رواية ﮼صفقة ﮼عشك الفصل الثاني عشر 12 - بقلم ﮼الاميره،الموسويه 👑

بقلمي (هدى الموسوي) الاميره الموسويه👑

ما احلل لاي شخص ياخذ كتاباتي وينشرهم (ذمه)

*ملاحظه ..(البعض حيدوخ منو الي سوا الحادث واعرف قسم حيكولون مفهمنا شي وينتقدون 😪
فأحب اوضح انو اني سويت بيها مثل منكول بالعراقي (لوفه) 😂 سبرايز وكذا 😅
بس بهذا البارت حتتوضح الاحداث فرجاءاً بلااا استهزاء وسلامتكم ☺️)

سدن .. مفهمت منو الي مسوي حادث يمان لو اخو ؟!

بسام .. لج انتي غبيه لو شنو .. الي مسوي الحادث نورالدين بس الي بالغيبوبه اخو يمان .

سدن .. استغفر الله ..هو اني الغبيه!!
قبل اشويه كلتلي نورالدين الي مسوي حادث؟!
والظهر سمعتك تحجي ويا يمان اتكوله حبيبي الله يكومه الكم بالسلامه زين اشون نورالدين مسوي حادث واخو الي بغيبوبه مفهمت!!

بسام .. انتي شكو مهتمه بالموضوع ، وليش دتسألين اصلاً؟!!!!

سدن .. بسام لخاطر الله جاوبني وبس منوو الي بالغيبوبه؟!!

بسام .. لااااااااا انتي شغلتج مو خاليه شنو علاقتج بيهم هسه اريد اعرف والا متلومين غير حالج ع الي راح اسوي.

سدن .. اوك حكولك شنو علاقتي بالموضوع بس بالاول فهمني اشون صار الحادث ومنو الي متأذي!!

بسام .. لج سدن لتخبليني شنو علاقتج بي وشكو تردين اتعرفين؟!!
لج احجي شنو الي مسويته من ورانا احجي لا ادفنج هنا وروح امي.

سدن .. عزا العزاني بسام اتحول الى مفترس شورطني وحجيت .. وج متعرفي لبسام حيوان و ميتفاهم شنطقج شحجاج!!!
اوووووف يا ربي رحمتك هسه شسوي اني؟!
نورالدين خطبني من بابا قبل فتره واني موافقت وانطاني فتره حتى افكر وانطي خبر اعتقد من حقي اعرف شنو الي صار بالانسان الي حرتبط بي عدل ميت.

بسام .. خطبج!!!!!!!!!!

سدن .. اي واذا ممكن اتكولي منو الي بالغيبوبه .

بسام .. وليش اني مااعرف بهذا الموضوع؟!
ليش محد كالي شنو اني طرطور هنا ؟!
وانتي حضرتج شنو شايفه نفسج حتى ترفضين الباشا .. لج بأحلامج ميجيج واحد مثل نورالدين يا غبيه.

سدن .. مثل متوقعت بالضبط .. حتبدي الحيونه والمصالح .. بصوت حاد ..

_بسام اعتقد هسه ابد مو وقت هذا كلامك .. مثل مجاوبتك جاوبني منو الي مسوي الحادث ترى طلعتها الروحي.

بسام .. خلي اشوف ابوج والي كلام ثاني ويا .

سدن .. اوووووف يا ربييييي بسااااام حتحجي لو لا؟!!!

بسام .. انتي مو رفضتي شكو دتسألين عليه ؟!
شنو اهتز ضميرج هسه .. لو انقهرتي عليه؟!

سدن .. يبووو دروح هو اني صوجي الي دااحجي وياك.
عفته ورحت لغرفتي اتصلت ببابا .. لاول مره بحياتي اتصل ع بابا ويرد عليه بسرعه!
بالعاده يرن الموبايل الى ان يسكت ميجاوب ..

الاب .. هلو بابا اشلونج حبيبتي !!

