رواية ساهر الفجر الفصل التاسع والعشرون 29 - بقلم الكاتبة شمس السعدي

اسعد الله مسائكم بكل خير احبتي 💕
//// البارت التاسع والعشرون ////
#ساهـر_الفجـر ..
#الكاتبـة_شمس ..

بقينا منتضرين للصبح گالوا هاجر جابت الحمد لله ..
ارتاحينا .. كانت الساعة سبعة الصبح ومانمنا من القلق وهمزين كان يوم جمعه وماكو دوام ..
شويه وسمعنا صوت وضجة ..
تطافرنا اني ولينا لان نامت يمي وبنين راحت وي هاجر لان عمتي نعيمة مريضه وماتگدر ..
طلعنا من الغرفه مرعوبين ..
ياساتر شنو من يوم هذا ؟؟

شفت عمي حمزة يگمز ويصيح .. الحگوا ومايعرف شيسوي خطيه ..
گال .. مريم تخربطت وعندها الم وتبجي . يمكن راح تجيب ..
نعيمة .. يااااا غير عليها السابع ..
حمزة .. ماادري خلي وحدة تجي وياي ناخذها ..

ساهر گال فجر روحي وياهم بس البسي عبايه اسلاميه
لبست عبايتي فوگ ملابسي ولفيت الشال ورحت وياهم .
طول الطريق تعيط وتبجي ..
وتگله خابر امي لو اخواتي يجن…
خطيه هي اهلها بالناحية وبعيدين ..
حمزة .. اي بس نوصل اخابرهم ..

وصلنا واني مااعرف شأسوي ..
خابر عمو ع بنين گالها عمتج بتول هناك يم هاجر . تعاي انتي هنا لان فجر ماتدبرها ..

دخلو مريم للصاله ..فحصتها الدكتورة . گالت عندها طلوگ بس ماكو توسع ..
والاطفال نبضهم ضعيف .. لازم توقع هسا عمليه نسويلها ..
عمو مرتبك ويرجف .. وقع وگالها بسرعه سوولها ..

خفنا عليها وع الاطفال .. وبقينا ندعي ونبجي الله يگومهم بالسلامة انتضرت هواي وماصدگت صار عندها .

دخلت العمليات واحنه كلنا ندعي .
اجة ماهر وعامر ونزلت عمتي بتول .. گالت راح نطلع هاجر للبيت وارجعلكم خاف تردون شي ..

حمزة .. لا ابقي يم هاجر انتي ..
بتول .. راح اوديها يم امها واخواتها هناك ..

گلت الماهر . اخذني اشوف هاجر ونرجع ..
رحت شفت هاجر وابنها وسلمت عليهم وباركتلهم هي وزوجها ..

تالي گالت بنين انتي ابقي هنا انتي وعمتي واني راح اروح وي هاجر .. وللظهر ارجع حتى ترحين انتي ..

نص ساعة . وطلعت الممرضه گالت جابت الحمد لله ع سلامتهم ..
بس الاطفال تعبانين شويه راح ناخذهم للخدج .. عمو حمزة ضاج ونزلت دموعه خاف عليهم ..
گالتله عمتي .. كل الجهال هيج ولأن ماكاملين بعدهم راح يخلوهم بالخدج .. گدرت تقنعه ..
هي راح وي الاطفال واني بقيت يم عمو وعامر ننتظر يطلعون مريم ..
بعد ماطلعوها صعدت وياها وهي تون من الالم وتبجي ع اولادها وبعدها تحت تأثير البنج ..
وتگله حمزة اولادي وين بيهم شي اشو مااسمع صوتهم .
طمنها عمو وگالها يخبلون ومابيهم شي والبنيه طالعه عليج تخبل ..
فجر .. عمو شنو حتسميهم ..
گال مريم گالت اذا ولدو بالسلامة ..
اسميهم ملك ومحمد .. فرحت لان حيسميهم ع اسم بابا .

بقيت الى ان اجت بنين ورجعني ماهر للبيت ..
رجعت تعبانه ولگيت ساهر مانايم منتضرني ..
اول مارجعت .. صاح فجري تعاي ..

