رواية ﮼صفقة ﮼عشك الفصل الخامس عشر 15 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

يمان .. شنو قصدك مفهمت؟!!

نور الدين .. لانك كلما اتشوف سدن تسحل روحك لحد مراحت  رجليك.

يمان .. خرب عقلك اي والله هسه عاد خلي يروح اخوها واحجي مو كدامه شيكول عليه يزحف لاختي.

بسام .. ههه لا حشاك يمان اكيد الباشا ديتشاقه وياك.

سدن .. بلا هذا شديحس يحجي هشكل!!
خلاني اشك بروحي الا اشويه كنت راح اظن اني الي دعمته ليمان وسويت بي هالشكل.

نورالدين ... بعد الي صار بينا بالمستشفى وكلامها المستفز بوقتها فقدت اعصابي ومديت ايدي عليها.
وكانت اكثر مره احس بيها بالندم ع شي سويته بكامل ارادتي!
ولو احساس الندم ملازمني من حادث يمان .. بس الله شاهد انه ما كانت نيتي أأذي احد بوقتها .. مو انوب أخويه!
المهم ..
عافتني وراحت بسرعه حتى محجت شي ولا جرحتني بكلام بعد ما ضربتها ولا حتى باوعتلي بس لمحت عيونها غوركت بالدموع ، دارت وجهها وراحت ..!
اني هم كنت مقهور وقلق ع يمان ومعصب منها .. فمهتميت الها لان كل عقلي وتفكيري يم اخويه ..بقيت يمه اتابع وضعه خاف يحتاج شي !
الظهر تعبت حيل فالاطباء والمساعد مالتي نصحوني انو اروح للبيت اورتاح!
بالبدايه رفضت اترك يمان بس بعدين يمان اصر انو اروح ارتاح .. وحتى لينزعج يمان فعلاً رحت للبيت !!
طلعت من غرفة يمان شفت جنطه مدرسيه بالممر مشموره!!!!!!!
معقوله اتكون نست جنطتها !!
صفنت عليها وابتسامه غصب عني انرسمت ع وجهي .. اخذت الجنطه خليتها بالسياره وطلعت بوجهي للبيت.
غسلت وغيرت ملابسي اشويه ارتاحيت .. كلت انام اشويه والعصر ارجع للمستشفى .. بعدني هستوني غفيت .... رن موبايلي!!!!!
باوعت زيد ديتصل!!
اهوووو اكيد هذا يريدني امر للشركه والله بطران .. مديت ايدي جريت الفون سويته سايلنت ونمت...'
كعدت العصر كلش كمت سويتلي كوب قهوه حتى اصحصح لانه راسي يريد ينفجر من التعب!
بعدها بدلت وطلعت .. فتحت الفون اريد اشوف زيد شعنده يتصل واذا اشوف رقمها بالمكالمات الفائته ... و مسج هم منها...!!