سدن .. حجيت ويا بابا بس كانت يمه هوسه وكلام خبصه شكله بالشارع واني خابرته ..الحمدلله زينه انت اشونك بابا؟

الاب .. اذا انتو واخوج بخير فأني زين اكيد.

سدن .. تمام ... بابا اذا تسمح اكو شي اريد اسألك عليه.

الاب .. خير بابا محتاجه شي ؟!

سدن .. لا سلامتك حبيبي ممحتاجه شي بس اليوم سمعت خبر واريد اتأكد منه .

الاب .. خير شصاير؟!

سدن .. سمعت انو نورالدين مسوي حادث مااعرف اخو وهسه بغيبوبه  .. وبسام سألته عصب ومقبل يكولي شي.

الاب .. اي صحيح سمعت من بسام هالخبر .. ع اساس نورالدين داعم اخو بالغلط وهسه يمان بغيبوبه صارله اسبوعين بالمستشفى!

سدن .. اهااا الحمدلله.

الاب .. على شنو ؟!

سدن .. هاا .. لا بس دااكول الحمدلله محد مات منهم.

الاب .. اي والله ميستاهل يمان شاب بعمر الورد .. واخو نورالدين حسب مسمعت متدمر عليه فد مره.

سدن .. خطيه الله يساعده .. زين بابا انت اشوكت تجي اشتاقينالك!

الاب .. ان شاء الله هالايام اجي عندي كم شغله لازم اخلصها بالعراق وهم امر ع نورالدين اخذ من خاطره الرجل صاحب مواقف ميصير ما روحله

سدن .. اها تمام لعد توصل بالسلامه ان شاء الله.

الاب .. الله يسلمج بابا .. يلا اني صار لازم اروح سلميلي ع اخوج بسام.

سدن .. يوصل حبيبي الله وياك.

اااااااف واخيراً فهمت القصه .. اهم شي نورالدين مبي شي .. بس اخو هم خطيه ميستاهل!
صح هو قليل الادب وميستحي بس بعده صغير مو مال يموت هسه.

ياا سدن وج انتي اكيد اتخبلتي شنو هالكلام .. مات ولا عاش انتي شعليج!
اي والله معليه .. هالايام صايره اهذي هواي ..!

نزلت لكيت البيت فارغ وبسام ماكو!
كلعه بلا رجعه .. خلص اليوم عادي روتين ممل بس رغم كل الملل والكآبه الي عايشتهم گلبي احسه ممرتاح!
وضعي كوله ممستقر شنو السبب مااعرف.
لليل كولش اني وحدي بالبيت وبسام افندي ماكو!
بقيت كاعده بالصاله وانتظره يجي لانو اخاف انام بالبيت وحدي .. كعدت وفجأه احداث الليله الي بات بيها نورالدين يمي كولها اجتي ع بالي!!
لو ما اخو اكيد هسه كان اجاني ...!
شعور غريب اجتاحني ،، مااعرف شنو حنين .. لهفه .. او يمكن اشتياق!!!
محتاجه اشوفه .. احجي ويا واعانده!
لويش فجأه هذا الشعور اعتراني .. لويش لما كان ملك الي يتمنى بس رضاي رفضته!
وهسه دااشتاقله!!
ع هذا المنوال غفيت ع القنفه ... مصحيت غير ع صوت الباب دينفتح!!
فزيت والمفاجأه .....
دخل بسام وبابا..!!!!
بقيت صافنه مدااستوعب بابا شجابه ؟!
اليوم اني حجيت ويا كال كم يوم واجي .. هسه افتح الكى واكف كدامي؟

