رواية ﮼صفقة ﮼عشك الفصل الثامن عشر 18 - بقلم ﮼الاميره،الموسويه 👑

بقلمي (هدى الموسوي)الاميره الموسويه 👑

ما احلل لأي شخص ياخذ كتاباتي وينشرهم (ذمه)

قبل يوم .......

نورالدين .. شنو يعني خطبت بنته!!

يمان .. ههه اشبيك نور يعني يرادلها شرح !!
طلبت ايد سدن من ابوها على سنة الله ورسوله.

نورالدين .. يعني انت كلتله اريد اتزوج سدن!!

يمان .. لا بصراحه اني مكلتله هيج لان استحيت انت تعرفني ارتبك بهيج امور مااعرف شلون احجي ..بس كلتله انو احنه انريد نجي نطلب ايد بنتك

نورالدين .. وابوها شنو كالك؟!!!

يمان .. والله رد ابوها فاجأني متوقعته يوافق بهالسرعه .. خصوصاً واني هذا وضعي !
بس كلتله هذي الجمله كالي اهلاً وسهلاً اتنورونا.

نورالدين .. ...!

يمان .. اتسرعت مو؟!

نورالدين .. ماكو رد.

يمان ..  نور وين صفنت دااحجي وياك.

نورالدين .. هاا .. وياك مصفنت .. بس قرارك فاجأني.

يمان .. ليش؟!

نورالدين .. مكنت متوقع اتفكر تتزوج بهالسرعه خصوصاً انت طول عمرك  تستهزء بالزواج والارتباط.

يمان .. اي صحيح هذا قبل ، اما حالياً الوضع اختلف انت دتشوف حالتي بعد مو مال حب ومراهقه متأخره اني فكرت هواي بوضعي ومستقبلي وقررت انو احسن حل الي اتزوج انسانه احبها وتحبني واستقر.

نورالدين .. اشلون عرفت اتحبك شنو اعترفتلك بحبها مثلاً ؟!

يمان .. لاااا لا البنيه محاجي وياها بهذا الموضوع ابد كل الي بينا سلام بس هي مبين من معاملتها الي وكلامها وياي وشقاها انها اتبادلني هذا الاعجاب واكيد الحب يجي بعد الزواج مثل ميكولون الناس.

نورالدين .. وانت ............  تحبها؟!!

يمان .. بصراحه اني معجب بيها هواي من اول مره شفتها عجبتني ودخلت گلبي وهذا الاعجاب بمرور الوقت ديقوى عندي وهي بنت ناس معروفين وحلوه مناقصها شي وين الكى احسن منها بس......

نورالدين .. بس شنو؟!!

يمان .. خايف لترفضني بسبب اعاقتي.

نورالدين .. لتكول هيج يمان واني اوعدك راح اسوي كل الي اكدر عليه حتى تتزوجها.

يمان .. حبيبي ابو النور اني شعندي غيرك.

نورالدين .. مبروك مقدماً.

...............

سدن .. ماكو داعي تخلي هذا الشرط بينا .. انت مسمعت كلامي للاخير البارحا اني..

نورالدين .. لتكملين اعرف الي تردين اتكولي شنو و ...

سدن .. لاا لا متعرف شي والله يخليك لتقاطعني خليني اكمل كلامي للاخير وبعدها راح اترك القرار الك هذي المره ..
من اول يوم خطفتني وشفتك حسيت شي بداخلي اتغير .. شعور غريب انتابني من اول مره التقت عيني بعينك ..
وهذا الشي بدا يكبر كل ما اشوفك .. كل مااسمع صوتك .. كل ما المحك .. بس كنت اتجاهله وابرره لنفسي بأي عذر لانو ممجربه هيج شي ولا ماره بهذي المشاعر او حاستها غير لما شفتك.
اني من صغري مشاعري كاتمتها بداخلي بابا بعيد عني وبسام بس بالاسم اخويه ما فد يوم حسسني بشعور اخ ولاعطف اخ ع اخته .. الشعور الوحيد الي حسسني بي هو الخوف والرعب.
يعني بالمختصر ممبادله احد مشاعر ولا عندي علاقه من اي نوع ، فأنت كنت احساس غريب بالنسبه اليه !
تجربه اول مره اعيشها ، لا اعرفها ولا فاهمته لذلك خفت منها .. خفت اغامر بمشاعري واندم.
فقررت اتأنى ومااتسرع واخطو هيج خطوه كبيره بحياتي .. بس انت اثبتتلي انو اني كنت على خطأ.
وانو ترددي وخوفي من مشاعري تجاهك كان غلط .. كل مره كنت توكف وياي وتبينلي اشكد انت تحبني .. لأي درجه انت مستعد تضحي علمودي
بس اني كنت غبيه ومحسيت بيك .. واخر مره بالسياره صدكني بعد ما نزلت قررت اصارحك بمشاعري بس انت استعجلت ورحت بسرعه .. وبعدها صارت احداث بسام و هم متخليت عني رغم اني كنت غلطانه بحقك .. ولما حاولت اصلح غلطي واكولك ع الي بداخلي مكملنا حديثنا واجه بابا واخوك.
بسبب احداث بابا والمشكله الي هو بيها قررت أأجل الموضوع اشويه وبعدها اعترفلك بكولشي .. بس بما انو انت فتحت الموضوع هسه ....
خلص ماكو داعي انتظر اكثر .. وحتى اذا متريد اتساعد بابا ومتطلعه من هذي المشكله هم مو مهم عندي لانو مااريدك تعتبر مشاعري تجاهك هي مقابل شي.
لااااا اني من كل گلبي وبكل جوارحي وعن قناعه تامه اكولك ...... احبك.
اي احبك ومجنونه بيك ومستحيل افكر بيوم من الايام اكون لشخص غيرك انت وبس.
حتى لو حياتي تنتهي انهيها و ما اعيشها بعيد عنك .. وبلا اي شروط  اني موافقه ع الزواج.