ضحك ماهر وگال اني رايح لينتي اشتاقيتلها ونعسان من ورى هاجر ومريم مانمنا سونا فلم هندي ..

اول مادخلت للاستقبال ابتسمتله ..
ضحك ومد ايده .. رحتله سحبني يمة ..
گتله ريحتي كلها مستشفى خلي ابدل ..
گال لاابقي ويشم بيه برگبتي ..اوووف اشتاقيتلج وبالي يمج ..
-اني هم مشتاقه بس نعسانه ..
-اي ابقي يمي ..
-اي وتجي عمتي تشوفنا نصير فلم لا خليني اروح للغرفه .
-وج ياغرفه هو بعد اكو راحة . تلگيها مستشفى صايرة هاجر وامي وبراء . وزوج هاجر هنا .
-اروح بغرفه مريم انام ..
-شلونها مريم والجهال ..
-زينين بس صغار ..
-حضني حيل وگال شوكت يصير عدنا جود ..

باوعتله بأستغراب .. جود منو ؟؟
-ابننا ..
-ههههه غير عساس تريده سلطان ..
-اي ذاك الي راح .. بس هسا غيرت رأي ..
-لا ساهر لاتنسى وصية جدتي كانت تريد ابنك يتسمى سلطان ويصيحولك ابو سلطان ع اسم جدو ..
اذا تريد الطفل الثاني نسميه جود ..
-عود خلي يجي والله كريم ..
-مدامك بخير يجون والا درزن ..
-هههههه يابويه .. مو اخاف عليج انتي ترفة وماتتحملين
-مدام منك اتحمل الموت ومااگول لا ..
-اويلي يابة تعال شوف ابنك شلون مدلل .. وبقى يتغازل ع طريقته ويبوس الى ان غفيت بحظنه وماحسيت من التعب ..

ماصحيت الا ع صوت عامر فززنا ..
گوموا يالكناري فضحتونا ..
ساهر .. انجب لك واطلع منا ..
عامر.. اسف اذا قطعت خلوتك سلطان سليمان بس اهل مريم بالباب اذا تسمح ندخلهم ..

من سمعت صوت عامر .. طفرت وانهزمت من الاستقبال استحيت من عامر ..
تالي سمعت اهل مريم وصلوا وباقية امها يمها واختها واخوها وابوها اجو للبيت ..

رحت الغرفة مريم نمت ..
اجت عمتي گالت گومي سوي غدا الاهل مريم . براء نايمة واني ملتهيه وي هاجر ..

گمت واني ميته تعب وعندي دراسه ولازم ارتاح ..
طلعت سمك من المجمدة .. ملحته وتبلته وخليته بالفرن ..
وحميت التمن والمرگ . ودااسوي الزلايط .
نزلت لينا ..
گالت روحي نامي اني اكمل الباقي .
حسيتها نقذتني .. رحت ركض للغرفه نمت ماگعدت لليل
شفت البيت مخبوص بأقاربنا كلها جايه تشوف هاجر ويباركون العمو حمزة ..

سلمت ورحت للمطبخ شفت البنات يحظرن عشا .. ساعدتهن وكملنا ..
رحت ادرس عندي هواي تحاضير ..
#بقلمي_الكاتبة_شمس
……………………………………………… ..
مرت الايام وهاجر رجعت البيت عمتي ..
بس مريم بعدهي بالمستشفى وي اولادها ..
كان المفروض تجي المشيه ويگطعون المهر مال بنين بس الي صار خلانا نأجلها ..
بعد اسبوعين تحددت المشيه ..
صحيح ماكو حفله لأن الطرفين حزنانين ..
بس اخذنا بنين للصالون رتبت حواجبها وسوت مكياج خفيف لبست فستات بيج لان فتحت حزنها .
وهي شويه مربربه وبيضه طلعت تخبل ..

