رواية ساهر الفجر الفصل الثامن والعشرون 28 - بقلم الكاتبة شمس السعدي

اسعد الله مسائكم بكل خير احبتي 💕
//// البارت الثامن والعشرون ////
#ساهـر_الفجـر ..
#الكاتبـة_شمس ..

طلعت من الاستقبال شفت بنين وايات يتعاركن .
بهذي اللحظة .. دخل ابوي وعمي وعامر ..
گال خير شكو صوتجن واصل للشارع ..
رادت تحجي امي قاطعتها ..
يمة اسكتي اريد اسمع منهن !!

باوعت البنين .. احجي بنين شعندج انتي وايات ??
بنين .. لاتسألني الي خوية .. اسأل هاجر وهي تسولفلك ..
باوعت الهاجر لونها انخطف ..
-هااااا ماكو شي خويه لاتضوج روحك سوالف نسوان ..
بنين .. لااحجي خلي يشوف الحية الي مخليها بحظنه وامي تسترلهااا .

تعصبت حيل من سمعت هيج وعطت بيهن .. احجن ولجن شكو ..
ايات شمسويه ..
ايات ...والله ممسويه شي يجذبن عليه تدري بيهن حزب الله ..
بنين .. احنه جذابات .. منو الي جذبت وگالت فجر وگعتني وسقطت طفلي .
وخلتينا كلنا نطيح بخطيتها ونتهمها وراحت من وراج والكل ذمها ..

فجر .. من سمعت هذا الحجي تخبلت . اني شفتهن يتعاركن بس مافهمت السالفه شنو . عبالي لان ايات عيرت ساهر بوضعه ..

ساهر عاط .. يعني شنو منو الي وگعها معقوله توصل بيج توگعين نفسج وتأذين الطفل حتى تتخلصين من فجر ..

بنين .. غير كون اكو طفل حتى توگعة ..
احجي هاجر شبيج .. احجي الي گالته امي الج ..

ساهر .. يعني مو حامل كل هذي الفترة ضحكتي علينا وطلعتي مو حامل .. خلتيني اتأمل جذب وفرحتنا اني واهلي وجدتي كله وهم ..

ايات .. لاوالله كنت حامل والله .. بس سقطت وخفت احجي خاف اخسرك وتروح مني ..

ساهر .. اششششش اسكتي مااريد اسمع صوتج ..
باوعت الامي .. وانتي يمة شلون هنت عليج .. اني ابنج . شفتيني شلون متلهف ع الطفل وتالي تشتركين وياها ..منو الاولى اني لو هي .

امي گامت تبجي .. والله اني هم مثلكم ماادري وفرحانه اكثر منكم بالطفل ..
ومادريت مسقطته الا لمن وگعت واخذناها ورادت الامها ..
من رحنا گامت تبجي وتتوسل وگالت خاله استري عليه طفل ماكو .
واختي حلفتني بأمي وتبجي وتخربطت. وماردت اكسر بيها وبعد الطفل راح ومايفيد الحجي .

ساهر .. وماهر مو وياجن شلون عبرت عليه ..
امي .. مايدري شمعرفه هو گلنا الماهر اخذنا للمستشفى وماخليناه يدخل ويانا بقينا گاعدين شويه بالطوارئ وطلعنا ..

ساهر ..وانتي اختاريتي فجر تذبين التهمة عليها وتعاقبيها على فعله بنت اختج .. سترتيها وفضحتي يتيمة ..
وطول هالفترة اني اتهم بفجر والومها لان تركتني ..
وطلع كله بسببجن. . والله اعلم شسويتي وخلتيها تنهزم .

امي گامت تبجي .. وايات سوت نفسها اغمى عليها ..

گلتلها گومي كافي تمثيل . بعد سوالفج ماتعبر عليه .
الطفل شوكت وشلون سقط ..
هي ماتحجي عود مغمي عليها .

عطت بيها بعلو صوتي ..
گووووومي . طفرت بسرعه ..
واديها ترجف .
من فاتحة الحجيه .. من رحت الاهلي امي رادت تغسل الزوالي وساعدتها لليل تخربطت ووگع ..
وگلت الامي ماتحجي .. عبالي اعوضك واحمل بعد .
بس تالي تصوبت .

ساهر .. واصابتي ضيعت كل مخططاتج وتالي خططتي تتهمين فجر وتطلعين منها مثل الشعرة من العجينه .

