رواية ﮼صفقة ﮼عشك الفصل الحادي عشر 11 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي احد ياخذ كتابتي وينشرهم (ذمه)

ابو بسام .. ليش هي موجوده هنا؟!

نورالدين .. اي موجوده ودتسمعك.

ابو بسام .. هاي شنوو لعد وينها غير اتعرفنا عليها ؟!

نورالدين .. سيد كريم الانسانه الي دااحجي عنها هي بنتك سدن واني رايد اطلبها على سنة الله ورسوله.

ابو بسام .. هااا ... سدن؟!!!

سدن .. يا ربي شنو مسويه بحياتي كل يوم يوكفلي گلبي .

نورالدين .. اي نعم سدن .. واني فاتحتها بالموضوع بس رفضت لذلك اني انسحبت .

ابو بسام .. فاتحتها ... اها يعني سدن تعرف ؟!
اشو مكلتيلي بابا الباشا حاجي وياج ؟!

سدن .. مااكدر حتى ارفع عيني واباوع لبابا .. شكول شأحجي مكنت متصوره يطلع هالطلعه هذي ويحرجني هشكل.
ع بالي مثل كل مره لما يستفزني كدام بابا وبسام وبالنهايه يغير الموضوع كوله.

نورالدين .. صحيح المعروف انو اطلبها منك لانك ابوها و ولي امرها .. وهذا كان قراري من البدايه مثل موضحت قبل قليل بكلامي بس أرتأيت اخذ موافقتها بالاول لان بصراحه مااريد مجرد روتين ولا اريد احد يضغط عليها او يجبرها كل الي يهمني قبولها هي .
فأرجو ان متعتبر تصرفي هذا وقاحه او قلة ذوق كوني كلمت بنتك قبل لا اخذ رأيك.

ابو بسام .. والله يا باشا انت فاجأتني مااعرف شنو اكلك بصراحه .. وبالنسبه السدن اني ماادري بيها اصلاً رافضتك وماعندي علم بهذا الموضوع.
بس مثل متفضلت القرار النهائي يرجع الها اكيد فأذا كانت موافقه الي الشرف اتكون زوج لبنتي.

نورالدين .. اشكرك واني مستعد انتظر سدن الى ان تتخذ قرارها وتنطيني موافقتها .

سدن .. رد بابا صدمني!
اتوقعت يعصب منه اشون يحجي وياي بهيج موضوع من دون علمه ومن ورا..!
بس تقبله للموضوع وترحيبه بالفكره فاجتني !
سكتت مكلت شي بس الافكار الي سيطرت ع عقلي ثولتني .. كل هذا الي انكال بكفه وبسام اذا عرف بكفه ثانيه.
ميصدك الباشا حيصير زوج اخته بالنسبه اله ثروه اتغير كل حياته .. ميهمه لا حياتي ولا كسرة ركبتي اهم شي مصالحه.

ابو بسام .. سدن بابا شنو رأيج بألي كاله الباشا؟!

سدن .. بقيت مدنكه منطقت ولا حرف .. بس شي بداخلي كان يغلي غضب ع جبل الجليد الي واكف يمي.

نورالدين .. سيد كريم اتركها تاخذ قرارها ع كيفها .. رجاءاً مااريد اي احد يجبرها ع شي واني ممستعجل انتظرها لحد متقتنع.

ابو بسام .. ها .. اي .. اي طبعاً هي صاحبة القرار الاخير .

نورالدين .. اني اترخص لازم اسلم ع المعازيم حتى وان متمت الحفله فهذولي خطاري.

ابو بسام .. اي اي اخذ راحتك ابني.

سدن .. ابني!!!!!!
بسم الله هذي  اول بوادر الموافقه .

راح وعافنا اني وبابا واكفين بس ما الي طاقه اوكف بعد رجليه نحلت .. مشيت كم خطوه كعدت ع كرسي .. وبابا هم اجه كعد يمي ..

الاب .. سدن بابا ليش مكلتيلي انو الباشا حاجي وياج بهذا الموضوع؟!!
مو من عوايدج اتضمين عليه ولا اكو اسرار بينا .. شنو الي منعج تحجيلي؟!!!!

سدن .. صفنت بوجهه مااعرف شحجي .. اكوله شنو السبب .. احجيله ع الي عرفته عن صفقاته المشبوهه .. لو اسأله عن سر صفنته بالموبايل وابتسامته الشارده؟!!
لا المكان ولا الزمان مناسب لهذا الحوار اصلا .. كتمت خيبتي وسكتت .. لمحت بسام من بعيد يدخل للقاعه متوجه النا .. بس شخص وكفه يسلم عليه ويحجون!
اني استغليت الوضع وحجيت الي خطر ببالي ..

