رواية ساهر الفجر الفصل الثاني عشر 12 - بقلم الكاتبة شمس السعدي

هلا وغلا حبايب ..
//// البارت الثاني عشـر ////
#ساهـر_الفجـر ..
#الكاتبـة_شمس ..

دعينـي اعيش .. فقد شـابَ شعـري من كـثرة الانتضـار!

صعدت الدرجات وعمري كلـة يمشي گدامي ..
اي يساهر شحصلت من الانتضار غير بس شلة الحال .
كبرت وانت تركض ورى سراب ..

الي فوگ هي مرتك وراح تشاركك حياتك .. اتقِ الله بيها حتى الله يوفقك ..

اخواني وراي يدگون ويرگصون الى ان دخلت الغرفـة ..
ايات گاعدة على طرف الجرباية ومغشيه وجهها ..
اتقربت منهـا ..
گومتها بإيدي ورفعت الغشاوة .. بستها براسها ..

-من هاي الليله صرتي مرتي .. اريدج تكونين الي نعم المرة وماتخذليني .. ولاتخلين احد يدخل بينا ..
ادري مو وكت هذا الحجي .. بس لازم اگلج وخاف بيوم تگولين ساهر ماگال ..
وتدرين بيه طبعي مر .. اذا وفيتي وحبيتني وصرتي صادقة وياي .. اخليج على راسي وادللج ..
بس اذا تلعبين من وراي وشتگلج امي تسوين .. هنا يختلف الحجي .. وتشوفين غير ساهر الي واگف گبالج .

-تدلل . الي تريدة يصير وبحياتي مااكسر كلمتك ..
-ان شاء الله مايطلع منا بس الخير والطيب . ومانجرح بعضنا .. اذا تردين گومي بدلي واني راح اسبح واطلع بين ميجيبون العشا ..

دخلت جوة الدوش وافكر .. اصحى يساهر وانسى الراح راح وهاي مرتك حلالك . اذا تريد تنسى لازم تعاشرها وتحبها وتجيب منها الي يطولون نسلك .
انت مو صغير والوكت فات ع الحب والانتضار .

طلعت لگيتها مبدله ولابسه روب  ..
اتقربت منها . وهي كانت جريئة انطتني الدافع انه اتقرب منها برغبه .. ووووو💑.

بدلت دشداشتي البيضه ونزلت .
اول ماشافتني امي هلهلت واخواني يهوسولي ..
رحت الجدتي ..
عفية وليدي عفيه .. منك المال ان شاء الله ومنها العيال .الله يترس بطنها من الليله وتفرح گلبك بولد يشيل اسمك ..

اخواتي والكل اجه يسلم الا فجر . 
-ها فجر شو انتي مثل الواحد گاعد بجنازة . الي يشوفج يگول مافراحانه الي ..
-لا ليش مبروك الله يسعدكم ..

-يله جدة رايح للاستقبال اسلم على ابوي والولد .
دخلت سلمت على ابوي وعمي وجماعتي موجودين بعدهم ..
واكيد مافوتوا الفرصه واخذوني للحديقه وگعدوا يصنفون ويضحكون عليه لان كلي لمع هههههه .

اجة ماهر .. ساهر يله روح اصعد فشله تارك مرتك وصعدوا العشا للغرفه ..

دخلت لگيت امي وخالتي گاعدات يسولفن وياها ..
شافني گامن ..

ابتسمتلها يله نتعشا ..
رجعت امي فتحت الباب ..

-هاي يمة غير قابل هي مغارة عمو بابا ..
-هههههه لايمة بس گلت خاف تردون شي .
-لايمة مانريد هذا خير من الله . واذا احتاجينا شي اخابر ع البنات انتي روحي نامي تعبتي ..

-يايمة هم اصدگ تغمض عيني من الفرح ..
-الله يكثر افراحج يمه ..

تعشينا وكملنا شالت الصينيه ..
-وين شايلتها ..
-انزلها ..
-وهيج تطلعين ..
-لتبسه روب شبيها ..
-وهو هذا روح مفتح من القارات السبعه .. باعي ايات بغرفتج هنا حرة شتلبسين عسى ما تبقين بلا ملابس. 
بس برة هذا الباب مااريد غير الگلبيات لو الدشاديش واذا تراكات عندج طوال ومستور هم ماامانع .
بس لبس ضيگ ومامحتشم مااريد فاهمة ..