ايات .. ماكان قصدي والله ..
ساهر .. لاتحلفين بريئ منج الله ..
وانتي هاجر ليش سكتي وماحجيتي اعرفج انتي هم صافه وياهن ..
هاجر .. لا والله ياخويه .. من كلام امي ع فجر ضجت منها وعبالي صدگ هي الي وگعت الطفل .. بس بعد ماعرفت من امي السالفه ضجت وتعاركت وياها وتخربطت وهاي حالتي التشوفها بسببهن وحتى اعتذرت من فجر وطلبت السماح لان ظلمتها ..
بس ماردت احجي وانت مريض واشيلك هم فوگ همومك ..
ساهر .. لمي ملابسج وروحي لهلج .. مااريدج مرة الي . بحياتي كلها اكره الكذب والنفاق ومااحب المرة الي ملعبه وتدور خطط ومكايد ..
يله ولي منا ومااريد اشوفج ..

بنين .. اوگف ساهر .. قبل ماتروح بقت سالفه باقيه ببالي ..

ابوي ..ولكم شكو بعد مو راح اتخبل هو هذا بيت لو مركز اجرام ..

ساهر .. احجي بنين شمصخمة هاي بعد ..
بنين .. سالفه كيان والي صار ومعرفة المكان حرگ فجر .اني شاكة بأيات وراها ..

ايات .. يااا اني شعليه قابل ليل ونهار احجي وياها ..
بنين .. مو بعيدة تجيبين رقمة من اي مكان .اني شفت رقمة يتصل عليج مرة بس ساعتها مافهمت ..

ساهر .. احجي ولج .. صدگ هالحجي لو لا ..
لينا .. اي صدگ لان مرة طلبت رقمة مني وگالت اريد اكلفه بشغلة .. واني نطيته الها ..
……………………………………… .
ساهر .. اتهسترت من سمعت .. وج ياعار شلون عشت وياج كل هذي الفترة مخدوع ..
وفوگاها مستخطيج واگول ظالمها وياي .. تالي تطلعين حيه ..
تعرفين عقاب ( رمي المحصنات ) ماخفتي من ربج ..
ويمكن الله عاقبج وحرمج من الامومة وبسببج انحرمت وماصرت اب ..
اطلعي بسرعة اطلعي وورقتج تجي وراج ..

فجر .. اوكفي ايات ..لليوم ماتدخلت ولاحجيت بكلشي سويتوه بيه . سواء انتي . او عمتي الي تهمتني وتعرف اني بريئة ..
بس الله يلعنج دنيا واخرة ع الي سوتيه بجدتي .. بسببج انتي وذاك العار ماتت .. الله لاينطيج ورادت تضربها لو ماتلزمها بنين وتگلها اتركيها عقابها عند الله .

فجر تبجي .. شلون اتركها وهي سبب موت جدتي . راحت جدتي بسببها .. يتمتني وخلت الناس كلها تتهمني اني الي موتتها ..

ساهر .. تعاي فجر تعاي هنا .. وداعتج حقج اخذة مربع من كل شخص ظلمج . حتى لو كانت امي الي ربتني ..

مو يمة .. شحصلتي هسا . فادتج ايات . خسرتي ابنج علمودها .. لاتتوقعين بيوم اسامحج ع السوتيه ولاتگولين عندي ابن ..

ابوي .. صار ساعه منتظر تخلص المسرحيه هاي واحجي شگد ساندتج ووگفت وياج يانعيمة لان گلت بالماضي ظلمتها وخنتها . واريد اعوضها واخليها تسامحني .
بس لهنا وخلص .
تعبت واني اسدد ديوني خطأ بحياتي .. بعد مالج وجود هنا .لمي هدومج وروحي وي بنتج اختج ..

نعيمة .. يا محمود صدگ ينطيك گلبك وتطردني بعد هالسنين كلها . اولادنا بطولنا وانت تطردني ..
ادري غلطت بس ماقصدي هي جبرتني استر الها ..

محمود .. ولا حجايه اطلعي بسرعه ..
عامر .. لابويه مو هيج ..
محمود .. انت لاتتدخل . والي يدافعلها خلي يروح وياها ..

براء .. الله لينطيج يبنين . بعتي امج علمود هالساقطه هاي ..
ساهر .. برااااء . وربي افرك حلگج اذا حجيتي حجايه وحدة .. عاجبج تبقين ابقي ..
ماعاجبج اطلعي .. لو ناسيه انتي گاعده بنص بيتها وتحجين عليها ..

