رواية ريحانة والشيطان .... الطاغية والبريئة الفصل الثاني 2 - بقلم jolyjojo23

#ريحانه_والشيطان .... #الطاغية_والبريئة
#الكاتبة_ام_جوليا
#قصص_وروايات_عراقية
#الجزء_الثاني

....................
ريحانه ..
كعدت ثاني يوم على صوت ماما وهي تبوسني وتكعدني بهدوء تكلي يلا حبيبي حتى نكوم نغسل ونتريك بابا منتظرنا ..
حضنت ماما حيل وكتلها صباح الخير وبستها وكتلها اني احبج هوايه ماما انتي وبابا هي باستني وكالت واني اموت عليج بأبتسامة يلا ياروح ماما خل نلحك ع بابا محضر النه مفآجأة
ماما اخذتني غسلت الي(الكاتبة : ام جوليا) وبدلت الي ورحنه لبابا حتى نتريك بسته لبابا وكعدت بحضنه
بابا: حبيبة بابا اني اليوم بنوتي كبرت واني محضر الها مفاجأة
شنو بابا المفاجأة ...
حبيبتي مراح تصير مفاجأة اذا كلت الج يلا اكلي
وشويه وتعرفين شنو المفاجأة ..
كملنه وظليت العب شوي بالالعاب بالاستقبال شويه واندكت الباب واجت الدادة كالت لبابا اجوي ضيوف عليه ..
بابا اجه ودخلت ويا بنية طويله وجان شعرها اسود سرح ولابسة كوستم اسود وماروني
بابا صاحلي وصاح لماما ..
ماما سلمت عليها بس حسيتها منزعجة من شافت هالبنية ..
صاحلي بابا گالي سلمي ع مدرستج ..
صفنت بوجه بابا شنو يعني مدرستي ؟
كالي هذي مدرسة تعلمج العزف ع البيانو ورح تبدي تدرسج عربي وانكليزي ورياضيات اني اريد بنتي اشطر بنوتة بالدنيا
اميرتي الصغيرة رح تسمعين كلامي وكلام مدرستج وتصيرين شاطرة ... لوترديني ازعل منج ..
بست بابا وكتله لاحبيبي بابا ح اسمع كلامك وح سمع كلام المدرسة
سلمت عليها وكان اسمها ست حوراء ..
وبدت تعلمني شويه شويه ع البيانو وعرفتني على السلم الموسيقي ..
وبديت اتعرف ع الاحرف العربية وع الاحرف الاجنبية ..
بابا جان مهتم بكل تفاصيلي وكان يحب يفتخر بيه
ماما.. كانت دائما تظل صافنة ومهمومة واكثر الوقت الكاها تصلي وتبجي ...
اني تفاصيل حادثة عيد ميلادي كان تجيلي بالاحلام وافز مرعوبة منها وتجي (الكاتبة ام جوليا)ماما يمي تقرالي قران لحد مانام كان صوتها عذب جدا ترتل القران واني استغرق بالراحة والنوم ...
خلصت الاجازة مال بابا وصار لازم يرجع لعمله هو كل 3 اسابيع يروح ينزل اجازه اسبوع او عشر ايام ..
بس هالمره كان عنده شغل ب بغداد يكمله فبقى شهر ونص يمنه بهالاثناء اني كمت اعرف اقرا كم كلمة عربي وكم كلمه ( الكاتبة ام جوليا)انكليزي وحفظت الارقام والاعداد باللغتين وكنت متفوقة حتى بدروس البيانو وبابا طاير من الفرح ....
وعدني بابا اذا صرت بعد اشطر يسويلي حفلة ويخليني اعزف بيها
وكانت امنيتي هالشي اسويه ..

