رواية ﮼صفقة ﮼عشك الفصل الثامن والعشرون 28 - بقلم ﮼الاميره،الموسويه 👑

بقلمي الاميره الموسويه 👑

مااحلل لاي شخص ياخذ كتاباتي وينشرهم (ذمه)

نورالدين .. دخلت للغرفه لكيتها نايمه ع التخم نومه مااحجيها الكم .. القميص قصير ويكشف اكثر من ما يغطي!!
شفتها بمنظر خلاني اتصنم بمكاني .. يمكن هي المخلوقه الوحيده الي تخلي انفاسي تختفي .. دكات گلبي لاول تتخربط .. ماانهز بسهوله لهيج منظر بالعاده اني نورالدين الي متثيره رغبه او شهوه تجاه اي مخلوقه .. بس هالمره شي غريب دب بكل انحاء جسمي!
افكار غريبه خطرت ببالي.. بس لااااا مستحيل اتقربلها ، اكيد هذا الشي راح يصغرني بنظرها وتستحقرني وهذا اخر شي ممكن افكر بي تجاها.
استجمعت نفسي وطردت الافكار الي غزت عقلي .. رجعت فتحت الباب وسديته بقوه فزت هي من مكانها بملامح مفزوعه.
من شافتني تحول فزعها لنظرة كره ..

سدن .. من عافني وطلع بقيت افتر بالغرفه لحالي ماادري شسوي .. لا اكدر اطلع للشرفه اجيب ملابسي وألبسهم اخاف يجي ويلكاني لابستهم وهالمره من صدوك ينهيني.
ولا اكدر ابقى بهذا القميص لان اعرف تأثيره عليه من النظرات الظلمه الي شفتهم بعيونه.
كنت خايفه منه لأبعد حد .. متوقعت يجي يوم والشخص الي كان منقذي الي ومصدر امان .. يتحول الى سبب خوف وترهيب الي.

اتغطيت بالغطى ع التخم ومددت افكر اشون بيه اذا رجع هو ونظراته المفترسه ... اتأخر الوقت وكنت جوعانه حييييل من ريوك الصبح مأكلت شي بعد .. داهم النعاس عيوني ونمت ........ ما كعدت غير ع صوت قوي فزيت برعب ع بالي انفجار فتحت عيني شفته  واكف يم الباب وايده عليه !!

الله اكبر عليك حتى من النومه حارمني !
باوعت ع نفسي الغطى ماكوو والقميص مرفوع ليفوك !!!!!!!
وجهي حسيته ناااار صار من الاحراج .. اكيد شافني بهذا المنظر وحيرجع الظلام لعيونه ، رفعت عيوني بتردد وباوعتله اريد اشوف نظراته الي اكيد ديفترسني .. بس المفاجأه كان داير وجهه عني!!!
جريت الغطا بسرعه ولفيت نفسي .. ردت اكوله يجيبلي ملابسي من البلكونه البسهم حتى لو مبللات ولا ابقى كدامه بهالشكل .. بما انو مااكدر ابعده عني ع الاقل خليني احافظ ع نفسي وما اسوي شي يرغبه بيه.
ردت احجي بس هو سبقني .....

نورالدين ..بصوت هادئ صح النوم .

سدن .. باوعت عليه ومحجيت شي.

نورالدين .. كومي بدلي خلي ننزل نتعشى.

سدن .. يحجي وياي بكل هدوء واريحيه ع بالك من صدوك زوج و زوجه .. ميدري اني كل شويه يجي ببالي اهجم عليه اموته واشرد .. بس طولي ميساعد.

نورالدين .. دااحجي وياج.

سدن .. مو جوعانه (كذب ميته من الجوع)

نورالدين .. صعدولج عشه لهنا؟!

سدن .. لا.

نورالدين .. تمام لعد ننزل نتعشه.

سدن .. مااريد اتعشه شنوو هي كوه.

نورالدين .. بدلي فضيني وبلا كلام.

