رواية ساهر الفجر الفصل الحادي عشر 11 - بقلم الكاتبة شمس السعدي

مساء الحب والسعادة لعيونكم گليباتي 💕
//// البارت الحادي عشـر ////
#ساهـر_الفجـر ..
#الكاتبـة_شمس ..

فجر ..
انني فتاة ضائعة .. ابحث عن حب او حنان بين طيات الكلمات وبين مخارج الحروف من الشفاه..
حرمت مما هو اغلى شي في حياة يتيمة . تمنت ان تعيش بدفئ عائلة صغيرة ..
تبكي وتضحك تخطأ وتعتذر .. كل هذا بوجود من يرشدها اذا خطأت . ويمسح دموعها اذا بكت ..
ويفعل المستحيل ليرى ضحكاتها ..

كم اشتهيت ان اركض لاستقبال ابي عندما يعود من العمل .. وحضن امي الدافيئ عندما انام ليلا ..
فرحهم عندما اذهب للمدرسه واستقبالهم عندما اعود ..

انا الان فتاة شابه .. لكن في داخلي فراغ كبير يفتقد لحنان امي وابي اللذي لم احصل عليه ابدا ..

ماانكر كانت جدتي تسوي كلشي لأسعادي .. وساهر كان مثال الاب الروحي الي ..

لكن ساهر ظلمني لما اخذ هذا الحنان والحب الي كنت اشوف بعيونه كـ حنان اب الطفلته . وحب طفله الابوها .

فجأة صارحني بشي ماكنت متوقعه بحياتي يصير .. حول الحب الي كنت احس بي اتجاهه الى حب مختلف تماما عن مافي داخلي ..

صحيح رفضته وجرحته .. لان ماردت تختفي العلاقة الابويه الي بينتها سنين وياه .
كنت اعرف هو ابن عمي ..
واحب اصيحله عمو .. حتى احس بحنان الاب والعم سويه .
عمامي ماكانوا يهتمون بي ..
وماشفت الحنيه منهم ..
خالات ماعندي . هو خال واحد مسافر خارج القطر .
وخالو عمار الي تركني عند بيت جدي وماسأل عني .

هذا كله خلق فجوة بعدم الثقه بالناس . لان الكل يمكن يتخلى عني بأي لحظة ..
حتى ساهر . اتخلى عني وقرر يحبني بطريقه ثانيه اني ماردتها. ولااريدها ..
حتى من اغار عليه من ايات . مو لان احبه حب عاطفي .
وانما احسها اخذت الاب الروحي الي ..
بعد ماكان اهتمامة وحبه الي بس ..
هسا احس صارت شريكة معاي بهذا الحب ..
مثل طفله يتيمة تحب ابوها . وابوها يتزوج ويجيبلها زوجة اب وتاخذة منها ..

اما كيان .. فكان رقيق وياي وصارحني بحبه وكلامة خلاتي احول مشاعري كلها بأتجاهه .
وخاصه بعد خالو فتحلي ذراعة وبيته الي ..
حسيت ممكن انه ابني حياة جديدة مع عائله تحبني وتعتبرني مثل بناتهم ..

لكن جدتي الوحيده الي تكسر گلبي وتگدر تأثر عليه ..
لان تعبت كثير الاجلي ومااتخلت عني حتى بأخطائي .
كان الكل يوبخني ويضربني وهي تحاميني وترشدني .

كانت تحمل طيبه بابه وحنيه ماما لهذا من اجت ترجعني للبيت ماگدرت اگلها لا .رغم اني مقرره ماارجع .
بس كلمة وحدة منها خلتني اتنازل وارجع وياها ..
دايما ادعي الله يحفظها الي . لان بعدها متأكدة محد يرحمني ..

بس من رجعت شفت الوجوه نفسها مااتغيرت .. حتى الي كان سندي اتغيير والي اذاني اكثر قسوته الزايده وعبالك واحد ثاني گبالي ..
بس مجبوره اتحمل الخاطر جدتي والى ان اخلص سادس ويخطبني كيان ..

ساهر ..
ليلتها مااتعشيت قهرتني فجر ..
نمت بعد مااتگلبت بمكاني بالدقيقه يمكن ثلاث مرات .
صابتني بقلق وشلة الحال وراحت ..

