رواية ساهر الفجر الفصل الرابع والعشرون 24 - بقلم الكاتبة شمس السعدي

مساء القرنفل لعيونكم حبايب ..
//// البارت الرابع والعشرون ////
#ساهـر_الفجـر ..
#الكاتبـة_شمس ..

فجر ..
اجو بيت خالو عمار استقبلناهم ..
عمتي من شافتني گالت هاي شبيها ايدج ..
خالو زياد .. مابيها شي بس اصبعها انكسر ولافين ايدها كلها  واليوم نفتحها ..
دخل كيان وراهم شايل الجنط ..
من غير مااباوعله رحت للمطبخ ..
سويت نفسي دااشتغل .. مااحس الا خيال وراي التفتت ..
گال .. شلونج فجر متغيرة هواي وضعفانه .
-باوعتلة. بأستهزاء .. الفضل الك غير ..
-اني اعتذر الي صار غصب عني ..
-تركته ومشيت من غير مااحجي ..
لزم ايدي وعصرها .. فجر الي سويته علمود انجمع بيج المفروض تفهميني ..
-سحبت ايدي منه بسرعه ..
باوع كيان اني مو فجر القديمة وتگدر تضحك عليه لو تستغفلني ..
اي حب هذا .. الي يحب مايشهر بحبيبته حتى لو كان فعلا لامسها يخاف على شرفها لان يعتبر شرفه ..
تعرف شلون كان موقفي ..
شلون الكل طعن بشرفي بسببي ..
وكله اهون .. ووفاة جدتي .. اخذت مني اروع واثمن شي بحياتي .. ولايمكن اسامحك عمري كله ..

-فجر الي صار قضاء وقدر .. انتي هسا حرة وتركتيهم خلي ننسى الماضي ونبدي من جديد..

-تحلم .. اني هسا ع ذمة رجال واياك بعد تتقرب مني وتحاول ..
-هههههه اي رجال .. الي استغلج واستغل ضروفج وعقد عليج .. هو من زمان منتضر هاللحظة ..
واجتو ع طبق من ذهب ..
لاهو بعمرج ولابمستواج الفكري .. شلون راح تعيشين وياه وفوگاها متزوج ..
انتي ماعندج احساس يذلون بيج وباقيه وياهم ..

-تركت الاحساس الك .. ماانبك ضميرك وانت السبب بوفاة جدتي شلون تگدر تنام وانت الي جلطتها وموتتها ..
وهسا ابتعد عن وجهي ولاتفكر تحجي وياي ..

طلعت من المطبخ منهارة والدمعة خانگتني ..
اجت مايا وراي ..
فجر كيان شعندة وياج اني سمعت اغلب كلامة بس مافهمت ..
هو يحبج وانتي متزوجة شلون ..

-هاي سالفه طويله .. وسببها كيان ..
-شلون يعني ..
-كيان هو سبب وفاة جدتي .. گمت ابجي مااتحملت ..
-اشششش اسفه حبيبتي اذا ضغطت عليج ..

دخل خالو زياد .. يله فجر جهزي نفسج حتى نروح نفتح اصبعج ويشوف ايدج الدكتور ..

انتبه عليه ابجي ..
شبيج باباتي اكو شي صاير احد اتصل بيج وضايقج؟؟

مايا .. لا بابا كيان ضايقها سمعته يحجي بالمطبخ بس مافهمت عليهم ..

خالو .. اي اني لاحظت اكو توتر بينكم .. كل هذا لان خطبج وتعاركوا هو وساهر ..
ترى كيان ماغلط هو بس يحبج ورادج . وعمامج ماقبلوا وطردوه شنو ذنبه ..