فجر .. كان الامر مثل الخيال او الحلم .. ماكنت متوقعه يوم وتنكشف الاوراق وتظهر برائتي .
حتى عمي فاجأني بردة فعله وماكنت متوقع راح يوگف وياي ..
رحمتك ياالهي واخيرا ظهر الحق ..
براء ..كالعادة صارت ضدي .. وماكنت اعرف ساهر شيقصد من گالها گاعدة بنص بيتها ..
الا لمن براء گالت ..
اني الي مااريد اگعد ببيتها الي جدتي ظلمتنا ونطته الها .
فهمت انه جدتي رادت تضمن حقي .. وبعد روحي يمة كانت دوووم تفكر بيه ..
رغم اني بعد حب ساهر وحياتي وياه مايهمني لابيت ولامال ..

عمتي ام ساهر بقت تبجي وتخربطت .. شالها عامر وبراء راحت وياها ..
ايات من نزلت محمله جنط هواي .. وبعين وكحة تگلي بالعافيه عليج اخذي هالمگرم خلي يفيدج ..
لو كا الكل واگف كان ضربتها ع حلگها وريحت گلبي بعد كل الي سوته بيه ..وبجدتي ..

ساهر ضاج واعتكف يوم كامل بالاستقبال وگال لحد يدخلي .. ويلوم بنفسه لان ورط نفسه وتزوجها ..

البيت بيومها انگلب كله وكان ليل ..
حتى محد تعشا وكل واحد گاعد بمكان ..
لينا خبرت ماهر بلي صار . وگال احاول اخذ اجازة واجي ..
عامر اتصل ع بنين .. وگالها امي تخربطت وهاجت الغدة عليها ووديتها للمستشفى ..
هاجر تبجي وتگول لو ادري ماحاجيه ..
بنين ضاجت على امها وحقها .. لان الام مهما تغلط تبقى ام ومانگدر نكرهها او نضوج منها ..

عمو صعد الغرفته ومانزل .. كان الجو كئيب حيل ..
صحت لينا ورحنا للمطبخ ..
گلتلها مايصير هيج. خلينا نسوي عشا ونجمعهم . مااريد البيت يتشتت هيج ..

لينا .. وعمو منو يگول يقبل ينزل هو وساهر ..
فجر .. معليج اني ادبرها ..

حظرنا العشا وجهزناه .. وطلبت من بنين تساعد لينا .. واني اخذت نفس وصعدت العمو ..
اعرف ماكو بينا علاقه عم وبنت اخوه . وعلاقتنا طفيفه او شبه معدومة . بس جربت حظي وصعدت ..

دگين الباب ..
گال منو .. لگيتة يشرب جگاير وحدة ورى الثانيه وهو ممنوعه عنه الجگاير ..

گتله عمو ممكن ادخل ..
ماحجة ..
اتقربت منه وگعدت ع السرير ..

اخذت نفس وگتله .. تدري من كنت صغيرة وانت تجي للبيت عبالي ابويه واركض الك ..
كنت تشبه بابا وبمشيتك حتى . ومن كنت تتمرض لو يصير عليك شي اضوج اخاف تروح مثل بابا ..
اتمنيت احضنك واشبع من حضنك وحنانك .. بس كنت دووم تصدني وماتريدني .
وابد ماكرهتك لو ضجت منك .. وانطيك اعذار رغم مااعرف ليش تكرهني ..
تمنيت تجي تعبان واگلك شلونك عمو واساعدك بالعلاليگ ومن تريد شي تصيحني وتطلب مني ..
عمو دايما كنت اگولها الك من بعيد . بلكي تسمعني وتگلي ها عمو محتاجة شي . تردين شي ..
رغم ساهر رباني وتعب عليه .. بس كنت دايما اتمنى قربك الي لان يگولون العم والد وردت احس بشعور الاب منك ..

من حجيت وياه باوعلي ودمعت عيونه .. گال تعاي عمو من فتحلي اديه ماصدگت وحضنته .. خنگتني العبرة وبجيت . باسني براسي وگال ..
اعذري عمج يبنيتي مرات الحقد والطمع يعمي العيون ومايشوف اي شي گدامة ..
مااگلج سامحيني لو سامحي عمتج .  لان اعرف مايشفعلنا اي شي .
بس راح اگلج منا ورايح اني ابوج والله يقدرني اعوضج عن الي راح ..