ثاني يوم ..
طلعت للشغل بسرعه ومن غير مااشوف اي احد ..
حتى جدتي متعود اسلم عليها قبل مااطلع هالمرة ماشفتها ..

كملت شغليزكله ورتبت اموري ..
وخابرت الرعد ..
الو رعد .. ضايج ماتطلعلنا هسا للهور .
رعد .. اي والله هي مال هور ومشويات بهذا الجو ..
راح اخابر ع الولد وارجعلك خبر ..

باوعت الجهازي ماهر بالانتظار ..
گتله رعد يله سدة انت لان ماهر جاي يتصل ..

ردت على ماهر ..
ياهلا بأخوي الغايب ..
ماهر .. هلا بيك .. شلونك وين انت .
ساهر .. بالمحل وراح نطلع للهور ..
ماهر ... عود عبالي اشوفك ..
ساهر .. انت هنا ؟؟
ماهر .. اي اجيت قبل شويه ..
ساهر .. تعال ويانا ..
ماهر .. لاتعبان غير مرة مابقى بس شهرين واخذ الشهادة وارتاح ..
ساهر .. ياالله بس خاف تتكبر علينا سيادة الضابط ..
ماهر .. ليش هي العين تعلى ع الحاجب ..
ساهر .. اروحلك فدوة ضلعي .. بطريقك شوف ذاك الصايع وين هالايام ماالگفة . لان الصبح اني بالمحل .
وهو دوامة مسائي ..
ماهر .. عامر ودخل ع الجامعه هاي اذا ماطلع يبات بيها
ساهر .. اني ادري عليمن طالع ..
ماهر .. اكيد ع الوالد گلبه مايسع وحدة ..
ساهر.. ولك لاتفضحنا شيخلصك من امي .. هي سالفه قديمة ولسا مجلبه بيها . دور تسمعك لاهاهي !!
ماهر .. اي بعلي ههههههه . يله روح خلي اسبح .
ساهر .. يله روح .ها خاف باجر التحق . المحل بأمانتك لان راح تجي بضاعه وانت تعرف للشغله ..
ماهر .. تدلل ..

اليوم گضيته كله بالهور ..
لليل رجعت . لگيت امي حايرة شمسويه من اكلات الماهر ..
وكالعادة عازمة بيت خالتي ام ايات ..
وعمتي بتول وهاجر وزوجها ..
وعمتي ابتهال وبناتها بس جايات ..
والاخ ماهر گام يحوس من شافها مايعرف شلون ينفرد بيها ..

سلمت ورحت گعدت يم ايات ..
-شلونج ايووو.
-بخجل مع ابتسامة .. زينه .
-طالعه حلوه ..
-ضحكت وگامت ..
عمتي ابتهال.. عمة خجلتها للبنيه .. اگلك ساهر شوكت نفرح بيكم ..

الكل جان گاعد .. هانت عمة ان شاء الله الاجازة الجايه .
امي .. صدگ يمه يعني هاهي نجهز ..
ساهر .. اي يمة جهزوا قبل مااجي بكم يوم اخبركم وتجهزون كلشي ..
والغرفه باجر تجي وانصبوها والنواعم امي تتكفل بيهن . بعد ماعدنا شي .
والتأخير مو حلو ..

محمود .. بالخير وليدي ان شاء الله طبتها خير علينا يارب امي گامت تهلهل ..
جدتي .. تعال يملعون خلي احبنك واخير راح اشوفك عريس ..
گمت بست راسها وحضنتها ..
#بقلمي_الكاتبة_شمس
..........................................
عمي حمزة .. بس استعجل لان اني ومريم الشهر الجاي نروح الايران ونطول هناك . اتزوج قبل مانروح .

ساهر .. ها نويتوا . الله يسهل ان شاء الله.
جدتي .. هيج يمة واشوفكم راجعين ومريتك حامل لأنذر طلي الوجه الله ..
حمزة .. ان شاء الله دعواتج تكفي يمة ..
مريم .. رحمة الله والديج عمة ..

عمتي بتول .. هاي الاخبار الحلوه . الله يكثر افراحنا دووم ..