-مو فجر تلبس تراكات حصر ودشاديش ربع شو ماتحجي عليها ..
-اللهم طولج ياروح .. ها ايات بدينا .. اشتغلت تأثيرات امي . جا اني شسولفت وياج قبل شويه ..
لاتحطين گبالتج وي فجر ..
فجر هذا بيتها ورابيه بي وكلهم بحسبة اخوانها واهلها ..
وبعدين انتي بعمر فجر . معلمة وواعية لازم من غير مااحجي انتي من أذاتج ماتسوين الغلط ..

-هاهي الي تريده يصير . حجتها ودارت وجهها وگعدت ع الجربايه ..

اتنهدت .. اتقربت منها . ايات الخاطري اذا تحبيني بطلي سوالف النسوان مال زعل والمشاكل مااحب هاي السوالف امي لو ماامي والله يحاسبني عليها جان هجرتها من سوالفها ومشاكلها ..
يله لاتگلبين وجهج عاد هاي اول ليله النا . وبعدهي بأولها ..

ضحكت وباوعتلي .. ساهر احبك ..
صفنت بوجهها متفاجأ .. هاي الكلمة كنت منتضرها من زمان بس من غير شخص ..

ابتسمتلها وگرصت خدها .. اروح اودي الصينيه واجي
اخذت الصينيه وطلعت بالصاله الفوگ ..
صحت .. بنين بنين ..

صعدت ..
-ها عريسنا رايد شي ..
-لا بس هاج الصينيه وجيبي دولكة مي وگلاص ..
-اي ثواني ..

سمعنا صوت امي عالي ..
-ادري بيها تريد تخرب عرس ابني حاقدة تغار ..
-ولج نعيمة انتي ماتكفين عن البنيه .. لو اجت بنت اختج واتقويتي ..
-بله عمة انتي دووم ماتنطين بيها .. بدال ماتگليلها عيب ومايصير تشجعيها ..

*ردت انزل افهم السالفه شني ..
لزمتني بنين .. لايخوي مو وكتها روح العروستك ..
-ولج ماتشوفين امي شنت الحرب ..
-ياحرب ليش هي جديده عليك مناگر امي وفجر ..
روح العروستك ولاتهتم . اذا نزلت امي تعاند وتكبر السالفه ومو حلوة بحقك ..
هسا يگولون عايف مرته وحاشر روحة بسوالف النسوان انت ادخل وجدتي ماتسكت هي تحلها ..

-راح ادخل بس شوفيلي السالفه شنو ..
-اي صار . اروح اجيبلك المي واجي ..
#بقلمي_الكاتبة_شمس
………………………… ..
دخلت بس ضجت حيل .
ايات .. شبيك ساهر اكو شي صاير ..
-لا ماكو بس يمكن انغثيت من الاكل ..
-سلامتك .. تعال ارتاح خاف من التعب ..
-ها اي هسا بس تجي بنين تجيب المي ..
-عود اني اگولمها تعال ارتاح انت ..

لا ماعندي شي .. اذا انام خاف انغث اكثر خليني شويه امشي ..
اندگت الباب فتحتها وطلعت ..
-ها شبيها امي ..
-سالفه تافهة . گايله الفجر اغسلي الگدور مال الطبخ بالطارمة ..
فجر گالتلها تعبانه مااگدر والگدور كبار ..
امي ماساكته گامت تحجي عليها وتگلها . همزين الله انطاني جنه نادرة الله ليعوزني الج ..
فجر ماساكته ورادتها ..
-اي لعد نزليها خليهن تغسلهن جنتج النادرة ..

وامي متخبله وگايمة تعيط والباقي سمعته انت ..
-هااااا يله انطيني المي وروحي انتي ..
-خوية بعد تفكر بيها . مايصير انت هسا متزوج .
-يعني مايصير اخاف عليها لان بنت عمي وربت على ايدي . لازم تخلون بيها سالفه . اذا تزوجت اشيل ايدي منها لو انكر وجودها بحياتنا ..
-لا خويه ماقصدي . بس علمودك احجي خاف تصير مشاكل من كثر دفاعك عنها ..

-روحي بنين من وجهي .. هاي عود انتي العاقله عليمن اعتب على براء وامي ..

رجعت للغرفه وتمددت ع السرير ..
-راح اطفي الضوه ..
هزيتلها براسي ..
طفته ولمحتها نزعت الروب واجت بحظني ..

