رواية ريحانة والشيطان .... الطاغية والبريئة الفصل الثالث 3 - بقلم jolyjojo23

#ريحانه_والشيطان .... #الطاغية_والبريئة
#الكاتبة_ام_جوليا
#قصص_وروايات_عراقية
#الجزء_الثالث
...........
دخلت وجدان تعيط وتصيح وتكول ابنج مات موتته الحقيرة ...
بيبي تبجي وتصرخ ولج وجدان منو مات بيهم احجيلي
يايمة يااوليدي وتملخ بروحها وشعرها واني خايفة وامي تصرخ لااحسان لاتعوفني لوحدي فدوة
....لزمتها وجدان لامي وتكولها ولج حيوانه لاتفاولين على احسان
احسان مامات محمد الي مات ... اذا احسان يموت شيخلصج مني ولزمتها وتملخ بيها وبيبي  تصرخ يايمه يامحمد ..اني ابجي واصرخ واجتي الممرضات وزوج عمتي سحبوها لوجدان عن امي
وانطو لبيبي ابرة مهدىء وهي تكول اريد اشوفهم
تجذبون عليه اثنينهم ماتو
اريد ولدي الله لايوفقكم اريد ولدي ...
ماما وكعت من طولها شكدماضربتها وجدان دمتها وشالوها بغرفه ثانية واني وياها ...
بعد ماعرفت شي لان عزلو امي عن مكان بيبي ...
عدا اليوم لليل اني جابتلي الممرضات اكل واكلت وامي مغمى عليها وشادين الها مغذي لان صار كم يوم ماماكلة
لليل فتحت عيونها وحاجتني ..شفتي ابوج عايش بعده
كوتلها لامشفته وابجي وحاضنتها ...
جتي الممرضة وسالتها ماما عن بابا
كالت الها .. تعدى مرحلة الخطر .. ماما رادت تشوفه استأذنولها من دكتور واخذتني وراحت دتشوفه لكينه حمايه ع الباب وبالكوة دخلونه
لان ابن عم بابا موجود ودخلنه لبابا ...
بابا جان متصوب بكتفه ورجليه وراسه ملفوف بيه خدوش بجسمه كله وبوجهه
اني وماما ركضنا دنحضنه الدكتور منعنا كال اي حركة مفاجئة خطر عليه انتم طمنتو عليه وشفتو فلهنا وكافي حتى يكدر يستعيد عافيته ...
ابن عم بابا صاح لامي وكال الها اطمنتي هسه عليه وسمعتي كلام الدكتور ... يلا ارجعج للبيت لان اخاف عليكم هنا واحسان موصيني عليكم ..
عيون امي مبطلت بجي اخذنا سيف (ابن عم بابا)
رجعنا للبيت وليكناهم ناصبين الفاتحة والبيت مليان باقارب بيبي ...
ماذكر ايام الفاتحة شلون خلصت لان اكثر الوقت كنت وي ماما بغرفتها وهي مخلصة صلاة ودعاء وبجي ...
بهالفترة مطلعنه نشوف بابا ..
عدا اسبوع على وفاة عمي وبيبي بعدها منهارة ومريضة حيل وعمتي وجدان مستلمة البيت بالامر  والنهي ..
وماما متجنبتها حيل بحيث حتى متطلع الالما تشوف  وجدان مموجوده ...
سمعت انو بابا رح يجيبونه اليوم للبيت وان هوا صاير احسن ماما واني فرحنه حيل
وجدان جابت سرير ورتبتة بالاستقبال لان كان جبير حيل وهيج سوت تكول علمود الناس الي راح تجي على بابا ميصير بابا يتحرك هواية وهو اصلا الاستقبال والهول كبار ومعزولين وبيهم صحيات وكل المسلتزمات حتى ثلاجه صغيرة للمشروبات والتقديم ..
اجه بابا جايبينه ناس وياهم ممرضة ورتبو وضعه وخلوه بالاستقبال
كان هاديء واحنه رحنه سلمنه عليه اني وماما حضنته وكمت ابجي وبيبي اجتي يمه تمشي ايدها ع شعره
تكله كوم يانظر عيني اخذلي بثار اخوك ...
يلا يمه ي حزام ظهري لتخلي ظهري مكسور ...
گللها اطمني يمه الي غدرونه جبناء وجاي دورهم لتخافين على حق اخوي اني مطلعة ومنتقم من كل واحد اله دور بالصار بينا ...
بس هسه ماريد اشوف احد طلعو كلكم ومن احتاج شي راح ادز عليكم ...
