رواية ساهر الفجر الفصل الخامس عشر 15 - بقلم الكاتبة شمس السعدي

مساء العسل حبايب💕
//// البارت الخامس عشـر ////
#ساهـر_الفجـر ..
#الكاتبـة_شمس ..

من اجة كيان وحجة بأشيأء تطلع ابن آدم عن طورة ..
تخبلت وماعاد اشوف من الغضب ..

باوعت الفجر ردت تگلي جذب رغم ان اثق ماتسوي هيج شي ..
خلت ايدها على حلگها وتهز براسها بمعنى لا وتبجي ..

ساهر .. انجب ياحقير لاتجذب فجر اشرف منك .. وگمت اضرب بي بالكوة سحبه مني مراد وماهر ..

كيان .. مو گلتلكم انطونياها احسن من الفضايح ماقبلتوا وهسا غصب عنكم راح اخذها ..
واذا ماتصدگني .. الدليل الحرگ الموجود من ركبتها البطنها ..

من گال هيج -اني اتهسترت ونزلت دگ بي ..
والعياط خبص البيت والتهينا نتعارك ومانحس الا فجر عاطت بصوت عالي ..
التفتت شفت جدتي واگعة بالگاع وحلگها اعوج ..

ركضت الها ..
يمة اگعدي شو ..
صحت .. ولك ماهر افتح باب السيارة بسرعه وشمرتله السويج ..

جيبلي عبايه بسرعه ..
لفيتها وشلتها ..
اجت وياي عمتي ابتهال وماهر ..

واني امشي اصيح خابرن ابوي يجي ورانا بسرعه ..
وانت يادون حسابك بعدين ..
صعدتها بحظن عمتي ..
وگمت اسوق بلا وعي ..

-عمة شوفيها تتنفس ..
-اي بس جامدة ماتتحرگ .. اووووف يمة سوده عليه ماجبتلج بس المشاكل لو باقيه هناك احسن الي شجابني وجبت وياي البلوه ..
لاهناك خلصانه ولاهنا ..

ماهر .. عمة مو وكته خلي تگوم جدتي بالسلامة وبعدين نحجي .
ساهر .. عمة لو مو تزعلين وحق الحق الا اخذ حقي من ابنج ثالث ومثلث ..

خزرني ماهر بمعنى اسكت لان عمتي بس تبجي ومقهوره اكثر منا ..
بس شتسوي اذا ابنها عار ..

وصلنا للمستشفى ركض ماهر جاب سديه واجة خليناها بيها وركضنا للطوارئ ..
اول ما فحصها الدكتور .
گال شاك جلطة بالدماغ بسرعه نحولها للانعاش ..

حولوها للانعاش ومحد دخل وياها بس عمتي واحنه بقينا ناكل بروحنا اكل على جدتي وعلى كيان الي فلت منها ..

شويه واجة ابوي وعمتي بتول ورجلها وولد عمتي .
واجة عمار ومراد . الدون مااجة وهمزين مااجة جان دخلته الانعاش بمكان جدتي ..

ابوي من شاف عمار تخبل وراد يهجم عليه لو مالازميه ومهدأيه ..
وگتله يابه هنا مستشفى وفشله .
بقينا منتضرين جدتي ونتائج التحليل والتخطيط ..

فجر ..
من اجة كيان يعيط ..
لزمني گلبي وحسيت راح تصير مشكله ..
وخفت يتعاركون ..
ومافهمت عمتي ليش تركض ورى كيان وتگله لاتهجم البيت ..

بس من گال اخذتها والي ومحد بعد ياخذها ..
حسيت عقلي انشل ومااگدر استوعب كلامة ..
شلون اخذني وشيقصد ..
واني حتى من يلمسني مااقبل ..
ولاخليته بيوم يتقربلي ..

ساهر صار دم من الغضب وعينه عليه .. هزيتله براسي وگتله لا ..
لان ماردت اي احد يتوقعني مو شريفه ..
حتى لو جان هذا الشي سواه كيان حتى يجبرهم يتزوجني .. بس مستحيل اقبل يشوه سمعتي ..
وخاصه من انطى مكان الحرگ ..
تخبلت .
محد شايف جسمي ولااثر الحرگ ..
حتى بنات عمي ماشايفاته ..
شلون هو عرف مكانه ..
تخبلت وحقدت عليه ..

دموعي تجري والعيون كلها عليه .
شفت جدتي وگعت تخبلت وگمت اعيط ..
ركضتلها ..
جدة گومي . جدة والله مامسويه شي . والله كذب محد لازم شعره مني . لاتصدگيه جذاب ..
اجة ساهر دفعني وحاول يحرگة گام يعيط ولفاها بالعبايه واخذها ..
بقيت مثل المخبله اركض وراهم للباب ..
حسيت روحي فقدت جدتي خلص وكله بسببي ..