نورالدين .. حظ عاثر مو!
من اول مره شفتها عشگتها واقسمت متصير لغيري .. بس هي عاندت ورفضتني ... ولما خلص قررت انساها واتركها الغيري اعترفت بحبي!!!!!!!!!!!!!!
ماكو مفرده ممكن اكولها وتشرح الي دااحسه شنو .. حتى جمل الكون كلها وتعابيرها متوصف ذره من شعوري بهاللحظه.
درت وجهي عنها لان الكلام الي راح اكوله مااكدر انطقه وعيونها بعيني .. مااكدر احجي وهي كدامي .. يحتاجلي طاقه تسع العالم كله وهم مااكدر.
مستعد اواجه الدنيا كلها وادخل بعين اكبر واحد واحاجي ... بس كدامها اني اضعف من اني انطق بحرف واحد ممكن يكسرها.
زين شسوووووي ... شنووو الحل؟!!

اضحي بگلبي لو بإخويه؟!!

يمان اخر شي بقالي من اهلي .. هو عائلتي الوحيده واغلى من روحي ....... وهي!!!!
هي انفاسي .. هي الروح الي بجسمي .. هي النبض الي بصدري!

ياربيييييييييي دخيييييييييلك اني اخذ امانتك وخلصني.

سدن .. لويش ساكت متحجي؟!
اعرف اني اتأخرت واعرف جرحتك هواي .. بس صدكني خوفي هو الي كان مانعني ومردت اوهمك بشعور كاذب قبل ما اتأكد من حبي الك .
فأترجاك تسامحني ع كل الي سببته الك .. ومتتخلى عني لانو صدكني مااعرف شنو ممكن يصيرلي اذا خسرتك .. مااكدر اتخيل الحياة بلاك.

نورالدين .. بغضب ... كافي.

سدن .. ردة فعله خوفتني .. بلا وعي مني رجعت خطوتين ليوره من الفزعه.

نورالدين .. التفتت عليها .. بصوت هادئ وبنبره حاده .. انتي فعلاً اتأخرتي وكل الكلام الي كلتي ما له اي قيمه بعد.

سدن .. ملامحه كانت عباره عن غضب وظلام رغم كلامه هادئ بس حسيت بي يريد ينفجر!!
شنو يعني كلامي ماله قيمه ؟!

نورالدين .. يعني الي كلتيها قبل دقايق ميهمني ولا يعنيلي شي اصلاً.

سدن .. نورالدين صدكني اني ...

نور الدين .. لتحجين ولا كلمه لان الكلام لان كلامج ميفيد.

سدن .. شقصدك ؟!

نورالدين .. قصدي اني بعد مااريدج.

سدن .. اعرف اني جرحتك هواي ومن حقك اتردلي الجرح وتسمعني كل هذا الكلام واكثر، اني موافقه ومحزعل منك لانو اني غلطت بحقـ..

نورالدين .. بغضب مشه بتجاها دفعها ع الحايط وخلا ايدها ع حلكها .. هي فتحت عيونها بصدمه من ردة فعله الغريبه .. اسكتييييييي كلت اسكتي مااريد اسمع صوتج.

سدن .. ايده ع حلكي كاتم كلامتي بقوه .. وعيونه الي كانت عباره عن ظلام وغضب بعيوني ميفصلنا غير كم سم ... انفاسه احسها نار تحركني مااعرف لويش عصب لهدرجه لما اعترفتله!!
بقى ع هذا الوضع دقايق بعدها ابتعد عني .