بوسني وحضني وماما باسته ودموعها تجري وكالت امرك ابو ريحانه ... من تحتاج شي اني كاعدة بأي وقت ..
بدت اوضاع البيت تتغير وبابا صار تعامله غير طريقته وي الكل كان علطول الاستقبال مايخلى اما اصدقاء بابا الضباط
او الاطباء والممرضة وياه علطول ..
بابا بدو وياه جلسات كهربائية وعلاج كهربائي لان جان ميكدر يستخدم رجله لان الطلقة صايره بصف عصب ومأثر عليه ...
واني استمريت بالدروس بس البيانو وقفت دروسه علمود حزينين علمود عمي محمد ..
كل اسبوع بقينا نسوي ثوابات ... ماما صارت شاحبة حيل وهزيله وهي وبابا مااشوفهم وي بعض قليل بس ع كد السلام والاحتياجات ..
بقت ست حوراء تنطيني دروس وكمت اقرا زين انكليزي وعربي وبابا هدالي مجموعة قصص قصيرة  باللغتين العربية والانكليزية
والرياضيات اني متفوقة بيه قرر بابا يقدملي ع مدرسة نموذجيه تسوي اختبارات للاطفال حتى تقبل الي متقدمين دراسيا ياخدوهم فورا ..
بابا سوالي واسطة وكبر عمري سنتين يعني اني عمري 4 سواهم ست سنوات ودخلني للمدرسة النموذجية ...
كانت عالم جديد الي ... بديت ادوام وكأني صدوك عمري 6 سنوات والي يسألني اكوله 6 ...
بدا بابا يتعافى ويمشي ع عكازة ورجعت اتدرب ع البيانو وشويه بده جو البيت الكئيب يخف بس بعده بابا ينام بالاستقبال يكول هيج اريح الي علمود الضيوف
حاولت ماما وطلبت منه ان يرجع غرفته رفض وكال كلشي بوقته من يصلح الا ارجع غرفتي ..
مفهمت شنو قصدة ...
صارلنه 4 اشهر هسه ...ورا الحادثه ... بابا استعاد عافيته بس بقى اثر بسيط بمشيته كالولهً بالتمارين يروح ...
وفجأة طلب من ماما تجهزله جنطة بكل احتياجاته ...
ماما باستغراب ...
-احسان علمود شنو الجنطة تريدها
_جهزيها لان خلصت اجازتي وراح ارجع لواجبي ...
انتهى وقت الراحة وصار وقت تصفية الحسابات وكل مجرم لازم ياخذ جزاءه
ماما بشهكةً وبجي :
فدوة احسان اترك هالوظيفة الله يخليك احنه مالنه غيرك ليش تريد تيتمنا من وراك ..
لزمها حيل من ايدها :
لج وجهال اخويه الي تيتمو مافكرتي بيهم من مات بسببي .. اخويه الجبير فداني بروحه
ابويه الي رباني وصاني بيكم وبامي وبولده وان اخذله حقه باخر شهكة شهكها ..
هذا كله اتركه وابقى بلاشرف اكابلج ترديني اكابلج واكعد مثل النسوان وابجي ..
انفعال بابا وصياحه بماما اول مره اشوفه خفت منه حيل وانهزمت بغرفة بيبي ..
احب غرفتها الكى بيها سكينتي وهدوئي ...
ورا شويه بيبي راحت الهم ومسمعت صوتهم وماما جهزت الجنطة وهي دمعتها مانشفت ...
اوووف ياماما ... ليش هيج فجأة انكسرتي ...
ولو اني من يمي داحس بابا انسان ثاني برغم هو ميقسي عليه ..
هي شنو احساسها ..
راح بابا ودعنا بس جت عمتي وجدان بمكانه...
كنت ماطيقها ابد ...
بقى بابا يتصل علطول ويطمن علينه وطبعا الحياة متخلو من مشاكل وجدان وي ماما واذيتها الها ....
بس اني كنت مشغوله بالمدرسة والدروس وارجع تعبانه وانام واكعد للدروس وهي وجدان كدامي تحاول تسوي نفسها زينه وياي وي ماما ..
بس اني ابقى نافرة منها ...
مره لاحظت ان ست حوراء هم انطت لماما ورقة وعلبة صغيرة ماما قرتها
كالت الها مستحيل ماسويها وبغضب ..
ست حوراء لزمت ماما من ايدها وكالت الها نصي صوتج انتي الي راح تخسرين نفذي الاوامر وبس ...
اني ارتبكت من هالمنظر وهمه حسو عليه جيت غيرو بسرعة طريقتهم واستأذنت ست حوراء وراحت ...
