رواية ساهر الفجر الفصل السادس عشر 16 - بقلم الكاتبة شمس السعدي

صباح الورد لعيونكم .. واعتذر للتأخر بسبب ضروف خاصة اشكر الي فهموا وقدروا سبب غيابي ..
اما الي حجوا واتجاوزوا .. الله يسامحكم .

//// البارت السادس عشـر ////
#ساهـر_الفجـر ..
#الكاتبـة_شمس ..

بتول .. يله روحي غسلي ونامي وباجر يصير خير . 
باوعت البنين وگالتلها ..
بنين عمة انتي ابقي يمها ولاتغفلين عنها ..
غسلت وبدلت ودخلت نمت .
بس كل ساعه داخلتلي وحدة تسمعني اشكال حجي وتطلع .
وايات اجت فرصتها تنتقم مني ..
تطب تهز اديها وتصيحلي ها يالشريفه لسا مانايمة .

ماتدري اني عيوني يخافن يغمضن لايستغلون غفوتي ويكتلوني ..
احس ملح بعيوني ومااگدر انام ..
وادعي الله ينجيني وينجيي جدتي . احس الصبح مايرضى يطلع ويخلصني ..
وكأنه متونس على عذابي والي صار بيه ..

اطلع يافجر ...
اطلع ...
حتى ولو كان الطلوع ...
حيشد حبل المشنقة ...
اطلع ...
وداوي الاراوح الي اشتكت ...
وإلي انضلمت  ...
وإلي بكت ...
اطلع على وجوه البشر ...
اجبر بكسر إلي انكسر ...
وإللى على نفسه انحسر ...
اطلع وريحني خلص ماعاد في حِمل وصبر !!

ماصدگت اذان الفجر أذن ..
گمت غسلت وتوضيت .. وخليت سجادتي وصليت ..
كنت مخنوگة حيل ..
واحس گلبي يريد يطگ ..
بقيت ادعي وابجي على السجادة الى ان غفيت عليها من غير مااحس ..
حلمت بجدتي لابسه ملف صلاة وگاعده تصلي يمي ..
كملت وباوعتلي وابتسمت ..
انطتني سبحة بإيدها كانت ..
ردت اگوم احضنها ابتعدت عني ..
كلما اقترب تبتعد الى ان اختفت نهائي ..

طفرت على صوت بنين وهي تحرك بيه وتصيح فجر اگعدي فجر بيج شي ؟؟

مااعرف عبالها ميته او بيه شي . بس كانت نضراتها مفزوعة ..
من فتحت عيني غمضت واخذت نفس قوي ..
-هففففف هبطتيني .. ليش نايمة هنا ؟؟
-ماادري كنت اصلي وغفيت ..
باوعت النهار طالع ..
گالت يله گومي غسلي وخلينا نگوم نتريگ ..

-مااشتهي راح انام لان الليل كلة مانمت بالي يم جدتي ..
بنين .. قبل شويه اتصلت على ساهر وضعها نفسة مااتغيير ..
-وج بنين حلمت بيها تخبل ولابسه ملف مال صلاة ابيض وتبتسملي وحتى انطتني سبحة بس كلما اقترب منها تبتعد .. يمكن ماراضية عني ..
اكيد هسا تگوم تكرهني ..
اووووف كله بسببي .. اشتاقيت العطرها من اشمها .
بيها ريحة الحنيه كلها ..

-كافي تبجين نامي شويه وارتاحي . اني عندي امتحان امتحن واطلع مااتأخر ..
-حبابه بنين لاتعوفيني . مااريد ابقى وحدي هنا ..
-لاتخافين .. عمتي بتول هنا ..
-لا اني سمعتها تروح الجدتي الصبح وماتجي للظهر .
-معليج اني راح اگلهم مريضه ونايمة محد يگعدج ..

راحت بنين واني حضنت شيله جدتي ونمت ..
حاولت ردت انام ماگدرت ..