_بابا رجاءاً ما اريد بسام يعرف بهذا الموضوع .

الاب ..ليش بنتي بسام اخوج ومكانته من مكانتي .. لازم انكوله لان اول وتالي راح يعرف

سدن .. اعرف بسام اخويه وكل الي كلته اعرفه .. بس اني بعدني ممتخذه قرار بهذا الموضوع وانت تعرف اسلوب بسام وتفكيره  اهم شي نفسه .. فدوه مااريده يعرف ع الاقل الى ان اتخذ قراري.

الاب .. بس بنتـ...

سدن .. شفت بسام ديتجه ناحيتنه .. مديت ايدي لزمت ايد بابا بقوه وبنظره متوسله اترجيته ...

_ لخاطري بابا ارجوك لتكول شي لبسام.

الاب .. ماشي .. ماشي.

سدن .. اجه بسام والابتسامه ماليه وجهه اتكول رابح اللوتو .. الله يستر شضام من بلوه هالمره.

بسام .. يلا بابا ترحون للبيت حتى اوصلكم لان عندي شغله لازم اروح.

الاب .. اي انروح اتأخر الوقت واختك باجر عدها دوام .

بسام .. يلا لعد امشو نسلم ع الباشا ونطلع.

سدن .. اني حروح للحمام عود اجي وراكم للسياره.

بسام .. اشكد اتعدلن بروحجن النسوان لخاطر ربجن .. كل اشويه للحمام.

الاب .. هههههه غير يهتمن بشكلهن يا ابني احنا شمعرفنا بهالسوالف .

سدن .. اني رايحه لانو مااكدر اتحمل خفة دم بسام افندي لا اموت من الضحك.

بسام .. اني اروح وياج امشي.

سدن .. وين اتروح خير شكوو؟!
دااكولك رايحه للحمام .. حمام يعني نساء .. شكو جاي وياي تعدل اشواربك؟!

بسام .. لج ضبي اللسانج لا اكصه الك .

الاب .. انتو وتالي وياكم وقتها هسه تتعاركون ؟!

سدن .. حتى للحمام ما اروح بطلت اني طالعه للسياره .. عفتهم وطلعت بسرعه بس الدمعه بعيني مااعرف من كلام بسام الحقير لو من المصيبه الي فتحها ع راسي البارد الخ.
راحو بابا وبسام سلمو ع الباشا مالتهم واني طلعت كدامهم فتحت السياره وكعدت
اخذنا بسام للبيت طول الطريق محجيت شي عكسهم هم خلصو الطريق كوله يحجون عن فخامة الحفله والناس الي حاضريها .. شفت فلان وقابلت علان .. هذا جاي وهذاك مجاي.
وصلنا للبيت تقريباً نص الليل .. صعدت لغرفتي ميته نعاس بس بدلت وشمرت روحي ع المخده .. ما احس غير فوني يرن!!

باوعت رقم ديتصل .. بس اعرفه رقم منو!!
انطيته رفض .
اتصل مره ثانيه هم رفضته .. متصل بعد غير ورا خمس دقايق تقريباً وصلني مسج.

(ردي اريد احجي وياج).

سدن .. لو تموت .. ابقى اتصل لباجر شوف منو يجاوبك.
غلقت الجهاز ونمت... كعدت الصبح ع صوت المنبه مالت الساعه .. كمت غسلت وبدلت .. طلعت اخذني محمود للمدرسه بس اني ما الي خلك حتى افتح عيوني احس بتعب فضيع ونعسانه فد مره .. نزلني محمود وراح .. كالعاده دوام ودراسه ..انتهى الدوام وطلعت !
وكفت انتظر محمود يجيني ماكو!
مو من عوايده محمود ميتأخر ابد .. كل مره اطلع الكى واكف ينتظرني شعجب هالمره اتأخر؟!!
بقيت بالشارع انتظره الطالبات تقريباً كولهم راحو مبقى احد بس اني .. متصلت بمحمود كلت اتمشى للبيت رغم اني تايبه ما ارجع للبيت مشي .. عبرت الشارع واذا سيارته تطلع كدامي!!!

نزل الجامه وكالي اصعدي!
محجيت ويا سويت نفسي ممهتمه عبرتها ومشيت بقى يمشي ورايه الى ان وصلت للشارع مالت بيتنا ..!
نزل هو واجه وكف كدامي ..

نورالدين .. انتي ليش متسمعين الكلام.

