رواية ساهر الفجر الفصل الثالث عشر 13 - بقلم الكاتبة شمس السعدي

اسعد الاوقات لأجمـل متابعين وقراء💕
//// البارت الثالث عشـر ////
#ساهـر_الفجـر ..
#الكاتبـة_شمس ..

هذا الطفل دخل الفرحة ع البيت من بعد سنين .. فعلا حسيت اكو شي راح يخليني اتمسك بالحياة اكثر ..

راح اصير اب .. ماكنت متوقع راح افرح الهاي الدرجة ..
حمل ايات خلاتي اتقرب اكثر منها ..
واهتمامي زاد بيها ..

اول مرة احس كلام امي صح من گالت .. يمة انت كبرت وهذا الطفل راح يشيلك وكت كبرتك . انتبه البيتك ومرتك وراعي الله بيهم ..

ماانكر زادت المشاحنات والمشاكل ..
وايات تغيرت بعد ماحملت .
صارت تدلل هواي . ودايما فوگ بغرفتها ..
واشوف امي وهي جبيرة تشتغل بمكانها حتى ماتجيها حجايه لان بنت اختها ..

جدتي .. ولج نعيمة هاي راح تبقى معلگة فوگ . ادري وحد عن الناس الحملت .
اشو كلنا حملنا وشلنا بيوت مااتذكر گعدنا وسكتنا ..

نعيمة .. اي عمة خطيه تتعب من الدرج وماتگدر تنزل .
واني والبنات مكفيات شتردين منها ..

جدتي .. شفتي هاي من جانبج سترتيلها لو فجر عدها امتحان ومااشتغلت تگلبين البيت على روسنا ..

نعيمة .. اوووف عمة . قابل حالة فجر مثل ايات . ايات حامل خطيه ..

ساهر .. بالصدفة سمعت كلامهن واني داخل .  سلمت وصعدت .
شفت ايات گاعده ع الجربايه وموبايلها بيدها وتاكل فواكه ..

-شلونج اليوم ..
-زينة انت شلونك .
-تعبان ماتگومين تحضرين الي شي اكله . لان مستعجل -هسا راح يصبون غدا واكل مااگدر انزل واصعد ..
-اگلج مستعجل تگليلي انتضرهم يتغدون ..
-اوووف ساهر مو تدري بيه حامل واخاف على ابني ..
اني حتى الدوام اخذت اجازة لان تعبانه ..
-اگلج ايات اني ماگتلج احرثي وبعدين اشو هاجر اختي من تحمل ماتگعد وتسكت شايله بيت عمتي شيل ..
-صار گايمة لان اعرف ماترتاح الا اگوم ..

دخلت سبحت وطلعت وايات ماكو ..
نزلت وراها . لگيتها گاعد ع الكرسي وامي تصب ..

بنين .. اگلج ايات مايصير هيج . ندري حامل . بس مو مستغله امي بكل شي هذا دلال يسموه .
احنه كلنا دوام الصبح ع الاقل انزلي ساعديها .

ايات .. يا وين مااشتغل هي بس اليوم ظهري يوجعني لان انتي ممداومة وشفتيني راح تلزميها عليه ..

بنين .. والله شكلج مايوحي بس اليوم ماصار شهرين على حملج وانتي صايره شسمنج ..
بس ها اگلج منا لمن تجيبين اذا هيج تبقين گاعده وتاكلين شفل مايشيلج ..
-يا تحسبين عليه الاكل شماكله اني .  اشو حتى مايثبت ببطني من ورى النساوة ..

صحت بيها .. ايات موگتلج انتي صبيلي . ليش امي تصب امي .. اني گلتلها يمة . لان جنت اگلب بالگدور وصبيتلك وياي والله هي ماقبلت ..

سكتت لان امي دافعت ومااگدر احجي .
ايات .. ساهر تتغدا هنا لو فوگ . حتى تصعد الصينيه مااگدر اني اصعدها ظهري ..
ساهر .. لا انتي صعدي ارتاحي اني راح اكل هنا واطلع
ايات .. يعني هم مااشوفك شنو هاي ..
ساهر .. ايات اصعدي كافي دلال . بليل يمج قابل طاير

اخذت نفس قوي .. يمة لاتخليني اتعصب . دلالج الها كافي راح تمرديها عليه ..
كلشي تگلج تگوليلها صار .. بعد يومين تجيب هم تشمر الطفل عليج وماتربيه .. ترى اني ساكت ومتحمل واگول خطيه حامل ومااجرحها ..
بس الامر زاد عن حدة ومااتحمل بعد ..

