترجاك متدخل لان ح صير مشاكل اكثر مما تصير الك مشاكل
-مدافتهمج هسه انتي موافقة لولا..
- اني موافقة عليه بس ردت بعد وقت اتهيأ نفسيا للوضع ..
-ليش هو شكلج شوكت الخطوبة والزواج..
-كلي ع الاسبوع الجاي العقد وراها يحدد الزواج شوكت
- زين انتي كعدتي وياه محاجيته
- لا حجيت ويا من جنت اخذ ضياء اله هو طبيب اسنان وظل يسأل بضياء عن وضعنه وحياتنه وضياء مجاوبه ع كلشي ، وسألني ع والدي وحجيت ع مرتين وياه وانتهى الموضوع تفاجئت ورا مده خاطبني من والدي والباقي انته تعرفه.
- انتي مرتاحه اله
-هو مبدئيا خوش ولد وحباب بس هم الله العالم بالبشر .
- زين انطيه فرصة وبلكي يطلع زين وانتي اذا شفتي نفسج مو كادرة تكملين ويا، اني مستحيل اخليج تتزوجينه لو شيصير ، ولاتخافين من المشاكل ماكو اي مشاكل اني احلها وي والدج وابد لاتخافين لا ع وضعج ولا ع وضع الولد طول مااني بيه النفس اني متكفل بيكم حتى وان تزوجتي فانتي تبقين بتنا وربيتي عدنه وام ولدنه، ابدلاتحسين بالضعف كلنه وياج ووي قرارج .
- تسلم ابو ريحانة عساك سالم يارب، وربي يحفظك النه ويديمك
- الله يوفقج .. يلا اترخص ورانه يوم طويل وي الولد..
- الله وياكم ..
رحنه ووصلنه البيت ولكيت جيهان محضره كلشي طبعا المسبح اني مسوي مثل صاله كبيرة ومسدودة  ومسكفه وكله جام داير مدايرها واشجار وخضرة وكعدتها حلوه كلش لان زارع نباتات ظليه بالدخل ونفتح الشبابيك والباب جام كبير كأننا كاعدين بالحديقة وداير مدايرنا الحديقة وبيوتنا
دخلو الولد سبحو واني سبحت وبدلت وبدينا نتعاون ع الشوي وامي فرحت حيل بشوفت ولد محمد كانما صايرلها سنة مشايفتهم ..
وفجأة كبت العيطة واسمع صوت ريحانة مفجورة بالبجي ركضت شكو ولكم شبيها ريحانة تعالي باباتي منو وياج ..
ريحانة مفرفحة من البجي وتشهك وتأشر ع ضيغم ..
-لك ضيغم شمسوي الها..
- شنو شمسوي الها دشوفها شلابسه وتريد تنزل المسبح هيج كوتلها روحي بدلي غير هذا اللبس تعاندني تكولي معليك انته بابا جايبه الي ..
- وضربتها مو
- لا..
- لعد ليش تبجي ..
- جريتها من شعرها كتلهها ماكو سبح واذا دخلتي اغركج 😏
:
- لك انته شبيك حاط عقلك وياها طفلة هاي كله عمرها 10 سنوات
- لاموطفلة 😒 وحتى لو ماتلبس هيج ، انته موتكول هي مسؤولة من عدنا واحنه اخوانها😏 خل تسمع الكلام من هسه بعد من تكبر شراح تسوي تعاندكم ومتسوي الا الي يعجبها
-اي حقك .. شوف ضيغم حسابك ويايه بعدين ، عيون ريحانة متدمع واني موجود افتهمت عندك شي معاجبك تجي تحاجيني متحجي وياها ابد
افتهمت ..
(طبعا هو يدري بيه كلشي ولا احد يضوج حنين او ريحانة وهو يريد يخلق مشكلة شلون مجان ، صاير ارعن حيل خلا هالملاك عيونها دم وين متعودة احد يصيح بيها اويضربها..)
- ريحانة باباتي حبيبتي لاتبجين .. باعي اني جايبلج لبس ثاني روحي البسيه ولاتخافين ديشاقه وياج ضيغم يريد يضوجج بس هو يحبج ، وبعد اذا ضوجج لاتردين عليه تعالي كولي الي واني اعرف شسوي بي..
-صار بابا بس كوله لايجرني من شعري والله أذاني
-شحده بعد واحد يحجي وي ريحانتي ..
راحت بدلت ريحانة ورجعت وعينها عليه وعين ع ضيغم خايفة منه رحت يمها نزلت وياها وبديت العب وياهم بالمي اكو كره مائية منفوخه هوا ونلعب بيها ونضرب بيناتنا ...ومسوي زحليكات مائية عاليه للي يريد يطفر .
سنان وعمار خابصين الجو يصعدون ع زحاليك ويتراهنون منو يغطس بالمي اكثر مناامي تصيح
خايفة عليهم ..
ا- يمه احسان صيح بيهم فدوه لايصير بيهم شي ، تنكسر ايد او رجل او رگبتهم ..
-يوم شنو السالفة ، خليهم يلعبون يتونسون شكو عليهم .