سدن .. اي انتظرني خلي البس البنطرون مالتك حتى يصير طقم.

نورالدين .. ااااف نسيت .. طلعت الموبايل واتصلت بالحرس البره ينزل الاغراض من السياره ويكوللهم يصعدوهن فوك .

دقايق واندكت الباب سمحتلهم بالدخول .. دخلو الغراض للغرفه هي كانت واكفه بمكانها وتباوع للي ديصير بهدوء بس علامة التعجب واضحه ع ملامحها ..!
دخلو كل الاغراض وانصرفوا ..

_بصوت حاد .. بدلي.

سدن .. متوقعت حيروح يشتريلي ملابس .. وشدعوه هالكد شسوي بيهم ليكون مفكرني حبقى ويا هذا ...... والله يا الله.
صح اتفاجأت من تصرفه بس بنفس اللحظه شي غريب ماافهمه اتسلل لداخلي .. مبينت شي بقيت نفسي هادئه وممباليه بألي دااشوفه الى ان كالي بدلي.

_رجعت كعدت بمكاني ومجاوبته ، اذا مفكرني لعبه عنده يأمرني وانفذ فهواااااااي غلطان.

نورالدين .. لبست كلامي ولا كأنو دتسمع .. اسلوبها هذا يستفزني لابعد حد بحيث يخليني اريد الزمها وانهي حياتها بأديه .. بس لااا خلي اطول بالي مااريدها تكرهني ..!
مشيت بتجاها وصلت للتخم الي كاعده عليه جريت الغطى منها بقوه طلعت رجليها ...!

سدن .. بعصبيه كعدت وغطيت نفسي .. شدتسويييييي شهالتصرفاااااات ؟!!!!

نورالدين .. اسلوبي يعتمد عليج .. نفذي الي اكوله ولتخليني اسوي شي اكره يصير بينا.

سدن .. ههه شنو تسوي بعد اكثر من الي سويته .. لتخاف ماكو شي ممكن تسوي ويزيدني كره لانو كرهي الك اتخطى كل الحدود.

نورالدين .. نزلت لمستواها بصوت هادئ ، نبره حاده ونظره غاضبه .. دقيقه وحده الكاج جوه ع السفره غير هذا راح اخليج تعرفين شعور الكره الحقيقي .. عفتها وطلعت بس كلامها بقى ينخر بعقلي .. يحرگ بگلبي .. تكرهني!!!!

سدن .. نبرة صوته المهدده كانت واضحه ميحتاج اجادل واجيب المشاكل النفسي .. كمت من مكاني بسرعه بمجرد ما طلع اخذت بيجامه خفيفه لونها زهري ومنقطه بأبيض وتي شيرت ابيض من الي جايبهم بدلت وشمرت قميصه ع السرير مالته .. رفعت شعري ع شكل كعكه ونزلت ركض لانو الدقيقه حتخلص.
نزلت لكيت البيت فارغ وهدوووء .. مشيت بخطوات متردده مااندل وين اروح .. زين يمان وعائلته مو ساكنين هنا اشو ماكو ولا واحد!
بيتهم ما شاء الله كبير وحلو بقيت اتأمل الديكورات والاثاث .. واذا بصوته المرعب مفززني ..

نورالدين .. نزلت ع السفره لكيت الاكل محضري .. دخنت جكاره على ما تنزل لان اعصابي بعد الي شفته تلفت ع الاخير وضروري جكاره تهديني .. بقيت سرحان بصورتها الي بمخيلتي .. شكلها وهي نايمه يبعث افكار ظلمه بعقلي .. دايخ وافكر واذا بيها دتنزل من الدرج بكل هدوووء اتكول اميره وتمشي!
الملابس الي لابستهم ناعمه و وشعراتها رافعتهم بطريقه بسيطه بس ضايفتلها جماليه ورقه طاغيه.
بقت تمشي بهدوء وتتلفت بعفويه ، واضح انها متندل مكان السفره وين .. تركتها تتحرك بحريتها ردت اشوفها شنو تسوي .. وكفت كدام صورة لابويه وامي كبيره معلكيها بالصاله بقت تتأمل بيها .. مااعرف شنو حجت بينها وبين حالها بس سمعت همهمة صوتها .. بعدين مشت الى ان صارت كدام المطبخ رادت تدخل صحتها .. بصوت حاد..