ضحكت ومسحت دموعي .. معناها ماوصلولك السالفه بحقيقتها ..
خالو كيان مايحبني .. سمعني كلام حب وغزل وقشمرني وكان بين فترة وفترة يحرضني ع ساهر وعمامي ويطالب بحصتي وعساس يشغل فلوسي ويربحهن .
من شاف ساهر ماقبل وصدة ..
تعرف كيان شسوه ..
طعن بشرفي .. وگالهم مو بنيه واني راح استر عليها .
اكو احد يحب يتهم الي يحبها هالشكل ..
كنت محاربه الكل علموده وتالي يطعني هو بظهري ..
تعرف شنو سوة عمي والكل من سمعوا ..
انضربت وانهانيت وتلقبت بألقاب بذيئة .. كل هذا واني ممسويه شي ..
سحبوني واخذوني للدكتوره حتى يتأكدون وكان تهديدهم يقتلوني لو ثبت كلامة ..
وللاسوء . جدتي ماتحملت وماتت من قهرها وكل ظنها اني فعلا مو شريفه ..
ماتت من غير مااثبتلها برائتي . بس انسان اناني وطماع ..
كل هذا وتگلي ذنبه انه حبج .. مااريدة ولااريد حبه ..
كنت تگلي ساهر مو الج واكو فارق بالعمر واختلافات بينكم…
بس الي ماتعرفة انت ساهر اكثر واحد تعب وياي ورباني وسهر عليه وحبني ..
كلكم تركتوني ومحد سأل عليه .. بس هو الي وگف وياي وحماني ..
بس اني مااستاهله لهذا تركته .. هو يستحق انسانه تحبه وتدافع عنه بروحها ومو انانيه مثلي ..

كنت احجي وابجي .. وخالو ومايا يستمعون الي بتعجب ..
سحبني خالو الحظنه من غير مايگول ولاكلمة ..
وهنا حسيت بدفو وفرغت همومي كلها بحظنه الى ان ارتاحيت ..

ومايا تبجي وياي ..
خالو .. يله باباتي كافي . اوعدج كيان اني احاسبه ومااخليه يتقرب الج ..
وانتي مايا . اخذي بنت عمتج وخلي تغسل وتبدل حتى اخذها للدكتور ..بين مااودي بيت عمج للملحق يرتاحون ..
#بقلمي_الكاتبة_شمس
………………………………………
بدلت وانتضرت خالو .. مايا طلعت ..
دگ موبايلي ..
لينا .. هلو فجر
-هلو لينا .. شوكت تجون ..
-مااعتقد نجي لان ماهر حيلتحق خلصت اجازته وهواي صارله ممداوم .. انتي شلونج ..
-شلوني واخوج هنا .. فار دمي من شفته وفوگاها بعين صلفه لسا يحجي ويبرر ..
-اووووف كيان .. عود اني حجيت وي امي وگلتلها توصيه ..
-تردين احجي وي عمو ..
-لااني حجيت وياه كلشي وفهمته وهو وعدني يحجي وياه ..
-سمعت صوت واحد يكح يمها ..
-گلتلها اكو احد يمج ..
-ها لا مويمي يمكن ماهر اجة يله حبيبتي باي .. ديري بالج ع نفسج واي شي يصير خابريني ..

غلقته .. ماادري ليش احس سمعت كحة ساهر . لا بس اني منبهة ع لينا محد يعرف الرقم الجديد.
يمكن احد مر من يمها ..
                 
اجة خالو اخذني للدكتور فتحها وسوالها اشعه گال مابيها شي بس ماتشيلين شي ثگيل ..

ساهر ..
گلبي يريدها وروحي تفتر وتدور عليها .. وبالي مايبطل تفكير بيها .. وخاصه لما افكر بوجود ذاك الدون يمها ..
كل ساعه اتخيل اشياء تتلف اعصابي وتوترني .

صحت ليناااا .
ها ساهر رايد شي ..
جانت ايات يمي گاعده ..
ماگدرت احجي ..
گلتلها .. ايات جعت ماتسويلي شي اكله ..
ايات .. شسويلك .. انتظر شويه الغدا راح يجهز .
ساهر .. لا اريد اتغدا وانام مالي خلگ ..