-ادري هاي جدتك قرت براسك عليها .. ليش انت گاعد يمنه وتشوف شيصير بالبيت ..
-ياجدتي هو اني وين شفتها .. اولا سمعت سوالفجن قبل شويه كلها .
وبعدين ايات وياي ماتگوم وتدلل .
ملابسي صارلهن يومين بالحمام ممغسولات .. ومااحجي اگول خطيه ..
بالبدايه جانت كلمة مني تگوم ركض هسا ماادري شبيها كل الي تحمل هيج ..

-اي يمة حامل عن حامل تختلف . وهي حملها صعب خطيه . ماتعرف شيصير بينا من نحمل نشوف الموت انتو الزلم شمدريكم كله ع الجاهز .

-هاي هي يمة . حتى غدا بعد مااتغدا هنا . لان من اشوف الغلط مااعرف اسكت وانتي تجبريني اسكت .
اطلع احسن الي ..

بدلت وطلعت ..
خابرت على رعد ..
-وين انت ..
-بالبيت شلون مطبگ سمج يفوتك تعال وياي ..
-اي بعلي جوعان بس خاف ازحمك ..
-دتعال ولك شنو تزحمني اكو فرق بينا . ماراح اتغدا 
انتضرك ..

رحت البيت رعد هو متزوج قبل فترة ومرتة حامل بالثامن وحسب ماگال حالتها صعبه لان عندها قلب .
دخلنا اجت البنيه لابسه عباتها وسلمت عليه ..

-هلا خويه شلونج الحمد لله على سلامتج . سمعت من رعد جنتي داخله مستشفى والله عساس اجيب المرة ونجيكم بس هي هم حامل ومريضه ..

-لاخويه معذورين سؤالك كافي رحم اللخ والديك ..
رعد .. يله ام علاوي صبيلنا غدا واني اجي اخذة ..
ساهر .. ولك خطيه فوگ ماهي مريضه واني اجيت وزودتها عليكم ..
رعد .. گول يله يمعود هي اصلا ماتقبل الا تطبخ بإيدها واليوم اشتهيت سمج وعلى اساس اخلي امي تطبخ وماقبلت ..

راح رعد جاب الغدا . مسويه مطبگ سمج وزلاطه وروبه وطرشي وخضره .. ونسيت روحي بالاكل لان كنت جوعان والاكل يشهي . ومطبگ سمج بعد ..
#بقلمي_الكاتبة_شمس
………………………… ..
مناك رحت للمحل ..
شفت ماهر هناك ..
-ياهلا بسيادة الضابط نورت المحل ..
-هلا خوي ههههه موالهلدرجة وين جنت صار ساعه منتضرك ..
-اي جنت يم رعد تغديت عندة ..
-اي سألت عليك گالوا عندك شغل وتالي يم رعد تتغدا .
-ياخوي شردت من المناگر مال النسوان .
-اوووه ليش تكرهني بالعرس عود اني اجيتك علمود هاي السالفه ماحجيت وي ابوي .
اتخرجت وصرت ضابط عوزي بس مرة ..
-اي من ارجع احجي وي امي . گالت اني اححي وي ابوك ..
-صدگت امي تحجي هي ماتريدها ..
-لا معليك هي وعدتني واجة الوكت تنفذ وعدها ..
-دريت بلينا قدمت اتعيينت بعقد ..
-ها بالخير ان شاء الله التثبيت ..
-اي دور اشوفها براحتي . هذا عمار دمرني مايلام ابوي يكرها ..
-عوفنا من هذا الحجي .. وين خلوك بيا مقر ..
-ببغداد .. بس سمعت اكو اسمااء طلعت بالتاجي وبعد ماادري ..
-لامااريدك هناك . الوضع مو زين وخطر عليك ..
-الله كريم مايصير الا الي كاتبه الله . بس خلوني اتزوج بالاول ..
-هههههه لاحگ ع شلاع الگلب خيو . اگلك راح احجي وي النقيب يشوفلك مكان امن . حتى تلحگ تشوف عرسك ههههه.
-اي والله اخيك عندة جفاف .. حتى اذا بوسط بغداد قابل اخذ مريتي واشلع عن عمار ومحمود ومشاكلهم .
-هسا بالاول خلي يقبل محمود يخطبها وعمار يوافق ينطيها يله عود تقرر تنهزم منا ..
-هي ماتحلها الا سلطانه فخريه ..
-اي هم حاجيتها تگول غير ابوك يلين راسه ويقبل يروح وياي يخطبها قابل اروح وحدي حتى عمار يعاند وماينطيها ابد ..
-اووووف ليش هيج حظي .
-صوج گلوبنا مو حظنا . دوووم يختارون النا شلاع الگلب -ع الاقل انت حصلت الي تريدها الا اني ..

