رواية ريحانة والشيطان .... الطاغية والبريئة الفصل الثامن عشر 18 - بقلم jolyjojo23

(الكاتبة ام جوليا)
#ريحانه_والشيطان .... #الطاغية_والبريئة
#الكاتبة_ام_جوليا
#قصص_وروايات_عراقية
#الجزء_السابع_عشر
::::::::::::::::::::::::::::::::::::::::::::::::::::::::::::
احسان..ورا محجيت هيج وي والدتي كنت متعمد اسمع جيهان كل كلامي .. خلت وطلعت اعرف بيها راح تبجي بالحمام لان منعتها تطلع بالحديقة .
رحت لبيت رغد اشوف الولد شمحتاجين لان راح اطلع واشوف شوكت راح ينتقلون لبيت جدهم .
اجتي رغد جنت منتظرها بالاستقبال
احسان: شلونج ام ضيغم
رغد : الحمدلله ابو ريحانة ، تفضل
احسان: اني حجيت وي والدج وفهمته ان احنه موافقين انكم تكعدون يمه واما قرار الزواج فهذا راجع الكم ، اني سألت ع الشخص الي متقدملج وهو خوش انسان والكل يشهد باخلاقه واخلاق اهله ، وهذا حقج ومنكدر نحرمج منه
رغد: والنعم منكم ماقصرتواواني هم موضوع الزواج بعدني دافكر بيه برغم بابا كلش مقتنع بيه ، بس اني متخوفه حيل من الولد خاف ميقبلون ويسون مشكلة ويعترضون واني ولدي ماكدر اخسرهم بعد كل هالتعب وياهم وامانة محمد الي مقصر ويايه بيوم ماريد اقصر وي ولده
احسان : انتي قرري ومعليج بالولد اني افهمهم واكدر اقنعهم بطريقتي
رغد : شلون تكدر تقنعهم وهمه ع الانتقال لبيت جدهم وكالبين الدنيا ميقبلون يقتنعون .
احسان: دصيحيهم بس
راحت رغد دتصيحهم
اجوي ضيغم وسنان وضياء ، اجوي سلمو وباسوني طبعا همه يصيحولي عمو واني اكولهم باباتي حتى ميحسون بفقدان ابوهم
احسان: هلا باباتي تعالو يمي هنا كعدو .
احجولي شبيكم وي ماما ابقى افهمكم لازم تسمعون كلامها ومتعبوها وتدرون بيه اذا سمعت مضوجيها ان الي راح ازعل عليكم
ضيغم : عمو يعني انته قابل نتركم ونروح نسكن بيت جدو ونعوفكم
احسان: اي قابل وجدتكم هم قابلة ومأيدتني لان تريد مصلحتكم واني الي طلبت هالشي واني الي نقلتكم لهناك ومحد اله علاقة لاجدو ولاماما اني اريدكم تنتقلون هناك لان اني دوامي ممستقر وهم اخاف عليكم من بقائكم هنا
سنان: بس ليش مااخذت رأينا عمو احنه مو صغار كبرنا ولازم نقرر حياتنا وي منو نريد نعيش تعودنا هنا ، بيبي وخاله جيهان والولد وريحانة وحنين شلون نتركم هيج بسهولة
ضياء: اني ماروح واعوف ريحانه
احسان : كملتو حجي هسه 😊 اذا كملتو حتى افهمكم شنو الاسباب
الولد: اي عمو كملنه
طبعا ضيغم عينا تصرفاتي اعرفه مقابل يستمع بس يحاول يحترمني اشرس اخوته ضيغم حيل صعب حتى ويايه  ماكدر افرض عليه لازم اقنعهم واني اصلا مصادقهم لان احس نفسي نحرمت من اخويه وهذوله بمكانه
...
شوفو ولدي انتم مو ولد اخويه واني مربيكم قبل ماازوج شلتكم سنان وضيغم اني فتحت عيني ان انتم ولدي.. ورا ماجتي ريحانة هم كلت انتم تكونون اخوتها وسندها ووراها استشهد ابوكم وهو يستشهد وصاني بيكم وانتم امانته وحتى اكون صادق من ضمن الامانة طلب ان تكون ريحانة لواحد منكم يعني خطبها بس ماحدد لأي منكم وهالشي ماافرضه عليكم ولاعليها بس حبيت ابين وصية ابوكم واخويه وامكم تعرف بهالوصية بس طبعا ريحانة صغيره بعدها ومتعرف شي ..
ضياء: عمو اني اني ازوجها لريحانة اصلا تخبل 😍 هنيالي بيها
ضيغم : انجب انته ضياء خل نفتهم ، شنو يعني هو خطوبه وتحددوها بكيفكم ولاي واحد بله اني رايدها واخواني رادوها تصير مشاكل بينه علمود ريحانة
رغد : ضيغم احترم عمك شهالحجي .
