رواية ﮼صفقة ﮼عشك الفصل التاسع والعشرون 29 - بقلم ﮼الاميره،الموسويه 👑

بقلمي الاميره الموسويه 👑

ما احلل لاي شخص ياخذ كتاباتي وينشرهم (ذمه)

الزعل عوفه على صفحه
الزلن لساني ولسانك
شنهو ذنب گلوبنه!!

نورالدين .. عفتها وطلعت بس بلحظتها من صدك كرهتها .. لو مهما يكون الكره الي بداخلي لشخص مستحيل اتمناله الموت .. والاصعب من هذا اشلون عدها جرئه تنطق هذا الكلام بوجهي .
خلص معناها اني قصه منتهيه بالنسبه الها .. وفعلا متريدني مو مجرد كلام وحقد مؤقت مثل ما كنت متوقع!
كرهتها كرهت نفسي وكرهت الصدفه الي وصلتني لهذا الطريق وعرفتني بيها .. انسانه مثل هذي متستاهل ذرة حب مني ولا حتى اخسر مشاعري عليها او افكر بيها.
طلعت بسيارتي افتر كنت مخنوك لدرجه يصعب عليه اشم الهوا!

صعبه من تتعب ع شخص وتبني عليه أمال واحلام وتالي يطلع وهم وتكتشف كل احلامك كانت كوابيس .
والاصعب من هذا اشلون تقنع گلبك ينساها .. اشلون تقنع علقك يتخلص منها؟!
بلا وعي الألم هو الي يتحكم بيه .. اخذتني رجليه لبيت بنيه كنت اعرفها من زمان (كصديقه ) وبس حتى لحد يفكر غير تفكير ميربطني بيها علاقه حب وهالسوالف نهائياً .. عرفتها عن طريق يمان مره راد يضحك عليها مثل كل الي يعرفهن بس اني منعته لانها انسانه شريفه وخلوقه .. كنت اعتبرها بمثابة اخت وبس
مااحجي وياها الا نادراً لما يثقل حملي او انزعج من شي لدرجه مااكدر اتحملها .. وخصوصاً بعد ما دخلت سدن بحياتي نسيتها كلياً وهي هم متتواصل وياي ابد لان تعرفني مااحب احد يزعجني ومفهمها انو اني لما احتاجها اعرف اشلون اوصللها غير هذا ممسموحلها تتصل بيه ابد ..  سالفه طويله وقديمه
المهم ..
رحت الها اتصلت عليها رنه والثانيه ردت .....!!

رشا .. الوو!!

نورالدين .. اني جوه بيتكم انزلي

رشا .. نور؟!!!
معقوله هذا انت ؟!

نورالدين .. انزلي .. سديت الخط وبقيت بالسياره ادخن بس احس روحي الي دتحترك مو الجكاره.
دقايق واجتي رشا .... منتبهت عليها ولا باوعت بوجهها اصلاً .. لان بالي كان بغير عالم حتى عيوني متشوف غير صورتها وهي تتمنى موتي.

رشا .. مرحبا نور اشونك شخبارك .. اليوم شذكرك بيه؟!

نورالدين .. تعبان...

رشا .. واضح عليك .. بس يا ترى راح تحجيلي شنو الي متعبك لو حتكتفي بالسكوت كالعاده!!

نورالدين .. مااعرف ... لان حتى اذا اريد احجي مااعرف شنو الي راح اكوله.

رشا .. اهاااا شكله الموضوع هالمره كولش كبير!

نورالدين .. ماكو رد.

رشا .. اممم زين احجيلي شي مختصر ع الاقل اعرف شنو الي موصلك لهذي الحاله.

نورالدين .. حبيت.

رشا .. ههههههه لا هواي متغير انت .. صاير تمزح .

نورالدين .. بنبره حاده وكل هدوووء .. وانتي صايره تافهه.

رشا .. اممم قصدك لانو ضحكت !!
ترى حقي ماكو واحد ممكن يصدك الي دتكوله .. الباشا يحب!!
مستحييييييييييييل كول غيرها.

نورالدين .. انزلي من السياره .

رشا .. ماشي لتعصب اسفه .. بس والله مدااصدك انت تحب.

نورالدين .. ليش مو بشر؟!

رشا .. لاااا مو هذا قصدي .. بس اني اعرفك كولش زين انت مو من النوع الي يظهر مشاعره بسهوله ولا حتى من النوع الي يؤمن بالحب والعلاقات الغراميه.