دخلت للغرفه بنين دتبدل ..
اجت عمتي وراها ..
اني سويت نفسي نايمة ..
-فجر نايمة لسا ؟؟
-لاخطية مانامت الليل كله تبجي ..
-اووووف والله مااعرف تاليها شلون ..
-اگلج عمة فجر تخاف تبقى هنا واني عندي امتحان . ابقي يمها منا لمن اجي وروحي للمستشفى ..
-لا عمة مااگدر اني راح اروح هسا وي ابوج ومن يجي ساهر يبدل ارجع وياه . مااتأخر ..

راحت عمتي وبدلت بنين وطلعت ..
اخذت نفس قوي وحسيت ماراح تعدي هالساعه ع خير .

بين قلق وخوف وتوتر ع جدتي وفحص الدكتوره .
مااعرف شلون راح تفحصني وشنو موقفي او شراح تگول عليه ..
الخوف تغلبني اكثر من فتحت الباب ودخلت عمتي نعيمة

-گومي يساس البلاء .. ايات مريضه وبراء بالدوام وهاجر الليل كله سهرانه وي ابنها واني وحدي ..
گومي وياي نغسل البيت ونفرشة ..
جدتج حالتها كلش وخاف تموت ع ساعه لازم نحظر البيت .
مو تجي العالم البيت مامرتب ومامفروش ..

ضجت من گالت هيج ..
گمت ع حيلي ..
-ليش مفاوله ع جدتي .. اسم الله عليها .
-يمة السانج يمة .. وبعد الج عين وتحجين .. صدگ من گالوا المستحة ماتت ..
فوگ مامصخمة وجهنا وعينج صلفه وگوية ..

-گمت من غير ماارد عليها .. لان من البارحة واليوم شبعت غلط وسب وعارات ..
مايفيد لو الف واحد يگلها بريئة المهم هي شلون تحب تشوفني .. وشغله كيان اجتها ع طبق ذهب ..

طلعت للمطبخ غسلت مواعين الريوگ ونضفته ورحت للاستقبال شلت الطاولات والتحفيات ومسحت الارضيه .
الى ان نشفت نزلت الفراشات من المخزن وفرشت ..
وبعدين رحت للهول هم مسحته وفرشته ..
نضفت المراوح وغرفة جدتي ..
نضفتها وبخرتها تحب البخور .. ورتبت كنتورها ..
واني ارتبهن اشم بيهن وابوسهن ..
اااه ياامي .. اي هسا حسيت باليتم لما رحتي عني ..
هو يوم واحد واني احس نفسي ضايعه بلاج ..
ارجعيلي وسامحيني ..
اكيد من اروح للدكتورة ويخبروج كلام كيان كذب راح تگومين ع حيلج وترجعيلنا ..

اجت ايات ..
هييي شنو هالبخور اختنگت . ونفسي گامت تلعي بسببج ماصدگت جدتج ماهي اليوم وماتشعل بخور .
اجيتي انتي بمكانها ..

مارديت عليها . خليتها تطلع السم الي مخبيته الي طول هالفترة ..

من شافتني ساكته ومارديت . وكنت مشغوله بملابس جدتي ..
گالت ..
-ان شاء الله بالخرس ونرتاح من اللسانج فد مرة ..
هم مااهتميت وهي احس راح تطگ من القهر لان ماارد عليها .
وگامت كل شويه تجي تسمعني حجي وتروح ..
اخر شي گالت ..
گومي للطارمة اغسليها ..
#بقلمي_الكاتبة_شمس
…………………………………
باوعتلها .. الساعة 12 الظهر هسا حارة وشمس قويه مااگدر ..
-غصب عنج تگومين قابل ترديني اگوم اني اغسلها .
والله بس يصير شي الابني ساهر يموتج خاف انتي عايزة اشو الكل يكرهج ويحاول يتخلص منج ..