من گال هيج سكتت وغيرت الموضوع . ماردت شي يفتح جروحي الماضيه . بعد ماجاي احاول اتأقلم واتعود وانسى ..

كملنا شغل ورجعنا للبيت ..
اول ماوصلت اخذت امي للاستقبال وحجيت وياها ..
-اگلج يمه شسويتي على شغلة ماهر ..
-ياشغلة؟؟
-شبيج يمة لو هاي السالفه لان ماتهمج نسيتيها ..
-هااااا قصدك على خطبة لينا…  اي حجيت وياه ومعاند وگال اطلگج اذا فتحتي الموضوع مرة ثانيه ..
-يممممممة يطلگج .. ليش عندي احساس اصلا مگايلتله
-يا يساهر شو صاير ماتحترم امك وتجذبها بعد . ذاك ابوك واسأله مو كلشي ومدخليني بالنص ..
-جا وين الوعد .. لو خلصت شغلتج وضمنتي بنت اختج بحظن ابنج والباقي مايهمج ..
-شنو هذا الحجي . استحي .. گتلك حاجيته وماقبل . تريد انت احجي وياه ..
-لا اني مااحجي . اعرف منو اليحاجيه . بس سواء رضيتوا او لا لينا الماهر . وتزفوها بيدكم اله ..

امي هزت اديها وگامت ماعجبها الحجي .. ويمكن ضامنه ومتأكدة هالشي ماراح يصير ..

اول ماطلعت عين ماهر عليه ويأشرلي .. سويتله حركة بمعنى ماكو شي ..
عبس وجهه خطيه .. وحتى عشا ماتعشا ..

استغليت جدتي وحدها بالغرفه . والبنات كلهن بالمطبخ يشتغلن .
رحت يمها ..
-جدة فارغة لو لا ..
-اي يمة تعال قابل شايفني احرث لو اشتغل . هاي گعدتي ليل ونهار حتى رجليه ماتن من الگعدة ..
-شتگولين اخذج الجمعة الكربلاء هم تتمشين وهم تزورين -علواه يمة . مشتهيه ازور احفاد الرسول واگعد بحضرتهم .. وتاخذني مناك للنجف .. صار هواي مازايرة جدك ..
-غالي والطلب رخيص ..
بقينا نسولف شويه .. وتالي فتحت وياها موضوع ..
-صدگ جدة ماهر اتخرج واسمه راح يطلع ويداوم ويريد يتزوج ..
-والله هذا مناي كلكم تتزوجون واشوف اولادكم ..
-بس تعرفين الي يريدها منو . والمشكله الطرفين معاند ومايحلها الا انتي ..
-يوم المنى الي لينا تصير مرتو الماهر . ادب واخلاق وجمال . شايله صفات عمتها كلها ..
-منو قصدج عمتي ازاد ..
-اي يمة حبايه ومگسومة .. صحيح فجر تشبه امها بس لينا تشبها بكلشي وحتى صفاتها . هادئة ومطيعه ..
-اي صحيح اتذكرها بس مامعاشرها هواي لان عمي جان مبتعد عنا شويه ..
-اووووف الله لاينطي البعدهم عنا .. عوفنا من هاي السالفه ولاتنبش جروحي ..
-هسا شگلتي بسالفه ماهر ؟؟
-والله يمة قبل كان الكبير الة كلمة بالبيت .. والكل يسمع كلامة . بس هسا كبرنا ومحد ياخذ بحجينا ..
ابوك احجي وياه يگلي يمة لاتتدخلين .. ولو ادري اكو من يوز براسه ..
-عمتي شگالتلج ..
-عمتك هم حايرة . منا اخوها ومناك زوجها .. تگول لو باقية وكاتلني داعش احس من هالعيشه ..
عبالي افرح بجيتها يمي . بس اثنينهم راسهم يابس ومانسوا حقدهم .. وراح يطينون عشيتها وعيشتنا ..