خليت ايدي ع ظهرها وحضنتها رغم تعبان بس ماردت اكسر بيها ..
بس بسرعة غفيت وماحسيت الا الصبح والباب تندگ .
فزيت ..
واتفاجأت بأيات نايمة بحظني .. عبالك جنت احلم وصحيت .بس الواقع لامهرب منه .
حاليا متزوج واليوم صباحية عرسي .. وهاي مرتي الي نايمة بحظني ..
امي الله يهديها كسرت الباب ..
طفرت ايات ولمت روحها ..
همستلها . انتي ادخلي للحمام واني افتح الباب ..

فتحتها .. هايمة نسيتي اني تزوجت البارحة واليوم صباحيتي ..
-لايمة شلون انسى احلى يوم عندي . بس اجت خالتك وجايبه الريوگ تريد تصعدة ..
وين ايات گعدت ومدت راسها من الباب ..

-ادخلي يمة اذا تردين عادي لاتستحين ..
-ها لا خاف بعدكم مامتهيأين . من تخلصون صيحولي اني نازله ..

ضحكت على سوالفها .  والله ياام ساهر شوكت تبطلين سوالفج ..

طلعت ايات ..
-اجت امج جوة . اني راح اسبح بين ماانتي تبدلين .
كملت سبح سمعت صوت امي وخالتي .
شبسرعة صعدتن واني عود گلتلها من نخلص اصيحج ..

فتحت الباب شويه .. ايااات ملابسي وياج ..
جابتلي ملابسي وتضحك ..
ترى هنا امي ..
-اي سمعت صوتهن غير اكمل يله تگليلهن يصعدن .
-مو اني خالتي صعدتها ..
-يله ماصار شي .
بدلت وطلعت . سلمت على خالتي وباركتلي . گلتلها اني نازل جوة .
خالتي .. يا مو هذا الريوگ جبته الكم .
ساهر .. اي شويه واصعد بين ما تكملون ..

نزلت هلهت مريم .. ولمت الدنيا عليه . الكل كام يهوس وعامر وماهر يرگصون ومراد هم جاي من الصبح .

جدتي .. هلا يمة صباحيه الخير ان شاء الله.  تعال هين جدة تعال خلي ابوسك ..
بست راسها واديها ..

-عجل وين مريتك ..
-فوگ يم امي وخالتي ..
-وهاي امك شعندها مگابلتكم ماتگول عرسان جدد . ولاتفهم ابد واليكتلني ماادري شلون جابت هالزلم جنهم اسود .. وهي… ..
-ها جدة بدينا .… 
-لايمة عليمن بس سوالف امك تغث . اسألني اني .
لو شايف بأول عرسها .
جانت تقفل الغرفه على ابوك وماتخليه يطلع حابسه الرجال بالغرفه تگول ماشايفه .
وهسا حسبتلها كل ساعه وصعدت لفوگ وهاي عود رجليها توجعها ..

الظاهر جدتي حاميه على امي وماتخلص السالفه .
گلتلها جدة اروح للاستقبال يم الولد فشله .
وانهزمت . وين مااروح تلاگيني المشاكل ..

فرشوا السفرة للولد وصبوا الريوگ .
گعدت وياهم انقش ومااحس روحي الا شبعت ..

شويه وصاحوني بالبيت رحت ..
-يله يمة روح تريگ وي مريتك عيب تعوفها وحدها .
-وانتن هستوجن ذكرتن مرتي وعيب . صارلج ساعه فوگ مافكرتن وگلتن عرسان جدد .
بس اريد اعرف شعندجن وعد بلفور ونسيتن اروحتجن .

-يايمة امها اشتاقتلها وتريد تشوفها قابل اطردها .
-وامها وين عمها غير البارحة يمها . وبعدين هاي مو سوالف خالتي ..
-لاسوالف امك مو .. نعم الله عليك هاي زوجتك افرح بيك طال السانك عليه ..

عاندت بيومها وماصعدت شگد توسلت امي . گلتلها شبعت اكلت وي الولد .
وراح يجون جماعتي مااگدر ..
وصدگ للظهر اني بقيت بالاستقبال ماصعد ولاطلعت للصاله حتى .
اذا اريد شغله من باب المطبخ اطلبها وارجع ..

طلعت للحديقه اشرب جكارة .. وسمعت طگطگة بالممر .
-منو .
-ها اني .
-شتسوين ..
-مااسوي . رحت ضميت الگدور بالمخزن ورى البيت ..
-وشبي شكلج مخطوف ولونج اصفر ..
-مابيه ..
رادت تروح لزمتها من ايدها. 
شنو هذا الوراج طلعيه ..
-ماكو شي شبيك موبايلي بيدي.
-جنتي تخابرين المن .
-مااخابر بس كنت مخليه السماعات اسمع بي اغاني .
وبعدين انت ليش تتدخل مو گلت معليه بيج وماتهميني شرايد مني روح المرتك خطيه من الصبح گالبه وجهها وعينها ع المطبخ ..