گمت ع حيلي . علواه اخلص منكم وارتاح ..
تركتها ورحت للحديقه..  لميت الوساخة الي بيها وغسلت الطارمة ..
اجت بنين ..
-هلو فجر شلونج هسا ..
-مااعرف ..
-اوووف حبيبتي يله شنسوي هذا مقسوم علينا.  واحس شي سويتيه گمتي تلهين نفسج بالشغل حتى ماتنقهرين وتضوجين اكثر ..
ادخل ابدل واجي اساعدج ..

جاي اشتغل انفتحت باب الشارع ..
دخلت عمتي بتول وساهر ..
هو من غير سلام گبل دخل لجوة .. حسيت الدمعة بطارف عيني ..
حتى مالحگت اسأله ع جدتي ..

شمرت الصوندة بالگاع وركضت العمتي ..
-ها عمة بشري جدتي شلونها ؟؟
طبطبت ع كتفي وگالت .. ادعيلها فجر الله يباوعلنا ان شاء الله وتگوم بالسلامة ..

دخلت لجوة اني اخذت الصوندة واكنس بالكاع بكل قوتي وابجي ..
عيوني تجري مثل المي الي بالصوندة ..

واحجي بيني وبين نفسي .. ربي طيبها الخاطري .. لاتعيشني اليتم مرتين .

صاحت بنين .. فجر تعاي اتغدي ..
-مااشتهي اكمل الطارمة وادخل .
بقيت اتحجج حتى مااخلي عيني بعين ساهر ..

وهو بالمطبخ صاح .. بنين گليلها تعوف كلشي وتدخل وبعد مااقبل فجر تغسل الطارمة .
انطنها شغل بداخل البيت مو خارجة ..

منا عرفت اني انحكم عليه بالسجن ولازم اتحمل نتيجة فعل شخص وثقت بي وهو شمرني للنار من غير ميفكر بنتائج ادعائة وشراح تأثر علية ..

سديت الحنفية ودخلت گبل للغرفه .
صاحت عمتي نعيمة .. تعاي صبي ويانا ..
تركتها ودخلت ..
سمعت ايات تسولف وي ساهر بالصاله .
من البارحة واليوم ماشفتك ضجت حيل حتى مانمت وگعدت من الصبح الهي نفسي بالشغل البيت بلاك موحش .

ساهر .. شترديني اسوي اعوف جدتي وهي بهالحاله .
ايات .. الله يشافيها مااتحملت حقها تالي رباتها تطلع… .
قاطعها .. ايااااات اسكتي… .

دخلت للغرفة واضحك ع القدر الي لاف بيه وعاقبني بطريقتة ..
معقوله اني اكون سبب بخسارة كل الي يحبوني ..
وصرت لقمة سهله الايات والي جاي تستغل كل فرصة حتى تتخلص مني ..

اجت بنين جايبه صينيه بيها تمن ومرگة وخضرة وخيار .
-يله فجر گومي . من البارحة لليوم ماأكلتي لاتوگعين .
-مااشتهي .. نفسي مسدوده عن الاكل مادام جدتي ماهي بسريرها ..
-واذا صحت جدتي .. هم من تشوفج مريضه تزعل وتنتكس .. خلينا حايرين بجدتي لاتوگعين انتي هم ودور نحير بيج ..
-گمت اكلت شويه يمكن خاشوگتين وگلتلها لاتجبريني مااگدر ..

سمعت صوت ساهر يسولف ويگول لحد يخبر عمي حمزة خطيه نشدهم وهمة هناك وعندهم علاج ..

رحت السرير جدتي لفيت روحي بالبطانيه ونمت ..
مااگدر اغفى .. بس لازم اتصنع النوم حتى اخلص من الكلام والملامة ..

للعصر .. اجت عمتي گالت يله گومي بدلي . اجة ماهر راح ياخذنا خالج وصاه ..
-عمة استحي اروح شتگول عليه الدكتوره خاف عيب .
-دگومي يعمة هستوج عرفتي العيب ..

