رواية ﮼صفقة ﮼عشك الفصل السابع عشر 17 - بقلم ﮼الاميره،الموسويه 👑

بقلمي (هدى الموسوي ) ﮼الاميره،الموسويه 👑

ما احلل لاي شخص ياخذ كتاباتي وينشرهم (ذمه)

سدن .. بصوت مرعوب بسااام .. هاي شنوو شصاير شنو هذا الدم .. ؟!

محمود .. ست سدن لتخافين ماكو شي الحمدلله عدت ع خير واستاد بسام ما بي شي .

سدن .. شنو ما بي شي وهو سابح بالدم !!

محمود .. هذي جرح خفيف براسه وخيطنا .. صدكيني ما بي شي.

بسام .. بصوت خافت .. خليني اكعد وبعدين كملي استجواب.

سدن .. سندت بسام ويا محمود ودخلنا لغرفته!
نيمنا ع فراشه وطلعنا .. سألت محمود شصاير لبسام منو اشون انجرح هشكل واتكسر؟!

محمود .. استاد بسام كان دينزل من سيارته وجايه سياره سريعه ضاربته وطالعه كبل.

سدن .. مااعرف لويش نورالدين صار كدام!!
معقوله هو الي سوا ببسام هشكل؟!
لااا بس هو ميعرف انو بسام ضربني اني كلتله وكعت .. وممعقوله هو مجرم لهدرجه حتى يموت بسام !

_زين محد شافها للسياره الي دعمته؟!

محمود .. لا والله واني مكنت متواجد اتصلو عليه ورحت اخذته لاخو حضرتج من المستشفى.

سدن .. تعبناك ويانا محمود كل يوم مشكله وانت مبتلي بينا.

محمود .. لااا لتحجين هيج ست سدن انتو خيركم مغركني وهذا واجبي.

سدن .. تسلم متقصر.

محمود .. يلا اني اترخص واذا حتاجيتو اي شي اتصلي عليه.

سدن .. اشكرك .. مع السلامه.

راح محمود .. واني رحت لبسام لكيته يون خطيه الظاهر ديتوجع لان الحادث السابق مسمعته يون هشكل.
رحت جبت تعقيم وقطن .. مسحت الدم من وجهه وساعدته ينزع قميصه لانو كله دم .. لبس ملابس نظيفه .. ورحت سويتله شوربه طلعتها من النت وسويتها الحمدلله ضبطت !
جبتها لكيته نايم كعدته وأني أكلته بأيدي لانو ميكد ايده مچبسه خطيه.

اكل الشوربه ورجع نام .. نظفت المطبخ ورجعت كعدت يمه اخاف يريد شي

صارت تقريباً الساعه ب9 بالليل اندكت الباب!!!

كلتله بسام جرس الباب ديندك!!

بسام .. تعالي اسنديني اني اكوم اشوف منو.

سدن .. كل عقلك بسام انت بيا حال اشون اتكوم؟!!

بسام .. لعد اشلون انتي تطلعين للباب الدنيا الليل.

سدن .. هذا اكيد محمود رجع يتطمن عليك يعني منو غيره يجينا .. حروح من ورا الباب وشوف منو .

بسام .. ماشي بس لتفتحين الباب ابد واذا مو محمود ارجعي اني اكوم.

سدن .. اوك .. رحت ع كيف فتحت الباب الداخلي مالت البيت وباوعت شفت سياره مظلله واكفه بالباب .. و واحد ضخم واكف!
من شفت السياره عرفتها المنوو لانو مو غريبه عليه واعرف كولش زين منو صاحبها .. مشيت بهدوء فتحت الباب الخارجي .. سلم عليه هذا الشخص وسألني ع بسام اذا موجود لانو الباشا جاي ديشوفه!!!

كولش استفزني هذا الاسلوب شنو شايف نفسه حتى مينزل هو بنفسه ويسأل !
كنت حطرده واكول نايم بسام بس كلت بسامو اذا يعرف يخبصني .. كلتله بلي بسام موجود يكدر الباشا مالتك يتفضل.
الحارس استغرب من كلامي يمكن معجبه اشون احجي ع الباشا هشكل .. عفته ودخلت لبسام .. كلتله انو نورالدين جاي حتى يشوفه!!