خليت ايدي ع حلكي من الالم الي دااحسه بفكي اصابعه غرسهم بخدي بقوه كأنه يريد يطلع يهشم وجهي .. بس لما شافني اتوجعت تركني بسرعه.

نورالدين .. اتأخرتي هواي والي بينا خلص انتهى.

سدن .. لويش دتحجي هشكل .. واذا انتهى لويش دتطلب تتزوجني؟!

نورالدين .. هههه اتزوجج!!
لاا انتي فاهمه الموضوع غلط .. مو اني الي راح يكون زوجج.

سدن .. مصدومه من كلامه وتصرفاته الغريبه الي ماافهم سببها..
لعد منو؟!!

نورالدين .. يمان ..... اخويه.

سدن .. صافنه بوجهه كل ظني ديتشاقه وياي يريد يأذيني لما يكولي مااتزوجه اله او يريد ينتقم مني لانو اذيته وخليته ينتظر .. بس الاسم الي ذكره بأخر كلامه يبس الدم بعروكي.

شدتحجي انت؟!!

نورالدين .. الي سمعتي.

سدن .. ههههه مكنت اعرف انت سخيف لهدرجه بحيث تلعب بمشاعري حتى تردلي الاذيه.

نورالدين .. انتبهي لالفاظج مااريد أأذيج اخاف على اخويه كلبه ينكسر على عروسته.

سدن .. لا انت اكيد اتخبلت.

نورالدين .. لا بالحقيقه عقلت.

سدن .. نورالدين اذا تريد اتعاقبني ع الي سببته الك برفضي فصدكني اني ندمانه وحاسه بغلطي وماشي مستعده اتحمل اي عقوبه منك الا الي دتكوله هذا الله يخليك لتعيده بعد.

نورالدين .. عقابج انتي الي صنعتي بأيدج .. انتي الي حكمتي علينا.

سدن .. شدتحجي .. شدتحجيييي .. انت شدتحجييييي

نورالدين .. يمان خطبج من ابوج .

سدن .. شنوووو ؟!
يا ربييييييي معقوله الي كالي عليه بابا هو يمان؟!

نورالدين .. واني وعدته انو راح تصيرين من نصيبه.

سدن .. وعدته!!!

نورالدين .. وبس ينحل موضوع ابوج راح نجي حتى يتقدملج رسمي.

سدن .. لااااا انت اكيد مو بوعيك.
شنوووو يتقدملي ؟!
شنوووو وعدتا؟!
بأي حق تقرر تهديني لاخوك؟!
اشون تضحي بيه بهالسهوله ؟!
اني سدن شنووو نست كلامك الي .. وين حبك .. وين الشخص الي حبيته وين وديته؟!

نورالدين .. كافي.

سدن .. لا مو كافي لاااا...
لازم احجي وانت لازم تسمع .. لوووو السماء تنطبق ع الارض مااتزوج غيرك.
اتريدني متريدني مااصير الغيرك .. اني مو سلعه عندك حتى اتقرر اشوكت تحبني اشوكت تتصدق بيه لاخوك.

نورالدين .. لتصعبين الامور عليه وعليج .. يمان يحبج ويريدج زوجه اله
ولتنسين حرية ابوج بالمقابل.
يعني اعتبريها صفقه رابحه وكسبتيها ابوج .. وزوج يحبج .

سدن .. بغصه ألم .. انت تعرف شدتحجي؟؟!!!
لهدرجه اني عندك ولا شي حتى تتعامل بمشاعري كصفقه بين طرفين؟!!
دااكولك احبك افهمنييييي الله يخليك .. احبك احبك واعرف غلطت بحقك واستاهل اتعاقبني بس مو بهالطريقه.

نورالدين .. القرار الج .. فكري واني انتظر ردج.

سدن .. انت دتسمعني شدااحجي لو لا؟

نورالدين .. انتي اسمعيني زين وحاولي تستوعبين كلامي .. قراري هذا نهائي وغير قابل لأي نقاش فلا تعبين نفسج.

سدن .. الدموع بدت تنزل مثل النار عيوني احسها دتحترك .. افهم من كلامك انو انت موافق اتزوج اخوك!!

نورالدين .. واني بنفسي راح ازوجكم.

سدن .. مكدرت اكتم البجيه بصدري اكثر كعدت يم رجليه وشهكت بقوه ، بجيت بصوت عالي .. اتوسلته بكل ذرة رجاء بيه يتراجع عن كلامه ، يكولي انو هذا مجرد عقاب ديعاقبني بي .... ارجيت عيونه تشوف حالي وترحم بيه!!
بس الظلام والغضب الي شفتهم بعينه نهو كل ذرة امل بداخلي .. رفعت راسي وقهر الكون وألمه كوله بصدري .. سألته سؤال...