عصرت اديها حيل .. فجر لاتختبرين صبري اكثر .. ومرتي معليج بيها ولاتحتكين بيها فاهمة ..

-اخ ايدي اذيتني وخر عني شعلية بيكم.
وي عصرت ايدي سحبت الموبايل منها ..
-هذا بعد تحلمين تشوفيه .. ماطلع عينج غيره ..
-ساهر جيبه لاتعصبني . انطيني موبايلي ..

جانت تتمرجح وتحاول تاخذة واني رافعه عنها وهي ترفع برجليها حتى تاخذه ..
السالفه حلتلي وحبيت اشلع گلبها ..
ويمكن تقربها مني الهاي الدرجة وهي تحاول تاخذة حركت مشاعري من جديد ..
اتقربت عليه حيل وگمت اخذ نفس قوي حتى اشم ريحتها ..
بس من حسيت على روحي وشفت تقربها مني راح يأذيني ويأذيها ..
دفعتها حيل ع الحايط ..
#بقلمي_ال
هاج اخذيه وولي من وجهي . ومااشوفه بعد بأيدج والله اخذه واكسره واتحلمين تشوفين موبايل بحياتج ..
اتعصبت عليها وحجيت بنتر وياها وتركتها ورحت ..

فجر .. والله ياربي. خبل ساعة زين وساعه يتخبل عليه .
اووووف ياالهي ارشدني الطريق الصحيح وريحني ..

دخلت للبيت .. گعدت يم جدتي ..
وجاي اسولف وي البنات . بس كلما ارفع عيني اشوف ايات تريد تاكلني بنضراتها ..
تركت الصاله كلها ودخلت ..

شفت كيان خابصني بالمكالمات .. واني مسويته صامت
خابرته ..
-الو وين صار ساعه اتصل ..
-تدري عرس وهوسه ..
-هاااا واخيرا تزوج استاذ ساهر واخلصنا منو .. اگلج حبيبتي شسويتي ع الطلب الي گتلج بي ..
-كيان صعبه مااگدر ..
-خلص فجر براحتج . ادري بيج ماتحبيني لو صدگ تحبيني مثل مااني احبج عجل مارفضتي طلبي ..

اوووف زعل بعد شيراضيه .. اي احبه صحيح بس ديجبرني على شغلات مااگدر اسويها ..

ساهر .. للظهر صعدت شفت ايات تحجي بثكل ..
اتقربت منها . شبيها الحلوة ضايجة ..
ايات .. ضايجة لان زوجها تاركها من الصبح لسا وماسأل عنها . حتى ريوگ مااتريگت بسببك ..

اخذتها الحظني .. اعوضج بالغدا شتگولين . اي ياعيني غير جماعتي وخطار يجون قابل اتركهم وادخل ..
بقت تدلل عليه الى ان صالحتها وراضيتها ووووو💑

سبحنا ونمنا حتى بدون غدا للعصر يله تغدينا ..
بقيت ثلاث ايام ورى العرس يله التحقت ..
وشفت بيهن انواع الدلال والزعل والغيرة الي عند النسوان ..

والله ساعات اگول لو باقي عزابي احسن .. الرحت للمطبخ اجت وراي واذا رحت يم جدتي تجي تركض قبلي وتگعد تگابلنا .
اعرفها تغار من فجر ولان فجر تنام وي جدتي هي واخواتي .. فساعات احس ايات راح تسكن الغرفة .

عمي حمزة ومريم سافروا الايران للعلاج . والبيت بلاهم وحشه .. وخاصه المحل كنت مأمنه عند عمي وهسة اضطريت اوكل عامر عليه .
ولو ادري بي مايضبط الشغل بس وصيت محمد الي يشتغل وياي يخبرني اول بأول ..

ماصدگت التحقت وارتاحيت ..
الجماعة هناك ماقصروا وياي ولان عريس جديد ماخلوني اطول . رجعت بعد اسبوعين ..
ومازالت الحرب مستمره ..

دخلت شفت فجر وايات يتعاركن ..
شكو ياساتر ..
ايات .. فجر تعاند اگلها لاتنضفين الطابق الفوگ وهي الا تصعد .  والصراحة اخاف منها لاتسويلنا شي
فجر .. خبله شلگيتيني النهار كله عند ام عباس واسويلكم ايات .. ماادري يجوز كلشي يصير . وهسا صارت كلها ع الموبايلات ..