-گولي ياالله جدة .. اذا تطلب الامر اني اروح احجي وي عمي عمار بس اريدج انتي وياي حتى تأثرين عليه ع الاقل ينطيج خاطر اكثر منا لان عمته ..

-الله كريم خلي يثبت بمكان وبعدين نروح ..
-عمي حمزة شخبارة هم خابرج ..
-اي خابرني يگول التحاليل والسونارات تبشر بخير والله كريم ..
-الله كريم .

اجن البنات دخلن للغرفه .. اني اترخصت وگمت
صعدت للغرفة ..
بدلت واريد اگعد ع الجربايه ..
گالت ايات .. سهوري حبيبي ولو تعبان اشتهيت فراوله
-هسا ..
-اي كلش اشتهيتها ..
-راح اخابر عامر يجيب وياه هو طالع ..
-اوووه عامر ل 12 مايجي واني هسا اشتهيتها هسا روح حباب ..
-اتنهدت وگمت صار هسا رايح .
لبست دشداشتي ونزلت ..

- هايمة وين
-ماكو شي طالع اجيب غراض واجي ..

رحت افتريت .. وين الگي هسا . بقيت ادور الى ان لگيت فراوله ..
حتى ابو المحل ضحك عليه من گتله المرة مشتهيه .
افتهم السالفه ..
گال انت زين اشتهت فراوله .. اني بنص الليل گالتلي مشتهية سمج زوري هسا تجيبلي ..
وللصبح تنوح وتبجي ..
تالي طلعت الصبح جبتلها . ونضفته وسوته واكلته بالريوگ ..

ساهر .. لا عمي جا الفراوله ارحم .. ههههههه .
رجعت للبيت ..
غرفة جدتي مفتوحة ..
صاحتني ايات .. ساهر انه هنا .

استحيت اخذ العلاگة يمهم لان ماجايب كمية هواي وماعبالي ايات جوة ..

خليت العلاگة ع الدرج ورحت ..
-ها شو نازله عبالي فوگ .
-اي حبيبي ضجت ونزلت يم البنات .. جبتلي فراوله .. صفنت بوجهه .
-ها .. اي جبتلج .
-حبيبي ماهان عليه اشتهي . راح يركض جابلي واجه .
اوووف مشتهيتها حيل ..
انطيني ايدك خلي اگوم ..

براء .. اني هم اشتهيت يس حرامات ماعندي رجل يجيبلي ..
ساهر .. عرفت ايات تتقصد تحجي هيج حتى تغيظ فجر .
وعبالها فجر تحبني لو مهتمتلي . 
هي حتى ماانتبهت الحجيها من حجت ..

وعقاب الها ..
رحت للدرج جبت العلاگة . خليته بمصفي وغسلته وجبته .
يله ايو مادامج هنا يم البنات . هاجن اكلن سويه ..
باوعت الجدتي . 
جدة تردين ..
-لايجدة مااريد من هذا مااحبه .. بس اذا اكو رمانه تفاحة اي اكل ..
رحت جبتلها من الثلاجة واجيت ..
وتگابلنا اني وياها بالصينيه نفلس رمان وناكل ..
والبنات ياكلن وي ايات ..

صحيح ايات مرتي وحقها عليه .. بس مااحب كيد النسوان وسوالفن الماسخة . ايات النهار كله صاعدة فوگ وتصيح ظهري من صار بيها كيد وحبت تغيظ نزلت وصار كل الحيل بيها ..

كملنا اكل ..
گلتلها يله ام سلطان تگومين لو بعدج ..
-يوووه ساهر كم مرة گتلك لاتصيحلي ام سلطان محلو هالاسم ..
-هجم بيتج يجدة شبي اسم سلطان زينة الرجال جان . واخذتي حفيدة الماخذ طبعه ..
ادعي ابنج يطلع عليهم احسن ممايطلع على خاله ابو گذيله ..
-هسا اني شحجيت وانطتيني جريدة . ابني واني حرة بي والله تحبون تتدخلون بحياة غيركم ..

صحت بيها .. اياااات الزمي السانج وگدامي لفوگ يله

بنين .. هاي صدگ اتكبرت وعلا خشمها ..
براء .. اي مو راح تجيب ولي العهد .. الي يشوفها يگول ابن الامير وليام ببطنها ..

ساهر.. انلصمي انتي واعرفي شتحجين . صايرات ماينعطى الجن وجه ..