حسيت بسام رجعتله عافيته الابتسامه شكت حلكه نصين .. متصيرلك جاره بسام .

بسام .. روحي دخليهم بسرعه شمنتظره!

سدن .. كلتله يتفضل .

بسام .. لج شنو كلتيله يتفضل .. امشي استقبليهم ودخليهم بنفسج لج هذا الباشا.

سدن .. شنو استقبلهم زفه هي .. وبعدين انت بيا حال مريض وجاي ديشوفك شكو هالخبصه.

بسام .. بغضب .. بلا شحجي وياج انتي .. امشششششييييي دخليهم هسه وعوفي كبريائج لخاطر الله.

سدن .. اوك رايحه لتصيح.
عفته وطلعت دخلتهم للصاله كان جاي هو واخو يمان .. اخو ع الكرسي المتحرك وهو يدفعه!!
هم زين كلف نفسه ما جابله خادم يدفع كرسي اخو .
سلمت عليهم يمان من شافني مااعرف لويش ابتسم واكلني اكل بالسلام .. بقى يتشاقه ويضحك من الباب ... وكالعاده كلامه المعسول الي كل ميشوفني يكوله احس هذا الشخص معجون بالسكر .. دمه خفيف ومرح .. عكس اخو الجامد بس بالاعياد يكول شي يضحك.
على ذكر اخو كان ضايج وملامحه معقوده مااعرف شنو السبب الظاهر جاي معصب الافندي.
سلم عليه بهدوء وعدم اهتمام مجرد سلام عابر .. عجيب الي يشوفه اليوم ميكول هو نفسه الي قبل يومين اتسلق البلكونه حتى يشوفني!
اني هم مهتميت بي او بالاحرى اتظاهرت بعدم الاهتمام ، مزاجه المتقلب هذا ينرفزني .
كعدو بالصاله واني رحت ساعدت بسام حتى يعدل كعدته .. وبعدين دخلتهم يمه بالغرفه!
كعدو ع التخم الي بغرفة بسام .. واني رحت سويتلهم شي اقدمه الهم .. كنت محرجه كولش انو ادخل يمهم وهم بس زلم!!
بس شسوي حتى منظفه ماكو بالبيت وبسام ميكدر يتحرك لازم اني الي اضيفهم.
اخذت العصير وقدمته .. ردت اطلع چان يمان يصيحني....!!

يمان .. وين رايحه تعالي اكعدي يمنا ترى منعض.

سدن .. التفتت عليه بخجل .. اشو هذا ميستحي !
حاولت ما افشله لانو بسام كان يراقبني ونظراته تحذرني انو انفذ بلا كلام .. مشيت كم خطوه دا ارجع اكعد يمهم ... چان يحجي الافندي ..

نورالدين .. بأبتسامه بارده .. اكيد عندها دراسه شكو تكعد يمنا خليها تروح يمان لتحرجها .

سدن .. رفعت نظري اله بأستغراب .. احس نفسي فشلت لان اني رجعت دااريد اكعد شكو تمنطق لحاله!!
يمان هم حسيته فشل ومعترض .. كال اي براحتها اكيد .
طلعت من الغرفه بس كنت شايطه من الغضب .. لويش كل متصيرله فرصه يحرجني؟
صح اني مااريد اكعد يمهم بس هو شافني كعدت شكو يطردني .. لويش ما من البدايه كالي اخذي راحتج لويش لما كعدت يلا نطق!
رحت للمطبخ بسرعه بس اني معصبه ومستحيه من الفشله الي حسيتها ومن طريقة كلامه وياي من اول ما دخل ، بعدين كلت اروح للصاله عاد اقرا اشويه احسن من الكعده بالمطبخ ..
مريت من يم غرفة بسام سمعت بسام يكوله هالمره لازم تشرب العصير باشا .. و هو بصوته الرجولي يحجي بكل هدوء وثقه ....