انقهرت من كلامها . گمت بدلت تنورة وقميص ولفيت حجابي وطلعت ..

كان الكل بالصاله وعبالك حزب مسوين واني الوحدي وماادري اذا اگدر اجابه هذا الحزب ..
نعيمة وايات وهاجر وبراء . كانوا نضرتهم ماتتفسر شماته او استهزاء ..

عمتي .. ها عمة جهزتي يله خلينا نروح ..
باوعت البنين .. هزتلي براسها .
گلتلها بنين عفية روحي وياي اخاف ..
عمتي .. يله عمة ماكو وكت.  بعد لازم ارجع واروح بدل عمتج ابتهال ابات يم جدتج ..

رحت وياها واني ادعي الله ينصرني عليهم مع انه ادري بروحي طاهرة ومحد لامسني.  بس الخوف امتلكني للحظة ونضراتهم خلتني اتوتر ..

صعدت عمتي يم ماهر ..
واني صعدت ورى . مستحيه منة شيگول عليه ..
حتى ماسلمت ..

باوعلي من المرايا ..
شلونج فجر ..
هزيتله براسي ودنگت ..
گمت افرك بأصابعي الى ان حسيت الجلد راح يتزلغ ..

عمتي .. يله فجر انزلي ..
نزلت العيادة دكتوره ..
كانت مليانه نسوان .. اكو حوامل واكو عدهم اطفال وجايات مراجعه ..
واني بنصهم مااعرف شنو دوري وشأسوي هنا .
حسيت برهبة . واتلفت واباوع بالوجوه ..

عمتي .. روحي اگعدي هناك . اني راح احجي وي السكرتيره واجيج ..

رحت گعدت يم مرة كبيره بالعمر . ووياها بنيه متوسطة وحامل ..

سألتني .. شگد صارلج متزوجة .

صفنت بوجهها وماعرفت شنو اجاوبها ..
گلتلها .. اني ممتزوجة ..
-يايدادة جا شعندج هنا .

جاوبت البنيه الي وياها ..
-عمة عادي اكو بنات يجن عمود خربطة هرمونات او التهابات موشرط بس الي متزوجات يراجعن .
-هااااا عندج العافيه يمة . بعدج صغيرونه وحليوة من اجاج المرض ..

هي عبالها اني مريضه بمرض . ماتدري المرض الي بيه جاي من اقرب الناس الي . من اهلي وعمامي وابن خالي الي حبيته ووثقت بي ..

اتمنيت امي هنا وتدافعلي وتگول اني واثقة ببنتي لاتاخذوها ولاتسوولها شي ..

للحظة غرغرت عيوني دموع وگمت ابجي بلاوعي .. والكل لاحظني ..
احاول اسكت نفسي واصبر روحي وامسح دموعي الي فضحني ..

اجت عمتي تخوزر بيه وگومتني ..
-شبيج تبجين تردين تفضحينا .. تعاي يمي ..

گمت وياها وگفت يم السكرتيرة ..
اشرت العمتي . هي هاي ..
عمتي .. اي هي امانه عليج فهميها للدكتورة ادخل وياها
السكرتيرة كانت تحجي وي عمتي وعينها عليه . وتباوعلي من فوگ لجوة وتتفحصني ..
#بقلمي_الكاتبة_شمس
……………………………….
بقيت مدنگة الى ان اجة دوري ..
دخلت ومتوترة وعمتي وراي ..
الدكتورة متوسطه بالعمر .. گالت تعاي ماما اگعدي هنا شأسمج ..
-فجر محمد
-فجر شعندج .. قاطعتها عمتي وراحت يمها  ..
-دكتورة البارحة وگعت بالطارمة وتأذت واجينه بس نتأكد اذا غشـاء البكارة موجود .. لان بقى بالنا يمها ..
الدكتورة .. انتي امها ؟؟
-لا عمتها .
-امها وين ؟؟
-امها متوفيه ..
-اممممم زين هسا اطلعي انتي خلي افحصها وادز عليج ..
-اي بس مااوصيج دكتورة فحصيها زين .
-ديله ياعيني اطلعي ..
باوعتلي عمتي وگالت اني هنا يم الباب ..