فتحت المسج كاتبتلي نسيت الجنطه بلكي اتشوف احد يجيبها محتاجتها ضروري!!
احد يجيبها؟!!
اتريد ادزلها جنطتها بيد واحد و يشوف عيونها ؟!
كلمة دز واحد يجيبها عصبتني بلا سبب!
اشكد كنت متندم لان ضربتها .. مسجها هذا خلاني اريد اشرب من دمها رغم انو كلامها ما بي اي غلط ..
عقلي كان يعرف كلامها طبيعي .. هي مو حكر الي!
واني مو الوحيد الي شايفها واشوفها ..!
بس گلبي متقبله احسه قفل لحظتها .. لييييشششش ماادري
زين اذا اخوها شاف الجنطه بيد هذا الواحد مراح يسألها وين كانت جنطتج!!
اكيد هذي مو بوعيها لما كتبت المسج .. شكله الراشدي (الكف) أثر ع عقلها.
واني بقمة الغضب .. تمام طلباتج اوامر.
فكرت اروح بنفسي انطي لجنطه الاخوها واكله اليوم اختك نستها يمي .. بس خفت يأذيها .. قررت ادزها بيد محمود سايقهم حتى اخاف تصحى من غبائها فتكدر تتلافى الموضوع وتكول نسيتها بالسياره
فعلاً اتصلت بمحمود واخذلها الجنطه كلتله تنطيها لاخوها بسام واذا سألك اتكوله نستها بالسياره.
اخذها محمود ومسألت بعدها .. ولا عرفت شي عنها لان التهيت بيمان وعلاجه !
الاطباء كالو ماعنده اي مشكله بأعضائه ما عدا اشوية جروح وخدوش .. و اصابة العمود الفقري وهذي متتعالج!
بس لازم يسوي علاج طبيعي حتى ليصير ضمور بعضلاته ..!
بقى يمان اسبوعين وطلع من المستشفى !
بين علاجه وبين الشركه ضاع اغلب وقتي .. بس هي مطلعت من بالي .. شكلها و الدموع بعيونها عذب گلبي !
اكثر شي اكرها بحياتي شخص احبه يتأذه بسببي .. وهذولي اعز اثنين اني أذيتهم!
يمان اخويه وهي ...
يمان صار مقعد بسببي .. وهي قسيت عليها وحملتها مسؤولية شئ ما لها ذنب بي!
رفضها الي من حقها واني كان المفروض اتقبل هذا الرفض من البدايه وانسحب.
حتى وان كنت احبها .. حتى وأن كنت اعشقها .. حتى وان كنت اتنفسها.. مووووو سبب هذا يخليني اعصب وسوي الي سويته !
وبعدها خليت الصوج براسها وعصبت عليها .. رغم انو هي اصلاً مكانت تعرف سبب حادث يمان شنو!
كرهتها ، جرحتها وضربتها بلا سبب .

اوووووووف اشلون بهاي الافكار .. اشلوووون اخلص منها ...!
كل يوم يمر اشتاقلها اكثر .. شوفتها اتمناها اكثر واكثر ... الى ان نفذ صبري خلص!
لازم اشوفها .. ولازم هي تجي بنفسها لانه بعد الي سويته مااكدر اروحلها برجلي اكيد مراح تتقبل اتشوفني !
اني كنت ناوي اول ميطلع يمان من المشفى اسوي حفله على سلامته ومااخلي شخص مااعزمه دفعان بلا لراس اخويه.
فضربت عصفورين بحجر .. عزمت اخوها وكتبت بالبطاقه الدعوه عائليه.
مع ذلك ممتوقع اخوها يجيبها لانه حقير نوعاً ما .. بس خليها ع الحظ وانشوف.

فعلاً تمت الحفله واجو كثير ناس من كل المناصب والطبقات .. وكفت من الشرفه اتفحص الوجوه عسى ولعل تجي واشوفها ..!
ومثل متمنيت الامنيه لاول مره تتحقق ... لمحتها دخلت هي واخوها ..!
بملامحها الهادئه وعيونها الأخآذه .. كانت تشع من بين الكل .. مااعرف عيوني الي ميزتها عن الموجودين.
بقيت اتفحصها وأتأمل حركاتها بدون متدري دقايق مرت واني هايم بيها .. الى ان التفتت وشافتني!!!!
درت وجهي بلا اهتمام .. لانوو مهما يكون هي رفضتني .. مو سهله اذل نفسي واحسسها انو الي سوته بسيط.
بعدين نزلت سلمت اني ويمان ع الحضور .. اخوها جابها واجه يسلمون علينا .. كل خطوه تقترب مني گلبي احسه يطلع من صدري بقوه .. سلم اخوها عادي وهي هم سلمت مرديت عليها ..
بس أومئتلها براسي .
غريبه مشاعرنا لدرجة نعامل الي انحبهم بكبرياء وعدم اهتمام .. واحنا صدورنا مشتعله من الاشتياق.
حسيتها انقهرت من تصرفي .. وعيونها هم دمعت!!!!
ردت احجي وارد على سلامها حتى متنجرح مني .. بس يمان سبقني وكام يتغزل بيها...!!!
هذا الشي خلاني انجنننننن ع الاخير .. بس بلا ما ابين شي.
كنت من الخارج هادئ جداً وطبيعي .. بس بداخلي بركان يريد ينفجر!
كلام يمان احسه خنجر ينخر بگلبي .. ومع ذلك ما اكدر اسوي شي.
والمصيبه هي اتجاوبت ويا .. كامت تحجي ويا وتتشاقه ولا كأنو احد واكف حتى اخوها محسبتله حساب!
بلحظة غضب كلت اليمان انو هي سبب الي هو بي هسه!
وهذا الشي خلا نظراتها ونظرات اخوها ويمان تتوجه اليه بتعجب واستغراب!!!!!!!
بس اني بسرعه اتداركت الموضوع!
بقى اخوها ويمان يضحكون .. بس هي اتباوعلي بنظرة حقد مااعرف غضب .. نظره شخص يريد ينتقم .. شكلها من تعصب يخليني ابتسم لا ارادي.
هي الظاهر متحملت الموضوع .. استأذنت من اخوها اتروح للحمام!
بقيت اني واكف يمهم هم يحجون واني عقلي يمها ..!
اترخصت منهم ورحت وراها ... بقيت انتظرها بباب القاعه .. بعد كم دقيقه طلعت بس عيونها حمر!!!!
من شافتني ارتبكتب وملامحها عصبت اكثر!
مشيت بتجاها كم خطوه .. وبصوت هادئ سألتها ..