_تعالي هنا.

سدن .. التفتت لكيته كاعد ع كرسي وكدامه طاولة طعام اشبه بالملكيه شكلها فخم .. مشيت ناحيته بهدوء بس ريحة الاكل سطرتني سطر .. كان كاعد ع الكرسي الي براس الطاوله اني سحبت الكرسي الي نهايتها وكعدت .

نورالدين .. ليش بعدتي ترى مااكل بشر .

سدن .. رفعت نظري اله ومجاوبته .. اريد اكل بس مااعرف اشون ابدي وهو كاعد.

نورالدين .. بقيت انتظ رها اتبلش بالاكل ماكو كعدت بهدوء وساكته .!!
_متاكلين؟!

سدن .. كلتلك مااريد.

نورالدين .. بس ملامح وجهج وتعابيرج متكول متريدين.

سدن .. يا فضيحتااااااه .. لهدرجه مبين عليه جوعانه .. باوعتله بحده وبصوت جامد ..

_ما اشتهي ولا اريد .. حاول تفهم شدااكول .. لو حتى الاكل هم بالغصب.

نورالدين .. باوعتلها كانت تحجي بأنفعال وعصبيه رغم ماكو داعي لكل هذا الشب اني مجرد ردتها تاكل لانها من الصبح مماكله شي .. ليش تنفعل وتتنزفز؟!
اعتدلت بكعدتي و ورثت الجكاره الي بأيدي .. بصوت هادئ ..

_أكلي.

سدن .. مااريد .

نورالدين .. اكلي.

سدن .. ما أريـ...

نورالدين .. بصوت غاضب .. أكلليييييييييي.

سدن .. عصب حيل لدرجه ملامحه كولها اتحولت الى غضب .. مديت ايدي واكلت من الخوف مبقيت شي بالصحن .. اكلته كوله هو بقى كاعد بهدوء ويدخن ما مد ايده واكل نهائياً .... بعدني دااكل وجان ينفتح الباب ويدخل يمان وزوجته.... !!

اي هي جانت عايزه وهسه كملت .. دخلو شايلين طفل صغير ايه من الجماااال ما شاء الله طالع الامه عيونه رماديات وبشرته ثلج .. شعره اسود وكثيف فدوه اشكد حلووو .. گلبي كام يرفرف عليه اول مره اشوف طفل عن قرب هشكل اريد بس المسه ..!

سلم يمان ع اخو وبعدين سلم عليه .. حاولت اني قدر الامكان اتناسى الموضوع الي صار قبل بينا والافكار الغريبه الي ساورتني من اتذكره .. سلمت عليه بطريقه روتينيه بس مطلت الكلام ويا ولا حتى رفعت راسي وباوعتله .. ماادري لويش احس نفسي مذنبه من اشوفه .
زوجته كانت انسانه جداً هادئه وثقيله .. رغم برودتها بس تصرفاتها عفويه ومبيها تكبر.
اول ما شاف السفره يمان كال اييييي ... اني ميت من الجوع من الصبح ليهسه كلشي مماكلين بس محتارين بأدم باشا ولقاحاته.

طلع مني الكلام بعفويه .. حياتي اسمه ادم.

لارين .. بأبتسامه هادئه .. اييييي اقدملج الباشا الصغير سيد ادم .

سدن .. حبيبي فدوه اشون شهالجمال .. الله يحفظه الكم ويخليكم اله.

لارين .. حبيبتي تسلمين .. شكلج تحبين الاطفال .!!