مر اسبوع الوضع (الكاتبة ام جوليا)طبيعي ماكو شي بيوم عمة وجدان كالت ح اروح يومين وارجع ارتب وضعي ووضع الجهال لان راح اخذ الطابق الفوك كال احسان كعدي بيه بدال مفارغ وبيبي كيفت وفرحت بس اني ابد مافرحت لان مااحبها ولااحب اولادها ..
راحت ورجعت وجتي مغيرة اسلوبها وتعاملها وكامت طبخت واجتي تحضني وتبوسني وراها
كالت اسويلكم كيك وعصير مشتهين
وزوجها يمنا وجهالها ..
سوت الكيك وهو بالفرن واني رحت اريد اشوفه من ينتفخ واحب اكل الي يبقى منه سائل شفتها لعمتي دسوي عصير بس انتبهت طلعت من جنطتها شيشة صغيرة قطرات فرغتهم كلهم بالعصير وخاطته ..
وتعشينا ورا العشا جابت النه الكيك واكلنه وشربنه العصير وراها حسيت نفسي نعسانه
... ورحت نومتني ماما وراحت ...
للفجر حسيت بصوت خربطة وشفت خيال ديطلع من غرفة ماما وجنت دايخه بس اريد اروح للحمام واريد اروح لماما ..
لمحت عمتي وجدان راحت قفلت البيبان وكالت الي  شكعدج كتلها اريد اروح الحمام ..
اخذتني هي لاول مره تسويها ورجعتني نيمتني وطلعت ..
كعدت ثاني يوم طبيعي بس مابيه حيل اروح بس ادري بابا يزعل اذا مرحت
ماما مكعدتني قلقت عليها رحت لكيتها نايمه بفراشها مثل الملائكة حضنتها ورجعت نمت ..
محسينا الاع دكت عمتي وجدان ..
تصيح ع ماما يلا خاتونة رجلج اتصل ويكول جاي باجر ..
لشوكت تخلصينها نوم ..
ماما كعدت مستغربة الي ديصير كالت الي شجابج هنا وليش مرحتي المدرسة
ضاجت حيل شافت الوقت ب 12 ..
وكالت راسي ثكيل ليش هيج نمت اني نومة ومابية  اكوم ..
ريحانة اني هم احس مثل احساس ماما مابيه حيل وجسمي ثكيل ...
عاد هي اخذتني سبحتلي وبدلت الي ومشطلتي وكالت انتظريني اسبح حتى بلكي اصحصح ماعرف شكو
كملت ماما ورحنه لبيبي .. جانت تصلي الظهر
بوست ايدها ماما وكالت الها اعذريني خاف طولت بالنومه ..
بيبي : لابنيتي كلنه كعدنه متأخرين بس وجدان كاعدة من وقت ومطلعة جهالها للمدرسة وجتي رادت تكعد ريحانة لكتها يمج عافتكم كالت خل يرتاحون .....
امي : اي يوم هسه اجهزلج شي مشتهية شي ..
بيبي : لابنيتي حضري (الكاتبة ام جوليا)نفسج بس لان احسان جاي باجر واني اريدكم مثل قبل واحسن واريد اشوف بعد وليد منكم ...
خل تاخذج وجدان وشوفي شنو تحتاجين من السوك وروحي للصالون ورتبي نفسج جنج عروس ..
امي : بس يوم ميصير مطلعت السنة مال محمد ..
بيبي : انتي شعليج اني امه لمحمد واني داكلج روحي عدلي نفسج لمنو غير رجلج وعود غيري لبسج بالغرفة بس منا لحد متطلع السنة
وقبل متطلع السنة اني اريد اسمع بحملج ..
الله يرضى عليج ..
امي : صار تأمريني انتي وكله بايد الله بعد ..
ماما اخذتها عمه وجدان وطلعو ...من العصر لليل الا اجتي ماما
صادف يوم خميس وباجر جمعة ..
جتي ماما وطالعة كانها لعابة كاصة شعرها ومخلصته خصل ذهبية ووجهها مورد ومحملة غراض الي والها ولبيبي وحتى لوجدان وجهالها جايبتلهم وشفت الفرحة بعيونها
وبيبي فرحت لفرحتها وكالت الها اي عفية عليج بنيتي اريدج ترجعين الفرحة لوجه احسان وللبيت
..
ماما بوست ايدها لبيبي وكالت الها ادعيلنا بدعائج النه نرتاح ونصافى ...