اجة كيان راد يلزمني .. عطت بي ..وضربته على صدره
-انت اخر واحد يلمسني .. كله بسببك انت سويت بيها هيج .. ليش مو اني صدگتك . اكو واحد يحب هيج يفتري ع الي يحبها ..

سحبني وهمسلي .. غصب عني ماينطوج اذا مو هيج .
-اطلع منا ولي عني مااريد اشوف وجهك اطلع ..
طلعته وسديت الباب ..
ابجي واعيط ..
انسحبت من شعري ووگعت بالگاع ..

نعيمة ..كله منج يفگر الله لاينطيج عساج بالموت ..
ماجبتيلنا بس المشاكل ..

حبابه عمة خليني اروح وياهم ..
وين ترحين ولج وانتي الي سويتي هيج بيها .. من اگلهم انتي حيه محد يصدگ ..
مسويه روحج شريفه وانتي كل يوم ترحين البيت عمتج تنامين وياه وتجين ..
او يمكن ياخذج البيت لو شو وين الله اعلم .. بعد بنت امج انتي وكلشي يطلع منج ..

-كافي حرام عليج .. والله ماسويت شي والله ..
-ولج هي بيها شمسويه . حتى مكان الحرگ شايفه هاي وحدها تكفي ..
شحصلنا من امج الي قشمرت الاخوة ووگعت بينهم . هسا انتي هم نفس امج ..

بنين .. كافي يمة مو وكتها .. گومي فجر تعاي ادخلي . خلي نصليلها وندعيلها بلكي تعدي على خير ..

اخذتني بنين ودخلنا ..
لجوة ..
ايات .. اااااه يعني الي شفته الظهر حقيقي ومااتوهم ..
نعيمة .. شنو شفتي ..
ايات .. شفتها هي وكيان يم الباب وشايل دشداشتها ومدري شيسوون ..

من سمعت كلام ايات تخبلت . اكيد شافتنا من الشباك لان شباك غرفتهم مسلط ع الحديقه ..
بس الي حجته مو صحيح ..

-وج جذابه شنو شال دشداشتي .. والله جذب . راد يتقرب مني دفعته وطردته ماخليته والله كذب .
نعيمة .. وشدخله للبيت اذا كذب ..
براء .. تهي بهي . طلعت السالفه فالتوا وافلام ثقافيه .اي والله عشنا وشفنا ..
حتى بعد جدتي تدافعلج هي وساهر .. اكيد عرفوا طينتج شنو ..

-هاي شبيكم متصدگون .. والله ماسويت شي والله ليش محد يصدگني ..
باوعت البنين .. لزمت ايدها .. والله بنين صدگيني انتي مو مثلهم ادري بيج ماتكرهيني . والله ماسويت شي والله ..

بنين .. روحي ادخلي للغرفه وبعدين نسولف يله ..
دخلت الغرفة جدتي وقفلتها .ونمت على سريرها وابجي واشم بريحة مخدتها ..
ااااه جدة لاتعوفيني . انتي تمرضتي اكلوني اكل اذا رحتي عني شيصير بيه ..
صدگيني جدة مامسويه شي انتي تعرفيني ومربيتني
علمتيني الحرام والحلال قبل العيب ..

اتكسرت الباب ..
نعيمة .. افتحي ولج شعندج قافله الباب .. تردين تنتحرين وتبلينا .. موتي بعيد عنا .
يوم المنى الاخلص منج بس مو هنا وتبلينا ..

اتهسترت ..
فتحت الباب .. شتردين . وين اروح عنج . بعدهي جدتي عايشه وهيج تسوين اذا راحت شتسوين . حرام عليج عندج بنات تقبلين واحد يسوي بيهن هيج ..

نعيمة .. انجبي ولج . لاتجيبين بناتي على اللسانج النگس اشرف منج يعار ..
بناتي مايروحن ينامن للولد ويفضحن ارواحتهن .. والله زين منه كيان وراد يتزوجج اني منه مااثق بيج الي تنام وي واحد ممكن تنام وي عشره ..
والله ظلمناه للولد وطلع اشرف منج ..
#بقلمي_الكاتبة_شمس
….…………………………… .
-يله اني موشريفه . بس كافي عوفيني رحمة الاهلكم خلوني بحالي ..
والله مااسوي شي . بس اريد انام بسريرها هم هذا حرام ..

بنين .. روحي فجر . ادخلي معليج بامي ..
نعيمة .. ولج شنو معليج . ماسمعتي ابوج خابر وگال جدتج حالتها خطرة وبالانعاش ..
والله خلي تدعي ليل ونهار جدتها ماتموت . شيخلصها من عمامها . والله يذبحوها ويطمون عارها وياها ..

