رواية ساهر الفجر الفصل الثلاثون 30 - بقلم الكاتبة شمس السعدي

هلا وغلا حبايب واخيرا وصلنا للنهاية 💕
//// البارت الثلاثون والاخيرررر ////
#ساهـر_الفجـر ..
#الكاتبـة_شمس ..

هالشي اسعدنـي اكثر مما اسعدهم .. لان احس واخيرا لگيت عائلتي الي كنت ابحث عنها واحاول انتمي الها ..
تعبي كله كان راحة نفسيه مقابل ضحكاتهم وقبولهم الي بوسطهم اما عمو كلما يجي يبوس راسي ويگلي مااعرف شلون اكفيج حقج ..
وساهر يگلي شمسوي عند الله الي نطاني هيج جوهرة
فـكان يحاول يخفف عني التعب .. يطلعني نفتر بالهند الخضار والجو يخبل .. وعامر ويانا والمترجم.
يبقى عمو يم عمتي واحنه نطلع ..
اشتريت كم ساري يخبلن الزواجي .
واشترى للبنات هدايه والعمتي ..

بعد ماعمتي بدأت العلاج وگامت تستجاب اله ..
حجزنا ورحنا الدكتور ساهر ..
فحصة وسوالة رنين ..
گاله حالتك جيدة جدا .. لكن تبقى الراحة عامل مهم حتى نبعد الانتكاس او الرجوع لنقطه البدايه ..

ساهر كانت بباله شغله وحدة وسأل الدكتور عنها ..
-دكتور زين اني وراي زواج اگدر امارس حقوقي بشكل طبيعي لو هذا الشي يأثر على ظهري ..

الدكتور باوعلي وضحك .. واشرله عليه وگاله هذي خطيبتك..  طبعا احنه معانا مترجم ..

گاله اي هي ..
گاله اگدر احجي گدامها عادي .
ساهر .. اكيد هي اكثر وحدة لازم تتطلع ع هذا الشي ..
رد الدكتور .. جيد اذا راح اگلك تگدر تمارس هالشي لكن مو بكثرة بالوقت الحالي ..
وبالالتزام بالعلاج والراحة مايأثر ابدا ..
لكن اعيد واكرر .. فترة الزواج تكون مميزة والعرسان الجدد يحبون الكثرة مو تتهور وخلي بالك من صحتك ..
باوعلي واشر وحجة كلام ماعرفتة ..

گلت للمترجم مافهمت ..
ضحك المترجم وگال .. يگول اذا صار شي عليه اانتي المسؤولة مو تتعبيه ..

الصراحة مافهمت لمن ضحك ساهر وغمزلي ..
ياااي اتمنيت الگاع تنفتح وتبلعنـي ..

انطاه علاج اضافي وقت الحاجة وسأل عن عمتي ..گاله ساهر بحماية الله ..

عمتي استمرت بالجرعات الكيمياويه ..
كنا نطلع للفندق وبوقت الجرعة نرجع للمستشفى ..

اتصل ماهر ع ساهر وحجة وياه .. ساهر فرح وگال الحمد لله ..
كلنا عيونا عليه نريد نعرف شكو ..
گال مبروك حبيبتي ناجحة وبمعدل 93 الدنيا ماسعتني من الفرح . وحضنته وابجي ..
گال بهذي المناسبة راح اطلعكم اونسكم ..
طبعا اكلهم مطيب مثل اكلنا بس اجوائهم وحفلاتهم حلوه وتونس ..

بعد شهرين اتحسنت عمتي والنسبه قلت حيل .. والدكتور گال النتائج تبشر بخير بس لازم فترة وترجعوها لهنا نسويلها تحاليل اللازمة ونتأكد ..
قررنا نرجع للعراق ..
البيت كان ضجة بالخطار وكلها ملتمة هناك ..
بنين ورعد وابنه هم اجو ..