بالگوة گومتها من يمي ..
لينا واگفه وبيدها الجهاز ..
گلتلها هسا گدامي خابري فجر وافتحي سبيكر  ..
ترددت بالبدايه وگامت تتحجج ..
گلتلها لينا لاتخليني اتوسل . بس اسمع صوتها ومن غير ماتحس ..

اتصلت عليها وگامت تحجي وياها ..
او ماگالت هلو لينا ..
رجعتلي روحي ..
بس كان صوتها كله حزن ومن سمعت هالدون ضايقها احس نار تسعر بيه ..
ااااخ يارجلي مو وكتها تخذليني وتوكفين .. الا اعلمة الامهات شتجيب ..

بس ارتاحيت من حسيتها تگدر تدافع عن نفسها وخالها زياد مبين احسن من خالها عمار ..
كحيت لااراديا وشكت بيه .. بس لينا تلافت الموضوع وخلصت الاتصال بسرعه ..

ااااخ يافجر شنو الجابرج تتركين بيتج وامانج وترحين للمجهول ..

تأذيت من سمعت صوتها وتدهورت اكثر .. هيج ساهر محاصرج جان .. تتحملين كلشي بس حتى تبتعدين عني ..
فجر ..
بعد مافتحت اصبعي وبدأ يتحسن .. انشغلت بالدراسة وتحظير للسادس ..
بيت خالو عمار وخالو زياد كل يوم يطلعون ويتونسون وكنت اتحجج بالدراسه وخالو مايضغط عليه ..
مخليني ع راحتي ..
وكنت ابتعد حتى مااشوف كيان ..

هو بعد مانبهه خالو ماشفته او اني الي اختفيت من الوسط .. مرات عمتي تجي تشوفني وتسأل ليش مااطلع وياهم واتحجج بالدراسه كالعادة ..

مرت الايام ورجعوا بيت خالو عمار . وارتاحيت شويه .
گمت اطلع وياهم واشوف ناس ..
بيوم طلعت اني ومايا للمكتبه ..
وكانو الاغلبيه اكراد وماافهم لغتهم ..
وكنت بس اگلب بالكتب وماافهم شي ..

طلعت كتبي واستغليت الفرصه اقرأ .. كانت المكتبه بيها نت وشغلت اليوتيوب وردت اخلي السماعه حتى اقرأ وياهم ..
كنت دايما اتابع اساتذة ع اليوتيوب يفهمون حيل ..
قبل مااخلي السماعة ..
سمعت صوت واحد ..
صاح محمد ..
الصوت يشبه صوت ساهر .. التفتت بكل قوتي لوره .
وعيني تدور ساهر ..
مايا مو يمي ..
گلبي انقبض . انهضمت ليش بعدني افكر بي ليش صوته مايفارگني ..
طلعت برة اريد اتنفس اريد ابجي ..
اخذتني ايدي ع الموبايل ..
واتصلت عليه ..
ماادري ليش ردت بس اسمع صوته ..
دگيت ع رقمة .. طول ومايجاوب ويمكن الرقم غريب وماعرفه .. اني اصلا اخذت رقم مايا القديم حتى اتواصل وي لينا واسأل ع ساهر ..

رد الو ..
سحبت نفس وشهگت حاولت اصبر على روحي ..
وبگلبي اگله اروح فدوة الصوتك ..

جاوبته بصوت مخنوگ شلونك ساهر ..
سكت ثواني وگال فجر .. ليش متصله ..
-ردت اسأل عليك ..
-وهيج يهمج ساهر .. مو تركتيه ورحتي من غير حتى ماتودعيه ..
-ودعتك بس انت كنت نايم ..
-حسيت عليج وعبالي من حبج وخوفج عليه اجيتيني بالليل طلع ردتي تهجريني وتغدرين بيه ..