فجر تصفگ بيدها .. لاحول ولاقوة الا بالله.  انتي مو صاحيه وشعندي وياكم واسويلكم .
قابل كاتلتني الغيرة لو عنست مثلا وفاتني القطار .
الحمد لله بعدني صغيره والف واحد يتمناني ..

صحت بيها بعلو صوتي .. كافي ولج انتي وياها ماتحترمن واحد صار ساعه واگف ولاوحدة تحترم.
لو باقي هناك احسن ..

امي .. هلا يمة هلا وتخزر بأيات . تعال ادخل .معليك بيهن شويه يتعاركن ويردن يتصالحن ..

ساهر .. والله ماشوفهن متصالحات دگول حرب عدهن .
وين جدتي ..

جدتك جوة تصلي .
طلعت گبل للشغل لان محمد خابرني وگال عامر مايعرف للشغل ومايخليني احجي ويتصرف بكيفه .

رحت ولگيت الاخ يجامل براسي وبحلالي .. وياهو يجي من جماعته يبيعله بنص السعر.  خلاني اتخبل .
وتعاركت وياه وزعل ..
معناها بهاي الاسبوعين كل ربح ماكو . بقيت فترة واگف بمحلي . وحتى للبيت ماارجع بس بالليل انام .
حتى اعوض خسارة المحل بسبب عامر الي حتى مصرفه مطلعه مني ..

هذا الشي خلى ايات تضوج وتتذمر والصراحة حقها لان بعدهي عروس وماشافت شي وحتى ماطلعنا ولازرنا ولاسافرنا ..

بعد فترة من التعب والشغل رجعت للبيت بالليل ..
وشفت ايات محظرة ومبدله ومسويه كيكة وشموع ..

اتفاجأت .. خير ياطير معقوله عيد ميلادي واني ناسي .
لا بعد وكت العيد ميلادي اني بشهر 11

بوستها ..
طالعه حلوه والترتيب حلو عاشت ايدج ..
-تعرف شنو المناسبه ..
-مو تزعلين اذا گتلج مااعرف . لان لاهو عيد ميلادي ولاعيد زواجنا صار شهر من تزوجنا. 
هااااا لان صار شهر الزواجنا سويتي كيكة ..

-هههههه لا . علمود هذا . وطلعت تحليل ..
-شنو هذا .
-اني حامل ..
-من گالت هيج بقيت صافن بوجهها مااعرف افرح ولا شنو . بس اي لازم افرح.  هذا الطفل الي كنت انتضره واخيرا راح يجي طفل يشيل اسمي ..

ضحكت وحضنتها .. ان شاء الله تگومون بالسلامة انتي وياه ..
بس شوكت رحتي ..
-العصر اني وخالتي . جنت شاكة بس حبيت اتأكد .
خطيه خاله فرحت ورادت تبشر بس اني منعتها . ردت انت اول واحد تدري ..

-يعني جدتي ماتدري ؟؟
-لا ..
-شنو لا المفروض السلطانه فخريه اول وحدة تدري ..
نزلت بلا وعي اركض الها حتى ابشرها ..
اول ماشافتني نزلت دموعها وفتحتلي اديها ..
عرفت امي سابقتني ..
حضنتها وهي تبجي .. واخيرا راح يجي سلطان الصغير
-ان شاء الله جدة .. بس واذا بنيه. .
-الحمد لله ع تمام الخلقه . كلشي من عندة نعمة.  بس عسا وان يقسملك الولد الي يشيل اسمك ودور اترسوا البيت بنات افرح من اشوفهن يفترن يمي ويبجن عليه من اموت ..
-العمر كله الج ان شاء الله  .
-اي اريد العمر بس الشوفت ابنك اوووف يساهر خلصت عمري كله انتضر اشيل ولدك انت وحمزة..

-اااخ ذكرتيني بعمي حمزه .. لاتگولولهم خطيه مااريد أذيهم الله يرزقهم ويجون يفرحونا ..

فجر .. من سمعت ايات حامل وشفت الفرحة بعيون ساهر وجدتي.  ضجت حيل ..
وحسيت بغيره من الطفل .. لان اكيد راح ياخذ مكاني وخاصه جدتي اخاف تلتهي بي وتنساني. 
تصرفاتي انانيه وطفوليه ..
لكني لم اشبع من حنانهم بعد!! 
#بقلمي_الكاتبة_شمس
يتبع……… .