بعدت شرودي وكمت حضنت بابا وسلمت عليه .. سؤال وكلام .. عرفت منه انو هو بالعراق لما اتصلت بي!
كالي انو حب يسويها مفاجأه النا اني وبسام ولما اتصلت بي اليوم هو بالمطار ويحجي وياي .. واني من خبصتي الي كنت بيها وقلقي مسألته ع الهوسه الي سمعتها يمه شنو!
كعدنا اشويه بعدين بسام بدا يحجي ويعربد اشون مكلناله عن موضوع الخطوبه !!
حجه ويا بابا وسكته .. اما اني التزمت الصمت وتركت الحو لبسام يحجي براحته.
بعد نقاش طويل سكت بسام .. كمت اني نمت .. والصبح كالعاده دوام !!
اول مطلعت بقيت اتلفت يمنى ويسرى عسى ولعل يطلع كدامي!
عسى ولعل المح سيارته حتى لو مار صدفه مو الا جاي عليه!!
عسى وعسى ... وكولشي متحقق من الي اتمنيته بيومها ...!
خلص الدوام كولشي مفهمت لانو عقلي كان بغير مكان ... الشعور الغريب الي ديجتاحني بفراكه حيل متعب لدرجه دااحس نفسي اتكئبت...!
رجعت للبيت لكيت بابا ديبدل يريد يطلع!!
سألته ها وين؟!!

الاب .. رايح للمستشفى اريد امر على الباشا واتطمن على اخو.

سدن .. هااا .. اي .. تمام .
مشيت خطواتي عن بابا ورجعت التفتت اله .. بابا يصير اجي وياك؟!!

الاب .. اني رايح للمستشفى بابا شكو رايحه وياي؟!

سدن .. ضايجه واريد اطلع فدوه بابا..!

الاب .. هستوج رجعتي من الدوام بدلي وارتاحي .. ومن ارجع اخلي بسام ياخذنا نتعشى بره !!
بعد شتردين ؟!!

سدن .. لا بابا اني اريد اروح وياك اشوف يمان خطيه الولد باقي ببالي من يوم الحفله وانقهرت عليه لما سمعت الخبر.

الاب .. ماشي بسرعه بدلي اذا اتأخرتي اعوفج واروح.

سدن .. اروح بهذولي ملابسي مبيهم شي.

الاب .. بنتي شكو مستعجله امشي بدلي انتظرج.

سدن .. شمرت جنطتي ع التخم وجريت بابا وطلعنا ..ملابسي هذولي مبيهم شيييي بس امشينا فدوه ليجي بسام.

الاب .. ماشي يلا اصعدي.

سدن .. اخذني بابا ورحنا للمستشفى انشوف يمان .. المستشفى كان خاص من مستشفيات درجه اولى!
حمايه وتفتيش كالعاده ع بالك داخلين ثكنه عسكريه .. لو مقر حكومي.
بعد ما عرفو احنا منو وتأكدو من هوياتنا اخذونا لغرفه كبيره مثل الاستراحه وبقينا ننتظر بيها ..!
اشوكت يتكرم علينا حضرت الباشا....!
بس الي سمعنا كان مخييب للامال .. احد الموظفين بلغنا انو
_الباشا مموجود ومراح نكدر انشوفه!!!
بابا اتفهم الوضع وقدر صدمة نورالدين بأخو ، فسألنه الاطباء ع حالة يمان كالو انو هو بغيبوبه .. ولما سأل بابا ع الحادث ... كان الجواب لهذا السؤال صادم!!

_قبل اسبوعين يمان كان مشتري دراجه جديده نورالدين مكان يعرف عنها شي!
حسب مسمعت انو يريد يسويها مفاجأه الاخو!
وقسم كالو انو نورالدين معارض فكرة الدراجه او حتى السياره السريعه اليمان لانو ميريد يخسر اخو الوحيد بسبب هالشي.

بس الظاهر يمان مشتريها بلا علم او موافقة اخوو فلما راجع نورالدين للبيت كان يسوق بكل سرعته .. واخو ديطلع من البيت بنفس الوقت فمتضاربين!!!
نورالدين كونه بالسياره كانت اصابته خفيفه ومسيطر عليها .. بس الضربه القويه صايره بيمان!!
بحيث فاقد الوعي من اسبوعين .