_اني شنو بالنسبه الك؟

نورالدين .. طلقه وحده هسه تنهي كل هذا الالم الي بصدري .. النار الي دتاكل بروحي بطلقه وحده كلها تختفي!

_ولا شي.
انت متعنيلي اي شي .. مجرد تسليه وانتهت خلص.

سدن .. مستحيل هذا الشخص الي كدامي هسه وديحجي هو نفسه نورالدين الي خلاني اتعلق بي احبه مستحييييييييييل.

_لتحجي هيج الله يخليك اني بحياتي محبيت احد غيرك .. لتجرح گلبي بيك.

نورالدين .. سألتي سؤال .. وهذا جوابه.

سدن .. احبك والله بكل ذره بيه احبك .

نورالدين .. اعرف ..
كل الي عرفتهن قبلج حبني وعشكني مثلج واكثر .. بس كلهم كانن عندي مجرد نزوه وانتهت حالهن من حالج..

سدن .. دنكت راسي ودموعي احسها شلال يجري .. يمكن عيوني وكعود بأديه من كد البحي الي بجيته ...!

نورالدين .. عندي شغل وصار لازم اروح انتي قرري واني انتظر الرد منج حتى اتصرف بموضوع ابوج.

سدن .. دار جهه وراح يريد يطلع كمت من مكاني وصحتله ... لحظه.

نورالدين .. التفتت عليها منظرها دمر شي اسمه گلب عندي .. ادموعها نار حركت كل روحي .. بس ملامحها المكسوره فجأه اتحولت الى غضب.

سدن .. موافقه.

نورالدين .. كنت مصدوم من موافقتها .. كل املي ترفض يمان ويبتعد عنها .. كنت اعرف انو من المستحيل انجمع بيها بعد حتى اذا تركها يمان او متزوجو .. بس اقلها متتزوجه .

شنو؟!

سدن .. مثل ما سمعت .. موافقه ع زواجي من اخوك.

نورالدين .. تمام وانتي اعتبري ابوج انتهت مشكلته.

سدن .. لا لتتدخل بموضوع بابا اني احله.

نورالدين .. اشلون اتحلي؟!

سدن .. ميخصك .

نورالدين .. اذا متردين اساعد ابوج ليش وافقتي ع الزواج.

سدن .. حتى اخليك تندم ع كل الي سويته بييييه ، هذا الموقف مراح انسى وراح اخليك اتبوس اتراب رجليه ومتنوله يا باشا.

عفته وطلعت احس نفسي خاويه .. امشي بلا روح .. ماادري شحجيت وبشنو رطت روحي!
اخذني محمود وطلعت بوجهي للبيت .. دخلت لبسام لكيته نايم .. طلعت الغرفتي اتصلت بأصدقاء بابا الي اعرفهم من ظمنهم محامي كولشي شاطر شرحتله الي اعرفه عن موضوع بابا كالي انو الموضوع سهل انشاء الله وحيحلها .
مر ع الموضوع يومين وبابا ماكو منه خبر .. طكت روحي مااعرف اشون اخلص نفسي من هاي المصيبه الي ورطتها بيها.
بعد اسبوع تقريباً اندكت الباب كمت فتحتها واذا ببابا واكف كدامي!!
اخذته بالاحظان وطلعت هم گلبي وحزنه كوله بحظن بابا .
بقى يمنا بابا كم يوم والناس تروح وتجي الا هو ما اجه هالمره .. بس اخو اجه والابتسامه متفارك وجهه هسه عرفت معناها.
كعد يمان وبابا يحجون ... والصدمه لما كال يمان لبابا انو يريد يخطبني اله!!
محد كالي بهذا الموضوع ولا احد اخذ رأيي الى ان صاحني بابا وكالي اكو موضوع رايدج بي ع انفراد!
كعدت اني ويا وحجالي  كولشي .. اشون خطبني يمان واشون ع باله يقصدني اني لنورالدين .. بس جوابي حير بابا وغير ملامحه من كلتله موافقه!!!
حاول بكل الاشكال يأثر عليه واتراجع عن قراري .. بس اني اصريت .. طبعاً هذا الشي بسام ما كان يعرفه ... كل ظنه انو زواجي حيكون من نورالدين ..
ولما عرف الحقيقه ..... وانو اني حتزوج يمان .... سوه شي خرب كل الي بنيته.......!

للحكايه بقيه 🤗
ارجع واكرر لتستعجلوووووون الاحداث اكو هواي اشياء حتصير.
ولحد اتكول ماكو احداث اني ردت اسوي هذا البارت خاص بسدن ونورالدين لانو بي هواي اعترافات من الطرفين.

رأيكم بالاحداث ... ولتنسوووووووووووون التصويت اي سحكه غلسو 😴 نعسانه 😅
🚶🏻‍♀️🙋🏻‍♀️