نورالدين .. البشر يتغير مو!

رشا .. اكييييد وانت اكبر مثال.

نورالدين .. ما اجيت حتى تشرحيلي نظريات الحياه.

رشا .. اوك احجيلي منو هذي سعيدة الحظ الي كدرت تمتلك گلب الباشا ؟!

نورالدين .. متعرفيها.

رشا .. زين الحب شي حلو يسعد الناس مو يتعبهم انت شنو الي متعبك؟!

نورالدين .. منو كالج الحب يسعد الناس؟!

رشا .. كل العالم تعرف هذا الشي والي عاشو قصص حب دليل ع هذا الكلام ميحتاجلها معرفه ودراسه .

نورالدين .. زين ليش اني الحب سبب موتي؟!

رشا .. اسم الله نور شهالكلام؟!
هياتك كدامي ما شاء الله معافى وسليم لويش دتحجي بهالسيره.

نورالدين .. الي كدامج هذا بس جسد .. روحي قتلتها كلمات كالتهم بلسانها.

رشا .. امممم شكلك متعارك وياها .. ماشي اسمعني نور يمكن كلامي هذا ميعنيلك شي او حتى ميغير الي بداخلك والي دتحسه بس عسى ولعل ينطيك الطمأنينه او يزيح جزء من التعب الي دتحمله ..
الحب رغم حلاوته مر .. يعني اذا متعيش مرارته وعذابه مراح تستطعمه ولا تحس بقيمته.
فطبيعي جداً يصير وياك هشكل خصوصاً بالنسبه لشخص مثلك مشاعره جامده ولتزعل من كلامي بس هذي الحقيقه الي عرفتها من علاقتي بيك ، انت شخص قاسي وحتى بحبك تأذي .. فممكن ايكون الطرف الثاني اساء فهمك بسبب البرود الي بمشاعرك وصار الخلاف !
مو معناها تنهي كولشي بينكم وتتركه بأول مشكله .

نورالدين .. كل الي كلتي مو مهم .. جاوبيني ع سؤال واحد وبس.

رشا .. اوك شنو سؤالك.

نورالدين .. اذا شخص يحبج ممكن يتمنى موتج؟!

رشا .. اكيد لا مستحيل الي يحب من صدوك يفكر مجرد تفكير بأذية حبيبه مو موته.

نورالدين .. خلص.

رشا .. مفهمت شنو هو الي خلص؟!!

نورالدين .. صار لازم اروح .

رشا .. بعد وكت هستوك اجيت.

نورالدين .. تصبحين ع خير.

رشا .. ماشي براحتك .. وانت من اهله.

نورالدين .. نزلت من السياره واني شغلتها وطلعت .. وكأني كنت عايز نار تحركني اكثر من الي بيه.
كنت اتمنى يكون جواب رشا غير الي ببالي .. اتوسلت الله بداخلي يكون ظني غلط وجوابها يطفيلي البركان الي ديثور بگلبي.
بس الي كالته اثبتلي انو اني كنت غبي .. والحب شي حقير ويذل مو اكثر.
محسيت ع الوقت غير الشمس دتطلع .. كل هذا واني افتر مثل التايه متادري وين اروح.
مااريد ارجع البيت واشوفها .. ولا اريد حتى شي يذكرني بيها .
ركنت السياره بالكراج وبقيت ادخن الى ان طر الصبح عيني مااخذت نوم .. بنفس وضعي رحت للشركه ما الي خلك اداوم بس مجبور لازم الهي نفسي بأي شي.
بالمكتب غسلت وجهي وبدلت ملابسي مأكلت شي .. خلصت اليوم شغل بالليل طلعت للفندق مالتنا حجزت جناح خاص الي وبلغت زيد يروح للبيت يجيبلي ملابس لهنا.
اول ما وصل زيد للبيت اتصل عليه يمان .. انت وين وشكو وليش مرجعت !!
كلتله انو اني مسافر كم يوم عندي صفقه بس تكمل ارجع وطمنته مصاير شي.

ع هالحال بقيت بالفندق لمدة شهر كامل حاولت اتناساها بكل وسيله واشيلها من بالي ..
بس قبل لا انهيها من حياتي خلص لازم تدفع ثمن الي سوته بيه .. حبي الي داسته برجلها بكل برود لازم اخليها تبجي دم على الي خسرته.