من رجعنا سوينا سنة جدتي لان صادفت واحنه بالهند واجلوها بسببنا بنفس الاسبوع سويناقراية وعشا وثاني يوم طلعنا للنجف ..
معقوله مرت سنه واني بدونج يغاليه ..
كنت اضن انه ماراح اعيش بلاج ..
مرت عليه ايام صعبه وايام حلوه .. وبكلهن اتمنيت وجودج يمي ..
لاتصدگين بيوم انساج لو ابعد عنج .. اني راحتي وسكينتي من اجي هنا واحجي وياج ..
بالگوة ساهر سحبني منها ..
وگالها جدة ادعيلنا .
بعد اسبوع نبدي حياة جديده وانتي ماموجودة يمنا ..
تفاجأت من گال اسبوع شألحگ بيها ..

من رجعنا من النجف عمو گال بسرعة جهزوا اموركم وتزوجوا حتى نفرح بيكم لا راح يوازينا محرم ..ارتاحينا كم يوم وبدينا نجهز الزواجنا .
كانت بنين تطلع وياي اشتري ملابس واجهز واشترينا الذهب . وفرشات للغرفه واحتياجات هواي مانلحگ
كان رعد ياخذنا وساهر وياه لان مايگدر يسوق .

بنين فرحتني من گالت رعد بدأ يستجيب الها ويبادلها الحب والمشاعر ..
وحتى يدلعها ويطلعها ويسميها ام علاوي ع اسم ابنه ..
فرحت من سمعت حياتها مستقرة ورعد عرف قيمتها .
لان فعلا بنين انسانه تستحق السعادة ..

اجت الغرفه الي كنا موصين عليها نازكة وحلوة .
لونها صاجي بس فخمة ..
الكل جابلنا هدايا مقدما ..
ماهر جاب ثلاجة ..
وبنين ورعد جابو بلازما ..
والثريات السقفيه والجداريه ع هاجر ..
بس عمو حمزة ومريم جابولي سوار .
وعمو محمود جابلي شباحية ..
وحبيبي عليه سيت ذهب من طلعنا اشتراه .

كلما يقترب الموعد اتوتر اكثر .
وخاصة الوقت ضيق ومااعرف شلون لحگت حتى الكل كان يساعدنا حتى براء الي ماكنت متوقعه مساعدتها .

اخذني البنات للصالون صبغت شعري اشقر رمادي وخصل سلفري .. واني بيضه حيل طلع حلو عليه ..
بس ماخليت ساهر يشوفه ..
وهو خطيه يركض وراي ومايگدر بس حتى يشوفه ..
گتله والله الا بالزواج ..
مابقى للزواج بس يومين  ..
رتبت اموري كلها ..
وفرحتي زادت من شفت خالو زياد وزوجته وبناته عازمهم ساهر ..
احس نفسي طايرة واكو احد من اهل امي يساندني .
حظني خالو وگال شتتوقعين اترك احلى يوم بحياتج ومااحظرة .
والبنات هم فرحانين لان راح يحظرن زواجي ..
صعدتهن يرتاحن وبدينا نجهز ..
قررنا نسوي حفله الحنه والزواج بيوم واحد بالقاعة ..
بس الي لفت انتباهي ..
ساهر ضايج ومو ع بعضه ..
الكل فرحان ويرگص بس هو احسه مهموم ولاعبالك ساهر الي قتل نفسه حتى ننجمع ..
لليل وقبل يوم الزواج ..
راسلته ..
گتله اريد اشوفك . اني فوگ بغرفه براء ..
ولان ناس وخطار عدنا مگدرت انزل واحجي وياه ..

مافتح الرساله .. تخبلت اكثر ..
نزلت . شفت عامر ..
گتله اريد ساهر . گله فجر تريدك بالحديقه ..

گال .. خلي الولد يستمتع بالعزوبيه لاحگة باجر ونكدي عليه ..
گتله عامر لاتضوجني صيح ساهر بسرعه ..

راح ورجع .. گال يگول خليها تصعد وتنام منا ناس ومااگدر اگوم عيب .
………………………………………… .
صدگ ضجت ..ليش ساهر هيج يسوي ..
اكيد اكو شي صاير ..

صعدت البنات كلهن يسرحن شعرهن والي تشير والي تحظر للحنه ..
الا اني بعالم ثاني ومقهوره ..
معقوله ساهر بي شي . اخاف مريض وميگلولي .
گلت البنين ..
گالت لامابي شي . قبل شويه راد جاي . بس شفته ضايج سألته گال لا مابيه بس راسي من الهوسه والتعب
عذرته وگلت يمكن صدگ تعبان ونعسان ..
حاولت انام ماگدرت وگمت اتگلب ..
اجت رساله من ساهر ..
-فجر كيان هم اتواصل وياج او دز شي ..