سدن .. ههه لا علاقتي ويا الاطفال مو هالكد لانو ماعدنا اطفال بالبيت فما شايفه طفل عن قرب هيج .. وادم ما شاء الله حلو وشكله ينحب .

لارين .. هاج اخذي بحظنج شويه لعد.

سدن .. هاا لا مو اخاف اوكعه لو يصير بس شي .. مشايله طفل اني ابد.

لارين .. هههه لا لتخافين ميصير شي اني حخلي بحظنج انتي بس الزمي ميحتاجلها شي .

سدن .. شالت الطفل خلته بحظني .. ياااااا ربي اشووووون شعور حلوووو ريحته اتجنن دافيه وهو بشوش ويضحك مستغربني ابد .. بقيته بحظني والعب بي رحت لغير عالم حتى نسيت اكو وحش مرعب كاعد كدامي وعيون مفترسه دتراقبني بدقه!!
اندمجت ويا ادم هواي شكله وحركاته الطفوليه ذكرتني بالطفله الي بداخلي .. الطفله الي معاشت شعور العائله ، حنان الام ، حماية الاب وطيبة الاخ.
فززني من هالشعور والذكريات صوت لارين وكلامها الي رجعني للواقع المر ...

لارين .. انتي تحبين الاطفال ان شاء الله ربنا يرزقكم انتي ونورالدين بطفل مثل ادم واحلى .

سدن .. كلامها بدل ميفرحني خوفني .. رفعت نظري اله بسرعه لكيته ديباوعلي بأبتسامه جانبيه ع وجهه معناها واضح ميحتاجله تفسير ..!
بعدت نظري عنه ومحجيت شي حاولت اتجاهل كلامها وكأني مسمعت .. واذا بي يحجي ...

نورالدين .. حركاتها وتصرفاتها ويا ادم وشلون تلعبه عكست مدى البرائه الي بداخلها .. اسلوبها عفوي وابد مو متصنع بقيت اراقبها بأستمتاع وكأني دااتفرج ع طفلين كدامي مو بس ادم .. كالت لارين كلام واضح انه معجبها ملامحه اتغيرت من هدوء الى انزعاج بس محجت شي .. سكوتها خلاني ارد ع لارين بنوع من الاستفزاز الها .. بصوت هادئ ..

_ليش لا ، بس اني مااريد ولد اريد بنت حتى تطلع حلوه ع امها .

سدن .. اشكد ميستحي هذا اشون يحجي هشكل كدامهم .. الي يسمعه يكول من صدوك احنا عايشين حياة زوجيه .. بس اكيد اله قصد من ورا هذا الكلام ديفهمني انو اگطع الامل اطلع منا لو اخلص منه!!
انطيت ادم الامه واترخصت منهم حتى اصعد للغرفه .
محجه هو ولا جبرني ابقى عفتهم وصعدت بس نظرته وكلامه الواثق هزو كياني.
دخلت للغرفه وبقيت افتر بيها رايحه راجعه .. لازم اخلص من عنده واشرد منا بأي طريقه هذا واضح من كلامه باني امال لبعيد ، يريد يخلف مني !!!!!
من كل عقله اخلي يتقربلي لو يصير عندي طفل من عنده بعد مااتزوجني بهذي الطريقه!
والله لو يموووت ما اخلي يلمس شعره مني.
بعدني محتاره وافكر جان ينفتح الباب ويدخل .. بدون استأذان بدون حتى ميدك ع الباب.
شفته دخل اني طلعت من غرفة النوم كعدت بالصاله ع التخم مالتي الي انام عليه .. جريت الغطا وداانام جان يحجي هو ..

نورالدين .. بعد ما كامت اتفاجأت لارين .. لان هي تعرفني محد يقاطع كلامي ويكوم بهالطريقه!
والشي الثاني اني كنت دائماً احجليها عنها لما كنا بأمريكا .. اتصورت انو هي تحبني وتبادلني نفس الشعور .. لذلك صمتها وانسحابها المفاجئ خلا لارين تستغرب!
استأذنت هي من عدنا حتى تروح تنوم ابنها بقينا بس اني ويمان ...!