تعشينا ونمت اليوم بحضن ماما فرحت بشكل ماما وتغييرها ردت بابا يرجع مثل قبل النه ...
وصار الصبح والبيت كله كاعد ونشيط
كلنه جهزنا نفسنا وتحضرنا لشوفه حبيبي بابا ..
ماما لبست قميص اسود وتنوره واسعة كبس جان موديلها وقميص من فوك تول شفاف وحطت مكياج خفيف واني لبست فستان ماما مشتريته الي لونه ماروني وبيه ورد ناعم ابيض
وطلعنه مثل الاميرات منتظرين حبيبنا بابا ...
بابا بال 2 الظهر (الكاتبة ام جوليا )دخل واول ماتوجهه لبيبي حضنها وبوسها وشمها وسلم ع عمتي وجهالها واني ركضت لحضنه ابوس بيه واشمه ممصدكه بابا رجع شويه احسن من قبل بعدين انتبه ع ماما جان يصيح الها شنو مناويه تسلمين ..
امي اباوعلها ارتبكت وخدودها احمرت ...
تكله لاردتك تكمل واسلم عليك اجت تسلم عليه هو واكف حضنها وباس راسها ..
كال الها شطالعة اميرتي ... طالعة تخبلين بهالكصه ...
فرحت واطمنت انو العلاقة بين ماما وبابا رجعت تهدء وتستقر بينهم ...
ورجع بابا ينام بغرفته يم ماما ورجعت حياتنه تستعيد المحبة وعمتي بدت دترتب الفوك وتنتقل بيه بس بابا كال الها اني اشتريت بيت الج بصفنا وح افتح السياج وخليج بصفنا هي كيفت ماكالت لا...
بابا يتابع دروسي وفرحان بيه حيل ..
وماما محتارة تسوي اكلات وتدلل ب بابا ...
جنت اشوف ست حوراء يبين عليها الضيق من تشوف امي  مرتاحة او تجي تحجي وياها تعصبها وتروح امي تنطيها ورقة وهذي تاخذها وتروح مرتين بالاسبوع انتبهت عليها..
مرة من المرات بابا مجان موجود ..اسمع ماما تكلها كافي تركونا بحالنه الي تردونه مااسوي
... وشسوون سوو..
حوراء.. راح تندمين جيهان وتخسرين
ماما : متكدرون تسوون شي ..
واذا لحيتي بالموضوع حتى بعد اكطع رجلج منا
حوراء: سهلة ست جيهان يصير خير ...
ورا 3 ايام ،.
ماما كاعدة (الكاتبه ام جوليا)دتمشطلي وتبوس بيه وتغنيلي ومااسمع الاصياح بابا .... جيهان وينج ...
اني ارتعبت من الخوف ..
بابا دخل وعيونه حمر
وصاح ع امي اليوم موتج ع ايدي وبده يريد يضربها ..
شافني طلعني من الغرفة واني ابجي اكوله بابا لاتموت ماما ممسويه شي هو يكلي سكتي روحي لبيبي يلا ..
انطاني لبيبي وكال ماريدها تطلع من الغرفة لو شيصير ،..
بيبي تحجي وياه تريد تهدأه ماكو فايدة كللها محد يدخل ومراح احجي شي بصياح بيبي اخذتني حضنتني وتسكت بيه ...
جانت غرفتهم قريبة ع بيبي ومااسمع الا صريخ ماما وتتوسل بابا فدوة بس اسمعني والله مظلومة مواني والله
ومنسمع الاالتكسير والضرب وصريخ امي
توسلاته بقت بالساعة تسكت وترجع تصرخ من الضرب مال بابا بيها متحملنا عاد من سمعنا اكثر بيبي راحت تريد توخر ه عنها
وجان منظر بابا مخيف ايديه مدمايه وامي متورمه من ضرب وشعرها بالكاع وبابا لازم مكينه حلاقة ويحلق براس امي وبيبي شافت المنظر وكامت تصرخ ولك ياظالم شمسوي وتدك وتلطم اني انصدمت من الي شفته وامي فاقدة بيد ابويه صاح ب بيببي كال الها اطلعي لااصب عليها تيزاب واحركها بكاعها اباوع اني وكاني مو اني
شديصير اكو صور بالكاع لماما وهي بالفراش ويمها واحد مامبينه معالمه ...
اني دخت وكعت وماحسيت بعد بشي .....

وللحكاية بقية

كالعادة ماهي توقعاتكم ومارايكم بأحداث القصة ...
ولاتنسون التصويت والمشاركة والتشجيع منكم يسعدني ..
الكاتبة ام جوليا ...