سدن .. لما يكون الك كلام عليه عود اسمعه.

نورالدين .. اهااا .. تمام زين والي يريد يحجي وياج اشلون بلا ؟!

سدن .. ما عندي كلام وياك .. وبخصوص الي كلته البارحه لبابا فأحب اكولك انسى الموضوع ولتنتظر ع الفاضي لانو لو تبقى الوحيد ع الكوكب هم ما اتزوجك .
فلتفكر انو احراجك لبابا او لما تخليني كدام الامر الواقع حيأثر عليه .. بالعكس حتخليني ارفض اكثر واكثر.

نورالدين .. شوفي لحد هذي اللحظه اني ممسوي شي .. لا الي نيه احرج ابوج ولا اخليج كدام الامر الواقع.
كل ما هنالك كلت الحقيقه مو اكثر .. الناس كانو معزومين ع خطوبتي ولما اجو شافو ماكو لا خطوبه ولا عروسه اصلاً لذلك قررت اوضح الحقيقه يعني مو نيتي أضغط عليج.
اما بالنسبه لابوج فأني كلتلج قبله عن نيتي بالزواج منج يعني بكل الاحوال كنت راح اطلبج منه .
فحاولي تقللين من الدراما الي ابالج ولتفسرين الامور على هواج.

سدن .. ممكن اعرف انت شنو الي اتريده مني؟!

نورالدين .. اريدج الج.

سدن .. واني مااريدك.

نورالدين .. امممم تمام .

سدن .. اذا ممكن وخر خليني اروح للبيت ولتطلع كدامي مره ثانيه.

نورالدين .. امشي اوصلج للبيت .

سدن .. شكراً اني اروح لحالي .

نورالدين .. مكنت متصور انو يجي يوم وانرفض خصوصاً من بنت.
بس بما انو هذي رغبتها اني هم مااريدها بعد .. الظاهر هذي طفله متعرف شتريد.
خلص لهنا وانتهى شي اسمه سدن.
صعدت بسيارتي وطلعت بس احس نار بصدري مشتعله ... دست بانزين وبكل سرعه سقت السياره ....

سدن .. رجعت للبيت لكيت بابا كاعد بالصاله سلمت عليه وصعدت بدلت ملابسي ونزلت اسوي غده ..

سويت الاكل وكعدت اكل بس احس اكو فراغ بداخلي مااعرفه شنو .. اشون احس نفسي خفيفه!
حتى الاكل مكملته ما الي شهيه .. غسلت مواعيني ورحت دااريد اصعد چان يصيحني بابا...

الاب .. سدن .

سدن .. نعم بابا رايد شي؟!

الاب .. اي تعالي عندي موضوع اريد احجي وياج.

سدن .. اهووو اكيد حيفتح موضوع الباشا والخطوبه .. بعد شيخلصني!
رحت كعدت يم بابا انتظر اسمع الي يحجي حتى انهي الموضوع نهائياً ويا واكوله مااريده ولا افكر بالزواج اصلاً.
بس الي سمعته صعقني!!!!!

الاب .. بنتي انتي تعرفين كلش زين شنو انتي بالنسبه الي..
بغض النظر عن عصبيتي احياناً وقسوتي .. بس انتي الج مكانه خاصه بگلبي تختلف عن الجميع .. حتى عن اخوج بسام .. بس داالاحظ هالفتره انتي مو سدن الي بنتي الي اعرفها !
متكعدين يمي مثل قبل ولا تحجيلي اي شي يخصج وصايره اتضمين عليه هواي اشياء .. اريد اعرف شنو الي صايرلج؟!!!
احجيلي ..

سدن .. مصاير شي بابا واني ممتغيره ولا شي .. تكدر اتكول اتعودت ع غيابك لا اكثر.

الاب .. لا اني متأكد مو هذا السبب .. من زمان اني مسافر وعايفكم من ايام بيبيتج حليمه انتي متغيرتي هسه شنو الي صار؟!

سدن .. بابا ماكو شي صدكني .. اشويه الدراسه متعبتني هالفتره ومداافرغ هذا كل ما بالامر.. لتشغل بالك.

الاب .. ماشي .. بس اتذكري اي وقت تحتاجيني اني موجود.