بيوم كعدت سمعت ماما تبجي ميته من البجي تكله لبابا الله يخليك لاتروح وترجع لشغلك هسه والله گلبي مقبوض من روحتك وهو حاضنها ويطمن بيها ويسكت بيها ...
كان لابس ملابسه العسكرية واكو حماية وياه منتظرينه برا بالسيارة اجه بوس ايد بيبي ...
وباسني وحضني وگلي ديري بالج على امج وبيبي واسمعي كلامهم وصيري شاطرة حتى انفذلج وعدي الج ..
بسته وبجيت لان شفت ماما تبجي وكتله بابا لاتروح خطية ماما تخاف وحدها ..
گلي اني موجود بأي وقت يمكم لتخافون انتي اميرتي الشجاعة رح تظلين شجاعة دائما..
كتله اي بابا ...
طلع بابا وماما شمرت وراه دولكة مي حتى يرجع النه سالم وظلت حاضنتني وتبجي حيل ..
اول مره اشوف امي منهارة من بابا يطلع
كوتلها ماما لتخافين اني يمج ماتركج ...
ظلينه كم يوم ع نفس وضعنا اني اتابع دروسي وي ست حوراء ومتفوقة بيهم وماما يوم عن يوم اشوفها تذبل وتضعف وكامت متاكل قليل ابد
وبيبي تحجي عليها تكلي جيهان شبيج وجهج اصفر خاف حامل .. ماما تكلها لاشويه تعب وقلق علمود احسان مجنت اريده يروح
گلبي مامطمن ابد ..
لاحظت بعدين انو ست حوراء انطت ورقة لماما وماما عبست وبين ع ملامحها القهر والضوجة
بس شنو هذا الي ضوج ماما لما قرأت الورقة ؟
ظليت احوص اريد اعرف بس شلون اعرف اني اصلا ماعرف اقرا كل الكلمات هستوني داتهجه واجمع الاحرف والكلمات ظلت الورقة بيد ماما وراحت لغرفتها
وست حوراء راحت ... وراها تعشينا ونيمتني ماما وراحت
اني كعدت بنص الليل اريد اروح الحمام فأخاف اروح وحدي وجنت نايمه بالفراش بغرفه ماما اباوع لمكانها مموجوده ظليت اتسحب شويه شويه باوعت لكيت ضوه بالمكتب ورحت داباوع منو هناك ادور ماما لكيتها دتلعب باوراق بابا ولازمه شي بيدها تمشي عليهم...
استغربت حيل شنو الي دتسويه ماما فصحت عليها ماما ماما تعالي اريد اروح حمام هي ارتبكت وانتبهت لوجودي بسرعة ضمت الي بيدها
كالت الي هسه حبيبتي جايه رتبت كلشي واجتلي بوستني واخذتني حمام ورجعت تنومني ...
اني نمت وكعدت بس (الكاتبة ام جوليا) عندي فضول موطبيعي اعرف شنو الي جان بيد ماما شي غريب اول مره  اشوفه ....وظليت ادقق وانتبه اكثر لتصرفات ماما حتى اعرف هي وين ضامته لان صار عندي هوايه كأني ادور ع الكنز المفقود 😍
ظليت ادور وادور وماحصلت شي بس انتبهت انو ماما تحجي وي ست حوراء بعصبية واني ممسوية شي وشاطرة وياها
فورا مطلعت كتلها ماما انتي زعلانه مني اني مسوية شي يضوجج
جاوبتني كالت لاحبيبتي ابد انتي ريحانة قلبي شلون تضوجيني ...
كتلها لعد ليش هيج ضجتي من ست حوراء ..
كالت الي حبيبتي تريد تزود فلوسها بالتدريس واني مقبلت وانتي لشغلين بالج بهالامور
ركزي بالدراسة وتعلمي زين حتى ينفذلج بابا وعده ...
مبقى بالي شي بس مراح من بالي موقف الحفلة والجهاز الي عد ماما والي مداندل مكانه واثناء مجنت ادور لكيت صور اهلها لامي
جنت العب بيهم وماما دخلت اول مشافتني العب بيهم صاحت بيه ..
اني شمرت الالبوم مال صور .. وكمت ابجي اني محد يصيح بيه ابد ..
حضنتني ع طول ومسحت دموعي وكالت الي حبيبتي مااحب تلعبين بغراضي وهالاشياء خاصة  ميجوز اللعب بيها
انتي استأذني مني قبل متمدين ايدج ع شي ..
اعتذرت منها وهي بوستني وكتلها منو هذوله بالصور 
كالت الي وهي مغرغره(الكاتبة ام جوليا) بالدموع هذوله اهلي وبيت جدج الي انحرمتني من شوفتهم
وكعدت تراويني بصورهم وتحجيلي عن اهلها انتبهت عدها 3 اخوه ولد واخت وحده جميلة بشكل بس مو بجمال ماما وهي الاكبر من ماما
وكالت الي هذي اختها اسمها نسرين ..كتلها وينهم هسه بيت جدي حضنتني وكالت بالجنة هسه همه وكاعدين يباوعون علينه علطول ..