استأذنه وطلعنا اخذني بابا لمطعم اتعشينا اني ويا ..! بس محسيت بطعم الاكل
رفض نورالدين انو يشوفنا خصوصاً وهو عرف اني موجوده فتح هواي تساؤلات بعقلي!
كتمتها واتجاهلت كل الي بداخلي حتى اليوم يمر .. بعدها رجعنا للبيت ..هم خلص هذا اليوم كالمعتاد ..!
ثاني يوم داومت وهم اتكرر وياي نفس الافكار والذكريات .. كنت اتلفت واباوع بالوجوه بلكي اشوفه !
بس ماكوووو وهذا الشي بدا يحبطني اكثر واكثر!!
لما رجعت للبيت ملكيت بابا انتظرته للعصر لما رجع كعدنا انسولف ومن خلال كلامه كالي انو هو وبسام رايحين للمستشفى وشايفين نورالدين وكاعدين ويا..!
عجيب مو ع اساس مشغول وميتواجد هالفتره ؟؟
سكتت بس الافكار بدت اتزيد براسي ... اتحملت الوضع مدة اسبوع .. بعدها بابا سافر والكعده بالبيت قبضت روحي اكثر وزادت همي وافكاري .. قررت اروح اشوفه بنفسي والتقي بي غصباً عليه والي يصير يصير.
ثاني يوم انتظرت لما خلص الدوام واجاني محمود ياخذني للبيت كلتله يغير طريق البيت اليوم !
بالبدايه استغرب ورفض .. بس كلتله انو بسام اتصل عليه وكالي اروح لهذي المستشفى!!
محمود بس يسمع اسم بسام يتكهرب لانو يكرها حيل واعتقد يخاف منه .. فمن سمع الامر من بسام نفذ ع طول !
اخذني للمستشفى .. نزلت هم تفتيش وكذا عرفت عن نفسي وكلتلهم اني من طرف السيد كريم و السيد بسام!!
دخلوني ...
هم كعدت بصالة الانتظار كالو لحد مينطون خبر للباشا  ... انتظرت بعدين مليت من الانتظار
كمت اتمشى بالممر بقيت امشي مسافه وادخل من ممر للممر  ... واذا بغرفه كدامي يطلع منها اصوات الات واجهزه كهربائيه!!!
دخلت لكيت عرفه كدامي اشون العزل وبيها شباك كبير تكدر اتشوف الي بالداخل!!
والصدمه كانت لما شفت يمان نايم ومحاوطي بكل هذي الاجهزه والاات!!!!
بقيت متفاجأه بالمنظر الرهيب والي يكسر گلب الحجر .. منو يصدك هذا الي نايم نفسه الي قبل كم يوم كان يضحك وتغزل ويتشاقه!!
كنت سرحانه بالمنظر الرهيب الي دااشوفه واذا بصوت يفززني من ورايه!!

التفتت لكيته واكف كدامي .... بس اقسم واني واثقه من كلامي مو نفسه نورالدين الي اعرفه!!!!
شخص ثانييييييي عباره عن ظلام!!

ظلام يغطي كل ملامحه .. وجهه شاحب وهالات سود تحت عيونه .. عيونه الي مليانه غضب ... اي غضب مااعرف شنو سببه!!!

بلا اي مقدمات ولا اي سلام بصوته الاشبه بالرعد ....

نورالدين .. شعندج هنا؟!!!

سدن .. بلعت الخوفه الي صارت بحنجرتي من شفته .. وبصوت مرتبك ومتقطع ...

اني .. ها .. هذا .. اجيت ... اني ... حتى ...

نورالدين .. بصوت حاد ونبرة مليانه غضب ... امشي اطلعي منا ومااويد اشوف وجهج نهائياً والا صدكيني مراح تبقين عايشه.

للحكايه بقيه 💔
اسفه ع التأخير بس الخطار ممنطينا مجال 😪
رأيكم بالاحداث وتوقعاتكم للبارت القادم 🤗
لتنسوووووووووون التصوووووووووويت حتى ينزل البارت القادم ❤️
اي غلط اي سحكه غلسووو والله كل اشويه اغفى وافز ميته نعاس 😴