سدن .. الله هذي الكلمه اشكد حسستني بالامان .. رغم كل زعلي من بابا بس هالكلمه نستني كولشي .. رجعتني طفله صغيره لحظن ابوها ... حظنت بابا وقررت انسى الي عرفته واعتبره خطأ عابر صار وانتهى.
بعد هذا الحديث نفسيتي اتحسنت اشويه تجاه بابا .. خلصت اغلب وقتي ويا كاعدين انسولف ونفضفض .. طبعاً مجاب طاري موضوع الزواج نهائياً وهذا الشي طمني .. لانو كنت اظن انو كل الي ديسوي بابا هو تمثيل حتى يقنعني بالزواج!
بس الحمدلله طلع ظني مو صحيح ..
بقى بابا يمنا يومين ورجع سافر .. وهالمره حسيت بحزن وفراغ فضييييييع بغيابه!
استمرت حياتي بيت ودوام .. وتفكير....!
اي تفكير .. كنت افكر بجبل الجليد .. معقوله بهالسهوله يختفي!!
الي يسمع كلامه و اصراره عم عناده الي يريده ياخذه و كلام التمسك والاعجاب والانتظار .. .. ميصدك بكلمه وحده اختفى من حياتي!!!!

اتناسيت امره وشغلت نفسي بدراستي ... الى ان فد يوم سمعت بسام يحجي بالفون!!

بسام .. حبيبي يمان الله يصبرك ويكومه الك بالسلامه!!!!!

سدن .. يمان!!
هذا الاسم وين سامعته اني؟!!
وين وين وين .... هاااا اي اتذكرت هذا نفسه اسم اخو حبل الجليد.

معقوله يكون هو نفس اليمان الي ديحجي ويا بسام؟!!
زين .. منو الي يقصده بسام يكوم بالسلامه؟!!
معقوله ........!!!!!!
لا لا شنو هالافكار .. هذا حتى الموت يخاف منه.
بس اشون لازم اتأكد .. بقيت احوص يوم كامل شي بداخلي ممرتاح .. مااعرفه شنوو .. فضول لو قلق .. لو خوف!!
لليل اجه بسام وهنا خلص كل صبر عندي ... لازم اعرف شنو الموضوع واقتل فضولي الي هو سبب عدم راحتي ع الاغلب .
كعدت يم بسام بالصاله .. سويت نفسي دا اقرا .. وهو لازم الفون وكل اشويه يتصل بواحد ..!
انتظرته الى ان انتهى ... وبصوت مرتبك سألته..

_بسام اليوم خابر بابا ..

بسام .. اي ؟!

سدن .. اي سألني عليك  وكال هالايام لويش متتصل بي.

بسام .. اي صحيح صارلي كم يوم ممتصل بي مشغول .

سدن .. اي اني هم كلتله هشكل .. بس انت هم اتصل بي خطيه باله يمك.

بسام .. اي لعد خلي اتصل بي هسه .

سدن .. هنيالي هسه هذا اشون اعرف منه شي واني مااعرف شحجي اصلاً.
بقيت كاعده يمه وهو اتصل ببابا .. بعد سلام وكلام وووو
وصل بسام للنقطه الي اريد اعرفهااااا ... ويا ريتني معرفتها ....

بسام .. لا والله بابا بعده فاقد الوعي.

سدن .. خطيه يا مسكين هذا !!

بسام .. اي اي طبعاً بابا لتوصي حريص اشلون ما اوكف ويا اذا مو ع حساب الباشا فـ على حساب اخو يمان صديقي وصاحب موقف .
ان شاء الله .. يوصل حبيبي يوصل .. مع السلامه

سدن .. بسام  منو هذا الي دتحجي عنه لبابا ؟!

بسام .. صديقي مسوي حادث وديسألني عليه.

سدن .. يااا خطيه الله يشفي .. اني شفته بالحفله مالت اخو لما عزمنا بخطوبته هو نفسه مو؟!

بسام .. شكو دتسألين ؟!!

سدن .. اشبيك شفتك مقهور ع صديقك كلت اواسيك غير اخويه.

بسام .. لج بابا افتهمي السالفه قبل لتواسين ... الي مسوي الحادث مو صديقي يمان الي دتحجين عليه ..

سدن .. لعد منو؟!!

بسام .. تتذكرين اخو الباشا صاحب الحفله الي رحنا لخطوبته؟!!

سدن .. اي!!!

بسام .. هو الي مسوي حادث صارله اسبوعين تقريباً .. وهسه  اخو بغيبوبه ومقهور عليه.

سدن .. هاا.............

للحكايه بقيه❤️
لتستعجلون الاحداث القصه بعدها ببدايتها فرجاءاً بلا تعليقات محبطه 😪
رأيكم بالاحداث وتوقعاتكم للبارت القادم 🤗
لتنسووووووووووووووون التصوووووووييييييييييت حتى ينزل البارت بسرعه.