طفر ماهر .. واني بقى شهرين واتخرج ماتزوجوني وافرحوا بيه هم . .
امي .. اي يمة يوم المنى اشوفكم اثنينكم بنفس اليوم . بس گول واجيبلك احلى وحدة ..
ماهر .. لا يمة الي اريدها موجوده وحاط عيني عليها ..

جدتي .. گول منهي ومن باجر اروح اخطبها الك وازفكم سويه ..

ساهر .. دخلص بالاول وبعدين فكر بالزواج واخزر بي . ماردته يستعجل ..

ماهر .. الي اريدها موجوده عند عمتي ابتهال .. واذا توافق من باجر اعقد عليها ..

ابتهال .. يايعمة منو قصدك ..
ماهر .. لينا ..
ابتهال .. بس عمة الامر والشور بيد ابوها مو بيدي . لو عليه اگلك گبع واخذ . بس لازم اخذ رأي ابوها واخوانها .

جدتي .. ولج شنو تاخذين رأي ابوها . ليش هو ماهر يتعيب باجر يصير ضابط والف من تتمناه ..

ابتهال .. اي يمة بس انتي تعرفين عمار . ومهما يكون لازم اخذ شورته ..

ابوي ماعلق ولاحجة وگام من غير ولاكلمة... بس حسيته ماراضي ..
وامي بس تستغفر وتأفأف ..
والكل كان مرتبك ..
الا الثنائي ماهر ولينا .. كانت عيونهم مليانه فرح وعبالك راح يتزوجون باجر ..

من شفتهم هيج اخذت وعد على نفسي لو مهما يكون لازم اجمعهم سويه ..
لان اني ضايگ لوعة الحب طرف واحد والفراگ ..
فكيف الحال همه واحد يحب الثاني وحرام يفترقون .

بعد ماخلصنا عشا وكل واحد راح البيته .. صار الي توقعته ..

صاح ابوي ماهر ..
ولك انت شلون من غير ماتشورنا تخطب بكيفك ..
ومالگيت الا بنت عمار ..

نعيمة.. هي هاي الناقصه اجيب جنة من هاي الترثة ..
جدتي .. وشبيها ترثتنا . مو جبتي من ترثتكم مرة شو ماحجينا . لو حلال عليج وحرام على غيرج ..
نعيمة .. عمة جا انتي تجيبين بنت الاختي البنت عمار نسيتي شسوه بينا .
هو اخته وماانطاها لمحمد الا بالگوة ..
جا بنته شلون . الله وكيلج يذلنا وماينطيها ..

محمود .. واني شمالي واطلبها منه لو تبقى بس بنته بالكون مااخذها ..

جدتي .. وشبيها بنته . شو ثگيله وحلوة وخريجة وماناقصها شي .
واذا تخافون تنذلون اني اروح واخطبها بيدي الماهر ..

ماهر .. يمة اروحلج فدوة ريت الجدات كلهن مثلج .
نعيمة .. وامك شبيها . لو لان تريد مصلحتك ..
ساهر .. يمة ماهر جبير وواعي ويعرف مصلحته. تدخلتي بحياتي وخطبتيلي برغبتج ..
اتركي ماهر يختار الي يريدها .. مو انتي الي راح تعيشين وياها هو الي يخلص عمرة وي انسانه مقتنع بيها ومايندم بعدين ..

امي .. بكيفكم سوو الي تردوه . بس اذا عمار انطاها الكم تعالوا عاتبوني ..
هو من اخذنا الفگر ازاد ذلنا دور هاي ..

انتبهت ع فجر شهگت ..
صحت ..يممممة شنو هالحجي ..

فجر ..عمة مااسمحلج تحجين على امي هيج ..

بذيج الساعه حسيت بوجع كلبها وحرگتها . لان تفرفح ودموعها تنزل ..

اشبيها امي .. خلصتي عمرج من اني صغيره لسا تعايريني بيها . شنو سوتلج ليش تكرهيها .
مو صارلها سنين جوة التراب . بيش مأذيتج ..

محمود .. كافي فجر روحي للغرفه . عمتج ماقصدها شي ..

-لاقصدها .. ادري بيكم كلكم ماتحبوني كلكم تكرهون اهلي ومااعرف السبب شنو ..
تلوموني دوم اني كتلتهم . بس الي كتلهم انتو ..

