رواية ساهر الفجر الفصل السابع والعشرون 27 - بقلم الكاتبة شمس السعدي

مساء الحب والسعادة عليكم حبايب 💕
//// البارت السابع والعشرون ////
#ساهـر_الفجـر ..
#الكاتبـة_شمس ..

مااتحملت جفاه ولعبة عليه .. كل ساعة برأي خبلنـي ..
وخاصه من گال روحي ماتصيرلج جارة ..
ضجت حيل ..
طلعت للباب ورجعت ..

اخذت نفس قوي وتنهدت .. باوع ساهر ماادري ليش احسك متونس بعذابي ..
شوكت ينتهي هالعقاب .. ماكفاك بعدي وعذابي دونك .
حرمتني اوگف وياك بأصعب ايامك ..
كلما اريد اتقرب الك تصدني .. ومن ابتعد عنك تلومني وتعاقبنـي انت شرايد بالضبط ..
-انتي الي شرايدة مو انـي ..اني گتلج الي اريدة من زمان وانتي رديتي بطريقتج الي.
سوالفج وحدة اضبط من الثانية .. وكل هذا واسامح واگول تربات ايدي .. والنتيجة عضيتي ايدي ومشيتي وخليتي گلبي ينزف . وببعدج داويت روحي بروحي ..

-شنو يعني بطلت تحبنـي ..

دخلت عمتي ام ساهر .. شكو شبيكم . اشر الامة تطلع ..
-غير افهم شكو شبيها هاي تصيح ..
-يمة گتلج اطلعي وسدي الباب ..
طلعت وسدته ..

بش شفت رجليها يم الباب بعدهي واكفه تتنصت ..
گالها يمة روحي لاتوكفين ورى الباب ..
راحت بسرعة ..

-اي ست فجر ماجاوبتي سؤالي شرايدة مني ..
-بس ماجاوبتني ع سؤالي بطلت تحبني ..
-واذا جاوبتج يهمج هالشي .. اذا گتلج مثلا نسيتج ومااريدج .. ينكسر گلبج مثل ماكسرتي خاطري ..
-نزلن دموعي مااتحملت واني اشوف برودة ..
گتله انت متونس على عذابي . لان شفتني حبيتك وتعلقت بيك هيج تسوي ..

ساهر .. اوكفي اوكفي .. شگلتي .
-انت شبيك تستهزأ بيه ..
-وج بنت اللذين مسترخصة عليه تكررين الكلمة ..
باوعتله وعيوني مدمعه .. ساهر اني احبك ..

-اويلي يابة واخيرا نطق ابو الهول ..
-صفنت عليه ومااعرف يمدحني ولا يذمني .. شبيك ساهر مامصدگني ..
-لا حاس بيج بس ردت تشوفين لوعتي شلون وحبج شسوه بيه ..
سحبني من ايدي وقربني حيل اله .. فجري كنت راضي بهاي اللحظة حتى لو قبل موتي ..

-اسم الله عليك طولت العمر ان شاء الله..
-تخافين عليه ..
-ماتدري من سمعت دخلوك للعمليه شصار بيه تخبلت ورحت للامام الكاظم طلبتك منه ..

ساهر .. ماصدگته من شفتها منفعله وتبجي وبعدين گالت احبك .. شگد تمنيت هالكلمة تطلع منها ..
هي تسولف واني اباوع لشفايفها ..
مااتحملت واني بهاي حالتي ومحروم من زمان وفجر شعلت نيران الرغبة بيه ..
بس اااااخ لو ماوضعي ومااگدر اسوي شي .. جان دمرتها على سنين البعد والهجر ..
سحبتها من گلبيتها ونيمتها فوگي . واخذت شفافها العسل بشفافي ..
هي ماگدرت تقاوم احسها ذابت بين ايدي واني مسيطر عليها رغم الضغط الي صار على ظهري واذاني ..
بس ماگدرت افوت هاللحظة من ايدي ..
كان احساس لايوصف .. شگد حلو من تاخذك المشاعر والرغبه الشخص يحبك وتحبه وتروح انت وياه العالم ثاني ..
شفتها اختنگت تركتها .. گامت بسرعه ورادت تنهزم ..
صحت اااخ تعمدت ..
رجعت هي .. هاااا اذيتك بيك شي ..وخايفه عليه ومرعوبه ..
گلتلها .. ااااخ من طعم شفافج جا غير يموت وغمزتلها .
هي صارت طماطة من الخجل وانهزمت بسرعة ..