-ساهر لاتصعب الامور عليه .. تعرف كلش زين ليش تركت البيت .. ظلمكم فاق قدرتي ع التحمل ..

-ظلمكم ؟؟ معناها حتى اني مشمول ..

-ماقصدي انت .. بس نضرتك الي وسكوتك لما اتهموني اني الي سقطت طفلك .. ماحجيت وسكتت ومعناها مصدگهم ..
تركت امك تحجي وتسب بيه وانت ساكت ومن ردت ادافع عن نفسي سكتتني ..

-وانتي طلبتي ثار وگلتي اعاقبه واروح من حياته مو ..
ردتي تلوين ذراعي يفجر ..
بس صدگي مو ساهر الي يذل روحة وتنلوي ذراعة حتى لو جنت مگرم وماامشي ..

-ليش تگول هيج اصلا مافكرت بهالطريقه .. اني تعبت ساهر وانت شاهد على افعالهم ..

-وج طبهم مرض انتي باوعي الي اني الي يحبج ويريدج وحتى من طلعتي ورحتي وي خالج مااهتزت شعره منهم ولاانجرح كبريائهم .. اني بس الي انجرحت وحسيت نفسي مامرغوب ومالي اي قيمة عندج ..

-بالعكس انت غالي عندي بسسسس .

-بدون بس فجر .. انتي الظاهر اختاريتي طريقج ..
واختاريتي تعيشين من دوني والدليل هسا انتي بعيده عني ومو يمي .. واني مااجبر مرة تعيش وياي غصب واذا ببالج العقد الي بينا ..
شوكت ماتردين مستعد افسخ وانطيج حريتج ..

-هذا اخر حجي عندك ساهر ..

-جا شترديني اتوسل بيج واكلج تعاي ومحتاجلج ومااكدر اعيش دونج .. يابة خلصت العمر اركض وراج وانتي ماهامج ..
رحتي عني واني بامس الحاجة الج .. بعد شترديني اگلج
-هاهي مثل ماتريد .. براحتك ..

-وج ياب لاتخبليني انتي شتردين حيرتيني .. فوگ مارحتي برضاتج وهسا ترديني اگلج ارجعي لو شنو فهميني ..

-كافي ساهر صوجي خابرت . ردت اسمع صوتك بس خليتني اندم ..

-هاهي فجر براحتج ..

-اوك . بس خلي بالك ع نفسك ..

-وانتي هم .. ها ومو عبالج هالشي راح يخليني اهد ايدي عنج .. بالعكس ..
شوكت ماتحتاجيني كـ أخ راح اوگف وياج ومااتركج ..

-باي .. وسديته ..

كـ أخ مو ساهر .. براحتك ..
من گتلك اعتبرك مثل اخويه كنت تضوج وترعد عليه .. وهسا من حبيتك تگلي مثل اخ ..
بس هو صوج گلبي الذلاني الك ..

بقيت احجي وي روحي مثل المخبله ..
وشفت مايا ورايا ..

وين كنتي ادور عليج صار ساعه اختفيتي بسرعه ..

ها اي اتصلت ع لينا واخذتنا السوالف ..

هاااا بديت اغار من لينا ..

هههههه يله خلينا ندخل ..

بقيت مواضبه ع دراستي واقرأ حتى انسى ومن جهة ثانيه حتى اسيطر ع المواد ..
خالو گال اذا ماصار نقل الاربيل .. او صارت بيها اشكالات ..

راح اخذج البغداد عند بيت ابن عمي ..
ماعندة احد بس هو وزوجته وامه كبيرة بالعمر ومايصير عندهم اولاد ..
وامه تصير بنت عم جدتج فخريه .. وراح تحبيها هم تشبه سوالفها ..

شوقني اشوفها ..
گال اصلا هو عزمنا الاسبوع الجاي البغداد ..
شنو رأيج ترحين ويانا وتتعرفين عليهم ..

مااعترضت وفرحت لان راح اشوف وحدة من ريحة جدتي ..
اتصلت بنين استغربت ..
استأذنت وگمت ..