_ اشبيهم عيونج؟!

سدن .. طول ما احنا واكفين هو بس يسمعني كلام يغث .. احس كلامه سهام موجه الي ورغم حاولت بكل الطرق احجي ويا يمان واتشاقه حتى اقهره بس ماكو فايده كان يرد على تصرفاتي وكلامي بتجريح اقوى ..  عصبني حيل وقهرني حيل مكدرت اتحمل رحت للحمام و بلا ارداة مني بجيت .. شنو هذي الدموع الي صايره هالايام تنزل ع كولشي!
وين سدن القديمه!!
سشوه بيه هذا .. اني الي عمري مبجيت غير ع ماما يجي هذا يبجيني!!
لا والله ما عاش .. غسلت وجهي وطلعت والصدمه لكيته واكف كدامي!!!
الظاهر كان واضح عليه كنت ابجي لان اول ما شافني سألني ع عيوني اشبيهم!!
مجاوبته ولا اهتميت .. دنكت راسي ومشيت .. چان يوكف بطريقي وهو ما شاء الله مو ضخم!!

رفعت راسي باوعتله بغضب ... وخر عن طريقي.

نورالدين .. تمام جاوبيني واخليج ترحين بطريقج.

سدن .. مبيهم شي .

نورالدين .. لعد ليش صايرات حمر؟!!

سدن .. بصوت حاد وعالي .. وانت شعليك عيونك لو عيوني هم؟!!
حمر خضر صفر .. انتتت شكووو .

نورالدين .. بأبتسامه هادئه ... فدوه يرحون عيوني وصاحبهم لعيونج.

سدن .. كلامه نار واشتعلت بگلبي احس گلبي مثل الي اتقلص ما اعرف انقبض مااعرف شنووو .. شعور ممجربته حلو ومؤذي بنفس الوقت .. صفنت بوجهه بس الدموع احسها دتتجمع بعيوني .. انت لويش دتسوي بيه هشكل!!!!!

نورالدين .. اااااااه سدن اااااااه .
اعرف اني غلطت بحقج .. واعرف قسيت عليج بس صدكيني غصب عني كنت متشتت ومقهور على يمان .. اذا سمعتي فأني الي كنت سبب بألي صارله وهذا الشي مو سهل ابد يمان اخويه الوحيد .. اتخيلي نفسج تكونين السبب بتدمير حياة اخوج الي هو كل شي بحياتج!
ظروفي الي مريت بيها جداً قاسيه وما اتمنى لاي أحد يعيشها .. بس هذا مو مبرر انو أأذيج .. لذلك اني اسف بكل ذره بيه واعتذر .