استغربت ..
رديت .. لا ابد ومايعرف رقمي لان جديد . ليش صاير شي ..
-گال لاهيج نامي انتي تصبحين ع خير ..

القلق اكل گلبي اتصلت عليه رفضه ..
اوووف بعد شينومني هسا وانت شمرت عليه قنبله ورحت يساهر ..

ثاني يوم وحتى ماعرفت نومتي شنو ..
نزلت بسرعه عبالي اشوفه بس ماشفته .
وبحجة راح للحلاق والحمام السوگ ..

ساعتها انقبض گلبي حيل .. ليش يسوي هيج .
وليش سأل ع كيان . معقوله يشك او سامع شي .

تريگنا وكملنا . عمتي گالت هم يله تلحگن ترحن للصالون لان الحنه تبدي من وقت ..
اخذت لينا ورحت ..
بالطريق گلتلها . ع ساهر وسؤاله عن كيان ..
گالت بس كيان هاجر المانيا مو هنا ..

ماعرفت شلون بدلت وشلون جهزت وسوتلي ام الصالون بس صافنه وافكر والخوف مسيطر عليه ..
سكوت ساهر مايطمن ومايبشر بخير ..

من الصالون ورحنا للقاعة .. الكل منتضرنا هناك .
والاجواء تخبل . فرح وهلال ودگ ورگص ..
كنا مسوين مولد .
وكل شويه البس بدله من غير الساريات الي اشتريتهن من الهند ..

اخر شي اجت بنين گالت راح تجي الزفه البسي البدله بسرعة ..
لبست البدله اوڤ وايت والردن كيبور ومنفوشه كلش حلوه ..
وكل الي تشوفني تصلي ع النبي .وتگول هنيال ساهر ع هيج جمال ..

ام القاعة فتحت اغنيه بالديجي دبگة ..وي دخلت ساهر للقاعة ..
لبسني البنات البرنص ع راسي والغشاوة ..
ودخل حبيبي وكانت المفاجأة .
لابس لبس خليجي ويخبل طالع بيه ..
اخذنا صور بالقاعة وخفت عليه من عيون البنات ..
هو من غير مايحجي ..
او يشوفني ..
لزم ايدي وعصرهن .. وگال يله نروح .
حسيته عصر روحي مو ايدي ..
صعدنا بالسيارة وماهر يسوق . وعمو يمة گاعد .
وصلنا للبيت بين هلال ورگص اول مادخلني رجع طلع .
لان مسوين عشا والرجال كلها منتضرة بالشارع ع گد ماعازم ناس ماكفى الاستقبال .
وخلو كراسي وطاولات برة ..

بقيت شويه گاعد ودخلتني مريم للغرفه . گالت ارتاحي. .بين ماخلصوا العشا .
اجة ساهر ..
اتقرب مني رفع الغشاوة وصلى ع النبي ..
نزع ملابسة بقى بس بالدشداشة . فتحها دگم الردن مال الدشداشة واجة يمي ..
گال تعاي اساعدج حتى تبدلين اكيد تعبانه ..
راد يفتح البدلة .. گتله لا لاتفتح اني ابدل ..
خفت ليشوف مكان الحرگ استحيت منه ..
عبس وجهة وگال ..
ليش متخليني اكو شي ..
-لا بس… .
-خلص ع راحتج .. اذا تحبين اطلع او اذا تردين روحي للحمام وبدلي ..
-گتله لاابقى اروح للحمام ..
بدلت ورجعت يمة .. لبست ثوب نوم وعليه روب طويل ..
جابوا العشا اكلنا وكملنا رحت غسلت .
لگيته ياخذ دواه ..
اكيد تعب طول النهار واگف ..
راد يتقرب مني ..
گتله اذا تحب انأجلها غير يوم لان شفته تعبان ..
عصب وگال .. شبيج فجر ردت افتحلج البدله ماقبلتي هسا تگولين انأجلها اذا ماتردين فد مرة گولي (بغضب)
انقهرت حيل وانهضمت ..
گتله انت الي شبيك . من البارحة مو ع بعضك ومتحجي وياي وتسألني عن كيان .
واليوم ماباوعت الوجهي ولاگلت حلوه او لا ..