ضحكت .. اااااه وينج جدة تعاي شوفي هاليوم يمكن اكثر وحدة تفرحيلي انتي ..
واخيرا روضت اللبوة مالتي وخليتها تحبني ..
الي صار ومشاعر فجر اتجاهي صحت الاسد الهائج بداخلي ..
واتمنيت اگوم امشي واطيب بأسرع وقت ..

فجر .. الي صار عبالك مثل الحلم .. كلشي مر بسرعه .
مااعرف شلون تجرأت واعترفتله بحبي . وشلون بسرعه سحبني اله وباسني بشفافي اول مرة احس بهيج شعور .
ماگدرت اقاومة . رغم مرضه وحالته الا انه سيطر عليه كليا وماگدرت اسحب نفسي اخاف ااذيه .. بس كنت خانگة نفسي بالگوة كان شعور غريب واحساس صعب يتفسر ..

اول ماتركني طلعت .. من سمعته گال اخ خفت عليه رجعت طلع يضحك عليه وغمزته اووووف دوختني ..

ماكو احد بالبيت بس عمتي ومريم وهاجر نايمات ..
اريد اسولف واحجي الي صار اريد اعترف الكل الناس بحبي ..
ساهر يحبني واني احبه اول مرة افرح هيج ..

بس يافرحة ماتمت ..شفت عمتي گبالي مخليه اديها ع خصرها ..
اني وجهي احمر واحس نفسي مسخنة . وشفايفي احسهن مفضوحات من بوسته ..
بسرعه خليت ادي ع حلگي خاف تكشفني ..

-وج شعندج يم ساهر شگلتيله ليش صوتكم طالع ..
-ها ماكو شي .
-وج شلون ماكو شي . واني اسمعج تصيحين وتحجين عليه اذا هو مارايدج شعندج لازگتله ..

سكتت وماحجيت وياه لان الي بي اني حرام انغصه بكلانها واهتم ..
بقيت افتر ومااتحملت . رحت المريم،گعدتها ..
مريم مريم ..
فتحت عينها . ها فجر شبيج ساعة 12 اشو لسا مامبدلة .
شافتني اروح وارجع بالغرفه ..
گامت .. وج شبيج صرعتيني ام ساهر سوتلج شي ..

فجر .. لا مو هي ..
-لعد ..
-ساهر !!
-شسوالج بتعجب ..
-ها مااگول استحي .. وضحكت هي افتهمت عليه وابتسمت ..
-وج لويش تستحين .. غير رجلج وعاقد عليج ..
-اي بس ماادري .. المهم عرفت بعدة يحبني وصارحته ..
-يعني تصالحتوا واخيرا .. هسا اجة دورج تكسبيه الج لان وراج حرب ولازم تصبرين. ساهر مايتعوض لاتخليه يروح من ايدج ..
بس ماگلتي شسوالج ..
گلتلها اتأخرت اروح ابدل بسرعه ..
انهزمت منها ورحت بسرعه بدلت ردت اطلع واستحي من ساهر .. اوووف شلون تجرأت وهيج حجيت .. هسا شلون اباوع بوجهه .
ودور باسني يبوووي ..

