رواية ساهر الفجر الفصل الخامس والعشرون 25 - بقلم الكاتبة شمس السعدي

هلا وغلا حبايب ..
//// البارت الخامس والعشرون ////
#ساهـر_الفجـر ..
#الكاتبـة_شمس ..

♣حتـى وإن طـال الغيـاب ، وزادت المسافـات ، المشـاعر الصادقـة لاتذبل أبداً ....

احس قطعه من روحـي راحت وياه .. ليش هيج ساهر ..
هانت عليك فجر .. الهدرجة حاقد عليه ..
ماتخليني حتـى اودعـك ..

گعدت جدة رحمة وتمسح على راسي وتقرأ ايات ..
اسم الله بنتي شنو شفتي حلم مو زين ..
تعالي جدة بحظني ..

كنت محتاجة حظن ابجي بي .. كنت حاظنتها وعبالك حاظنه جدتي .. گلتلها ليش هيج كلكم تركتوني .. انتي وساهر وكل الي احبهم راحوا من حياتي ليش .

كانت جدة رحمة ساكته وتستمع وتواسي بيه .
صاحت تقى جابتلي مي .
وگعد خالو وعمو ليث ..

خالو زياد .. شبيج فجر بابا اكو شي صاير ..
مسحت دموعي وحسيت على روحي .. منا ناس يعتبرون اغراب عني واني من اول يوم خبصتهم بمشاكلي ..

فجر .. لا خالو ماكو شي لاتخاف .. بس سمعت ساهر سافر للهند وماودعته لهذا ضجت ..

زياد .. ادعيلو بابا واطلبي من الله يطيبو ويرجع بالسلامة
ليث .. منو ساهر ..

زياد .. ابن عمها وخطيبها ..

تقى .. يعني انتي مخطوبه ..

زياد .. هاي سالفه طويله مو وكتها هسا .. يله بابا انتي نامي وارتاحي وان شاء الله يرجعو بالسلامة ..

رحمة .. عجل شعندو سافر للهند .

زياد .. للعلاج عمة .. كان يحارب داعش بالانبار وقناص ضربو بظهرو وانشلت رجلو ..

رحمة .. الله يقطع نسلهم ولايخليهم .. ضيعو شباب بعمر الورد الانجاس ..
بس جدة منو طلعو للعلاج الدوله لو ع حسابو ..

زياد .. ههههه شتحجين عمة هي الدوله بحالو .. جثير مثل حالة ساهر وباقين مشلولين وعندهم عوائل وماعندهم يصرفو للعلاج او العمليه ..
والدوله ماكلفت نفسها تعالجهم حتى راتب ماعندهم الله يعينهم ..
ساهر الله رازقو وگدر يعالج روحو ويسافر .. الا الفقراء وراحو لحتى يدافعوا عن بلدهم تالي بلدهم غدر بيهم وماسندهم لما وگعوا ..

رحمة .. الله يكون بعونهم . ولايوفق الحكومة وداعش اثنينهم نفس الارهاب ..
ذولي يقتلون بينا وهجرونا من بيوتنا وارضنا ..
والدوله تركتنا نموت ونتهجر وحايرة تنهب بينا ..
والضحية هم ذولي الشباب المساكين الي يدافعوا ويموتو ..

كنت استمع الهم وبالي بمكان ثاني .. ماصدگت طلعوا من الغرفه حتى اختلي بنفسي وافرغ همي ..
كنت كاتمة صوتي حتى جدة رحمة ماتسمعني ..

ثاني يوم گعدت مصدعة .. ومالي خلگ ..
اتصلت ع بنين ..

رفعته امها ..
الو شعندج مخابرة هم الج عين وتخابرين ..

سديت الموبايل من غير مااحجي شي ..
حرت المن اتصل واعرف اخبار ساهر ..