نورالدين .. لا اكيد اشرب اني وعدتك عن قريب راح نشرب عصير سوه و لازم يكمل وعدي.

سدن .. عن اي وعد ديحجي؟!!
وشنو قصده يشربون عصير عن قريب؟!!
خلي يروح وافهم السالفه من بسام واذا طلع الي ابالي صحيح اني اعرف اشون اخليله حد هالباشا هذا.

كعدت بالصاله واسمع صوتهم يحجون .. بسام ويمان يضحكون وصوتهم عالي .. الي يسمع بسام والضحك مالته ميكول هذا الي كان يون قبل اشويه ، والله لو ادري شوفة يمان علاجك كان جبته الك من الصبح ..
الا هو ما له حس .. نادراً ما اسمع صوته وميحجي غير كم كلمه .

صعدت جبت كتبي من فوك والتهيت ادرس ونسيت وجودهم بالبيت .. كنت مركزه ودااقرا بالكتاب رفعت راسي شفته واكف كدامي مثل الشبح!!!

نزيت من شفته .. بسم الله من وين طلع هذا .. هو من شافني فزيت وخفت ابتسم!!

نورالدين .. زيد اكدلي انو موضوع صديقتها انحل وانو بسام كايل للمديره انه ضارب اخته ورايد يموتها ..!
وهذا الشي خبلني يعني هي كانت تكذب عليه!!
رغم كنت متأكد هالنذل ضاربها بس مردت اكذبها .. بس لما زيد كالي هالكلام فقدت اعصابي.
البعض حيكول ما الك حق تعصب لانو بسام اخوها وحريص عليها ..!
راح اكللكم تمام واتفق وياكم .. بس وجهة نظري راح تعرفوها بعدين لما يدور الحديث بيني وبينها.
المهم .. كلت الزيد تتذكر الموضوع الي كلتلك راح اطلبه منك بعدين؟!!

زيد .. اي باشا اتذكر وحاضر اني.

نورالدين .. بسام الاحمد اريدك تكسرلي ايده.

زيد .. بسام ابن السيد كريم الاحمد؟!!!!!

نورالدين .. صاير استيعابك قليل زيد.

زيد .. العفو باشا اعرف حضرتك متحب تعيد الكلام مرتين بس بسام ابن شريكك وماعندك اي خلاف ويا ليش تريد تكرص اذنه!

نورالدين .. وانت من اشوكت تدخل بقراراتي وتناقشني بشنو الي اسوي وليش؟!!

زيد .. اني اسف اسف واعتذر باشا .. مثل متريد اعتبر الموضوع تم واذا تريد راسه اطيره الك هم.

نورالدين .. كلت تكسر ايده وبس .. اي لغوه زايده مااريد وامشي اطلع.
راح زيد والعصر انطاني خبر انو الامر تم.
يمان نوعاً ما صديق بسام .. يعني علاقتهم قويه رغم انه يعرف بيه مااطيق بسام بس هذا الشي ممأثر ع صداقتهم.
فسمعني بالصدفه احجي ويا واحد من الموضفين بالموبايل كلتله تلغي اجتماع بسام الاحمد باجر لانه متعرض الحادث وميكدر يجي.
سمع يمان واصر انو انروح للبيت حتى انشوفه ويسأل على كونه صديقه وصاحب واجب .
بالبدايه اني رفضت لان ابد مااحب نظرات يمان لسدن ولا كلامه .. احسه يعتبرها حالها من حال القذاره الي يعرفهن وهذا الشي يزعجني.
بعد اصرار من يمان اضطريت اوافق .. اخذته ورحت شفتها بالباب نظرتها احس شي بارد اثلج صدري .
بس كالعاده كلام يمان الماصخ واسلوبه المستفز خلوني اعصب وهي هم ما احسها تعترض على كلامه وياها كأنها مستمتعه بالموضوع .. عصبت منها لدرجه ردت اخنكها كدامه حتى تعرف تصرفاتها شنو تسوي بيه .. مردت اسلم عليها بس يمان راح يضل يسأل .
سلمت عليها بلا اهتمام .. ودخلنا الاخوها كعدنا بقو هم يسولفون ، اجاني اتصال استأذنتهم وطلعت احجي بره لكيت الصاله فارغه طلعت للحديقه الاتصال طول اشويه تقريباً نص ساعه .. لما رجعت لكيتهت كاعده بالصاله دتقرا !!
شكلها محست بيه من دخلت !
مشيت بهدوء وكفت قريب منها ، هي منتبهت مستمره تقرا بقيت اتأملها بهدوء الى ان حست بيه شافتني ارتعبت!