من طلعت عمتي اجت الدكتورة گعدت گبالي ..
اني دنگت وعيوني يصبن دموع وحدهن ..

الدكتورة .. يله فجر احجيلي شنو سالفتج ..
باوعتلها بأستغراب .. مثل ماگالت عمتي وگعت ..
-هذا الحجي مو الي . انتي واعيه مو طفله ووگعتي وتأذيتي .. انتي مجبوره اجيتي لهنا . اعتبريني امج واحجي . اني هم عندي بنيه تقريبا بگدج ..
ومعلمتها تحجيلي كلشي . احجي حتى اساعدج ..

طگيت من البجي من گالت عندي بنية بگدج ..
حسيت امي گبالي ودااشكيلها ..

-والله مابيه شي . لا وگعت ولااحد لمسني .. بس ابن خالي طلع كذبه عليه وهمة صدگوه والبارحة عمي طلب من عمتي تجيبني لهنا حتى يتأكدون .
بس والله مامسويه شي ..عفيه دكتوره سوي الي يردوه بس المهم يتأكدون ..

الدكتورة .. اشششش لاتبجين فجر . انتي ابوج وين .
فجر .. متوفي وي ماما . ماعندي اهل جدتي ربتني وهسا هي مريضه وبالانعاش ويردون يكتلوني اذا ماتأكدوا ..

الدكتورة..  لاحول ولاقوة الا بالله .. باعي ماما اذا تحبين ماافحصج واگلهم مابيج شي ..بس اخاف يصير حلف وكذا ولازم احجي الي شفته ..
فجر .. لا دكتورة اني جبتها عمري كله يذلون بيه . سوي الي گالوه حتى يصدگون .. وسويلهم تقرير او اي شي يردوه بس كون يتركوني بحالي ..

الدكتورة .. يعني هاي عمج هيج ضاربج .
فجر .. اي ..
-يله گومي اصعدي ولاتخافين مااذيج ..

صعدت ع السرير الي مخليته الدكتوره .. وكنت ميته خجل وگلبي يبجي قبل دموعي ..
كنت الم بروحي من المستحة واحس نار بوجهي ..
مغمضه واصيح بعلو صوتي بس من غير صوت ..
احس روحي التصيح وتستغيث ..
ااااه يابابا وماما ليش مااخذتوني وياكم قبل مااشوف هذا اليوم .اكيد لو جدتي موجوده يمي ماجبروني ع هذا الشي ..

الدكتورة .. يله ماما عدلي نفسج وگومي ..
دكت الجرس للسكرتيره . وگالتلها . دخلي عمة فجر ..

اني عدلت نفسي ومسحت دموعي .
واجيت يم الدكتوره دخلت عمتي وتلاقت عيونه ..
عاتبتها وعيوني دم من البجي ..
ردت اگلها لو عندج بنيه تقبلين يسوون بيها هيج ؟؟

بس الدكتورة سبقتني وشفت غليلي ..
-ماما خافوا الله بالبنيه .. ترى مو عبالج عبرت عليه سالفه وگعت وخفنا عليها ..
لو بنتج تقبلين احد يتهمها بشرفها ويجيبها للفحص ..

عمتي گامت تنطي الوان وعرگت ..
الدكتورة شمرت كتبت ورقه وانطتها الها ..
هاج عيني بنتكم كلشي مابيها سليمة وغشائها موجود ..
بس رسالتي العمها .. گوليله دمعت اليتيم يلگاها جمر بيوم القيامة ..خافوا الله بالبنيه حرام عليكم ..