فرك وجهه وگال مابيه ..
لابيك شي معقوله لسا تشك بيه وسالفه كيان مرت عليها اكثر من سنه شذكرك بيها هسا ..

گعد ع السرير واتنهد .. مااشك بيج ابد . ولو اشك ماكملت الزواج ولااحاول اتقرب منج ..
بس هذا الكلب فور دمي البارحة ..
وحتى بالليل گلت الخالج زياد وهو خابرة وطيح حظة ..

بأستغراب .. ليش شسوة ..
دز رساله تافهة مثله ويتحداني عود عباله يخرب ..

گتله .. وشنو هي الرساله الدزها ..
-اتركيها ختولي ..
-لا اريد اقرأها .. واعرف شنو الرساله الي خلت اسعد يوم بحياتنا ينقلب هالشكل ..

-بعد مااصريت نطاني جهازة ..
فتحت الرسائل وشفت رساله كيان اول وحدة ..
كاتب .. لاعبالك اتهنيت بيها اني شبعت بيها قبلك واكيد كلما تتقرب الها راح تتذكرني وتبعد عنك .. بحياتها ماراح تحبك مثل ماحبتني ..
وبقية الرسائل ساهر يغلط عليه ويسب ويتوعدله ..

ابتسمت وگتله .. وانت صدگته مو ..
وضايج من البارحة مني عمود هذا السبب مع الاسف .
تركته وگمت ..
-اجة وراي وسحب ايدي .. اوگفي ..
-اتركني ساهر لاتزودها عليه ..

اوكفي شتتوقعين اسوي .. ادري ثقتي بيج كبيرة واعرفج تحبيني بس ضجت من هذا الكلب .
ولو هنا جان سافرت البارحة ودفرت ببطنه بس طلع مهاجر . والدون گاعد هناك ويراسل ..

عصبت عليه .. مهما كان الي سواه كيان مالازم تنفعل وتضوج هيج .. لان انت تعرفه دون مثل ماگلت وناقص وماراد يخلينا نفرح بهذا اليوم ..
ونجحت خطته ..

-فجر كافي ..
-لا موكافي..  شوف شنو دناقش بهاي الليله .. اذا ابتعدت عنك. فكنت استحي من هاي ورفعتله الثوب ماردتك تشوفها وتشمأز ..
ومن گتلك انأجلها .. لان شفتك تعبان واخذت علاج وخفت عليك ..
وانت گمت تفسر الي سويته بكيفك .. شوكت تفهم اني ماشفت ولاراح اشوف غير عيونك ..
شوكت تعرف ماحبيت ولاراح احب شخص غيرك .
كافي ننبش بالماضي ساهر وخلينا نعيش حياتنا .كافي ..
سحبني الحظنه وباس راسي ..

-وج ينگطع الساني اذا شكيت بيج بيوم .. بس وربي لان ضايج منه هيج سويت ماردت انفعل يمج او تشوفيني ضايج ..
والا يخسى كيان او غيرة اذا يشوهون صورتج بعيني .
انتي فجر ساهر وتربات ايدة ..
انتي بنيتي ورويحتي ..
مااتحملت وابجي ..
مسح دموعي وبقى يبوسني بوجهي وبرگبتي الى ان اقشعر بدني .. وحسيت بأحساس غريب وجسمي نمل ..
رفع ملابسي استحيت ..
نزلتهن همسلي اشششش ..
ونزل ع مكان الحرگ بوسه وگال مااريدج يوم تستحين منها هذي وسام شرفج وعفتج الي مايوم واحد شافها ..

بقى يطمني ويهدأني الى ان…… .. ماحسيت شي الا اني بحظنه نايمة ويبوس براسي ووجهي ويگلي سامحني يروحي اذا ضوجتج ..

انتبهت عليه .. فزيت .. گتله ساهر بيك شي تحس بألم .
ضحك .. واخذني الحظنه .. والله اول مرة احس بروحي زين ومرتاح ..
مادام انتي يمي وبحظني مايصيبني اي شي ..