بصوت هادئ .. اسف مو قصدي اخوفج ؟!!

سدن .. بنبره حاده وعدهم اهتمام .. مخفت .. بسام رايد شي؟!!

نورالدين .. محد رايد شي ، اني رايد اشوفج.

سدن .. بعصبيه انت عندك انفصام شي؟!

نورالدين .. امممم لا ليش؟!

سدن .. لا اكيد اتعاني من مشكله لانو قبل اشويه فشلتني كدام اخوك واخويه وهسه جاي اتكولي اشوفج!
اذا ممكن اتفسرلي هذا شنو يسمو؟!

نورالدين .. اول شي لما اسكت عن تجاوزاتج لتتمادين انتبهي الالفاظج لما تحجين وياي.
ثانياً مفشلتج ولا شي شفت اخويه احرجج بطلبه حاولت اخليج تاخذين راحتج لانو كان واضح عليج متردين اتكعدين يمنا هذا قصدي ليش تعتبريها اهانه او افشلج!

سدن .. حتى لو مااريد اكعد اني الي احدد ابقى لو لا وممجبوره ابقى اذا مااريد فماكو داعي تتدخل بكولشي.

نورالدين .. ههه انتي مو طبيعيه

سدن .. اذا مو طبيعيه شكو دتحجي وياي؟!

نورالدين .. هم صحيح .
عفتها ومشيت ... چان تحجي ورايه ..

سدن .. اذا اكو واحد مو طبيعي فهو انت !

نورالدين .. التفتت عليها .. اممم وشنو الي موطبيعي بيه؟!

سدن .. مدااحجي وياك.

نورالدين .. اهااا .. دتتعاركين ويا نفسج؟!
معناها كلامي صحيح .

سدن .. شنو هو كلامك الصحيح؟!

نورالدين .. انو انتي موطبيعيه ..
لانو ماكو شخص طبيعي يتعارك ويا نفسه.

سدن .. هذا من وين ما اجي يطلعلي برد!
عصبني حيييل .. بصوت جامد رجاءاً روح ارجع للغرفه ليشك بسام ومااريد يجيني كلام.

نورالدين .. بشنو يشك ؟!
شدنسوي مثلاً!!

سدن .. مكلت دنسوي شي .. بس مااريد بسام يسمعني احجي وياك ويفكر غير تفكير.

نورالدين .. انتي ليش هيج عدائيه وتحورين الامور كلتلج اجيت اشوفج مو اتعارك.
وبعدين شنو الي خايفه يفكره اخوج اذا حجيتي وياي؟!!!

سدن .. اريد اقرا من رخصتك .

الظاهر ماكو نتيجه من الكلام ويا .. عفته واكف و درت وجهي اقرا .. بس احس كل جسمي يرجف مااعرف من الخوف لو الشعور الي يصيبني من اشوفه.
هو هم من شافني درت وجهي عافني وراح ماكوو دقايق اخذ اخو وطلعو !
سمعت بسام يصيح سدن سدن ..
رحتله كالي اطلعي وياهم عيب طلعو وحدهم.
اخذت جاكيتي لانو الدنيا بارده وطلعت وراهم لكيتهم ماكو .. دخلت كلت البسام راحو.
كالي تعالي ساعديني اريد اروح للحمام!
سندته ، اخذته للحمام وطلعت لما صاحلي دخلت طلعته ورجع نام .. طفيت الضوه ودااريد اطلع اتذكرت كلام نورالدين عن الوعد والعصير !!