احسان: لاطبعا حقك حبيبي ، بس اني طبعا ماراح انطي بنتي وقرة عيني لاي شخص منكم الااذا كان يستحقها
سنان: مفتهمنا عمو شنو يستحقها وشلون تحدد وشنو دخل هالموضوع بروحتنا لبيت جدو
احسان : يتحدد من يكون  اي منكم راغب يخطبها ويكون رجال اكدر اطمن على بنتي يمه واصلا المعيار الي راح افضل بيه هو الشخصية والشخصية ماتجي بالصياح والعناد والعصبية انما بالعقل والتروي والحكمة والشهادة والتفوق وطبعا بنتي ماراح ازوجها لغير دكتور ..
سنان ؛ اي عمو 😅 جنك تلمح الي لان اني ناوي اصير دكتور
احسان : والله وشطارتك بعد انته ظلت يمكم ضيغم : وليش بله الادكتور ، ع العموم اني موبالي لازواج ولاشي بس اني طموحي اكون ضابط ورح اكون
رغد : حبيبي فدوه اروحلك شدتحجي شكم مره حجيت وياك كوتلك تشيل هالفكرة من بالك
مادخل واحد منكم كلية عسكرية ماريد اخسركم كافي الي خسرناه
ضيغم :واني اعتقد فهمتج غير كلية عسكرية ماراح ادخل والااخذ حق ابوية الا ارتاح وهذا هدفي
احسان : ( اباوع لضيغم اي هذا اني بكل خبالي شلون وراثة هذي) اي كمل استاذ ضيغم صيح على امك كدامي خوش احترام لعد من ورايه شدسوي.
ضيغم : العفو منك عمو بس هذا مستقبلي وماتقبل احد يقرره عني حتى لو كانت امي.
احسان: هسه سدولي هالموضوع نجحو وطلعو معدلات وبعدين نحجي بهالموضوع لان اكو بعد شغلات راح احجيها الكم ورا متكملون سادس وترحون كلياتكم

الولد: شنو هيه .
احسان : كلت ورا ماترحون كليات ح تعرفونها ..
واذا اني متت قبل هالوقت اني مسوي وصية اني وجدتكم ومخلينها يم محامي العائلة وهو راح يوضح كلشي، وطبعا الوصية قابلة للتغير حسب تصرفاتكم وي امكم
ضيغم : كلشي ماريد من اي احد ، اني احتاج اوصل لهدفي وبس وطبعا امي ع راسي بس اني ماحب ينفرض عليه شي .
احسان : تمام استاذ ضيغم
ضياء: بس عمو اني بعد هوايه الااصير 18 سنة همه قبلي يصيرون
احسان : حبيبي هم الك وصية خاصة بيك من تصير 18 تصير الك ،وطبعا بعيد عن ورثكم والوصية اني مخليلكم وديعة باسمكم وفوايدها الكم تصرفون منها وهي مبلغ كبير ، لكل واحد منكم من اليوم راتب شهري خاص بيه من غير مصاريفكم الي راح توصل بيد امكم .
اما بالنسبة لعلاقة روحتكم بريحانة ..
اني اريدكم تبتعدون عن ريحانة شويه حتى ماتحسكم اخوتها من تريد تصير خطوبة اوشي تتحججون بهالشي وهم اريد جدكم يكون عينه عليكم لان اني مامتواجد ليل ونهار يمكم وكل اخباركم ح توصلني وطبعا كل عطلة انتم يمنا وخميس وجمعة يمنا يعني ماراح نفترق بس وقت الدراسة اريدكم تركزون بالدراسة ها واياكم واحد يحجي هالحجي كدام ريحانة بنتي ماريد عقلها يتشتت اريدها توعى ع دراستها ولوما وصية والدكم الي مستحيل اخليها بهالموقف..
بس ان شاءالله تكونون كدها وتبيضون وجه ابوكم كدامي وكدام الناس.
ضيغم : اي عمو اذا انته هيج حريص ع ريحانة ليش مبقيها يم ياسر وعمار😒 مو المفروض هم تخاف عليها منهم وهذوله هم شباب وباعمارنا هم .
احسان: لك انته اثول لو تستثول ليش تريدني اهينك واطيح حظك 😡😡😡، شنو هالحجي منو كلكم دابعدكم خايف ع ريحانة منكم اني موفهمتكم كل الموضوع
ضيغم : عمو اني ماقبل واحد يغلط عليه
احسان: اني اغلط واطيح حظك واضربك هم اني هواي انطيتك عين خصوصا انته..😡😡😡
ضيغم : لا ماقبل حتى لو تكون عمي ومربيني ، ومدام هذا اسلوب الحوار اني استأذن واني مستعد اروح لبيت جدي وبالنسبة لبنتك انطيها لسنان او ضياء هالموضوع ميخصني وموضوع الورث لكل حادث حديث من رخصتك عمي
احسان ( طبعا ردت اكوم اشبعه كتل لو ماوكفت رغد كبالي تتوسل ) : فدوه ابو ريحانة عوفه الله يخليك اني اخاف منه ومن سوالفه
احسان ( عطت بيهم ) : طلعو يلا كلكم مومال واحد يناقشكم والي يجيب سيرة هالموضوع كدام اي احد عقوبته لو مها كان يمي انتو شفتو وجهي الحلو ماشفتو وجهي الثاني ..