عمتي من غير ماتحجي اخذت الورقة وسحبتني .. باوعت للدكتوره ابتسمتلي وهزت راسها ..
نضراتها انطتني دفعة من الحنان . عبالك نضرات ام البنتها ..
هزت راسها بمعنى صيري قويه ولاتخلين احد يدوسج ..

طلعنا من العيادة .
سحبتني عمتي من ايدي ..
-وج شگلتي للدكتوره وهيج عصبيت عليه ..
-ماگلت هي من وحدها شكت وسألتني . وگلتلها كلشي ممسويه .. وفحصتني وشافتني حتى تتأكدون وتصدگوني من اگلكم كيان افترى عليه ..

-وج حتى اذا كيان مامخذج بس مايحجي ولاهيج يسوي لو ماشايف منج عين ومنطيته وجه ..

سكتت ومارديت . لان فعلا اني الغلطانه بهذا الشي.  صدگته ووثقت بي وحبيته . بس مااغريته بيوم ولاگتله اتقربلي . ولاخليته يلمسني ..

وصلنا للبيت ..
لگيت الحزب كله منتضرنا ..
نعيمة .. ها بشري .
بتول .. مابيها شي وغشائها موجود يعني كيان يكذب .
ايات .. حتى وان مااخذها .. بس مااجذب عيني الي شفتهم بيها . اكيد كلة شغلهم من فوگ لفوگ ..

اتهسترت عليها .. اتقي كافي حرام عليج . ولو انتي ماتعرفين الحرام . من البارحة واليوم كم مرة جرحتي وحجيتي .
المرة ثانيه الي يحجي عن شرفي مايلوم الا نفسه ..

ايات .. يمة تگول حية من جوة تبن .. طلع السانها عبالها تقشمرنا بهذا التقرير ..

بتول .. كافي رحمة الاهلجن ماناقصين البينا مكفينا ..
راح اخابر محمود اگله على فجر ومناك اروح للمستشفى حتى ابتهال تروح ترتاح ببيتها ..

دخلت للغرفه بدلت واجت بنين يمي حضنتني وتتعذر عن اهلها ..
مااتحملت واني بحضنها فرغت دموعي وهمومي . وهي تبجي وياي من اسولفلها شعوري وخجلي من الدكتوره والموقف الي صار ..

واحنة جاي نسولف سمعنا عياط وهوسه ..
طفرنا اني وياها للصاله ..
واشوف عمتي بتول تبجي وملخت روحها ..

وبراء تلگتنا تبجي .. ولجن جدتي توفت ..
من سمعت هيج حسيت طبله اذني انطرشت وبعد مااسمع ..

شويه ودخل ساهر هو وعمتي ابتهال .. عمتي دخلت تعيط بعلو صوتها وتبجي وساهر عيونه حمر ومختنگ  .
ساهر . انطوني جنسيه جدتي بسرعه ..
وعمتي ابتهال تگابلت هي وعمتي بتول ويعيطن ويبجن ..
ركضت الساهر حباب اخذني اشوفها .. ساهر مشتاقتلها وماودعتها حباب اخر مرة ..
ساهر .. اگعدي هنا محد تروح للمستشفى ..
فجر .. ليش ماتفهمني اگلك امي ماتت اليوم خلوني اشم عطرها احضنها ..
والله بس تسمع صوتي تگعد اني متأكدة .
ولكم راحت وهي مقهوره مني ع الاقل خلوني اطلب السماح منها ..

لزم وجهي بأثنين اديه ومسح دموعي .. وداعتج اجيبها بس اكمل الاجرآت .. ماادفن جدتي اذا مااجيبها البيتها وترتاح روحها يله ..

اخذ الجنسيه وراح واني گعدت بمكاني قرفصت ومامصدگة ..
گمت اضرب بوجهي راجديات اريد اصحى اريد يگلولي جدتج عايشه ومابيها شي ..
ملخت روحي بلا وعي الى ان اجت براء وبنين لزموني ..