يمان .. وهو ياكل .. سدن شكلها بعدها ماخذه موقف تجاهك واضح من ردة فعلها بعد كلام لارين.

نورالدين .. وشنو الي صار حتى يخليها تغيير نظرتها تجاه زواجنه؟!

يمان .. مااعرف بس انت اخويه واعرفك كلش زين ميستعصي عليك شي .. والتصرف الي ميعجبك تكلب الدنيا ع صاحبه .. غريبه لحد الان تتصرف وياها ببرود مدااعرفك.

نورالدين .. الموضوع مو قصة خوف او مااكدرلها .. اكدر كلشي اسوي بيها .. حتى اخوها الحقير انطاني مطلق الحريه واساساً هو ميهمني حتى اخذ رأيه بمعاملتي وياها .. بس هي تختلف!

يمان .. عن منو تختلف الي يسمعك يكول زير نساء حضرتك.

نورالدين .. لا هذي التسميه تخصك الك وبس .
اقصد تختلف مكانتها عندي .

يمان .. خو كول احبها وفضها شكو هاللف والدوران.

نورالدين .. مو موضوعنا هذا.

يمان .. لا موضوعنا .. اصلاً كلشي بهذا التغيير والاختلاف الي بشخصيتك واسلوبك اساسه هذا الشي.

نورالدين .. تمام اذا تعرف شكو دتلغي وكاعد تسأل وتتطقس الاحوال؟؟

يمان .. لا هذا الشي اني متأكد منه ومشاعرك هم اعرفها شنو بس سؤالي غير هذا الموضوع .. سؤالي هو اشلون راح تنسيها زواجك منها بهالطريقه؟!

نورالدين .. ما راح انسيها شي .

يمان .. هاا لعد اشلون؟!

نورالدين .. موضوع زواجنه هي الي جبرتني عليه لما وافقت ترتبط بشخص ثاني وهذا الشي لازم اخليها تدفع ثمنه بس مو هسه .. هسه اكو شي ابالي لازم اسوي وبعدها كل الي صار تنسى لحالها.

يمان .. وشنو هو هذا الشي؟!!

نورالدين .. مو مهم تعرفه المهم اتساعدني اسوي.

يمان .. شلون اساعدك بشي مااعرفه مخبل انتي؟!!

نورالدين .. ااااف منك يمان اشكد اتنك.. اسمع .....
هي بعد الي صار مشاعرها تجاهي اتغيرت وحتى كرهتني .. لانها متصوره انه هي بالنسبه الي مجرد صفقه مو اكثر.
لذلك مداتطيق حتى اتشوفني واني داالاحظ نظرة الكره والحقد بعيونها كل مره اباوعلها .

يمان .. اهاااا .. زين والحل؟!!

نورالدين .. الحل واحد وبس .. لازم اخليها ترجع اتحبني.

يمان .. سهله هاي .. جيبلها كم هديه غاليه ع كم الف قطعة ملابس .. لو اكلك اخذها للسوك تشتري ملابس وهالسوالف صدكني بس ترجعون هي تجي تصالحك هن النسوان يموتن ع السوك والملابس وكم كلمه حلوه هم لتنسى.

نورالدين .. تصدك انت غبي .. واني اغبى منك لان كاعد احجيلك واطلب منك مساعده.

يمان .. لك بابا والله دااحجي صدك جرب وشوف واذا ما رجعت علاقتكم عاتبني.

نورالدين.. انت متعرفها لسدن .. سدن غيييير ........!
كل فلوس الدنيا متغريها اني اعرفها كلش زين .. اصلاً سبب كرها الي انها تعتبرني اشتريتها بفلوسي .. واني اريد اثبتلها العكس.

يمان .. لعد شنوووو الحل فهمني ترى انسطرت.