كنت اسعد انسانه بهاي اللحظة لان گدرت اكسب عمي واقربه الي ..
گتله اذا فتحنا صفحة جديدة مثل ماگلت .. انزل تعشا ويانا ..
ضحك وگال روحي واني اجي وراج ..
……………… .…………………… .
نزلت فرحانه ..
گالت بنين ها ..
گلتلها هسا راح ينزل ..
بقى بس واحد عنيد اشوفه واجي ..
دخلت للاستقبال ..
لگيت ساهر لاف راسه ونايم ..
اتقربت منه وفتحت البطانيه ..
گال لا فجر بردان رجعي الغطا ..
-ههههه وشمعرفك اني فجر ..
-من عطرج واعرف سوالفج .. لان محد يتجرأ ويسحب الغطا مني واني نايم ..
-فديت الي يعرف حبيبته .. ديله گوم تعشا وعندك علاج .
-مااشتهي اريد انام ..
دنگت عليه وادغدغة وهو ضايج ويضحك ..
-ولج لاعبالج مااگدر واتركج .. والله اسحبج واندمج لان تتحرشين بيه ..
-ههههه فدوى تروح الك فجر .. بس گوم اگعد يمنا هيج وافتح نفسي للاكل ..
شال راسه .. فجر ؟؟
-عيون فجر .
-ابقي هيج .. لاتتغيرين اريدج كل يوم تحبيني اكثر واكثر ..
-اممممم ماكو اسهل من هيج .. اشبعك حب بس گوم وياي ..

** وكـيف لاأحبهـا وهي الحبيبة التـي تسعـدنـي في حزنـي ..
التـي تجعلنـي اكون بقمة سعادتـي عند رؤيتها فقط ..
تشعرنـي بأنه مازال هناك حب حقيقي في هذا الزمن ..
لاأخشى ان اخبرهـا مافي قلبـي ..
لأنني واثق بأنها ستتمكن من اسعادي في نهاية حديثي!! 
واحمد الله الذي ملكنـي جوهرة مثلها ..
دمتـي لـي يافجري انا !!

گام وسندته جبتله الكرسي .  واخذته يمنا بالصاله ..
نزل عمو شافنا ابتسم ..
التمينا ع السفرة كلنا ..
صحيح كان السكون هو سيد الموقف .. بس المهم انجمعنا كلنا سويه مثل ايام قبل من جدتي عايشه ..

لليل ساهر گال محتاجج يمي .  رغم عندي امتحان بس تركت كلشي ورحت يمة ..
گال فجر سامحيني هواي تأذيتي بسببنا ..
خليت اصبعي ع شفايفه .. اشششش الي سويته الي وحبك يشفع الكل شي سئ صار بحياتي ..

ساهر .. احبج ياب راح تخبليني انتي .. اشوكت اخذ الاذن من الدكتور واخليج مرتي مو راح اموت من وراج ..
فجر .. ههههه سااااهر شنو هاااي استحييي ..
ساهر .. دخل اطيب وعود تدلعي هيج الا اندمج والله .

بقيت للصبح نايمة يمة .. للفجر ..گعدت توضيت وصليت .
وطلعت كتبي ادرس ..

ماهر خطيه اجة كم يوم وراد يحل الوضع بس ماگدر الاطراف كلها قافله ع الموضوع ..
راح شاف امة واخذها وياه البغداد الدكتور هناك خاص بالغدد..
بقوا كم يوم ورجعت عمتي عند اختها ام ايات حسب ماسمعنا من عامر ..

مر كم يوم وبدات امتحانات نصف السنه امتحنا وكملنا والحمد لله كنت زينه .
ساهر ماقبل يشغلني وياه وكان يخليني يمة بس اقرأ وهو يباوع .. لو نايم .
يكلي مادام نفسج وياي يكفي ..
ايات رفعت دعوة طلاق عليه . بحجة عليل ومايگدر يلبي حقوقها .. والمحكمة حكمتلها بالطلاق ..
طبعا بعد مااخذت كل الذهب والفلوس الي بالكنتور ..
حتى فلوس ساهر ظامهن عندة ماخذتهن .
بس ساهر گال مااريد فضايح خلي تاخذهن وماتتهنا بيهن
عمتي بعد ماتخربطت وبالمستشفى . الغدة هاجت عليها وبدت تفرز وتعبتها ومحتاجة رعايه ..
البنات طلبن من عمو يرجعها ماقبل ..
فهاجر اترجتني احجي وي ساهر ..
وشفت عندهن حق .. امهن وتالي عمرها وبمرضها تتشرد بالبيوت ..

رحت الساهر واول مافتحت الموضوع .. گال لاتتدخلين بيها اتركيها ..
فجر .. ساهر مهما يكون امك . حرام مريضه وماعندها احد غيركم . لاتسوي هيج الله يعاقبنا بولدنا بعدين ..
اجت بنين وراي وهاجر واترجنا يحجي وي عمو .
تالي وافق ..

گال العمو .. وعمو يحترم ساهر مارفض طلبه .
خابر عامر وگاله جيب امك واختك خلي يرجعون للبيت ..

لليل رجعت عمتي هي وبراء . سلمت عليها ماردت .
بس براء ماتحجي ويانا كلنا .وحتى اخواتها مقاطعتهن .