سوينا مشاوي واكلنه ومتنا من تعب كلت للولد نامو يمنه بالبيت
وصدوك تعشو ونامو وراها علطول ..
جان يوم جمعة والكل كسلان ، تريكنه وكتلهم وين تحبون نطلع راح اخذكم ونروح
اتفقو كلهم نروح للمنصور ،، كتلهم يلا ورا الغده اجهزو واخذكم
اخذتهم المنصور وفررتهم وجبت الهم ملابس وريحانة دتشتري ملابس هي وحنين وضيغم اجالي ..
- عمو ريحانة وحنين يشترون ملابس عريضة وطويلة مو قصيرة وكصيفه شعدنه قابل وهمه كبرو عيب بعد..
- عود من اموت اتحكم بيهن شنو يحبن يلبسن خل يلبسن مدامهم صغار خل يتونسون ..ركز بداستك
احسن الك من هالسوالف نهم
باوعلي بغضب اي خليهم هيج وبعدين كول تعالو ربيهن هسه اني شعليه واهتم خله وطلع من المحل وانتظرنه برا
اشتريت الملابس واخذتهم على بيت اهل رغد ..
دخلنه وبوجهنا لكينه الدكتور كاعد ويمه ابو رغد ورغد..
سلمنه عليهم وظلينه نسولف وبدينه نتعرف ولد رغد عينهم على امهم وضيغم ديفور..
اترخص الدكتور كمال وكعدنه كلنه فحجى ضيغم ..
- هذا منو الدكتور وشعده هنا
ضياء.. - ماما مو هذا دكتور اسناني شجابه لهنا
:
ابورغد..دكتور حسين تقدم لامكم واني وافقت
:
الولد:يعني شنووافقت وشنو تقدم ماما
ابو رغد .. يعني يتزوجها
رغد .. بابا اني بعدني مموافقة وكلت افكر
ابو رغد .. واني وافقت وانتي مراح تكسرين كلمتي افتهمتي خليتج براحتج فترة طويلة ولهنا وكافي..
ضيغم : انتي موافقة تتزوجين واحد وتخونين ابويه
رغد .. ضيغم احترم نفسك شنو اخون ابوك
( كبت العيطة بينهم واني صافن هذا ابو وغد شلون يسوي هيج حاولت اهدىء بضيغم وسنان وضياء مصدومين )
ابو رغد : شوفوا انتم ولدها وضحت بعمرها الكم بمافيه الكفاية وانتم ياريت تقدرونها وتحترمونها بعد كم سنة تتزوجون وتلتهوون بعائلتكم وتركوها لازوج ولاولد مراح اسمح لبنتي بعد ضيع عمرها وشبابها عليكم لهنا وكافي ..
ضيغم : وهي اذا مو كد الخلفة والمسؤولية شكو تخلف ، هي هذي وصية بابا تريد تروح تتزوج وتخونه
ابورغد .. لك حيوان شنو تخونه ، هو ابوك ميت صار كم سنة وامكم بقت عليكم كل هالسنين واي احد يتقدم الها ترفضه ولدرجه طلبت من عمكم يزوجها حتى تبقون يمه وماقبل يزوجها تريدني ابقيها ، باجر عكبه اني ميت منو الها ..
انته ، يلي ماتحترم لاجبير ولاتقدره ولاتعطف على صغير شنو شايف نفسك ولك ادوسك مثل الحشرة بقندرتي اذا حجيت او اعترضت واي احد يعترض منكم حسابه عسير ويايه ، زمن الدلال راح وانتهى عهده يمي لان امكم ماعرفت تربيكم اني اربيكم خلو بالكم هالشي ،،تقبلون بزواج امكم وهي راح تكعد يمناا وتدير بالها عليكم ومتقصر بشي عاجبكم معاجبكم
الولد ظلو يصيحون ..
ضيغم كام يصييح والله ماتزوج اكتلها والله اجاه ابو رغد وضربه راجدي وسحلهً يريد ياخذه وياه ورغد تدك وتلطم ،والله بطلت ماريد زواج ولاصخام .. ولدي بويه عوفهم ..
ابو رغد لزم رغد هم كفخها وكال الها امشي دخلي ونفس مااسمع منج هاي تربيتج السز فرحانه مكعدتهم بيت جدهم جايبتهم بلا اخلاق
..
طبعا اني بنصهم احاول اهديهم احاجي ابو رغد صار نار .. صاح ع الحمايه مالته يريد يسحل ضيغم لان يتهدد
كتله عوفه عمي .. اني اخذه واحاجيه واهدئه
فاككتهم بالكوة وسحبت ضيغم للسياره رجعته ويايه..
الطريق كله اشوفه دار وجهه وعيونه تنزل دموعها يحاول ميبين ديبجي ..
-ضيغم شبيك ليش ساكت
-شحجي يعني اذا امي تريد تخون ابويه وتتزوج وتتركنا هذي بعد متستاهل ينكال عليها ام ..