نورالدين .. اثبتلها حبي وغلاتها عندي .. هو هذا الحل.

يمان .. واشلون تثبت حبك بلا؟!

نورالدين .. مااعرف .. هو هذا الي مدوخني .. اني ما اعرف بهالسوالف لذلك دااطلب مساعدة خبراتك السابقه كونك موسوعه بحالها.

يمان .. ههههههه والله انت قديم .. يمعود ترى اني فقير انتو ماخذين عليه نظره مو زينه.

نورالدين .. يمان بلا سوالفك وشقاك اتساعدني لو لا؟!!

يمان .. هههه ماشي ماشي بس لتعصب واني الي اكدر عليه مااقصر لتخاف .. بس هااااا لتحجي كدام لارين بهذا الموضوع اتعصب وبعد شيراضيها.

نورالدين .. طاح حظك لك انت رجال لو طرطور اتخاف من مرتك.

يمان .. هه ع اساس انت شلونك مو جاي تطلب مني اساعدك .

نورالدين .. اني اريدك تساعدني ارجعها تحبني مو لاني خايف منها حاول تفتهم شنو احجي لا اكسرلك راسك المصدي هذا.
ولتضل كل شويه مان عليه ومعيرني افتهمت لو لا .

يمان .. عمي دااتشاقه ويااااك اشبيك سحبت عليه .. صلي ع النبي ابو النور.

نورالدين .. اني صاعد انام وباجر الصبح الكاك قبلي بالشركه وعود هناك نحجي.

يمان .. ماشي اخذ راحتك ..

نورالدين .. تصبح ع خير ..... عفته وصعدت للغرفه فتحت الباب هي بالغرفه من شافتني راحت للصاله واتمددت ع التخم!!
دخلت وسديت الباب رحتلها للصاله وكفت بالفتحه الي بين غرفة النوم والصاله وبصوت حاد .

_ كومي اريد احجي وياج.

سدن .. ما عندي حجي وياك.

نورالدين .. بنفاذ صبر دااكول اني اريد احجي كومي .

سدن .. مااريد احجي وياك.

نورالدين .. مشيت بتجاها بسرعه وغضب جريتها من ايدها ورفعتها وكفت ع حيلها .. بصوت حاد وغاضب من بين اسناني ..

_ لما تشوفيني متساهل وياج لتستغلين هالشي وتتمادين ترى صبري اله حدود واذا نفذ صدكي انسى انتي منو وشنو بالنسبه الي.

سدن .. الانزعاج كان مرسوم ع كل ذره بملامحه وعيونه مليانه غضب .. كان لازمني من ايدي بقوه بحيث حسيت اعضام ايدي دتتكسر نبرة صوته هادئه بس عباره عن بركان يغلي الكلمات تطلع حمم ملتهبه من بين اسنانه .. الظاهر هالمره حيل اتماديت .. بصوت مرتبك وخايف ..

_ايدي .. ايدي دتأذيني.

نورالدين .. اول واخر مره لما احجي تعوفيني وتكومين سواء كدامهم او لحالنه .. اذا اسكت ع تصرفاتج الغبيه وكلامج الي اكبر من عندج مو معناها تلبسيني انتي متعرفين اني شنو اكدر اسوي بيج .. ودينج متتخيلين اذا استفزيتيني شنو راح تشوفين!!
سكتت هوااااي وخليتج ع راحتج كلت حقها لان اتزوجتها بهالظروف خليها تهدأ .. غلطتي .. اتجاوزتي .. اتجاهلتي .. استفزيتي .. اسكت واعبر .. بس متحترميني كدام الناس لااااااا لهنا واكسر راسج.

سدن .. كلامه شرر يتطاير بوجهي واعصابه مشدوده وشريان برگبته ناط حسيته حينفجر .. وجهه غاضب بملامح مظلمه !
من خوفي من شكله المرعب وكلامه الغاضب نسيت حتى وجع ايدي بقيت صافنه عليه واباوعلع بصدمه!'