هاجر وبنين وگعن ع امهن ويبجن قهرني ..
بس ساهر شگد حاولت وياه يراضيها ماقبل ..
وگال اتركيني هسا مو وقتها ..

بعطلة نصف السنه .. ساهر بعد مااخذ رأي بنين بموضوع رعد ..
اتصل وانطاه الموافقه ..
بنين الفرحة ماسايعتها ..
وعمتي من سمعت ساهر وافق . ماگدرت تحجي وسكتت
اجن النسوان وام رعد يتفقن ع المهر والخطبه ..
وحسب توصيات ساهر وعمو ..
گالتلهم عمتي .  نسوي المهر والعقد بيوم واحد وسكته . لان جدتي سنتها ماطالعه ..
واذا يحب بالزواج ياخذها من بيتنا ويسويلها حفله ببيتهم وهذا الكلام طبعا ساهر كله گاله الرعد ..
وگاله المهر انت بكيفك شتحدد ..

رعد گال الساهر .. اني بيتي جاهز بس ارتبه .. واغير الغرفه . بين ماتجهز امورها .
ونفض السالفه بسرعه واذا ع الطفل يبقى عند امي بين ماتكمل بنين هالسنه وتتخرج ..
بس بنين ماقبلت .
وگالت لا اخليه عندي هو عمره سبع اشهر يعني زين مايتعب . ومن اداوم اخليه عند ام رعد ..

عمتي ماراضيه بالزواج وتحجي ع بنين وتلومها وتگلها راح تتندمين . بس گدام ساهر ماتحجي وتسكت .
اما بنين .  ففرحتها ماتنطيها الاحد ومامهتمة الكلام اي شخص ..

بيوم كلنا مجموعين .. وجاي نحظر المهر بنين والمشيه ..
فجر ساهر القنبله ..
وگال ..
يابه .. شوفلك واحد وبيعله الغرفه مالتي باي سعر حتى واحد ماعندة ويريد يتزوج انطيها الها ..
وغرفه جدتي .. اريد اطلع واحد يرتبها ويصبغها ويغير ديكورها ..
ويسوي صحيات بالممر الي وراها داخليه ..
اريدها الي ..

عمتي .. اي زين تسوي يمة انت بعد ماتگدر تصعد وتنزل ..
ساهر .. مو الي بس .. اريدها تجهز حتى من فجر تكمل امتحانات نعلن زواجنا ونتزوج بيها ..

حسيتها ضاجت وسكتت . بس البقيه فرحوا وباركولنا ..
ماهر وعامر .. گلوله بشرط نسويلك حفله كبيرة وبالقاعة مال شفائك وزواجك اثنينهن ..

فعلا الفرحة صارت فرحتين .. وهاجر وبنين ولينا يخططن للزواج وشيسون وشيلبسن .
صار البيت ضجة ..وساهر مد ايده الي .
استحيت من عمامي . بس هو سحبني وگاله يابه .
لازم ارجع اخطبها منك هسا لو شلون ..
عمو . هههههه اي وحسب حسابك ماانطي بنتي الا بشروط ومهر غالي ..
ساهر .. طبعا حقك تتشرط عندك جوهرة ثمينه ..
رحت العمو حضنته وبوسته ..
دمعت عيوني من گال ماانطي بنتي الا بشروط ..
فعلا هسا يلة بديت احس عندي عائله تحبني واحبها .
رغم عمتي بعدهي ماطايقتني بس المهم ساكته عني وتخاف من ساهر وعمو ..

لليل نايمين وسمعنا هاجر تصيح وتبجي ..گمنا الها نركض . گالت ولجن راس الهادي طگ الحگني .
ركضت بنين تصيح ماهر واني مااعرف شأسوي ركضت الغرفة مريم وگعدتهم ..
مريم عليها السابع ..
من شافت هاجر تبجي وناگعة بالمي ..
گامت ترجف ووگعت .. دور حرنا بيها ..
بسرعة اجة ماهر ونقلوا هاجر للمستشفى .ومناك خابروا زوجها وعمتي بتول ..

بقينا منتضرين للصبح گالوا جابت الحمد لله ..
ارتاحينا .. كانت الساعة سبعة الصبح ومانمنا من القلق وهمزين كان يوم جمعه وماكو دوام ..
شويه وسمعنا صوت وضجة ..
تطافرنا اني ولينا لان نامت يمي وبنين راحت وي هاجر لان عمتي نعيمة مريضه وماتگدر ..
طلعنا من الغرفه مرعوبين ..
ياساتر شنو من يوم هذا ؟؟
#بقلمي_الكاتبة_شمس
يتبع……
…………………………………