مشيت ع اطراغ اصابعي اريد اطلع بهدوء ..
صااااح فجرررر وين ..
وگفت بمكاني باوعتله اشرلي بآيدة تعاااي ..ويضحك
#بقلمي_الكاتبة_شمس
.............................. .
گتله .. هاااا مو اتأخرت ..
اي تعاي مااخرج ..
اتقربت منه .. اخذ ايدي وباسهم .. باعي حبيبتي .. دور مااقبل اتطلعين من غير ماتودعيني ..
اريد احس بوجودج وياي وبحياتي .. باوع الملابسي ..
گال احس الصدريه گصيفه مووو .

باوعت الروحي .. لا وين اشو حتى ضعفانه ..
-اي حبيبي انت فجري واغار عليج .. ومااريد اي عين تصد عليج . لو ترخين الحزام لو تلبسين عبايه اسلاميه فوگ ملابسج ..

رخيت الحزام .. گال اي هيج .. اموت ع التسمع كلام رجلها ..
ضحكت -مو راح اتاخر ..
بلگوة تركني اروح .. كنت طول الدوام بعالم ثاني كلما اتذكر الي صار ابتسم حتى مافهمت شي من الدروس ..

رجعت متلهفة حتى اسولف البنين .. خطيه فرحتلي هواي وخابرنا لينا وفرحناها ..
بيومها حصرني مريم وبنين بغرفتها ويردن يعرف شنو سوه ساهر .. وماخلني اروح الى ان عرفن ..
هذا الشي خلى الشك براس ايات وعمتي ..
وتگول الله يستر منجن احس وراجن مصيبه هواي تتختلن .
لليل واني ماشفت ساهر واشتاقيتله لان خطار وامة يمة دوووم ..
وماتخليني اوصل يمة هي وايات ..
فكنا مثل الفارة والبزون اني وياهن من يصعدن ينامن استغل الفرصه واروحله اشوفه ..
وبنين توگف حرس ..
ساهر ضاج من هذا الوضع وگال اريد اعلن زواجنا .
بس اني ماقبلت . گتله مااريد مشاكل الى ان تطيب واني اكمل يله ..

لان اعرف اذا علن زواجنا ماراح يخلني ارتاح وراح يحاولن يخربن كلشي بينا ..
فكنت اشوفة بالبوگات ع سالفه ساهر ..

بيوم گاعده ادرس عندي امتحان ..
وبنين يمي مشغوله بتحضير بحث التخرج ..
اجاني مسج من ساهر ..
-حبيبتي مشتاق حيل تعاي يمي ..
دزيتله .. مااا اخاف احد يشوفنا ..
-وج قابل خاتل وياج غير مرتي ..
-اي استحي ..
-تجين لو اصيح بعلو صوتي فجر تعاي والم البيت كله هنا ..
-لا حباب هسا جايه ..

هاجر كانت تسولف فيديو وي زوجها وابنها ..
اشرت البنين افتهمت ..
گمنا بسكته ..للصاله ..
بنين .. شكو
فجر .. اخوج معند الا اروحله ..
بنين .. اي ومنتضرين الحرس بنين توگف يله عمي روحي شأسوي امري الله ..
فجر .. يومة فديت .. اجازيج من يجي ذاك اليوم ..
بنين .. اي قشمريني تدرين هالشي ميصير ..

خليتها بالصاله گاعدة ورحت للاستقبال ..
لگيت الاخ نازع قميصه وباقي بالفانيلا والمنظر اوووف مااعرف اخجل لو اذوب ..
هو اصلا جسمه رياضي رغم هسا ضعفان .. اول مرة اباوعله بهيج نضره .. نضرة حب واعجاب ووله ..

رفع البطانيه وگال تعاي هنا ويأشر ع اديه ..
فتحت عيوني .. يااا ماااا
وج قابل بالحرام غير مرتي ..
لا يجي احد وبعدين استحي شنو هاي ..
محد يجي تعاي مو راح اتخبل .
وعامر مو ينام يمك وينه .
شحته راح لفوگ بس تعاي مو اشتعلوا اهلي ..
اتقربت بطيئ ومتردده ..
سحبني الحظنه وغطانا ..صار راسي برگبته وع صدرة اوووف يريحته تنبع رجوله كان عطرة المفضل بلو شانيل اغلب الاحيان من يسافر يشتري منه ومايغيرة لهذا عطرة مميز ولو اشتمة عبر امتار اعرف هذي ريحة ساهر ..