خطر ع بالي ماهر ..
خابرت عليه ..
الو منو ..
هلو ماهر اني فجر ..
فجر ؟؟ خير خو ماكو شي ..
لا سلامتك .. بس بقى بالي يم ساهر وصلو لو بعدهم ..
اي وصلوا هسا بالفندق .. بس بعده حجزهم للدكتور باجر ..
اي خليه يرتاح اكيد تعب ..
-فجر انتي خايفه عليه صدگ ؟؟

-تحجي صدگ ماهر .. ساهر غالي عندي حيل وانتم تعرفون كلش زين علاقتي بي شلون كانت .. بس الله لينطي الي فرقنا ..

-ساهر يحبج فجر .. لسا ماحجيت هالشي .. بس من تصوب وسوله عمليه يهذي بأسمج ويصيح امانه برگبتكم فجر لحد يأذيها .. الي يحب ساهر يحب فجر ..
مافكر بروحة بگد مافكر بيج ..

ماهر يحجي واني ابجي .. واني هم احبه بس مالحگت اشوف شي من هذا الحب من گد المشاكل ..

-جا ليش عفتيه ورحتي ؟؟

- ماهر لاتنسى هو متزوج واني صرت عائق بينه وبين مرته ..
وحبي اجة متأخر لهذا ابتعدت ماردته يخرب حياته اكثر ..

هذا مو حجي .. انتي تعرفين بحياته ماراح يحب ايات .. كنت اتصور الي يحبها هي .. لان دووم يگول حبي صعب ومستحيل يتحقق .. ومن خطبها استغربت لان كانت ايات مو مستحيله بالنسبه اله ..
بس بعد غيرته من كيان ومشاكله اكتشفت هالشي ..
وكم مرة نصحناه اني ورعد بس ساهر حبج بجنون ومستحيل اكو شي يعقله او يبعده عنج ..

تگدر تگول اني كنت عميه وماشفت هذا الحب وفات الاوان حتى استرجعه .. الاهم هسا يرجع يسلامة وعافيه وكلشي مااريد ..

انتي وين هسا ..؟؟

عند بيت عم خالو زياد .. ناس طيبين وعندهم جدة رحمة بنت عم جدتي .. تخبل وتشبهها ..

اي عرفتهم بيت ليث مو .

اي هو ..

زين جا اذا اجت لينا لهنا لان تريد تجي الاهلها واني بالدوام فخابرت مراد يجيبها ..
حتى اگلها تجي يمج واجيكم . لان مااروح الاهلها اني بعد سالفه كيان ..

هلا بيكم .. صدگ تفرحوني لان مشتاقتلكم هواي ..

يله هسا اني بالواجب واي شي يصير اني اگلج لاتشيلين هم ولاتضوجين ..

من حجيت وي ماهر ارتاحين حيل .. وبقيت اترقب جيتهم الي ..

اني كنت اكثر الاحيان ادرس وماالحگ ..بس بالي يم ساهر ..
#بقلمـي_الكاتبة_شمس
.............................. .
ساهر ..
الدكتور الي دزيناله التقارير ..
گال العمليه مالته ناجحة بنسبه 90 % لكن يحتاج اشهر للشفاء والمشي وهذا يعتمد ع الارادة والحاله النفسية للمريض ..

والحمد لله رغم حالتي وهجر فجر الي .. الا ان الارادة صارت اقوى عندي حتى اشفى وارجع مثل قبل ..
لكن حالتي النفسية مااعتقد راح تفيدني ..

بعد يومين من الحجز اجة الموعد ودخلت للفحص .. طبعا سوالنا رنين وتحاليل واشعه جدد ..
وانتضرنا النتيجة ..
بعد ماشافهن الدكتور اول ماگال ..
انت محظوظ ..
صفنت عليه واني هاي حالتي ويگلي محظوظ ..
طبعا هاي المترجم يترجملنا ..
رجع گال ..
نعم انت انسان محظوظ .. لان هذي اصابتك بالظهر المفروض تهشم الحبل الشوكي وتؤدي للشلل الدائمي .
لكن بقدرة الهية ..
الضربة كانت بالعمود الفقري .. والعمود الفقري ضغط على الحبل الشوكي والاعصاب..
وهذا الضغط هو الي سبب الشلل الك ..
والنتيجة ..
راح نجري لك عملية . نزيل الضغط عن الحبل الشوكي ..
ونثبت الفقرات بواسطة براغي ..
وسنعمل على ازالة الفقرات المكسورة وتبديلها بفقرات صناعية ..