اني لبست فستان اسود مخصر ع الجسم ولفيت الشال وساهر تخبل ..
يگلي شطالعه راح تموتيني ..
وساعة يغار ويگلي الثوب گصيف البسي شي عليه .
گتله حبيبي ماكو رجال يدخلون بس نسوان .
واذا دخل رعد البس شي وربي متشوف البنات كلهم لابسين بناطير وضيق ..
عاد بالقوة اقتنع ..

اجت المشية وكملوا .. گالوا راح نعقد الهم .
بنونة حبيبتي ترجف من التوتر .. رغم فرحتها برعد صار الها ..
عقدو وكملوا ..
اصرت ام رعد يدخل رعد يلبسها الذهب ..
دخل رعد سلم عليها وباسها براسها وگعد ..
كان مايباوع من التوتر او شي ثاني مانعرف ..
رغم هي ملاك وگاعده يمة ..
بس هو لبسها بسرعه وراد يگوم .. بس امة اجت وجابت ابنه خلته بحظنه .
عمتي نعيمة ضاجت وتبجي وتگول راح يظلمون بنتي بهذا الطفل ..
خزرتها عمتي بتول حتى تسكت ..
خلصوا وطلعوا كانت بنين فرحانه بالحلقه ومامصدگة رغم برود رعد اتجاهها ..
اني ضجت عليها حيل .. ودعيت الله يهديه ويحبها مثل ماتحبه ويسعدها ان شاء الله..

بعد اسبوع طلعت مريم للبيت واولادها بصحة زينه ..
عمو ذبح خروفين السلامتهم ووزعهن ..
كانت الدنيا ماسايعته ..

ساهر اشترالهم سريرين للاطفال وردي وازرق حلوات حيل وصى عليهن من بيج ببغداد ..
اني وياه اختاريناهن ..

عمتي نعيمة صحتها تدهورت وحالتها سائت وقرر الدكتور يسويلها عمليه ويقلع الغدة ..
حددوا العمليه ببغداد وسافرت هي واختها ومناك تروحلها عمتي ابتهال وماهر هم يمهم ..
بقينا كلنا خايفين ومنتضرين تدخل للعمليه .. ساهر يتواصل وي ماهر .. والقلق مبين عليه ..
شفته ضايج ..
گتله ليش متحجي وياها ..
ساهر .. ماكو داعي جاي اسأل ماهر عليها ..
فجر .. ساهر لاتعاند .. لاسامح الله هاي عمليه ومانعرف شيصير مايصير عليها .. ماتتندم بعدين .
لاتخليها تدخل للعمليه وانت زعلان وماتحجي وياها ..
ساهر .. فجر كافييي لاتضغطين عليه ..

لزمت ايده وبوستها .. الخاطري ساهر اذا تحبني اتصل واحجي وياها ..
اخذ نفس وگال .. اوووف منج تدرين بيه مااتحمل نضراتج هاي ..
روحي اطلعي واني اتصل .
تركته وطلعت . اعرفه يكابر ومايتحمل بس الي سوته خلاه يصبر ومايحجي وياها ..
ماهر يگول كانت تبجي وخايفه من اتصل ساهر بيها وطمنها ..ارتاحت وهدأت ..
اعرفها تحب ساهر اكثر واحد بس ماعرفت شلون تحتويه

بعد الانتضار اتصل ماهر وگال طلعت وحالتها زينه ..
عمو محمود هم رغم بعد شايل منها بس كانت ملامحة مبين عليها الخوف والتوتر ..

مرت الايام وعمتي رجعت وحالتها احسن ..
البيت نوعا ما عم عليه السكون والهدوء .. كلنا مشغولين بالتحضير الزواج بنين ..
اني بين الدراسه وبين اساعدهم .. وبين ساهر الي گام يراهق عن كبر .. ويزعل اذا انشغلت عنه ..