باسني براسي وگال صار سنين احلم بهاي اللحظه . اخليج بحظني واحضنج واعصرج هيج ..
ضغط عليه بحظنه حيل ..
تذكرت من كنت صغيرة وينيمني بحظنه هيج ..
بس بذاك الوكت كان شعور مختلف عن هسا ..
حسيت بنعاس واني بحظنه ..
صاح فجري نايمة ..
گتله .. اممممم .
وج ااااخ لو ماظهري وحالي هذا .. جان هسا طلعت الفرق مال السنين الراحن كلها .
حسيته گام ينفظ ويتمادى .. وهو اعرفه مريض ومايتحمل .. بسرعة گمت عنه وگتله لايجي احد ..
حسيته ضاج وعيونه بيهن رغبه قويه ..
بس ماردته يحس بضعفه ومرضه ..
گال والله مااشوي شي بعد. بس تعاي يمي اگعدي اريد اسولف وياج ..
گعدت يمة .. وگام يسولف عن خططه للمستقبل . وينتظر اخلص دراسه ويطيب ويوگف ع رجله ونسوي حفله عرس ..
اثناء كلامة .. گال فجر مو تزعلين .. ترى ايات هم مرتي ومااگدر اكسر بيها ..
راح تتساوون بكلشي بالايام والاحترام والتعامل ومااريد مشاكل ..
بس شغله وحدة مااگدر انطيه الغيرج وهو گلبي . مستحيل احد يتربع بي غيرج ..
وامي اتحمليها .. اعرفها ماتنحمل بس الخاطري اسكتي عنها واني احاول الگي حل ..
ابتسمتله .. وگتله مدام القمر معي شلي بالنجوم ..
اذا انت وگلبك الي بعد مالي دخل بغيرك خلي شيحجون يحجون ..

مرت الايام واني وساهر كل يوم يزيد حبنا اكثر واكثر .
رغم دراستي وسادس بس ماخليت هالشي يأثر على حبنا كنت اساعدة وافرك رجله دائمة وبالليل اسندة ويبقى يوگف فترة ويتحمل الخاطري رغم يتعب .
بس كنت مخبلته بدلعي وكلامي .. وهالشي خلى عندة ارادة قويه حتى يطيب ..
وبدأ يحرك اطراف رجله .. ويگدر يعتمد ع نفسه من يگوم او ينام ..
حتى الدكتور مالته .. بعد مادزاله التقارير والرنين . گاله جاي تتحسن بطريقه اسرع مماتوقعت .
مو گتلك الحاله النفسيه والارادة الها دور بشفائك ..
بس بقى العلاج الطبيعي مااكتمل .

اما هاجر فتغيرت حيل .. وصارت تساعدني بطريقه غير مباشرة وعبالك تعرف اني وساهر نتبادل الحب ..
لان مرة من المرات ..
كان دوامي الصبح ..
ومتعودة اودع ساهر قبل مااطلع ..
شفت عمتي يمة ماگدرت ادخل . لان مانعتني اوصل يمة بقيت افتر بالغرفه وصارت الساعه ثمانيه الا ربع .
والوكت راح يفوتني ..
گعدت هاجر ..
گالت صباح الخير .
رديت عليها ..
گالت شعجب لسا مارايحة ..
گلتلها هااا كتابي ضايع داادور عليه ..
عي ماحجت طلعت ورجعت . گالت فجر يمكن ساهر يريدج ..
رحت شفت عمتي بالمطبخ هي وهاجر .
لان البنات كلهن نايمات وايات دوامها عصري بس عمتي تگعد من الصبح ..