-الو بنين ..
-ولو اني زعلانة .. معقوله ماحن گلبج وگلتي اسأل على بنت عمي .. هيج وجودنا بحياتج كان حمل وانزاح عنج .

-لاتگولين هيج بنون بالقرآن مشتاقتلج بس تعرفين ظروفي والدراسه شاغلتني .
-وماردت احد يعرف رقمي ويوصل الساهر . بس كنت اسأل عليه من لينا ..

-اي واني شنو قابل راح انشره للرقم .. نسيتي ايامنا وگعداتنا ..
-وج كنتي اختي الماولدتها امي . وتعرفين علاقتي بيج اكثر وحدة .
-مااگدر افضفض واحجي وي وحدة لان ماعندي ميانه قويه بيهم . وبراء تعرفيها .
بس انطيها سالفه تنشرها ع الفضائي ..

-هههههه والله اشتاقيت لسوالفج .. شخبارج ساهر شلونه
-ساهر من سئ الى اسوء . مايتفاهم صاير ودوم عصبي لدرجة حتى علاج بطل ياخذ ..

-ليش هيج ..؟؟

-تعرفين ليش .. ساهر طلع مثل اخته حظ ماعندة ..

-ليش خير شبيج ..؟؟
-اووووه سالفه طويله ..

-سولفيلي شصاير .. بعدين . بس گليلي انتي خابرتي ساهر ..

-اي ليش ..

-اشو تعصب زيادة وارتفع ضغطة وطگ خشمة دم ..
وهاي اول مرة تصير بي ..

-ضربت على صدري .. وهسا ..

-زين . بس الدكتور حذرة من العصبيه وگاله ضغطك مرتفع حيل زين ماانجلطت ..

-اووووف راح يخبلني ساهر .. يسوي هيج حتى يعاقبني ادري بي ..

-ليش متگولين يحبج ..

-حبنا غلط بنين .. خلي يهتم بمرته ويحبها ويشوف حياته افضل ..

-وج خلي تهتم بي هي بالاول يله يهتم بيها .. ليل ونهار فالحة تبدل وتعدل ..ودور نزعت الاسود ومكياجها وتجي تتمختر گدامة لو تدحس روحها يمة ..
وتشيط الرجال .. لان هو يگدر يگوم لو يتحرك صدگ تنرفزني بسوالفها ..

-ايات من يومها هيج قابل جديده علينا .. بس الغيرة والحقد بداخلها ..

-وج وفوگاها هي وامي ليل ونهار يتناگرن مااعرف سالفتهن ..

-اي مو فجر ماهي تتعارك وياها فأنتقلت عمتي الايات .

-هههههه لا والله اكو شي بينهن بس شنو ماادري ..

-هسا اتركينا منهن وگولي شنو مشكلتج ..

-مشكلتي حب من طرف واحد ..

-اووووف الله يساعدج ومنو هو ..

-وج ماادري شلون ومن غير ماافكر . هيج حبيته واتعلقت بي ..
وخاصه من يجي الساهر ..
احس روحي تطير .
لان ماكو احد واضطر افتح الباب وادخله يم ساهر ..

-مادام يدخل يم ساهر معناها رعد ماكو غيره بس هو الي يدخل للبيت وعدنا ميانه وياه ..
عزااااا العزاج بنين .. مالگيتي الا رعد ..

-ليش هو الحب يعرف منو ..

-لاماقصدي رعد خوش ولد واهلج كلهم يحبوه .. بس ماصار فترة من ماتت زوجته وعندة طفل .
وتدرين بي يحب مرته معقوله يگدر ينساها بسهوله خاف يشلع گلبج ..

-وج ماادري من خبالي .. كل ماتروح امي الهم اجلب بيها بحجة ضايجة ..
واروح اشيل ابنه والعبه يخبل .. بس حتى المح رعد ومااشوفه دومة طالع لو بالدوام ..
والمشكله يگلي شلونج خيتي ..