للفجر گعدني سبحنا وصلينا ورجعنا نمنا ..
عيشني بأحلى ايام ..
دلال وحب ..
وكلة يصيحلي لو فجري لو بنيتي ..
طلعت القبولات وانقبلت .. كلية تحليلات ..
صحيح ضجت وماكنت متوقعه يطلعي هيج ..
بس الكل قنعني بيها وگالي ساهر . افتحلج مختبر وحدج بس تكملين ..

بديت اداوم وساهر رجع الشغله ومحلاته الي تركها ..
عمتي رجعت كملت علاجها وحالتها تتحسن اكثر ..
اما بنين فحامل من رعد . ورعد طاير بيها ..

بعد فترة سمعنا ايات تزوجت من معلم وياه مطلق وعندة اثنين اطفال ..
وبراء خطبها كرار ابن عمتي بتول .. يعني حتتزوج يم هاجر ..
بيتنا صار حلو ومتفاهم مو مثل قبل ..
لينا وماهر بعد ماولدت .
انتقلوا البغداد يم اهلها وهو هم دوامة هناك ..
اني من البيت والدوام وساهر الي يوم عن يوم يتدلل اكثر ويريدني يمة دايما ..
كان ناقصنا طفل والله مارزقنا بي وكنت دايما اگله الله كاتبلنا بيوم وهو يگول اني كبرت واريد طفل يشيل اسمي ..
رغم هو صحته صارت احسن وماكو اي سبب يمنع الحمل .الا بعد سنة من زواجنا ..
الله رزقنا ببنوتة وسميتها فرح ..
وبعد الاربعين . خلاني احمل بأخو الها ..
ولي العهد .. هو صحيح فرحان وطاير بفرح . بس كان منتظر سلطان الصغير ع احر من الجمر ..
ادعولي ربي يگومني بالسلامة .
ويحفظلي عائلتي وحبيبي ساهر .. الي بدأ القصه وحجة اغلب حياته ..
واني كملتها بعده ..
يعني بحياتي ماكنت اتوقع راح اكتب قصتي لولاه وراح اترك القلم اله يختمها هو ..

سأبقى لكِ الحبيب والصديق والروح والنبض ..
سأحتويكي واحتضنكي .. ونعيش الايام سويا بفرحها وحزنها ..
سأبكي من دموعكِ ..
وابتسم من ضحكتكِ ..
سأكون لكِ الملاذ حين تضطرب الاجواء ..
مهما كانت حجم الصعوبات ..
اعدكي ان أكون بقربكِ ..
الى ان يحتويني التراب ..
اعدكي يارفيقة الدرب ..!!

ساهر .. شكرا حبيبتي وضي عيوني وام اولادي وفجري . لان ساندتني باصعب ايام حياتي ..
ولحد الان متكفله بالبيت والدوام وبنتنا صغيرة رغم حملها وتعبها ..
واني الي معيشتني بدلال وماقصرت بيوم وياي ويرجع الفضل والحمد والشكر لله الي جمعني بيها ..
اشكركم كلكم متابعيني وكاتبتنا العزيزة .. على الجهود المبذولة والتعليقات الحلوة والدعاء النا بغض النظر عن التجاوزات الي صارت .ماانكر امي غلطت هواي بحياتها بس مهما تكون امي ..
وحاليا حست بندمها وهمها ابوي واحفادها وبس .
وخاصه فرح تموت عليها وهي الي تعتني بيها بغياب فجر
اتمنى عجبتكم قصتنا واستفاديتوا منها ..
في امان الله ..
#بقلمي_الكاتبة_شمس
النهايــــــــــة
………………………
هلاو حبايب اكيد عرفتوا القصه بدأها ساهر وتكلم عن حياته وحبه الفجر ..
وبعدين تفاجأت بفجر تكملها وتحجي مشاعرها الي مرت بيها ..
وهذا الي انطه رونق خاص للقصه ..
يارب عجبتكم .. واسفه لتأخري بسبب العاصفه والنت الي انقطع ..
تحياتي الكم وانتضروني بروايه جديده ..
الكاتبة شمس .💕