( طبعا ضيغم عافنه وكام قبل مااكمل حجي وبقية الولد كامو وراه )
رغد: فدوة ابو ريحانة مو كتلك ع كيفك انته ماتعرف شديسوي بيه ضيغم مدمرني ومن اتعاند وياه يزيد اكثر بالهداوة ويا
احسان: اني عمري ماشفته هيج يرد عليه ، جان خليتيني أدبه ع جسارته
رغد : شتأدبه هو بطولك صاير اخاف لايتجاوز وهذا مراهق وبعده لحد هاللحظة متأثر بوفاة ابوه لان جان حيل متعلق بيه ، ماعرف شراح يسوي بيه اذا عرف بشغلة الخطوبة
احسان: معليج منه اطيح حظه هالمراهق هذا هنوب يتحكم بينا ، وانتي بس جهزي ملابسكم بنهايه هالاسبوع اذا تحبون اوديكم تنتقلون
رغد : هو والدي ديجهز النه البيت الي بصفه اخذه النه بس هسه ح نكعد ويا..
احسان: خوش لعد ولاتشيلين هم الولد اني وياهم وحتى اذا عصبت عليهم فهذا لمصلحتج ومصلحتهم ..
رغد: الله يستر وان شاءالله خير ..
احسان: الله كريم ، يلا اروح اني ممحتاجة شي
رغد : لاسلامتك الله يحفظك النه من كل شر
احسان : تسلمين ام ضيغم .
:::::::::::::::::::::::::::::::::::::::::::::
رجعت للبيت واني عيوني تدور جيهان ..اول مدخلت صحت جيهان وينج ..
اجتي جيهان وعيونها مورمه من البجي بس ولاكأني داشوف حالتها..
احسان : تعالي ورايه للغرفة ..
جيهان : حاضر
اجتي ورايه وكعدت ع السرير وهي نزلت دتنزعني حذائي والجواريب اني جنت مااقبل اخليها تسوي هيج بس هي جانت دائما تكلي اني افرح من اخدمك بعيوني
كتلها جيهان باوعيني وكومي اني انزع وحدي
جيهان : احجي واني دانزعك عادي
احسان : ماشي جيهان براحتج؛ شوفي اريدج تنتبهين على ريحانة تره كبرت وولد وجدان كبرو واحنه لازم نتحذر من اي شي
جيهان س: اطمن ريحانة مؤدبة وواعية وبعدها صغيرة ي
احسان : هي صغيرة بس همه مو صغار وفترة مراهقة ، اريد تنتبهين عليها زين
جيهان : هي ريحانة حتى من تدخل غرفتها تقفل الباب عليها ومن نايمة هم تقفل بابها واكثر وقتها بدروسها وكاعدة وي حنين ، وصار الي تريده يصير..
احسان : وجهزي نفسج رغد ح تنتقل هي والولد بنهاية الاسبوع ..
والطابق الفوك اريده تجهزيه لمرتي ..
جيهان : شدتحجي احسان شنو مرتك وشوكت خطبت ومنو هذي .. شو مصدكت انته كالولك ع زواج
احسان : ليش منتظر احد يكولي لو منتظر اذن منج ، موردتي اتزوج واجيب اخ لريحانة وهاي امنيتج راح تتحقق واذا تحبين ازوج ثالثة ورابعة هم ازوج كلما يعجبني ح اتزوج حتى اراويج شلون تتنازلين عني بسهولة وتعرفين قيمتي .

جيهان : والله احسان موقصدي والله اني اجن من غيرتي عليك ماتحمل بس من امي حجت وكالت ع الولد وع رغد جنت ح اموت ، بس كلت حرام عليه احرمك واني موبيدي ، ومديصير عندي اطفال صار سنين ، شكد حاولت واستمريت  ع العلاج وي دكتورة حنان ومصار شاسوي ، من حبي الك لان احبك اكثر من نفسي مردت اكون انانية بيك وتالي هيج تعاملني كانك مصدكت اكول اي تريد تزوج وكدام عيني ..
....