-لاصدگ بنين سالفتج اكبر واصعب مني . 
والاصعب حب من طرف واحد . وبنيه يعني لاتگدرين تعترفين بحبج ولاتحجين وراح تبقين ساكته ومتعذبه من هذا الحب ..

-شأسوي حظي غير ..

بقينا نندردش وصدگ قهرتني بنين وردة وتستاهل الي يقدرها .. بس حبها هذا راح يدمرها ..

كم يوم ورحنا البغداد الاقرباء خوالي .
وكنت متلهفه اشوف جدة رحمة ..
رحت بس اني وخالو .. الهم ..لان البنات جدتهم مريضه ام امهم وبقوا هناك .

سلمت على خالو ليث يصير ابن عم ماما ..
وزوجته تقى اصلها من بغداد ..
حبابه بشكل ورحبت بينا ..

جدة رحمة اول ماشافتني ..
گالت هلا بريحة فخريه .. عمر واتمنى اشوفها . كنت اني وياها رحله وحدة بس فرقونا الي ميخافو الله ..

حضنتني وحضنتها وفعلا بيها شبه من جدتي . لدرجة اشتميت ريحة جدتي بيها وگمت ابجي لااراديا ..

وهي بجت وياي .. وگالت ادري بيج اشتاقتيلها بس احسبيني اني جدتج وابقي هين يمي ..

الكل كانوا بمنتهى اللطف وياي وحبيتهم وحبوني بيوم واحد حسيت وكأني اعرفهم من زمان ..

اخذوني للكاظم رغم همة سنه بس دخلوا وياي وزارو وتقى مرت خالو ليث تگول بين فترة وفترة نجي نگعد بالحظرة نرتاح نفسيا ..
وفعلا هو الي يدخل الحظرتهم فدوة الاسمهم يطيب من الهموم ويرتاح وعبالك گاعد بالجنه ..

بالليل رجعنا فرشولي يم جدة رحمة ..
نعسانه واتصفح بالفيس ..
وشفت ساهر ناشر ..
(الخير في مااختاره الله ) ادعوا لي بالعودة لوطني وانا اسير على قدمي ..
ومخلي صورته ويمة عامر وعمو حمزة بالمطار ..
شهگت بالبجي ..
مودع بالله يغالي ربي يرجعك سالم النا ..

اتصلت ع بنين واشهگ ..
وج ليش مگلتيلي ساهر راح يسافر .. ليش كان عرالاقل رحت شفته بالمطار ..

والله هو ماقبل وحلفنا مانگول الاحد .. واني من لهوتي وياه وحضرت غراضه ماشفت دربي ..

ااااه ادري بي يريد يعاقبني .. ناشر منشور بالمطار حتى يحرگ روحي ..

لامو هيج .. ليش متگولين يريد يگلج اني رايح ادعيلي بس بصوره غير مباشره ..

سديته من بنين .. اتصلت عليه جهازة مغلق .. معناها سافر ومن غير مايودعني ..
سواها وحدة بوحدة لان ماودعته ماودعني ..
بيومها تهسترت وگمت ابجي ..
حتى جدة رحمة. گعدت تقرأ ع راسي ايات عبالها حلمانه حلم مو زين ..
#بقلمي_الكاتبة_شمس
يتبع… .
هلو حبايب ..
طبعا البارحة عساس اختم بطلب من اصحاب القصة لكثرة التجاوزات ..
واني كم مرة نبهت ع هذي الشغله ..
بس توقف الواتباد وانحذف البارت ..
وضجت وگلتلهم مااختمها بهيج طريقه ..لان اني تعبت عليها وتالي استعجلتوني وضاع تعبي كله ..
فرجاءً لتتجاوزون ..
هي بقت كم بارت اتحملوا الى ان تخلص ولاتخجلوني وي اصحابها .. فديتكم ❤