رحت بسرعه للاستقبال شفته نايم ومخلي ايدة ع عينه مغطيهن ..
بستة من خدة . بسرعه فتحهن ..
گال عبالي نسيتيني ..
گتله شلون انساك وانت روحي . بس استحيت من عمتي گاعده يمك ..
ساهر .. اي امي لزگت اگلها روحي تريكي ماتقبل . روحي خلصي شغلج .
گالت شعندي البنات يگعدن ويشتغلن اني اريد اگعد يمك هنا .
-همزين اجت هاجر وصاحتها ..
-اي ماصدگت من گالت ساهر يريدج ..
-لا ماصحت ..
-امممم معناها اكو طرف جديد انظم الحزبنا ههههه
ههههه الله يحنن الگلوب علينا ..

من هذا اليوم واني حسيت ع تغير هاجر المفاجئ ..
بنفس اليوم تفاجأنة بحمل لينا ..
والكل فرح الها . وخاصه ماهر .. خطيه كان ببغداد ودزتله صورة التحليل ..
بالاول مافهمها ..
وبعدين اتصل فيديو ويعيط من الفرح ..
كلنا گاعدين وساهر يشاقه وياه ويگله لك راح تصير ابو اعقل ..
كنت اباوعله وعيوني امتلئن دموع. كان المفروض هسا انت اب ومنتظر ابنك ..
الله يعوضك بهاي الفرحة الي كنت تتمناها انت وجدتي .
قهرني حيل ..
وعمو يگله .. يوم الك ان شاء الله وليدي ..
وعمتي گامت تبجي ..
بس ايات .. ماعجبها الحجي وهزت اديها وطلعت ..
كان المفروض تسمعه حجايه حلوه . بس هي جرحته بهاي سوايتها ..
صدگ ضجت . وبنين هم طلعت وراها ..
گالتلها .. ليش بينتي گدام ساهر انتي ضايجة وهزيتي ايدج ..
ايات .. قابل جذب . رجال مكسر وتتأملون منه طفل بعد بي حيل يسوي طفل .. فوگاها اني الي انحرمت وياه .
بنين .. محد جابرج الباب يوسع جمل . اذا تردين روحي لو بيج حظ حافظتي ع الطفل وفرحتي بي .
ايات .. اي لو ماهاي الحيه وگعته جان هسا اكو ابن الاخوجن يشيل اسمة . بدل ماتحاسبيني . حاسبيها مو صافه وياها علينا .
هاجر كانت واگفه ..
گالتلها ايات لاتشمرين اخطائج على غيرج . لايصير شي ميعجبج ..
باوعت الهاجر وهزت اديها وصعدت . ماعجبها الحجي .

بذيج اللحظة اتمنيت ارد عليها وابرد گلبي . بس اكيد اذا حجيت راح تصير مشكله وتنگلب ع راسي . وتوصل السالفه الساهر وينقهر ..
لهذا فضلت اسكت واوكل امري الـ الله ..

انتظرت صارت الـ 12 بالليل . الوقت الي اجتمع بي وي حبيبي ..
رحت اله ولگيته منتظر كالعادة ..
بقيت شويه يمة وخففت عنه رغم هو فتح الموضوع ..
وگال فجر اخاف اظلمج وياي ..
خليت ايدي ع حلگة .
وگتله .. اشششش الي يهمني انت وصحتك والعمر كله گدامنا ونحقق بي كلشي نتمناه ..
سحبني وباس راسي وگال .. ماغلطت من حبيتج واختاريتج . رفعتي راسي برباتي الج ..

ثاني يوم كان جمعة وكنت مشغوله ادرس لان مابقى شي ع امتحانات نصف السنه ..
اجت بنين تركض ..
وج فجر الحگي اجت ام رعد ونسوان ..
فجر ..اتفاجأت .. معقوله جايه تخطب .
بنين ..الا يرادلها معجزة... .