بعد الشهر نفسيتي كل يوم بدت تتدمر اكثر .. صدى كلماتها ونظراتها الي بلا اهتمام كانت جحيمي الي يحركني كل يوم وكل لحظه .. بعد الشهر يمان اتصل عليه وكال هسه لازم تجي للبيت عدنا خطار مهم وضروري تجي!
لبست وطلعت بوجهي للبيت ملكيت احد !
صحت يمان يمان ماكو رد اجتي الشغاله كالت استاد يمان طلع مموجود.. دخلت للمكتب وكعدت انتظره يجي اريد افهم شهالافلام الي ديسويها وياي.. كاعد ودااكلب بالملفات اندكت الباب .. ع بالي الشغاله جابت الگهوه الي طلبتها سمحتلها بالدخول ..

انفتح الباب واذا الكاها هي واكفه كدامي ....!

سدن .. بعد الكلام الي دار بينا مشفته بعد اختفى نهائياً .. غيابه وعاني ع الغلط الي ارتكبته بحقه !
صح اني كنت ساخطه عليه وكارهته بسبب الي سوا بيه بس مهما يكن الي كلته قاسي حيل .
الندم دائماً ميفيد ولا يغير النتيجه اني جرحته وهو اكيد مراح يسكت ع هذا الجرح .. الله اعلم على شنو ناوي هالمره.
شهر مر على غيابه كل ما أسأل يكلولي مسافر مسافر .. فكرت هواي مرات اعتذر منه ع الي كلته وافهمه انو اني مااقصد والكلام طلع من ماعندي حالة عصبيه وكلته .. بس اشون اوصله لا عندي موبايل اتصل عليه .. ولا اعرف وين هو واروحله!
بقيت بالبيت انتظر .. اهلي ماكو خبر منهم الظاهر كنت عاله عليهم وخلصو منها .. محد كلف نفسه بمكالمه وسألو عني ميته عدله!
اذا عندج غضب وحقد المفروض تطلعي بأهلج مو بالشخص الوحيد الي كان عون وسند الج.
بس لاااا هو يستاهل الي كلته واكثر .. لان الي سوا بيه مو قليل الحقير باعني الاخوو .
كالعاده تفكيري انقسم جزئين جزء يلوم بيه وندمان ع الي كلته .. وجزء ارتاح واتشفى بي مذلول كدامي.

يمان وزوجته كانو مخلصين حياتهم ونسه وطلعه .. وابنهم ادم ع طول يعوفو يمي اتعلقت بي كولش لدرجه صار من ياخذو يبجي الا يمي يلا يسكت.
لارين بدت تنزعج من هذا الشي لانها كامت تواجه صعوبه بالتعامل ويا ابنها الي كل اشويه يبجي يريدني يمه.
واني حاولت بكل الطرق اتأقلم وياهم بالبيت وانسى حياتي ويا اهلي لان الظاهر ماكو رجعه.

فد يوم كنت داانيم بأدم لان امه وابو طالعين .. وسمعت صوته يصيح يمان!!!!!
گلبي صار يرفرف مثل الحمامه .. فزيت من مكاني بصدمه ممصدكه الي دااسمعه ولو مداايصيح بأسم اخو كان كلت هذا يمان.
عفت ادم نايم وعدلت نفسي هيج شي بسيط اخاف شكلي مبهذل .. نزلت بهدوء لكيت الصاله فارغه وهوماكو!!
سألت الشغاله كالت الباشا بغرفة المكتب .. بخطوات متردده وخايفه من ردة فعله فتحت الباب لكيته كاعد ورا المكتب وبيده اوراق يگلب بيهم .. من شافني رفع نظره الي بحده ورجع يباوع للاوراق الي بأيده!!

بصوت مرتبك ومهزوز .. مساء الخير.

نورالدين .. ماكو رد.

سدن .. اتقربت منه بخطوات بطيئه وهادئه صرت قريبه منه .. بهدوء

_اني اسفه.

نورالدين .. بعدم اهتمام وهو يگلب بالاوراق .. ع شنو؟!!

سدن .. ع الكلام الي كلته.

نورالدين .. تمام.

سدن .. يعني سامحتني؟!!

نورالدين .. بعدم اهتمام ع نفس انشغاله ..يهمج اسامحج او لا؟!

سدن .. اي اني غلطت وكان المفرو...

نورالدين .. قاطعتها بحده .. تردين اسامحج؟!!