لحد هاي اللحظة واني افكر .. ليش خلصتوا العمر كله وانتو تحت سقف واحد وماافترقتوا .
ليش بس ابوي بعدتوه عنكم ..
شنو الي خلاه يعيش وحدة . لو شايف منكم محنه . كان بقى عايش وياكم . وماكان بنته الصغيرة لعبت بالطباخ وحرگت اهلها .
كان اكو واحد نقذهم ..
كان احد شاف بنته ومنعها ..
مو ذنبي ماتوا اهلي . بس ذنبكم وانتم خلصتوا عمركم تحجون عليهم ..
وهو كان اصغر واحد بيكم ومحتاج حنانكم ..
مثل ماسويتوا باهلي دتسوون بيه ..
بس لهنا وكافي . بعد مااسكت ..

محمود .. والله طايل السانج بنت محمد . يله فوتي للغرفه گومي ولي ..

گامت للغرفة .. وجدتي جانت تبجي على كلامها ..
-كله مني اني دللته اكثر منكم لان جان مريض واعتنيت بي اكثر منكم ..
جان بي سكر من هو صغير ولازم واحد ينتبهله. .
بس انتو گلوبكم قاسيه على عمامكم ..
الي اتبروا من سلطان لان اتزوج سنيه ..
ابوكم جان فقير وطيب وماحقد عليهم وشگد راد يتواصل وياهم وهمة منعوه حتى من ورثه ..
وگدر يبنى روحة شويه شويه وصارت عندة محلات خياطة مشهوره بالمحافظه .
الحجي سلطان لسا انتم عايشين بخيره بس محد بيكم حامل صفاته .
غير بس محمد وساهر .. ذوله الي اشوف بيهم سلطان ..

بيومها جدتي تخربطت لان فرفحت هواي ..
جبتلها المضمد بسرعه . قاس ضغطها مرتفع .
ضربها ابرها وخلالها مغذي ونامت ..

بقيت سهران يمها اني وفجر .
والكل سكت ومحد فتح موضوع ماهر ولينا ..
#بقلمي_الكاتبة_شمس
....................................... .
اباوعلها ومستغرب .. شنو انتي سلطانه فخريه .
مايلام جدي من حبج وترك عشيرته وبغداد علمودج .
لانج اصيله صبرتي عليه وبنيتوا حياتكم وحدكم من غير معين . وفوگ كل هذا مايوم حسينا انتي سنيه ..
كانت تزور الائمة اكثر منا .
ومعلوماتها عنهم قويه من جانت تقصلنا قصصهم ..
ااااه هيج حب سلطان متغلغل بيج حتى بمعتقدة ..

باوعت الفجر تبجي .. كله بسببي لو ماحاجيه اني مافرفحت وانقهرت ..

ساهر .. لاتلومين نفسج . ماگلتي الا الحقيقه .. اتعلمي لاتسكتين عن حقج .. ولاتخضعين للي يدوسج ويطمس شخصيتج ..
بس الي قاهرني .. دايما من تحجين تجمعين الكل .
كلكم تكرهوني .. وكلكم عذبتوني ..

يعني افهم من كلامج كلنا مشموليين ..
بس اعتقد اني وجدتي وبنين وماهر ومريم هم مايوم سمعت واحد جرحج لو اذاج ..
اتركينا كلنا . بس مااسمحلج تنكرين تعب وسهر جدتي الج ..

فجر .. ماقصدي من حرگتي حجيت .. وجدتي لو اموت مااوفي حقها وحقك ..
ماتشوفني ابجي عليها . اني بلياه مااسوه شي . بلياه اتدمر ويمكن اموت ..

ساهر .. اسم الله لاتحجين هيج حجي .. قصدي على جدتي لاتوالفين الها ..
اني راح اگوم انام كم ساعه وراي گعده من الصبح التحق اذا صار شي اتصلي عليه بسرعه .
موبايلي راح اخليه يم راسي ..

هزت براسها من غير ماترد ..

كان يوم متعب كلش .. بحيث نمت من التعب ماحسيت الا ع المنبه الساعه خمسه الفجر ..
گعدت سبحت وصليت وبدلت ونزلت ..
شفت اني گاعده .. محضرتلي متاع والجاي ..