حبيبتي بنون ماگدرنا نسويلها حنه بس بيناتنا حنيناها وسوينالها صينيه وشموع ..
رغم كل هذا كانت الفرحة بعيونها ..
مع انه رعد ولايوم اجة وشافها فترة الخطوبه غير بس من عقدوا محكمة قبل الزواج واجو ..
كل التجهيزات . كانت تطلع هي واخته تجي تاخذها ويرحن للسوگ ..
وهي بين الدوام والتجهيزات ومرض عمتي تعبت هواي .
كان فراگها صعب علينا وعليه اكثر شي ..
لان هي الي وگفت وياي بكلشي .
بحيث من طلعت مااتحملت حضنتها وابجي وهي تبجي .. وتوصيني ع ساهر واهلها وتگلي اعرفج اصيله ورغم الي سوته امي ماراح تتركيها .
هي بعد كبرت والمرض اكل منها حيلها وصحتها سامحيها حضنتها وگلتلها امشي وانتي مطمأنه .
الخاطر ساهر مستعده اسامح حتى عدوي ..

كنت كل يوم اتصل بيها .. واسألها عن رعد..
تگول هو حباب ويحترم ويلبي كل طلباتي . بس عندة برود اتجاهي ..
مريم گالتلها حاولي تكسبيه .
حتى اذا عندة برود البسي وعدلي وانتضريه وقربيه منج .
بس بنين من النوع الخجوله ومااعرف اذا راح تاخذ بنصيحة مريم او لا ..
اما من ناحية ابنه وامة .. تگول مرتاحة وامة حبابه كلش وماتعبني هواي لان عندي دراسه ..
حتى ابنه هي تبدل وترضع وتهتم بي .

اني انشغلت بالامتحانات لان عطلنا ولازم ادرس زين ..
ساهر خلالي مدرسين بهذي الفترة .
گال حتى للامتحانات انتي مستعدة ..
وگال الاهله محد يضغط عليه او ينطيني شغل لان عندي دراسه ..
بس ضميري ميخليني اگعد واسكت . ومريم خطيه حايرة بأولادها والبيت .
ولينا حامل ومتگدر .
وبراء هم دوام وتراعي امها مريضه ورجعت انتكست ومانعرف شبيها ..
يعني لازم اساعدهم ..

بهذي الفترة .. ساهر طلع عمال للغرفة وگال حتى تكمل الى ان تخلصين امتحانات ..
وترتبيها ع ذوقج ...
هو بالعلاج الطبيعي حالته احسن .. بس الدكتور طلب منه يجي يشوفه ويفحصة حتى يتأكد نهائي ..
بس هو گال انتضرج تكملين امتحانات حتى ترحين وياي .
طلب من عمو يسويلي جواز ..
بس قبلها رحنا عقدنا محكمة .
وكانت الدنيا ماسايعتني من الفرح ..
وساهر يضحك عليه ..
يگلي وين وجهج بعقد السيد وشلون گالبته ووين هسا مليانه فرح ..
بس ضجت من شفته مخلي حاظر 50 مليون وغايب 50 مليون ..
ماقبلت وگتله انت عندي اغلى من الفلوس وحتى الله مايقبل بغلاء المهر ..
گال .. انتي تسوين الدنيا ومابيها عندي وهذا قليل بحقج..
من رجعنا للبيت . اتفاجأت بعمتي جايبه جكليت وطشت علينا ..
ولينا مسويه كيكة وعصير . واحتفلنا واخذنا صور للذكرى .
وعامر يهوس بالوسط يوم اللي واذبح طلي ..
متنا ضحك عليه ..
كان يوم رغم بساطته بس من الاحلى الايام عندي ..
بدأو العمال يشتغلون ويحفرون ..
وساهر يشرف عليهم ..
طبعا كلنا حبسونا فوگ مانطلع ..
اني گعدت بغرفه لينا لان ماهر مموجود ..
واستغليتها اقرأ لان امتحاناتي قربت ..
غرفة ساهر الفوگ سووها البراء وصعدوا الغراض الي كانوا بغرفه جدتي كلها لفوگ .
اما غرفه الاخشاب مال ساهر القديمة .. فأنطاها الشخص من المنطقه حالته ضعيفه ومحتاج ..
بعد ميخلصون العمال شغل وتنضيف . ساهر يقفل الغرفه ميخليني اشوفها يگلي مفاجأة ..
الى ان كملت .. فعلا كان ذواق بأختيار كلشي . رغم الالوان اني اختاريتها .
بس الديكور رائع . والصحيات تصميمهن خليجي ..
فبقت بس غرفه الاخشاب ..
گال كملي امتحانات ونختار ع كيفنا من البيجات لو نروح البغداد ..