كان الدكتور يحجي مصطلحات واشياء هواي ويمكن راح يدل ظهري كله ويثبته ببراغي ..
وعامر يگله مو خاف زينجر البرغي ..
ضحكنا كلنا ..

حدد الدكتور العمليه بعد اسبوع من الموعد ..
وخبرت اهلي ..
وكنت متأمل حيل انه ترجعلي حياتي السابقة ..
اشهر واني مقعد ومامتعود على هاي الگعدة ..
كنت احب الحركة والصيد والسفر ..
وابد مااتعب .. لان ارتاح من افتر واشتغل واتونس ..

واجة يوم العمليه .. كنت اتمنى اسمع صوتها قبل ماادخل .. ومااعرف اذا راح اعيش او لا ..
بس اتمنيت اسمعها واسألها اذا تحبني لو لا ..
من اول ماحبيتها وامنيتي اسمع كلمة احبك منها ..
اهلي كلهم حجو وياي نفر نفر بس هي ماكو ..
شگد تمنيت اگل العمي يخابرها الي .. بس كبريائي منعني اتصل واحجي وياها ..
راح تلوموني وتگولون مرتك اتصلت وهي اولى . بس ماتعرفون الحب شيسوي ..
يدمر وماتگدر تستبدله بغيرة .
صح اعترف اني غلطت واتزوجت غيرها واني احبها . بس عبالي انساها وللاسف طلعت مستوليه عليه كلي ومو بالسهولة اگدر انسى ..

فجر ..
جانت لينا يمنا هي وماهر وملتمين كلنا ..
وجاي نسولف ع دوامي لان مابقاله شي .. وطلبت من ماهر يرتب نقلي البغداد ..
هو ماقبل وحاول يقنعني بس اني كنت مصرة ..
گال فجر ماردت اگلج بس ساهر اليوم عمليته ..
من گال هيج شهگت ومااتحملت ..
گتله اتصل بعمو هسا وشوفه ..
گال شبيج فجر صار نص ساعة من دخلوه ..

-وليش ماگتلي قبل هسا ..

وعساس اذا گتلج راح تطيرين للهند وترحيله .

گتله ماهر هسا تاخذني للامام الكاظم .. اريد هناك اگعد وادعي بحظرته ..

جدة رحمة .. اي جدة روحي وادعيلو هذا حفيد الرسول وهو اقرب الى الله منا ..
اگعدي بحضرتو واشكي وابكي الله وادعيلو ..

ماهر .. يله گومن انتي ولينا اخذجن ..
بدلت وتوضيت وتوكلت ع الله ..

اجرلنا ماهر سيارة ورحنا طول الطريق مابطلت دعاء ..
اول ماوصلت للامام لبست ملف الصلاة ودخلت من غير ماانتضر لينا ..

دموعي تنزل واگله مولاي انت اقرب الربي العالمين .. كن شفيعا لي عند الله ..
الهـي بحق ال بيت الرسول ..
بحق الامام موسى ابن جعفر .. گومة بالسلامة. ورجعة النا سالم ويمشي ع رجله ..
يارب لاترجعني خايبه واني بحضرة الاطهار ..

كان ازدحام وبالقوة يله گدرت اوصل للشباك ..
لزمتة وگعدت يمة ابجي بحرگة وقهر ..
اگله ربي رجعلياه بالسلامة ..
ربي مااطلع منا الا اذا گالو طلع بالسلامة ونجحت عمليته
كانت النسوان يجن ويرحن ويشوفني حاضنه الشباك وابجي بحرگة ..
يمسحن ع راسي ويگللي الله ينطيج مرادج ان شاء الله
.هاي الي تگلي يرجعلج ابو بيتج بالسلامة ..
والي تدعيله بالشفاء ..