صباح الخير يمة ..
-هلا يمة عود هسا ردت اصعدلك عبالي نايم بعدك ..
-جدتي شلونها ..
-زينه هسا شفتها .
-اروح اشوفها بسرعه . صبي الجاي بين مااجي لان مستعجل الولد راح يمرولي ..
-جا ماتتريگ ..
-لا مااشتهي .

رحت الغرفه جدتي .. شفتها نايمة .
وفجر گاعده بالگاع ومخليه راسها يم ايد جدتي ع السرير وغافيه ..

سحبت بطانيه من النضده وغطيتها بهدوء ..
مهما تسويلي گلبي بحياته مايبطل يحن عليج . حتى اذا نسيتج وعشت حياتي ماراح اگدر اشيل ايدي عن حمايتج .
بست راس جدتي وطلعت . شربت الجاي وبست اني وطلعت ..
الطريق كله غافي ماشبعان نوم ..
ورايح للساتر وسهر الليل كله معناها ماانام ..

مرت حياتي بالمقر كله ع الساتر ومخلين ارواحنا بقوطيه مثل مايگولون ..
هواي تصوبوا من عدنا هالمرة ..
واضطريت ابقى وماگدرت اخذ اجازة .. حتى استحي اطلب وجماعتي كلها تصوبت ..
جنت مقرر اسبوع وارجع علمود نحظر للزواج ..
بس طالت المدة وامي كل يوم تخابر .
وها وين صرت ووين صرت .
وايات تدزلي صور الغرفه شلون نصبوها ومرتبتها وفارشتها ..
وفاجأتني من گالت كلشي كامل بقى بس العريس هربان مايجي خاف يتزوج ..

-شنو هالحجي .. شگالولج جبان مو رجال ماعندي كلمة . يعني اذا الوضع مگلوب هنا .ترديني اعوف كلشي واجي اتزوج وافرح .
وانسى جماعتي الي واگفين ع الساتر والي تصوبوا والي استشهدوا ..

-ماقصدي ساهر شبيك جاي اتشاقه .. حرام يعني ؟؟
-لاموحرام . بس فكري بالكلام قبل ماتطلعيه ..

بيومها انغثيت حيل . والاكثر غثني ماهر بأتصاله ..
رجل عمتي رافض ينطيه لينا .
وجاي الابوي وگايله تحلمون انطيكم اضفر منها . ماعندي مرة الكم . انطيتكم مرة وماقدرتوها وحافضتوا عليها
شلون انطيكم مرة ثانيه . حتى احظر فاتحتها بعد كم شهر ..

يعني الوضع زاد بله .. وخاف ابوي جان معاند . هسا لو يشوف ماهر يموت گبال عينه هم مايخطبها اله .
وجدتي مريضه مانگدر نضغط عليها ..

لهذا گلت الماهر ..
خويه سد الموضوع فترة ويصير خير . بلكي جدتي تصير احسن واخذها واروح اني اخطبها الك..
گدرت اخليه يهدأ شويه ..

اتصلت على امي وطلبت منها تحاول تقنع ابوي ..
-يمة اني شلي غرض ابوك مايقبل وعمار تجاوز هواي شلون ترضاها على ابوك يذل روحة ..
-مااعرف يمة . شلون سويتي الي براسج وقنعتي الكل بأيات واني اولهم ..
تقنعين ابوي . والا انسي اتزوج ..
من سمعت كلامي ..
اتراجعت ..
-لايمة والله وروح ابوي اني اقنعه الك بس مو هسا خلي يهدأ شويه . بس انت اوعدني اتمم العرس على خير .

قريب اجازتي ..
خابرت امي وگلتلها تجهز كلشي راح انزل اجازة بس مو طويله اسبوع واحد بلگوة اخذته لان الوضع متأزم ..

من رجعت لگيت مگلوب گرايبنا كلها هنا . والنسوان يهلسن بالدجاج ويخلن بالمجمدة ..
حتى الذبايح موجوده ..

عبالك اليوم العرس ..
اول مادخلت اشتغلت الهلال والرگص ..
وفتح عامر الديجي .. سوالي واهس وگمت ارگص وياهم واضحك ..
بالصدفة صارت عيني عليها ..