مجنت اعرف شنو جنه وشنو نار
ظليت اسأل بماما وهي تشرحلي واني من نوع اخزن بسرعة واحفظ والي احفظة مينمحي ...
مشت الايام على نفس الوضع ومتغير شي ...
الاان بيوم  بابا خابر حجى وي ماما وحجى وي بيبي وكال الها الاسبوع الجاي ح يجي تبدي اجازته ظلت ماما تبجي وتوصي بيه ينتبه ويدير باله زين وميثق بأحد
واني حجيت وي بابا وجنت مشتاقتله حيل ...
بابا جان شغله ع الحدود اكثر شي فيطول بروحاته ...
جنه منتظرين بابا يجي وماما مجهزه نفسها وبدلت الي وطبخت الاكلات الي يحبها بابا وكلنه منتظرين دخوله علينه ...
فجأة دك التلفون وطلبو يحجون وي بيبي ...
بيبي دتحجي بالتلفون ولطمت ع صدرها وصرخت يمه ولدي راحووو مني ..
اني مصدومة ...
ماما هي صرخة وهي وكعة بالكاع الخدم اجوي تلاحكو علينه والسايق وفجأة صارت هوسه وشالو ماما ودوها غرفتها وبنص ساعة اسمع السيارات والهوسة واصوات غريبة عجيبة ..
ماما صحت ورا شويه والدادة جانت يمنا بسرعة تريد تحجي متكدر بس (الكاتبة ام جوليا)دموعها تجري وحاضنتني وتبجي ...
كامت اخذتني وياها وجلبت وي بيبي وصعدنا بالسيارات واني مادري احنه رايحيين وين ..
نزلنا ودخلنه للمستشفى واني ماعرف اول مره اشوفها رحنه نتمشى لحد مصاحو للدكتور وسألوهم ع الاسماء ورحنه صعدنا بطابق ثاني وظلينه نمشي لحد موصلنه لغرفه الدكتور ظل يسولف وي ماما وماما تشهك بالبجي وبيبي وياها وفجأه بيبي تخربطت ووكعت ونقلوها ع غرفه ثانيه وبقينا يمها
اجه الدكتور لماما كال الها لازم تصيرين قويه وادعيله هسه هوبالعناية المشددة اذا مرت 24 وماكو اي مضاعفات نكدر نطلعة ،..
بهالاثناء اجتي عمتي وجدان واول ماجتي نزلت على ماما غلط وجرتها من شعرها اول مره اشوف ماما احد يمد ايده عليها كمت اصرخ وابجي وبيبي كامت تصيح ع عمتي وجدان ولج وجدان عوفي المكرودة شعليها ليش تأذيها ..
وهي تضرب بامي وماما ساكته وتبجي وجدان تكول لبيبي كل مصايبنا بسبب هالعلة وولدج ح يرحون بسببها لو ما هي خبلته لاخويه خلته ميندل راسه من رجليه شوفي تاليتها ..
بيبي عاطت بيها كالت الها وجدان قسما بذات الله اذا متركتيها ح اتبرى منج واني اعرف شغلي وياج عوفيها هاليتيمة بلكى على عينها ولدي يكومون بالسلامة ...
تركتها لماما وكالت لبيبي محد خلاها هيج تشيخ علينه غيرج انتي واحسان هذي نجسة وعار وانتو ملفيها واني مراح اتركها والا تكون نهايتها ع ايدي ..
جنت مرعوبة حيل من منظر عمتي وكرهتها حيل ورحت حضنت ماما (الكاتبة ام جوليا).. ماما حضنتني واخذتني لبيبي
باست ايدها والله يمه مالي ذنب اني ... شكد توسلت بيه يترك الي ديمشي بيه ويسويه وهو ميقبل والله مواني السبب وهي تشهك وتبجي ...
كالت الها الله يرضى عليج ي بنتي ادري بيج مالج ذنب بس هذي وجدان حاقدة ع الكل موبس عليج تركيها معليج منها ...
بس ادعيلهم حبيبة انتي يتيمة ومظلومة ربج يستجاب دعائج حضنو بعض وظلو يبجون وراها ماما توضت وضلت تصلي وتدعي واني نايمه بحضن بيبي ع سدية لان بيبي وضعها تعبان مقبلو يطلعونها ...
لحد مغفيت محسيت الاصار الصبح واسمع العياط دخلت وجدان وهي تصرخ ع بيبي موكتلج مترتاح الاتموتهم يمه ابنج مات ارتاحي يمه هذي الي تدافعين عنها موتته
بيبي كامت تصرخ واني ابجي وخايفة ع صريخهم وامي تدك وتلطم ماعرف شديصير
بس المنظر دمرني وخصوصا ماما اول مره هيج تنهار كدامي ....

وللحكاية بقية .....
ملاحظة :: الصورة هذي ام ريحانة وكل ماانزل بارت راح انزل صورة مقاربة للاحداث حتى تعيشون وياها..

توقعاتكم اريد اعرفها وشنو رأيكم بلي ديصير ...

احتمال انزل بارت بالليل ...
شجعوني بالتصويت وتعليقات ...

الكاتبة ام جوليا ..