من گالت هيج .. اتخبلت ..
واتهسترت من سمعت جدتي حالتها خطره .. گمت الطم وابجي ملخت روحي تملخ ..
وهمة يتفرجون عليه ..
لو مابنين تگومني وتدخلني للغرفه جان اني لو ميته مالهم دخل بيه ..

خابرت لينا شگد اتصلت مارديت ..
خابرت بنين ..
حجت وياها شويه وسدته ..
گالت يردن يجن. وكيان مانعهن .. بالهن يم جدتي ..

مااهتميت واخذت شيلتها ع السرير اشم بيها وحضنتها ونمت ..
بنين تمسد بشعري .. فجر صارحيني كيان سوالج شي .
-حتى انتي بنين .. والله مالمسني ومايوم خليته يتقرب .
-وكلام ايات مو شافتكم من الشباك ..
-اي صحيح خابرني وگال عندي شغله وياج وعساس ساهر متعارك وياه ومهددة ..
ومن الباب حاجيته بس هو تمادى وراد يتقرب بس اني والله ماانطيته مجال دفعته وانهزمت للبيت .

-اوووف يافجر بعدج طفله وين ووين الحب والزواج وج اني خلصت جامعه وماانطيت مجال الاحد لان مااثق بس الي يجي ويدگ باب اهلي .
-كيان ابن خالي وابن عمتي ووهو يحبني ولگيت الحب والحنان عندة بعد ماالكل اتخلى عني ..
شتتوقعين اترك انسان طلبني للزواج وماكذب عليه .
-والله ماادري .. بس لاتصدگين واحد يحب من صدگ ويفتري على حبيبته لو يشوه سمعتها . او يحاول يطلب اشياء محلوة منها ويتقربلها ..

زدت بالبجي . شمدريني هيج يصير شمدريني .. بس والله اذا صار شي ع جدتي لو مهما كانت الاسباب الي خلته هيج يسوي بحياتي مااسامحه ..

ساهر .. بقينا ناطرين بالباب كلنا
والدكتور گال حالتها ماتبشر بخير وصار عندها شلل نصفي .هنا حسينا جبل وانهدم ..
لان جدتي جانت جبل الي احنه مستندين عليه واذا راحت نتطشر ومحد يلمنا ..

صارت ضجة بالمستشفى وابوي وعمار تعاركوا .
تالي بعدونا وگالوا مايصير هنا انعاش .. روحوا برة والمرافقة الي وياها تبلغكم بأي شي يصير ..
وهي اصلا راح تبقى نايمة وماتگدرون تشوفوها ..

گلت الابوي .. روحوا انتو اني راح ابقى هنا واذا صار شي ابلغكم ..
ماقبل ابوي .. بس رجل عمتي بتول گدر يقنعهم ..
واصلا عمتي ابتهال وياها ماقبلت تروح ..
الكل راح وگالوا من الصبح نجي ..

خطرت ببالي فجر .. اكيد ابوي وامي مايرحموها ..
صحت عمتي بتول ..
گلتلها عمة اخذي فجر وياج لان ابوي مايرحمها اذا راح خليها يمج بين ماجدتي تطلع بالسلامة ..

بتول .. والله يمة الولد من سمعوا تخبلوا ومتحلفين بيها وبي .. هسا خاف اخذها وتصير مشكله ..

ساهر .. تحجين صدگ عمة يعني معقوله تصدگين حجي هذا الدون الي لارباتنا ولاعاداتنا ماخذها ..
وتجذبين فجر الي ربتها الحجيه فخريه بيدها ..

بتول .. يعني انت مصدگها ..
ساهر .. ولاشكيت بيها .. واعرف هالعار گال هيج حتى يجبرنا نوافق عليه ..

بتول .. والله ماادري شأگلك . راح ابات اليوم عندكم علمودها .لان مااگدر اخذها وياي ..
ساهر .. ديري بالج عليها ..

هزت براسها وراحت ..
بقيت گاعد بره وجكاره ورى جكارة اريد النار الي بگلبي تطفى بس احس صار جمر ومااضن يطفى الا اادب هالدون هذا ..
واعلمة شلون يمس شرفنا بحجايه ..

فجر ..
جنت نايمة بغرفة جدتي وبنين يمي ..
واندفرت الباب علينا ..

شفت عمي وعيونه تجدح نار ..
لزمت ايد بنين ..

هو دفع بنين ولزمني من شعري .. ولج ساقطه تالي عمرنا تصخمين وجوهنا بسوايتج ..
امي انشلت وحالتها خطرة بسببج انتي وذاك الجلب .
والله الا اذبج واطمج بگبر محد يعرفه واخلص من عارج ..

سحبني من شعري بالگاع واني اتوسل بي يعوفني ..
عمو والله مامسويه .. عمو والله كذب كذب ..