اجت لينا گومتني ..
گومي فجر كافي بجي .. گومي صلي وادعيله .. اقري قرآن مايصير هيج تبقين ..

گمت صليت ودعيت وعيوني مابطلن بجي ..
اخذت قرآن وگعدت بالزاويه ..
ولينا گالت اروح اشوف ماهر واجي ..

واني اقرأ لفت انتباهي وحدة گاعدة تاخذ خيرة الوحدة ثانيه ..
مااعرف شنو الي خلاني اتقرب منها .. مع العلم اني ماامن بهيج اشياء ..

گلتلها عندي شغله ومحتاجة اخذ خيره ..
گالت اني مااخذ خيره وانما استخارة .. وهذي بالقران ..
اگدر اگلج الشغله الي ببالج زينه لو لا . بس مااگدر اعلم الغيب .. مايعلم الغيب الا الله ..

گلتلها عندي شخص غالي عليه .. وحاليا بالهند ديسوله عمليه .. بس اريد اعرف تنجح عمليته او لا ..

گالت هالشخص زوجج مو ..
-بس عقد سيد يعني بأعتبار خطيبي ..
-مادام عاقدين بشرع الله يعني يتسمى زوجج عند الله ..
باعي بنيتي كلشي بأرادة الله ..
جاي اشوف الاستخارة جيده ومابيها عائق .. يعني ان شاء الله ناجحة بس الشفاء يطول شوية ..
اتشكرت منها .. گالت الشكر لله بنتي ..

ردت ارجع لمكاني ..
گالت .. يمة ليش گلبج بين نارين ..
استغربت ..
شنو قصدج ..
احسج ترديه وتحبيه بس اكو شي مانعج عنه ..
باوعتلها بأستغراب اكثر ..
-لاتباوعيلي وامشي وياه وانتس مغمضه ترى سعادتج وحياتج الحلوه وياه مو وي غيره ..
وبعد انتي بكيفج ..

ورجعت تحجي وي الي بصفها ..
گمت ورجعت المكاني .. من اجت لينا سولفتلها ..
گالت هاي اشارة الج حتى تحسين بي وترجعيله ..
وج فجر لاتفكرين بأهله فكري بي هو ..
اني دوووم اكل بنفسي واضوج لان حرضتج وخليتج تتركين البيت ..
لو مصارحته وگايلته يبعدج عنهم والله يبعدج لان يحبج ..
عبالج اني مااسمع حجي .. والله عمتي دووم تگولي اخوج كذا وابوج كذا وعمتج كذا ..
واني اسكت الخاطر ماهر .
والي مصبرني اكثر .. قرار ماهر .. لان گال دوامي ببغداد راح ااجر بيت هين ونستقر ..
بس منتظر ساهر يستعيد عافيته ..
مرات امي تگول .. الف عين لأجل عينُ تكرمُ ..
الاجل ماهر لازم اتحمل واصبرر..
وانتي هم سوي هيج ..
لاتظلمين نفسج وساهر .. اول مايرجع روحي وصارحيه وخليه يسامحج وارجعوا سويه ..

-وايات وعمتي راح يخلونا نعيش مرتاحين ..
-انتي شعليج بيها .. هي بمكان وانتي بمكان ..

اوووف لينا ماادري خلي يرجع بالسلامة والله كريم ..

مرت كم ساعة طلعنا نشوف ماهر ..
گال وينجن صار ساعة مصلوب هنا ..
فجر .. ها بشر طلع لو لا ..

-الدكتور طلع ويگول العمليه ناجحة رغم طولت هواي ..بس ساهر بعدة مخليه تحت المراقبه بس يفيق يطلعوه بغرفة وحدة ..

اوووف الحمد لله .. دمعت عيوني وتحمدت الله وشكرتة وسلمت ع ابو الجوادين وتشكرت منه ..

ماهر .. وهسا طمأنينه ع ساهر يصير نروح ناكل لو لا لان متت الجوع ..