سدن .. يا ربييي هذا هوايه ... مااكدر هيج !
بقيت صافنه بوجهه .. سارحه بملامحه الرجوليه .. صوته الحاد .. الهدوء الي بكلامه ... بكل ما للكلمه من معنى حبيته.
ايييييييي .. اذا كان الحب رجفة ايد .. ونبضة گلب مجنونه .. وعيون هايمه ومشاعر مرتبكه .. والاعظم من هذا امان وحنان ..... فأني احبه لهذا الكائن .
بس مع ذلك ما لازم اضعف واعترف بسهوله .. خلي يتعذب اشويه يلا اكوله وخليني اتأكد من صدقن ومشاعره يلا ابوح.
جريت نفس بهدوء ..

_ تمام مسامحتك بس محنسى الي سويته.

نورالدين .. موافق لتنسين .. بس اهم شي متنقهرين ولا عيونج تدمع بسببي.

سدن .. اوك اكدر اروح هسه لو اكو شي بعد مكلته!

نورالدين .. بأبتسامه هادئه ... احبج.

سدن .. بسرعه مشيت من يمه بس احس گلبي حيوكف من كالي هذي الكلمه ممتوقعه اسمعها منه نهااااااائياً رغم هو هواي لمحلي لهذا الموضوع بس ابد مكالي هذي الكلمه بصريح العباره!
دااحس هذا الشخص مو نفسه نورالدين الي قبل كم اسبوع شفته بالمستشفى!
رجعت للحفله وكولشي مر تمام .. هو بقى طول الوقت عينه عليه !
ولما احجي ويا يمان او اسلم ع شخص يباوعلي بنظره مخيفه!
امممممممممم شكله جبل الجليد يغار!
يااااااااي شنو هالشعور الي دااعيشه هذا!
خلصت الحفله ورجعنا للبيت ..

بسام .. نورالدين منزل عينه عنج طول الوقت؟!!

سدن .. منتبهت وبسام شدتحجي انت؟!

بسام .. اممم شكله واكع الافندي .. اي واخيراً راح يصير الي ابالي.

سدن .. انت مو طبيعي .. اروح انام احسن.
اول مره اشوف اخ حقير هشكل .. يكولي يباوع عليج ومفتخر العار.
لو عندك ذرة غيره كان مكلت هالكلام اصلاً مو فرحان ع بالك منتصر.
اووووف يا ربي ملكيت غير هالبسام تسوي اخويه !!
استغفر الله لا اعتراض ربي بس انت اعرف بالحال.
بدلت ونمت .. الصبح كعدت بدلت وطلعت للمدرسه .. چان اشوفه واكف بسيارته !!
هههههه واخيراً رجعت حليمه مدري حميده لعادتها القديمه !!
وصلني للمدرسه وراح .. من طلعت هم لكيته موجود .. صعدت ويا محمود ورحنا للبيت ...
وصلني وراح داادخل للبيت چان يصيحلي !!!
التفتت لكيته واكف كدام بيتنا ومرتكي ع سيارته .. كلتله روووح منا عالم ليشوفوك.

نورالدين .. تعالي كلت.

سدن .. عفيه الله يخليك روح لتسويلي مشكله لو يجي بسام ويشوفك.

نورالدين .. تجين انتي لو اجيج اني بنفسي !

سدن .. استغفر الله نورالدين الله يخليك روووووح ليجي بسام.

نورالدين .. مشيت بتجاه بيتهم كم خطوه صرت كدام بابهم .. بصوت هادئ .. اولاً مساء الخير .. وثانياً مشتاقلج .. وثالثاً .. مراح اروح الي تسوين الي اريده.

سدن .. شنو الي تريده كول عفيه قبل ليجي بسام ويسويلي كارثه.

نورالدين .. اريدج تجين وياي نتغده وارجعج.

سدن ... شدتحجيييييييي انت اتخبلت .. وين اجي وياك هسه يجي بسام وميلكاني غير يذبحني!