هو يسحل بشعري ويضرب ..
تالي اجت عمتي بتول نامت فوگي ..
بتول .. خويه الخاطري عوفها .. مايصير هيج . شمدرينا حجيه صدگ غير بالاول نتأكد يله نتصرف ..

محمود .. بتول وخري عنها لاتدافعين الهاي العار لو ميته وي اهلها ومرتاحين ..
نعيمة .. ولج عيني شتتأكدين ايات شايفتها هي وياه بالحديقه وشايل دشداشتها .. اتركي خلي يطم عارها ..

بتول .. انتي اسكتي ولاتهيجين النار . فكروا بأمي اذا درت مسويلها شي تموت ..
زوجوها اله وسدوا السالفه ..

اجه ماهر وسحب ابوه بالگوة مني .. وهي يدفر بيه ..
احس خشمي ينزف دم من گدر ماضربني ودفرني ..

اجت هاجر .. تف عليج بحياتنا ماسوينا سوايتج واني الي خاطبني وعاقد عليه ابن عمتي . بس ماخليته يمس شعره مني ..

بنين .. هاجر شبيج تخبلتي شنو هذا الحجي ..

عيوني تصب وحاضنه عمتي من ظهرها .. واحس روحي بغابه والوحوش داير مدايري من جميع الجهات .
وبأي ساعة تجيني هجمه ومااعرف منين .
صرت فريستهم الي من زمان يحلمون يهجمون عليهم واجتهم الفرصه ..
من كل واحد غلطة لو ضربه لو تفله من غير الشتم والسب ..

ساعتها اتمنيت الله ياخذ روحي احسن مماابقى هيج ..
جرتني عمتي ودخلتني الغرفه وگالت اقفليها ولاتفتحيها لمن اجي ..

بقيت وحدي ابجي واون من الالم ..
باوعت الروحي وجهي خريطه من الضرب والدم ..
طلعت اكلينكس من جنطتي وامسح وجهي وخليت ع خشمي لان النزف مايتوقف ..

بقيت بالساعات وحدي ومنتضره الحكم والقرار الي يصدروه بحقي ع ذنب مااذنبته ..
كلما اسمع صوت افز من الخوف وادعي الله يطلعني من هاي المحنه ويخلصني من البلوه الي سلطها عليه كيان وانهزم ..

اتصل عليه كيان كم مرة مارديت ..
تالي تدزيتله رساله ..
شكرا ع رد الحب الي وهبته الك . جازيتني بسمعتي وحياتي الي مااعرف اذا الحگ اعيشها او اخسرها بسببك من هاي اللحظه انساني لان بعد مااطيق اباوع الوجهك .بعد الي سويته ..
الله ياخذ حوبتي منك ومن الي الگالك عن مكان الحرگ وسلطك عليه ..

دزيتها وغلقت الجهاز ..
انفتحت الباب دخلت عمتي بتول وعمتي نعيمة والبنات كلهن ..

بتول .. باعي عمة عمج متحلف وناوي يكتلج لو ماتدخلت وحجيت وياه .. اذا تردين تثبتين برائتج وتسدين الحلوگ خلينا باجر نروح للدكتورة ..

فجر .. عمة شنو دكتوره شأسوي خشمي توقف النزف مابيه شي بس اخذيني يم جدتي اروح اگعد يمها هناك واراعيها ..

ضحكت ايات والبنات على كلامي ..
بقيت صافنه وضجت منهن . يضحكن عليه واني ماگلت شي غلط ..

بنين .. شنو هالتخلف وين عايشين احنه . البنيه تگول مامسويه ليش ماتصدگون .
رجعتونا قرن بهاي سوالفكم ..

نعيمة .. انلصمي انتي ولاتتدخلين . هذا قرار ابوج لو تروح للدكتورة لو يكتلها ..

رحت العمتي .. لا عمة اروح اخذيني باجر وين ماتردين اخذيني بس لايكتلني عمي والله مامسويه شي .

بتول .. يله روحي غسلي ونامي وباجر يصير خير . 
باوعت البنين وگالتلها ..
بنين عمة انتي ابقي يمها ولاتغفلين عنها ..
غسلت وبدلت ودخلت نمت .
بس كل ساعه داخلتلي وحدة تسمعني اشكال حجي وتطلع .
وايات اجت فرصتها تنتقم مني ..
تطب تهز اديها وتصيحلي ها يالشريفه لسا مانايمة .

ماتدري اني عيوني يخافن يغمضن لايستغلون غفوتي ويكتلوني ..
احس ملح بعيوني ومااگدر انام ..
وادعي الله ينجيني وينجيي جدتي . احس الصبح مايرضى يطلع ويخلصني ..
وكأنه متونس على عذابي والي صار بيه ..
#بقلمي_الكاتبة_شمس
يتبع…………