لينا .. اي والله جعت ..
اخذنا ماهر وتغدينا بمطعم ورجعنا لبيت.
تلگانا خالوا وجدة رحمة يسألون ع ساهر..
طمنتهم عليه ..

بعد ساعه .. دز عمو صور ساهر ع جهاز ماهر وهو نايم بالغرفه بالمستشفى..
اخذتهن وعيوني تباوعله وتبجي ..
حتى وهو نايم ينگط هيبة ووقار ..
تمنيت روحي يمة واعدل شعراته الي نازلات ع گصته واگعد اباوع واشبع من شوفته ..

مااعرف شلون وشوكت هيج تعلقت بي وحبيته لدرجة الجنون والاشتياق ..

احيانا يكون البعد نعمة وليس نقمة .. فتكتشف بأن هناك ثغرة حنان تجعلك تبحث عن ذالك الشخص الذي ابتعدت عنه .. وقد تكون تلك الثغرة .. هي حب او شوق يقتل الكبرياء والزعل ..
وان ليس هناك اسباب لذلك البعد الا ظروف اجبرتنا لاختبار مدى الحب ومكانة كل شخص في قلب الاخر ..

فعلا هذا البعد خلاني اراجع حساباتي واختياراتي الي اجبرت عليها ..
اشهر واني بعيدة عن ساهر .. احس نفسي مشتته مابين بيت خالو دور اجيت زيارة البغداد ولگيت نفسي مستقرة بيها يس مااحس اكو امان ..

الوجوه رغم طيبتها بس من اباوعلها ماالگي الوجوه الي احبها ..
وجه ساهر وريحة جدتي وضحكة بنين وصراحتها ..
ومريم وطيبتها ..
ولينا وماهر الي حبهم مالي علينا البيت .
بغض النظر عن تصرفات عمو وعمتي وبراء وايات وووو
فأكيد لأجل الي احبهم المفروض اتحمل ..

بعد شهر رجع ساهر للعراق ..
وكانت هذي اللحظة المنتضرة ..
اول ماخبرني ماهر ..
گتله مر عليه اخذني وياك ..

ماهر .. عين العقل .. كنت معاهد نفسي . ارجعج غصب واجمعج انتي وساهر مثل ماجمعنه ..

اتصلت بخالو وفهمته رغم هو بالبدايه ضاج وعباله احد مضوجني . بس من حلفتله وگتله اني ماانتمي الاي مكان غير هناك ببيت جدتي ..
طلب ابقى على تواصل وياه وشوكت مااحتاجة يجي ..
تشكرت منه ع وگفته وياي ..
جدة رحمة وتقى وعمو ليث ضاجو ..
بس وعدتهم ارجع اني وساهر واخليهم يتعرفون عليه .
واصلا هم متشوقين يشوفوه بعد ماسولفتلهم عنه ..
واجة ساعة اللقاء بمن هواهم قلبنا واشتاق لهم ..

جمعت غراضي واخذني ماهر ورجعنا المحافضتنا .
ماهر گال ماگلت الساهر ردتها مفاجأة ..
وصلنا الظهر البيت جدي ..
كانو مسوين غدا الوجه الله برجوع ساهر ..
دخل ماهر جنطي واني وراه ..
توتر وخوف ممزوجة باللهفه والاشتياق ..
كل هذا واني امشي بخطوات متثاقله من الحديقه للمطبخ ..
قلبي متلهف لرؤياك فكيف سيكون اللقاء...
#بقلمي_الكاتبة_شمس
يتبع...
..................
هلو حبايب .. اعرف اتأخرت بس كنت ناويه ماانزل الى ان اشوف سالفه الواتباد ..
اليوم مافتح عندي ابد وشلع گلبي .
لهذا راح احاول اختمها بأقرب وقت لان فعلا تعبت .. هواي صارت عرقلة وتأخير ..
اعذروني مرة لخ وشكرا للتعليقات الحلوة والداعمة احبكم كلكم ..😚