نورالدين .. خليني اوضحلج شي للمره الاولى والاخيره وبعد مااعيد الكلام .. سبب زواجي منج بهالطريقه انتي..
انتي الي جبرتيني اخذج غصب عنج واعقد عليج .. واذا تتذكرين اشكد حاولت اقنعج وبكل الطرق انو نرتبط مقبلتي .
ولتكولين بسبب الي صار وموضوع يمان .. لان اني قبل لا يصير الحادث وسالفة يمان اتقدمتلج واكثر من مره وطلبتج من ابوج ومن اخوج وحتى منج ومفاد عاندتي وكل تفكيرج اريد اشتريج بفلوسي وهذي سوالفج الغبيه.
اشوكت تفهمين الفلوس متعنيلي شيييي !!
اشوكت تفهمين اني احبج وميت بيج ؟!
اشوكت تقتنعين انو التراب الي تمشين عليه اغلى عندي من كنوز الدينا اشووووووكتتتتت؟!!
فهميني هذا العناد شنو الي براسج .. ؟!
ليش رافضه تصدكيني .. ليش متثقين بيه؟!
اذا ع مود موضوع يمان فحقج واني غلطت واعترفتلج انيييي غلطت .. شسوي بعد؟!
مو كافي سنتين ضاعت من عمري وعمرج؟'
مو كافي سنتين عذبتيني ببعدج؟!
مو كااااافييييييي .. ترى الي سويتي انتي اتخطى بمراحل غلطتي وياج.
انخطبتي الاخويه وكنتي راح تتزوجي وانتي تعرفين كلش زين شنو يمان بالنسبه الي وشنوووو مشاعري تجاهج!!
كنتي راح اتخليني اكره اخويه وتخونيني بمشاعري تجاهج.
عذرتج وكلت ميخالف اني غلطان واتحمل .. سنتين عفتج تنسين الي صار ورجعت اعتذرتلج وكلتلج احبج وباقي ع حبي الج .. رحتي بنفس اليوم انخطبتي من هذا الكلب وارتبطتي بي.
مو كافي مشبعتي انتقام .. مبردتي غليلج ترى كل يوم دااموت اني بعذابي وياج.
انتي كدامي ومااكدر حتى احجي وياج كلمه حلوه .. مااكدر حتى اسألج اشلونج.
كل هذا اتركي وكل هذا متقبله منج ومستعد انسى وابدي وياج من جديد بس فهميييينييييي الي تردي شنوووووو شنووووو واني اسوي.

سدن .. ملامحه هذي وعصبيته ذكروني باليوم الي اجه وترجاني بي مااقبل بيمان!!!
نفس الاحداث دتعيد نفسها بس هالمره بمشاعر اقوى واصدق .. كنت حاسه بكل كلمه يكولها
گلبي واني اشوف العجز والرجاء بعيونه كان يحترك .. ينمرد .. بس عقلي وكبريائي الحقير منعوني حتى اظهرله اي رحمه.
سكتت وباوعت بعينه بكل تحدي ... بصوت حاد ونبره واثقه ...

_اتريد تعرف شنو الي اريده؟!!!

نورالدين .. اي .

سدن .. اريدك اتموت .. اتموت وتختفي من حياتي هذا الشي الوحيد الي ممكن يخليني اسامحك.

نورالدين .. كلماتها طلقات اتجمعت بگلبي .. كنت متأمل بعد كل الي كلته تحن وتلين .. بس الظاهر اني مااعرفها لهذي المخلوقه .. الظاهر اني كنت متوهم بيها ... تركت ايدها بهدوء وبصوت بارد خالي من اي مشاعر ..

_تمام .. اعتبريني متت .

للحكايه بقيه 💔
باجر ينزل بارت ثاني
رأيكم بالاحداث وتوقعاتكم للبارت القادم
لتنسوون التصويت