:
- انته بلامخ ، شلون بله امك خانت ابوك وهو مات صارله سنين ومن حقها تتزوج ورا متخلص عدتها ورغم هذا بقت كاعده عليكم .
حقها ومالومها اذا تزوجت لان صدك اذا انته ابنها هيج تحجي عليها شبقيت للغربه .
ماقاهرني منك الاانك صغرتها كدام جدك وخليته يمد ايده عليها وهي المدلله بسببكم انهانت وانته شتريد منها واذا مزوجت ولعلمك اذا اخويه جان عايش وزوجته الي توفت مراح يبقى بلا زواج كل هالسنين ، ياابني لاتخلي عواطفك تتحكم بيك انته رجل لازم تحكم عقلك وتفكر وتقدر ظروف المقابل ، انته هسه صغير وطايش واني مالومك جنت بيوم من الايام مثلك ، باباتي استفيد من خبرتي لان احتمال مراح تواجه الي اني واجهته لاتخدعك مظاهر الامور وتظلم الي تحبهم بعدين راح تندم ،
خفف عن اهلك حملك ولاتكون صعب وتأذيها لوالدتك من حقها تتزوج وتشوف حياتها ومراح تنفصل عنك ، هي باقيه وياك
- ياريتها مابقت ، ياريتها ماتت وابوي الي عاش
-تعترض ع امر ربك ، استغفر الله وكافي اعقل واكبر ..
- والله مااخليها تتزوجه
- هسه سد الموضوع كدام بيبي لاتتخربط وتتأذى وهي مناقصة مرض ، وانته ابقى هنا لحد مانحل الموضوع
- حتى لو انحل الموضوع بعد ماعترف بيها امي ، خل ابوها الساقط يفيدها
... جريته من هدومه .. ولك شو انته متحترمني ولاتحترم احد ، شنو تكول كلمة ساقط كدامي وعلى منو على جدك ..
تخبلت لو هذا صدك دلالي الكم تخليني بنص هدومي كدامهم ويكول علينه منعرف نربي..
شوف ولك تتزوج ماتتزوج انته مالك دخل افتهمت وراح تبقى كاعد يمنه ومالك علاقة بيها ..
وراح اعيد تربيتك كلها ع هالالفاظ والاسلوب
يلا وصلنه انزل واياني واياك اسمعك حاجي شي
هذاك الوقت اني الي ادمرك واعرف شلون اعاقبك ..
يلا بسرعة انزل وكول الهم ماحاب اعيش هناك اريد ابقى بينكم للي يسألك واكتفي بهيج ..
:::::::::
نزل طبعا ووجهه مكلوب ونزلت حجيت وي امي وامي فرحت من عرفت ح يعيش ويانه وتدعي وتكول ان شاءالله كلهم يرجعون لحضني وهي خليها تروح تتزوج وتخلف شعلينه بيها بس ولدنه نريدهم ..
ثاني يوم بلغته كتله لاداوم منا لحد منشوف انقلك لو شنسوي..
امتعض وجهه وتغير لونه بس مانطق بحرف .. طول الوقت ساكت
خليت ابو رغد يهدء وورا يومين رحت اريد اتفاهم ويا واحاول احل الموضوع
رفض رفض قاطع ان نتناقش بيه وبلغني زواج رغد الخميس..
- زين انته ليش مستعجل وتجبرها وهي مرايده
- هي متعرف مصلحتها واني اعرف وهالانسان ميتعوض واريد اطمن عليها..
- بعد اني عجزت وياك، الله يسعدها ويوفقها، وشوكت العقد
-هالجمعة ..
- بيها الخير والله يسعدهم ويوفقهم .
- بس رجاءا بلغ الكل مينطي خبر لضيغم ، لان متهور ومتسرع وماضمن شيسوي ..
مشى الاسبوع عادي ورجعت ضيغم لمدرسته يمنه ويداوم وجان يخابر اخوته
واني جان يوم خميس واجالي اتصال من جيهان واني جنت بواجب فمتأخر للعصر مراجع ..
احسان الحك الي فدوة ضيغم طلع وبيده سلاح وماكدرتً اخذه منه
- شدتحجين صدك انتي تحجين لاحول ولاقوة الابالله ، روحي خل الحك عليه .
سديته منها واخذت السيارة وطرت على بيت ابو رغد ..
لكيت الامة مكلوبة واسمع صياح ضيغم : ولك يانذل مااتاخذ مكان ابوي اكتلك واكتلها..
وي مادخلت اريد اوصل الهم وجان اسمع الطلقات ركضت ع ضيغم سحبت السلاح منه وضربته ع راسه
اباوع ع رغد هي والدكتور كلهم دم وملحكت سحبت ضيغم  اريد اطلعه منهم سحلوه مني ..
وللحكاية بقية
شلونكم حبايبي
شخباركم
عساكم بخير ..
شنو توقعاتكم للاحداث اتمنى عجبتكم
لاتنسون ضغط النجمة التصويت والتعليقات الي تسعدني
وارجو منكم تدعولي باجر داخله مستشفى علمود اصابتي..
احبكم في الله
الكاتبة ام جوليا