بست راس جدتي واستسمحتها وطلعت ..
صعدت لفوگ ..
شفتها لافه راسه وتبجي جوه البطانيه .
اگعدي ايات شلون تحجين هيج وي جدتي ..

-من حجت على اخوي ماحجين انت .
-ضجتي لان حجت على اخوج . بس من قلدتي على اسم جدي واتعيبين ماحجيت اني . گلت مااريد اكسر بيج گدام واحد ..
شحجيت اني وياج ايات .. گتلج معليج بواحد . خليج وياي وبس ..
بتصرفاتج هاي جاي تأزمين الوضع وتبعديني عنج ..

-اني شعليه .. اذا جدتك بكلشي مخليه روحها . تنلام خالتي من تگول عجوز البيت ..
-ايااات احترمي نفسج ولاتخليني اتجاوز عليج .. جدتي خط احمر هالمرة حجيتي عليها المرة الثانيه تلگين روحج عند بيت اهلج ..
اشو شايفه نفسج من يوم الحملتي . ترى مو عبالج بحملج تلوين ذراعي . لا اصحي اني ساهر ..

تتذكرين الاتفاق الي بينا ..
گتلج راح اجي اخطبج بس لاتنتضرين مني شي اكثر من هيج ..
بس من يوم الي تزوجنا خلفت الاتفاق وبديت وياج صفحة جديده وردت اعيش حياتي وياج ومن حملتي الدنيا ماساعيتني ودللتج ..
بس دلالي انگلب عليه وطال السانج ..
هاي اخر مرة اگولها ..
انتي مرتي وام ابني لاتخسريني بسوالفج وكيدج مالج دخل بأمي ولا بفجر ..
حياتنا تخصنا لاتدخلين ثالث بينا ترى تفشل وينتهي كلشي بلمح البصر ..

تركتها وطلعت للاستقبال نمت ..
مر يومين علاقتي بيها فاترة .
حتى من رحنا الكربلاء والنجف ماراحت ويانا ..
ونبهت امي تتركها وتكف اديها عن حياتنا ..

بعدها التحقت للانبار ..
بعد كم يوم من التحاقي .. خابرني ماهر ..
-الو هلا بالضلع شلونك بشر شكو ماكو ..
-لاتسأل الدنيا اسودت بوجهي ..
-شكو ؟؟
لحيت على جدتي نروح نخطب لينا وراحت امي ويانا بأمر من جدتي ..
بس عمي عمار ماقبل ..
وكيان طفر بالوسط وطلب فجر بدل لينا ..
گال تنطونا مرة ننطيكم مرة ..

من گال ماهر هيج .. احس ضربه اجت على راسي واني واگف بالشمس والحر . احس عيوني غوشت .
گاله فجر شنو ..
-شبيك ساهر . اگلك كيان شرط على جدتي ياخذ فجر مقابل لينا ..
-خلص ماهر روح انت اني عندي شغل.  
گمت اروح ارجع ومااعرف شأسوي ..

اخر شي رحت للمسؤول مالتنا .. گاله جدتي مريضه وحالتها خطرة ولازم امشي اشوفها ..
عاد الرجال اتعاطف وياي وگال روح وماعدها الا العافيه بسرعة لميت غراضي ورجعت بنفس اليوم الاهلي ..
#بقلمي_الكاتبة_شمس
يتبع… ..
……………………………
هلا حبايب ..
هواي دااشوف انتقادات الفجر ..
ترى فجر مراهقه ومشاعرها ماثابته .. وماكو ام او اخت عندها توجهها ..
مثل متشوفون الي ربتها جدتها وهي اكبر منها بالعمر وماتگدر تشكيلها او تحجيلها .
البنيه تحتاج احد من عمرها او اكبر شويه .حتى ماتخجل وتفضفض اله ..
والكل يحاربها ومايريدها .
وبنات عمها مبتعدات عنها رغم همة عايشين نفس البيت
فلاتحكمون على تصرفاتها ..
ولاتقارنوها بأيات ..
ايات مو بعمرها متخرجة ومعلمة وواعيه لكن تصرفاتها مرات مثل فجر او اكثر ..
يعني الحكمة ووزن الامور ماتنقاس بالاعمار .
يمكن هذي المراهقة راح يكون الها دور اكبر واوعى من غيرها ..
تابعوا الاحداث واحكموا حبايب قلبي .
احبكم كوووماااات 😚