اباوع ع الكل راحن لبسن اسود وعبالك متحضرات ..
الموتها ..

طلعتلي بنين دشداشه منها وگالت هاج البسي . مااعرف شلون نزعت ولبست . بنين شويه سمينه ودشداشتها عريضه عليه .
گالت مشي امرج بيها بين ماننزل للسوگ ونشتري ..
عفتها ورحت المكان جدتي اخذت ملابسها وشيلتها وحتى العصابه الحظني واشم بيهن وابجي ..

يمة هان عليج تعوفيني وحدي .. مو اني فجرج ماگلتي المن راح تتركيني . انتي بالمستشفى واني شفت الويل بعد عينج شراح يصير بيه ..
منو بعد يضحك وياي ويسولف منو يعيط عليه وينبهني اذا خطأت .
منو الي يگعدني للصلاة لو للدوام غيرج ..

سمعت عياط ورى عياط وبدت الناس تجي واحد ورى الثاني ..
اني بقيت بالغرفه ماردت اشوف البيت مخيم بالحزن بعدها ..
دخلن لينا وسما من شفتهن گمت اعيط ..
ولجن راحت . امي راحت .. هسا حسيت باليتم وربي ..
حضنني ويبجن وياي ..
لينا .. وج من البارحة اريد اموت واجي يمج ادري بيج بلاها ماتتحملين .بس هذا الكلب منعنا وماخلانا نجي ..
فجر .. كله من كيان هو الي موتها . هو الي اخذ جدتي مني . عساني لاشفته ولاعرفته وگمت الطم ع وجهي .
لينا .. خلي يولي مايسوى تفكرين بي . امي هسا اجت وطردته من البيت وبهذلته ..
بقيت او وابجي الى ان جابوا جدتي للبيت ..
سمعت عياطهن ..
وركضت واني اتعثر بدشداشة بنين ..
متكومات ع التابوت .
صحت .. يمممممممة وينج گومي اني فجرج اجيت . نمت ع تابوتها وابجي ..
يمة هانت عليج فجر وتعوفيها . ماگلتي محد الها غيرج يمة اني بعدج اموت محد يرحمني . سامحيني يمة سامحيني لان رحتي مقهوره مني ..

ابجي واعيط بحرگة وسحبتني نعيمة . گومي عنها موتيها وتبجين عليها ام المصايب .
مااحس الا ساهر عاط بيها ..
يمة حجايه زايده مااخليج بالفاتحة نهائي ..
وهاي كلجن اي سالفه او مشكله ماتلومن الا نفسج .
اريد فاتحة جدتي هاديه مثل موتتها ..

اجو. الولد شالوا جدتي اخذوها ..
وساهر لزمني بأثنين اديه وگال بنين اخذيها للغرفه ..
باوعتله وين راح تاخذوها صار الليل شلون تدفنوها بالليل ساهر .. ماندفنها هسا للفجر ونطلع .
روحي للغرفه ومعليج بواحد ولاتطلعين ..

اخذتني بنين ولينا ورحت للغرفه واون واسولف وي الحيطان الي مليان بحسها وريحتها ..
هسا تيتمت صدگ ماحسيت اني يتيمة ام الا بعد ماتت جدتي .. اااااه يمة وينج ارجعيلي فدوة اروح الاسمج ..
يمة وينج ؟
امي يم كلب الحنين
حبيبة وينج ?
حبيبة وينج صدك رحتي وماتجين
يمة وياج ارد اروح
مختنگة ..️ونتي الهوة!
ويمة شيطيب الجروح !
اذا مانكعد سوا
يمة ارجعيلي على بختج
يمة مشتاگة الضحكتج
امي يم كلب الحنين 
صدك رحتي وماتجين صدك رحتي وما تجين ..
#بقلمي_الكاتبة_شمس
يتبع…… .