اضحك واباوعلها .. كانت گاعدة ع الدرج ومخليه اديها ع خدها ..
وصافنه بعالم ثاني مااعرف شبيها ..
جنت ارگص واحاجيها بگلبي بلكي تسمعني وترد عليه ..

حتى لو أحببت بعدكِ مجدداً ،،
سيبقى حبي لكِ أمراً بديهيا
هل تعتقدين بأن الأم التي فقدت طفلها
و أنجبت غيره ستنسى وليدها الأول ؟!
اطمئني يا طفلتـي فحبكِ مخلدٌ في صدري
لكنّ كبريائي اقنعني بالرحيل ....

جدتي جانت گاعده ع القنفه وتهز بعصتها ويانا ..
اجيت بست راسها ..
شلونج يروح ساهر ..
-هلا يروح جدتك . بس بطل جذب بعد كم يوم تتزوج وتجي الي تاخذ روحك .وتنسى جدتك ..

ضحكت ضحكة طويله .. اول مرة ادري بيج تغارين عليه .
-ولك شلون مااغار واني اشوف سلطان گبالي ..
-لو عشر نسوان اخذ محد يغريني عنج تبيقين انتي الاصل وحضنتها ..
لمحت ابتسامة فجر وهي تباوعلنا .
ضحكتلها ..

رحت يمها شبيج ..
ها مابيه شي ..
-اشوفج صافنه ومهمومة احد غاثج ..
-لاتحلل من كيفك گتلك مابيه شي. اروح يم البنات بالمطبخ .
انهزمت مني وعبالك عندها شي خافيته عني وخاف اشوفها وتفضحها عيونها ..
هينه يفجر . باجر عگبه اعرف شنو بيج ..

صبوا غدا .
گال ابوي .. ساهر البنيه مكمله ورايحة الصالون .
باجر ثلاثاء الخميس العرس ماانأجل ..

-هاهي ياابو ساهر . تآمر . بس انطوني اليوم وباجر ارتاح واشبع نوم والي تردوه يصير ..

عمي حمزة .. عند عيناك ابو السواهر . اشبع نوم وارتاح وهاي الولد كلها المن نريدها ..
بس هااا نريدك ترفع راسنا الخميس مو تگول تعبان واريد انام ..

-ههههههه ها عني بدت رحمة الله . واني اگول شعجب ساكت لسا . اروح انام احسن الي ..

صعدت للغرفه . شفتها غرفة ثانيه مو غرفتي ..
ريحة اخشابها وعطرها يسحر ودور باردة ..
خلتني انام مااگعد النص الليل ..

ثاني يوم طلعت للمحل سويت جرد للبضاعه وتحاسبت وي عمي وكملت شغلي ورجعت للبيت .
سويت قائمة بجماعتي وبديت اتصل عليهم كلهم واعزمهم للحنه ..

خابرتني ايات كم مرة . اني احجي وياه اغفى من غير ماادري وحتى زعلت مني عبالها اتعمد ..

-شبيج زعلتي والله تعبان هناك عبالج نتام نرتاح واليوم خلصته بالمحل شغل ورحت للسوگ اشتريت احتياجاتي وقاط ..
لازم تعذريني وكلها يومين وراح تجين لهنا بعد لويش الزعل ..

عاد فكت شويه . مااحب المره الي تعبس وجهها وتضوج على اتفه الاسباب .
صحيح مااگدر ازعل وحدة منهن حتى اخواتي اذا اعيط عليهن ارجع اصالحهن .
بس بالمقابل مااحب النكديات والي كلساع يتزعلن .
وهاي الشغله كم مرة نبهت ايات بيها ..

بيوم الحنة جماعتي هزوا القاعة هز وسولي حفله ماصايرة .
وصدگ تونست وياهم ..
وبيوم الزفة . ايات رادت بالفندق .
بس اني ردتها بالبيت عمود جدتي طلبها تشوفني وهمة يزفوني الغرفتي وماگدرت ارفضلها طلب ..

ومن زفوني للغرفه اول مارحت الها بست راسها واخذت دعواتها وصعدت . للانسانة الي راح ابدي حياتي وياها واطوي صفحة فجر نهائياً..
#بقلمي_الكاتبة_شمس
يتبع... ..