نورالدين .. بسام مموجود سافر اليوم عنده صفقه وميجي غير بالليل.

سدن .. لا عيني مااروح مثل هذيج المره هم كلت مسافر وانوب طلعلي فوك راسي .

نورالدين .. ههههه لا هذي المره غير صدكيني.

سدن .. لاااا يعنييييي لا وروح منا ليجي ويشوفك.

نورالدين .. وميجي شنو يعني خايف منه!

سدن .. اني الي خايفه مو انت بس روووح.

نورالدين .. خطوه وحده مااتحرك منا اذا متجين وياي.

سدن .. يا ربي انت تريد اتموتني .

نورالدين .. بحده ..اااااشششششش .. لتحجين هذا الكلام كدامي .

سدن .. اوك مااحجي بس روح.

نورالدين .. شوفي مااحب اعيد الكلام وانتي خليتيني اكرر الف مره .. امشي اصعدي السياره وخلي انروح على عنادج هذا كان رحنا واجينا.

سدن .. مااروح .

نورالدين .. متأكده؟!!

سدن .. اي متأكده.

نورالدين .. تمام.
درت وجهي ومشيت .. بعدني مصاعد للسياره .. چان اتصيحني.

سدن .. لحظه .

نورالدين .. التفتلها .. بس محجيت شي.

سدن .. اكيد بسام ميرجع.

نورالدين .. اأومئتلها بهدوء .

سدن .. اوك بس ما اتأخر.

نورالدين .. تمام.

سدن .. صعدت ويا بالسياره .. واخذني ع مكان يجنن .. هو مطعم بس يحاوطه مثل النهر مااعرف ع جرف نهر .. فد شيييي يجنن بس بالاحلام عايشته!
اتغدينا وسولفنا .. مخله شي مشترى الي .. اكل ..حلويات عصائر .. كرزات .. بطني حسيتها حتنفجر!
يوم من صدوك انحسب من عمري .. اتونست بي ونسه مو طبيعيه .. بعدها اخذني فرني بالسياره كالي ننزل اشتريلج شي من المحال كلتله مااريد شيييي بس رجعني للبيت!
رغم اصراره بس اني موافقت وهو هم محب يجبرني .. كملت الطلعه ورجعني للبيت!
وصلني وراح .. بدلت ونمت .. كنت فرحانه وبنفس الوقت خايفه كأني مسويه جريمه واخاف تنكشف!

كعدت العصر قريت اشويه ومتعشيت لان كنت احس معدتي مليانه بس سويت كابتشينو وكعدت اقرا .... لليل كولش اجه بسام!!

بس ملامحه كانت مو طبيعيه ومعصب ... اول ما دخل وشافني جرني من شعري عاط بيه !!

بسام .. لج اليوم انهيج اليوم اقتلج خلاص .

سدن .. بسام اااااخ دتأذينييييي شكووو شمسويه اشبيك بسااام اااخ.

بسام .. شمسويه؟!!
متدرين شمسويه ؟!
اليوم وين چنتي ويامن طالعه!!!!!!!!!!!
للحكايه بقيه 💔

مرحبا حبايبي
اعتقد اني اتفقت وياكم حنزل كل يومين بارت بس حيكون قصير والاغلبيه وافقت على هذا الشي فما الها داعي كل مينزل بارت اتكولون قصير ترى مليت من هالكلمه
رجااااااااءاً لحد يكول البارت قصييير لانه اكثر من ١٩٠٠ كلمه ولحد يكول ماكوووو احداث لانوووو دا اسلسلهاااااااا
وبالنسبه للي يكولون نفس مسلسل تركي مااعرف شنوووو احب اكوللكم انو ماكو هيج شي لا ايلين ولا غيرها قصه مختلفه تماماً واحداثها حتكون صدمه وعد 🙂😌
رأيكم بالاحداث وتوقعاتكم للبارت القادم 😒
لتنسووووووووووون التصووووووووييييييييييتتتتت حتى ينزل البارت بسرعه 🙋🏻‍♀️🚶🏻‍♀️