نزعت دشداشتها .. ولبست گلبيه حلوة ..
ورتبت شعرها .
وطلعنا سلمنا ورحنا للمطبخ . نتصنت ع الحجي ..
بنين كانت ترجف من التوتر والخوف ..
واني ولينا واگفين نسمع .
ولينا مثل المطفيه . كل شويه وگالت شعدهن وشيردن .
بس اني كنت اعرف بحب بنين الرعد وشنو يعنيلها هالشي ..
مريم وهاجر گاعدات يم عمتي ..
اجت براء شافتنا مكومات ونتهامس ..
هزت اديها وگالت الله اليستر منجن . عود سون جاي ومي امي تگول .
سويت بسرعه واخذته ورجعت المكاني ..

ام رعد .. عيني ام ساهر .. انتو تعرفونا كلش زين واحنه عشرة عمر ومو يوم ويومين .. واني جايتج بطلبة ..

ام ساهر .. اي خيه گولي الي اگدر عليه اسويه ..
ام رعد .. خيه تعرفين رعد والي صارله .والمگرود مااتهنى بحياته . وبقى هو وابنه وحيد ..
ومن شفت المحروسه بنتكم بنين واخلاقها وهي اصلا متربيه وياه . دخلت گلبي وردتها الرعد ..

حسيت عمتي تفاجات وضاجت ..
ام ساهر .. ام رعد انتي مثل اختي بس انتي تعرفين مابيدي شي وكلشي بيد ابوها وعمها واخوتها ..
والبنيه تدرس ومانگدر نجبرها وخاص رعد عندة طفل وهي مو حمل المسؤوليه .

ام رعد .. شفتها شلون طيبه وحنينه ع الطفل وهو هم يحبها . وگلت بس هاي الي اامن على رعد وابنه بيدها . وبعدين مدام اني موجودة مااخليها تشيل همة بس تنطيه الحب واهتمام الام الي ماشافها ..

بنين كانت تسمع وعيونها تجري من الفرح ..
بس عمتي الظاهر ماتعديها ع خير ..
وگالت للمرة اخذ شور اهلها ونردلكم خبر ..
بس بعد ماطلعوا ..
جمعتنا ونبهتنا .. اياني واياجن تطلع هاي السالفه وخاصه الساهر ..
واني اخذ فترة واگلهم البنيه ماتقبل ..
مو تالي عمري ازوج بنين الخريجة والحلوه الرعد المهتلف . الي اهلها جانت تتصدق عليها الحجيه ومن صار بالجيش انغسل وجههم . وفوگاها ارمل وعندة طفل .

شفت بنين ضاجت وانقهرت . وايات گالتلها عمة الف واحد يتمناها شنو رعد وتنطي بنين .
وگامت تزن براس عمتي الى ان قفلت نهائي ..
مريم رادت تحجي وگالتلها ع الاقل اخذي رأي بنين ..
بس عمتي تگلها .. بنين ماتعرف مصلحتها اني اعرف .

من شفت الوضع هيج كان اكو خطار يم ساهر . انتضرت الى ان طلعوا وتسحبت للاستقبال .
اول ماشافني ابتسم ..
اشتاقلي الحب مو ..

گتله ساهر راح اگلك شي بس لاتگول اني گتلك .
انقلبت ملامح وجهه وتغيرت ..
-شكو ؟
-ام رعد اجت تخطب بنين الرعد بس عمتي نبهت مانگول وراح ترفضهم ..
-شنو اشو رعد ماگال .. زين وبنين شنو رأيها ..
-تدري ببنين گلبها طيب . وهي متعلقه بأبنه بس سمعت وافقت ومااعترضت .
بس عمتي قافله ورعد ولد زين ومتأكدة راح يصون بنين وحرام هيج نخسرة .

شفت ساهر ضاج وگال يصير خير روحي انتي هسا ولاتبينين الاحد گلتيلي ..
-رحت واني ع نار وخايفه بدل مااكحلها عميتها ..