احسان (اباوع لعيونها من تحجي وتبجي وتعاتبني واني اعرف كلامها كله صح ومن كلبها طالع ومتحملت ابقى اشوف دموعها حضنتها ) : اششش كافي كافي كله الادموعج انتي غبية ازوج عليج شلون لج هو اني كلبي هذا اتسمى باسمج ماكو وحده تكدر تاخذ ربع مكانج هنا وين اكدر اني اشوف عيون غير عيونج وين الكى مثل گلبج .. انتي روحي انتي ملاذي ومسكني ، شكد مرينا بظروف ورجعنا اقوى من قبل ، اني اريدج قوية متتنازلين عني ومتتنازلين عن حقج وحق بنتج  اذا اني موجود اليوم ماضمن نفسي موجود باجر لو لا..
جيهان : اسم الله عليك يومي قبل يومك ياروحي انته..لاتجيب سيرة الموت فدوة على لسانك ماتحمل.
احسان : فدوة اروح اني لهالعيون ، الي ماشوف غيرهم ربي لايحرمني منج ولامن ريحانة ويحفظكم الي .. اوعديني جيهان تحافظين ع حق بنتي اذا صار الي شي وتخليها شخصيتها قويه
جيهان : اوعدك حبيبي كلشي تريده يصير بس لاتبعد عني ولاتحرمني منك ..
احسان : احرمج شلون هو انتي حارمتني وحضنتها حيل ،مشتاقلج ولج شلون بيج مالكة عقلي وگلبي ولج اني مسحور بيج ..وحضنتها وذابت بحضني ولمساتي وجنت الثم شفافها عطشان الها ومامرتوي وهي تحوص..
احسان (انطيتها مجال تاخذ نفس): احجي شبيج .. تحوصين شنو بالج
جيهان: اكولك وماتزعل مني
احسان: كولي بله
جيهان:  ح تزوج صدوك بعد عليه احلف بداعة ريحانة احجيلي الصدوك
احسان : هنا الحجي . وداعة عيونج وداعة عيون ريحانة مازوج غيرج ولاافكر باي وحدة غيرج ..
اني كلي ملك لجيهان بعد شتريدين .
جيهان (تحضني وتبوس بيه ) :اووي من فدوة اروح الك كولك ، وين الكى مثلك بالدنيا كلها اموت عليك اني ..
احسان : اموت عليج اني والله شاهد من يوم ماجتي عيني عليج ماتت النسوان بعيني .. اطمني حبيبتي ، بس شنو ماريد هالحجي تعرف بيه امي ، خليها عبالها ازوج لحد ماتزوج رغد ونخلص من هالسالفة وتستقر واحنه هم نستقر .
جيهان : رغد صدوك ح تزوج
احسان : تقريبا اي والرجل الي خابطها جدا مناسب الها وخوش انسان اني سألت عليه .. وكافي تعالي مشتاقلج كافي حجي .....
وحضنتها ورحنه بغير عالم ......

::::::::::::::::::::
عدت الايام البقية عادي بس ريحانة من عرفت بيت عمها ح يرحون كلبت الدنيا بجي عليهم وضياء حاضنها ويبجي وحاضنه رغد وتبجي عليهم
واباوع لضيغم حاقد عليه يباوع الي من جوه لجوه وسلامه بارد ع ريحانة اما سنان فحباب يعامل ريحانة بمحبة اكثر .. اتمنى يصير من نصيبها ..
امي كلبته عزا يوم روحتهم بالبجي والنحيب .. وبالمهدئات والمسكنات اتلاحكت عليها ..
رحت اخذتهم وراحو وجدهم منتظرهم ومستقبلهم احسن استقبال ..سلمت عليه وراحو ..
وكعدت ويا اسولف..
_شوف ابني تره بعد اسبوعين راح اسوي الخطوبة مال رغد حتى يكون عندك علم
_ هي انطت موافقتها
_مانتظر موافقتها وعموما الرجل ميتعيب واني انطيته كلمة بالموافقة
-بس ميصير تجبرها ياعمي
-ماجابرها وبنتي واني اعرف مصلحتها زين ، اني دانطيك علم بالموضوع مدااخذ رايك ، انطيتك فرصتك ورفضتها خلص بعد مالك دخل بيها
.... نرفزني كلام ابو رغد حيل بس هوا حقه ..
-صح كلامك عمي واني اترخص واذا احتاجيتو لاي شي بأي وقت اني موجود..
-تسلم ابني
- يلا اروح اترخص اني لان الوالدة عايفها منهارة علمود الولد
-الله يصبرها ويشفيها وهمه مو بعيدين كل خميس يجوكم
- هلابيهم بكل وقت .. مع السلامة
....
طلعت واني مقهور ع رغد وع طريقة ابوها بالتعامل وياها..
لازم اعرف رايها اذا مقابلة اساعدها ..

وللحكاية بقية ..

حبايبي شلونكم
انطوني رايكم بالبارت
ولاتنسون التصويت بالنجمة وتعليقاتكم الحلوه مثلكم تسعدني
احبكم في الله
الكاتبة ام جوليا