سألت بسام .. شنو قصده يكولك هشكل!!

بسام .. ميقصد شي ، بس هو قبل كم يوم اجانه وقدمتله عصير مشربه .. كلتله ليش مشربت !
كال ان شاء الله عن قريب نشرب اني وياك وعد .. وفعلاً اتحقق كلامه فأني ذكرته بوعده.

سدن .. بتسائل وهو اشوكت اجانه وانت قدمتله عصير كل مره اني اسوي!

بسام .. اجه لما صارت سالفة صديقتج صابرين وانتي كنت بغرفتج متدرين بي.

سدن .. اهااااااا هسه كل شكوكي اتأكدت!!!!!!!!
عرفت شنوووو يقصد بوعده .. اكيد هو الي سوا ببسام هشكل لان ضربني !
هو كالي اذا طلع ماد ايده اكسرها اله.

بسام .. اشبيج صفنتي؟!!

سدن .. هاا لا ماكوو شي.

بسام .. ماشي طفي الضوه لعد اريد انام جسمي كله يأذيني.

سدن .. طفيت الضوه وطلعت .. واني الغضب والافكار اكلوو عقلي!

ردت اصعد لغرفتي انام بس كلت بسام خطيه اخاف يحتاج شي بالليل وميكدر يكوم بقيت يمه
للصبح كاعده ع الكرسي ادرس ولما انعس اغفى اشويه وافز.
صار الصبح كعدت سويتله ريوك وكعدته اخذته للحمام غسل وجه .. جيتله الريوك خليته يمه وكلتله اني حروح ابدل لانو عندي دوام!
رحت بدلت ونزلت لكيت بسام مخلص ريوكه اخذت الصينيه للمطبخ بهذي الاثناء اجه محمود!
دخل سلم ع بسام وكاله لما توصل سدن ارجعلي عندي شغله وياك.
وصلني محمود للمدرسه وراح .. داومت دوام عادي .. صابرين محجت وياي بعد ولا تقربتلي ..!
حتى لما تشوفني اتدير وجهها عني .. ايييييي الحمدلله خلصت منها.
واني قبل فتره تعرفت ع بنيه اجتي جديده لمدرستنا نقل من غير مدرسه .. بنيه حبابه كولش وطيوبه اسمها ايات .
كعدت يمي بالرحله اول يوم اجتي لانو صابرين كانت بوقتها غايبه .. فالرحله فارغه!
كعدت يمي وتعرفنا ع بعض .. كولش حبيتها بس كنت خايفه من بسام لتشوف تصرفاته واسلوبه السز .. وبعد متحجي وياي مثل كل البنات !
خلال كم اسبوع علاقتي بيها صارت كولش قويه !
خصوصاً بعد سالفة صابرين .
المهم .. انتهى الدوام ودعت صديقتي ايات ولكيت محمود دينتظرني صعدت السياره .. بس قبلها لمحت سيارة نورالدين واكفه ع الشارع !

اييييي هم زين اجه لازم احجي ويا واوكفه عند حده اشون يسوي هشكل ببسام.
بس محمود اشون بي؟!!
اخذني محمود للبيت وصلني .. ع بالي ينزل وياي البسام !
كالي اني لازم اروح عندي شغله كلفني بيها استاد بسام .. اي راح اخلص من محمود.
راح محمود واني بقيت واكفه بالباب دنكت عود دااسوي حذائي .. باوعت سيارته واكفه براس الفرع!!
خليت جنطتي ع كتفي ومشيت بسرعه لسيارته .. فتحت الباب وكعدت يمه
هو تفاجأ!

نورالدين .. امممم .. يا ترى شنو سبب الجرئه المفاجأه هذي؟!!

سدن .. انت الي دعمت بسام مو؟!!

للحكايه بقيه 🤗

اعتذر ع التأخير الاشتراك خلصان وماكو نت والنبي فعلت ع الشريحه حتى انزللكم بارت
بس حعوضكم ببارتين 😊
رأيكم بالاحداث ... ولتنسوووووووون التصويييييت 🙋🏻‍♀️