اني انشغلت بالامتحانات ..
بين الدوام والدراسه مااحس بالوقت شلون يمر .
كنت ابقى بالصاله گاعدة للفجر . اقرأ وبعدها انام ساعتين واروح للامتحان تعبت حيل ..
ساهر يجيني بالعكاز يمشي يگعد شويه يمي او اني اروح يمة ..
بس يحاول مايشغلني ويگعد يباوع بموبايله ..
بهذي الفترة عمتي انتكست وبعد مااخذوها البغداد ..
گالوا الغدة الي قلعوها سامة .. وانتشر المرض ولازم تتعالج كيمياوي ..
من سمعنا تخبلنا والبيت تأزم وصار كآبه الكل يبجي وضايج ..
عمو محمود گال لاتگلولها لا تتعب اكثر ..
بس هي حست من اهتمامنا بيها ..
كان عندي اخر امتحان احياء .. مااعرف شلون قريت او شلون امتحنت ..
زينه او موزينه ماادري ..
ساهر ..مااخليها هنا راح اخذها وياي للهند .
وانتي فجر بسرعه جهزي غراضج ترحين ويانا .. جوازي جاهز . بس سوو جواز العمتي وفيزوا  
راح عمو وعامر ويانا ..
رادت بنين تروح بس ساهر ماقبل وگالها ماصارلج هواي متزوجة فشله من الولد ..

رحنا للهند وامالنا معدمة ..
ساهر نسى نفسه وانشغلنا بعمتي . اخذناها الدكتور. امراض خبيثة .. وهو احنه اصلا متفقين وي الدكتور عن طريق دكتور ساهر ..

دخلوها بسرعة وسوولها تحاليل وبلشوا بالعلاج لان حالتها متقدمة ..
قلعوا الثدي الايمن لان الغدة كانت يمة ومن قلعوها انتشر بي ..
وبدوا العلاج ..
من كانت تتعالج تتخربط وتتقيأ وتتعب .
واني مااعرف بهيج اشياء . بس كنت اصر اكون عند حسن ساهر وبالاول والاخير الي اسويه يتسجل عند الله .
كنت اساعدها وابدللها وامسح كل يوم جسمها كله بكلينكس مبلل ومعطر . بحيث من يجي عمو يشوفها يتغزل ويگلها شمسويتج فجر طالعه عروس ..
هي تضحك وتباوعلي .. بس لليوم مااعتذرت او گالت اني غلطانه ..
لكن عيونها مبين عليهن الندم والرضا اتجاهي ..
حتى تعاملها تغير وماتطلب شي الا مني ..
والممرضه من تسأل تگلها هذي زوجة ابني ..

هالشي اسعدنـي اكثر مما اسعدهم .. لان احس نفسي وجدت عائلتي الي كنت ابحث عنها واحاول انتمي الها ..
تعبي كله كان راحة نفسيه مقابل ضحكاتهم وقبولهم الي بوسطهم والا عمي كلما يجي يبوس راسي ويگلي مااعرف شلون اكفيج حقج ..
اما ساهر فيگلي شمسوي عند الله الي نطاني هبج جوهرة ..
#بقلمـي_الكاتبة_شمس
يتبع………………
………………………………………..
هلا وغلا حبايب ..
قبل يومين شفتو الجو شلونه . عاصفه ومطر وبسبب هالشي النانو وگع والكهرباء صار طبگ وانطفت ..
وهسا يله تصلح النانو ونزلت الكم بسرعه. .

اما بخصوص الجزء الاخير راح يكون ع البارت الثاني الي حنزلة مباشرة بعد هذا .. بسبب كثرة التفاصيل ماگدرت ادمجهم ببارت واحد ..
تحياتي لكم 😚 وتقبلوا اعتذاري احبتـي ..