ساهر ..
من اجت فجر وگالتلي ام رعد خطبت بنين كلش ضجت . وانقهرت صاحبي واخوي هيج يسوي ..
خابرت عليه وگتله هسا تجي عندي شغله وياك ..
راد يتعذر ماانطيته مجال .
نص ساعه واجة ..
فتح الباب عامر . گتله عامر روح عندي شغله وي رعد .

رعد واگف .. گتله ادخل شبيك خايف البيت بيتك ياما اكلنا وشربنا ولعبنا هنا ..

هو بسرعه دخل يتعذر .. باوع ساهر والله مالي ذنب ولاقصدي اتجرأ واخطب اختك .. بس امي تخبلت عليه وگالت لو هي لو ماتدخل غيرها جنه البيتي ..
واصرت تجي .. وصرت امام الامر الواقع ..

باوعتله بغضب وگتله .. اذا ماتعرفني زين يخوي وعبالك استعر منك وارفضك ..
ولك لو جاي الي وحاجي .. جان گتلك گبع واخذ بعد رضاة البنيه مستحيل ارفضلك طلب ..
هي هاي خوتنا ولك .. تتصور اتعالى عليك ..

هو من سمع كلامي .. اخذ نفس وضحك ..
-يعني مازعلان .. وموافق ..
ضحكت اني وگتله .. باوع بنين بغلاة روحي عندي اكثر وحدها احبها بأخواتي واتمنالها احسن قسمة .
بس الك انطيها واني مغمض .. واعرف ماراح تقصر وياها ..

رعد .. مااعرف شأكلك . تدري اني صارلي سبع اشهر من ماتت المرحومة . وبعدهر مافكرت بالزواج ابد لو ماامي تصر وخلت ابني گبالي ..
وبعد سوالفها ع اختك . ارتاحيتلها من يمي . وان شاء الله ماراح اقصر عنها واخليها ع راسي ..

ساهر .. واني اضمن الك بنين راح تخاف على ابنك اكثر من روحها .. ومو لان اختي بس لان اعرف طيبتها وگلبها ووصيتي الك مااريد بيوم تنزل دمعه من عيونها .
لان ساعتها تخرب خوتنا ..

رعد .. واني اشري خوتنا بروحي ومااخلي شي يخربها .
طلع رعد ..
صحت بنين اريد اخذ رأيها واتأكد بأذني هي موافقه .

اصيح ومحد يسمع ..
صحت فجر ماكو بس اسمع اكو عرك وصياح من جوة ..
گلت الله ساتر . شنو من نسوان شگد تحبن المشاكل .
سحبت الكرسي واستندت عليه وگعدت ..
وبقيت افر بيه الى ان وصلت للباب فتحتة .
واشوفهن كلهن واگفات بالصاله ويصيحن ..
عطت بيهن بعلو صوتي ..
شكو .. ماتستحن . ماتهدن ليل ونهار مشاكل ..
دخل ابوي وعامر وعمي حمزة ..
گالوا شكو صوتكم طالع للشارع ..
ساهر .. والله نفس سؤالي . صحت بنين شكو صوتج انتي وايات طالع ..
اثنينهن صفنن بوجهي ..
رادت تححي امي . اشرتلها .
اسكتي يمة .. اريد اسمع منهن !!
#بقلمي_الكاتبة_شمس
يتبع...

..................
حبايب اعتذر جدا ع التأخير .. واشكر كل من همه صحتي وراحتي واستبدلها بالقصه ..
حاولت اكتب رغم ايدي . والوجع . بس ماحبيت اخليكم تنتضرون الباجر ..
احبكم كومااات يااروع متابعين ..

للأمانه / لازم اوصل سلام ساهر وبقية ابطال القصه . يبلغون تحياتهم لكم جميعا ..
الي يگولون ساهر يشبه منو ..
يشبه هذا بالضبط . انسان راقي جدا .. ونضراته حادة وشخصيته بالضبط نفس الي بالصورة .
الله يحفظة ان شاء الله..