سدن .. بخوف وتردد .. اي .

نورالدين .. رفعت نظري الها بحده وبأبتسامه ماكره .. تمام بس الي يغلط لازم يتعاقب .

سدن .. بلعت الخوفه الي بحنجرتي .. وبأرتباك .. وشنو عقابك؟!!

نورالدين .. اني ما راح اعاقبج .. بس عندي شرط حتى اسامحج.

سدن .. بكلمات متقطعه .. شنو هذا الشرط؟!!

نورالدين .. اعتدلت بكعدتي .. وفريت الكرسي بتجاها .. بصوت جامد ونبره امره ... تعالي هنا.

سدن .. نظراته ولون عيونه اتبدلو واكتسحهم ظلاااام دامس .. نظرات اعرف شنو معناها والابتسامه الي ع نهايه حلكه بأسلوب ساخر شرحت قصده ...!
كنت متردده وكل شي بيه مرعوب من الافكار الي دتخطر ع بالي .. بس ما كان كدامي حل ثاني .. نورالدين هو الوحيد الي وكف وياي وساعدني بأحلك الظروف اذا خسرته محد يبقالي .... التناقض بداخلي اربكني بحيث خطواتي كانت متردده وخايفه .. اخذت نفس ومشيت بتجاها .. وصلت ع مسافه قريبه منه وكفت.

نورالدين .. الخوف الي ع ملامحها كان كفيل بشرح الي ديتحسه بهذي اللحظه .. باعدت بين رجليه واني كاعد وكلتلها بصوت حاد وكل هدوووء .. اقتربي .

سدن .. كنت منصاعه لأمره مااعرف ليش يمكن القرار الي اتخذته بعد ما بي رجعه .. مشيت خطوتين اصبحت واكفه بحظرة هذاك الجسد الضخم ..

نورالدين .. اكعدي ع رجلي.

سدن .. فتحت عيني بصدمه من طلبه .. الخوف اتملكني وقررت اتراجع وانسحب من الصلح .. مااريد اسوي الي ديفكر بي ع الاقل مو هسه ولا بهالظروف .

درت وجهي عنه دااريد اروح جرني من ايدي وبلحظه وحده لكيت نفسي كاعده ع رجليه وبين احظانه .. ميفصلني عنه شي !!

عضلات صدره الصلبه حسيتها جدار من حديد وايده الي سحبتني بقوه صارت قضبان منعتني انهزم من سجنه...!
مشاعر مخربطه خوف ع احراج .. هدوء ع ارتباك .. لحظات تخطف الانفاس سرق مني ع غفله تفكيري وباسني!!!!
شعور غريب اول مره حسيته ويا .. اخذت مني هذي الخطوه ثواني دقايق ساعات .. مااعرف اشكد استمرت الى ان دفعته بقوه لانو بدت انفاسي تتلاشى واختنكت .. هو الظاهر حس انو اني دااختنك بعد عني بقيت اشهك بقوه حتى احذ نفس اما هو كان ياوعلي بكل هدوووء وابتسامة نصر مرسومه ع وجهه..

نورالدين .. اقتربت منها بصوت هادئ همستلها بأذنها .... اذا تردين اسامحج لازم اتكملين للاخير.

سدن .. رفعت نظري اله باوعت لعيونه .. وفهمت الكلام الي يريد يكوله خلص بس حاولت استغبي عسى ولعل يكون قصده غير ..... بصوت هادئ ونبره متسائله .. شقصدك ؟!!

نورالدين ... تعالي وياي ....

سدن ..وين ؟!!

نورالدين .. اخذتها من ايدها ودانصعد للغرفه .. وكفت وسحبت ايدها مني!!

سدن .. نور ممكن تسمعنـ....

نورالدين .. بنبره هادئه هدووووء قاتل .... اشششششششش لتحجين ولا كلمه سوي الي اكوله وبس

سدن .. نظراته ونبرة صوته كانت غير قابله للنقاش .. مشيت ويا بلا اي اعراض اخذني من ايدي وصعدنا لغرفتنا .........

للحكايه بقيه 💔

اعرف اتأخر البارت واسفه بس والنبي النت عندي زفت لان ع الشريحه انشر ويطلعلي فشل يعني مو مني الصوج 😪 انتظرت لليل كولش كالو يصير قوي النت

رأيكم بالاحداث وتوقعاتكم للبارت القادم

لتنسووووووون التصويييييييت